အခန်း (၃၄၈-၃၄၉)

အခန်း (၃၄၈) ယွမ်ချန် ဓားကျမ်းစာ

ချန်ဖေး၏ မျက်နှာပေါ်တွင် အပြုံးတစ်ခု အလိုအလျောက် ပေါ်လာ၏။ ယခင်က ချန်ဟုန်ဂိုဏ်းတွင် ချန်ဖေးသည် ယွမ်ချန် ဓားကျမ်းစာ၏ ပထမ အဆင့်နှစ်ခုကိုသာ ရရှိခဲ့သည်။ တတိယအဆင့်မှာ ပျက်စီးနေ၏။ ကျင့်ကြံ၍ ရသော်လည်း တတိယမြောက် ကျင့်စဉ်အဖြစ် အပြည့်အဝ ပေါင်းစပ်၍ မရခဲ့ပေ။

ယခုမူ ကျောက်တိုင်၏ တတိယမြောက် ကျင့်စဉ်က ချန်ဖေး၏ စိတ်ထဲတွင် အပြည့်အဝ စွဲထင်သွားခဲ့ပြီ ဖြစ်ပြီး ဤသည်က အဆုံးသတ် မဟုတ်သေးချေ။ ကျင့်စဉ် အမွေအနှစ် ဆက်ခံခြင်းက ဆက်လက် ဖြစ်ပေါ်နေ၏။

စတုတ္ထနှင့် ပဉ္စမအဆင့်များတွင်လည်း ကျောက်တိုင်များအတွင်းရှိ သတင်းအချက်အလက်များက ရပ်တန့်မသွားဘဲ ချန်ဖေး၏ အသိစိတ်ပင်လယ်အတွင်းသို့ ဆက်လက် စီးဝင်နေခဲ့သည်။

ရှီရှောက်ဖန်းက မြေပြင်ပေါ်တွင် လဲလျောင်းနေ၏။ ဤအခိုက်အတန့်တွင် ထောင့်ကျနေမှုကြောင့် သူက ချန်ဖေး၏ ကျောပြင်ကို အနည်းငယ် လှမ်းမြင်နေရသည်။ သို့သော် ယခု ကျောပြင်ကို မြင်ရုံဖြင့် ဘာအကျိုးရှိမည်နည်း။ လူတစ်ယောက်၏ မျက်နှာကိုပင် ပြောင်းလဲနိုင်ရာ သာမန် ကျောပြင်တစ်ခုကို ပြောင်းလဲရန်ဆိုသည်မှာ နည်းလမ်းပေါင်း များစွာ ရှိနေပေသည်။

ရှီရှောက်ဖန်းကို အနည်းငယ် မျှော်လင့်ချက် ကင်းမဲ့သွားစေသောအရာမှာ ယခုကဲ့သို့ လူကို တိုက်ရိုက် မြင်နေရသည့်တိုင်အောင် ထိုကျောပြင်မှ ထွက်ပေါ်လာသော မည်သည့် အသက်စွမ်းအင်ကိုမျှ သူ အာရုံမခံနိုင်ခြင်းပင် ဖြစ်သည်။

အရှိန်အဝါအငွေ့အသက်ဆိုသည်မှာ လူတိုင်း ပိုင်ဆိုင်ထားသောအရာ ဖြစ်ပြီး ဒွာရသန့်စင်ခြင်းအဆင့် ပညာရှင်များသည် လူတစ်ဦးကို ခွဲခြားရန် ထိုအချက်အလက်များကို အသုံးပြုလေ့ရှိသည်။

သို့သော် ဤခွဲခြားသတ်မှတ်နည်းက ချန်ဖေးနှင့်ပတ်သက်၍မူ အချည်းနှီးသာ ဖြစ်နေ၏။

တစ်နည်းဆိုရသော် အကယ်၍ ရှီရှောက်ဖန်းသာ ဤတစ်ကြိမ် အသက်ရှင်ကျန်ရစ်ခဲ့လျှင်တောင် နောင်တစ်ချိန် မျက်နှာချင်းဆိုင် ဆုံတွေ့သည့်အခါ ချန်ဖေးကို မှတ်မိမည် မဟုတ်ပေ။ သူ့ကို လှည့်ကွက်တစ်ကွက်တည်းဖြင့် သေလုမြောပါး ဖြစ်စေခဲ့သူမှာ ဤလူပင် ဖြစ်၏။

အမှန်တကယ်တော့ သူ စတင် လှုပ်ရှားလိုက်သည့် အခိုက်အတန့်တွင် ချန်ဖေး၏ အရှိန်အဝါက ပေါ်ထွက်လာခဲ့သည်။ သို့သော် တိုက်ပွဲ အမှန်တကယ် စတင်ချိန်တွင် သူ၏ ဝိညာဉ်သတ်ဖြတ်ခြင်း ကျင့်စဉ် မည်မျှပင် အစွမ်းထက်စေကာမူ သူ၏ အရှိန်အဝါ ပေါက်ကွဲထွက်လာမှုကို ဖုံးကွယ်ထားနိုင်ခြင်း မရှိခဲ့ချေ။

သို့သော် ထိုအခိုက်အတန့်မှာပင် ရှီရှောက်ဖန်း၏ စိတ်ထဲသို့ နတ်ဘုရား သတ်ဖြတ်ခြင်းဓားက ထိုးဖောက်ဝင်ရောက်လာခဲ့၏။ ပြီးပြည့်စုံခြင်း အဆင့်ရှိ ဝိညာဉ်သတ်ဖြတ်ခြင်း ကျင့်စဉ် ပါဝင်နေသော နတ်ဘုရား သတ်ဖြတ်ခြင်းဓားသည် မိမိထက် ကျင့်ကြံခြင်းအဆင့် နိမ့်ကျသူတစ်ဦးအပေါ်တွင် နှိုင်းယှဉ်၍မရလောက်အောင် သေစေနိုင်စွမ်း ရှိသည်။

ထိုအချိန်က ဒွာရသန့်စင်ခြင်း အစောပိုင်းအဆင့်ရှိ ရှီရှောက်ဖန်းမှာ သူ၏ အလိုအလျောက် တုံ့ပြန်မှုဖြင့်သာ ပြန်လည် တိုက်ခိုက်နိုင်ခဲ့ပြီး ရန်သူ မည်သည့်နေရာတွင် ရှိနေကြောင်းကိုပင် မသိနိုင်ခဲ့ပေ။

ထိုအခြေအနေမျိုးတွင် အခြား ဒွာရသန့်စင်ခြင်း အစောပိုင်းအဆင့် တစ်ဦးသာ ဖြစ်နေပါက ရှီရှောက်ဖန်းကို ကွက်လှည့် အနည်းငယ်အတွင်းမှာပင် လွယ်ကူစွာ သတ်ဖြတ်နိုင်မည် ဖြစ်သည်။

ဤသည်က ထိုအချိန်က ရှီရှောက်ဖန်း၏ ဒဏ်ရာများ မည်မျှ ပြင်းထန်ခဲ့ကြောင်းကို ပြသနေ၏။

ရှီရှောက်ဖန်းက မြေကြီးပေါ်တွင် လဲလျောင်းနေပြီး ချန်ဖေး၏ ကျောပြင်ကို စူးစိုက်ကြည့်နေရုံမှလွဲ၍ ဘာမျှ မလုပ်နိုင်ခဲ့ပေ။ ဤနည်းဖြင့်သာ သူ၏ ရင်ထဲရှိ နာကြည်းချက်များကို ဖွင့်ထုတ်နိုင်သကဲ့သို့ ဖြစ်နေ၏။

အချိန် မည်မျှ ကြာသွားသည် မသိပြီးနောက် ချန်ဖေး၏ လက်က ကျောက်တိုင်မှ ခွာသွားသည်ကို ရှီရှောက်ဖန်း သတိပြုမိလိုက်သည်။ ထူးဆန်းသည်မှာ ချန်ဖေး၏ မျက်နှာကို မမြင်ရသော်လည်း ဤအခိုက်အတန့်တွင် ချန်ဖေး၏ ဝမ်းသာပျော်ရွှင်မှုကို ရှီရှောက်ဖန်းက အာရုံခံမိနေခြင်းပင်။

မှန်ပေသည်။ လူတစ်ယောက်၏ ကျောပြင်ကို ကြည့်ရုံဖြင့် ထိုလူ၏ စိတ်အခြေအနေကို အနည်းငယ် သိနိုင်ပေသည်။

ဤအခိုက်အတန့်တွင် ထိုလူ မည်မျှ စိတ်လှုပ်ရှားနေမည်နည်း။

ချန်ဖေး စိတ်လှုပ်ရှားနေသလား။ သေချာပေါက် ချန်ဖေး စိတ်လှုပ်ရှားနေသည်။

အဆင့် ခုနစ်ဆင့်... အပြစ်အနာအဆာကင်းပြီး ပြီးပြည့်စုံသော ယွမ်ချန် ဓားကျမ်းစာ... ချန်ဖေးက ဘယ်လိုလုပ် စိတ်မလှုပ်ရှားဘဲ နေနိုင်မည်နည်း။

ဤကျောက်တိုင်ပေါ်ရှိ ယွမ်ချန် ဓားကျမ်းစာမှာ အံ့ဩဖွယ်ကောင်းလောက်အောင် ပြည့်စုံနေခဲ့သည်။ ကျောက်တိုင်ပေါ်သို့ သူ၏ လက်ဝါးကို မတင်မီက ယွမ်ချန် ဓားကျမ်းစာမှာ ပျက်စီးနေဆဲ ဖြစ်နိုင်သည်ဟူသော အဆိုးဆုံး အခြေအနေအတွက် ချန်ဖေးက ကြိုတင် ပြင်ဆင်ထားခဲ့ပြီး ဖြစ်၏။

ထို့ကြောင့် ယွမ်ချန် ဓားကျမ်းစာ၏ ပထမ အဆင့်သုံးဆင့်ကို အပြည့်အဝ ရရှိချိန်တွင်ပင် သူ အမြတ်ထွက်နေပြီဟု ချန်ဖေးက ခံစားခဲ့ရသည်။ ထို့နောက် ပထမ အဆင့်ငါးဆင့်ကို အပြည့်အဝ ရရှိချိန်တွင်မူ ချန်ဖေး၏ စိတ်လှုပ်ရှားမှုမှာ စကားဖြင့် ဖော်ပြ၍ မရနိုင်တော့ချေ။

ပြီးပြည့်စုံသော ယွမ်ချန် ဓားကျမ်းစာကို ချန်ဖေး၏ အသိစိတ်ပင်လယ်ထဲသို့ လွှဲပြောင်းပေးလိုက်ချိန်တွင် ချန်ဖေး၏ အသိစိတ်ပင်လယ်က ဝင်တိုက်ခံလိုက်ရသကဲ့သို့ပင် ခံစားလိုက်ရ၏။

ပြီးပြည့်စုံသော ကျင့်စဉ် ခြောက်ခုကို ရရှိထားပြီး ယွမ်ချန် ဓားကျမ်းစာက ပြီးပြည့်စုံသော ကျင့်စဉ်အခြေခံဖြစ်နေသဖြင့် ချန်ဖေးက ထိုကျင့်စဉ် ခြောက်ခုစလုံးကို အတူတကွ ပေါင်းစပ်နိုင်သည်။

ယွမ်ချန် ကြယ်စင်ဓားခန္ဓာ တစ်ခု လိုအပ်နေသော်လည်း ကျင့်စဉ် ခြောက်ခုကို ပေါင်းစပ်လိုက်ခြင်းက နောက်ဆုံးတွင် ဒွာရ တစ်ရာကျော်ကို ရရှိစေသည်။ ဒွာရ ကိုးဆယ်သာ ဖွင့်နိုင်သော ကျင့်စဉ်များနှင့် နှိုင်းယှဉ်ပါက ဤသည်က အရည်အသွေးပိုင်းအရ ကြီးမားသော ခုန်ပျံကျော်လွှားမှုပင် ဖြစ်၏။

ထို့အပြင် ယွမ်ချန် ဓားကျမ်းစာ၏ အဆင့် ခုနစ်ဆင့်စလုံး ရှိနေပြီး ဂိုဏ်းအတွင်း၌ ယွမ်ချန် ကြယ်စင်ဓားခန္ဓာ၏ ကျင့်ကြံခြင်း နည်းလမ်း သုံးဆယ့်သုံးခု ရှိနေသဖြင့် ချန်ဖေးက ယွမ်ချန် ကြယ်စင်ဓားခန္ဓာကို အတင်းအကျပ် ပေါင်းစပ်ပစ်နိုင်သည်။

ဖွင့်လှစ်နိုင်သော ဒွာရ အရေအတွက်ကို မတိုးမြှင့်ပေးနိုင်သော်လည်း တိုက်ခိုက်ရေး စွမ်းအားကိုမူ အမှန်တကယ်ပင် မြှင့်တင်ပေးနိုင်၏။

ထို့အပြင် ယွမ်ချန် ကြယ်စင်ဓားခန္ဓာနှင့် ပတ်သက်၍ သဲလွန်စအချို့ ရှိနေသည်။

လက်ရှိ ဂိုဏ်းအတွင်းရှိ ယွမ်ချန် ကြယ်စင်ဓားခန္ဓာကို မူလက နတ်တိမ်ဓားဂိုဏ်းမှ ရရှိခဲ့ခြင်း ဖြစ်သည်။ ချန်ဖေး အစစ်အမှန် တပည့်အဖြစ် ရှိနေစဉ်က နတ်တိမ်ဓားဂိုဏ်း၏ ဒုတိယ အစစ်အမှန်တပည့် ဖြစ်သော ရှန်းထူချန်ကို အနိုင်ယူခဲ့စဉ် နတ်တိမ်ဓားဂိုဏ်းမှ ဆုလာဘ်အဖြစ် ပေးအပ်ခဲ့ခြင်း ဖြစ်၏။

အကယ်၍ ပြီးပြည့်စုံသော ယွမ်ချန် ကြယ်စင်ဓားခန္ဓာ ရှိနေပါက နတ်တိမ်ဓားဂိုဏ်းတွင်ရှိသည်မှာ ဖြစ်နိုင်ခြေ အများဆုံးပင် ဖြစ်သည်။

ဌာနေပြန်ဓားမျှော်စင်တွင် ပြီးပြည့်စုံသော ယွမ်ချန် ဓားကျမ်းစာနှင့် အခြား ကျင့်စဉ်အချို့ ရှိနေသော်လည်း ယွမ်ချန် ကြယ်စင်ဓားခန္ဓာမှာ ထင်ရှားစွာပင် ပျောက်ဆုံးနေ၏။ နတ်တိမ်ဓားဂိုဏ်းကမူ ယွမ်ချန် ကြယ်စင်ဓားခန္ဓာ၏ မပြည့်စုံသော ကျင့်စဉ် တစ်ခုကိုသာ ထုတ်ပေးနိုင်ခဲ့သည်။

ဤအဖြစ်အပျက် နှစ်ခုမှာ တိုက်ဆိုင်မှုတစ်ခု သက်သက် ဖြစ်နိုင်သလို သို့မဟုတ် ကြားတွင် တစ်စုံတစ်ရာ ဆက်စပ်မှု ရှိနေခြင်းလည်း ဖြစ်နိုင်ပေသည်။

ချန်ဖေးက အခြား ကျောက်တိုင်များကို တစ်ချက်ကြည့်လိုက်သည်။ ယွမ်ချန်ဓားဂိုဏ်း၏ ကျင့်စဉ်ဟု ရေးထိုးထားသော ကျောက်တိုင်အပြင် အခြား အမွေအနှစ် တစ်ခုနှင့် ဌာနေပြန်ဓားမျှော်စင်၏ ကိုယ်ပိုင် ကျင့်စဉ် သုံးခု ရှိသေး၏။

ပုံမှန် အခြေအနေမျိုးတွင် ချန်ဖေးသည် လူတစ်ဦး၏ ဝိညာဉ်အနှစ်သာရကို သန့်စင်သည့် အဆင့်ရှိ ဤကဲ့သို့သော ကျင့်စဉ်မျိုးကို ကြည့်ရှုရန် စိတ်ဝင်စားပေမည်။ သို့သော် ဤနေရာတွင် တစ်နာရီကျော် အချိန်ဖြုန်းခဲ့ပြီးဖြစ်ရာ မထင်မှတ်ထားသော အဖြစ်အပျက်များကို ရှောင်ရှားရန် အမြန်ဆုံး ထွက်ခွာခြင်းက အကောင်းဆုံး ဖြစ်သည်။

ကျောက်တိုင် ကိုးခုအတွင်းရှိ အမွေအနှစ် ကျောက်တုံးများနှင့် ပတ်သက်၍မူ ချန်ဖေးက မထိခဲ့ပေ။ အမွေအနှစ် ကျောက်တိုင်များသည် ဤနေရာရှိ အစီအရင်နှင့် ချိတ်ဆက်ထား၏။ အကယ်၍ ချန်ဖေးသာ ဤကျောက်တိုင်များကို ဖျက်ဆီးရန် ရဲတင်းပါက ဌာနေပြန်ဓားမျှော်စင်သည် နောက်တစ်ခဏမှာပင် ပျက်စီးသွားမည် ဖြစ်သည်။ ပင်မ တောင်ထွတ်ပေါ်ရှိ လူနှစ်ဦးကလည်း တစ်စုံတစ်ခု ပြောင်းလဲသွားကြောင်း ချက်ချင်း အာရုံခံမိသွားမည် ဖြစ်၏။

ချန်ဖေးက ဤအစီအရင်ကို ထိန်းချုပ်ထားနိုင်လျှင် ပြဿနာမရှိပါ။ သို့သော် ဤအစီအရင်က အလွန် ကြီးမားကျယ်ပြန့်ပြီး သွေးအထိအတွေ့၏ စွမ်းအားဖြင့် လုံးဝ သိမ်းပိုက်နိုင်ရန် အလွန် အချိန်ကြာမြင့်မည် ဖြစ်သည်။

အကယ်၍ ချန်ဖေးသာ အမွေအနှစ် ကျောက်တုံး အနည်းငယ်ကို ရယူရန်အတွက် ထိုအချိန်များ အားလုံးကို အသုံးပြုခဲ့ပါက သူ လုံးဝ ရူးသွပ်နေခြင်းသာ ဖြစ်ပေလိမ့်မည်။

ဌာနေပြန်ဓားမျှော်စင်တွင် ဤကျင့်စဉ်များ၏ ကျောက်စိမ်း စာလိပ် မှတ်တမ်းများ ရှိနေမည်မှာ သေချာသည်။ အမွေအနှစ်ကျောက်တုံးကို ဖျက်ဆီးလိုက်သည်ဖြစ်စေ၊ ယူဆောင်သွားသည်ဖြစ်စေ ချန်ဖေးနှင့် ယွမ်ချန်ဓားဂိုဏ်းအတွက်မူ သိပ်ပြီး အရေးမပါလှပေ။

ချန်ဖေးက ခေါင်းလှည့်၍ အဝေးမှ ရှီရှောက်ဖန်းကို တစ်ချက်ကြည့်လိုက်သည်။ သူ၏ ညာလက်ကို အနည်းငယ် ဝှေ့ယမ်းလိုက်ရာ ရှီရှောက်ဖန်း၏ ကိုယ်ပေါ်ရှိ ဝိညာဉ်ကျောက်တုံးများနှင့် ဆေးလုံးများက ချန်ဖေး၏ အရှေ့သို့ လွင့်ပျံလာ၏။

သေချာသည်မှာ အဖိုးတန်ဆုံးအရာက ဝိညာဉ်ဓားပင် ဖြစ်သည်။

ချန်ဖေးက အရာအားလုံးကို အာကာသ အကွက်ထဲသို့ ပစ်ထည့်ပြီးနောက် ယခင်က သူ ထိန်းချုပ်ထားခဲ့သော အစီအရင်၏ သေးငယ်သော ဧရိယာဆီသို့ လျှပ်တစ်ပြက် သွားလိုက်၏။ သူက သွေးလက်တံများကို အဆက်မပြတ် မထုတ်လွှတ်ထားခဲ့သဖြင့် ဤထိန်းချုပ်ထားသော ဧရိယာမှာ သူ၏ မူလအခြေအနေသို့ ပြန်လည်ရောက်ရှိစ ပြုနေပြီ ဖြစ်သည်။

ချန်ဖေး၏ လက်မောင်းတွင် ဓားရာတစ်ခု ပေါ်လာပြီး သွေးများက မြူအဖြစ် ပြောင်းလဲသွားကာ ထိုဧရိယာကို လွှမ်းခြုံသွား၏။ လက်ဖက်ရည် တစ်ခွက်သောက်ချိန်ထက် နည်းပါးသော အချိန်အတွင်းမှာပင် ထိုဧရိယာက ချန်ဖေး၏ လက်ထဲသို့ ပြန်လည်ရောက်ရှိသွားသည်။

နောက်တစ်ခဏတွင် ချန်ဖေး၏ ခန္ဓာကိုယ်က အစီအရင်ကို ဖြတ်သန်းသွားပြီး ရေကန်အောက်ခြေမှ ထွက်ပေါ်လာ၏။

ချန်ဖေးက လျင်မြန်စွာ ရွေ့လျားလိုက်ပြီး ရေကန်မျက်နှာပြင်မှ ပေါ်ထွက်လာခဲ့ပြီ ဖြစ်သည်။ ပတ်ဝန်းကျင်ကို တစ်ချက်ကြည့်လိုက်ရာ ကျင့်စဉ်ကို ရရှိပြီးပြီဖြစ်သဖြင့် ဌာနေပြန်ဓားမျှော်စင်တွင် ဆက်နေရန် အဓိပ္ပာယ်မရှိတော့ကြောင်း ချန်ဖေး သိလိုက်၏။

ဌာနေပြန်ဓားမျှော်စင်က အောက်ဘက်ရှိ အမွေအနှစ် ဧရိယာ၏ အခြေအနေကို မရှာဖွေတွေ့ရှိသေးသည်ကို အခွင့်ကောင်းယူ၍ ချန်ဖေးက သဘာဝကျစွာပင် တတ်နိုင်သမျှ ဝေးဝေးသို့ ပြေးထွက်သွား၏။ အကွာအဝေး တစ်ခုအထိ ရောက်ရှိသွားသရွေ့ ဌာနေပြန်ဓားမျှော်စင်က ချန်ဖေးကို ရှာတွေ့နိုင်တော့မည် မဟုတ်ပေ။

ချန်ဖေး၏ ပုံရိပ်က တစ္ဆေသဖွယ် ဝေဝါးသွားပြီး ဌာနေပြန်ဓားမျှော်စင်၏ အစွန်းဘက်သို့ တစ်ဟုန်ထိုး ပြေးထွက်သွားသည်။

ဂိုဏ်းတစ်ခုလုံးကို အစီအရင်တစ်ခုဖြင့် လွှမ်းခြုံထားသော်လည်း အသင့်အတင့်မျှသော ကာကွယ်မှုသာ ပေးစွမ်းနိုင်ပြီး ပြင်ပလူများကို ကာကွယ်ရန်သာ အဓိက အသုံးပြု၍ အတွင်းပိုင်းအပေါ် များစွာ ထိန်းချုပ်နိုင်စွမ်း မရှိပေ။

သို့သော် တစ်ယောက်ယောက်က အတွင်းမှနေ၍ တိုက်ရိုက် ဖြတ်သန်းသွားမည်ဆိုပါက အစီအရင်ထံမှ တုံ့ပြန်မှုကို ဖြစ်ပေါ်စေဆဲပင်။

ထို့ကြောင့် ချန်ဖေးက တိတ်တဆိတ် မထွက်ခွာမီ အစီအရင်၏ အစိတ်အပိုင်း သေးသေးလေးတစ်ခုကို ထိန်းချုပ်ရန် သွေးအထိအတွေ့ကို အသုံးပြုရန် ဆုံးဖြတ်လိုက်၏။

အစီအရင်၏ အစွန်းတွင် သွေးမြူများက လေထုထဲတွင် ပြည့်နှက်သွားသည်။ ချန်ဖေး အရှေ့ရှိ အစီအရင် ဧရိယာမှာ တဖြည်းဖြည်း ချန်ဖေး၏ ထိန်းချုပ်မှုအောက်သို့ ရောက်ရှိလာ၏။

ရုတ်တရက် ချန်ဖေးက အနည်းငယ် မျက်မှောင်ကြုတ်လိုက်ပြီး ဌာနေပြန်ဓားမျှော်စင်၏ ပင်မ တောင်ထွတ်ဆီသို့ လှည့်ကြည့်လိုက်သည်။

နောက်တစ်ခဏတွင် ဌာနေပြန်ဓားမျှော်စင်၏ အစီအရင် တစ်ခုလုံးက ချက်ချင်း တုန်ခါသွားပြီး အစီအရင်တွင် တွယ်ကပ်နေသော သွေးမြူများမှာ ရုတ်တရက် ခါထုတ်ခံလိုက်ရ၏။

အကယ်၍ တစ်ယောက်ယောက်က အစီအရင်ကို တက်ကြွစွာ ထိန်းချုပ်လိုက်ပါက သွေးအထိအတွေ့သည် ထပ်မံ ထိုးဖောက် ဝင်ရောက်နိုင်ခြင်း မရှိတော့ပေ။

သွေးအထိအတွေ့သည် ထိန်းချုပ်မှုမရှိဘဲ အလိုအလျောက် အလုပ်လုပ်နေသော အစီအရင်များကိုသာ အကျိုးသက်ရောက်နိုင်၏။

တစ်ယောက်ယောက်က အစီအရင်ကို ထိန်းချုပ်လိုက်သည်နှင့် ယခု ဖြစ်ပျက်နေသည့်အတိုင်း သွေးမြူ၏ စွမ်းအားကို တိုက်ရိုက် ဖယ်ရှားပစ်မည် ဖြစ်သည်။

ထို့အပြင် ဤအခိုက်အတန့်တွင် စောင့်ကြည့်ခံနေရသည့် ခံစားချက်အနည်းငယ်က ချန်ဖေး၏ အာရုံထဲသို့ စိမ့်ဝင်လာ၏။ အကယ်၍ ချန်ဖေးသာ ဒွာရသန့်စင်ခြင်း အစောပိုင်းအဆင့်မျှသာ ဖြစ်နေပါက ဤစောင့်ကြည့်နေမှုကို သတိပြုမိမည် မဟုတ်သော်လည်း ချန်ဖေး၏ စိတ်စွမ်းအားမှာ ဒွာရသန့်စင်ခြင်း နောက်ဆုံးအဆင့်သို့ ရောက်ရှိနေပြီ ဖြစ်သည်။

ထို့ကြောင့် ချန်ဖေးက ဤစောင့်ကြည့်နေမှုကို ပေါ်လာသည်နှင့် တစ်ပြိုင်နက် သတိပြုမိလိုက်၏။

ဌာနေပြန်ဓားမျှော်စင်မှ လူများက သူ့ကို တွေ့သွားကြပြီ ဖြစ်သည်။

အမွေအနှစ်နေရာရှိ အပြောင်းအလဲများကို တွေ့ရှိသွားခြင်း ဖြစ်နိုင်သလို အခြားသော အကြောင်းပြချက်များလည်း ရှိနိုင်သော်လည်း ယခုအချိန်မှာ အဆိုပါအရာများကို စဉ်းစားနေရမည့် အချိန်မဟုတ်ပေ။ ချန်ဖေး ထွက်ခွာရမည် ဖြစ်၏။

ဤအခိုက်အတန့်တွင် စောင့်ကြည့်ခံနေရသည့် ခံစားချက်သက်သက်မျှ မဟုတ်တော့ပေ။

ချန်ဖေးက သူ့ထံသို့ ဦးတည်လာသော သတိပေးချက် တစ်ခုကို ခံစားလိုက်ရပြီး ဖိအားတစ်ခုက သူ့ကို လွှမ်းခြုံလာ၏။ ရှင်းလင်းစွာပင် တစ်ယောက်ယောက်က သူ့နောက်သို့ လိုက်နေပြီ ဖြစ်သည်။

ချန်ဖေးက ဌာနေပြန်ဓားမျှော်စင်ကို တစ်ချက်ကြည့်လိုက်သည်။ သူ၏ ပုံရိပ်က လျှပ်တစ်ပြက် ရွေ့လျားသွားပြီး ကောင်းကင် ရှောင်တိမ်းခြင်း ကိုယ်ဖော့ပညာကို အစွမ်းကုန် အသုံးပြုကာ အစီအရင်ထဲမှ တိုက်ရိုက် ဖောက်ထွက်သွား၏။

"ငါ့ ဌာနေပြန်ဓားမျှော်စင်ကို ဘယ်သူက ခိုးဝင်ရဲတာလဲ... အဲ့ဒီမှာရပ်စမ်း..."

အနောက်မှနေ၍ ကျယ်လောင်သော ဟိန်းဟောက်သံကြီး ထွက်ပေါ်လာ၏။ အကွာအဝေးမှာ အလွန် ဝေးကွာနေသေးသော်လည်း ကြောက်မက်ဖွယ်ကောင်းသော ဖိအားကို သိသိသာသာ ခံစားနေရပြီ ဖြစ်သည်။

ချန်ဖေးက မရပ်တန့်ဘဲ သူ၏ ရင်ခွင်ထဲရှိ ဖေးဆော့ကျန့်ကို အသက်သွင်းလိုက်ရာ အံ့မခန်း မြန်ဆန်နေပြီးဖြစ်သော သူ၏ အမြန်နှုန်းမှာ ပို၍ အံ့မခန်းအဆင့်သို့ ရောက်ရှိသွား၏။

တစ်ချိန်တည်းမှာပင် ဝိညာဉ်သတ်ဖြတ်ခြင်း ကျင့်စဉ်ကို အသက်သွင်းလိုက်ပြီး ကိုယ်ဖော့ပညာကို အစွမ်းကုန် အသုံးပြုမှုကြောင့် ချန်ဖေး ထုတ်လွှတ်လိုက်သော ချီစွမ်းအင်များ အားလုံးကို ဖျောက်ဖျက်ပစ်လိုက်သည်။

ဌာနေပြန်ဓားမျှော်စင်၏ ဂိုဏ်းချုပ် ရှင်းရှင်းကျောက်သည် မျက်စိတစ်မှိတ်အတွင်းမှာပင် အစီအရင်၏ အရှေ့သို့ ရောက်ရှိလာပြီးနောက် ချီအရှိန်အဝါကို ခြေရာခံ၍ လိုက်လံ သတ်ဖြတ်ရန် ရည်ရွယ်ချက်ဖြင့် ဖြတ်သန်းသွား၏။ သို့သော် ပတ်ဝန်းကျင်တွင် မည်သည့် ချီအရှိန်အဝါ ခြေရာမှ ကျန်ရှိမနေခဲ့ပေ။

ခိုးဝင်သူသည် တည်ရှိမှုကို ဖုံးကွယ်နိုင်ကြောင်း တပည့်များ၏ သတင်းပို့ချက်ကို သတိရသွားသောအခါ ရှင်းရှင်းကျောက်က အနည်းငယ် မျက်မှောင်ကြုတ်လိုက်သည်။

ယခုအချိန်၌ ရှောက်ဖန်မှာ သေလုမြောပါး ဖြစ်နေပြီ ဖြစ်သည်။ အမွေအနှစ် နေရာသည် ယခုအခါ လာချင်တိုင်း လာ၍ သွားချင်တိုင်း သွားနိုင်သော နေရာတစ်ခု ဖြစ်နေပြီး ယခု ဤလူက ပို၍ပင် ရဲတင်းစွာ ထွက်သွားလိုနေ၏။ အကယ်၍ ဤသတင်းသာ ပြန့်သွားပါက ဌာနေပြန်ဓားမျှော်စင်၏ ဂုဏ်သတင်းသည် မည်သို့ ဖြစ်သွားမည်နည်း။

‘ဌာနေပြန်ဓားမျက်လုံး... ပွင့်စမ်း…’’

ရှင်းရှင်းကျောက်က သူ၏ ညာလက်ဝါးဖြင့် ဓားလက်ညှိုး ပုံစံ ပြုလုပ်လိုက်ပြီး သူ၏ မျက်ခုံးကို ဖြတ်၍ မျဉ်းတစ်ကြောင်း ဆွဲလိုက်ရာ သွေးအမှတ်အသား တစ်ခု ကျန်ရစ်ခဲ့၏။ တစ်ချိန်တည်းမှာပင် ထိုအမှတ်အသားမှ သဲ့သဲ့မျှသော အလင်းတန်းတစ်ခု တောက်ပလာသည်။

လုံးဝ ခြေရာမရှိသင့်သောအရာက ဌာနေပြန်ဓားမျက်လုံးအောက်တွင် ရုတ်တရက် ပြောင်းလဲသွား၏။

ကမ္ဘာကြီး တစ်ခုလုံးက အဖြူနှင့် အမည်း ဖြစ်သွားပြီး တောင်ပေါ်လမ်းတစ်လျှောက်တွင် အနီရောင် အစင်းကြောင်းများသာ ပြန့်နှံ့နေ၏။ ဤသည်တို့မှာ ချန်ဖေး ချန်ရစ်ခဲ့သော ခြေရာများ ဖြစ်သော်လည်း အံ့မခန်း အမြန်နှုန်းဖြင့် ပျောက်ကွယ်သွားနေသည်။

ဌာနေပြန်ဓားမျက်လုံးက အစွမ်းထက်သော်လည်း အားနည်းချက်များကလည်း သိသာထင်ရှားလှ၏။

စိတ်စွမ်းအား အမြောက်အမြားကို စားသုံးသည့်အပြင် အချိန်ကြာလာသည်နှင့်အမျှ ခြေရာများစွာက တဖြည်းဖြည်း ပျောက်ကွယ်သွားမည် ဖြစ်သည်။

သို့သော် ခြေရာများ ပျောက်ကွယ်သွားသည့် အမြန်နှုန်းက ရှင်းရှင်းကျောက်၏ မျှော်မှန်းချက်များထက် အနည်းငယ် ကျော်လွန်နေခဲ့၏။ ပြိုင်ဘက်က တည်ရှိမှုကို ဖုံးကွယ်ရန်အတွက် အမှန်တကယ်ပင် ထူးခြားသော ကျွမ်းကျင်မှုတစ်ခုကို ပိုင်ဆိုင်ထားသည်။ အကယ်၍ သူသာ ချက်ချင်း လိုက်မလာခဲ့ပါက ဌာနေပြန်ဓားမျက်လုံးက မည်သည့်ခြေရာကိုမျှ ရှာတွေ့နိုင်တော့မည် မဟုတ်ပေ။

ရှင်းရှင်းကျောက်က လျင်မြန်စွာ ရွေ့လျားသွားပြီး ဓားအိမ်ကနေ ဓားတစ်ချောင်း ဆွဲထုတ်လိုက်သကဲ့သို့ ထိုနေရာမှ ပျောက်ကွယ်သွား၏။

ချန်ဖေး၏ လှုပ်ရှားမှုများက မယုံနိုင်လောက်အောင် မြန်ဆန်သော်လည်း ရှင်းရှင်းကျောက်က ချန်ဖေးထက်ပင် ပိုမို မြန်ဆန်နေခဲ့သည်။

‘ဒွာရသန့်စင်ခြင်း နောက်ဆုံးအဆင့်၏ စွမ်းအား... ပြီးပြည့်စုံခြင်း အဆင့်ရှိ ကိုယ်ဖော့ပညာ…’

အစွမ်းကုန် ပြေးထွက်နေသော ချန်ဖေးသည် အနောက်မှနေ၍ ဖိအားတစ်ခု လာနေသည်ကို ရုတ်တရက် ခံစားလိုက်ရ၏။ သူ၏ အမူအရာက အနည်းငယ် ပြောင်းလဲသွားသည်။ တစ်ဖက်လူက သူ၏ ခြေရာကို ရှာတွေ့ပြီး လိုက်မီလာခဲ့ပြီ ဖြစ်၏။

တစ်နေရာရာတွင် ခြေရာတစ်ခုခု ကျန်ရစ်ခဲ့သည်မှာ သေချာပေသည်။

ဝိညာဉ်သတ်ဖြတ်ခြင်း ကျင့်စဉ်က အံ့မခန်း ဖြစ်သော်လည်း သေချာပေါက် ပြီးပြည့်စုံနေခြင်း မဟုတ်ချေ။ လောကကြီးတွင် ပြီးပြည့်စုံသောအရာ ဆိုသည်မှာ အလွန် ရှားပါးလှသည်။

အရာတစ်ခုကို ပြီးပြည့်စုံသည်ဟု သင်ထင်မြင်သောအခါ ယင်းက သင်၏ ကိုယ်ပိုင် အစစ်အမှန်နှင့် အမြင်မှာ လုံလောက်အောင် မြင့်မားခြင်း မရှိသေးကြောင်းကို ဆိုလိုခြင်းသာ ဖြစ်သည်။

ချန်ဖေးက တည်ငြိမ်နေဆဲ ဖြစ်ပြီး သူ၏ ပုံရိပ်က ပြောင်းလဲသွားကာ သူ၏ ကိုယ်ပွားက ခွဲထွက်သွား၏။ ‘ပြိုင်ဘက်က ခြေရာကို လိုက်နေခြင်း ဖြစ်သဖြင့် ထပ်တူကျနေသော ထိုခြေရာနှစ်ခုအနက် မည်သည့်ခြေရာကို လိုက်မည်နည်းဆိုသည်ကို ကြည့်ကြတာပေါ့…’’

အခန်း (၃၄၉) ဂိုဏ်းရဲ့ သူရဲကောင်း

ချန်ဖေးအတွက် ကိုယ်ဖော့ပညာကို အဓိကထားမြှင့်တင်ခြင်း အကြောင်းအရင်းမှာ ကောင်းကင် ရှောင်တိမ်းခြင်း ကိုယ်ဖော့ပညာ၏ အဖိုးတန်ဆုံး အချက်ဖြစ်သည့် သူ၏ ကိုယ်ပွားပင် ဖြစ်သည်။ အရှိန်အဝါဖြစ်စေ၊ အခြားအရာများဖြစ်စေ အသက်ဝင် ပီပြင်လွန်းလှ၏။

အထူးသဖြင့် ယခုအခါ ဝိညာဉ်သတ်ဖြတ်ခြင်း ကျင့်စဉ် ရှိနေသဖြင့် အစစ်အမှန် လူနှင့် ကိုယ်ပွားကြားရှိ မည်သည့် ဆက်သွယ်မှုကိုမဆို လုံးလုံးလျားလျား ဖျောက်ဖျက်ပစ်နိုင်ရာ ထိုနှစ်ခုကြား ကွာခြားချက်ကို ခွဲခြားသိမြင်ရန် ပို၍ပင် ခက်ခဲသွားသည်။

ဒွာရ ၇၅ ခု ဖွင့်လှစ်နိုင်သော ကောင်းကင် ရှောင်တိမ်းခြင်း ကိုယ်ဖော့ပညာသည် ဒွာရသန့်စင်ခြင်း အလယ်အလတ်အဆင့်၏ ဒွာရ ၇၂ ခု သတ်မှတ်ချက်ကို ကပ်သီလေး ကျော်လွန်နေ၏။ ဒွာရ အရေအတွက် သီးသန့်အရဆိုလျှင် ကောင်းကင် ရှောင်တိမ်းခြင်း ကိုယ်ဖော့ပညာသည် ဒွာရသန့်စင်ခြင်း နောက်ဆုံးအဆင့်ထိ ကျင့်ကြံနိုင်သော အခြားသော အမွေအနှစ် များစွာကြားတွင် အမှန်တကယ်ပင် သာမန်မျှသာ ဖြစ်သည်။

ဒွာရသန့်စင်ခြင်း အစောပိုင်းနှင့် အလယ်အလတ်အဆင့်များ အတွင်း၌ ကောင်းကင် ရှောင်တိမ်းခြင်း ကိုယ်ဖော့ပညာ၏ အားနည်းချက်များကို မမြင်တွေ့ရသေးပေ။ ထို့အပြင် ချန်ဖေးက ကောင်းကင် ရှောင်တိမ်းခြင်း ကိုယ်ဖော့ပညာကို ပြီးပြည့်စုံခြင်း အဆင့်ထိ ကျင့်ကြံပြီးဖြစ်ရာ ဒွာရသန့်စင်ခြင်း အစောပိုင်းနှင့် အလယ်အလတ်အဆင့်များတွင် ကြီးမားသော အားသာချက်တစ်ခု ရှိနေသည်။

သို့သော် ချန်ဖေးက သူ၏ ကျင့်ကြံခြင်းကို ဒွာရသန့်စင်ခြင်း နောက်ဆုံးအဆင့် သို့မဟုတ် ဒွာရသန့်စင်ခြင်း အထွတ်အထိပ်အဆင့်သို့ မြှင့်တင်လိုက်သောအခါ ကောင်းကင် ရှောင်တိမ်းခြင်း ကိုယ်ဖော့ပညာ၏ အားသာချက်မှာ ဆက်လက် တည်ရှိနေတော့မည် မဟုတ်ချေ။

ထို့ကြောင့် ဖေးဆော့ကျန့်မှ အားဖြည့်ပေးမှု ရှိနေသော်ငြားလည်း ချန်ဖေးသည် ရှင်းရှင်းကျောက်၏ လိုက်လံ ဖမ်းဆီးမှုမှ မလွတ်မြောက်နိုင်ခဲ့ခြင်း ဖြစ်၏။

ဒွာရ ၇၂ ခုလုံးကို တစ်ခုတည်းအဖြစ် ပေါင်းစပ်ထားသော ဒွာရသန့်စင်ခြင်း နောက်ဆုံးအဆင့်သည် ဒွာရသန့်စင်ခြင်း နောက်ဆုံးအဆင့်၏ အစွမ်းထက်သော အခြေခံအုတ်မြစ် ဖြစ်သည်။ မိမိဂိုဏ်း၏ အမွေအနှစ် ကိုယ်ဖော့ပညာနှင့် ပေါင်းစပ်လိုက်သောအခါ ချန်ဖေးကို အမီလိုက်နိုင်ခြင်းမှာ ရှောင်လွှဲ၍ မရနိုင်သောအရာပင် ဖြစ်၏။

သို့သော် ဤအခိုက်အတန့်တွင် ချန်ဖေး၏ မျက်နှာပေါ်၌ ထိတ်လန့်သည့် အရိပ်အယောင်မျှ မရှိချေ။ ကိုယ်ပွားက အခြား တစ်ဖက်သို့ ထွက်ပြေးသွားစဉ် ချန်ဖေးက ကြိုတင် သတ်မှတ်ထားသော လမ်းကြောင်းအတိုင်း ဆက်လက် ပြေးလွှားသွားသည်။

အချိန်တိုအတွင်းမှာပင် ရှင်းရှင်းကျောက်က တောင်ထိပ်တစ်ခုသို့ ရောက်ရှိလာ၏။ ဌာနေပြန် ဓားမျက်လုံးအောက်တွင် အမှတ်အသား နှစ်ခုက မတူညီသော လမ်းကြောင်းများဆီသို့ ဦးတည်နေသည်။ ရှင်းရှင်းကျောက်က မျက်မှောင်ကြုတ်လိုက်၏။ အမှတ်အသားများကို ကြည့်ရုံမျှဖြင့် မည်သည့်အရာက ခန္ဓာကိုယ်အစစ် ဖြစ်ကြောင်း ခွဲခြားသိမြင်ရန် ခက်ခဲလှသည်။

‘ချွင်…’

ရှင်းရှင်းကျောက်က သူ၏ ဝိညာဉ်ဓားကို ဆွဲထုတ်လိုက်ပြီး ဓားတစ်ချက် ခုတ်ပိုင်းလိုက်ရာ ဓားဆန္ဒတစ်ခုက ကောင်းကင်သို့ ထိုးတက်သွားပြီး သစ်တောအုပ် အတွင်း၌ လွင့်မျောနေ၏။ နောက်တစ်ခဏတွင် အခြား ဓားဆန္ဒတစ်ခုက အနောက်မှ ထွက်ပေါ်လာပြီး ရှင်းရှင်းကျောက်၏ ဓားဆန္ဒကို ပဲ့တင်ထပ်သွားသည်။

ဆွေဝမ်ကုန်းက ဌာနေပြန်ဓားမျှော်စင်မှ အခြား ဒွာရသန့်စင်ခြင်း နောက်ဆုံးအဆင့် တစ်ဦးအနေဖြင့် သူတို့အနောက်မှ လိုက်ပါလာခဲ့ပြီ ဖြစ်၏။ ရှင်းရှင်းကျောက်က ချီအငွေ့အသက် တစ်ခုကို ရွေးချယ်၍ ခြေရာခံ လိုက်လံ ရှာဖွေခဲ့ပြီး ဆွေဝမ်ကုန်းကို အခြား တစ်ခုအား လိုက်လံ ရှာဖွေရန် တာဝန်ပေးအပ်လိုက်သည်။

အရှေ့မှ ပြေးလွှားနေသော ချန်ဖေးကလည်း အနောက်မှ ဓားဆန္ဒ နှစ်ခု ကောင်းကင်သို့ ထိုးတက်သွားသည်ကို အာရုံခံမိလိုက်ပြီး ဌာနေပြန်ဓားမျှော်စင်မှ ဒွာရသန့်စင်ခြင်း နောက်ဆုံးအဆင့် နှစ်ဦးစလုံး ထွက်ပေါ်လာပြီ ဖြစ်ကြောင်း သိလိုက်၏။

ဌာနေပြန်ဓားမျှော်စင် အတွင်း၌ ချန်ဖေး လုပ်ခဲ့သမျှက ထိုနေရာရှိ လူတိုင်းကို ဒေါသထွက်စေခဲ့သည်မှာ ရှင်းလင်းလှသည်။ သို့မဟုတ်ပါက သူတို့က လူနှစ်ယောက် အတူတကွ လိုက်လံ ဖမ်းဆီးမည့်အစား တစ်ယောက်တည်းကိုသာ စေလွှတ်လိုက်နိုင်သည်။

ဤသည်က ချန်ဖေးကို ပြန်မခေါ်လာနိုင်မချင်း သူတို့ ရပ်တန့်မည် မဟုတ်ကြောင်း ဆိုလိုပေသည်။

ချန်ဖေးက ကျောက်တုံးတစ်တုံးကို ခြေဖြင့် နင်း၍ သူ၏ ပုံရိပ်က ရေမတွက်နိုင်သော အရိပ်များအဖြစ် ဆန့်ထွက်သွား၏။ သူ၏ လက်ထဲရှိ ဖေးဆော့ကျန့်က အကန့်အသတ်ထိ အသက်သွင်းခံထားရသဖြင့် အဆက်မပြတ် တုန်ခါနေသည်။

သို့တိုင်အောင် ရှင်းရှင်းကျောက်နှင့် ချန်ဖေးကြားရှိ ကွာဟချက်က ဆက်လက် ကျဉ်းမြောင်းလာနေ၏။

ဤနှုန်းအတိုင်းဆိုလျှင် အမွှေးတိုင် တစ်တိုင်စာ အချိန်မကုန်ဆုံးမီမှာပင် ချန်ဖေး အမီလိုက်ခံရမည် ဖြစ်သည်။

ကောင်းကင် ရှောင်တိမ်းခြင်း ကိုယ်ဖော့ပညာဖြင့် ဖန်တီးထားသော အရိပ်ကိုယ်ပွားများမှာ ခန္ဓာကိုယ်အစစ်ထက် နှေးကွေးသဖြင့် ပိုမို မြန်ဆန်စွာ အမီလိုက်ခံရမည် ဖြစ်၏။ အကယ်၍ ချန်ဖေးက အရိပ်ကိုယ်ပွားများကို တမင်တကာ ဖျောက်ဖျက်ပြီး မူလခန္ဓာကိုယ်ပေါ်တွင် ဆက်လက် ခွဲထုတ်နေလျှင်တောင် သူ ရရှိနိုင်မည့် အချိန်က များစွာပိုမည်မဟုတ်ချေ။

ဌာနေပြန်ဓားမျှော်စင်မှ ဒွာရသန့်စင်ခြင်း နောက်ဆုံးအဆင့် နှစ်ဦးက နောက်ဆုံးတွင် ချန်ဖေးကို ဖက်ထုပ်တစ်ခုကဲ့သို့ ဝိုင်းရံပိတ်ဆို့ထားမည် ဖြစ်၏။ ဤတစ်ကြိမ်တွင် ချန်ဖေး၌ အခြေအနေကို ပြောင်းလဲပစ်ရန် အခွင့်အရေး မရှိတော့သည့်အလားပင်။ ‘အသေခံ တိုက်ခိုက်ခြင်းက တစ်ခုတည်းသော ရွေးချယ်စရာလား’

ချန်ဖေးက မော့ကြည့်လိုက်ရာ ကောင်းကင်ကို ဖောက်ထွင်းသွားသော ဓားတစ်လက်ကဲ့သို့ တစ်ကိုယ်တည်း ရပ်တည်နေသည့် တောင်ထိပ်တစ်ခုကို မြင်လိုက်ရပြီး တစ်ချက်ကြည့်ရုံဖြင့် အလွန် သိသာထင်ရှားလှ၏။

ချန်ဖေး၏ နှုတ်ခမ်းများတွင် အပြုံးတစ်ခု ပေါ်လာသည်။ သူက ခြေလှမ်းအနည်းငယ် လျှောက်လိုက်ပြီး တောင်ခြေသို့ ရောက်ရှိသွားရာ ထိုနေရာတွင် လူနှစ်ဦးက တင်ပျဉ်ခွေ ထိုင်နေပြီ ဖြစ်၏။ တစ်ခုခု မှားယွင်းနေကြောင်း အာရုံခံမိသည့်အလား ထိုနှစ်ဦးက မျက်လုံးများကို တစ်ပြိုင်နက် ဖွင့်၍ ချန်ဖေးကို ကြည့်လိုက်ကြသည်။

အပြာရောင် ဝတ်ရုံကို ဝတ်ဆင်ထားသော အမျိုးသားမှာ သာမန် ပညာတတ် တစ်ဦးနှင့် တူပြီး တစ်ခါတစ်ရံတွင် သူ၏ မျက်လုံးများထဲမှ လင်းလက်သွားတတ်သော ထက်မြက်မှုက သူ၏ အတွင်းပိုင်းရှိ ရက်စက်မှုကို ဖော်ပြနေ၏။ သူက ယွမ်ချန်ဓားဂိုဏ်း၏ ဂိုဏ်းချုပ် ချွီချင်းရှန်းမှလွဲ၍ အခြား မဟုတ်ပေ။

အခြား တစ်ယောက်မှာ အိုမင်းရင့်ရော်နေပြီး အသက်စွမ်းအင်များ သိသိသာသာ လျော့ကျနေသည့် လက္ခဏာများ ပြသနေသော်လည်း သူ၏ မျက်လုံးများထဲရှိ စိတ်ဓာတ်က ထူးထူးခြားခြား အားကောင်းနေဆဲပင် သူမှာ အကြီးအကဲ ကျိုးကျိရွှမ်း ဖြစ်၏။

ဂိုဏ်းချုပ် ချွီချင်းရှန်းနှင့် နှိုင်းယှဉ်ပါက ကျိုးကျိရွှမ်း၏ အခြေအနေမှာ ယုံမှားသံသယကင်းစွာဖြင့် များစွာ ပိုမို ဆိုးရွားနေသည်။ သူ၏ သက်တမ်းမှာ ကုန်ဆုံးလုနီးပါး ဖြစ်နေပြီး ယခင်က ဒွာရပေါင်းစည်းခြင်း အဆင့်သို့ တက်လှမ်းရန် ကြိုးစားမှု ကျရှုံးခဲ့ကာ ယခုအခါ သူ၏ ကျင့်ကြံခြင်းအဆင့်မှာ ကျဆင်းလာနေပြီ ဖြစ်၏။

သူ၏ ကျင့်ကြံခြင်းအဆင့် ကျဆင်းသွားသော်ငြားလည်း ကျိုးကျိရွှမ်းသည် ဒွာရသန့်စင်ခြင်း နောက်ဆုံးအဆင့်ရှိ အစွမ်းထက် ပညာရှင် တစ်ဦးနှင့် ဂိုဏ်း၏ မဏ္ဍိုင်ကြီး တစ်ခု ဖြစ်နေဆဲပင်။

ထိုနှစ်ဦးကို မြင်သောအခါ ချန်ဖေး အလွန် ဝမ်းသာကြည်နူးသွား၏။

ဝိညာဉ်ကျောက်တုံး တစ်တုံးဖြင့် လဲလှယ်၍ ချန်ဖေးက သတင်းတစ်ခု ပေးပို့ခဲ့ပြီး ဂိုဏ်းက ဒွာရသန့်စင်ခြင်း နောက်ဆုံးအဆင့် တစ်ဦးကို ထိုနေရာတွင် လာရောက်ကြိုဆိုရန် စေလွှတ်ပေးနိုင်မည်ဟု မျှော်လင့်ခဲ့သည်။

ချန်ဖေးက ဌာနေပြန်ဓားမျှော်စင်တွင် ဆယ်ရက်ကြာ နေထိုင်ခဲ့ရခြင်းမှာ သွေးရင်းမြစ် ကျင့်စဉ်ကို ကျင့်ကြံရန် သက်သက်မဟုတ်ဘဲ ဂိုဏ်းမှ လူများ ရောက်ရှိလာရန် စောင့်ဆိုင်းနေခြင်းလည်း ဖြစ်၏။

ယနေ့ညတွင် ချန်ဖေးက အကြောင်းပြန်စာ တစ်ခု ရရှိခဲ့သဖြင့် သူ လှုပ်ရှားခဲ့ခြင်း ဖြစ်သည်။ ဌာနေပြန်ဓားမျှော်စင်၏ အမွေအနှစ် နေရာသို့ ခိုးဝင်ကာ ယွမ်ချန်ဓားဂိုဏ်း၏ ကျင့်စဉ်များစွာကို ပြန်လည်ရယူခဲ့၏။

ထို့ကြောင့် ဌာနေပြန်ဓားမျှော်စင်က အခြေအနေကို ရှာဖွေတွေ့ရှိပြီး သူ့နောက်သို့ လိုက်လာကြောင်း အာရုံခံမိသောအခါ ချန်ဖေးက တည်ငြိမ်နေခဲ့ခြင်း ဖြစ်သည်။ အကြောင်းရင်းမှာ ဂိုဏ်းမှ လူများက သူ့ကို ကြိုဆိုရန် ထိုနေရာတွင် ရှိနေသောကြောင့် ဖြစ်သည်။

ယွမ်ချန်ဓားဂိုဏ်း၏ ဒွာရသန့်စင်ခြင်း နောက်ဆုံးအဆင့် ပညာရှင်များက ဌာနေပြန်ဓားမျှော်စင်ထက် များစွာ ပိုမို အစွမ်းထက်သောကြောင့် မဟုတ်ဘဲ ဂိုဏ်းမှ လူများက အနည်းငယ် ခုခံပေးနိုင်ပါက ချန်ဖေး အနေဖြင့် ချောမွေ့စွာ ထွက်ခွာနိုင်မည် ဖြစ်သောကြောင့် ဖြစ်၏။

ယွမ်ချန်ဓားဂိုဏ်း၏ အဖွဲ့ဝင်များအနေဖြင့် သူတို့သည်လည်း ဒွာရသန့်စင်ခြင်း နောက်ဆုံးအဆင့်မှ ဖြစ်ကြပြီး ထွက်ခွာရန် စိတ်အားထက်သန်နေကြသဖြင့် သဘာဝကျစွာပင် မည်သည့် ပြဿနာမျှ ရှိမည်မဟုတ်ချေ။

ချန်ဖေးကို အံ့အားသင့်‌စေသည်မှာ ချွီချင်းရှန်းနှင့် ကျိုးကျိရွှမ်း နှစ်ဦးစလုံး ရောက်လာကြခြင်းဖြစ်သည်။ မလိုအပ်သော ပြဿနာများ ဖြစ်ပေါ်စေမည်ကို စိုးရိမ်သဖြင့် သူ ပေးပို့ခဲ့သော သတင်းစကားတွင် ကျင့်စဉ်နှင့် လျှို့ဝှက်ကျမ်းစာများကို ရှာတွေ့ခဲ့ကြောင်း ချန်ဖေး ထည့်သွင်း မပြောပြခဲ့ပေ။

သို့တိုင်အောင် ချန်ဖေးက အထောက်အကူ ပြုပေးရန် ဒွာရသန့်စင်ခြင်း နောက်ဆုံးအဆင့် တစ်ဦး လိုအပ်ကြောင်း သိသောအခါ ယွမ်ချန်ဓားဂိုဏ်းမှ ဒွာရသန့်စင်ခြင်း နောက်ဆုံးအဆင့် နှစ်ဦးစလုံး အတူတကွ ရောက်လာခဲ့ကြ၏။

နတ်တိမ်မြို့ တစ်ဝိုက်ရှိ အခြေအနေများမှာ ယခုအခါ တည်ငြိမ်နေပုံရသော်လည်း အမှန်တကယ်တွင် မသေချာမှုများဖြင့် ပြည့်နှက်နေကြောင်း သိထားရသည်။ ယွမ်ချန်ဓားဂိုဏ်းကဲ့သို့သော ဂိုဏ်းများသည် ဒွာရသန့်စင်ခြင်း နောက်ဆုံးအဆင့်မှ ကြီးကြပ်မှု မရှိပါက မမျှော်လင့်ထားသောအရာ တစ်ခုခု ဖြစ်ပေါ်လာချိန်တွင် အလွယ်တကူ ပြဿနာကြီးများ ဖြစ်သွားနိုင်ပေသည်။

ချန်ဖေးပြောနိုင်သည်မှာ ဂိုဏ်းချုပ် ချွီချင်းရှန်း ဖြစ်စေ၊ အကြီးအကဲ ကျိုးကျိရွှမ်း ဖြစ်စေ၊ အခြားသူများက ဖြစ်စေ ချန်ဖေးကို အလွန် တန်ဖိုးထားကြကြောင်းပင် ဖြစ်၏။ သူတို့၏ မျက်လုံးထဲတွင် ချန်ဖေးက အခြား လူများစွာထက် ပို၍ အရေးကြီးနေသည်။

"ဂိုဏ်းချုပ်... အကြီးအကဲ ကျိုး..." ချန်ဖေးက ထိုလူနှစ်ဦးထံသို့ ချဉ်းကပ်သွားပြီး လေးစားစွာ အရိုအသေပေးလိုက်၏။

"ဘာတွေဖြစ်ခဲ့တာလဲ..."

ကျိုးကျိရွှမ်းက ချန်ဖေးကို ကြည့်၍ တိုက်ရိုက် မေးလိုက်သည်။ ချန်ဖေးက သတင်းအချက်အလက် အလွန်နည်းပါးစွာ ပေးပို့ခဲ့သဖြင့် ကျိုးကျိရွှမ်း အနေဖြင့် နောက်ထပ် လှုပ်ရှားမှုများကို စီစဉ်ရန် အကြမ်းဖျင်း အခြေအနေကို သဘာဝကျစွာပင် နားလည်ရန် လိုအပ်၏။

"တစ်ယောက်ယောက်က မင်းနောက်ကို လိုက်လာတာလား..." ချွီချင်းရှန်း၏ အကြည့်က ချန်ဖေးကို ကျော်လွန်၍ အဝေးသို့ လှမ်းကြည့်လိုက်သည်။

ယခုလေးတင် ချွီချင်းရှန်းက အဝေးမှ လျှပ်တစ်ပြက် ဓားဆန္ဒတစ်ခုကို အာရုံခံမိလိုက်၏။ အကွာအဝေး ဝေးလွန်းသဖြင့် ချွီချင်းရှန်းက ဓားဆန္ဒမှတစ်ဆင့် များစွာ ကောက်ချက်မချနိုင်ခဲ့ပေ။

သို့သော် ဤဧရိယာသည် ဌာနေပြန်ဓားမျှော်စင် ပိုင်ဆိုင်သော နေရာဖြစ်သဖြင့် ဓားဆန္ဒ ပိုင်ရှင်မှာ ဌာနေပြန်ဓားမျှော်စင်မှ လူတစ်ဦး ဖြစ်နိုင်ချေ များသည်။

"ဌာနေပြန်ဓားမျှော်စင်က ဒွာရသန့်စင်ခြင်း နောက်ဆုံးအဆင့် နှစ်ဦးပါ... တစ်ယောက်ကို ကျွန်တော့်ရဲ့ ကိုယ်ပွားက မျှားခေါ်သွားပြီး နောက်တစ်ယောက်က အနောက်ကနေ လိုက်လာတုန်းပါ..." ချန်ဖေးက အသံဩဩဖြင့် ပြောလိုက်၏။

"သွားရင်းလာရင်းနဲ့ ပြောကြတာပေါ့... သူတို့နဲ့ ဒီမှာ ထိပ်တိုက် ရင်ဆိုင်ဖို့ မလိုပါဘူး..." ချွီချင်းရှန်းက တိုးညှင်းသော အသံဖြင့် ပြောလိုက်သည်။

သူတို့တွင် ဒွာရသန့်စင်ခြင်း နောက်ဆုံးအဆင့် နှစ်ဦး ရှိနေပြီး ဌာနေပြန်ဓားမျှော်စင်မှ တစ်ဦးတည်းသာ လိုက်ပါလာသဖြင့် စိုးရိမ်စရာ ဘာမျှ မရှိသည်မှာ သေချာ၏။ သို့သော် ဓားများတွင် မျက်စိမပါသကဲ့သို့ ဤတစ်ကြိမ် သူတို့ ရောက်လာရခြင်း၏ အဓိက ရည်ရွယ်ချက်မှာ ချန်ဖေးကို ကူညီထောက်ပံ့ပေးရန် ဖြစ်သည်။

ပို၍ အရေးကြီးသည်မှာ ဤသည်က ဌာနေပြန်ဓားမျှော်စင်၏ နယ်မြေ ဖြစ်၏။ အခြား ဒွာရသန့်စင်ခြင်း နောက်ဆုံးအဆင့်မှာ ချန်ဖေး၏ ကိုယ်ပွားက မျှားခေါ်သွားခြင်း ခံရသော်လည်း ဤနေရာသို့ ရောက်လာရန် အချိန်တိုလေးသာ ကြာမြင့်မည် ဖြစ်သည်။

"ကောင်းပြီ..."

ချန်ဖေးက ခေါင်းညိတ်လိုက်ပြီး ကျိုးကျိရွှမ်းက ချန်ဖေး၏ လက်မောင်းကို ဖမ်းကိုင်လိုက်ရာ သူ၏ ပုံရိပ်က လျှပ်တစ်ပြက် ရွေ့လျားသွားပြီး ထိုနေရာမှ ပျောက်ကွယ်သွား၏။

ကျိုးကျိရွှမ်းက ကောင်းကင် ရှောင်တိမ်းခြင်း ကိုယ်ဖော့ပညာကို ကျင့်ကြံခြင်း၏ အထွတ်အထိပ်သို့ ရောက်ရှိအောင် ပေါင်းစပ်ပြီးဖြစ်ကာ ဒွာရသန့်စင်ခြင်း နောက်ဆုံးအဆင့်ကို ပိုင်ဆိုင်ထားသဖြင့် ယခုအခိုက်အတန့်တွင် သူ ပြသလိုက်သော အမြန်နှုန်းနှင့် သွက်လက်မှုမှာ ချန်ဖေးထက် သာလွန်နေသည်။

ချွီချင်းရှန်းက အနောက်မှ လိုက်ပါလာပြီး ချန်ဖေးကို အခြေအနေများ ဆက်လက် ရှင်းပြရန် အလျင်စလို မတိုက်တွန်းခဲ့ပေ။

"ကျွန်တော် ယွမ်ချန် ဓားကျမ်းစာကို ပြန်ရခဲ့တယ်... ပြီးပြည့်စုံတဲ့ ယွမ်ချန် ဓားကျမ်းစာပါ..." ချန်ဖေးက ထိုနှစ်ဦးကို ကြည့်၍ တိုးဖွဖွ ပြောလိုက်၏။

‘ဂျွတ်…’

သူတို့ သုံးဦးမှာ သစ်ပင်ထိပ်ဖျားကို ကျော်ဖြတ်သွားစဉ် ကျိုးကျိရွှမ်း၏ ခြေလှမ်းများ ရုတ်တရက် ရပ်တန့်သွားပြီး သစ်ပင် တစ်ပင်လုံး အနည်းငယ် တုန်ခါသွားကာ ပြာမှုန့်များအဖြစ် ပေါက်ကွဲသွားသည်။ ကျိုးကျိရွှမ်းက ချန်ဖေးကို လှည့်ကြည့်လိုက်ရာ ယခင်က တည်ငြိမ်နေသော သူ၏ မျက်နှာပေါ်တွင် ယခုအခါ မယုံနိုင်မှုများ ပြည့်နှက်နေ၏။

“ယွမ်ချန် ဓားကျမ်းစာ... ပြီးတော့လည်း ပြီးပြည့်စုံတဲ့ ယွမ်ချန် ဓားကျမ်းစာ... ဟုတ်လား…”

ချွီချင်းရှန်းကလည်း ချန်ဖေးကို အံ့အားသင့်စွာ ကြည့်လိုက်သည်။ ပြီးပြည့်စုံသော ယွမ်ချန် ဓားကျမ်းစာလော။ ထိုအချိန်က ချန်ဖေးက ချန်ဟုန် ဂိုဏ်းမှ ယွမ်ချန် ဓားကျမ်းစာ အဆင့်နှစ်ခုကို ရရှိခဲ့စဉ်ကပင် ချွီချင်းရှန်းမှာ အလွန်အမင်း ပျော်ရွှင်နေခဲ့ပြီ ဖြစ်၏။

မည်သို့ပင်ဆိုစေကာမူ ဘီလူးဝိညာဉ် ဓားသိုင်းနှင့် ကျုံးယွမ် ဓားသိုင်းတို့မှ ပြုလုပ်ထားသော ယွမ်ချန် ဓားကျမ်းစာသည် ဒွာရ ကိုးဆယ်ကို ဖွင့်လှစ်ပေးနိုင်ပြီး ယင်းက အတော်လေး ကောင်းမွန်သော ဒွာရသန့်စင်ခြင်းအဆင့် ကျင့်စဉ်တစ်ခု ဖြစ်နေပြီ ဖြစ်သည်။

ယွမ်ချန်ဓားဂိုဏ်း၏ အနာဂတ် ဒွာရသန့်စင်ခြင်း နောက်ဆုံးအဆင့်များသည် ပတ်ဝန်းကျင်ရှိ ဂိုဏ်းများထက် အလွန်အမင်း အားနည်းနေမည် မဟုတ်တော့ချေ။

ဤသည်က ယွမ်ချန်ဓားဂိုဏ်း တစ်ခုလုံးအတွက် အလွန် ကြီးမားသော အဓိပ္ပာယ် ရှိသည်။

ယခုမူ ချန်ဖေးက ပြီးပြည့်စုံသော ယွမ်ချန် ဓားကျမ်းစာကို အမှန်တကယ် ရရှိခဲ့ပြီ ဖြစ်ရာ ကောင်းကင် ရှောင်တိမ်းခြင်း ကိုယ်ဖော့ပညာကိုပင် ပေါင်းစပ်ရနိုင်သည်ဟု ဆိုလိုခြင်း မဟုတ်ပါလား။ ထိုအချိန်ကျလျှင် ပေါင်းစပ်သွားသော ကျင့်စဉ်က ဖွင့်လှစ်နိုင်သည့် ဒွာရ အရေအတွက်မှာ သေချာပေါက် ထပ်မံ တိုးလာမည် ဖြစ်၏။

အခြား ပျောက်ဆုံးနေသော ကျင့်စဉ်များနှင့် ပတ်သက်၍မူ အကယ်၍ စွမ်းအင် အလုံအလောက် ရှိပါက သင်ယူနိုင်သေးသည်။ ဒွာရများ တိုးမလာနိုင်သော်ငြားလည်း ကျင့်စဉ်များ အားလုံးကို ပေါင်းစပ်ပြီးနောက် သိုင်းကွက်များ၏ စွမ်းအားက အလွန်အမင်း တိုးတက်လာမည်ဖြစ်ပြီး တိုက်ခိုက်ရေးစွမ်းအား တိုးတက်မှုအတွက် အလွန် သိသာထင်ရှားပေလိမ့်မည်။

"သတ်ဖြတ်ခြင်းဓားသွား ဓားသိုင်း၊ မဟာမိုးကြိုးဓားသိုင်းနဲ့ ရေကျောက်စိမ်း ဓားသိုင်းတွေလည်း ပါသေးတယ်... ဒီသုံးခုရဲ့ ပြီးပြည့်စုံတဲ့ ကျင့်ကြံရေး နည်းလမ်းတွေကိုလည်း ကျွန်တော် ရခဲ့တယ်..." ချန်ဖေးက ဆက်ပြောလိုက်သည်။

“ဝီ…”

မူလ သစ်ပင်ကြီး ပေါက်ကွဲသွားမှုကြောင့် သူတို့သုံးဦး မြေပြင်ပေါ်သို့ ဆင်းသက်လိုက်ကြသည်။ ချန်ဖေး၏ နောက်ဆက်တွဲ စကားများကို ကြားပြီးနောက် ချွီချင်းရှန်းနှင့် ကျိုးကျိရွှမ်းတို့၏ ချီအရှိန်အဝါများ ရုတ်တရက် မြင့်တက်လာပြီး ပတ်ဝန်းကျင်ရှိ ယွမ်ချီစွမ်းအင်များ အနည်းငယ် တုန်ခါသွား၏။

သူတို့နှစ်ဦး၏ ခြေအောက်မှ အက်ကွဲကြောင်းများက စက်ဝိုင်းပုံစံ ပျံ့နှံ့သွားပြီး ဤအခိုက်အတန့်တွင် သူတို့၏ စိတ်ခံစားချက်များကို ဖော်ပြရန် မည်သည့် စကားလုံး အသုံးပြုရမည်ကို မသိတော့ကြောင်း ပြသနေသည်။

"ဒီစကားတွေက တကယ်ပဲလား..."

ကျိုးကျိရွှမ်းသည် ယခုအခါ ခရီးဆက်ရန် ဂရုမစိုက်နိုင်တော့ဘဲ သူ၏ အသံများ အနည်းငယ် တုန်ယင်လျက် မေးလိုက်၏။

ထိုနှစ်များက ကပ်ဘေးကြီး အပြီးတွင် ယွမ်ချန်ဓားဂိုဏ်း၌ ကျင့်စဉ် သုံးခုသာ ကျန်ရှိတော့ပြီး ကျင့်စဉ်အခြေခံဖြစ်သော ယွမ်ချန် ဓားကျမ်းစာမှာ လုံးလုံးလျားလျား ပျောက်ဆုံးသွားခဲ့သည်။ ယခု ချန်ဖေးက ကျင့်စဉ် သုံးခုကို အမှန်တကယ် ပြန်လည် ရှာတွေ့ခဲ့ပြီး ကျင့်စဉ်အခြေခံကိုပင် အပြည့်အစုံ ပြန်လည် ရယူနိုင်ခဲ့ပြီ ဖြစ်၏။

တစ်ခဏမျှ ကျိုးကျိရွှမ်း၌ အစစ်အမှန် မဟုတ်သော ထင်ယောင်ထင်မှား ခံစားချက် တစ်ခု ဖြစ်ပေါ်လာသည်။

"ဒီလို စကားမျိုးကို ချန်ဖေး သဘာဝကျကျပဲ နောက်မပြောင်ရဲပါဘူး..." ချန်ဖေးက ခေါင်းခါလျက် ပြောလိုက်၏။

"ဒီကျင့်စဉ်တွေကို ဌာနေပြန်ဓားမျှော်စင်မှာ ရှာတွေ့ခဲ့တာလား..." ချွီချင်းရှန်းက ချီစွမ်းအင်များကို အသက်ပြင်းပြင်း ရှူသွင်းလိုက်ပြီး တဖြည်းဖြည်း တည်ငြိမ်လာသည်။

သာမန်ရက်များတွင် ချွီချင်းရှန်း၏ ဝမ်းသာမှုနှင့် ဒေါသကို သူ၏ မျက်နှာပေါ်တွင် ဖော်ပြလေ့ မရှိသော်လည်း ချန်ဖေး ပေးလိုက်သော ဤသတင်းက အလွန်အမင်း တုန်လှုပ်ဖွယ် ကောင်းလွန်းလှ၏။ ဤအခိုက်အတန့်တွင် သူ၏ မျက်နှာပေါ်၌ မည်သည့်အရာကိုမျှ မမြင်ရသော်လည်း သူ၏ မျက်လုံးများကို ကြည့်ရုံဖြင့် သူ၏ လက်ရှိ စိတ်ခံစားချက်ကို မြင်တွေ့နိုင်ပေသည်။

"ဟုတ်ပါတယ်... ယွမ်ချန် ကြယ်စင် ဓားခန္ဓာနဲ့ ကောင်းကင် ရှောင်တိမ်းခြင်း ကိုယ်ဖော့ပညာကလွဲရင် ကျွန်တော်တို့ ဂိုဏ်းရဲ့ အခြား ကျင့်စဉ်တွေ အားလုံးကို ဌာနေပြန်ဓားမျှော်စင်က သိမ်းဆည်းထားပါတယ်..." ချန်ဖေးက ခေါင်းညိတ်၍ ပြောလိုက်၏။

"သူတို့ကများ ဒီလိုလုပ်ရဲကြတယ်ပေါ့..."

ကျိုးကျိရွှမ်းက ဒေါသတကြီး အော်ဟစ်လိုက်သည်။ သူ၏ စကားသံ အဆုံးတွင် အဝေးမှ ချီအရှိန်အဝါ တစ်ခု ထွက်ပေါ်လာသည်ကို ရုတ်တရက် အာရုံခံမိလိုက်၏။ ရှင်းရှင်းကျောက်က လိုက်လာခဲ့ပြီ ဖြစ်သည်။