အခန်း ၃၂၁

အခန်း (၃၂၁) - အင်အားယုတ်လျော့စေမည့် တိုက်ပွဲ

ယွိချောင့်၏ တပည့်သည် သွမ့်ချောင်မြန်၏ တပည့်နှင့် စတင်တိုက်ခိုက်လေသည်။

ဤတစ်ကြိမ်တွင် ယွိချောင့်ဘက်မှ သိသိသာသာ အသာစီးရနေပေသည်။

သွမ့်ချောင်မြန်၏ တပည့်သည် ခေတ္တမျှ ဖိနှိပ်ခံထားရသော်လည်း စိတ်မရှည်ခြင်းမျိုး လုံးဝမဖြစ်ပေါ်ခဲ့ချေ။

ထိုအစား သူသည် ပြိုင်ဘက်၏ တိုက်ကွက်များကို တည်ငြိမ်စွာပင် တုံ့ပြန်နေလေသည်။

‘သွမ့်ချောင်မြန် ခေါ်ယူထားတဲ့ တပည့်တွေက တကယ်ကို အစွမ်းထက်တာပဲ...’

ရွှီနင်သည် တိုက်ခိုက်နေသော သူတို့နှစ်ဦးကို လှမ်းကြည့်လိုက်သည်။

‘ခွန်အားကွာခြားချက် ရှိတယ်ဆိုပေမဲ့ သူ့ရဲ့ တိုက်ပွဲအတွေ့အကြုံ၊ စိတ်ပိုင်းဆိုင်ရာအခြေအနေနဲ့ တိုက်ပွဲဝင်စွမ်းရည်က တစ်ဆင့်ပိုသာနေတယ်... ဒီတိုက်ပွဲမှာ ဘယ်သူနိုင်မလဲဆိုတာ ပြောဖို့ခက်တယ်...’

ရွှီနင်သည် သွမ့်ချောင်မြန်၏ တပည့်အပေါ် အထင်ကြီးလေးစားမိလေသည်။

ထင်သည့်အတိုင်းပင် မကြာမီမှာပင် ယွိချောင့်၏ တပည့်သည် အနည်းငယ် စိတ်မရှည်ဖြစ်လာလေသည်။

သူသည် သိသိသာသာ အသာစီးရနေသော်လည်း ထိုအသာစီးရမှုများအား အနိုင်ရလဒ်အဖြစ်သို့ မပြောင်းလဲနိုင်ခဲ့ချေ။

ထို့အပြင် သူသည် ရှုံးနိမ့်လုနီးပါး အခြေအနေသို့ ရောက်ရှိနေသဖြင့် သူ၏လှုပ်ရှားမှုများနှင့် စိတ်ပိုင်းဆိုင်ရာအခြေအနေမှာ အနည်းငယ် ကစဉ့်ကလျား ဖြစ်လာလေသည်။

‘အခြေအနေက ပြောင်းပြန်ဖြစ်သွားနိုင်တယ်...’

ရွှီနင်သည် တိုက်ပွဲ၏ရလဒ်ကို ကြိုတင်ခန့်မှန်းပြီး ဖြစ်ပေသည်။

“ဟား”

ထိုစဉ် ယွိချောင့်၏ တပည့်သည် ရုတ်တရက် တိုက်ခိုက်လိုက်လေသည်။ ဤသည်မှာ လင်ကျယ်၏ မျှော်လင့်မထားသော တိုက်ခိုက်မှုမျိုးနှင့် ဆင်တူနေသည်။

သို့သော် ထိုတပည့်သည် လင်ကျယ်ကဲ့သို့ အသာစီး မရခဲ့ပေ။

သူ တိုက်ခိုက်ပြီးနောက် သွမ့်ချောင်မြန်၏ တပည့်မှာ အလွယ်တကူပင် ပြန်လည်တုံ့ပြန်လိုက်သည်။ သွမ့်ချောင်မြန်၏ တပည့်သည် ပြိုင်ဘက်ဖြစ်သူ စိတ်တည်ငြိမ်မှုပျက်ပြားကာ ပြင်းပြင်းထန်ထန်တိုက်ခိုက်လာမည်ကို ကြိုတင်မျှော်လင့်ထားခဲ့ကြောင်း သိသာလှပေသည်။

ဤအရာအားလုံးမှာ တွက်ချက်ထားပြီးသား ဖြစ်နေလေသည်။

‘ဒုက္ခပဲ’

ယွိချောင့်၏ တပည့်သည် သူ၏တိုက်ခိုက်မှု လွဲချော်သွားသောအခါ သူ၏အားနည်းချက်အား ထုတ်ပြမိသွားပြီဖြစ်ကြောင်း သတိပြုမိလိုက်လေသည်။

သူသည် အခြေအနေကို အမြန်ဆုံးပြန်လည်ထိန်းချုပ်ရန် ကြိုးစားလိုက်သော်လည်း သွမ့်ချောင်မြန်၏ တပည့်သည် သူ့အား အခွင့်အရေး မပေးခဲ့ပေ။ သွမ့်ချောင်မြန်၏ တပည့်သည် ခံစစ်အနေအထားမှနေ၍ ဦးဆောင်တိုက်ခိုက်သည့် အနေအထားသို့ ပြောင်းလဲလိုက်ချေပြီ။

အစပိုင်းတွင် မိုးဖွဲလေးများကဲ့သို့ တိုက်ခိုက်နေသော သွမ့်ချောင်မြန်၏ တပည့်သည် ရုတ်တရက် မုန်တိုင်းတစ်ခုပမာ အပြင်းအထန် တိုက်ခိုက်လာလေတော့သည်။

ထိုသို့ ရုတ်တရက် ပြောင်းလဲသွားသော တိုက်ခိုက်မှုပုံစံကြောင့် ပြိုင်ဘက်ဖြစ်သူမှာ အချိန်မီ မတုံ့ပြန်နိုင်ဘဲ ဖြစ်သွားရလေသည်။

ဘုန်း…

နောက်ဆုံးတွင် ယွိချောင့်၏ တပည့်သည် ဆက်လက်၍ မတောင့်ခံနိုင်တော့ချေ။ သူ၏ ခါးအား ကြယ်တာရာချီလှိုင်းတစ်ခု ရိုက်ခတ်သွားပြီး သူ၏ခန္ဓာကိုယ်သည် သွေးများပေကျံကာ လွင့်စင်သွားတော့သည်။

“သွမ့်ချောင်မြန်ဘက်က နိုင်တယ်”

ထိုအချိန်တွင် အကြီးအကဲဝေ့က ရလဒ်ကို ကြေငြာလိုက်လေသည်။

ယွိချောင့်ဘက်မှ တစ်ပွဲမျှပင် အနိုင်မရခဲ့ချေ။

‘တကယ်ကို အစွမ်းထက်လွန်းတယ်...’

ရွှီနင်သည် အနိုင်ရရှိသွားသော သွမ့်ချောင်မြန်၏ တပည့်အား ချီးကျူးမိလေသည်။

ယခုလေးတင် ပြသသွားသော သူ၏ ရင့်ကျက်သည့် စွမ်းရည်မျိုးမှာ ရွှီနင့်တပည့် သုံးယောက်လုံး၌ မရှိကြချေ။

မိမိ၏ခွန်အားဖြင့် တိုက်ပွဲအား အသေအချာ အနိုင်ယူနိုင်စွမ်းရှိသော ဖန်းယိုလိမှလွဲ၍ ပျန့်ဟွမ်နှင့် လင်ကျယ်တို့သည် ထိုသူ၏ ပြိုင်ဘက် လုံးဝမဟုတ်ပေ။

‘နောက်တစ်ဆင့်က ဘယ်လိုဖြစ်မလဲဆိုတာ ကြည့်ရသေးတာပေါ့...’

တပည့်များအား စေမလွှတ်ရသေးသော အလားအလာရှိသူ နှစ်ဦး ကျန်ရှိနေသေးသော်လည်း သူတို့၏ တပည့်များမှာ နယ်ပယ်အဆင့်အတန်းအရ အားနည်းနေကြပေသည်။ အနိုင်ရသူပင်လျှင် ရွှီနင်နှင့် သွမ့်ချောင်မြန်တို့၏ တပည့်များကို အနိုင်ယူနိုင်လိမ့်မည် မဟုတ်ချေ။

‘ငါ တစ်ပွဲတောင် မနိုင်ခဲ့ဘူး...’

ယွိချောင့်၏ မျက်နှာပေါ်တွင် မကျေနပ်မှုများ ပြည့်နှက်နေလေသည်။

သို့သော်လည်း အခြေအနေမှာ ဤသို့ဖြစ်လာပြီဖြစ်ရာ သူမအနေဖြင့် လက်ခံရန်မှတစ်ပါး အခြားရွေးချယ်စရာ မရှိတော့ပေ။

သူမနှင့် သွမ့်ချောင်မြန်တို့၏ ယှဉ်ပြိုင်မှုသည် သူမ၏ ရှုံးနိမ့်ခြင်းဖြင့် အဆုံးသတ်သွားခဲ့ချေပြီ။

‘ရွှီနင့်တပည့်တွေက ထူးခြားတဲ့ အံ့ဖွယ်တစ်ခုကို ဖန်တီးနိုင်ဖို့ မျှော်လင့်ပါတယ်...’

ယွိချောင့်မှာ ဤသို့ဖြစ်လာနိုင်ခြေ မများကြောင်း ခံစားနေရသော်လည်း ရင်ထဲမှ သက်ပြင်းတစ်ချက်ကို ချလိုက်မိလေသည်။

အဘယ်ကြောင့်ဆိုသော် ယခုအချိန်အထိ သွမ့်ချောင်မြန်၏ အစွမ်းအထက်ဆုံးတပည့်ဖြစ်သော ဖေ့ပင်းမှာ ထွက်ပေါ်လာခြင်း မရှိသေးသောကြောင့်ပင်။

ထို့နောက် အကြီးအကဲဝေ့၏ လမ်းညွှန်မှုဖြင့် ကျန်ရှိနေသော အလားအလာရှိသူ နှစ်ဦး၏ တပည့်များမှာ စတင်တိုက်ခိုက်ကြလေတော့သည်။

မကြာမီမှာပင် အနိုင်အရှုံး ပေါ်ထွက်လာခဲ့လေသည်။

သူတို့နှစ်ဦးထဲတွင် တာအိုနယ်ပယ် တတိယအဆင့် နှစ်ယောက်နှင့် ဒုတိယအဆင့် တစ်ယောက်ပါဝင်သော အလားအလာရှိသူမှ အနိုင်ရရှိသွားလေသည်။

ဤသို့ဖြင့် ပထမအဆင့် စမ်းသပ်မှု ပြီးဆုံးသွားလေသည်။

အနိုင်ရသူများအားလုံး၏ တပည့်များမှာ အလုံးစုံပိုမိုမြင့်မားသော နယ်ပယ်အဆင့်များတွင် ရှိနေကြသဖြင့် အားနည်းသူမှ အားကြီးသူအား အနိုင်ယူသည့် အခြေအနေမျိုး လုံးဝမဖြစ်ပေါ်ခဲ့ချေ။

ဤနည်းအားဖြင့် သွမ့်ချောင်မြန်၏အဖွဲ့သည် အကြီးမားဆုံးသော အသာစီးရမှုကို ပိုင်ဆိုင်ထားပုံပေါ်လေသည်။

“သွမ့်ချောင်မြန်က အနိုင်ရဖို့ အခွင့်အရေးများနေပုံပဲ...”

သွမ့်ဟွေးယောင့်သည် သွမ့်ဟွေးယွဲ့ထံသို့ အနည်းငယ် မကျေနပ်သည့် လေသံဖြင့် အသံလွှင့်ကာ ပြောလိုက်သည်။

“အဲဒီလိုလည်း မဟုတ်သေးပါဘူး...”

သွမ့်ဟွေးယွဲ့က ပြန်လည်တုံ့ပြန်လိုက်သည်။

“ရွှီနင့်ဘေးက တပည့်က သာမန်လူမဟုတ်ဘူး...”

“အင်း...”

သွမ့်ဟွေးယောင့်က တိတ်ဆိတ်စွာ ခေါင်းညိတ်လိုက်လေသည်။

ဖန်းယိုလိ၏ ခန္ဓာကိုယ်ထဲတွင် ထူးဆန်းသော စွမ်းအင်တစ်ခုရှိနေသည်ကို သူတို့အားလုံး သတိပြုမိခဲ့ကြလေသည်။

သူတို့နှစ်ဦးပင်လျှင် ဤထူးဆန်းသောစွမ်းအင်အား ရင်းနှီးမှုမရှိဟု ခံစားခဲ့ကြရသည်။

“ဒုတိယအဆင့် စမ်းသပ်မှုက တပည့်နှစ်ယောက်ကြားက အင်အားယုတ်လျော့စေမယ့် တိုက်ပွဲပဲ”

အကြီးအကဲဝေ့သည် ထပ်မံမတ်တတ်ရပ်ကာ စည်းမျဉ်းများကို ရှင်းပြလေသည်။

“ဒီတစ်ကြိမ်မှာတော့ မင်းတို့သုံးယောက်က အစဉ်လိုက် ယှဉ်ပြိုင်ဖို့ မဲနှိုက်ရမယ်။ တစ်ယောက် ရှုံးနိမ့်သွားပြီဆိုတာနဲ့ မဲပေါက်တဲ့အစဉ်လိုက်အတိုင်း နောက်တစ်ယောက်က ဝင်ပြိုင်ရမယ်။ တကယ်လို့ တစ်ဖွဲ့တည်းက လူတစ်ယောက်က စင်မြင့်ကို အောင်မြင်စွာ ကာကွယ်နိုင်ပြီး ကိုယ့်အဖွဲ့ကလူနဲ့ ပြန်ဆုံခဲ့ရင် ဒီတိုက်ပွဲကို အလိုအလျောက် ကျော်ဖြတ်ပြီး အစဉ်လိုက်အတိုင်း နောက်တစ်ယောက်နဲ့ အစားထိုးရမယ်”

မကြာမီမှာပင် အကြီးအကဲဝေ့သည် စည်းမျဉ်းများကို ရှင်းပြပြီးစီးသွားလေသည်။

‘အင်အားယုတ်လျော့စေမယ့် တိုက်ပွဲ...’

ရွှီနင်၊ သွမ့်ချောင်မြန်နှင့် အခြားအမျိုးသမီး အလားအလာရှိသူ လုဝေးဝမ်တို့သည် တစ်ပြိုင်နက်တည်း တွေးတောလိုက်ကြသည်။

ဤစည်းမျဉ်းအရ တတိယနေရာမှလူသည် ပို၍အသာစီးရမည်ကို သူတို့အားလုံး သိထားကြလေသည်။

သို့သော် ထိုအသာစီးရမှုမှာ သိပ်တော့မကြီးမားလှချေ။

“မဲနှိုက်ကြစို့”

အကြီးအကဲဝေ့သည် ဝါးချောင်း သုံးချောင်းကို ထုတ်ယူလိုက်လေသည်။

ရွှီနင်နှင့် အခြားနှစ်ဦးတို့သည် တစ်ချောင်းစီ ရွေးချယ်လိုက်ကြသည်။

‘သုံး...’

ရွှီနင်သည် ဝါးချောင်းအား ထုတ်ယူပြီးနောက် ဝါးချောင်း၏အောက်ခြေရှိ သူ၏နံပါတ်ကို မြင်လိုက်ရလေသည်။

‘သုံး... ငါက တကယ်ပဲ နောက်ဆုံးကပါလား...’

ရွှီနင်သည် ပြုံးယောင်သန်းသွားသည်။ ဤသည်မှာ အတော်လေး အသာစီးရသော အခြေအနေပင်။

သဘောတရားအရ နောက်ကျလေလေ အသာစီးရလေလေ ဖြစ်ပေသည်။

“ကျွန်တော်က ပထမဆုံးပဲ”

သွမ့်ချောင်မြန်၏ မျက်နှာပေါ်တွင် မည်သည့်ခံစားချက်မျှ မရှိဘဲ ထိုအစဉ်လိုက်ကျမှုသည် သူ့အား အကျိုးသက်ရောက်မှုမရှိသည့်ပုံပင်။

“ကျွန်မက ဒုတိယပါ”

လုဝေးဝမ်က ပြောလိုက်သည်။

“ကျွန်တော်က တတိယပါ”

ရွှီနင်လည်း သူ၏ဝါးချောင်းကို ပြသလိုက်လေသည်။

“ကောင်းပြီ”

အကြီးအကဲဝေ့က ခေါင်းညိတ်လိုက်သည်။

“ဒီလိုဆိုရင် ခဏနားပြီးတဲ့နောက် သွမ့်ချောင်မြန်နဲ့ လုဝေးဝမ်တို့က သူတို့ရဲ့တပည့်တွေကို အရင်ဆုံး စေလွှတ်ရမယ်”

“ဟုတ်ကဲ့ပါ”

သူတို့သုံးဦးလုံး ပြန်လည်ဖြေကြားပြီးနောက် နောက်ဆုတ်သွားကြလေသည်။

“ဆရာ၊ ဘယ်သူ့ကို အရင်လွှတ်မှာလဲ”

ရွှီနင်သည် သူတို့သုံးဦးထံ ပြန်ရောက်လာပြီးနောက် ဖန်းယိုလိက မေးလိုက်ခြင်းဖြစ်သည်။

“လင်ကျယ်က ပထမဆုံးပဲ၊ ပျန့်ဟွမ်က ဒုတိယ၊ မင်းက နောက်ဆုံးမှသွားရမယ်”

ရွှီနင်သည် အများကြီးစဉ်းစားမနေဘဲ အမြန်ဆုံး အဖြေပေးလိုက်လေသည်။

သဘာဝအရ အင်အားယုတ်လျော့စေမည့် တိုက်ပွဲတွင် အစွမ်းအထက်ဆုံးသူသည် နောက်ဆုံးမှ သွားရမည်ဖြစ်သည်။

ရွှီနင်၏ အဖြေမှာ သူတို့မျှော်လင့်ထားသည့်အတိုင်းပင် ဖြစ်နေသည်။

လင်ကျယ်နှင့် ပျန့်ဟွမ်တို့သည်လည်း သူတို့နှစ်ဦး အဆုံးထိ မတောင့်ခံနိုင်ကြောင်း သိထားကြပေသည်။

ဖေ့ပင်းအား ယှဉ်ပြိုင်တိုက်ခိုက်နိုင်ရန်အတွက်မူ ဖန်းယိုလိသာလျှင် လုံလောက်သောခွန်အား ရှိပေသည်။

“မင်းတို့လုပ်ခဲ့သလိုပဲ အစွမ်းကုန် ကြိုးစားကြပါ။ ရှုံးသွားရင်လည်း မင်းတို့ကို ငါအပြစ်တင်မှာ မဟုတ်ဘူး”

ရွှီနင်သည် သူတို့အား ထပ်မံ၍ အားပေးလိုက်လေသည်။

“နားလည်ပါပြီ ဆရာ”

သူတို့၏ စိတ်များကို တည်ငြိမ်စေပြီးနောက် ပိုမိုသက်သောင့်သက်သာဖြစ်ကာ အစွမ်းကုန် ကြိုးစားနိုင်မည် ဖြစ်သည်။

“ကောင်းပြီ... သွမ့်ချောင်မြန်၊ လုဝေးဝမ်၊ မင်းတို့ရဲ့ တပည့်တွေကို လွှတ်လိုက်တော့”

အနားယူချိန် ပြီးဆုံးသွားပြီဖြစ်ရာ အကြီးအကဲဝေ့သည် နှစ်ဖွဲ့လုံးအား ပြောလိုက်သည်။

ထို့နောက် နှစ်ဖွဲ့လုံးမှ သူတို့၏ တပည့်များကို စေလွှတ်လိုက်ကြသည်။

အဆုံးသတ် စမ်းသပ်မှုကြီးမှာ တရားဝင် စတင်သွားချေပြီ။