ဖြေရှင်း၍မရသော ဖန်ဆင်းရှင် နတ်ဘုရား စွမ်းအား
Vol. 82 Ch. 861
ထန်ထျန်းနှင့် ကျွင်းချန်ချင်းတို့ကြားမှ တိုက်ပွဲမှာ ရုတ်ခြည်းဆိုသလိုပင် ပေါက်ကွဲထွက်လာခဲ့သည်။
အလွန်ပင် ရုတ်တရက် ဆန်လှ၏။
သို့သော် ဤသည်မှာ ထန်ထျန်း တမင်တကာ လုပ်ခြင်း ဖြစ်သည်။
ဤအတောအတွင်း သူက ကမ္ဘာ့အရှင်ထံမှ လျှို့ဝှက်ချက်အားလုံးကို သိရှိထားပြီးဖြစ်ရာ သူ့လက်ဝယ်ရှိ သတင်းအချက်အလက်မှာ ကျွင်းချန်ချင်းထက် ပို၍များနေကြောင်း သိထားသည်။
သူက အပိုစကားများစွာ ပြောဆိုနေခြင်းဖြင့် ကျွင်းချန်ချင်းအား တစ်စုံတစ်ခု ရိပ်မိသွားစေရန် မလိုလားပေ။
ဤကဲ့သို့သော ပုဂ္ဂိုလ်မျိုးကို ရင်ဆိုင်ရာတွင် အလွန်အမင်း သတိထားရန် လိုအပ်သည်။
ထို့ကြောင့်ပင် သူက မဆင်မခြင် တိုက်ခိုက်တတ်သော လူငယ်တစ်ဦးကဲ့သို့ ပြုမူကာ စသည်နှင့် တိုက်ရိုက် လက်ဦးမှု ရယူခဲ့ခြင်း ဖြစ်သည်။
ဤဖြစ်စဉ်အတွင်း၌ လင်းရင်အတွက် အကောင်းဆုံး အခွင့်အရေး ဖန်တီးပေးနိုင်မည့် အချိန်ကို ရှာဖွေရန် သူ လိုအပ်သည်။
ကျွင်းချန်ချင်း၏ တားမြစ်တာအို ကို ဖျက်ဆီး ပြီးနောက် ထန်ထျန်း၏ ရိုးရှင်းသော လက်သီးတစ်ချက်မှာ သူ၏ မျက်နှာဆီသို့ တည့်တည့် ကျရောက်သွားခဲ့သည်။
ဤသည်မှာ သန့်စင်သော ခန္ဓာကိုယ် ခွန်အားသာ ဖြစ်၏။
သို့သော် ကျွင်းချန်ချင်းမှာ ပျာယာခတ်သွားခြင်း မရှိပေ။ ထိုသတ်ဖြတ်လိုခြင်း အဟုန်ပြင်းသော လက်သီးကို ရင်ဆိုင်ရာတွင် သူက လက်ညှိုးကိုသာ ဆန့်ထုတ်လိုက်သည်။
ကောင်းကင်ချုပ်နှောင်လက်ညှိုး က ချက်ချင်းပင် ဆင်းသက်လာခဲ့၏။
တားမြစ်တာအိုနှင့် မတူသည်မှာ ကောင်းကင်ချုပ်နှောင်လက်ညှိုးက ဟင်းလင်းပြင် ကို ပစ်မှတ်ထားခြင်း ဖြစ်သည်။
ချက်ချင်းဆိုသလိုပင် ထန်ထျန်းနှင့် ကျွင်းချန်ချင်းကြား၌ မရေမတွက်နိုင်သော ဟင်းလင်းပြင်များ ဖြစ်တည်လာခဲ့ရာ နှစ်ဦးသားမှာ အလွန်နီးကပ်နေသကဲ့သို့ ထင်ရသော်လည်း အမှန်တကယ်တွင်မူ ဝေးကွာလွန်းသော အကွာအဝေးတစ်ခုက ခြားနားထားသကဲ့သို့ ဖြစ်သွား၏။
ဤသည်မှာ သာမန် ခန္ဓာကိုယ် ခွန်အားသက်သက်ဖြင့် ဖျက်ဆီး နိုင်သော အရာမဟုတ်ချေ။
တားမြစ်တာအိုနှင့် ကောင်းကင်ချုပ်နှောင်လက်ညှိုး ပေါင်းစပ်လိုက်ခြင်းက ကျွင်းချန်ချင်းအား ပြိုင်ဘက်ကင်း အနေအထားသို့ ရောက်ရှိစေသည့် အဓိက လက်နက်များ ဖြစ်ကြသည်။
ကံဆိုးသည်မှာ သူ ရင်ဆိုင်နေရသူမှာ ပို၍ ဆန်းကြယ်လှသော ထန်ထျန်း ဖြစ်နေခြင်းပင်။
ကောင်းကင်ချုပ်နှောင်လက်ညှိုး ပေါ်လာသည်နှင့် တစ်ပြိုင်နက် ထန်ထျန်းက ခန္ဓာကိုယ်အတွင်းရှိ စွမ်းအားများကို ထပ်မံ လှုံ့ဆော်လိုက်ရာ သာမန် အခြေအနေမှနေ၍ အထွတ်အထိပ် အခြေအနေသို့ ချက်ချင်း ပြန်လည် ရောက်ရှိသွားသည်။
အနန္တတာအိုနိယာမ နယ်မြေ ကလည်း တစ်ဆက်တည်း ပေါ်ထွက်လာခဲ့၏။
ထိုမရေမတွက်နိုင်သော ဟင်းလင်းပြင်များက အနန္တတာအိုနိယာမနယ်မြေ ၏ ဖိနှိပ်မှုအောက်တွင် ဖြစ်တည်လာပြီးချက်ချင်းပင် တိုက်ရိုက် ကြေမွသွားခဲ့ရာ ကျွင်းချန်ချင်း၏ ခန္ဓာကိုယ်မှာ ထန်ထျန်း၏ ရှေ့မှောက်သို့ ပြန်လည် ပေါ်ထွက်လာခဲ့သည်။
သူတို့နှစ်ဦး၏ ပညာရပ်များမှာ တစ်ဦးကိုတစ်ဦး အပြန်အလှန် ချုပ်ကိုင်ထားကြသည်ဟု ဆိုနိုင်သည်။
ဤသို့သော အခြေအနေမျိုးတွင် မည်သူက အခြေခံ အုတ်မြစ် ပို၍နက်ရှိုင်းသလဲ၊ မည်သူက ခွန်အား ပို၍ကြီးမားသလဲ ဆိုသည်အပေါ်၌သာ မူတည်တော့သည်။
သိသာထင်ရှားသည်မှာ ထန်ထျန်းက တစ်ကျော့ပြန် အသာစီး ရသွားခဲ့ပြန်ပြီ ဖြစ်သည်။
ဤမျှ နီးကပ်သော အကွာအဝေးတွင် ကျွင်းချန်ချင်းက တားမြစ်တာအိုကို ဆက်လက် အသုံးမပြုနိုင်တော့ချေ။
အခြားနည်းလမ်း မရှိတော့သဖြင့် သူက ကိုယ်ကို ရှောင်တိမ်းကာ ထန်ထျန်း၏ လက်သီးကို ရှောင်လိုက်ရတော့သည်။
ကနဦး တိုက်ခိုက်မှုတွင် ထန်ထျန်းက အသာစီး ရရှိသွားခဲ့ရာ အချိန်မြစ်အတွင်းကထက်ပင် ပို၍ မြန်ဆန်လှသည်။
"ဟဲဟဲ... "
"ဒါလား မင်းပြောတဲ့ ဘယ်သူမှ မတားဆီးနိုင်ဘူးဆိုတာ"
ထန်ထျန်းက အေးစက်စွာ လှောင်ပြောင်လိုက်ရင်း ကျွင်းချန်ချင်း၏ နောက်သို့ ထပ်ကြပ်မကွာ လိုက်ပါကာ ဆက်လက် တိုက်ခိုက်လိုက်သည်။
ကျွင်းချန်ချင်း၏ ခွန်အားမှာ အမှန်တကယ်ပင် အထွတ်အထိပ်သို့ ပြန်လည် ရောက်ရှိနေပြီဖြစ်ရာ အရင်ကထက် အဆပေါင်းများစွာ ပို၍ သန်မာလာခဲ့သည်။
သို့သော် ထန်ထျန်းကိုယ်တိုင်၏ တိုးတက်မှုမှာ ပို၍ပင် ကြောက်မက်ဖွယ် ကောင်းလှ၏။
ဤသည်မှာလည်း သုံးစွဲမှုအမှတ်များ အကုန်အစင် စုပ်ယူပြီးသည်နှင့် သူက ကျွင်းချန်ချင်းကို ချက်ချင်း လာ ရှာရသည့် အကြောင်းရင်းပင် ဖြစ်သည်။
ကျွင်းချန်ချင်းတွင် အခြားသော ခွန်အားမြှင့်တင်နည်းများ ရှိနေမည်ကို သူ မသေချာသောကြောင့်ပင်။
အချိန်ဆွဲလေလေ၊ ပြောင်းလဲမှုများ ရှိလာနိုင်လေလေ မဟုတ်ပါလော။
မည်သို့ပင်ဆိုစေ၊ ခုနက တိုက်ခိုက်မှုအရ သာမန်နည်းလမ်းများကိုသာ သုံးမည်ဆိုပါက ကျွင်းချန်ချင်းမှာ ယခင်အတိုင်းပင် သူ၏ ပြိုင်ဘက် မဟုတ်ကြောင်း ထန်ထျန်း ခံစားမိသည်။
တိုက်ခိုက်မှုများမှာ အကြားအလပ်မရှိ ပြင်းထန်လှ၏။
ဖန်ဆင်းရှင် ကောင်းကင်တိုင်၏ ထိပ်ဖျားမှာ အလွန်ပင် ကျယ်ဝန်းလှသော်လည်း နှစ်ဦးသား၏ ပုံရိပ်များမှာ နေရာအနှံ့တွင် တစ်ပြိုင်နက်တည်း ရှိနေသကဲ့သို့ ထင်မှတ်ရသည်။
သူတို့၏ အရှိန်မှာ မြန်လွန်းလှပေသည်။
အသက်ရှူကြိမ် အနည်းငယ်အတွင်းမှာပင် သူတို့က အကြိမ်ပေါင်း သိန်းနှင့်ချီ၍ ထိပ်တိုက် တွေ့ဆုံခဲ့ကြသည်။
ထိုအထဲတွင် ကျွင်းချန်ချင်းက ထန်ထျန်းကို ထိပ်တိုက် ရင်ဆိုင်ရန် ရွေးချယ်ခဲ့သည့် အကြိမ်များစွာ ပါဝင်၏။ အထွတ်အထိပ် ပုဂ္ဂိုလ်တစ်ဦးအနေဖြင့် သူ၏ ခွန်အားကိုလည်း လျှော့တွက်၍ မရနိုင်ချေ။
ကံဆိုးသည်မှာ အကြိမ်ကြိမ် ထိပ်တိုက်တွေ့ဆုံမှုများက ကိစ္စတစ်ခုကိုသာ သက်သေပြနေခဲ့သည်။
အစစ်အမှန် ခွန်အား အပိုင်းတွင် သူက ထန်ထျန်းကို မယှဉ်နိုင်ခြင်းပင်။
နောက်ထပ် ပြင်းထန်သော တိုက်ခိုက်မှု တစ်ခုအပြီးတွင် နှစ်ဦးသား ပထမဆုံးအကြိမ်အဖြစ် ခေတ္တ ခွဲခွာလိုက်ကြသည်။
သို့သော် သူတို့နှစ်ဦး၏ တည်နေရာမှာ အပြန်အလှန် ပြောင်းလဲသွားခဲ့ပြီ ဖြစ်သည်။
ထန်ထျန်းမှာ ဖန်ဆင်းရှင် ကောင်းကင်တိုင်၏ ထိပ်ဖျား၌ ရှိနေပြီး ကျွင်းချန်ချင်းမှာ အောက်ဘက်သို့ ရောက်သွားခဲ့၏။
စွမ်းအားများ ပြည့်ဝ နေဆဲဖြစ်သော ထန်ထျန်းကို ကြည့်ရင်း ကျွင်းချန်ချင်းက မျက်မှောင်ကြုတ်လိုက်သည်။
"မင်းရဲ့ ခွန်အားက တကယ်ပဲ အကျိုးအကြောင်းမဆီလျော်တဲ့ အချက်တွေ ရှိနေတယ်"
" မင်းက ဒီလောက်အထိ မသန်မာသင့်ဘူး"
သူက ပြော၏ ။
ထန်ထျန်းက ရယ်မောလိုက်ရင်း "မင်းက ဘယ်တုန်းကကတည်းက သူများနဲ့ အကျိုးအကြောင်း လာပြောနေတာလဲ"
" ပြီးတော့ ဒီကမ္ဘာမှာ အကျိုးအကြောင်း မဆီလျော်တာတွေ အများကြီးပဲလေ"
" ဥပမာ မင်းလို လူစားမျိုးက ဘာလို့ သက်ရှိတွေရဲ့ အမြင့်ဆုံး နေရာကို တက်လှမ်းနိုင်ခဲ့သလဲဆိုတာကို ဘယ်သူမှ နားမလည်ကြသလိုမျိုးပေါ့"
ထန်ထျန်း၏ ရိသဲ့သဲ့ စကားများအပေါ် ကျွင်းချန်ချင်းက တုန်လှုပ်ခြင်း မရှိပေ။
"ဒီကမ္ဘာက သန်မာသူတွေ ပိုင်တဲ့နေရာပဲ"
" သန်မာသူက အမြဲ သန်မာနေမှာဖြစ်ပြီး အားနည်းသူက အမြဲ အားနည်းနေမှာပဲ။ ဒါက အခြေခံအကျဆုံး နိယာမပဲ"
" ငါ ထိပ်ဆုံးမှာ ရပ်နေနိုင်တာက ငါ့ရဲ့ သန်မာချင်တဲ့ စိတ်ဆန္ဒက ဘယ်တော့မှ မပြောင်းလဲခဲ့လို့ပဲ"
ထန်ထျန်းက နှာခေါင်းရှုံ့လိုက်၏။
"ဒါဆို မင်းရဲ့ အဲ့ဒီ ယုတ္တိဗေဒအရဆိုရင် မင်း ငါ့စကားကို နားထောင်သင့်တာပေါ့"
" ဘာလို့လဲဆိုတော့ အခု ငါက မင်းထက် ပိုသန်မာနေလို့ပဲ"
" ဒါကြောင့် လက်လျှော့လိုက်ပါတော့ ချင်း လေး ရယ်..."
" မင်းအတွက် ရလဒ်ကောင်း ရှိလာမှာ မဟုတ်ဘူး"
ကျွင်းချန်ချင်း၏ အကြည့်မှာ တည်ငြိမ်နေဆဲပင်။
"မင်း ငါ့ကို တကယ်ပဲ အနိုင်ယူနိုင်ပြီလို့ ထင်နေတာလား"
ထန်ထျန်းက ပခုံးတွန့်လိုက်ရင်း "မဟုတ်ဘူးလား"
" မင်းကို အပြတ်မရှင်းနိုင်ရင်တောင် မင်းကို ဒီ ဖန်ဆင်းရှင် ကောင်းကင်တိုင်ပေါ်မှာ ထာဝရ ပတ်ချာလည်အောင် ငါ လုပ်ထားနိုင်တယ်"
" မင်း ငါ့ကို ဘာလုပ်နိုင်မှာလဲ"
ကျွင်းချန်ချင်းက ခေါင်းခါလိုက်သည်။
"မင်း အမှန်တရားကို သိတဲ့အခါ မင်းရဲ့ အခုလို အတွေးမျိုးက ဘယ်လောက်အထိ ရယ်စရာကောင်းလဲဆိုတာ မင်း နားလည်လာလိမ့်မယ်"
"ဒါပေမဲ့ အခုတော့ ဒီကစားပွဲကို အဆုံးသတ်ဖို့ ငါ စိတ်မကူးသေးဘူး"
" တော်တော်လေး စိတ်ဝင်စားဖို့ ကောင်းတာပဲ"
"မင်းက ကိုယ့်ကိုယ်ကိုယ် အရမ်း ယုံကြည်မှု ရှိနေတော့... အခု မင်းမှာ ဒီလို စွမ်းအားမျိုးကို ရင်ဆိုင်နိုင်မယ့် နည်းလမ်း ရှာတွေ့သွားပြီလားဆိုတာ ငါ ကြည့်ချင်သေးတယ်"
ပြောပြီးသည်နှင့် သူက လက်ကို ထပ်မံ မြှောက်လိုက်၏။
ထိုအခါ ကြက်သီးမွေးညင်း ထစရာ ကောင်းလှသော အော်ရာ တစ်ခုမှာ ဟိန်းခနဲ ကျဆင်းလာခဲ့သည်။
ထန်ထျန်း ချက်ချင်းပင် အာရုံစိုက်လိုက်သည်။
ထိုအရာက မည်သည့် နည်းလမ်းဖြစ်ကြောင်း သူ သိထားသည်။
ဖန်ဆင်းရှင် နတ်ဘုရား စွမ်းအား... ထာဝရ စွမ်းအားမှလွဲ၍ ကျန်သည့် စွမ်းအားအားလုံးထက် သာလွန်ကာ အခြားသော အဆင့် တစ်ခုသို့ ရောက်ရှိနေသည့် ကြောက်မက်ဖွယ် နတ်ဘုရား စွမ်းအားပင် ဖြစ်ချေသည်။
ယခင် အချိန်မြစ်အတွင်းက ဖန်ဆင်းရှင် နတ်ဘုရား စွမ်းအားကို ရင်ဆိုင်ရစဉ် ထန်ထျန်းမှာ ချက်ချင်းပင် ကြေမွသွားခဲ့ရပြီး ဂျင်ဂိုကမ္ဘာ၏ အားဖြည့်မှုဖြင့်သာ အပြန်အလှန် အချိန်ဆွဲခဲ့ရသည်။
သို့သော် ယခုတစ်ကြိမ်တွင်မူ ပြောင်းလဲမှု တစ်စုံတစ်ရာ ရှိလာမလားဟု သူ စမ်းသပ်ကြည့်ချင်နေသည်။
ဖန်ဆင်းရှင် နတ်ဘုရား စွမ်းအား ဆင်းသက်လာသည်ကို ခံစားရသည်နှင့် ထန်ထျန်းက သူ၏ ခွန်အားအားလုံးကို ထုတ်ဖော်ကာ နည်းလမ်းအားလုံးကို အသုံးချလိုက်သည်။
အနန္တတာအိုနိယာမနယ်မြေ မှာ ထန်ထျန်း၏ ကိုယ်ပိုင် ကမ္ဘာတစ်ခုကို တည်ဆောက်လိုက်သကဲ့သို့ ရှိနေ၏။
သို့သော် ဖန်ဆင်းရှင် နတ်ဘုရား စွမ်းအား အစစ်အမှန် ဆင်းသက်လာသည့်အခါ ထန်ထျန်းမှာ သူ့ကိုယ်သူ အထင်ကြီးမိသွားကြောင်း သိလိုက်ရသည်။
ထိုအရာမှာ လုံးဝ တားဆီး၍ မရနိုင်သော တည်ရှိမှုမျိုး ဖြစ်သည်။
အနန္တတာအိုနိယာမနယ်မြေ မှာ မျက်စိတစ်မှိတ်အတွင်းမှာပင် အမှုန့်ဖြစ်သွားခဲ့၏။
မဟာ အနန္တတာအိုနိယာမ လက်သီးမှာလည်း ဖန်ဆင်းရှင် နတ်ဘုရား စွမ်းအား ရှေ့မှောက်တွင် မီးပုံထဲ တိုးဝင်သည့် ပိုးဖလံကဲ့သို့ပင် ပျောက်ကွယ်သွားခဲ့ရသည်။
နောက်တစ်ခဏတွင် ထန်ထျန်း၏ ခန္ဓာကိုယ်မှာ ယခင်တစ်ခေါက်ကကဲ့သို့ပင် ဖန်ဆင်းရှင် နတ်ဘုရား စွမ်းအားကြောင့် တိုက်ရိုက် ကြေမွသွားခဲ့ရလေသည်။
"တောက်..."
"အခုထိ မရသေးဘူးလား"
ထန်ထျန်း၏ ပုံရိပ်မှာ အခြားသော တစ်ဖက် တွင် ပြန်လည် ပေါ်ထွက်လာခဲ့သည်။
ဖန်ဆင်းရှင် နတ်ဘုရား စွမ်းအားမှာ အမှန်တကယ်ပင် ဆန်းကြယ်လွန်းလှ၏။
အခြေအနေမှာ ယခင်တစ်ခေါက်နှင့် အတူတူပင် ဖြစ်သော်လည်း ထန်ထျန်းအား အနိုင်ယူ နိုင်သည့် အမြန်နှုန်း မှာ အနည်းငယ် နှေးကွေးသွားခြင်းသာ ရှိသည်။
သို့သော် ထိုကွာခြားချက်မှာ လျစ်လျူရှုထားနိုင်လောက်အောင်ပင် သေးငယ်လှသည်။
ကျွင်းချန်ချင်းကမူ အေးစက်စွာ ကြည့်နေဆဲပင်။
"အခုကော... မင်းရဲ့ ယုံကြည်ချက်တွေ ရှိနေသေးရဲ့လား"
ထန်ထျန်းက လှောင်ရယ်လိုက်၏။
"ဒါက အင်အားချင်း အသာစီးယူတဲ့ တိုက်ပွဲ မဟုတ်လား"
"အရင်တစ်ခေါက်ကလည်း ငါ စမ်းပြီးသားပဲလေ။ နောက်တစ်ခေါက် ထပ်လုပ်ရုံပဲပေါ့"
" ဒါပေမဲ့ ဒီတစ်ခါတော့ ငါ လုံးဝ ရပ်တန့်သွားမှာ မဟုတ်ဘူး"
သူက အေးစက်စွာ ပြောလိုက်သည်။
ကျွင်းချန်ချင်းက အသာအယာ ပြုံးလိုက်ရင်း "ကောင်းပြီလေ... "
"ဒါဆိုရင် နောက်တစ်ခေါက် ထပ်စမ်းကြည့်ကြတာပေါ့"
စကားအဆုံးတွင် ဖန်ဆင်းရှင် နတ်ဘုရား စွမ်းအားမှာ ဟိန်းခနဲ ထပ်မံ ကျဆင်းလာခဲ့ပြီး ထန်ထျန်း၏ ခန္ဓာကိုယ်မှာ တိုက်ရိုက် ပေါက်ကွဲပျက်စီးသွားခဲ့ရလေတော့သည်။