အခန်း (၁၇၄-၁၇၅)

အခန်း ၁၇၄ ။ သူခိုး

ပရိသတ်များမှာ လင်းယန်၏ပုံရိပ်ကို အလွန်ကာကွယ်ပေးကြသည်။ အလိုအလျောက် စက်ကိရိယာ ကိစ္စမှာမူ အမှန် မဟုတ်နိုင်ဟု အများစုက ယူဆကြသည်။ အချို့သော ဗီဒီယို တင်ဆက်သူများကလည်း ဤသို့ ဝေဖန်ကြသည်။

"လူတိုင်း သိကြတဲ့အတိုင်း နန်ရှန်း တော်တာက လောင်ယွမ်လိုပဲ မျိုးစိတ်သစ်တွေကို ဖန်တီးနိုင်တာပါ။ ဒါက ဇီဝနည်းပညာပိုင်း ဖြစ်ပါတယ်။ စက်မှုနည်းပညာနဲ့ အလိုအလျောက် စနစ်ဆိုတာကတော့ သူနဲ့ လုံးဝ မဆိုင်ပါဘူး။ ဒါက ကျန်းနန် စိုက်ပျိုးရေးတက္ကသိုလ်က နန်ရှန်းရဲ့နာမည်ကို သုံးပြီး ကျောင်းသားသစ်တွေ ခေါ်ချင်လို့ လုပ်နေတာ ဖြစ်မှာပါ။ ဒါပေမဲ့ ဒါက ကောင်းတဲ့ ကိစ္စပါပဲ။ အခုခေတ်မှာ ကျေးလက် လူဦးရေနည်းလာတော့ စက်မှုစိုက်ပျိုးရေးက လိုအပ်လာပြီလေ။ ကျောင်းသားတွေ ပြောသလို အကြီးအကျယ် ပြောင်းလဲသွားတာမျိုးကတော့ အနောက်နိုင်ငံတွေရဲ့ စိုက်ပျိုးရေး ပုံစံနဲ့ မထူးပါဘူး။ အနောက်နိုင်ငံတွေမှာ လူတစ်ယောက်က ဧက သောင်းနဲ့ချီ စိုက်နိုင်တာ စက်ကိရိယာတွေ ကြောင့်ပဲ မဟုတ်လား။ ဒါက နိုင်ငံရဲ့ စိုက်ပျိုးရေးကို အဆင့်မြှင့်တင်တာ ဖြစ်နိုင်ပေမဲ့၊ အပြောင်းအလဲ အကြီးကြီးတော့ မဖြစ်နိုင်ပါဘူး။ ဘာလို့လဲဆိုတော့ မြေနေရာက ပြည်သူတွေရဲ့ အသက်သွေးကြော ဖြစ်နေလို့ပါ"

လူအများက ထိုသူ ပြောသည်ကို လက်ခံကြသည်။ ဤသည်မှာ ကျောင်းက လုပ်ဆောင်ခြင်းဖြစ်ပြီး လင်းယန်နှင့် မသက်ဆိုင်ဟု ယူဆကြသည်။ ထို့ကြောင့် အချို့သော သူများက လန်ဟန့်ဟန့်၏ ဗီဒီယိုအောက်တွင် "ဘာသာရပ် ပြောင်းလိုက်ပါ၊ အရူးလုပ်ခံရတာ" ဟူသော မှတ်ချက်များ လာရောက် ရေးသားကြသည်။

၎င်းကို မြင်သည့်အခါ လန်ဟန့်ဟန့်မှာ အလွန် ဒေါသထွက်သွားရသည်။ သူမသည် ဗီဒီယိုအသစ် တစ်ခုကို ထပ်မံ တင်လိုက်ပြီး ဤသို့ ရှင်းပြသည်။

"ဒီစက်မှု ဘာသာရပ်ကို နန်ရှန်းကိုယ်တိုင် ဖွင့်လှစ်ခဲ့တာလို့ ကျွန်မ အာမခံပါတယ်။ နန်ရှန်းက အောင်မြင်မှုတွေ အများကြီး ရထားပေမဲ့၊ သူရဲ့ အသက်က အခုမှ ၂၀ ပဲ ရှိပါသေးတယ်။ လူငယ်ဆိုတာ စက်ပစ္စည်းတွေကို နှစ်သက်ကြတာ မဟုတ်လား။ သူက စိုက်ပျိုးရေးရဲ့ အနာဂတ်ကို ပြောင်းလဲပစ်နိုင်စွမ်း ရှိပါတယ်။ ဒါက လူသား အားလုံးအတွက် ကောင်းတဲ့ ကိစ္စပါပဲ။ နန်ရှန်း ကျောင်းကို လာတာကလည်း ဒီဘာသာရပ်ရဲ့ တိုးတက်မှုကို လာကြည့်တာပါ။ မဟုတ်ရင် သူ ကျောင်းကို လာမှာ မဟုတ်ပါဘူး"

"ရှင်တို့တွေ ယဉ်ကျေးမှု ပြတိုက်အကြောင်း ကြားဖူးမှာပါ။ အဲဒီထဲမှာ ရှေးခေတ်ကနေ အခုခေတ်အထိ စိုက်ပျိုးရေး ကိရိယာတွေ အစုံအလင် ရှိတယ်။ နန်ရှန်းက အဲဒီကအရာတွေကို စိတ်မဝင်စားပါဘူး။ သူ အနှစ်သက်ဆုံးက ဒရုန်းတွေပါ။ ဒါပေမဲ့ ဒရုန်းကုမ္ပဏီတွေက အရမ်းဈေးကြီးလွန်းလို့ သူကိုယ်တိုင် ဘာသာရပ် ဖွင့်ပြီး သုတေသန လုပ်နေတာပါ။ ကျွန်မတို့ ကျောင်းမှာ ဆရာကြီးတွေကလွဲရင် စက်မှုပိုင်း တတ်တဲ့သူ မရှိပါဘူး။ ကျွန်မတို့ အခု စမ်းသပ်နေတဲ့ ပုံစံတွေက ပရော်ဖက်ဆာလင်း ပေးထားတာပါ။ အဲဒီ ပုံစံတွေက ဘယ်က ရသလဲဆိုတာ ကျွန်မ မသိပေမဲ့၊ အရမ်းကို ခေတ်မီပြီး ပြည့်စုံလွန်းလှပါတယ်။ ချင်းရှန်းရွာမှာ စစ်တပ်ရှိတာကို ရှင်တို့ သိကြမှာပါ။ အဲဒီ နည်းပညာတွေက စစ်တပ်ကလာတာလို့ ထင်ကြပေမဲ့ ဆရာကြီးတွေက မဟုတ်ဘူးလို့ ပြောကြပါတယ်။ ဘယ်လိုပဲဖြစ်ဖြစ် နန်ရှန်းက ဒီပုံစံတွေကို အလေးထားပါတယ်။ မမေ့ပါနဲ့... နန်ရှန်းက အခုထိ လူငယ်တစ်ဦးပဲ ရှိပါသေးတယ်"

လန်ဟန့်ဟန့်၏ ဗီဒီယိုက အကြီးအကျယ် လူပြောများသွားခဲ့သည်။ အချို့က သူမသည် လင်းယန်၏ ပရိသတ်ဖြစ်သဖြင့် ထိုသို့ ပြောခြင်းဖြစ်သည်ဟု ယူဆကြသော်လည်း၊ အချို့ကမူ သူမ ပြောသည်မှာ မှန်ကန်နိုင်သည်ဟု ထင်မြင်ကြသည်။

"နန်ရှန်းက တကယ့်ကို အံ့သြစရာကောင်းလွန်းလို့၊ သူဟာ လူငယ်တစ်ဦးပဲ ရှိသေးတယ်ဆိုတာကို ကျွန်တော်တို့ မေ့နေကြတာပဲ"

"ဟုတ်တယ်၊ အသက် နှစ်ဆယ်ကျော်လေးနဲ့ ဒီလောက် အောင်မြင်နေတာ။ သာမန် ကျောင်းသား တစ်ယောက်နဲ့ အသက်တူတူပဲလေ"

"အရင်က သုတေသနပညာရှင်တွေက စက်မှုပိုင်းကို သိပ်ပြီး အာရုံမစိုက်ကြဘူး၊ ဒါက နန်ရှန်းရဲ့အစီအစဉ် ဖြစ်ဖို့များတယ်"

အင်တာနက်ပေါ်တွင် ငြင်းခုံမှုများ ဆက်လက် ဖြစ်ပေါ်နေသော်လည်း လင်းယန်မှာမူ ထိုကိစ္စများကို မသိရှိပေ။ ရှောင်ဝူက ဖုန်းကို ယူလာပြမှသာ သူ သိလိုက်ရသည်။

"ကိုကို... ကိုကို နာမည်ကြီးနေပြန်ပြီ"

လင်းယန် ဖုန်းကို ကြည့်လိုက်သည့်အခါ... ထိပ်တန်း သတင်း ၁ နှင့် ၄ မှာ သူနှင့် ပတ်သက်နေသည်ကို တွေ့လိုက်ရသည်။ သူ ဘာမှ မလုပ်ဘဲနှင့် ဘာကြောင့် နာမည်ကြီးနေတာလဲဟု သူ ကြောင်သွားရသည်။

"တစ်ယောက်ယောက် ငါ့ကို လုပ်ကြံနေတာလား"

"ပြည်ပ အရင်းရှင်တွေလား"

လင်းယန်က သတိထားလိုက်သည်။ မကြာသေးမီက ပြည်ပ အရင်းရှင်များကို ပြည်တွင်းသို့ ပြန်လည် ဝင်ရောက်ခွင့် ပေးခဲ့သည် မဟုတ်လား။ သူတို့က သူ့ကို အထင်အမြင်မှားအောင် လုပ်နေတာလား။

သို့သော် အသေးစိတ် ဖတ်ကြည့်လိုက်သည့်အခါတွင်မူ ကျန်းနန် စိုက်ပျိုးရေးတက္ကသိုလ်၏ စက်မှုအင်ဂျင်နီယာ ဘာသာရပ်နှင့် ပတ်သက်နေသည်ကို တွေ့လိုက်ရသည်။

"ဘာ... ဒီကိစ္စလေးနဲ့လား" လင်းယန် စိတ်ပျက်သွားရသည်။ ထို့ပြင် လူအများက သူ့ကို နတ်ဘုရားတစ်ပါးကဲ့သို့ မြှင့်တင် ပြောဆိုနေကြသည်မှာလည်း သူနှင့် မကိုက်ညီလှပေ။ သူက စိုက်ပျိုးရေးသမားတစ်ဦးသာ မဟုတ်လား။

"ပြည်ပ အရင်းရှင်တွေက နောက်ကွယ်ကနေ လှုံ့ဆော်နေတာလား မသိဘူး။ ရှင်းပြချက်ဗီဒီယို တစ်ခုလောက် တင်မှဖြစ်မယ်။ မဟုတ်ရင် ကောလာဟလတွေက ပိုကြီးသွားလိမ့်မယ်"

သူသည် လန်ဟန့်ဟန့် တင်ထားသော ဗီဒီယိုကိုလည်း တွေ့လိုက်ရသည်။ ဤကလေးမလေးက သူ့ကို အစွမ်းကုန် ကာကွယ်ပေးနေသည် မဟုတ်လား။

"ပရိသတ်တွေက ကိုယ့်ကိုယ်ကိုယ် 'ဖရုံသီး' လို့ ခေါ်ကြတာလား... စိတ်ဝင်စားဖို့ ကောင်းသားပဲ" လင်းယန် ပြုံးမိသွားသည်။ ဤအမည်က မြေကြီးထဲက ထွက်လာသည့် အရာနှင့် အတော်လေး လိုက်ဖက်လှသည်။ သူ့ကို ဝန်းရံပေးကြသော ပရိသတ်များအတွက် သူ ဝမ်းသာမိသော်လည်း၊ သူတို့က သူ့ကို နတ်ဘုရားကဲ့သို့ သဘောထားနေကြခြင်းမှာမူ အန္တရာယ်ရှိလှသည်။

"ရှင်းပြလိုက်တာ အကောင်းဆုံးပဲ" လင်းယန်က ဗီဒီယို ရိုက်ရန် ပြင်လိုက်သည်။ သို့သော် သူ မရိုက်ရသေးမီမှာပင် အဘိုးစူးက မျက်နှာပျက်ပျက်နှင့် ရောက်လာခဲ့သည်။ လင်းယန်မှာ စူးရို့ရို့နှင့် ကိစ္စကို အဘိုးစူး သိသွားပြီလားဟု ထိတ်လန့်သွားရသည်။

"အဘိုးစူး... ဘာဖြစ်လို့လဲဟင်"

"ငါးတစ်ကောင်မှ မရတဲ့အပြင် ငါးကတောင် ပြန်မျှားတာ ခံလိုက်ရတယ်!"

လင်းယန် စိတ်အေးသွားရသည်။ စူးရို့ရို့ကိစ္စမဟုတ်သဖြင့် တော်သေးသည်။ "ဘာဖြစ်လို့လဲ၊ ငါးက ပျောက်သွားလို့လား"

အဘိုးစူးက နှာခေါင်းရှုံ့လိုက်သည်။ "ပိုက်ကွန်တောင် ပျက်စီးမတတ်ပဲ! ပြည်ပအရင်းရှင်တွေက လွန်လွန်းတယ်၊ ငါးကြီးကြီးတစ်ကောင်ကို ဖမ်းမိမလို့လုပ်ကာမှ လွတ်သွားတယ်"

လင်းယန်၏ အကြည့်များက လေးနက်သွားသည်။ အဘိုးစူးသည် သူ့ကို ငါးစာအဖြစ် အသုံးပြုကာ ပြည်ပ အရင်းရှင်များကိုဖမ်းရန် ကြိုးပမ်းနေခြင်းဖြစ်သည်။ သို့သော် ယခုအခါ ပြဿနာ တစ်စုံတစ်ရာ ဖြစ်ပေါ်ခဲ့ပုံရသည်။

"ဘာဖြစ်ခဲ့တာလဲ"

လင်းယန်မှာ အင်တာနက်ပေါ်က သတင်းများကို ပြည်ပ အရင်းရှင်များက နောက်ကွယ်မှ ကြိုးကိုင်နေခြင်းဖြစ်မည်ဟု သံသယ ဝင်လာသည်။

"အရင်က ငါတို့နိုင်ငံ ဆင်းရဲတုန်းက လူငယ်တွေကို ပြည်ပကို စေလွှတ်ပြီး ပညာသင်ခိုင်းခဲ့တယ်။ အခုတော့ ပညာတွေရလာပြီး နိုင်ငံလည်း ချမ်းသာလာပြီဆိုပေမဲ့ ပြဿနာက အဲဒီမှာပဲ။ အဲဒီလူတွေက ပြည်ပမှာ ကြာကြာနေတော့ သူတို့က နိုင်ငံခြားသားတွေလိုပဲ ဖြစ်သွားကြတာ! ပြည်တွင်းကို ပြန်လာပြီး အရင်းအမြစ်တွေ အများကြီး ရထားပေမဲ့ ဘိုးဘေးတွေကိုတော့ မေ့သွားကြပြီ..."

လင်းယန် သဘောပေါက်လိုက်သည်။ ယနေ့ထက်တိုင် ပြည်ပယဉ်ကျေးမှုကိုသာ အထင်ကြီးနေသူများစွာ ရှိနေကြဆဲ ဖြစ်သည်။ ပြည်သူတို့၏လုပ်အားဖြင့် ချမ်းသာလာသော်လည်း၊ သူတို့ကမူ ပြည်ပကိုသာ ကြည်ညိုကြသည်။ ဤကဲ့သို့သော သူများသည် နေရာတကာသို့ ပျံ့နှံ့နေကြသည်။ ရှေးခေတ်ကဆိုလျှင် ဤသူများသည် 'နိုင်ငံတော် သစ္စာဖောက်' များပင်ဖြစ်သည်။

အဘိုးစူးက ငါးဖမ်းပိုက်ကွန်ကို ဖြန့်လိုက်သည့်အခါ ထိုကဲ့သို့သော သူများစွာကို ခြေရာခံမိခဲ့ခြင်း ဖြစ်သည်။ ထိုသူများသည် ရန်သူထက်ပင် ပို၍ နာကျည်းစရာ ကောင်းလှသည်။

"စိုက်ပျိုးရေးတက္ကသိုလ်ထဲကိုလည်း ပြည်ပအရင်းရှင်တွေ ထိုးဖောက် ဝင်ရောက်နေတာလား" လင်းယန်မှာ ဤအချက်ကို အလွန်စိုးရိမ်မိသည်။

***

စူပါ-ဖမ်း(SFS)

SFS 175

အခန်း ၁၇၅ ။ အရင်းရှင် အင်အား

လင်းယန်မှာ စိတ်ပျက်မိသည်။ ပြည်ပ အရင်းရှင်များကို တားဆီးရန်မှာ အမှန်တကယ်ပင် ခက်ခဲလှသည်။ ယခုကဲ့သို့ အရင်းရှင်စနစ် ကြီးစိုးနေသော လူ့အဖွဲ့အစည်းတွင် ငွေမရှိခြင်းကပင် အပြစ်တစ်ခု ဖြစ်နေတော့သည်။ သို့သော် တကယ့် ချမ်းသာသူ ဘယ်လောက်များရှိမှာလဲ။ ပြည်တွင်း ပတ်ဝန်းကျင်မှာ ပြည်ပ၏ လွှမ်းမိုးခြင်းကို ခံထားရသဖြင့် ချမ်းသာသူများစွာမှာ အနောက်နိုင်ငံများကို အားကျကာ ပြည်ပသို့ ထွက်ခွာသွားကြသည်။ သို့သော် ပြည်ပသို့ ရောက်သည့်အခါတွင်မူ သူတို့၏ ဂုဏ်သိက္ခာများ ပျောက်ဆုံးသွားကြရသည်။ ထိုသူများထက်စာလျှင် ပြည်ပက ငွေကို ယူကာ မိမိ၏ ဘိုးဘေးများကို ရောင်းစားနေသူများက ပို၍ ဆိုးရွားလှသည်။

"ငွေဆိုတာ ကောင်းတဲ့ အရာပါ၊ ငွေ တစ်သောင်းနဲ့ သိက္ခာကို ဝယ်လို့ မရပေမဲ့၊ တစ်သိန်းဆိုရင်ကော၊ တစ်သန်းဆိုရင်ကော၊ တစ်ဘီလီယံဆိုရင်ကော...။ ငွေကြောင့်နဲ့ မိမိရဲ့ စိတ်ဝိညာဉ်ကို ရောင်းစားလိုက်တဲ့သူတွေ အများကြီး ရှိတာပဲ" လင်းယန် သက်ပြင်းချလိုက်သည်။

သူ၏ သီးနှံများက ပြည်သူတို့၏ ဘဝကို မြှင့်တင်ပေးနိုင်သော်လည်း... အရာအားလုံးကိုတော့ မပြောင်းလဲနိုင်ပေ။ ယခုခေတ်တွင် စားစရာ မရှိသူထက်၊ နေစရာ မရှိသူ၊ ချစ်သူ မရှိသူနှင့် ကလေး ပညာရေးအတွက် ပူပန်နေရသူများက ပို၍ များပြားလှသည်။ လူနေမှု ဘဝနှင့် ပတ်သက်သည့် အရာအားလုံးမှာ အရင်းရှင်တို့၏ ငွေရှာသည့် ကိရိယာများ ဖြစ်လာခဲ့သည်။ အခြေခံ အခွင့်အရေးပင် မရှိသူများအတွက် သိက္ခာအကြောင်း ပြောဆိုရန်မှာ ခက်ခဲလှပေသည်။

အဘိုးစူးက သက်ပြင်းချလိုက်သည်။ "စိုက်ပျိုးရေးတက္ကသိုလ်က ဆရာကြီး သုံးယောက်တောင် ပါဝင်နေတယ်..." အဘိုးစူးက အလွန် ဒေါသထွက်နေသည်။ "တစ်သက်လုံး စုဆောင်းလာတဲ့ နာမည်တွေ အကုန် ပျက်စီးကုန်ပြီ"

လင်းယန်မှာ စိတ်ထဲတွင် ထိတ်လန့်သွားရသည်။ "တောင်ခြေက ကျောင်းမှာကော ရှိလား"

"အဲဒီမှာတော့ ထိုးဖောက် မဝင်နိုင်သေးဘူး" ထိုအခါမှ အဘိုးစူး စိတ်အေးသွားရသည်။ ချင်းရှန်းရွာသို့ ဝင်မည့်သူတိုင်းကို သူ သေသေချာချာ စစ်ဆေးထားသောကြောင့် ဖြစ်သည်။ သူ၏ လျှို့ဝှက်ချက်များမှာ တိတ်တဆိတ် ပျံ့နှံ့သွားမည်ကို သူ မလိုလားပေ။ လင်းယန်လည်း စိတ်အေးသွားရသည်။

အဘိုးစူးက ဆက်ပြောသည်။ "ဒီသုံးယောက်လုံးက မိသားစု အကြောင်းတွေကြောင့်ပဲ။ တစ်ယောက်က သားဖြစ်သူက ပြဿနာ ရှာထားလို့ ငွေအများကြီး လိုအပ်နေတာကို ပြည်ပ အရင်းရှင်တွေက သိသွားတာ။ နောက်တစ်ယောက်က သမီးဖြစ်သူ ပြည်ပမှာ ကျောင်းတက်ဖို့အတွက်..."

အဘိုးစူးက ဆက်မပြောနိုင်တော့ပေ။ "နောက်ဆုံး တစ်ယောက်ကတော့ မနာလိုစိတ်ကြောင့်ပဲ။ မင်းက ဒီရလဒ်တွေကို တစ်ယောက်တည်း ပိုင်ဆိုင်ထားပြီး သူတို့လို လူကြီးတွေကို ဘာမှ အခွင့်အရေး မပေးဘူးလို့ သူက ယူဆနေတာ" အဘိုးစူးက ဒေါသတကြီးဖြင့် "ဒီလိုလူမျိုးက ဆရာလုပ်နေတာ... တကယ့်ကို သစ္စာဖောက်ပဲ!" ဟု ဆဲရေးလိုက်တော့သည်။

လင်းယန်က အဘိုးစူးကို စိတ်လျှော့ရန် ဖျောင်းဖျလိုက်ရသည်။ အဘိုးစူး ရှိနေသဖြင့်သာ ချင်းရှန်းရွာမှာ ဤမျှ အေးချမ်းနေခြင်း မဟုတ်လား။

"စုံစမ်းမိပြီဆိုရင်တော့ တော်သေးတာပေါ့၊ စိတ်မဆိုးပါနဲ့တော့" လင်းယန်မှာ တည်ငြိမ်နေသည်။ ချင်းရှန်းရွာထဲသို့ မဝင်နိုင်သရွေ့ အားလုံးမှာ အဆင်ပြေသည်။ အကယ်၍ ဝင်လာခဲ့လျှင်လည်း သူက အသာကြည့်နေမည် မဟုတ်ပေ။ ဤတောနက်ထဲတွင် မည်သူ့ကိုမဆို သူ သတ်ပစ်လျှင် ဘယ်သူမှ ရှာတွေ့မည် မဟုတ်ပေ။ ထို့ပြင် ဤနေရာတွင် ကင်မရာများလည်း မရှိပေ။

ထို့နောက် အဘိုးစူးက အခြားသော သူများအကြောင်းကိုလည်း ပြောပြသည်။ "အချို့က ပြည်ပမှာ ကျောင်းတက်ပြီး ပြန်လာတဲ့သူတွေ။ စီးပွားရေး တည်ဆောက်တဲ့ အပိုင်းမှာ သူတို့က ငါတို့ထက် ပိုတော်ကြတယ်။ နိုင်ငံလည်း မြန်မြန် ချမ်းသာလာခဲ့တယ်။ ဒါပေမဲ့ ပြည်ပ အရင်းရှင်တွေနဲ့ ပတ်သက်နေတဲ့သူတွေလည်း အများကြီးပဲ။ မင်းကို ငါးစာအဖြစ် မသုံးခဲ့ရင် ဒါတွေကို သိမှာ မဟုတ်ဘူး။ အကယ်၍ သူတို့ ထောင်ချောက်ထဲသာ ကျသွားရင် ပြည်သူတွေ အကုန် ဒုက္ခရောက်ကုန်မှာပဲ"

လင်းယန်မှာ သက်ပြင်းချလိုက်သည်။ အဘိုးစူးသည် ဒေါသကြီးသော်လည်း ပြည်သူ့ဘက်က ရပ်တည်သူ တစ်ဦး ဖြစ်သည်။ ၎င်းမှာ ရှေးလူကြီးတို့၏ စိတ်ဓာတ်ပင် ဖြစ်သည်။ သို့သော် မျိုးဆက်သစ်များမှာမူ ငွေကြေး လွှမ်းမိုးမှုကြောင့် ပြောင်းလဲကုန်ကြပြီ ဖြစ်သည်။ လင်းယန်သည် ထိုအရာများကို မြင်တွေ့ခဲ့ရသဖြင့် မြို့ကြီးများသို့ မသွားလိုခြင်း ဖြစ်သည်။ မြို့ပြ၏ မြင့်မားလှသော အိမ်ဈေးများကြောင့် သာမန်လူတစ်ဦးမှာ တစ်သက်လုံး အကြွေးဆပ်ရင်း အချိန်ကုန်သွားရသည်။

ချင်းရှန်းရွာတွင် နေရသည်မှာ ပို၍ ပျော်စရာ ကောင်းသည် မဟုတ်လား။ လင်းယန်က အဘိုးစူး၏ စကားများကို နားထောင်ပေးရင်း၊ သူ တစ်ခုကို သဘောပေါက်လိုက်သည်။

"အင်တာနက်ပေါ်က သတင်းတွေမှာလည်း ပြည်ပ အရင်းရှင်တွေက နောက်ကွယ်ကနေ လှုံ့ဆော်နေတာပဲ!"

"ဒါပေမဲ့ သူတို့ ဘာလို့ ဒီလို လုပ်တာလဲ" လင်းယန် စဉ်းစား၍ မရဘဲ ရှိနေသည်။ ဤသတင်းများက သူ၏ ဂုဏ်သတင်းကို မြှင့်တင်ပေးနေသဖြင့် ဆိုးကျိုး မတွေ့ရပေ။

"နာမည်ကြီးအောင် လုပ်ပြီးမှ ရိုက်ချိုးမလို့လား။ ပြည်ပ အရင်းရှင်တွေက အဲဒီလောက်အထိ ဉာဏ်ကောင်းကြတာလား။ ထားလိုက်ပါတော့... ကြိုတင် ကာကွယ်ထားတာ အကောင်းဆုံးပဲ"

လင်းယန်သည် ဗီဒီယိုတစ်ခုရိုက်ကူးရန် ဆုံးဖြတ်လိုက်သည်။ ရိုးရှင်းသော နောက်ခံဖြင့် ရိုက်ကူးထားသည့် ဗီဒီယိုမှာ မရှည်လှပေ။

"အင်တာနက်ပေါ်က ငြင်းခုံမှုတွေနဲ့ ပတ်သက်ပြီး ကျွန်တော် ရှင်းပြချင်ပါတယ်။ အလိုအလျောက် စက်မှု ဘာသာရပ်ကို ကျွန်တော် ကိုယ်တိုင် ဖွင့်လှစ်ခဲ့တာပါ။ ရည်ရွယ်ချက်ကတော့ ပြည်တွင်း စိုက်ပျိုးရေးလုပ်ငန်းတွေကို အဆင့်မြှင့်တင်ဖို့ ဖြစ်ပါတယ်။ ပြည်ပနိုင်ငံတွေ တိုးတက်နေသလို၊ ကျွန်တော်တို့လည်း စိုက်ပျိုးရေးပိုင်းမှာ နောက်ကျမကျန်ခဲ့သင့်ပါဘူး။ ဒီအပိုင်းမှာ ရန်ပုံငွေ ခက်ခဲလို့ ဘယ်သူမှ မလုပ်ချင်ကြပေမဲ့ ကျွန်တော်ကတော့ လုပ်ဆောင်သွားမှာပါ"

လင်းယန်၏ အသံမှာ တည်ငြိမ်လှသည်။ သူ့စိတ်ထဲရှိသည့်အတိုင်း ပြောဆိုလိုက်ခြင်း ဖြစ်သည်။ ပရိသတ်များ မည်သို့ နားလည်မည်ကိုမူ သူ ဂရုမစိုက်ပေ။

"ဒီအရေးကြီးတဲ့ အရာတွေကို ကျွန်တော် ဖုံးကွယ်မထားပါဘူး။ အလိုအလျောက် စိုက်ပျိုးရေး စက်ရုပ်တွေအကြောင်း ကျွန်တော်တို့ သုတေသန လုပ်နေပါတယ်။ လောလောဆယ်မှာတော့ ရလဒ် အချို့ ထွက်ပေါ်နေပြီ ဖြစ်ပေမဲ့၊ ကုန်ကျစရိတ်ကြောင့် ချင်းရှန်းရွာမှာပဲ အသုံးပြုနိုင်ပါဦးမယ်။ အားလုံးပဲ အများကြီး မမျှော်လင့်ကြပါနဲ့ဦး။ နောက်ဆုံးအနေနဲ့ ပြောချင်တာက အခုတလော အင်တာနက်ပေါ်မှာ သတင်းတွေက မရိုးသားပါဘူး၊ ပြည်ပအရင်းရှင်တွေ နောက်ကွယ်ကရှိနေနိုင်လို့ အားလုံးပဲ သေသေချာချာ ဆင်ခြင်ကြပါ"

လင်းယန်သည် ဗီဒီယိုကို တင်လိုက်ပြီးနောက် အများကြီး ဂရုမစိုက်တော့ပေ။ အင်တာနက်မှာ ကောင်းကျိုးရှိသလို ဆိုးကျိုးလည်း ရှိသည်။ ဗီဒီယို တင်လိုက်ခြင်းဖြင့် သူ့ဂုဏ်သတင်းကို ပြည်ပ အရင်းရှင်များက ဖျက်ဆီးမည့် ဘေးမှ ကြိုတင်ကာကွယ်နိုင်ပေလိမ့်မည်။ အကယ်၍ သူသာ နာမည်ပျက်သွားပါက ပြည်ပသို့ ထွက်ခွာသွားရန်အထိ ဖိအားပေးခံရနိုင်သည် မဟုတ်လား။

သူ ဗီဒီယိုမှာ တင်လိုက်သည်နှင့် ကြည့်ရှုသူ များပြားလှသည်။ ပရိသတ်များစွာမှာ မှတ်ချက်များ လာရောက် ရေးသားကြသည်။ လင်းယန်က ဗီဒီယိုတစ်ခုတင်ရန်မှာ အလွန်ခဲယဉ်းလှသဖြင့် လူတိုင်းက စိတ်လှုပ်ရှားနေကြခြင်းဖြစ်သည်။ ထိုဗီဒီယိုမှာ တင်ပြီး သုံးမိနစ်အတွင်းမှာပင် ထိပ်တန်း သတင်း နံပါတ် ၁ နေရာသို့ ရောက်ရှိသွားတော့သည်။

***