ကျားနဂါးနှိမ်နင်းခြင်း ကြီးမြတ်သောအလင်းဘုရင် ၂

"ကောင်းတယ် ကောင်းတယ်"

လက်တစ်ထောင် ဗောဓိသတ္တက သူ၏ဖန်တီးမှုကို ကျေနပ်စွာ စစ်ဆေးလိုက်၏။

ဤလောကရှိ ကျင့်ကြံသူ အများစုက ကိုယ့်ကိုယ်ကိုယ်ကာကွယ်ရန်သာ ကြိုးစားကြသော်လည်း သူ၏ရှေ့မှောက်တွင် မိမိဆန္ဒအလျောက် သံကြိုးများဖြင့် ချည်နှောင်ခံရသူများသည် အသက်ရှင်သန်မှုသက်သက်ထက်များစွာ သာလွန်သောအရာတစ်ခုကို လိုလားကြသည်။

သူတို့တွင် ကြီးမားသည့်ရည်မှန်းချက်များ ရှိကြလေ၏။

ဗောဓိဂိုဏ်းသို့ ဝင်ရောက်ခြင်းက မဟာကပ်ဘေး တွင်ပါဝင်ပြီး အမြင့်မြတ်ဆုံးသော အခွင့်အရေးအတွက် ယှဉ်ပြိုင်ရန်ဖြစ်၏။

ဤကဲ့သို့သော ရည်မှန်းချက်မရှိဘဲ ကောင်းကင်ပါရမီရှင်များနှင့် မည်သို့လုပ်၍ ယှဉ်ပြိုင်နိုင်မည်နည်း။

ဒီလို အလင်းရောင်ဘုရင်က ဝံပုလွေနတ်ဆိုးဆယ်ကောင်ထက် ပိုတန်ဖိုးရှိတယ်

"..." ရှန်းယီ တိတ်ဆိတ်နေပြီး သူ၏ဓမ္မကိုယ် ထည်အတွင်းရှိ အပြောင်းအလဲများကို အာရုံစိုက်ကာ ခံစားနေခဲ့ချေသည်။

သူ ချုပ်နှောင်ခံရခြင်းကို သဘောမကျသော်လည်း ၎င်းမှာ ခြင်များလေ၊ယားယံမှု နည်းလေ၊ အကြွေးများလေ၊စိုးရိမ်စရာ နည်းလေဟူသော အခြေအနေမျိုးသာဖြစ်၏။

ရှန်းရွှီဘိုးဘေး၏အမှတ်အသားပြုခြင်းကို ခံထားရပြီးဖြစ်ရာ အခြားသူများထံမှ ထပ်မံ အမှတ်အသားပြုခံရမည်ကို သူ မစိုးရိမ်တော့ချေ။

ခြေလှမ်းတစ်သောင်းနောက်ဆုတ်စဉ်းစားကြည့်မည်ဆိုပါက ၎င်းက အကျိုးရှိကောင်း ရှိနိုင်ပေလိမ့်မည်။

မူလက တာ့လော်မသေမျိုးအရှင်တစ်ပါးကို တစ်ယောက်တည်း ရင်ဆိုင်ခဲ့ရသော်လည်း ယခုအခါအခြား ဗောဓိသတ္တတစ်ပါး ပါဝင်လာသဖြင့် သူ၏ခန္ဓာကိုယ်ကများစွာသော အရာများကိုသာ ကိုင်တွယ်ဖြေရှင်းနိုင်၏။ သူကိုယ်တိုင် မည်သူ့ကိုမျှအနိုင်မယူနိုင်သဖြင့် ဤတတိယအဆင့်ကျွမ်းကျင်သူနှစ်ဦးကို ဖြည်းညှင်းစွာ ယှဉ်ပြိုင်ခွင့်ပြုလိုက်ခြင်းက ပိုကောင်းပေလိမ့်မည်။

ရှန်းယီ ပို၍ ဂရုစိုက်သောအရာမှာ အသွင်ပြောင်းလဲခြင်း၏ အဓိပ္ပါယ်ပင်။

ရှန်းရွှီဘိုးဘေး ကိုယ်တိုင် ပေးအပ်ခဲ့သော ကပ်ဘေးခုနစ်ရာကျော်၏နယ်ပယ်တိုးတက်မှုနှင့် နှိုင်းယှဉ်ပါက ဤလက်မောင်းလေးဖက်က ကပ်ဘေးစွမ်းအား နှင့် သေချာပေါက် ဆက်စပ်နေပြီး တူညီသောအရှိန်အဝါများဖြင့် ပြည့်နှက်နေသော်လည်း ၎င်းက ကျင့်ကြံခြင်းပြောင်းလဲခြင်းသက်သက် မဟုတ်ဘဲ နတ်ဘုရားစွမ်းရည်တစ်မျိုးနှင့် ပိုတူနေ၏။

အချိန်အတော်ကြာ စဉ်းစားတွေးတောပြီးနောက် ရှန်းယီ ရုတ်တရက် အံ့အားသင့်သွားပြီး နောက်ဆုံးတွင် နားလည်သဘောပေါက်သွားခဲ့ချေသည်။

တစ်ဖက်လူ ဝေမျှပေးသောအရာမှာ ကပ်ဘေးစွမ်းအားမဟုတ်ဘဲ လျှို့ဝှက်ဆန်းကြယ်သော တတိယအဆင့် ဗောဓိသတ္တအသီးအပွင့်တည်ရှိမှု၏အသွင်အပြင်များပင်။

အရေးမပါသော အစိတ်အပိုင်းလေးတစ်ခုပင်လျှင် မဟာအာဟတ်အသီးအပွင့်ဖြစ်တည်မှုနှင့် နှိုင်းယှဉ်၍ မရနိုင်ချေ။

"အခု နားလည်ပြီလား" လက်တစ်ထောင် ဗောဓိသတ္တ သိမ်မွေ့စွာပြုံးလိုက်ပြီး သူ၏လက်ကို ရုပ်သိမ်းလိုက်၏။

"မင်းရဲ့ဗုဒ္ဓသဘာဝက ကောင်းမွန်ပါတယ်၊ ဒီလို အာဟတ်ဓမ္မအသွင်အပြင်မျိုးကို မင်းပုံဖော်နိုင်တာ အံ့သြစရာ မဟုတ်ပါဘူး"

သူအခြားသူအပေါ် ချထားသော သံကြိုးများက မွေးရာပါစွမ်းအားကြီးမားသော လက်နက်တစ်ခုဖြစ်ပြီး အကယ်၍တစ်ဖက်လူက ပုန်ကန်ရန် စိတ်ကူးရှိခဲ့ပါက ဤလက်မောင်းလေးဖက်က ရန်သူများကို သတ်ဖြတ်နိုင်ရုံသာမက လိုအပ်ပါက သူ့ကိုလည်း ပစ်မှတ်ထားနိုင်ကြောင်း သေချာလှသည်။

အတိတ်က မျိုးစေ့ချခဲ့သော ဤမျိုးစေ့များကဲ့သို့ပင်သူတို့အားလုံးတွင် တူညီသောပြဿနာတစ်ခု ရှိကြပါသည်။ တစ်ဖက်လူက ကပ်ဘေးတစ်ထောင် သို့မဟုတ် သုံးထောင်ဖြင့် မည်သို့ပင်ကြီးထွားလာစေကာမူ အစကတည်းက လေလွင့်ကျင့်ကြံသူ တစ်ဦးဖြစ်ခဲ့ပြီး ကျင့်ကြံရန်အတွက် မဟာကျမ်းစာ တစ်စောင်တည်းသာရှိခဲ့သဖြင့် အခြားကောင်းကင်ဘုံပါရမီရှင်များ နှင့် နှိုင်းယှဉ်ပါက သူတို့တွင်နည်းစနစ်များစွာ နည်းပါးနေခဲ့ချေသည်။

အထူးသဖြင့် ဗောဓိဂိုဏ်းတွင် အကြီးအကဲများက ဂျူနီယာများကိုလျှို့ဝှက်ဆန်းကြယ်သော နည်းစနစ်များပေးအပ်ရန် နှစ်သက်ကြ၏။

မသေမျိုးသုံးပါးဂိုဏ်းကမူ တပည့်များကို ကာကွယ်ရန်အတွက် မှော်ရတနာများသာတပ်ဆင်ပေးရန် ပိုမိုနှစ်သက်ကြချေသည်။

ဤကျားနဂါးဖိနှိပ်ခြင်း မဟာအလင်းဘုရင်က မြင့်မားသောကျင့်ကြံခြင်းကိုသာ အားကိုးပြီး ရမ်းကားစွာသွားလာနေမည်ဆိုပါက မလွဲမသွေ ကြီးမားစွာထိခိုက်ခံရပါလိမ့်မည်။

လမ်းညွှန်ပေးသူ တစ်ဦးအနေဖြင့် လက်တစ်ထောင် ဗောဓိသတ္တက သဘာဝကျကျပင် သူ၏အတွက် အလားတူအရာများကို ပြင်ဆင်ပေးရမည်ဖြစ်ပြီး ထိုသို့မဟုတ်လျှင် သူကဆင်းရဲလွန်းသည်ဟုအထင်ခံရကာ ကောင်းမွန်သော ပျိုးပင်လေးတစ်ပင်ကို အလဟဿဖြစ်သွားစေလိမ့်မည်။

"ဒီအရှင်က ကုသဖို့ဂိုဏ်းကိုပြန်တော့မယ်၊ အခု မင်းက အလင်းဘုရင်ဖြစ်နေပြီဆိုတော့ မင်း လုပ်ချင်တာ လုပ်နိုင်ပါတယ်"

လက်တစ်ထောင် ဗောဓိသတ္တက အနက်ရောင်ခွေးကို အသာအယာဆွဲလိုက်ပြီး မြေကြီးပေါ်ရှိ ဝူရှန်းကို အဓိပ္ပါယ်ပါပါတစ်ချက် ကြည့်လိုက်၏။

"ဒီနန်းတွင်းအရာရှိ အပါအဝင်ပေါ့"

မဟာဂိုဏ်းကြီးတစ်ခု၏တည်ငြိမ်မှုက အင်ပါယာခုံရုံးနှင့်ဆက်နွှယ်မှုကို သိရှိထားလျှင်ပင် မေးမြန်းစရာမလိုလောက်သည်အထိဖြစ်ချေသည်။

ကပ်ဘေးကိုတက်ကြွစွာ ရှာဖွေနေသော ကျင့်ကြံသူတစ်ဦးက နတ်ဘုရားမင်းဆက်၏ကျဆင်းလာတော့မည့် အခြေအနေကို မမြင်နိုင်ပါက ဤအလင်းဘုရင်ဖြစ်ရန် မထိုက်တန်ချေ။

"ကျေးဇူးတင်ပါတယ်၊ အရှင်မြတ်" ရှန်းယီ ဆက်လက်စကားမပြောတော့ဘဲ နှုတ်ဆက်ရန် လက်အုပ်ချီကာလှည့်ပြီး သတိလစ်နေသော ဝူရှန် ကိုယူလိုက်ကာကြီးမားသော လက်ခြောက်ဖက်ပါ ခန္ဓာကိုယ်ကြီးဖြင့် အနောက်တောင်စီရင်စု ရှိရာဘက်သို့ တည့်တည့် ပျံတက်သွားခဲ့၏။

ဤကဲ့သို့တိုက်ရိုက်လုပ်ဆောင်ရခြင်းမှာ အခြား အကြောင်းပြချက်တစ်ခု ရှိပါသည်။

ထိုဝိညာဉ်မဲ့နေသော အနက်ရောင်ခွေးကို ကြည့်မိပြီး သူ၏မျက်လုံးများထဲရှိ သတ်ဖြတ်လိုသော ရည်ရွယ်ချက်ကိုဖော်ပြမိမည်ကို သူ စိုးရိမ်သောကြောင့်ပင်။

လက်တစ်ထောင် ဗောဓိသတ္တ နှင့် စစ်သူကြီးယန် တို့၏ထိပ်တိုက်တွေ့ဆုံမှုအပြီးတွင် ဒဏ်ရာရရှိသောအခြေအနေသို့ရောက်ရှိနေခဲ့ပြီး ဤဒဏ်ရာသည် အသေးအဖွဲမဟုတ်ပေ။ ထိုသို့မဟုတ်လျှင် ရွှေရောင်အလင်းစီရင်စု တစ်ခုလုံး၏ဧကရာဇ်ချီကို သိမ်းယူရန် ရွံရှာဖွယ်ကောင်းသောပြဇာတ်တစ်ခုကို ဖန်တီးရန် မဟာအာဟတ်တစ်ပါးကို စေလွှတ်စရာ လိုမည်မဟုတ်ချေ။

သို့သော် ဗောဓိသတ္တက ဤဒဏ်ရာကိုဖုံးကွယ်ရန် ရည်ရွယ်ထားခြင်း မရှိခဲ့ပေ။

တတိယအဆင့်သို့ ရောက်ရှိပြီး ဗောဓိသတ္တအသီးအပွင့်အဆင့်ကိုရရှိပြီးနောက် သေမျိုးလောကရှိ အရာအားလုံးက အရေးမပါတော့ဘဲ သူ့ကို ဒဏ်ရာရစေနိုင်ခြင်း မရှိတော့ချေ။

အကယ်၍ ရှန်းယီ ယခင်က ပျက်စီးမှုကို အခွင့်ကောင်းယူကာ ဗောဓိသတ္တတစ်ပါးကို အတင်းအကျပ်တိုက်ခိုက်ရန် အရာအားလုံးကို စွန့်စားရန်တွေးတောခဲ့ဖူးမည်ဆိုလျှင်ပင် လက်မောင်းလေးဖက်မှ ထိုတတိယအဆင့် အရှိန်အဝါကို ကိုယ်တိုင်ကိုယ်ကျ ခံစားလိုက်ရပြီးနောက် ဤအတွေးသည် လျင်မြန်စွာ ငြိမ်းသတ်ခံလိုက်ရ၏။

အအောင်ရရှိရန် အခွင့်အလမ်း မရှိချေ။

ဆရာကျစ်ခုံးကို ကယ်တင်ရန်အတွက် သူအလွန်အမင်း အားနည်းနေသေးချေသည်။

"လာဖို့ မလိုတော့ဘူး" ရှန်းယီ၏စိတ်ထဲတွင် လှုပ်ရှားမှုတစ်ခုဖြစ်ပေါ်သွားပြီး သတင်းစကားတစ်ခု ပေးပို့လိုက်၏။

ဝင်ရိုးစွန်းရှစ်ပါးချိုင့်ဝှမ်း၏ အဝေးတစ်နေရာတွင်..

ချင်းဟွာ သူမ၏စိုးရိမ်တကြီး ခြေလှမ်းများကို ရုတ်တရက်ရပ်တန့်လိုက်ရာ သူမ၏ဘေးရှိ ချီဖုန်း နတ်ဘုရားစစ်သူကြီးမှာ နားလည်ရခက်စွာဖြင့် ကြည့်လိုက်၏။

"ဘာဖြစ်လို့လဲ။ အရေးတကြီး ကိစ္စရှိတယ် မဟုတ်ဘူးလား"

ပုံမှန်အားဖြင့် အစစ်အမှန်နတ်ဘုရားတစ်ပါးက ပုဂ္ဂိုလ်ရေးကိစ္စများတွင် ဝင်ရောက်စွက်ဖက်လေ့မရှိသလို ချန်ချင်းက အမှန်တကယ်ကောင်းမွန်ပြီး သူမ၏နာမည်ကို ယခုလေးတင် ရှင်းလင်းနိုင်ခဲ့သောကြောင့်သာ အခြေအနေကို လိုက်ကြည့်ရန် သူ သဘောတူခဲ့ခြင်းဖြစ်၏။

"ကျေးဇူးတင်ပါတယ် နတ်ဘုရားစစ်သူကြီး၊ ပြေလည်သွားပါပြီ" ချင်းဟွာ လေးနက်စွာ ဦးညွှတ်လိုက်ရာ သူမ၏မျက်လုံးများထဲတွင် ကြောက်ရွံ့လေးစားမှုအရိပ်အယောင်တစ်ခု တိတ်တဆိတ် တောက်လောင်သွားခဲ့ချေ၏။

သူမ၏သခင်က တစ်နေ့တွင် ဤကမ္ဘာကြီး၏အမြင့်ဆုံးနေရာ၌ ရပ်တည်နိုင်လိမ့်မည်ဟု သူမ အမြဲတမ်းယုံကြည်ခဲ့ပေသည်။ သို့တိုင်အောင် သူတစ်ယောက်တည်း နတ်ဘုရားမင်းဆက် မှ အရာရှိတစ်ဦးကို ဗောဓိသတ္တတစ်ပါးထံမှ ကယ်တင်ခဲ့ကြောင်း သိလိုက်ရသောအခါ သူမ အနည်းငယ် မိန်းမောသွားဆဲပင်။

'မင်းပိုမြင့်လာလေလေ မင်းဘယ်လောက်သေးငယ်တယ်ဆိုတာကို ပိုသဘောပေါက်လေလေပဲ'

နန်ယန်မှ သာမန်နတ်ဆိုးလေး တစ်ကောင်အဖြစ်မှနေ၍ သူမက ယခုအခါစတုတ္ထအဆင့် ကြီးမြတ်သောမသေမျိုးစစ်သူကြီး၏တံဆိပ်ကို ရယူတော့မည်။ ချင်းဟွာ၏တတိယအဆင့် အပေါ် နားလည်မှု နက်ရှိုင်းလာသည်နှင့်အမျှ ထိုအရာ၏ကြောက်မက်ဖွယ်ကောင်းမှုကို သူမ ပိုမို ရှင်းလင်းစွာ နားလည်လာခဲ့ချေသည်။

သို့တိုင်အောင် ဗောဓိသတ္တတစ်ပါးကို ရင်ဆိုင်ရချိန်တွင်ပင် သူမ၏သခင် ပြောခဲ့ရသမျှမှာ ပေါ့ပေါ့ပါးပါး "ဘာမှမဟုတ်ပါဘူး" ဟူ၍သာဖြစ်၏။

လောကကြီးတစ်ခုလုံးကိုခြုံကြည့်လိုက်ပါ၊ ဒီလို ရဲစွမ်းသတ္တိနဲ့စွမ်းရည်မျိုး ဘယ်သူ့မှာရှိသေးလို့လဲ။

...

ရွှေရောင်အလင်းအစိုးရရုံး

အနောက်တောင်စီရင်စု မှ အလင်းတန်းတစ်ခု ပြန်လည်ရောက်ရှိလာပြီး ကောင်းကင်ယံမှ ဆင်းသက်လာကာ အဓိက ခန်းမအတွင်းသို့ အလျင်အမြန် ဝင်ရောက်လာခဲ့ချေ၏။

"သူ ပြန်ရောက်လာပြီလို့ မင်းပြောတာလား" ဖုန်းရှီကအရှေ့ဆုံးတွင် ရပ်နေပြီးဦးစွာ မေးမြန်းလိုက်ကာတိတ်ဆိတ်နေသော ရန်မင်လီက သူမ၏ဘေးတွင်ရှိနေပြီး အမည်ခံစစ်သူကြီး ခြောက်ဦးထက်မနည်း နောက်မှ လိုက်ပါလာခဲ့ကြ၏။

ဤကဲ့သို့သော လူအုပ်ကြီးကို ရင်ဆိုင်လိုက်ရရာ နတ်ဆိုးသုတ်သင်ရေးအရာရှိ၏အသံမှာ အနည်းငယ်တိုးသွားပြီး ကြောက်ရွံ့စွာဖြင့် ပြောလိုက်ချေသည်။ "သူ ပြန်ရောက်လာပါပြီ၊ သခင်ဝူရှန်းအခု အပြင်းအထန်ဒဏ်ရာရပြီး အစိုးရရုံးထဲမှာ လဲလျောင်းနေပါတယ်"

ယခင်က သတင်းပို့ရန် သွားစဉ်က သူ ဒေါသတကြီးပြောဆိုခဲ့သော်လည်း ယခုလေးတင် ရရှိခဲ့သောသတင်းများကြောင့် သူ အနည်းငယ် ရှက်ရွံ့သလို ခံစားလိုက်ရချေသည်။

"ဟက်" ၎င်းကို ကြားလိုက်ရသောအခါ ရန်မင်လီ၏မျက်နှာပ မှောင်မိုက်သွားပြီး သူအေးစက်စွာ မရယ်မောဘဲ မနေနိုင်ခဲ့ချေ။

ယန်လန်ထင်အပေါ် သူ၏မကျေနပ်မှုများက သူ၏မျက်နှာပေါ်တွင် လုံးဝပေါ်လွင်နေခဲ့၏။

နတ်ဆိုးသုတ်သင်ရေးဌာန၏ဝါရင့်အရာရှိတစ်ဦးအနေဖြင့် ဝူရှန်းက နှစ်များတစ်လျှောက်မည်သည့် ပြဿနာမျှမကြုံတွေ့ခဲ့ဖူးချေ။ သူ၏မျိုးနွယ်မှ ထွက်ခွာလာကတည်းက အချိန်တိုလေးအတွင်းမှာပင် သူက သူ၏အသက်ကို ဆုံးရှုံးလုနီးပါးဖြစ်ခဲ့ပေသည်။

အဲ့လူအိုကြီးကိုယ်တိုင် လာကြည့်သင့်တယ်၊ တစ်ခဏတာဂုဏ်ယူဖို့အတွက် လမ်းတစ်ဝက်မှာ ကျောက်စိမ်းရေကန်မသေမျိုးဂိုဏ်းက မျောက်နတ်ဆိုးကိုသတ်လိုက်တာက ဘယ်လောက်တောင် ပြဿနာတွေဖြစ်လာစေသလဲဆိုတာကိုပေါ့။

"သူ ဘယ်မှာလဲ၊ ပြီးတော့ သူ ဘယ်လိုပြန်ရောက်လာတာလဲ" ဖုန်းရှီ သူမ၏လုပ်ဖော်ကိုင်ဖက်၏ညည်းညူမှုများကို လျစ်လျူရှုပြီး နတ်ဆိုးသုတ်သင်ရေးအရာရှိ၏နောက်မှ ခန်းမအတွင်းသို့ လိုက်ဝင်သွားခဲ့ချေသည်။

"အဲဒါက... သခင်ဝူရှန်းကို ကိုယ်တိုင်ပြန်ခေါ်လာတာကစစ်သူကြီးနန်ယန် ပါ" နတ်ဆိုးသုတ်သင်ရေးအရာရှိက ထစ်ငေါ့ကာ ပြောလိုက်၏။

၎င်းကို ကြားလိုက်ရသောအခါ ဖုန်းရှီ၏ခြေလှမ်းများ တစ်ခဏမျှရပ်တန့်သွားခဲ့ချေသည်။

အခြေအနေတစ်ခုလုံးကို သူမ နားလည်ထားပြီးဖြစ်ကာ မဟာတောင်ပိုင်းတိုက်ကြီးကို ကြီးကြပ်ခဲ့သော သူမ၏နှစ်ပေါင်းများစွာ အတွေ့အကြုံများဖြင့် ဤသည်မှာ ဝူရှန်းအတွက် ဗောဓိဂိုဏ်းက အထူးဖန်တီးထားသော ထောင်ချောက်တစ်ခုဖြစ်ကြောင်း သူမအလွယ်တကူ သိမြင်နိုင်၏။

ထိုက်ယီအစစ်အမှန်မသေမျိုးတစ်ပါးကို လုပ်ကြံရန် ထိုဘုန်းကြီးများပြင်ဆင်ထားသော အစီအစဉ်က သေချာပေါက် အပြစ်ဆိုဖွယ်မရှိလှချေ။

ဖုန်းရှီပင်လျှင် ဝူရှန်း၏ပြန်လည်ရောက်ရှိလာမှုအတွက်မျှော်လင့်ချက်များစွာ မထားရှိခဲ့ဘဲ ထိုနောက်ဆုံး "အရေးပေါ်အခြေအနေ" အတွက်သာ သူ့ကိုရှာဖွေရန် ဒုက္ခခံခဲ့ခြင်းဖြစ်၏။

ပြီးတော့ အခုအခြေအနေကိုဖြေရှင်းခဲ့တာ မကြာသေးခင်ကမှ နန်ယန်ဆိုပြီးဘွဲ့ရရှိခဲ့တဲ့ လူငယ်ကျင့်ကြံသူဆိုတာကို သူမကိုပြောနေတာလား။

ဖုန်းရှီ အခန်းထဲသို့ဖြည်းညှင်းစွာ ဝင်သွားပြီး မျက်လုံးများကို တင်းကျပ်စွာမှိတ်ထားသော်လည်း ထိတ်လန့်နေဆဲဖြစ်သောကုတင်ပေါ်ရှိ လူဝကြီးကို ကြည့်လိုက်ချေသည်။

သူမ၏ထက်မြက်သော အမြင်အာရုံဖြင့် သူ၏ခန္ဓာကိုယ်အတွင်းရှိ ခိုင်မာသောရွှေရောင်စွမ်းအင်ကို သူမ ချက်ချင်းသတိပြုမိလိုက်ပြီး ဗောဓိဂိုဏ်းမှ လူများနှင့် သူထိပ်တိုက်တွေ့ဆုံခဲ့ကြောင်း ရှင်းလင်းစွာ ညွှန်ပြနေ၏။

ထူးဆန်းသည်မှာ ဤရွှေရောင်စွမ်းအင်များကို ပြင်းထန်သောဆေးစွမ်းအာနိသင်က ဖိနှိပ်ထားပြီး သိသာထင်ရှားသောအမြန်နှုန်းဖြင့် ပျောက်ကွယ်သွားနေခြင်းပင်။

"သူ ဆေးစားထားတာလား" သူမကနတ်ဆိုးသုတ်သင်ရေးအရာရှိကို ဘေးတိုက် တစ်ချက်ကြည့်လိုက်၏။ ဤကဲ့သို့ ဆေးစွမ်းအာနိသင် ဆိုသည်မှာ ထို မသေမျိုးဆေးလုံး၏အရည်အသွေးမှာ မြင့်မားရမည်ဖြစ်ပြီး နတ်ဆိုးသုတ်သင်ရေးဌာနပင်လျှင် ၎င်းကို အင်ပါယာမြို့တော်မှရယူရန်လိုအပ်ပါလိမ့်မည်။

"အဲဒါလည်း စစ်သူကြီးနန်ယန် ပါပဲ..." နတ်ဆိုးသုတ်သင်ရေးအရာရှိက အထဲဝင်ပုန်းရန် အပေါက်တစ်ခုရှာချင်သလို ခံစားလိုက်ရ၏။

ယခင်က ဤလူငယ် အမည်ခံစစ်သူကြီး နှစ်ဦးက သူတို့၏စစ်သူကြီးကို အန္တရာယ်ဖြစ်စေသည်ဟု သူ ထင်မှတ်ခဲ့သော်လည်း ယခုအခါ ၎င်းကထောင်ချောက်တစ်ခုမှန်း သိလျက်နှင့်ပင် သူက နတ်ဘုရားမင်းဆက်မှထွက်ခွာခဲ့ပြီး သခင်ဝူရှန်းကို အောင်မြင်စွာပြန်လည်ခေါ်ဆောင်လာနိုင်ခဲ့ရုံသာမကလိုအပ်သောခွန်အားကို ထည့်မတွက်ဘဲ ဤရဲစွမ်းသတ္တိတစ်ခုတည်းဖြင့်ပင် သူတို့၏တိုင်ကြားချက်များတွင်ဖော်ပြထားသော လူတစ်ဦးမည်သို့လုပ်၍ဖြစ်နိုင်မည်နည်း။

နတ်ဆိုးသုတ်သင်ရေးဌာနမှ အဖွဲ့ဝင်များအားလုံး အခန်းထဲသို့ ဝင်ရောက်လာကြပြီး တစ်ယောက်ကိုတစ်ယောက်ကြည့်ကာ တစ်ယောက်၏မျက်လုံးထဲတွင် အခြားတစ်ယောက်၏တွေဝေမှုများကို မြင်တွေ့နေကြရ၏။

နတ်ဆိုးသုတ်သင်ရေးအရာရှိ ယခင်က ပြောခဲ့သမျှကို သူတို့အားလုံးကြားခဲ့ရပါသည်။

ရန်မင်လီပင်လျှင် ဖြည်းညှင်းစွာ မျက်မှောင်ကြုတ်လာပြီး သူ၏မကျေနပ်မှုများကို ယာယီဘေးဖယ်ထားကာ ဤကိစ္စနှင့် ပတ်သက်၍ ပိုမိုစူးစမ်းချင်စိတ် ဖြစ်လာခဲ့၏။

လူတိုင်း၏မျက်စိအောက်တွင်..

ကြီးမားပြီးတောင့်တင်းသော လူဝကြီးက သူ၏မျက်လုံးများကို ရုတ်တရက်ဖွင့်လိုက်ရာ င

မြေပဲစေ့အရွယ်အစားချွေးသီးချွေးပေါက်များက သူ၏နဖူးကို ဖုံးလွှမ်းသွားပြီး သူ၏မျက်နှာတွင် အံ့အားသင့်မှုများပြည့်နှက်နေကာ သူ့အသံမှာ အက်ကွဲနေသော်လည်း ထူးထူးခြားခြားစူးရှနေခဲ့သည်။

"မင်းပဲ"

ဤစကားကြောင့် လူတိုင်းက တစ်ပြိုင်နက်တည်း ခေါင်းလှည့်ကြည့်လိုက်ကြ၏။

တစ်ခဏမျှသတိပြန်လည်စုစည်းပြီးနောက် ဝူရှန်း ရုတ်တရက် ထထိုင်ကာ သူ၏ခန္ဓာကိုယ်ကို အလန့်တကြားစစ်ဆေးလိုက်ပြီး သူ၏ဒုတိယမြောက် စကားမှာ "ငါ တကယ်ပဲ အသက်ရှင်နေသေးတာလား"

သူ ခေါင်းမော့လိုက်ရာရှုပ်ထွေးသော အမူအရာများဖြင့်ပြည့်နှက်နေသော လုပ်ဖော်ကိုင်ဖက်များနှင့် အထက်လူကြီးများစွာ၏မျက်နှာများကို မြင်တွေ့လိုက်သည်။