အခန်း (၂၉၇)

စစ်မြေပြင်မှ ထာဝရရှင်သန်ခြင်းဆီသို့

အခန်း (၂၉၇)

" ဝေဝူကျိ ဝေနိုင်ငံက ချင်ကို မခုခံနိုင်ဘူးဆိုတာ ခင်​ဗျားသိပါတယ်။ ဒါက ခင်​ျှားရဲ့ နောက်ဆုံး ရုန်းကန်မှုပဲ။ " ကျောက်ဖုန်းက မြေပုံကို ကြည့်ပြီး ပြုံးလိုက်သည်။

ဝေဝူကျိက အသက်ကြီးပြီဖြစ်သော်လည်း သူ့ရဲ့ စွမ်းဆောင်ရည်​ြ သံသယဝင်စရာမလိုပေ။ ထို့အပြင် သူ၏ မျိုးချစ်စိတ်ကလည်း လေးစားမှုကို ရရှိနိုင်သည်။ သို့သော် ချင်နိုင်ငံက နိုင်ငံခြောက်ခုကို ချေမှုန်းပြီး ကမ္ဘာကြီးကို စုစည်းမည့် လမ်းကြောင်းက တားဆီး၍ မရနိုင်ပေ။

ကျောက်နှင့် ဟန်နိုင်ငံတွေကို သိမ်းပိုက်လိုက်ခြင်းက ချင်နိုင်ငံအင်အားကို ပို၍ တောင်းတင်းစေခဲ့ပြီး လူဦးရေသန်းပေါင်းများစွာကို တိုးလာစေခဲ့သည်။ ဤခေတ်တွင် လူဦးရေကလည်း နိုင်ငံအင်အား၏ အစိတ်အပိုင်းတစ်ခု ဖြစ်သည်။

" ယန်ကောင်းမြို့ကို ဖျက်ဆီးပြီး နယ်စပ်ကို ထိုးဖောက်ရမယ်။ ပြီးရင် ဝေကို ချေမှုန်းဖို့အတွကိ စစ်တပ်ကို လမ်းကြောင်းသုံးခုခွဲမယ်။ " ကျောက်ဖုန်းက တိုက်ပွဲအတွက် ပြင်ဆင်ပြီးသား ဖြစ်သည်။

" ကျန်းမင် " ကျောက်ဖုန်းက ခေါ်လိုက်သည်။

" အရှင် " ကျန်းမင်က ချက်ချင်း ဝင်လာသည်။

" ငါ့ညီမကို ကာကွယ်ဖို့ ကိုယ်ရံတော်တစ်ရာကို လွှတ်လိုက်ပါ။ " ကျောက်ဖုန်းက တည်ငြိမ်စွာ ပြောလိုက်သည်။

" နားလည်ပါပြီ။ " ကျန်းမင်က အမိန့်ကို အကောင်အထည်ဖော်ရန် ချက်ချင်း ထွက်ခွာသွားသည်။

စစ်တပ်က စတင် လှုပ်ရှားသည်နှင့် ကုသရေးစခန်းမှ သမားတော်များကလည်း စစ်တပ်နှင့်အတူ လိုက်ပါကြမည်ဖြစ်သည်။ ကျောက်ဖုန်းက သူ၏ ညီမကို အထူးဂရုစိုက်လေသည်။ သူက ကျောက်ရင်ကို စစ်တပ်ထဲ​တွင်​ မနေစေချင်သော်လည်း သူမက ကျောက်ဖုန်းကဲ့သို့ ခေါင်းမာပြီး သူမ လုပ်ချင်သည်ကို စိတ်ပိုင်းဖြတ်ပြီး လုပ်တတ်သည်။

" ဝေကို ချေမှုန်းမယ်။ ဒီတိုက်ပွဲမှာ စွမ်းရည်အားလုံးကို တစ်သောင်းကျော်အောင် လုပ်ရမယ်။ ဒါပေမယ့် အစစ်အမှန်ချီပဲ လိုတော့တာ။ " ကျောက်ဖုန်းက မျှော်လင့်ချက်များဖြင့် ပြည့်နှက်နေသည်။

သူက စစ်ပွဲမှ စွမ်းရည်များ ပိုမိုရရှိရန်နှင့် အသက်ပိုရှည်ရန် မျှော်လင့်နေသည်။ သူ၏ ခွန်အားများ တိုးလာသော်လည်း သက်တမ်းက ၁၅၀ နှစ်တွင် ရပ်တန့်နေရသည့်အကြောင်းရင်းကို သူသိလိုသည်။

ရှန်းယန်မြို့တော်။

ကျန်းထိုင်နန်းဆောင်။

" အရှင်မင်းကြီး စစ်ပွဲစတင်ပါပြီ။ " ယွီလျောင်က ခန်းမထဲသို့ ဝင်လာပြီး ပြောလိုက်သည်။

" ဝေနိုင်ငံက တစ်နှစ်အတွင်း ပျောက်ကွယ်သွားလိမ့်မယ်။ " ရင်ကျန့်က တည်ငြိမ်စွာ ပြောလိုက်သည်။

" ကျွန်တော်မျိုးက တိုက်ပွဲအခြေအနေကို အမြဲမပြတ် စောင့်ကြည့်နေပြီး စစ်ရေးသတင်းတွေကိုလည်း ချက်ချင်း အစီရင်ခံပါ့မယ်။ " ယွီလျောင်က ပြောလိုက်သည်။ " ချူနိုင်ငံက ဟွမ်ရှဲက လှုပ်ရှားမှုအချို့ ပြနေပါတယ်။ သူက ကျွန်တော်မျိုးတို့ ချင်ကို တိုက်ဖို့ ပြင်နေတဲ့ပုံပဲ။ ဒါကိုတော့ လျစ်လျူရှုထားလို့မရပါဘူး။ "

" ဟွမ်ရှဲ လွန်ခဲ့တဲ့ အချိန်တွေကတည်းက မြေမြှုပ်ထားသင့်တဲ့ လူအိုကြီး။ အဲ့ဒါကို ငါ ကိုင်တွယ်လိုက်မယ်။ " ရင်ကျန့်က ပြုံးလိုက်ပြီး သူ၏ စိတ်ထဲတွင် အစီအစဉ်များ ရှိနေသည်မှာ ထင်ရှားသည်။

" ဟွမ်ရှဲ တကယ်ကို ထူးခြားတဲ့ ပုဂ္ဂိုလ်တစ်ယောက်ပဲ။ တကယ်ပဲ အကြာကြီး အသက်ရှင်နေခဲ့တယ်။ ဒါပေမယ့် ချူနိုင်ငံမှာလည်း သူ့ကို သေစေချင်နေတဲ့လူတွေ အများကြီး ရှိတယ်။ " ယွီလျောင်က ပြုံး၍ ပြောလိုက်သည်။

" ယွီချင်း ရိက္ခါထောက်ပံ့မှုတွေကို သေချာစောင့်ကြည့်ထား။ စစ်တပ်မှာ ရိက္ခါမပြတ်အောင် သေချာလုပ်ပါ။ " ရင်ကျန့်က ပြောလိုက်သည်။

" နိုင်ငံရေးကိစ္စမှာ ဝန်ကြီးဝမ်နဲ့ ဝန်ကြီးဖုန်းတို့က မဆင်မခြင် လုပ်မှာမဟုတ်ပါဘူး။ ကျွန်တော်မျိုးလည်း ကြီးကြပ်ပေးပါမယ်။ " ယွီလျောင်က ပြန်ဖြေလိုက်သည်။

" ကျင့်သုံးနိုင်ငံထဲမှာ ဝေနိုင်ငံက နောက်ဆုံးနိုင်ငံပဲ။ " ရင်ကျန့်က တည်ငြိမ်စွာ ရေရွတ်လိုက်သည်။

ယန်ကောင်းမြို့။

" အစီရင်ခံပါတယ်။ ယွင်ကျုံးမြို့က ဝူအန်းစခန်းက ကျွန်တော်တို့ နယ်စပ်ကာကွယ်တပ်တွေကို ချေမှုန်းသွားပါပြီ။ "

" အစီရင်ခံပါတယ်။ ချင်စစ်တပ်က နယ်စပ်က ကျွန်တော်တို့ ဝေကာကွယ်ရေးတပ်တွေကို ဖျက်ဆီးပြီး ယန်ကောင်းမြို့ကို တိုက်ရိုက်ဦးတည်လာနေပါတယ်။ "

" အစီရင်ခံပါတယ်။ ချင်စစ်တပ်က ကျွန်တော်တို့မြို့နဲ့ ငါးလီအကွာကို ရောက်နေပါပြီ။ "

ကင်ထောက်များ တစ်ယောက်ပြီးတစ်ယောက်က စစ်သေနာပတိချုပ် လုံကျန်းကို အစီရင်ခံလိုက်ကြသည်။

" လျို့ဝှက်အစီရင်ခံစာတွေထဲမှာ ချင်က နှစ်လကြာမှ တိုက်ခိုက်မယ်လို့ ပြောထားတယ်။ အခုတော့ အများကြီး ပိုစောနေတာပဲ။ ချင်က တကယ်ကို ကောက်ကျစ်တယ်။ " လုံကျန်းက လှောင်ပြုံးပြုံးလိုက်သည်။

" ကြောက်နေစရာမလိုဘူး။ ငါတို့ ယန်ကောင်းမြို့က အင်အားတောင့်တင်းသလို ရိက္ခါတွေလည်း အလုံအလောက်ရှိတယ်။ ချင်စစ်တပ်က ထိုးဖောက်နိုင်မှာ မဟုတ်ဘူး။ ပြီးတော့ ချင်စစ်တပ်ရဲ့ ဝူအန်းစခန်းက ပြန်လည်ဖွဲ့စည်းထားတဲ့ ကျောက်နိုင်ငံက သစ္စာဖောက်တွေပဲ။ သူတို့က ချင်အတွက် အပြည့်အဝ အနစ်နာခံတိုက်ခိုက်မှာမဟုတ်ဘူး။ " လုံကျန်းက ဖြည်းညင်းစွာ ပြောလိုက်သည်။

" စစ်သေနာပတိချုပ် ဝူအန်းစခန်းမှာ အဓိကတပ်ရင်းသုံးခုရှိတယ်။ တပ်ရင်းတစ်ခုစီမှာ စစ်သည်တစ်သိန်းစီ ရှပါတယ်။ ဒါကြောင့် ဝူအန်းစခန်းမှာ စစ်သည်အင်အားသုံးသိန်းရှိတယ်။ တကယ်လို့ အင်အားသုံးပြီး တိုက်ခိုက်ဖို့ ကြိုးစားလာရင် ယန်ကောင်းမြို့က ဆက်ပြီးတောင့်ခံနိုင်ပါ့မလားမသိဘူး။ " ဝေတပ်မှူးတစ်ယောက်က ပြောလိုက်သည်။

" အရှင်မင်းကြီးက ငါနဲ့အတူ ချင်ရဲ့ ထိုးစစ်ကို ခုခံဖို့ ကာကွယ်ရေး​ဗျူဟာကို ကြိုတင်ရေးဆွဲပြီးသားပဲ။ ချင်စစ်တပ်က တိုက်ခိုက်နေပြီ။ တပ်မှူးအားလုံး မြို့ကို ကာကွယ်ဖို့အတွက် အပြည့်အဝ ကြီးကြပ်ရမယ်။ " လုံကျန်းက တည်ငြိမ်စွာ ပြောလိုက်သည်။

" အမိန့်အတိုင်းပါ။ " ဝေတပ်မှူးများက တစ်ယောက်ပြီး​တစ်ယောက် ပြန်ပြောလိုက်ကြသည်။

" ဒီနေ့ကစပြီး ဘယ်တပ်မှူးမှ ကိုယ်ကွပ်ကဲနေတဲ့ တပ်ဖွဲ့တွေဆီက ခြေတစ်လှမ်းတောင် မခွာရဘူး။ တာဝန်က စွန့်ခွာတဲ့သူ စစ်ဥပဒေအရ အရေးယူမယ်။ ဒီနေ့ကစပြီး ယန်ကောင်းမြို့တစ်ခုလုံးကို ပိတ်ဆို့ထားရမယ်။ ဘယ်သူ့ကိုမှ အဝင်အထွက်မလုပ်စေနဲ့။ " လုံကျန်းက ကျယ်လောင်စွာ အမိန့်ပေးလိုက်သည်။

" နားလည်ပါပြီ။ " ဝေတပ်မှူးများက ဦးညွှတ်ပြီး ထွက်ခွာသွားကြသည်။

" အစီအစဉ်အားလုံး လုပ်ပြီးပြီလား။ " လုံကျန်က ဘေးမှ လက်ထောက်စစ်သူကြီးကို မေးလိုက်သည်။

" ကျွန်တော်မျိုးကိုယ်တိုင် ကိုယ်ရံတော်တွေကို ဦးဆောင်ပြီး အရာအားလုံးကို မြို့အနှံ့မှာ နေရာချထားပြီးပါပြီ။ တကယ်လို့ အဲ့ဒီအခြေအနေကို ရောက်လာခဲ့ရင် ကျွန်တော်တို့က ချင်စစ်တပ်နဲ့အတူ အသေခံတိုက်ပါလိမ့်မယ်။ " လက်ထောက်စစ်သူကြီးက ပြန်ဖြေလိုက်သည်။

" ကောင်းပြီ။ " လုံကျန်းက ခေါင်းညိမ့်လိုက်ပြီး သူ၏ မျက်နှာတွင် ပြတ်သားသော အမူအရာပေါ်လာသည်။ " အရှင်မင်းကြီးနဲ့ ဝေနိုင်ငံရဲ့ ကျေးဇူးတွေအတွက် ငါ့ရဲ့ လုံမိသားစုက အကြိမ်တစ်ထောင် သေရပါစေဦး ကျေးဇူးဆပ်လို့ ​ကျေမှာမဟုတ်ဘူး။ ငါ လုံကျန်း နောက်ဆုံးအင်အားကို သုံးပြီး ဝေနိုင်ငံအတွက် ပေးဆပ်သွားမယ်။ "

ညအချိန်သို့ ရောက်လာခဲ့သည်။ ယန်ကောင်းမြို့၏ အပြင်ဘက်တွင် ဝူအန်းစခန်းက တပ်စွဲထားပြီး တဲအတွင်း စစ်သူကြီးများ စုဝေးနေကြသည်။ ကျောက်ဖုန်းက အဓိကနေရာတွင် ထိုင်နေသည်။

" စစ်သေနာပတိချုပ် စစ်သည်တွေအားလုံး စားသောက်ပြီး မနက်ဖြန်တိုက်ပွဲအတွက် အဆင်သင့်ဖြစ်နေပါပြီ။ " ကျန်ဟန်က ပြောလိုက်သည်။

" ငါ ယွင်ကျုံးမြို့မှာတုန်းက မင်းတို့ကို ပြောခဲ့ပြီးသားပဲ။ " ကျောက်ဖုန်းက လေးနက်စွာ ပြောလိုက်သည်။ " ယန်ကောင်းမြို့ထဲမှာ ဝေစစ်သည်တစ်သိန်းခွဲရှိတယ်။ ရိက္ခါတွေလည်း အလုံအလောက် ရှိတယ်။ သူတို့က ငါတို့ချင်ကို အချိန်အကြာကြီး ယှဉ်ပြိုင်ဖို့ ရည်ရွယ်ထားတာပဲ။ ဒီမြို့ကို ထိုးဖောက်ဖို့ အင်အားသုံးပြီး တိုက်ခိုက်တာကလွဲရင် အခြားနည်းလမ်းမရှိဘူး။ "

" ကျွန်တော်မျိုး တိုက်ခိုက်မှုကို ဦးဆောင်ပါမယ်။ " စစ်သူကြီးသုံးယောက်လုံးက တစ်ပြိုင်နက် တောင်းဆိုလိုက်ကြသည်။

" မနက်ဖြန် တုဆွေက လေးတပ်ဖွဲ့ကို ဦးဆောင်ပြီး မြို့ထဲကို မြားငါးသိန်း ပစ်ခတ်ပြီး ရန်သူကို တတ်နိုင်သမျှ ဖိနှိပ်ရမယ်။ လီယောင်က စစ်သည်တွေကို ရှေ့ပြေးတပ်အဖြစ် ဦးဆောင်ပြီး ငါနဲ့အတူ တိုက်ခိုက်ရမယ်။ မြင်းတပ်ဖွဲ့ကတော့ ယန်ကောင်းမြို့ရဲ့ နောက်ဘက်ကို ပတ်သွားပြီး ဝေစစ်တပ်ရဲ့ ဆုတ်လမ်းကို ဖြတ်တောက်ထားရမယ်။ " ကျောက်ဖုန်းက စစ်သူကြီးသုံးယောက်ကို ကြည့်ပြီး တိုက်ရိုက်အမိန့်ပေးလိုက်သည်။

" အမိန့်အတိုင်းပါ။ " သူတို့သုံးယောက်က ပြန်ပြောလိုက်သည်။

" စစ်သူကြီးလီ " ကျောက်ဖုန်းက လီယောင်ကို ကြည့်လိုက်သည်။

" စစ်သေနာပတိချုပ် " လီယောင်က လေးစားစွာ ကြည့်လိုက်သည်။

" ဒီအချိန်တစ်လျှောက်လုံး တပ်မှူးအချို့က မင်း အရပ်ဘက်ကနေ စစ်ဘက်ကို ကူးပြောင်းလာတာကို ဝေဖန်နေကြတယ်။ အောင်မြင်မှုမရှိဘဲ စစ်သူကြီးရာထူးကို ရထားတယ်လို့ သူတို့က ယုံကြည်နေကြတယ်။ အခု ငါမင်းကို ရှေ့ပြေးတပ်ဖွဲ့ကို ဦးဆောင်ဖို့ အခွင့်အရေးပေးလိုက်မယ်။ မင်း ဒါကို ကောင်းကောင်း အသုံးချနိုင်ဖို့ ငါမျှော်လင့်ပါတယ်။ " ကျောက်ဖုန်းက တည်ငြိမ်စွာ ပြောလိုက်သည်။

" ကျွန်တော် စစ်သေနာပတိချုပ်ကို စိတ်ပျက်အောင် မလုပ်ပါဘူး။ " လီယောက်က စိတ်လှုပ်ရှားစွာဖြင့် ပြောလိုက်သည်။

" ကောင်းပြီ။ " ကျောက်ဖုန်းက ခေါင်းညိမ့်လိုက်သည်။

လီယောင်၏ စစ်တပ်ကို ရှေ့ပြေးတပ်ဖွဲ့အဖြစ် တာဝန်ပေးလိုက်ခြင်းက သူ့ကို အခွင့်အရေးတစ်ခု ပေးလိုက်ခြင်း ဖြစ်သည်။ သူရှိနေလျှင် မြို့ကို ထိုးဖောက်ခြင်းက ခက်ခဲသော အလုပ်တစ်ခု မဟုတ်ပေ။ ထို့ကြောင့် ဤတစ်ကြိမ် အောင်မြင်မှုကို လီယောင်အား ပေးအပ်လိုက်ခြင်းနှင့် တူပေသည်။ လီယောင်က ထိုအခွင့်အရေးကို ဆုပ်ကိုင်နိုင်မလားဆိုသည်မှာ သူ့အပေါ်တွင်သာ မူတည်ပေသည်။