အခန်း (၇၅၉-၇၆၀)
Vol. 71 Ch. 759-760
အခန်း (၇၅၉) - ထာဝရစိမ်းလန်းအင်မော်တယ်နွယ်ပင်၏ စွမ်းပကား၊ အလယ်အလတ်ကမ္ဘာများကို ဖမ်းယူခြင်းနှင့် ရွှမ်ဟွမ်ကမ္ဘာ၏ ဆင့်ကဲပြောင်းလဲမှု(၄)။
"ဘာကို ကြောက်နေရမှာလဲ...”
"ရွှမ်ဟွမ်ဂိုဏ်းရဲ့ တပည့်ဖြစ်လာပြီးတဲ့နောက်မှာ မင်းက ပိုပိုပြီးတော့ သတ္တိကြောင်လာသလိုပဲ...”
"မင်းက အခုလက်ရှိ ရွှမ်ဟွမ်ဂိုဏ်းရဲ့ စွမ်းအားက ဘယ်လိုရှိလဲဆိုတာကို တကယ်မသိတာပဲ...”
"အလယ်အလတ်ကမ္ဘာပေါင်းများစွာထဲမှာတောင် ပြိုင်ဘက်ကင်းတဲ့ တည်ရှိမှုပဲကွ...”
"အခု ဂိုဏ်းချုပ်အရှင်ရဲ့ ကျင့်ကြံခြင်းအဆင့်က နတ်ဘုရားအသွင်ပြောင်းအဆင့် နှောင်းပိုင်းကိုတောင် ရောက်နေပြီဆိုတာ သိထားရမယ်။ ပြိုင်ဘက်ကင်း နတ်ဘုရားအသွင်ပြောင်းအဆင့်လို့တောင် ခေါ်ဆိုလို့ရတယ်...”
"ဒါ့အပြင် ငါတို့ ရွှမ်ဟွမ်ဂိုဏ်းက အနည်းဆုံး နတ်ဘုရားအသွင်ပြောင်းအဆင့် နတ်ဆိုးကျင့်ကြံသူ အကောင်တစ်ရာကျော်ကိုတောင် ယဉ်ပါးအောင် သွန်သင်ထားပြီးပြီ...”
"သာမည အလယ်အလတ်ကမ္ဘာလေးတစ်ခုက ငါတို့ရဲ့ ပြိုင်ဘက် ဘယ်လိုလုပ် ဖြစ်နိုင်မှာလဲ...”
ဝူဝေတာအိုအရှင်က စိတ်မရှည်စွာဖြင့် ပြောလိုက်၏။
ဤသည်မှာ ပြဿနာတစ်ခုဖြစ်လာမည်ဟု သူ လုံးဝမထင်ထားပေ။
အကယ်၍ ဂိုဏ်းချုပ်အရှင်သာ ကိုယ်တိုင်ကိုယ်ကျ လှုပ်ရှားမည်ဆိုလျှင် ဤရန်သူများသည် ကလေးကလားသာဖြစ်ပြီး လွယ်လွယ်ကူကူပင် သုတ်သင်ခံရမည်သာ ဖြစ်လေသည်။
လုံးဝကို ထည့်ပြောစရာပင် မလိုတော့ချေ။
"အကယ်၍ ဂိုဏ်းချုပ်အရှင် ကိုယ်တိုင်သာ ဝင်ပါမယ်ဆိုရင်တော့ သဘာဝကျကျ မတူညီတော့ဘူးပေါ့...”
"အဲဒီ အလယ်အလတ်ကမ္ဘာက နတ်ဘုရားအသွင်ပြောင်းအဆင့် အရှင်သခင်တွေကို ဖြေရှင်းလိုက်နိုင်ရင် ငါတို့အတွက် ခြိမ်းခြောက်မှုက သိပ်မကြီးမားတော့ပါဘူး...”
ကျောက်ဟွမ်ကျန်းကလည်း ခေါင်းညိတ်လိုက်၏။
အမှန်တကယ်တော့ ကျင့်ကြံခြင်းလောကတွင် အဆင့်မြင့်ကျင့်ကြံသူများက ပို၍အရေးပါလေသည်။
နတ်ဘုရားအသွင်ပြောင်းအဆင့် အရှင်သခင်တစ်ပါးက အားကောင်းသော ကျင့်ကြံသူမည်မျှနှင့် ညီမျှသည်ကို အားလုံးက သိထားကြသည် မဟုတ်ပါလော။
အကယ်၍ အလယ်အလတ်ကမ္ဘာသည် နတ်ဘုရားအသွင်ပြောင်းအဆင့် အရှင်သခင်များကို ဆုံးရှုံးသွားပါက သူတို့အတွက်မူ ပြောစရာပင် မလိုတော့ချေ။
"ဒါကတော့ ဂိုဏ်းချုပ်အရှင်ပို့လာတဲ့ သတင်းအရပေါ့လေ...”
"ဒီတစ်ကြိမ် ထာဝရစိမ်းလန်းအင်မော်တယ်နွယ်ပင်အရှင် ဖမ်းယူလာတဲ့ အလယ်အလတ်ကမ္ဘာရဲ့ နာမည်က ချင်းယောင်ကမ္ဘာတဲ့...”
"နတ်ဆိုးမျိုးနွယ်စုတွေ အဓိကနေထိုင်တဲ့ အလယ်အလတ်ကမ္ဘာတစ်ခု ဖြစ်ပုံရတယ်။ အဲဒီအထဲမှာ လူသားအနည်းငယ်ပဲ ရှိတယ်...”
"ချင်းယောင်ကမ္ဘာတစ်ခုလုံးမှာမှ နတ်ဘုရားအသွင်ပြောင်းအဆင့် နတ်ဆိုးကျင့်ကြံသူ သုံးရာလောက်ပဲ ရှိပုံရတယ်...”
ဝူဝေတာအိုအရှင်က ဆက်သွယ်ရေးကိရိယာမှ ပို့လာသော အချက်အလက်များကို ကြည့်ရင်း မေးစေ့ကို ပွတ်သပ်လိုက်၏။
ဤအချက်အလက်များကို ဤမျှ ရှင်းရှင်းလင်းလင်း သိရှိနေရခြင်းမှာ သဘာဝကျကျပင် ထာဝရစိမ်းလန်းအင်မော်တယ်နွယ်ပင်၏ စွမ်းအားကြောင့် ဖြစ်ပေသည်။
ဖမ်းယူခြင်း ပြီးစီးသွားသည့် အခိုက်အတန့်တွင် ထာဝရစိမ်းလန်းအင်မော်တယ်နွယ်ပင်သည် ချင်းယောင်ကမ္ဘာတစ်ခုလုံး၏ အချက်အလက်များကို ချက်ချင်း သိမြင်နားလည်နိုင်သွားသည်။
အသေးစိတ်အချက်အလက် အားလုံးကို သိရှိရန် မဖြစ်နိုင်သော်လည်း အချို့သော နတ်ဘုရားအသွင်ပြောင်းအဆင့် နတ်ဆိုးကျင့်ကြံသူများ၏ အချက်အလက်များကို သိရှိရန်မှာမူ လက်ဖဝါးလှန်သကဲ့သို့ လွယ်ကူလှပေသည်။
ထိပ်တန်း တိုက်ခိုက်ရေးစွမ်းအားများကို သိထားသရွေ့ ကျန်ရှိနေသော အဆင့်နိမ့် တိုက်ခိုက်ရေးစွမ်းအားများမှာ အမှန်တကယ်တမ်း ဘာမှမဟုတ်တော့ပေ။
"နတ်ဘုရားအသွင်ပြောင်းအဆင့် နတ်ဆိုးကျင့်ကြံသူ သုံးရာပဲလား...”
"ရှေးဟောင်းနတ်ဆိုးကမ္ဘာနဲ့ ယှဉ်လိုက်ရင် အများကြီး ကွာခြားနေသေးပုံပဲ...”
ကျောက်ဟွမ်ကျန်းက မျက်တောင်တစ်ချက် ခတ်လိုက်၏။
"ဒါက ပုံမှန်ပါပဲ...”
"ငါတို့ အရင်ကနေခဲ့တဲ့ ကျင့်ကြံခြင်းလောက၊ ရှေးဟောင်းနတ်ဆိုးကမ္ဘာ၊ ရှေးဟောင်းမိစ္ဆာကမ္ဘာတို့က အတော်လေး ထူးခြားတဲ့ အလယ်အလတ်ကမ္ဘာတွေပဲ...”
"မွေးဖွားလာတဲ့ နတ်ဘုရားအသွင်ပြောင်းအဆင့် အရှင်သခင်တွေရဲ့ အရေအတွက်ကလည်း အများဆုံးပဲ...”
"သဘာဝကျကျ အခြား အလယ်အလတ်ကမ္ဘာတွေနဲ့ ယှဉ်လို့မရဘူး...”
"နတ်ဘုရားအသွင်ပြောင်းအဆင့် နတ်ဆိုးကျင့်ကြံသူ သုံးရာရှိတာကိုက အတော်လေး ကောင်းနေပါပြီ...”
"ဒီတစ်ကြိမ်မှာ ဂိုဏ်းချုပ်အရှင်က ကိုယ်တိုင်ကိုယ်ကျ ဝင်ပါပြီး ဒီနတ်ဘုရားအသွင်ပြောင်းအဆင့် နတ်ဆိုးကျင့်ကြံသူ သုံးရာကို ဖမ်းဆီးမယ်လို့ ကြားတယ်...”
"ဂိုဏ်းချုပ်အရှင်က ဒီနတ်ဘုရားအသွင်ပြောင်းအဆင့် နတ်ဆိုးကျင့်ကြံသူ သုံးရာကို ယဉ်ပါးအောင် သွန်သင်ပြီးတော့ ငါတို့ ရွှမ်ဟွမ်ဂိုဏ်းရဲ့ တောင်စောင့်ဝိညာဉ်သားရဲတွေအဖြစ် ပြောင်းလဲဖို့ ရည်ရွယ်ထားတယ်...”
ဝူဝေတာအိုအရှင်က ပြုံးလိုက်လေ၏။
သူ၏မျက်လုံးများထဲတွင် စိတ်လှုပ်ရှားနေသော အလင်းရောင်များ ထွက်ပေါ်လာလေသည်။
သိသာထင်ရှားစွာပင် ဤသည်မှာ ရွှမ်ဟွမ်ဂိုဏ်း၏ တပည့်များစွာအတွက် ကြီးမားသော အခွင့်အလမ်းတစ်ခု ဖြစ်ပေသည်။
မည်သို့ပင်ဆိုစေကာမူ ဤသည်က အလယ်အလတ်ကမ္ဘာတစ်ခု ဖြစ်နေသည်မဟုတ်လော။
အထဲတွင် မည်သည့် ရတနာများ၊ မည်သည့် ဝိညာဉ်ဆေးပင်များနှင့် ကံကြမ္မာအကျိုးပေးများ ပါဝင်နေသည်ကို မည်သူက သိနိုင်ပါမည်နည်း။
အနည်းငယ်မျှသာ ရရှိနိုင်လျှင်ပင် အကျိုးအမြတ်များစွာကို ခံစားရမည်သာ ဖြစ်ပေသည်။
ဤကဲ့သို့သော အလွန်ကောင်းမွန်သည့် ကံကြမ္မာအခွင့်အလမ်းကို မည်သူကမျှ လက်လွှတ်ခံမည် မဟုတ်ပေ။
"ဂိုဏ်းချုပ်အရှင်က တကယ်ပဲ ကိုယ်တိုင်လှုပ်ရှားမယ်ပေါ့လေ။ ဒါဆိုရင်တော့ ကျုပ်တို့အတွက် ဘာအမှားအယွင်းမှ ရှိမှာမဟုတ်တော့ဘူး...”
"အဲဒီ နတ်ဘုရားအသွင်ပြောင်းအဆင့် နတ်ဆိုးကျင့်ကြံသူတွေက ငါတို့ ရွှမ်ဟွမ်ဂိုဏ်းရဲ့ တောင်စောင့်ဝိညာဉ်သားရဲတွေ ဖြစ်လာခွင့်ရတာကလည်း သူတို့ရဲ့ ကံကောင်းမှုတစ်ခုလို့ ဆိုရမှာပဲ...”
ကျောက်ဟွမ်ကျန်းက အလွန်စိတ်လှုပ်ရှားနေလေသည်။
သူသည် လက်သီးများကို ပွတ်သပ်လိုက်ကာ မစောင့်ဆိုင်းနိုင်တော့သည့် အသွင်ဖြစ်နေ၏။
……
အခြားတစ်ဖက် ကုယုံတောင်ထွတ်တစ်နေရာ၌။
စုန့်ဖျင်အန်းသည်လည်း ဤသတင်းကို လက်ခံရရှိခဲ့ပြီး အလွန်အံ့ဩသွားကာ ဤကဲ့သို့သော ကံကြမ္မာအခွင့်အလမ်းမျိုး ပေါ်ပေါက်လာလိမ့်မည်ဟု မထင်မှတ်ထားခဲ့ပေ။
ဤသည်မှာ ရွှမ်ဟွမ်ဂိုဏ်း၏ အထက်မှအောက် အားလုံးအတွက် ကြီးမားသော ကိစ္စရပ်တစ်ခု ဖြစ်လေသည်။
"ဆရာ၊ ဂိုဏ်းချုပ်အရှင်က တကယ်ကို မဟာတန်ခိုးရှင်တစ်ပါးပဲ...”
"ရွှမ်ဟွမ်ကမ္ဘာရဲ့ ဆင့်ကဲပြောင်းလဲမှုကို မြှင့်တင်ဖို့အတွက် ထာဝရစိမ်းလန်းအင်မော်တယ်နွယ်ပင်ကို ထိန်းချုပ်ပြီး အလယ်အလတ်ကမ္ဘာတွေကို တစ်ခုပြီးတစ်ခု ဖမ်းယူခဲ့တာပဲ...”
"ရွှမ်ဟွမ်ကမ္ဘာထဲကို ပေါင်းစပ်စေပြီး ရွှမ်ဟွမ်ကမ္ဘာရဲ့ မူလအရင်းအမြစ်ကို အားကောင်းလာစေခဲ့တယ်...”
"ဒီလို လုပ်ရပ်မျိုးက အင်မော်တယ်တစ်ပါးရဲ့ လုပ်ရပ်လို့တောင် ခေါ်ဆိုလို့ရနေပြီမလား...”
"စိတ်ဝိညာဉ်ကမ္ဘာက ကျင့်ကြံသူတွေရော ဒီအချက်ကို လုပ်နိုင်မလားဆိုတာ မသေချာဘူး...”
စုန့်ဖျင်အန်းက ခံစားချက်ပြင်းပြစွာဖြင့် ပြောလိုက်၏။
သူသည် ဤသတင်းကို လက်ခံရရှိချိန်တွင် အနည်းငယ် ကြောင်အမ်းသွားခဲ့ပြီး ပါးစပ်အဟောင်းသားပင် ဖြစ်သွားရလေသည်။
မည်သို့ပင်ဆိုစေကာမူ ဤသည်က အလယ်အလတ်ကမ္ဘာတစ်ခု ဖြစ်ပေသည်။ ဖမ်းချင်တိုင်း ဖမ်း၍ရနိုင်ပါမည်လော။
အလယ်အလတ်ကမ္ဘာဆိုသည်ကို မည်သည့်အရာဟု ထင်နေပါသနည်း။ မြေကြီးပေါ်မှ ကျောက်ခဲတုံးများလော။
ဤကဲ့သို့သော တန်ခိုးစွမ်းအားမှာ လနှင့် ကြယ်များကို လှမ်းဆွဲယူလိုက်သည်နှင့် တူညီလှပေသည်။
စိတ်ကူးဖြင့်ပင် မှန်းဆ၍မရနိုင်လောက်အောင် ဖြစ်လေသည်။
"အမှန်အတိုင်းဆိုရရင် တကယ်ကို မကောင်းဆိုးဝါးပါပဲ...”
"ငါ စိတ်ဝိညာဉ်ကမ္ဘာမှာ နှစ်သောင်းချီ နေလာခဲ့တာတောင် ဒီလိုလူမျိုးကို တစ်ခါမှ မမြင်ဖူးသေးဘူး...”
"တကယ်လို့ လူတစ်ယောက်က ဒါမျိုးကို လုပ်နိုင်တယ်ဆိုရင် အနည်းဆုံးတော့ မဟာယာနအဆင့်ကျင့်ကြံသူ ဖြစ်ရလိမ့်မယ်...”
"နှမြောစရာကောင်းတာက ဒီလိုအဆင့်ရှိတဲ့ ပုဂ္ဂိုလ်ကြီးမျိုးဆိုလို့ ငါ လူသားဧကရာဇ် တစ်ပါးတည်းကိုပဲ မြင်ဖူးသေးတယ်...”
"ဒါ့အပြင် စိတ်ဝိညာဉ်ကမ္ဘာက လူသားဧကရာဇ် ဝင်လှုပ်ရှားတာကိုလည်း ငါမမြင်ဖူးဘူး...”
"အဲဒီအဆင့်ရှိတဲ့ တည်ရှိမှုက တကယ်ကို ဘယ်လောက်အတိုင်းအတာအထိ စွမ်းအားတွေ ပိုင်ဆိုင်ထားသလဲဆိုတာ မသိရဘူး...”
အရက်တာအိုအရှင်သည်လည်း အနည်းငယ် ကြောင်အမ်းသွားခဲ့လေသည်။
သူသည် မိမိကိုယ်မိမိ စိတ်ဝိညာဉ်ကမ္ဘာ လူသားမျိုးနွယ်စုမှ ဆင်းသက်လာသူဖြစ်ပြီး အတွေ့အကြုံများပြားသည်ဟု ထင်မှတ်ထားခဲ့သည်။
သို့သော်လည်း ဤကမ္ဘာသို့ ရောက်ရှိလာပြီးနောက်မှ မိမိသည် အသိပညာ နည်းပါးလှကြောင်းကို သိရှိသွားခဲ့ရသည်။
အချိန်တိုင်း၊ အခိုက်အတန့်တိုင်း ဖြစ်ပေါ်နေသော ပြောင်းလဲမှုများသည် သူ့ကို ဆွံ့အသွားစေကာ မည်သို့ပြောရမည်ကိုပင် မသိတော့ချေ။
အမှန်တကယ်ပင် သူသည် တစ်ချိန်က လေဟာနယ်သန့်စင်ခြင်းအဆင့် ကျင့်ကြံသူတစ်ဦး ဖြစ်ခဲ့သည်။
သို့သော် စိတ်ဝိညာဉ်ကမ္ဘာတွင်မူ လေဟာနယ်သန့်စင်ခြင်းအဆင့် ဘိုးဘေးတစ်ပါးက ဘာများ အရေးပါပါမည်နည်း။
ယခုအခါတွင် သူသည် ပို၍ပင် နှိမ့်ချတတ်လာလေပြီ။
"ဆိုလိုတာက စိတ်ဝိညာဉ်ကမ္ဘာမှာဆိုရင်တောင် လူသားမျိုးနွယ်စုရဲ့ မဟာယာနအဆင့် ကျင့်ကြံသူက လူသားဧကရာဇ်တစ်ပါးတည်းပဲ ရှိတာပေါ့လေ...”
"ဒါက သိပ်ပြီးတော့ သနားစရာ မကောင်းလွန်းဘူးလား...”
"ကျွန်တော်တို့ လူသားမျိုးနွယ်စုက ဒီလောက်တောင် အားနည်းတာလား...”
စုန့်ဖျင်အန်းခမျာ အလွန်အမင်း စူးစမ်းလိုစိတ် ဖြစ်ပေါ်သွားလေသည်။
မည်သို့ပင်ဆိုစေကာမူ သူသည် ငယ်စဉ်ကတည်းက လူသားမျိုးနွယ်စုများ အုပ်စိုးသောကမ္ဘာတွင် နေထိုင်လာခဲ့ပြီး ငယ်စဉ်မှ ကြီးပြင်းသည်အထိ လူသားမျိုးနွယ်စုများကသာ ကြီးစိုးခဲ့ကြသည် မဟုတ်လော။
ဤကမ္ဘာတွင် နတ်ဆိုးသားရဲအချို့ ရှိနေလျှင်ပင် ၎င်းတို့သည် လူသားမျိုးနွယ်စု၏ ပြိုင်ဘက်များ မဟုတ်ကြပေ။
လူသားမျိုးနွယ်စုသည် အခြားသော မျိုးနွယ်စုများ၏ အနိုင်ကျင့်ခြင်းကို ခံရသည်မှာ အမှန်တကယ် မည်ကဲ့သို့ဖြစ်မည်ကို သူ လုံးဝစိတ်ကူး၍ မရနိုင်ပေ။
"မင်းက ဘာနားလည်မှာလဲ...”
"စိတ်ဝိညာဉ်ကမ္ဘာဆိုတာ အစစ်အမှန်ဝိညာဉ်တွေ ကြီးစိုးတဲ့ကမ္ဘာကွ။ လူသားမျိုးနွယ်စု အသက်ရှင်ကျန်ရစ်တာကိုပဲ မဆိုးဘူးလို့ မှတ်ရမယ်...”
"ပြောရမယ်ဆိုရင် စိတ်ဝိညာဉ်ကမ္ဘာရဲ့ အကောင်းဆုံး ကျင့်ကြံခြင်းနေရာတွေကို အစစ်အမှန်ဝိညာဉ် မျိုးနွယ်စုတွေက သိမ်းပိုက်ထားခဲ့တာ ကြာပြီပဲ...”
"ငါတို့ လူသားမျိုးနွယ်စုအတွက် ချန်ထားခဲ့တာက အရင်းအမြစ်နည်းပါးတဲ့ ဝေးလံခေါင်ဖျားတဲ့ နေရာတချို့ပဲ ရှိတယ်...”
"ငါတို့ လူသားမျိုးနွယ်စုက ယနေ့အချိန်ထိ ဒီလိုအဆင့်ရောက်အောင် ဖွံ့ဖြိုးတိုးတက်လာနိုင်တာကိုက အတော်လေး ကောင်းနေပါပြီ...”
"ငါတို့ စိတ်ဝိညာဉ်ကမ္ဘာက လူသားမျိုးနွယ်စုကိုတောင် အထင်သေးရဲသေးတယ်ပေါ့လေ...”
အရက်တာအိုအရှင်သည် သေလုမတတ် ဒေါသထွက်သွားပြီး မျက်နှာတစ်ပြင်လုံး နီရဲသွားကာ အလွန်တရာ မကျေမနပ် ဖြစ်သွားလေသည်။
စိတ်ဝိညာဉ်ကမ္ဘာတွင် ရှင်သန်နိုင်ရန်အတွက် လူသားမျိုးနွယ်စု၏ ရှေ့ဆောင်ဘိုးဘေးများစွာသည် တစ်ဦးကျဆုံးလျှင် တစ်ဦးအစားထိုးကာ အသက်စွန့်ခဲ့ကြပြီး ချီးကျူးဂုဏ်ပြုထိုက်သော စွမ်းအားရှင်များစွာ ပေါ်ထွက်လာခဲ့သဖြင့်သာ လူသားများသည် စိတ်ဝိညာဉ်ကမ္ဘာတွင် ဆက်လက် ရှင်သန်ပြန့်ပွားနိုင်ခဲ့ခြင်း ဖြစ်သည်။
လူသားမျိုးနွယ်စုသည် စိတ်ဝိညာဉ်ကမ္ဘာတွင် အနည်းငယ် ချုပ်ချယ်ခံရပြီး သေးငယ်သော အရာလေးတစ်ခုအဖြစ် သတ်မှတ်ခံရသည်မှာ မှန်သော်လည်း၊ မည်သူကမျှ စိတ်ဝိညာဉ်ကမ္ဘာရှိ လူသားမျိုးနွယ်စု၏ ကြိုးစားအားထုတ်မှုများကို ဖျက်ဆီးပစ်၍ မရနိုင်ပေ။
သို့ရာတွင် တစ်ဖက်မှ ပြန်တွေးကြည့်လျှင် ရွှမ်ဟွမ်ကမ္ဘာကဲ့သို့ လူသားမျိုးနွယ်စုများ၏ သုခဘုံနှင့် နှိုင်းယှဉ်ပါက စိတ်ဝိညာဉ်ကမ္ဘာမှ လူသားမျိုးနွယ်စုများမှာ အမှန်တကယ်ပင် အလွန်အမင်း ချုပ်ချယ်ခံရကာ ဘဝသည် အလွန်တရာ သနားစရာကောင်းလှပေသည်။
အခြားသော အားကောင်းသည့် မျိုးနွယ်စုများ၏ သုတ်သင်ဖျက်ဆီးခြင်းကို ခံရမည်လောဟု အချိန်တိုင်း စိုးရိမ်ပူပန်နေရသည်။
နေ့စဉ်နှင့်အမျှ ကျီးလန့်စာစား၍ ထိတ်လန့်တုန်လှုပ်စွာဖြင့် နေထိုင်ရလေသည်။
အခန်း (၇၆၀) - ထာဝရစိမ်းလန်းအင်မော်တယ်နွယ်ပင်၏ စွမ်းပကား၊ အလယ်အလတ်ကမ္ဘာများကို ဖမ်းယူခြင်းနှင့် ရွှမ်ဟွမ်ကမ္ဘာ၏ ဆင့်ကဲပြောင်းလဲမှု(၅)။
"ဒီလိုဆိုရင် တကယ်တော့ ရွှမ်ဟွမ်ကမ္ဘာမှာ ဆက်နေတာက ပိုကောင်းလိမ့်မယ်...”
"အနည်းဆုံးတော့ တခြားမျိုးနွယ်တွေရဲ့ သတ်ဖြတ်ခြင်းကို ခံရမလားဆိုပြီး နေ့တိုင်း ထိတ်လန့်တကြားနဲ့ နေစရာမလိုတော့ဘူး...”
"ရွှမ်ဟွမ်ကမ္ဘာမှာပဲ အေးအေးဆေးဆေး ဆက်ပြီး ကျင့်ကြံနေတာက အကောင်းဆုံးပဲ...”
စုန့်ဖျင်အန်းက လေးနက်သောအသံဖြင့် ပြောလိုက်၏။
"ဒါပေမဲ့ ငါ ခန့်မှန်းတာသာ မမှားဘူးဆိုရင် အဲဒီ ရွှမ်ဟွမ်တာအိုအရှင်က ကမ္ဘာဖြတ်ကျော် တည်နေရာပြောင်းအစီအရင်ကို ပိုင်ဆိုင်ထားပုံရတယ်...”
အရက်တာအိုအရှင်က လျှို့ဝှက်ဆန်းကြယ်သည့်ဟန်ဖြင့် ပြောလိုက်လေသည်။
"ကမ္ဘာဖြတ်ကျော် တည်နေရာပြောင်းအစီအရင်။ အဲဒါက ဘာအဓိပ္ပာယ်လဲ...”
"ဆရာက ဘာလို့ ဒီလိုပြောရတာလဲ...”
စုန့်ဖျင်အန်းက သိချင်စိတ်ပြင်းပြစွာဖြင့် မေးလိုက်၏။
"မေးနေစရာ လိုသေးလို့လား...”
"'သိဒ္ဓိဝင်ကျမ်းစာတောင်' ထဲမှာ ရုတ်တရက် အမွေအနှစ်ပညာရပ်တွေ အများကြီး ထပ်တိုးလာတာကို မင်း သတိမထားမိဘူးလား...”
"ဒီအမွေအနှစ်တွေအကုန်လုံးက ဝိညာဉ်လောက လူသားမျိုးနွယ်ဆီကလာတာပဲ...”
"တခြားသူတွေက မသိရင်မသိမယ်၊ ဒါပေမဲ့ ဝိညာဉ်လောက လူသားမျိုးနွယ်ရဲ့ လေဟာနယ်သန့်စင်ခြင်းအဆင့် ကျင့်ကြံသူတစ်ယောက်အနေနဲ့ ငါကတော့ အသိဆုံးပဲ...”
"အဲဒီထဲက အမွေအနှစ်ကျင့်စဉ်အများစုက ဝိညာဉ်လောက လူသားမျိုးနွယ်ရဲ့ ကျမ်းစာတိုက်ကနေ လာတာချည်းပဲ...”
အရက်တာအိုအရှင်က ပြတ်ပြတ်သားသားပင် ပြောလိုက်လေသည်။
အမှန်အတိုင်းဆိုရလျှင် ယခင်က ဤကျင့်စဉ်မှတ်တမ်းများကို သူမြင်တွေ့ခဲ့ရချိန်တွင် လုံးဝကို ကြက်သေသေသွားခဲ့ရသည်။
ဝိညာဉ်လောက လူသားမျိုးနွယ်မှ စွမ်းအားရှင်ကြီးတစ်ဦး ရွှမ်ဟွမ်ကမ္ဘာသို့ ရောက်ရှိလာပြီး လူသားမျိုးနွယ်၏ ကျမ်းစာတိုက်ကိုပါ ဤနေရာသို့ သယ်ဆောင်လာခဲ့လေသလားဟုပင် သူ ထင်မှတ်သွားခဲ့၏။
ဤသည်မှာ တကယ်ကိုပင် အလွန်အမင်း ချဲ့ကားလွန်းရာ ကျနေပေသည်။
"ဆရာ့စကားအရဆို ဂိုဏ်းချုပ်ကြီးက ဝိညာဉ်လောကကို တိတ်တဆိတ် သွားခဲ့တယ်ပေါ့...”
"ပြီးတော့ ဝိညာဉ်လောက လူသားမျိုးနွယ်ရဲ့ ကျင့်စဉ်တွေကိုပါ ခိုးယူလာခဲ့တယ်ပေါ့လေ...”
"ဒါပေမဲ့ ဒါကို ဘယ်လိုလုပ်နိုင်ခဲ့တာလဲ...”
"ဂိုဏ်းချုပ်ကြီးက မွေးရာပါ ပါရမီရှင်တစ်ယောက် ဖြစ်တာမှန်ပေမဲ့ အခုချိန်မှာ နတ်ဘုရားအသွင်ပြောင်းအဆင့် နှောင်းပိုင်းပဲ ရှိသေးတာလေ...”
"ဒါပေမဲ့ ဆရာပြောသလို ဝိညာဉ်လောက လူသားမျိုးနွယ်က အရမ်းကို အင်အားကြီးပြီး လေဟာနယ်သန့်စင်ခြင်းအဆင့်၊ ခန္ဓာပေါင်းစည်းခြင်းအဆင့် ကျင့်ကြံသူတွေက နေရာတိုင်းမှာ ရှိနေတာဆို...”
"ဂိုဏ်းချုပ်ကြီးက ဒီလိုစွမ်းအားရှင်ကြီးတွေကို လျစ်လျူရှုပြီး လူသားမျိုးနွယ်ရဲ့ ကျင့်စဉ်တွေကို ခိုးယူနိုင်ပါ့မလား...”
စုန့်ဖျင်အန်းက မျက်တောင်တဖျတ်ဖျတ်ခတ်ကာ အလွန်အမင်း သိချင်နေဟန်ဖြင့် ပြောလိုက်၏။
"မင်းက ငါ့ကိုမေးတော့ ငါက ဘယ်သူ့ကို သွားမေးရမှာလဲ...”
"ပြီးတော့ အဲဒီ 'ရွှမ်ဟွမ်ဘိုးဘေး' က သာမန် နတ်ဘုရားအသွင်ပြောင်းအဆင့် ကျင့်ကြံသူမှ မဟုတ်တာ...”
"အကယ်၍ 'ထာဝရစိမ်းလန်းအင်မော်တယ်နွယ်ပင်' နဲ့သာ ပေါင်းစပ်လိုက်မယ်ဆိုရင် ခန္ဓာပေါင်းစည်းခြင်းအဆင့် စွမ်းအားရှင်ကြီးတွေတောင် သူ့လက်ချက်နဲ့ သေသွားနိုင်တယ်...”
"ဒီလို ပုဂ္ဂိုလ်မျိုးကို သာမန်ယုတ္တိဗေဒတွေနဲ့ သွားပြီး တွက်ဆလို့ မရဘူးကွ...”
"တစ်ဖက်လူက အတိုင်းအတာမဲ့ နက်နဲလွန်းတယ်လို့ပဲ ပြောရမှာပေါ့...”
"ဒါ့အပြင် တကယ်လို့ ကမ္ဘာဖြတ်ကျော် တည်နေရာပြောင်းအစီအရင်ကို ပိုင်ဆိုင်ထားတယ်ဆိုရင် နောင်တစ်ချိန် ငါတို့လည်း ဝိညာဉ်လောကကို သွားခွင့်ရလာနိုင်တယ်...”
အရက်တာအိုအရှင်က လေးနက်သောအသံဖြင့် ပြောလိုက်လေသည်။
ရွှမ်ဟွမ်ကမ္ဘာရှိ ဘဝသည် သက်တောင့်သက်သာရှိပြီး ပူပင်သောကကင်းလှသော်လည်း ဝိညာဉ်လောကသို့ ပြန်သွားရန် သူ အမြဲတမ်း တောင့်တနေဆဲ ဖြစ်၏။
မည်သို့ပင်ဆိုစေကာမူ သူသည် ဝိညာဉ်လောက လူသားမျိုးနွယ်မှ ဆင်းသက်လာသူဖြစ်ပြီး ဝိညာဉ်လောကသည်သာ သူ၏ ဇာတိမြေ ဖြစ်ပေသည်။
"စိတ်ချပါ ဆရာ...”
"ကျွန်တော်တို့ အခုချိန် အရေးကြီးဆုံးက ကျင့်ကြံခြင်းအဆင့် တိုးတက်လာဖို့ပဲလေ...”
"နောင်တစ်ချိန် ကျွန်တော်တို့ ရွှမ်ဟွမ်ကမ္ဘာရဲ့ အင်အားတွေ ကြီးထွားလာပြီး စွမ်းအားရှင်တွေ အများကြီး မွေးထုတ်ပေးနိုင်လာရင်လည်း ဖြစ်နိုင်တာပဲ...”
"အဲဒီအချိန်ကျရင် ကျုပ်တို့ ရွှမ်ဟွမ်ကမ္ဘာ လူသားမျိုးနွယ်တွေလည်း ဝိညာဉ်လောကကို ထိုးဖောက်ဝင်ရောက်ပြီး လူသားမျိုးနွယ်အတွက် နယ်မြေသစ်တွေ ချဲ့ထွင်ပေးနိုင်မှာပါ...”
"ဝိညာဉ်လောက လူသားမျိုးနွယ် နယ်မြေတွေ ပိုပြီး ကျယ်ပြန့်လာအောင် ကူညီပေးပြီး ကိုယ်ပိုင်နေရာတစ်ခု ရယူပေးနိုင်မှာပါ...”
စုန့်ဖျင်အန်းက ပေါ့ပေါ့ပါးပါးနှင့် ရဲတင်းစွာ ပြောလိုက်၏။
"ဒီလိုဆိုတော့လည်း အဓိပ္ပာယ်မရှိတာတော့ မဟုတ်ဘူး...”
အရက်တာအိုအရှင်၏ စိတ်ထဲတွင် လှုပ်ခတ်သွားလေသည်။
မည်သို့ပင်ဖြစ်စေ အားလုံးက လူသားမျိုးနွယ်များသာ ဖြစ်ပေသည်။ မတူညီသော ကမ္ဘာမှ ဖြစ်နေစေကာမူ တူညီသည့် မျိုးနွယ်စု သက်ရှိများသာ ဖြစ်ကြ၏။
အကယ်၍ အချင်းချင်း အကူအညီပေးကြမည်ဆိုလျှင် ဝိညာဉ်လောက လူသားမျိုးနွယ်ကိုလည်း လျင်မြန်စွာ ဖွံ့ဖြိုးတိုးတက်လာစေနိုင်ပေသည်။
ရွှမ်ဟွမ်ကမ္ဘာ၏ တိုးတက်လာမည့် အခြေအနေကို သူ အတော်လေး မျှော်လင့်ထားမိ၏။
ယခုအချိန်တွင် များစွာ သိသာထင်ရှားမှု မရှိလှသော်လည်း နှစ်ထောင်ချီ၊ သောင်းချီ၍သာ ဖွံ့ဖြိုးတိုးတက်လာမည်ဆိုလျှင် လုံးဝ ခြားနားသွားပေလိမ့်မည်။
ဝိညာဉ်လောက လူသားမျိုးနွယ်ကို အလွယ်တကူ ကျော်လွန်သွားပြီး လျစ်လျူရှု၍မရနိုင်သော ကြောက်မက်ဖွယ် အင်အားစုတစ်ရပ် ဖြစ်လာနိုင်သည်။
…………
ရက်အနည်းငယ်အကြာ၊ ချင်းကျိုးတိုက်ကြီး။
'ထာဝရစိမ်းလန်းအင်မော်တယ်နွယ်ပင်' ၏ စွမ်းအားအောက်တွင် အလယ်အလတ်အဆင့် ကမ္ဘာဖြစ်သော ချင်းယောင်ကမ္ဘာသည် ရွှမ်ဟွမ်ကမ္ဘာအတွင်းသို့ တိုက်ရိုက် သယ်ဆောင်ခြင်း ခံလိုက်ရပြီး ချင်းကျိုးတိုက်ကြီးအတွင်းသို့ ပေါင်းစပ်ကာ ချင်းကျိုးတိုက်ကြီး၏ အစိတ်အပိုင်းတစ်ခု ဖြစ်သွားလေတော့သည်။
မူလက ချင်းယောင်ကမ္ဘာ၌ နေထိုင်နေကြသော နတ်ဘုရားအသွင်ပြောင်းအဆင့် နတ်ဆိုးကျင့်ကြံသူများစွာမှာ ချက်ချင်းပင် ကြက်သေသေသွားကြရ၏။
၎င်းတို့ ချင်းယောင်ကမ္ဘာတွင် ဤမျှကြာရှည်စွာ နေထိုင်လာခဲ့ရာ ဤကဲ့သို့သော ကိစ္စမျိုးကို တစ်ခါမျှ မကြုံတွေ့ခဲ့ဖူးပေ။
"ဘာတွေဖြစ်ကုန်တာလဲ။ ချင်းယောင်ကမ္ဘာမှာ ဘာတွေဖြစ်သွားတာလဲ...”
"ဘာလို့ ရုတ်တရက်ကြီး ကောင်းကင်နဲ့ မြေကြီး မှောက်ခုံလန်မတတ် အပြောင်းအလဲတွေ ဖြစ်သွားရတာလဲ။ ကမ္ဘာမြေရဲ့ ချီစွမ်းအင်တွေကတောင် ဆယ်ဆမက ပိုပြီး သိပ်သည်းလာတယ်...”
နတ်ဘုရားအသွင်ပြောင်းအဆင့် နတ်ဆိုးကျင့်ကြံသူ အများအပြားမှာ မှင်တက်သွားကြရသည်။
၎င်းတို့သည် ကမ္ဘာမြေ၌ ထူးကဲသော အပြောင်းအလဲများ ဖြစ်ပေါ်လာရသည့် အကြောင်းရင်းကို အသီးသီး ရှာဖွေနေကြ၏။
"ချီစွမ်းအင်တွေ သိပ်သည်းလာတာလောက်တင် မဟုတ်ဘူး၊ ဒီကမ္ဘာမြေကြီးတစ်ခုလုံးက ဘယ်နှဆလောက်တောင် ပိုကျယ်သွားမှန်း မသိတော့ဘူး...”
"ပြီးတော့ ပတ်ဝန်းကျင်မှာလည်း မရင်းနှီးတဲ့ တောင်တန်းတွေနဲ့ သက်ရှိတွေ အများကြီး ပေါ်လာတယ်...”
"မတူညီတဲ့ ဘာသာစကားတွေကိုတောင် ပြောနေကြသေးတယ်။ ငါတို့တွေ တခြားကမ္ဘာတစ်ခုကို ရောက်သွားသလိုမျိုးပဲ...”
"မဟုတ်မှလွဲရော စွမ်းအားရှင်ကြီးတစ်ယောက်က ငါတို့ရဲ့ ချင်းယောင်ကမ္ဘာကို တခြားကမ္ဘာဆီ သယ်သွားတာများလား...”
နတ်ဘုရားအသွင်ပြောင်းအဆင့် နတ်ဆိုးကျင့်ကြံသူအချို့မှာ အလွန်အမင်း ဇဝေဇဝါ ဖြစ်နေကြ၏။
၎င်းတို့ ချင်းယောင်ကမ္ဘာတွင် အချိန်ကြာမြင့်စွာ နေထိုင်ခဲ့ကြပြီး ကမ္ဘာတစ်ဝန်းလုံးကို စောစောစီးစီးကပင် လှည့်လည်သွားလာခဲ့ဖူးသည်။
ဤကမ္ဘာအကြောင်းကို လက်ဖဝါးပေါ် တင်ထားသကဲ့သို့ အကုန်သိသည်ဟု မပြောရဲသော်လည်း မရင်းနှီးသော နေရာဟူ၍ တကယ်ကို မရှိသလောက်ပင်။
သို့ရာတွင် ယခုမူ ပတ်ဝန်းကျင်၌ မရင်းနှီးသော နေရာများစွာ ရုတ်တရက် ပေါ်ပေါက်လာခဲ့၏။
ကောင်းကင်နှင့် မြေကြီးတစ်ခုလုံးသည် မည်မျှလောက်အထိ ကျယ်ပြန့်သွားမှန်းကိုပင် မသိနိုင်တော့ပေ။
၎င်းတို့ မည်သို့ပင် ပျံသန်းစေကာမူ ကမ္ဘာ၏ အဆုံးသတ်သို့ ရောက်ရှိနိုင်ခြင်း မရှိတော့ချေ။
ဤသည်က ၎င်းတို့ကို အလွန်အမင်း ထိတ်လန့်ကြောက်ရွံ့သွားစေပြီး မည်သို့ဖြစ်ပျက်သွားသည်ကို လုံးဝ နားမလည်နိုင်အောင် ဖြစ်သွားစေတော့သည်။
မသိနားမလည်နိုင်မှုသည် အမြဲတမ်း အကြောက်မက်ဖွယ်အကောင်းဆုံး ကိစ္စရပ်ပင် မဟုတ်ပါလော။
ဤသည်မှာ ကံကောင်းခြင်းလော သို့မဟုတ် ကပ်ဘေးလောဆိုသည်ကို မည်သူမျှ မသိနိုင်ကြချေ။
မှန်ပေသည်၊ ဤသည်မှာ နတ်ဘုရားအသွင်ပြောင်းအဆင့် နတ်ဆိုးကျင့်ကြံသူများ၏ စိုးရိမ်ပူပန်မှုသာ ဖြစ်သည်။
အဆင့်နိမ့် နတ်ဆိုးသားရဲများအတွက်မူ တကယ်တမ်းတွင် အားလုံးက အတူတူပင် ဖြစ်ပေသည်။ မည်သည့်နေရာသို့ ရောက်သွားစေကာမူ ထိုအတိုင်းပင် ဖြစ်ပေလိမ့်မည်။
"ဘယ်လိုပဲဖြစ်ဖြစ် ငါတို့ အထူးသတိထားဖို့တော့ လိုတယ်...”
"အကောင်းဆုံးကတော့ တခြားကင်းထောက်တွေကို စေလွှတ်ပြီး ပတ်ဝန်းကျင်က သတင်းအချက်အလက်တွေကို စုံစမ်းခိုင်းတာပဲ...”
"ငါတို့ ချင်းယောင်ကမ္ဘာမှာ ဘာတွေ ထူးခြားပြောင်းလဲသွားသလဲ ဆိုတာကို စောင့်ကြည့်ရမယ်...”
နတ်ဘုရားအသွင်ပြောင်း ပြီးပြည့်စုံခြင်းအဆင့် နတ်ဆိုးကျင့်ကြံသူတစ်ဦးက လေးနက်သောအသံဖြင့် ပြောလိုက်၏။
၎င်းသည် အတော်လေး သတိကြီးလှပေသည်။
မည်သို့ပင်ဆိုစေကာမူ ပတ်ဝန်းကျင်အပြောင်းအလဲက တကယ်ကို ပြင်းထန်လွန်းလှရာ အကယ်၍ တဇွတ်ထိုးလုပ်မိမည်ဆိုပါက သေလမ်းသာ ရှိပေလိမ့်မည်။
ပတ်ဝန်းကျင်၏ သတင်းအချက်အလက်များကို သေချာစွာ စုံစမ်းပြီး ဘာတွေဖြစ်ပျက်နေသည်ကို ရှင်းလင်းစွာ သိရှိပြီးမှသာ ရွေးချယ်မှု ပြုလုပ်ချင်နေဆဲ ဖြစ်၏။
ဤသည်ကသာ အကောင်းဆုံး နည်းဗျူဟာပင် ဖြစ်ပေသည်။
ထိုသို့မဟုတ်ဘဲ ခေါင်းမရှိသော ယင်ကောင်များကဲ့သို့ နေရာအနှံ့ လျှောက်သွားနေမည်ဆိုလျှင် သေလမ်းရှာနေသည်နှင့် များစွာ ကွာခြားမည် မဟုတ်ပေ။
ထိုအချိန်မှာပင် ဤနတ်ဘုရားအသွင်ပြောင်းအဆင့် နတ်ဆိုးကျင့်ကြံသူများအနီးမှ အသံတစ်သံ ရုတ်တရက် ထွက်ပေါ်လာလေသည်။
"တာအိုရောင်းရင်းတို့ ကျွန်ုပ်ရဲ့ ရွှမ်ဟွမ်ကမ္ဘာကို ရောက်လာတဲ့အတွက် ကြိုဆိုပါတယ်...”
"မိတ်ဆွေတို့အနေနဲ့ ကျွန်ုပ် ရွှမ်ဟွမ်ဂိုဏ်းရဲ့ တောင်စောင့်ဝိညာဉ်သားရဲတွေ ဖြစ်လာဖို့ ဆန္ဒရှိကြမလားတော့ မသိဘူး...”
ဤနေရာတွင် ပေါ်လာသူမှာ အခြားသူမဟုတ်ဘဲ ကျိုးစွေ့၏ကိုယ်ပွားပင် ဖြစ်ပေသည်။ သူသည် အထက်မှနေ၍ အောက်သို့ ငုံ့ကြည့်ကာ ထိုနတ်ဘုရားအသွင်ပြောင်းအဆင့် နတ်ဆိုးကျင့်ကြံသူများကို ပြုံးရွှင်စွာ ကြည့်နေလေ၏။
"မင်းက ဘယ်သူလဲ...”
"အပြင်ကလာတဲ့ နတ်ဘုရားအသွင်ပြောင်းအဆင့် ကျင့်ကြံသူလား...”
"ဒီကောင်က ဘယ်သူပဲဖြစ်ဖြစ် သူ့ကိုသတ်ပြီး ဝိညာဉ်ကို သန့်စင်လိုက်...”
နတ်ဘုရားအသွင်ပြောင်းအဆင့် နတ်ဆိုးကျင့်ကြံသူ အများအပြားမှာ ချက်ချင်းပင် လန့်ဖျပ်သွားကြ၏။ ၎င်းတို့၏ အနီးသို့ သူစိမ်းတစ်ဦး ချဉ်းကပ်လာမည်ဟု မထင်မှတ်ထားခဲ့သည့်အပြင် ယခင်ကလည်း မည်သည်ကိုမျှ သတိမထားမိခဲ့ကြပေ။
သို့သော်ငြား ၎င်းတို့က လျင်မြန်စွာပင် တုံ့ပြန်လာပြီး ရက်စက်ကြမ်းကြုတ်သည့် သဘာဝစရိုက်များ ပေါ်ထွက်လာကာ ကျိုးစွေ့အပေါ် အသေသတ်ရန် ဆန္ဒရှိလာကြ၏။
သိသာထင်ရှားစွာပင် ဤနတ်ဘုရားအသွင်ပြောင်းအဆင့် နတ်ဆိုးကျင့်ကြံသူများသည် အတော်လေး ရက်စက်ကြမ်းကြုတ်ပြီး ဗိုလ်ကျတတ်ကြပေသည်။
"တကယ်ကို အပြစ်ကြွေးတွေနဲ့ ပြည့်နှက်နေတဲ့ နတ်ဆိုးသားရဲတစ်သိုက်ပဲ...”
"တကယ်ကို ကယ်တင်ချေချွတ်ပေးဖို့ လိုအပ်နေတာပဲ...”
ကိုယ်ပွားကျိုးစွေ့က တည်ငြိမ်သော မျက်နှာထားဖြင့် ဤနတ်ဘုရားအသွင်ပြောင်းအဆင့် နတ်ဆိုးကျင့်ကြံသူများကို ခပ်အေးအေးပင် ကြည့်နေလိုက်သည်။
နတ်ဘုရားအသွင်ပြောင်းအဆင့် နှောင်းပိုင်းသို့ တက်လှမ်းသွားပြီဖြစ်သော သူ့အနေဖြင့် ပင်မကိုယ်ထည်မဟုတ်လျှင်ပင် ဤနတ်ဘုရားအသွင်ပြောင်းအဆင့် နတ်ဆိုးကျင့်ကြံသူများ ယှဉ်ပြိုင်နိုင်စွမ်းရှိသည့် အရာမဟုတ်တော့ချေ။
၎င်းတို့အားလုံး ပေါင်းစည်းလိုက်လျှင်ပင် သူ့ပြိုင်ဘက် ဖြစ်လာမည် မဟုတ်ပေ။
ရွှစ်... ရွှစ်... ရွှစ်…။
ကိုယ်ပွားများ တစ်ခုပြီးတစ်ခု ထွက်ပေါ်လာကာ နေရာအနှံ့ ပြန့်ကျဲသွားလေသည်။
ဝုန်း... ဝုန်း... ဝုန်း…။
ခဏအကြာတွင် ထိုနတ်ဘုရားအသွင်ပြောင်းအဆင့် နတ်ဆိုးကျင့်ကြံသူများအားလုံး ချေမှုန်းခံလိုက်ရပြီး မျက်နှာများမှာလည်း ရိုက်နှက်ခံထားရသဖြင့် ဖူးရောင်ပွန်းပဲ့နေကြတော့၏။
တစ်ဦးချင်းစီ၏ ခန္ဓာကိုယ်ထဲသို့ 'အိပ်မက်ဆိုးမျိုးစေ့' များ ပေါင်းစပ်ထည့်သွင်းခံလိုက်ရတော့သည်။
ထိုအခါ ၎င်းတို့ ခန္ဓာကိုယ်ပေါ်ရှိ ရန်လိုမှုများနှင့် သတ်ဖြတ်လိုသော အငွေ့အသက်များက ချက်ချင်းပင် လွင့်စင်ပျောက်ကွယ်သွားကြလေသည်။
ထိုအရာများနေရာတွင် အစားထိုးဝင်ရောက်လာသည်က အရာရာကို သဘောပေါက်နားလည်သွားသော အကြည့်များပင် ဖြစ်ပေသည်။
လူသတ်ဓားကို လွတ်ချပြီး ချက်ချင်းပင် ဗုဒ္ဓသားတော်အဖြစ် ကူးပြောင်းသွားသကဲ့သို့ပင်။
တစ်ဦးချင်းစီသည် ကရုဏာတရားအပြည့်ဖြင့် ဖော်ရွေလာကြလေတော့၏။
"မဆိုးဘူး၊ မဆိုးဘူး...”
"ဒီလိုဆိုရင်တော့ ဒီကမ္ဘာမှာ ဘာခြိမ်းခြောက်မှုမှ မရှိနိုင်တော့ဘူး...”
ကိုယ်ပွားကျိုးစွေ့က အလွန်အမင်း ကျေနပ်သွားလေသည်။
သို့သော်ငြား နောက်လာမည့် အချိန်များအတွင်း သူသည်လည်း ကမ္ဘာအနှံ့ ပြေးလွှားကာ နတ်ဘုရားအသွင်ပြောင်းအဆင့် နတ်ဆိုးကျင့်ကြံသူများစွာကို ကယ်တင်ချေချွတ်ပေးရဦးမည် ဖြစ်ကြောင်းကိုလည်း သိထားပေသည်။
မည်သို့ပင်ဆိုစေကာမူ 'ထာဝရစိမ်းလန်းအင်မော်တယ်နွယ်ပင်' သည် အလယ်အလတ်အဆင့် ကမ္ဘာများကို အချိန်မရွေး ဖမ်းယူတတ်သည် မဟုတ်ပါလော။
ထိုသို့ဖြင့် ရွှမ်ဟွမ်ကမ္ဘာသည်လည်း အခြားကမ္ဘာမှ သက်ရှိအမြောက်အများကို လက်ခံရရှိဦးမည် ဖြစ်သည်။
အကယ်၍ သေသေချာချာ ဖြေရှင်းနိုင်ခြင်း မရှိပါက သတ်ဖြတ်မှုများ ဖြစ်ပေါ်လာနိုင်ပေသည်။
သို့သော်လည်း သူ့တွင် ရွှမ်ဟွမ်ကမ္ဘာ၌ ကိုယ်ပွားအများအပြား ရှိနေသဖြင့် ဤကိစ္စရပ်များကို ကိုင်တွယ်ဖြေရှင်းရာတွင် အကောင်းဆုံး အကူအညီများပင် ဖြစ်သည်။
ပင်မကိုယ်ထည်၏ ကျင့်ကြံမှုအဆင့် တိုးတက်လာသည်နှင့်အမျှ ကိုယ်ပွားများ၏ စွမ်းအားကလည်း အသီးသီး မြင့်တက်လာဦးမည် ဖြစ်လေတော့သည်။