အခန်း ၂၃

အခန်း (၂၃) ကြာစေ့နှင့် ပေါင်းစည်းခြင်းနှင့် တုန်လှုပ်ဖွယ် နိမိတ်များ

​ရှုချွမ်း၏ ရင်ဘတ်အတွင်း၌ ပူပြင်းလှသော စွမ်းအားများမှာ ဒီရေအလား ရူးသွပ်စွာ တိုးဝင်လာသည်။

ဖော်ပြရန် ခက်ခဲသော ခံစားချက်တစ်ခုမှာ သူ၏ နှလုံးသားထဲ၌ အရှိန်အဟုန်ဖြင့် ပေါ်ပေါက်လာပြီး တစ်ကိုယ်လုံးမှလည်း အဖြူရောင် အငွေ့များ ထွက်ပေါ်လာသည်။

ဤအရာမှာ 'ဖန်တီးရှင် ကြာစေ့' က သူနှင့် စတင်ပေါင်းစညပြီး အပြောင်းအလဲများ ဖြစ်ပေါ်လာခြင်းဖြစ်ကြောင်း ရှုချွမ်း နားလည်လိုက်သည်။

သူက ချက်ချင်းပင် တင်ပျဉ် ခွေ ထိုင်လိုက်ကာ မျက်စိမှိတ်၍ ထိုစွမ်းအားများကို စတင် သန့်စင်လေတော့သည်။

​အချိန်ကြာလာသည်နှင့်အမျှ ရှုချွမ်းက သူ၏ ခန္ဓာကိုယ်အတွင်းရှိ အပြောင်းအလဲများကို သိသိသာသာ ခံစားလာရသည်။

သူ၏ သွေးများမှာ ဆူပွက်နေပြီး ပြင်းထန်သော အသံများ ထွက်ပေါ်နေသည်။

၎င်းမှာ တောင်တန်းနှင့် မြစ်ချောင်းများကို တုန်ခါစေနိုင်သော မိုးခြိမ်းသံများ ကဆုန်ပေါက်နေသည့်အလားပင်

​သူ၏ ပါရမီမှာလည်း ကောင်းကင်ကို ဆန့်ကျင်သော အသွင်ကူးပြောင်းမှု တစ်ခုကို ကြုံတွေ့နေရသည်။

ဤအရာမှာ 'ဖန်တီးရှင် ကြာစေ့' ၏ အံ့မခန်းဖွယ် အစွမ်းပင် ဖြစ်သည်။

ပေါင်းစည်းပြီးသည်နှင့် ၎င်းက ရှုချွမ်း၏ ခန္ဓာကိုယ်ကို ချက်ချင်း စတင်ပြုပြင်ပြောင်းလဲတော့သည်။

​တစ်ရက်ကြာပြီးနောက် 'ဖန်တီးရှင် ကြာစေ့' က ရှုချွမ်း၏ 'ချီပင်လယ်' အတွင်းသို့ လုံးဝ စိမ့်ဝင်သွားပြီး သူနှင့် တစ်သားတည်း ဖြစ်သွားလေသည်။

ထိုအခါ ခန့်ညားထည်ဝါပြီး အစွမ်းထက်လှသော အော်ရာ တစ်ခုမှာ ကောင်းကင်ယံသို့ တိုးဝင်သွားကာ 'စမ်းသပ်ခြင်း မျှော်စင်' ကိုပင် ဖောက်ထွက်သွားတော့သည်။

​ဝုန်း...

​ခဏချင်းအတွင်းမှာပင် လေပြင်းများ တိုက်ခတ်ကာ တိမ်တိုက်များ အရောင်ပြောင်းသွားပြီး ကမ္ဘာကြီးတစ်ခုလုံး တုန်လှုပ်ချောက်ချားသွားသည်။

တစ်ချိန်တည်းမှာပင် စမ်းသပ်ခြင်း မျှော်စင်အတွင်းရှိ အပြင်စည်းတပည့်များမှာလည်း သူတို့ဘဝတွင် တစ်ခါမျှ မမြင်ဖူးသော မြင်ကွင်းကို တွေ့လိုက်ရသည်။

မရေမတွက်နိုင်သော အလင်းတန်းများမှာ ကောင်းကင်သို့ ပျံတက်သွားပြီး လေထဲတွင် ရောယှက်နေကြသည်။

​ထို့နောက်တွင် မဟာနေမင်းကြီး၏ ပုံရိပ်ယောင် တစ်ခု ပေါ်လာပြီး စူးရှသော အလင်းတန်းများမှာ စမ်းသပ်ခြင်း မျှော်စင်၏ အဆင့်တိုင်းသို့ ပျံ့နှံ့သွားသည်။

ထိုနေမင်းကြီးထံမှ ထွက်ပေါ်လာသော အော်ရာ မှာ အလွန် ခန့်ညားထည်ဝါလှသဖြင့် မည်သူမျှ မကျူးကျော်ဝံ့သော သန့်စင်မြင့်မြတ်သည့် ခံစားချက်ကို ပေးစွမ်းနေသည်။

​ဆယ်ထပ်အောက်ရှိ မိစ္ဆာသားရဲများနှင့် မိစ္ဆာမျိုးနွယ်များအားလုံးမှာ ထိုအော်ရာ ၏ ဖိနှိပ်မှုကို ခံလိုက်ရသဖြင့် မြေပြင်ပေါ်တွင် ဝပ်စင်းနေကြရပြီး မည်သည့်လှုပ်ရှားမှုမျှ မပြုဝံ့ကြပေ။

ရှုချွမ်း၏ ခန္ဓာကိုယ်ပေါ်တွင်မူ ရောင်စုံ ‘တာအို’ စည်းချက် များ ဝန်းရံနေပြီး သူ၏ ခန္ဓာကိုယ်ကို အဆက်မပြတ် သန့်စင်ပေးနေသည်။

​ထိုအချိန်တွင်... အပြင်ဘက်ရှိ အပြင်စည်းအကြီးအကဲ သုံးဦးမှာလည်း စမ်းသပ်ခြင်း မျှော်စင်အတွင်းမှ ကြောက်မက်ဖွယ်ရာ ထူးခြားဖြစ်စဉ်ကို သတိပြုမိသွားကြပြီး သူတို့၏ မျက်နှာအမူအရာများ ပြောင်းလဲသွားသည်။

​"နေမင်းကြီးရဲ့ စောင့်ရှောက်မှုနဲ့ ကောင်းကင်ဘုံရဲ့ တာအို သံတွေပဲ... ပြိုင်ဘက်ကင်းတဲ့ ပါရမီရှင်တစ်ယောက် ပေါ်ထွန်းလာပြီ"

အကြီးအကဲ လီဟုန်မှာ ပါးစပ်အဟောင်းသား ဖြစ်သွားရသည်။ ဤကဲ့သို့သော အခြေအနေမျိုးကို သူမ၏ ဘဝတွင် ပထမဆုံးအကြိမ် မြင်ဖူးခြင်းဖြစ်သည်။

​"အခုလောလောဆယ် စမ်းသပ်ခြင်း မျှော်စင်ထဲမှာ အပြင်စည်းတပည့်တွေပဲ ရှိတာလေ... ဘယ်သူက ဒီလို ထူးခြားတဲ့ နိမိတ်ကို ဖန်တီးလိုက်တာလဲ"

အကြီးအကဲ လီဟုန်က သူ၏ စိတ်ထဲရှိ သံသယကို ထုတ်ဖော်ပြောလိုက်သည်။

၎င်းတို့သည်ပင် မျှော်စင်အတွင်း၌ ဖြစ်ပျက်နေသမျှကို အကုန်လုံး မကြည့်နိုင်သဖြင့် အတွင်း၌ မည်သူရှိနေသည်ကို အသေအချာ မသိကြပေ။

​"ရှုချန် ဖြစ်နိုင်မလား"

ထိုစဉ် အကြီးအကဲ ကျင်းလိုင်က ဝင်ပြောသည်။

ရှုချန်မှာ အလွန်အမင်း မောက်မာသဖြင့် သူ မနှစ်သက်သော်လည်း တရားမျှတစွာ ပြောရလျှင် ယခုစစ်ဆေးပွဲဝင်နေသော တပည့်များထဲ၌ ရှုချန်၏ ပါရမီမှာ အကောင်းဆုံးများထဲမှ တစ်ဦး ဖြစ်သည်။

ထို့ကြောင့် အကြီးအကဲ ကျင်းလိုင်က ရှုချန် ဖြစ်နိုင်မည်ဟု ခန့်မှန်းလိုက်ခြင်း ဖြစ်သည်။

​"ကဲ... ခန့်မှန်းနေတာတွေ တော်ကြတော့။ မင်းတို့နှစ်ယောက် ဒီမျှော်စင်ကို ဆက်ပြီး စောင့်ကြပ်နေပါ။ ငါ ဒီအကြောင်းကို မြင့်မြတ်အရှင်သခင် ဆီ သွားတင်ပြပြီး သူကိုယ်တိုင် ဆုံးဖြတ်ချက် ချခိုင်းလိုက်မယ်"

အကြီးအကဲ သုံးဦးထဲတွင် တစ်ချိန်လုံး တိတ်ဆိတ်နေသော ပုဂ္ဂိုလ်က ပြောလိုက်သည်။ သူက ပြောပြောဆိုဆိုနှင့်ပင် မြင့်မြတ်အရှင်သခင်၏ အမည်ကို ထုတ်ဖော်လိုက်သဖြင့် အခြားအကြီးအကဲ နှစ်ဦးမှာ ချက်ချင်းပင် ငြိမ်သက်သွားကြသည်။

သူက စကားအဆုံး၌ အလင်းတန်းတစ်ခုအဖြစ် ပြောင်းလဲသွားပြီး မြင့်မြတ်အရှင်သခင် ရှိရာသို့ အရှိန်အဟုန်ဖြင့် ပြေးထွက်သွားတော့သည်။

သူတစ်ဦးတည်းသာ မြင့်မြတ်အရှင်သခင်ကို တိုက်ရိုက်တွေ့ဆုံနိုင်ပြီး ကျန်အကြီးအကဲ နှစ်ဦးမှာမူ ထိုသို့သော အရည်အချင်း မရှိကြပေ။

​ဤအချိန်တွင် မြင့်မြတ်နယ်မြေ၏ နက်ရှိုင်းသော ခန်းမကြီးတစ်ခုအတွင်း၌ ထိုက်ယိ မြင့်မြတ်နယ်မြေ ၏ အရှင်သခင်သည်လည်း သူ၏ မျက်လုံးများကို ဖွင့်လိုက်သည်။

သူ၏ အော်ရာ မှာ နတ်ဘုရားတစ်ပါးကဲ့သို့ ကြောက်မက်ဖွယ်ကောင်းလောက်အောင် ကြီးမားလှပြီး အစွမ်းထက်မှုမှာ အထွတ်အထိပ်သို့ ရောက်ရှိနေသည်။

သူက တစ်စုံတစ်ခုကို စောင့်ဆိုင်းနေသည့်အလား ခန်းမကြီးအတွင်း၌ ငြိမ်သက်စွာ ထိုင်နေသည်။

​" မြင့်မြတ် အရှင်သခင်... စမ်းသပ်ခြင်း မျှော်စင်က..."

ထိုစဉ် ခန်းမအပြင်ဘက်မှ အကြီးအကဲ၏ အသံ ထွက်ပေါ်လာသည်။

​"တော်ပြီ... ဘာမှ ဆက်ပြောမနေနဲ့တော့၊ ငါ သိပြီးပြီ။ မြန်မြန်သွားပြီး တောင်ထိပ်သခင် အားလုံးကို ခန်းမထဲကို လာခဲ့ဖို့ အကြောင်းကြားလိုက်၊ ငါတို့ ဆွေးနွေးစရာရှိတယ်"

အကြီးအကဲ၏ စကားမဆုံးမီမှာပင် မြင့်မြတ်အရှင်သခင်က ဖြတ်ပြောလိုက်ပြီး အမိန့်ပေးလိုက်သည်။

​"အမိန့်အတိုင်းပါ"

အသံများ ပျောက်ကွယ်သွားပြီး ခန်းမကြီးမှာ တစ်ဖန် ပြန်လည် တိတ်ဆိတ်သွားပြန်သည်။

အမွှေးတိုင်တစ်တိုင်စာခန့် ကြာပြီးနောက် ထိုက်ယိ မြင့်မြတ်နယ်မြေ၏ တောင်ထိပ်သခင်များက သတင်းကြားသည်နှင့် ခန်းမကြီးအတွင်းသို့ အသီးသီး ရောက်ရှိလာကြသည်။

​"မြင့်မြတ် အရှင်သခင် ဘေးကင်းကင်းနဲ့ တံခါးပိတ် ကျင့်ကြံ မှ ထွက်လာနိုင်တယ့်အတွက် ဂုဏ်ပြုပါတယ်"

တောင်ထိပ်သခင်များမှာ ရိုသေစွာ ဂါရဝပြုလိုက်ကြပြီး မြင့်မြတ် အရှင်သခင်၏ အမိန့်ကို စောင့်ဆိုင်းနေကြသည်။

မြင့်မြတ် အရှင်သခင်က ခေါင်းညိတ်ပြလိုက်ကာ တည်ငြိမ်စွာ ပြောလိုက်သည်။ "စမ်းသပ်ခြင်း မျှော်စင်ကနေ ပြိုင်ဘက်ကင်းတဲ့ ပါရမီရှင်တစ်ယောက် ပေါ်ထွက်လာပြီ။ လူလွှတ်ပြီး စုံစမ်းခိုင်းလိုက်ပါ။ လိုအပ်ရင် သူ့ကို ထူးထူးခြားခြား တိုက်ရိုက်တပည့် အဖြစ် လက်ခံလိုက်ပါ။ ဒီလို ထူးခြားတဲ့ နိမိတ်မျိုးကို ဖန်တီးနိုင်တဲ့သူက သာမန်လူတော့ မဟုတ်နိုင်ဘူး"

​"အမိန့်အတိုင်းပါ"

တောင်ထိပ်သခင်များမှာ ရိုသေစွာ ခေါင်းညိတ်လိုက်ကြပြီး မြင့်မြတ် အရှင်သခင်၏ ညွှန်ကြားချက်ကို ဆောင်ရွက်ရန် ထွက်ခွာသွားကြသည်။

​သို့သော် ရှုချွမ်းမှာမူ ဤအရာအားလုံးကို မသိပေ။

ယခုအချိန်တွင် သူက 'ဖန်တီးရှင် ကြာစေ့' က ပေးစွမ်းသော အဆုံးအစမဲ့လှသော ပျော်ရွှင်မှုများထဲ၌ နစ်မွန်းနေပြီး ပြန်မထွက်နိုင်အောင် ဖြစ်နေသည်။

၎င်းမှာ ဖော်ပြ၍မရသော ခံစားချက်မျိုးဖြစ်သည်။

သူ၏ တစ်ကိုယ်လုံးမှာ လေထဲတွင် လွင့်မျောနေသည့်အလား ခံစားနေရသည်။

​အပြင်ဘက်မှ ကြည့်လျှင် သူ၏ ကိုယ်မှ မှိန်ပျပျ တာအိုစည်းချက် များ ထွက်ပေါ်နေပြီး နောက်ကျောတွင်လည်း မဟာနေမင်းကြီး၏ ပုံရိပ်ယောင် က စောင့်ရှောက်ပေးနေသည်။

ပတ်ဝန်းကျင်ရှိ ကောင်းကင်နှင့်မြေကြီး မူလချီ များမှာလည်း တစ်စုံတစ်ခု၏ ဆွဲဆောင်မှုကို ခံနေရသည့်အလား သူ့ထံသို့ ရူးသွပ်စွာ တိုးဝင်လာကြသည်။

ကောင်းကင်ယံတွင် မူလချီများမှာ လျင်မြန်စွာ လည်ပတ်နေပြီး စွမ်းအားလေဆင်နှာမောင်းတစ်ခုအဖြစ် ပေါ်ပေါက်နေသည်။

ထိုစွမ်းအားမုန်တိုင်း၏ အလယ်ဗဟိုတွင် ရှုချွမ်း ရှိနေခြင်း ဖြစ်သည်။

​မူလချီများ စီးဝင်လာပြီးနောက် သူ၏ ကျင့်ကြံခြင်းအဆင့်မှာလည်း သိသိသာသာ မြင့်တက်လာသည်။

​ချီစုစည်းခြင်းနယ်ပယ် အဆင့် ၅

​ချီစုစည်းခြင်းနယ်ပယ် အဆင့် ၆

​ချီစုစည်းခြင်းနယ်ပယ် အဆင့် ၇

​...

​အမွှေးတိုင်တစ်တိုင်စာခန့်အတွင်းမှာပင် ရှုချွမ်း၏ ကျင့်ကြံခြင်းအဆင့်မှာ ချီစုစည်းခြင်းနယ်ပယ် အဆင့် ၉ သို့ တိုက်ရိုက် ရောက်ရှိသွားသည်။

အကယ်၍ သူ၌ 'မဟာယန် ' ကျင့်စဉ် ၏ နောက်ထပ် ကျင့်စဉ်အပိုင်းများသာ ရှိနေပါက သူက သေမျိုးအဆင့်ကျော်လွန်ခြင်းနယ်ပယ် သို့ တစ်ရှိန်ထိုး တက်လှမ်းသွားနိုင်လောက်သည်။

​ဤကဲ့သို့ ကြောက်မက်ဖွယ်ကောင်းအောင် အဆင့်တက်ခြင်းမှာ သူ၏ အခြေခံပေါ် မည်သည့် ဆိုးကျိုးမျှ မသက်ရောက်စေပေ။

ဆန့်ကျင်ဘက်အနေဖြင့် 'ဖန်တီးရှင် ကြာစေ့' ၏ အကူအညီကြောင့် သူ၏ အခြေခံမှာ ပိုမို ခိုင်မာလာခဲ့သည်။

'မဟာယန်' ကျင့်စဉ်ကြောင့် ဖြစ်ပေါ်လာသော 'မဟာနေမင်းကိုယ်ခန္ဓာ' မှာလည်း ပိုမို အစွမ်းထက်လာသည်။

​သူ၏ ကျင့်ကြံခြင်းအဆင့်မှာ ရှေ့ဆက်တက်၍ မရတော့သောအခါမှ ရှုချွမ်းက ကျင့်ကြံခြင်းကို ရပ်တန့်လိုက်သည်။

သူ ရပ်လိုက်သည်နှင့် ထူးခြားသော နိမိတ်များမှာလည်း ဘာမှမရှိခဲ့သလို တဖြည်းဖြည်း ပျောက်ကွယ်သွားတော့သည်။

​"နောက်ဆုံးတော့... ပေါင်းစည်းတာ ပြီးသွားပြီ"

ရှုချွမ်းက သူ့ကိုယ်သူ ပြန်လည် စစ်ဆေးကြည့်လိုက်ပြီး ကျေနပ်သော အပြုံးတစ်ခု ပေါ်လာသည်။

ဤ ဖန်တီးရှင် ကြာစေ့မှာ သူ့ကို တကယ့်ကို စိတ်မပျက်စေခဲ့ပေ။

ပေါင်းစည်းပြီးနောက် သူက ပတ်ဝန်းကျင်ရှိ မူလချီများကို သိသိသာသာ ထိတွေ့ခံစားလာရသည်။

​သူ၏ စိတ်မှာလည်း အလွန်အမင်း ကြည်လင်လာသည်။

အရင်က ကျင့်ကြံခြင်းတွင် နားမလည်ခဲ့သော အချက်များမှာ ယခုအခါ ချက်ချင်းပင် သိမြင်နားလည်သွားတော့သည်။

ထို့အပြင် ကမ္ဘာအတွင်းရှိ တာအိုစည်းချက် များကိုပါ သူ ရှင်းရှင်းလင်းလင်း မြင်တွေ့လာရသည်။

ဤအရာမှာ အရင်က သူ လုံးဝ မလုပ်နိုင်ခဲ့သော အရာဖြစ်သည်။

ယနေ့မှစ၍ သူက ကောင်းကင်တက်လှမ်းခြင်း နယ်ပယ် အထိ မည်သည့် အဟန့်အတားမျှ ရှိတော့မည်မဟုတ်ပေ။

သူသာ အဆင့်ဆင့် ကျင့်ကြံသွားမည်ဆိုပါက ကောင်းကင်တက်လှမ်းခြင်း နယ်ပယ် ရှိ အစွမ်းထက်သူတစ်ဦး ဖြစ်လာမည်မှာ သေချာလှသည်။

​ရှုချွမ်းက သူ၏ စိတ်လှုပ်ရှားမှုများကို ထိန်းချုပ်ကာ စနစ်ကို ပြန်ဖွင့်ပြီး သူ၏ အချက်အလက်များကို စစ်ဆေးကြည့်လိုက်သည်။ ၎င်းတို့မှာ ကမ္ဘာပျက်မတတ် ပြောင်းလဲသွားခဲ့ပြီ ဖြစ်သည်။

​【အမည် - ရှုချွမ်း】

【 နယ်ပယ် - ချီစုစည်းခြင်းနယ်ပယ် အဆင့် ၉】

【ပါရမီ - ပြိုင်ဘက်ကင်း ဘုရင် 】

【ကံကြမ္မာ - ကံကြမ္မာကို ဆန့်ကျင်သူ (ရွှေရောင်)】

【ဘဝဇာတ်ညွှန်း - သင်က ကံကြမ္မာကို ဆန့်ကျင်သော လမ်းစဉ်ပေါ်သို့ လျှောက်လှမ်းနေပြီ ဖြစ်သည်။ ဘဝက အရင်လို တစ်သမတ်တည်း မဟုတ်တော့ဘဲ အနာဂတ်ကို ခန့်မှန်းရန် ခက်ခဲလှသည်။။】

【အခွင့်အလမ်း - ရှင်းလင်းစွာ မမြင်ရတော့ပါ】

.....

​ရှုချွမ်း၏ ပါရမီမှာ 【ပြိုင်ဘက်ကင်း ဘုရင်】 သို့ တိုက်ရိုက် ပြောင်းလဲသွားပြီး စနစ်၏ အမြင့်ဆုံး ပါရမီအဆင့်သို့ ရောက်ရန် နှစ်ဆင့်သာ လိုတော့သည်။

ကံကြမ္မာရှိ အရင်က ကံဆိုးခြင်းများမှာလည်း ယခုအခါ ရွှေရောင်ကံကြမ္မာ ဖြစ်သော 【ကံကြမ္မာကို ဆန့်ကျင်သူ】 ဖြစ်သွားခဲ့ပြီ။

​ဇာတ်ညွှန်းနှင့် အခွင့်အလမ်းများမှာလည်း ခန့်မှန်း၍မရနိုင်အောင် ဖြစ်သွားသည်။

၎င်းကို ကြည့်ခြင်းဖြင့် ရှုချွမ်းမှာ တစ်စုံတစ်ခုကို စဉ်းစားမိသွားသည်။

ကံကြမ္မာကို ဆန့်ကျင်လိုက်ခြင်းကြောင့် သူ၏ အနာဂတ်မှာ အစဉ်မပြတ် ပြောင်းလဲနေပြီး မည်သို့ဖြစ်လာမည်ကို အသေအချာ မပြောနိုင်တော့ခြင်း ဖြစ်နိုင်သည်။

​ယခုအချိန်တွင် သူက ကမ္ဘာကူးပြောင်း သူ တစ်ဦး၏ ခန့်ညားထည်ဝါသော အငွေ့အသက်များကို ပိုင်ဆိုင်သွားခဲ့ပြီ ဖြစ်သည်။

အရင်က သနားစရာကောင်းလှသော ပုံစံမှာ လုံးဝ ပျောက်ကွယ်သွားခဲ့ပြီ ဖြစ်လေတော့သည်။