အခန်း (၇၅၃-၇၅၄)

အခန်း (၇၅၃) - နတ်ဘုရားအသွင်ပြောင်း နှောင်းပိုင်းအဆင့်သို့ တက်လှမ်းခြင်း၊ အင်မော်တယ်အဆင့် စိတ်ဝိညာဉ်အမြစ်၊ ဆဋ္ဌမအဆင့် 'မိုးကြိုးကပ်ဘေးကူ'(၃)။

ဝုန်း...။

'မိုးကြိုးကပ်ဘေးကူ' ၏ ကိုယ်ပေါ်တွင် ထူထပ်လှသော မိုးကြိုးကပ်ဘေး အဆောင်လက်ဖွဲ့စာလုံးများ၊ ခရမ်းရောင် မိုးကြိုးလိုင်းများ ပေါ်ထွက်လာသည်ကို သူ ခံစားလိုက်ရ၏။

၎င်း၏ ခန္ဓာကိုယ်အတွင်း၌ ကြီးမားလှသော မိုးကြိုးပင်လယ် လေဟာနယ်တစ်ခု ပါဝင်နေပုံရပြီး မရေမတွက်နိုင်သော ကပ်ဘေးမိုးကြိုးများကို သိုလှောင်ထားလေသည်။

ဆဋ္ဌမအဆင့် အောက်ခြေအဆင့်သို့ ရောက်ရှိသွားသော 'မိုးကြိုးကပ်ဘေးကူ' သည် ၎င်း၏ကိုယ်ပိုင် ထူးခြားလှသည့် ကောင်းကင်နှင့် မြေကြီး ဓမ္မရုပ်သွင်ဖြစ်သော မိုးကြိုးပင်လယ် ဓမ္မရုပ်သွင်ကိုလည်း မွေးဖွားပေးနိုင်ခဲ့ပြီ ဖြစ်၏။

တစ်ကြိမ်တစ်ခါမျှ ဖော်ထုတ်လိုက်သည်နှင့် အဆုံးမဲ့ မိုးကြိုးပင်လယ်ကြီးကို ဆင့်ခေါ်နိုင်ပြီး အရာအားလုံးကို ဖုံးလွှမ်းသွားစေမည် ဖြစ်၏။

မိုးကြိုးအားလုံးကို ထိန်းချုပ်ထားသော နတ်ဘုရားတစ်ပါးနှင့်ပင် တူလှသည်။

“အရမ်းကို သန်မာလွန်းတယ်...”

ကျိုးစွေ့က လက်သီးကို ဆုပ်လိုက်၏။

'မိုးကြိုးကပ်ဘေးကူ' ၏ အရွယ်အစားမှာ များစွာ ကြီးမားလာခြင်း မရှိသော်လည်း၊ ၎င်း၏ကိုယ်ပေါ်ရှိ စွမ်းအားများမှာ အခြေခံကျသော အပြောင်းအလဲများ ဖြစ်ပေါ်သွားသည်မှာ ထင်ရှားလှပြီး သာမန် လေဟာနယ်သန့်စင်ခြင်းအဆင့် အစောပိုင်းကျင့်ကြံသူတစ်ဦးနှင့် များစွာ ကွာခြားမှု မရှိတော့ပေ။

ကပ်ဘေးမိုးကြိုးစွမ်းအားကို ပိုင်နိုင်စွာ အသုံးပြုနိုင်သောကြောင့် တိုက်ခိုက်ရေးစွမ်းအားမှာ ပို၍ပင် သာလွန်နေသည်မှာ သိသာထင်ရှားလှ၏။

အဆင့်တူ လေဟာနယ်သန့်စင်ခြင်းအဆင့် အစောပိုင်းကျင့်ကြံသူများအနေဖြင့် ယှဉ်ပြိုင်နိုင်စွမ်း လုံးဝမရှိချေ။

ယခုအခါ လေဟာနယ်သန့်စင်ခြင်းအဆင့် ကျင့်ကြံသူများကို ရင်ဆိုင်ရန်အတွက် သူသည် ကုယုံဆန်းကြယ်အလင်းပညာရပ်ကို အသုံးပြုရန် လုံးဝ မလိုအပ်တော့ပေ။

'မိုးကြိုးကပ်ဘေးကူ' ၏ စွမ်းအားကိုသာ အသုံးပြုလိုက်ရုံဖြင့် လေဟာနယ်သန့်စင်ခြင်း ဘိုးဘေးများကို သတ်ဖြတ်နိုင်ပြီ ဖြစ်၏။

“နောက်ထပ် ထူးကဲစွမ်းရည်တစ်ခုလည်း ထွက်ပေါ်လာပုံရတယ်...”

“နာမည်ကတော့ ဧကရာဇ်မိုးကြိုးလက်ဝါးတဲ့...”

ကျိုးစွေ့က တွေးလိုက်မိသည်။

မိမိ၏ သိစိတ်ပင်လယ်နက်ရှိုင်းသော နေရာမှ ကြီးမားလှသည့် ထူးကဲစွမ်းရည် အချက်အလက်များ ချက်ချင်း ဝင်ရောက်လာသည်ကို ကျိုးစွေ့ ခံစားလိုက်ရ၏။ ဒီရေလှိုင်းကြီးများအလား သူ၏ သိစိတ်ပင်လယ်ထဲသို့ ဝင်ရောက်လာကာ ချက်ချင်းပင် သူ ကျွမ်းကျင်သွားခဲ့သည်။

ဤသည်မှာ ခန္ဓာကိုယ်၏ ပင်ကိုယ်ဗီဇကဲ့သို့ပင် ဖြစ်ပြီး ဤသွေးမျိုးဆက်ထူးကဲစွမ်းရည်ကို ချက်ချင်း တတ်မြောက်သွားခြင်း ဖြစ်၏။

ယခင်က သူသည် 'မိုးကြိုးကပ်ဘေးကူ' ထံမှ ‘ကောင်းကင်အမျက်မိုးကြိုးသံစဉ်’ ဟု အမည်ရသော ထူးကဲစွမ်းရည်တစ်ခုကို ရရှိခဲ့ဖူး၏။

ယခု ထူးကဲစွမ်းရည်၏ အမည်မှာ ‘ဧကရာဇ်မိုးကြိုးလက်ဝါး’ ပင် ဖြစ်ပေသည်။

၎င်းသည် ပြိုင်ဘက်ကင်း လက်ဝါးသိုင်း ထူးကဲစွမ်းရည်တစ်ခု ဖြစ်၏။ လက်ဝါးတစ်ချက် ရိုက်ထုတ်လိုက်သည်နှင့် မိုးကြိုးပေါင်း သောင်းချီမကကို စုစည်းနိုင်ပြီး မရေမတွက်နိုင်သော မိုးကြိုးများကို ထိန်းချုပ်ထားသည့် ဧကရာဇ်တစ်ပါးအလား ရန်သူအား သေစေလောက်သော တိုက်ခိုက်မှုတစ်ခုကို ပေးစွမ်းနိုင်လေသည်။

များသောအားဖြင့် လက်ဝါးတစ်ချက် ရိုက်ချလိုက်သည်နှင့် တစ်ခဏအတွင်း မိုင်ပေါင်းသောင်းနှင့်ချီသော မြေပြင်ကို ပျက်စီးသွားစေနိုင်၏။

ဤကဲ့သို့သော ဖျက်ဆီးနိုင်စွမ်းမျိုးမှာ သာမန်ကျင့်ကြံသူများ၏ ထူးကဲစွမ်းရည်၊ မန္တန်အတတ်များနှင့် နှိုင်းယှဉ်ရန်ပင် လုံးဝမဖြစ်နိုင်ချေ။

ယခုအခါ သူ၏ခန္ဓာကိုယ်အတွင်းရှိ ဆဲလ်တိုင်းတွင် ကြီးမားလှသော မိုးကြိုးစွမ်းအင်များ ပါဝင်နေသကဲ့သို့ တဖျစ်ဖျစ် မြည်သံများ ထွက်ပေါ်နေသည်ကို သူ တွေ့ရှိလိုက်ရ၏။

၎င်းတို့သည် သူ၏ခန္ဓာကိုယ်အတွင်း မရေမတွက်နိုင်သော မိုးကြိုးများ အဆက်မပြတ် လှည့်လည်နေသကဲ့သို့ ဖြစ်နေပြီး၊ သူ၏ခန္ဓာကိုယ်ကို မိုးကြိုးခန္ဓာအဖြစ် ပြောင်းလဲသွားစေကာ မိုးကြိုးသောင်းသိန်းမကကို လက်ခံနိုင်စွမ်း ရှိလာစေ၏။

အမှန်အတိုင်းဆိုရလျှင် ယခုအချိန်၌ သူသည် အလွန်အမင်း လှုပ်ရှားချင်နေပြီး အပြင်ဘက်တွင် အချီသုံးရာမျှ တိုက်ခိုက်ချင်စိတ်များ ပေါ်ပေါက်လာကာ ခန္ဓာကိုယ်အတွင်းရှိ ဖျက်ဆီးချင်သော စိတ်ဆန္ဒများကို ထုတ်ဖော်ပစ်ချင်နေမိ၏။

ဤကြီးမားလှသော မိုးကြိုးစွမ်းအင်များက သူ၏ကိုယ်ပေါ်ရှိ သွေးမျိုးဆက်များကိုလည်း စိတ်လှုပ်ရှားလာစေခဲ့သည်။

"အင်း..."

ဤအချိန်တွင် ပိုင်စုကျဲ့လည်း တဖြည်းဖြည်း သတိရလာကာ လှပသော မျက်လုံးလေးများကို ဖွင့်လိုက်၏။

ပထမဆုံးအနေဖြင့် သူမ၏ ခန္ဓာကိုယ်မှ သိမ်မွေ့သော နာကျင်မှုတစ်ခုကို ခံစားလိုက်ရပြီး ယခင်က ဖြစ်ပျက်ခဲ့သည်များကို ပြန်လည်သတိရသွားချိန်၌ လှပသော မျက်နှာလေးမှာ အလိုအလျောက် နီရဲသွားလေသည်။

ရွှေရောင် အမွေးစုတ်ဖွား နားရွက်လေးများမှာ ညင်သာစွာ လှုပ်ရှားနေပြီး အထူးတလည် ချစ်စရာကောင်းကာ ဆွဲဆောင်မှုရှိနေတော့သည်။

သူမ၏ ခန္ဓာကိုယ်အတွင်း၌ ကြီးမားလှသော လေဟာနယ်သန့်စင်ခြင်း မှော်စွမ်းအင်များ စီးဆင်းနေသည်ကို ခံစားလိုက်ရ၏။

မူလက သူမ၏ ခန္ဓာကိုယ်အတွင်းရှိ လေဟာနယ်သန့်စင်ခြင်း မှော်စွမ်းအင်များမှာ အပြည့်အဝ တည်ငြိမ်မှု မရှိသေးပေ။

သို့သော် ယခု ယင်ယန်တာအိုလမ်းစဉ်ကို နားလည်သဘောပေါက်ပြီးနောက် သူမ၏ လေဟာနယ်သန့်စင်ခြင်းအစောပိုင်း ကျင့်ကြံမှုအဆင့်မှာလည်း လုံးဝ တည်ငြိမ်သွားပြီဟု ဆိုနိုင်ကာ အခြေခံအုတ်မြစ်မှာလည်း အလွန်အမင်း ခိုင်မာသွားခဲ့ချေပြီ။

ထို့အပြင် ဤမျှသာ မဟုတ်သေးချေ။

သူမ၏ ကိုယ်ပေါ်ရှိ လေဟာနယ်သန့်စင်ခြင်း မှော်စွမ်းအင်များမှာလည်း အဆင့်တစ်ခုအထိ တိုးတက်လာခဲ့သေး၏။

ယခုတစ်ကြိမ် ကျင့်ကြံမှုတစ်ခုတည်းကပင် သူမ၏ နှစ်ရာပေါင်းများစွာ ကြိုးစားကျင့်ကြံရမည့် အချိန်များကို အနည်းဆုံး သက်သာစေခဲ့ပေသည်။

ဤသည်ကို ကြည့်ခြင်းအားဖြင့် ဤကျင့်ကြံမှုသည် သူမအတွက် မည်မျှအထိ ကြီးမားသော အကျိုးကျေးဇူးကို ဖြစ်ထွန်းစေခဲ့ကြောင်း တွေးကြည့်နိုင်ပေသည်။

ဤသည်က သူမ လေဟာနယ်သန့်စင်ခြင်းအဆင့် အလယ်အလတ်ပိုင်းသို့ တက်လှမ်းရန် အချိန်များကို များစွာ လျှော့ချပေးနိုင်မည်ဟူသော အဓိပ္ပာယ်ပင် ဖြစ်၏။

အခြား လေဟာနယ်သန့်စင်ခြင်းအဆင့် ကျင့်ကြံသူများကဲ့သို့ နှစ်ထောင်ပေါင်းများစွာ ကြိုးစားရုန်းကန်ရပြီး၊ တိုးတက်မှု အနည်းငယ်မျှပင် မရရှိနိုင်ခြင်းမျိုး ဖြစ်ရန် မလိုအပ်တော့ချေ။

"ယောကျ်ား... ရှင်က ယင်ယန်တာအိုလမ်းစဉ် ကျင့်ကြံတာနဲ့ ပတ်သက်ပြီး ဒီလောက်တောင် ကျွမ်းကျင်နေတာဆိုတော့ အောက်ကမ္ဘာလောကမှာ အများကြီး လေ့ကျင့်ခဲ့ဖူးတာလား၊ အတွေ့အကြုံ အများကြီး ရှိနေတယ်ပေါ့လေ...”

ပိုင်စုကျဲ့က လှပသော မျက်လုံးလေးများကို ပုတ်ခတ်ပုတ်ခတ်လုပ်ရင်း ကျိုးစွေ့ကို ကြည့်လိုက်၏။

ဤစက်ဆုပ်ဖွယ်ကောင်းသော အမျိုးသားမှာ လုံးဝကို သမ္ဘာရင့်ဝါရင့်ကြီးတစ်ဦး ဖြစ်နေသည်ဟု သူမ ပို၍ပင် ခံစားလာရ၏။ သို့မဟုတ်ပါက ဤမျှလောက် ကျွမ်းကျင်နေမည် မဟုတ်ချေ။

ဤသည်မှာ ပန်းခင်းထဲမှ မဟာဆရာသခင်ကြီးတစ်ဦးနှင့်ပင် တူလှသည်။

သူမတွင် ရွှေမွေးကျောက်စိမ်းမျက်နှာ မြေခွေးသွေးမျိုးဆက် ပါရှိနေသော်လည်း တစ်ဖက်လူ၏ နည်းလမ်းများမှာ အလွန် ထူးကဲလွန်းသည်ဟု ခံစားနေရဆဲပင်။

"မဟုတ်ရပါဘူးကွာ...”

"ဒါက မွေးရာပါ ပါရမီထူးချွန်ရုံ သက်သက်ပါ...” ဟု ကျိုးစွေ့က ပြောလိုက်၏။

"ဒီလိုကိစ္စမျိုးဆို ကိုယ့်မှာ အတွေ့အကြုံ နည်းနည်းလေးမှ မရှိပါဘူး၊ ကျမ်းစာတွေထဲမှာ ရံဖန်ရံခါ ဖတ်ဖူးရုံလောက်ပါပဲ...”

ကျိုးစွေ့က မျက်နှာပူခြင်းအလျဉ်းမရှိ၊ အမူအရာမပျက် ပြောလိုက်၏။

သူသည် လူပျိုစစ်စစ်တစ်ဦးသာဖြစ်ပြီး ဤကဲ့သို့သော ကိစ္စများကို မကြုံဖူးကြောင်းနှင့် ပိုင်စုကျဲ့သည် သူ၏ပထမဆုံး တာအိုလက်တွဲဖော်ပင် ဖြစ်သည်ဟု ဆိုလိုခြင်းဖြစ်လေသည်။

အမှန်အတိုင်းဆိုရလျှင် သူ၏ မျက်နှာပြောင်တိုက်နိုင်မှုသည် မြို့ရိုးထက်ပင် ပို၍ ထူထဲနေချေပြီ။

လိမ်ပြောမည်ဆိုလျှင်ပင် တစ်ချက်ကလေးတောင် စဉ်းစားနေစရာ မလိုတော့ချေ။

"ဖီ... ရှင်ပြောတာကို ကျွန်မက ယုံမယ်လို့ ထင်နေတာလား...”

"မွေးရာပါ ပါရမီထူးချွန်တယ် ဟုတ်လား၊ ဒီလိုကိစ္စမျိုးမှာတောင် ပါရမီပါရသေးတယ်ပေါ့...”

ပိုင်စုကျဲ့က ကျိုးစွေ့ကို အားရပါးရ ကိုက်ပစ်လိုက်၏။

သူမသည်လည်း အရူးတစ်ယောက်မဟုတ်ရာ ဤခွေးကောင်၏ စကားကို မည်သို့ ယုံကြည်မည်နည်း။

ဤမျှ ကျွမ်းကျင်နေပါလျက် အတွေ့အကြုံမရှိသူတစ်ယောက် မည်သို့ဖြစ်နိုင်မည်နည်း။

ဝက်မကြီးက သစ်ပင်တက်နိုင်သည်ကိုသာ ယုံလျှင်ယုံလိုက်ပေမည်၊ ဤအမျိုးသား လူပျိုစစ်စစ်ဖြစ်သည်ဆိုသည်ကိုမူကား သူမ လုံးဝ ယုံကြည်မည်မဟုတ်ချေ။

သို့သော်ငြား သူမအနေဖြင့် ဤခွေးကောင်၏ ကျော့ကွင်းထဲသို့ ကျဆင်းသွားပြီးနောက် မည်သို့မျှ ရုန်းထွက်၍ မရနိုင်တော့ဟုသာ ဝန်ခံရပေမည်။

သို့ရာတွင် ဤအမျိုးသားက ဖြူစင်ဟန်ဆောင်ကာ ခန့်ညားသော လူကြီးလူကောင်းတစ်ဦး၊ သို့မဟုတ် အန္တရာယ်ကင်းမဲ့သူတစ်ဦးကဲ့သို့ အသွင်ယူထားသောကြောင့်သာ ဖြစ်ပေသည်။

ထို့ကြောင့်သာ သူမသည် ဤအမျိုးသား၏ အကြီးစားလှည့်ကွက်ထဲသို့ ကျဆင်းသွားကာ မိမိကိုယ်မိမိ ပုံအပ်မိခဲ့ခြင်း မဟုတ်ပါလော။

ယခုမူကား ထမင်းသည် ဆန်ပြန်မဖြစ်နိုင်သကဲ့သို့ နောင်တရရန်ပင် အချိန်နှောင်းသွားခဲ့ချေပြီ။

ကြက်နှင့်ညားလျှင် ကြက်၊ ခွေးနှင့်ညားလျှင် ခွေး ဆိုသကဲ့သို့သာ ဖြစ်ရတော့ပေမည်။

သူမသည် ရိုးရာဓလေ့ကို လိုက်နာတတ်သော မိန်းမသားတစ်ဦး မဟုတ်ပါလော။

"နေပါဦး၊ ရှင့်ရဲ့ ကျင့်ကြံမှုအဆင့်က နတ်ဘုရားအသွင်ပြောင်း နှောင်းပိုင်းအဆင့်ကိုတောင် ချိုးဖြတ်သွားပြီလား၊ ဘယ်လိုလုပ် ဒီလောက်မြန်နေရတာလဲ...”

ထိုအချိန်တွင် ပိုင်စုကျဲ့မှာ ရုတ်တရက် အံ့ဩတုန်လှုပ်သွားရ၏။

ကျိုးစွေ့၏ ကိုယ်ပေါ်မှ ထွက်ပေါ်နေသော အငွေ့အသက်သည် ကောင်းကင်နှင့်မြေကြီးကဲ့သို့ မှောက်ခုံလန်သွားသည့်အလား ပြောင်းလဲသွားပြီး အရင်ကနှင့်နှိုင်းယှဉ်လျှင် အဆပေါင်းများစွာ ပိုမိုအစွမ်းထက်လာသည်ကို သူမ ခံစားလိုက်ရသည်။

သိသာထင်ရှားစွာပင် တစ်ဖက်လူ၏ ကျင့်ကြံမှုအဆင့်သည် ကြီးမားသော ချိုးဖြတ်မှုတစ်ခုကို ရရှိသွားပြီး နတ်ဘုရားအသွင်ပြောင်း နှောင်းပိုင်းအဆင့်သို့ တက်လှမ်းသွားခဲ့ချေပြီ။

ဤအမျိုးသားသည် ဝိညာဉ်လောကသို့ စတင်တက်လှမ်းလာချိန်က နတ်ဘုရားအသွင်ပြောင်း အစောပိုင်းအဆင့်သာ ရှိသေးသည်ကို သိထားရပေမည်။

ယခုအခါ အချိန်မည်မျှကြာသွားသည်မို့ နှစ်ဆင့်ဆက်တိုက် ချိုးဖြတ်ကာ နတ်ဘုရားအသွင်ပြောင်း နှောင်းပိုင်းအဆင့်သို့ တက်လှမ်းသွားရပါသနည်း။

ဤကဲ့သို့သော တိုးတက်မှုနှုန်းသည် တွေးကြည့်၍ပင် မရနိုင်အောင် ဖြစ်နေပေသည်။

ဤအမျိုးသားသည် ယခုမှ အသက် ငါးရာ၊ ခြောက်ရာခန့်သာ ရှိသေးသည်ကိုလည်း သိထားရပေမည်။

ပုံမှန်အားဖြင့် ဆိုရလျှင် ဤအသက်အရွယ်ဖြင့် အချို့သူများသည် ဝိညာဉ်သန္ဓေသားအဆင့်တွင်သာ ရှိနေသေးရာ၊ နတ်ဘုရားအသွင်ပြောင်း နှောင်းပိုင်းအဆင့်သို့ တက်လှမ်းနိုင်ရန်ဆိုသည်မှာ ဝေလာဝေးပင် ဖြစ်လေသည်။

ဤအမျိုးသားသည် တကယ်ကို မွေးရာပါ ပါရမီထူးချွန်သူဖြစ်သည်ဟုသာ ဆိုရတော့ပေမည်။

"ဒါကတော့ မင်းနဲ့အတူ ယင်ယန်လမ်းစဉ်ကို လေ့လာဆင်ခြင်တဲ့အခါမှာ သိမြင်နားလည်မှု တစ်ခုခုရလာလို့ပေါ့...”

"ဒါကြောင့်လည်း ကျင့်ကြံမှုအဆင့်က ကြီးမားတဲ့ ချိုးဖြတ်မှုကို ရရှိသွားပြီး အကျိုးကျေးဇူးတွေ အများကြီး ရလိုက်တာပဲ...”

“ထပ်ပြီးသာ များများကျင့်ကြံမယ်ဆိုရင် ကျုပ်အတွက်လည်း အကျိုးကျေးဇူး ကြီးမားလာနိုင်ပြီး မကြာခင် လေဟာနယ်သန့်စင်ခြင်းအဆင့်ကို ရောက်သွားနိုင်လောက်တယ်...”

ကျိုးစွေ့က အတည်ပေါက်ဖြင့် ပြောလိုက်၏။

"ဖီ… ဖီ..."

ထိုစကားကို ကြားသောအခါ ပိုင်စုကျဲ့မှာ မျက်နှာလေး ရဲတက်သွားပြီး ဤအမျိုးသားကို နှာခေါင်းရှုံ့လိုက်လေသည်။

အကယ်၍ ဤသို့လုပ်ရုံဖြင့် လေဟာနယ်သန့်စင်ခြင်းအဆင့်သို့ တက်လှမ်းနိုင်မည်ဆိုပါက ယခုအချိန်တွင် လူသားမျိုးနွယ်၌ လေဟာနယ်သန့်စင်ခြင်းအဆင့် ဘိုးဘေးများမှာ နေရာအနှံ့ ရှိနေလောက်ချေပြီ မဟုတ်ပါလော။

သို့သော် သူမအနေဖြင့်လည်း ငြင်းဆန်နိုင်စွမ်းမရှိသည်ကို တွေ့လိုက်ရပြီး ဤအမျိုးသား၏ ဆွဲခေါ်မှုဖြင့် ယင်ယန်လမ်းစဉ်ကို အတူတကွ လေ့လာဆင်ခြင်ရတော့လေသည်။

မကြာမီ အိပ်ခန်းအတွင်း၌ တာအိုသံစဉ်များက အဆက်မပြတ် ထွက်ပေါ်လာပြီး ရေတွက်မရနိုင်သော ရွှေရောင်မန္တန်အဆောင်များ တောက်ပလာကာ အကာအကွယ်အတားအဆီးတစ်ခုအဖြစ် ယှက်နွယ်သွားကြလေသည်။

......

အခန်း (၇၅၄) - နတ်ဘုရားအသွင်ပြောင်း နှောင်းပိုင်းအဆင့်သို့ တက်လှမ်းခြင်း၊ အင်မော်တယ်အဆင့် စိတ်ဝိညာဉ်အမြစ်၊ ဆဋ္ဌမအဆင့် 'မိုးကြိုးကပ်ဘေးကူ'(၄)။

နောက်ထပ်တစ်လ ကုန်လွန်သွားပြန်၏။

အခြေခံအားဖြင့် ကျိုးစွေ့နှင့် ပိုင်စုကျဲ့တို့သည် အတူတကွ နေထိုင်နေကြပြီဖြစ်သည်။ ကော်နှင့်သစ်စေးကဲ့သို့ ခွဲခွာ၍မရတော့ဘဲ အမှတ် (၈၈) တာအိုကျောင်းတော်ရှိ စံအိမ်အတွင်း၌ နေထိုင်ကာ နေ့ညမပြတ် ယင်ယန်လမ်းစဉ်ကို လေ့လာဆင်ခြင်နေကြလေသည်။

ထိုအချိန်တွင် ပိုင်စုကျဲ့၏ ရွှေမွေးကျောက်စိမ်းမျက်နှာ မြေခွေးသွေးနှော၏ အစွမ်းထက်မှုကိုလည်း သူ သိရှိသွားခဲ့ရသည်။

သူမနှင့်အတူ ယင်ယန်လမ်းစဉ်ကို လေ့လာဆင်ခြင်ချိန်တွင် သူ၏ ကျင့်ကြံမှုအဆင့်သည် လျှပ်တစ်ပြက် မြန်ဆန်စွာ တိုးတက်လာပြီး တစ်ရက်လျှင် မိုင်တစ်ထောင်ခရီး ရောက်သည်ဟုပင် ဆိုနိုင်ပေသည်။

မိမိဘာသာ ကြိုးစားကျင့်ကြံရသည်နှင့် နှိုင်းယှဉ်ပါက အဆပေါင်းမည်မျှ မြန်ဆန်နေမှန်းပင် မသိနိုင်တော့ချေ။

ရွှေမွေးကျောက်စိမ်းမျက်နှာ မြေခွေးသည် ဝိညာဉ်လောကရှိ ထိပ်တန်းသွေးမျိုးနွယ် သက်ရှိများထဲတွင် ပါဝင်သည်မှာ မထူးဆန်းဟုသာ ဆိုရမည်ဖြစ်ပေသည်။ ယင်ယန်လမ်းစဉ်ကို အထောက်အကူပြုရာတွင် တကယ်ကို အကန့်အသတ်မရှိသော အသုံးဝင်မှုများ ရှိနေပေသည်။

မှန်ပေသည်၊ ပိုင်စုကျဲ့အပေါ်တွင်လည်း ကျိုးစွေ့၏ အထောက်အကူပြုမှုသည် ထပ်တူထပ်မျှ ကြီးမားလှပေသည်။

နက်နဲသော အငွေ့အသက်မျှင်များသည် ပိုင်စုကျဲ့၏ ခန္ဓာကိုယ်အတွင်းသို့ ဝင်ရောက်သွားပြီး သူမ၏ ရွှေမွေးကျောက်စိမ်းမျက်နှာ မြေခွေးသွေးကို သန့်စင်ပေးနိုင်စွမ်း ရှိနေ၏။

သူမသည် မူလက လူတစ်ဝက်၊ နတ်ဆိုးတစ်ဝက်သာဖြစ်ပြီး စစ်မှန်သော ရွှေမွေးကျောက်စိမ်းမျက်နှာ မြေခွေးစစ်စစ် မဟုတ်သည်ကို သိထားရမည်ဖြစ်သည်။

သို့ရာတွင် ယခုမူကား မတူညီတော့ချေ။ 'ချစ်ခြင်းမေတ္တာကူ' ထံမှလာသော နက်နဲသည့် အငွေ့အသက်မျှင်များကြောင့် သူမကိုယ်ပေါ်ရှိ သွေးမျိုးဆက်များသည် အဆက်မပြတ် သန့်စင်လာကာ ပိုမိုမြင့်မားသော အဆင့်တစ်ခုဆီသို့ တက်လှမ်းနေပုံရ၏။

ဤသည်ကပင် ပိုင်စုကျဲ့၏ ကျင့်ကြံမှုအဆင့်နှင့် သွေးမျိုးဆက်စွမ်းအားများကို ကြီးမားစွာ တိုးတက်လာစေခဲ့လေသည်။

ဤတစ်လတာ ကြိုးစားကျင့်ကြံမှုသည် နှစ်ဦးနှစ်ဖက်စလုံးအတွက် အကန့်အသတ်မရှိသော အကျိုးကျေးဇူးများ ဖြစ်စေခဲ့သည်ဟု ဆိုနိုင်ပေသည်။

"ယောက်ျား..."

"အစ်မတော်ဖုန်းရှီး၊ အစ်မတော်ဟွားနဲ့ အစ်မတော်ထောင်တို့က ကျွန်မအတွက် ဂုဏ်ပြုလက်ဆောင်တွေ အများကြီး ပို့ပေးလိုက်တယ်...”

"ပြီးတော့ လေဟာနယ်သန့်စင်ခြင်းအဆင့် မိသားစုကြီးတွေဆီကလည်း လက်ဆောင်တွေ အများကြီး ပို့လာကြသေးတယ်...”

ပိုင်စုကျဲ့မှာ အလွန် စိတ်လှုပ်ရှားနေပြီး လက်ဆောင်များကို တက်ကြွစွာ ကြည့်ရှုနေလေသည်။

သူမ လေဟာနယ်သန့်စင်ခြင်း အစောပိုင်းအဆင့်သို့ တက်လှမ်းသွားပြီးနောက် ဖုန်းရှီးမြို့၏ ရေတွက်ရနိုင်သော လေဟာနယ်သန့်စင်ခြင်းအဆင့် ဘိုးဘေးတစ်ဦး ဖြစ်လာခဲ့၏။

နောက်ကြောင်းဇာတ်မြစ်ဖြစ်စေ၊ အဆင့်အတန်းဖြစ်စေ အဆပေါင်းများစွာ မြင့်တက်သွားခဲ့ချေပြီ။

ဤသည်ကပင် လေဟာနယ်သန့်စင်ခြင်းအဆင့် မိသားစုများစွာကို ရှေ့တိုးလာကာ မျက်နှာချိုသွေးစေခဲ့ပြီး လက်ဆောင်များ အမြောက်အမြား ပေးပို့လာစေခဲ့လေသည်။

ထိုလက်ဆောင်များသည်လည်း အိမ်ထဲတွင် ချက်ချင်း ပြည့်လျှံသွားကာ မျက်စိကျိန်းမတတ် များပြားလှပြီး ရတနာအလင်းရောင်များက အရပ်လေးမျက်နှာသို့ ဖြာထွက်နေသည်။

"ရတနာတွေ ဒီလောက်တောင် များနေတာလား...”

ထိုမြင်ကွင်းကို မြင်သောအခါ ကျိုးစွေ့၏ နှုတ်ခမ်းထောင့်များ တွန့်ကွေးသွားရ၏။ အဘယ်ကြောင့်ဆိုသော် ဤလက်ဆောင်များ၏ တန်ဖိုးမှာ တကယ်ကို ပုံကြီးချဲ့လွန်းနေသောကြောင့် ဖြစ်လေသည်။

ကျပန်း လေဟာနယ်သန့်စင်ခြင်းအဆင့် မိသားစုတစ်ခုမှ ပေးသော လက်ဆောင်သည်ပင် အနည်းဆုံး အထွတ်အထိပ် ဝိညာဉ်ကျောက်တုံး တစ်သိန်းခန့် တန်ဖိုးရှိနေ၏။

၎င်းအပြင် စတုတ္ထအဆင့် ဆေးဖက်ဝင်အပင်များနှင့် ပဉ္စမအဆင့် ဆေးဖက်ဝင်အပင်များ စသည်တို့လည်း အများအပြား ပါဝင်သေးသည်။

ပဉ္စမအဆင့် ပစ္စည်းများနှင့် ဆဋ္ဌမအဆင့် ပစ္စည်းများပင် အများအပြား ရှိနေပြန်၏။

ဤလက်ဆောင်များကို ရရှိလိုက်ရုံဖြင့် သာမန် လေဟာနယ်သန့်စင်ခြင်းအဆင့် ကျင့်ကြံသူတစ်ဦးအတွက် နှစ်ပေါင်းမည်မျှ ကြိုးစားရုန်းကန်ရန် လုံလောက်သွားမှန်းပင် မသိနိုင်တော့ချေ။

ပိုင်စုကျဲ့သည် အလေးအနက်ထားမခံရသော လူသားဧကရာဇ်၏ သမီးတော်တစ်ဦးသာ ဖြစ်သော်လည်း လေဟာနယ်သန့်စင်ခြင်းအဆင့်သို့ တက်လှမ်းသွားချိန်တွင် လုံးဝ ကွဲပြားသွားခဲ့ပြီဖြစ်ပေသည်။

ဤကဲ့သို့သော စွမ်းအားအပြင် လူသားဧကရာဇ်၏ သမီးတော်ဟူသော ဇာတ်မြစ်ပါ ပေါင်းစပ်လိုက်လျှင် အလွန်အရေးပါသော အဆင့်အတန်းတစ်ခုကို အကြွင်းမဲ့ ပိုင်ဆိုင်သွားပြီဖြစ်သည်။

အကယ်၍ သာမန် လေဟာနယ်သန့်စင်ခြင်းအဆင့် ကျင့်ကြံသူတစ်ဦးသာဆိုပါက ဤမျှများပြားသော လက်ဆောင်များကို လက်ခံရရှိရန် လုံးဝ မဖြစ်နိုင်ချေ။

လူသားဧကရာဇ်၏ သမီးတော်ဟူသော ဇာတ်မြစ်နှင့် စွမ်းအားပေါင်းစပ်သွားမှုက အရည်အသွေးပိုင်းဆိုင်ရာ ပြောင်းလဲမှုတစ်ခုကို ဖြစ်ပေါ်စေခဲ့သည်ဟုသာ ဆိုရပေမည်။

"ဘုရားရေ၊ အစ်မတော်ထောင်က ကျွန်မကို ဆဋ္ဌမအဆင့် ရတနာဆေးလုံး တစ်ပုလင်းတောင် ပေးလိုက်တာပဲ။ ရောင်ခြည်ခုနစ်ဖြာ ကြာပန်းဆေးလုံးတဲ့...”

"ဒါက ပိုက်ဆံရှိရင်တောင် ဝယ်လို့မရနိုင်တဲ့ ဆဋ္ဌမအဆင့် ရတနာဆေးလုံးလေ...”

"တစ်လုံး သောက်သုံးလိုက်တာနဲ့ လေဟာနယ်သန့်စင်ခြင်းအဆင့် ကျင့်ကြံသူတစ်ယောက်ရဲ့ နှစ်တစ်ရာစာ ကြိုးစားအားထုတ်ရမယ့် အချိန်ကို သက်သာစေနိုင်တယ်...”

ပိုင်စုကျဲ့မှာ အလွန်အမင်း စိတ်လှုပ်ရှားနေသည်။

အဘယ်ကြောင့်ဆိုသော် လေဟာနယ်သန့်စင်ခြင်းအဆင့်သို့ တက်လှမ်းပြီးနောက်တွင် လေဟာနယ်သန့်စင်ခြင်းအဆင့် ကျင့်ကြံသူများနှင့် သင့်လျော်သော ဆေးလုံးများမှာ ပိုမိုနည်းပါးလာသောကြောင့် ဖြစ်လေသည်။

ဆဋ္ဌမအဆင့် ရတနာဆေးလုံးတိုင်းသည် တန်ဖိုးမဖြတ်နိုင်ပေ။

သာမန် ဆိုင်များတွင် ဆဋ္ဌမအဆင့် ရတနာဆေးလုံးများအား ရောင်းချရန်ဆိုသည်မှာ လုံးဝ မဖြစ်နိုင်ချေ။

ဝယ်ယူချင်ပါက အကြီးစား လေလံပွဲများဆီသို့သာ သွားရောက်၍ အခြားသော လေဟာနယ်သန့်စင်ခြင်းအဆင့် ဘိုးဘေးများနှင့် ယှဉ်ပြိုင်ရမည်ဖြစ်သည်။

လေလံတင်တိုင်းတွင်လည်း အံ့မခန်းဖွယ် စျေးနှုန်းများ ထွက်ပေါ်လာတတ်၏။

အကယ်၍ ကြွယ်ဝချမ်းသာမှုမှာ သာမန်မျှသာ ရှိမည်ဆိုပါက ဆဋ္ဌမအဆင့် ရတနာဆေးလုံးကို ဝယ်ယူနိုင်ရန် တွေးပင်မတွေးသင့်ပေ။

မည်သို့ပင်ဆိုစေကာမူ လေဟာနယ်သန့်စင်ခြင်းအဆင့် ကျင့်ကြံသူများအတွက်မူ အကယ်၍ ဆေးလုံးတစ်လုံးက နှစ်ပေါင်းရာချီ၊ ထောင်ချီ ကြိုးစားကျင့်ကြံရမည့် အချိန်ကို သက်သာစေမည်ဆိုပါက အထွတ်အထိပ် ဝိညာဉ်ကျောက်တုံး မည်မျှပင် ကုန်ကျစေကာမူ သဘာဝကျကျ ထိုက်တန်လှသည်။

လေဟာနယ်သန့်စင်ခြင်းအဆင့် ကျင့်ကြံသူများပင် ဖြစ်စေကာမူ သက်တမ်းမှာ အတော်လေး တန်ဖိုးကြီးလှသည် မဟုတ်ပါလော။

တစ်နည်းအားဖြင့် ဆိုရလျှင် ဤသည်မှာ သက်တမ်းကို အထွတ်အထိပ် ဝိညာဉ်ကျောက်တုံးများဖြင့် လဲလှယ်လိုက်ခြင်းဖြစ်ရာ လုံးဝကို အမြတ်ထွက်နေပေသည်။

"အစ်မတော်ဟွားကလည်း ကျွန်မကို နှစ်တစ်သောင်း ဝိညာဉ်နို့ရည် တစ်ပုလင်းတောင် ပေးလိုက်သေးတယ်...”

ပိုင်စုကျဲ့မှာ အံ့ဩတကြီး ဖြစ်နေလေသည်။

သိသာထင်ရှားစွာပင် ဤသည်ကလည်း အတော်လေး အံ့မခန်းတန်ဖိုးရှိသော ရတနာတစ်ခုဖြစ်ပေသည်။

လေဟာနယ်သန့်စင်ခြင်းအဆင့် ကျင့်ကြံသူများအတွက် မှော်စွမ်းအားများ ကုန်ခမ်းသွားပါက ပြန်လည်ပြည့်ဝလာစေရန် အချိန်အတော်ကြာ လိုအပ်သည်။

ပြဿနာမှာ တိုက်ပွဲကြီးတစ်ခု ဖြစ်ပွားလာချိန်တွင် ရန်သူများက မှော်စွမ်းအားများ ပြန်လည်ဖြည့်တင်းရန် အချိန်ပေးမည်မဟုတ်ခြင်းပင်။

သဘာဝကျစွာပင် အားနည်းနေချိန်ကို အခွင့်ကောင်းယူကာ အသက်ကို နှုတ်ယူကြမည်သာဖြစ်လေသည်။

သို့သော် နှစ်တစ်သောင်း ဝိညာဉ်နို့ရည်သည် လေဟာနယ်သန့်စင်ခြင်းအဆင့် မှော်စွမ်းအားများကို လျင်မြန်စွာ ပြန်လည်ပြည့်ဝစေနိုင်သည့် အဖိုးတန်ရတနာတစ်ပါး ဖြစ်၏။

နှစ်တစ်သောင်း ဝိညာဉ်နို့ရည် တစ်စက်တည်းဖြင့်ပင် လေဟာနယ်သန့်စင်ခြင်းအဆင့် ဘိုးဘေးတစ်ဦး၏ မှော်စွမ်းအားအားလုံးကို ချက်ချင်း ပြန်လည်ပြည့်ဝလာစေနိုင်သည်။

အကယ်၍ ကိုယ်ပေါ်တွင် ဤကဲ့သို့သော နှစ်တစ်သောင်း ဝိညာဉ်နို့ရည်တစ်ပုလင်း ဆောင်ထားမည်ဆိုပါက ၎င်းသည် အသက်ကယ်ရတနာတစ်ပါး အကြွင်းမဲ့ ဖြစ်ပေလိမ့်မည်။

လေလံပွဲများပေါ်တွင်သာ တင်လိုက်မည်ဆိုပါက ကျင့်ကြံသူမည်မျှကို ရူးသွပ်စွာ လုယက်လာစေမည်မှန်းပင် မသိနိုင်တော့ချေ။

ဤသည်မှာ တကယ်ကို ကြီးမားသော လက်ဆောင်တစ်ခုဖြစ်ကြောင်း တွေးကြည့်နိုင်ပေသည်။

"နေပါဦး၊ အစ်မတော်ဖုန်းရှီးက ကျွန်မကို အင်မော်တယ်ပုံဆောင်ခဲ အတုံးတစ်ရာတောင် ပေးလိုက်တာလား...”

"ဒါကတော့ တကယ်ကို လွန်လွန်းနေပြီ...”

ထိုအချိန်တွင် ပိုင်စုကျဲ့မှာ ဖုန်းရှီးတာအိုအရှင်၏ လက်ဆောင်ကို နောက်ဆုံးတွင် ဖွင့်ဖောက်လိုက်လေသည်။ အတွင်း၌ အင်မော်တယ်ပုံဆောင်ခဲ အတုံးတစ်ရာ ရှိနေပြီး ၎င်းတို့အပေါ်တွင် နက်ရှိုင်းလှကာ အဆုံးအစမဲ့သော အင်မော်တယ်ဝိညာဉ်ချီများ သိပ်သည်းစွာ ဖုံးလွှမ်းနေ၏။

အနည်းငယ် ရှူရှိုက်လိုက်ရုံဖြင့်ပင် အသက်ရှည်စေပြီး ကျင့်ကြံမှုအဆင့်ကို လျင်မြန်စွာ တိုးတက်လာစေနိုင်မည့်ပုံပေါ်နေ၏။

"အင်မော်တယ်ပုံဆောင်ခဲဆိုတာ ဘယ်လိုအရာလဲ...”

ကျိုးစွေ့က စူးစမ်းစွာဖြင့် မေးလိုက်၏။

သူသည် ဖုန်းရှီးမြို့ရှိ ကျမ်းစာတိုက်များစွာ၏ အချက်အလက်များကို ရရှိထားသော်လည်း အားလုံးကို ဖတ်ရှုရခြင်း မရှိသေးပေ။ ကျမ်းစာတိုက်တစ်ခုလုံး၏ အသိပညာများကို ချေဖျက်နိုင်ရန် အချိန်အတိုင်းအတာတစ်ခုအထိ လိုအပ်နေသေးသည်။

ထို့ကြောင့် သူသည် အင်မော်တယ်ပုံဆောင်ခဲကဲ့သို့သော အရာများနှင့် ပတ်သက်၍ ဘာမျှမသိသေးဘဲ အလွန်ရင်းနှီးနေသည်ဟုသာ ခံစားနေရ၏။

"အင်မော်တယ်ပုံဆောင်ခဲဆိုတာကတော့ နာမည်အတိုင်းပါပဲ၊ အင်မော်တယ်ချီတွေ စုစည်းပြီး ဖြစ်ပေါ်လာတဲ့ ပုံဆောင်ခဲတွေပေါ့...”

"ဒါက ငါတို့ ဝိညာဉ်လောကကနေ မွေးဖွားလာနိုင်တဲ့ ရတနာမဟုတ်ဘူး...”

"ဘာလို့လဲဆိုတော့ အင်မော်တယ်ပုံဆောင်ခဲက အင်မော်တယ်လောကကနေလာတဲ့ အဖိုးတန်ရတနာ ဖြစ်နေလို့ပဲ...”

"ငါတို့ ဝိညာဉ်လောကထဲမှာဆိုရင် အင်မော်တယ်ပုံဆောင်ခဲ တစ်တုံးစီတိုင်းက မြို့တစ်မြို့နဲ့တောင် တန်ဖိုးဖြတ်လို့မရဘူး...”

"မဟာယာနအဆင့် ကျင့်ကြံသူတွေဆိုရင်တောင် ဒါကိုရဖို့ အပြင်းအထန် တပ်မက်ကြတယ်...”

"ဒါက အထွတ်အထိပ် ဝိညာဉ်ကျောက်တုံးတွေကို ကျော်လွန်သွားတဲ့ ခိုင်မာတဲ့ ငွေကြေးတစ်မျိုးပဲ...”

ပိုင်စုကျဲ့က ရှင်းပြလိုက်၏။

"ဒါဆိုရင် အင်မော်တယ်ပုံဆောင်ခဲက တကယ်တော့ ဘယ်ကနေ ရောက်လာတာလဲ...”

ကျိုးစွေ့က မေးစေ့ကို ပွတ်သပ်လိုက်လေသည်။

အမှန်တကယ်တမ်း သူသည်လည်း အင်မော်တယ်ပုံဆောင်ခဲ၏ နက်နဲမှုကို ရိပ်မိနေ၏။ တကယ်ကို ဝိညာဉ်လောကနှင့် မသက်ဆိုင်သော ရတနာဖြစ်ပြီး ပိုမိုမြင့်မားသော ကမ္ဘာတစ်ခုမှလာသည့် စွမ်းအင်ပုံဆောင်ခဲတစ်ခု ဖြစ်နေပုံရသည်။

အင်မော်တယ်ပုံဆောင်ခဲ တစ်တုံးတည်း ဖြစ်နေလျှင်တောင်မှ ၎င်းအတွင်း၌ ပါဝင်သော စွမ်းအင်သည် အထွတ်အထိပ် ဝိညာဉ်ကျောက်တုံးများ စိတ်ကူးယဉ်၍ပင် မရနိုင်သည့် အရာဖြစ်လေသည်။