အခန်း ၃၂၃

အခန်း (၃၂၃) - ဖေပင်းနှင့် တိုက်ခိုက်သည့် ဖန်းယိုလိ

“ဒါက စွမ်းအားတိုးဆေးရော အားဖြည့်ဆေးပြားပါ မဟုတ်ဘူး”

တာအိုနယ်ပယ်အဆင့်ရှစ်သိုင်းပညာရှင်ဖြစ်သော အကြီးအကဲဝေ့၏အမေးကို ရင်ဆိုင်ရသော်လည်း ဖန်းယိုလိမှာ လုံးဝ ကြောက်ရွံ့ခြင်းမရှိခဲ့ပေ။

“ကျုပ် ဒီဆေးပြားကို စားတာက သူ့ကို သတ်မိသွားမှာစိုးလို့ဗျ”

ဖန်းယိုလိ၏ မောက်မာသောလေသံကြောင့် ထိုနေရာရှိ လူအားလုံးမှာ အံ့အားသင့်သွားကြလေသည်။

ပျန့်ဟွမ်နှင့်လင်ကျယ်တို့ပင်လျှင် ဖန်းယိုလိအတွက် စိုးရိမ်ပူပန်သွားကြသည်။

အခြားတစ်ဖက်တွင်မူ ရွှီနင်သည် မချိပြုံး ပြုံးလိုက်သည်။ သူသည် စိုးရိမ်နေသည့်ပုံ မပေါ်ပေ။

အကြီးအကဲဝေ့မှာ မျက်မှောင်ကြုံ့သွားပြီး ဤအခြေအနေတွင် မည်သို့လုပ်ဆောင်ရမည်ကို စဉ်းစားနေလေသည်။

သို့သော် ဤအခိုက်အတန့်တွင် ဖန်းယိုလိ၏လက်ထဲမှ ရေခဲပြာရောင်ဆေးပြားသည် လေထဲသို့ လွင့်တက်သွားပြီး အလင်းတန်းတစ်ခုအဖြစ် ပြောင်းလဲကာ ပင်လယ်နီမိစ္ဆာသခင် သွမ့်ဟွေးယောင့်၏လက်ထဲသို့ ကျရောက်သွားလေသည်။

သွမ့်ဟွေးယောင့်သည် စိတ်ကိုစုစည်းကာ ရေခဲပြာရောင်ဆေးပြား၏ မျက်နှာပြင်ကို အာရုံခံကြည့်လိုက်သည်။

“ဒါက လုံးဝကို အသစ်စက်စက် ဆေးအမျိုးအစားပဲ”

သွမ့်ဟွေးယောင့်သည် ခေါင်းလှည့်ကာ သွမ့်ဟွေးယွဲ့အား ပြောလိုက်သည်။

“ဒီဆေးပြားက စားသုံးသူရဲ့ စိတ်လှုပ်ရှားမှုကို လျှော့ချပေးနိုင်တယ်”

“အဲဒီလိုလား...”

သွမ့်ဟွေးယွဲ့က နားထောင်ပြီးနောက် ခေါင်းညိတ်လိုက်သည်။

ထို့နောက် သွမ့်ဟွေးယွဲ့သည် သူ့လက်ထဲရှိ ဆေးပြားကို ဖန်းယိုလိ၏လက်ထဲသို့ ပြန်ပစ်ပေးလိုက်သည်။

“မင်းစားလို့ရပြီ”

သွမ့်ဟွေးယွဲ့၏အသံသည် နေရာအနှံ့ ပဲ့တင်ထပ်သွားလေသည်။

ဤစကားကိုကြားသောအခါ အကြီးအကဲဝေ့သည် မည်သည့်အရာကိုမျှ ဆက်မပြောတော့ချေ။

“ကျေးဇူးတင်ပါတယ် မိစ္ဆာသခင်”

ဖန်းယိုလိသည် အဝေးမှနေ၍ သွမ့်ဟွေးယောင့်အား လက်နှစ်ဖက်ယှက်ကာ အရိုအသေပေးလိုက်သည်။

ထို့နောက် သူသည် ရေခဲပြာရောင်ဆေးပြားကို မျိုချလိုက်ရာ မကြာမီမှာပင် ခန္ဓာကိုယ်အတွင်း၌ အေးစက်သောခံစားမှုတစ်ခု ပျံ့နှံ့သွားသည်ကို ခံစားလိုက်ရသည်။

“လာစမ်း”

ဖန်းယိုလိ၏လက်ထဲတွင် ဧရာမပုဆိန်ကြီးတစ်လက် ပေါ်လာလေသည်။

ဤပုဆိန်ကြီးမှာ ရွှီနင်မှ သူ့အား ပေးထားသော လျှို့ဝှက်ရတနာတစ်ခု ဖြစ်ပေသည်။

ကြမ်းတမ်းသော အရှိန်အဝါတစ်ခုသည် လျင်မြန်စွာပင် ဖန်းယိုလိ၏ ခန္ဓာကိုယ်မှ ထွက်ပေါ်လာတော့သည်။

ဖောင်းကြွနေသော ကြွက်သားများနှင့် ကြီးမားလှသော ပုဆိန်ကြီးမှာ သူ့ရှေ့ရှိ တည်ငြိမ်နေသောတပည့်အား ဖိအားများစွာ ပေးစွမ်းနေလေသည်။

‘သူက တကယ်ကို သန်မာတာပဲ’

စင်အောက်ရှိ ဖေပင်း၏ မျက်လုံးများတွင် စိတ်လှုပ်ရှားမှုများ ပေါ်လွင်နေလေသည်။

“ဟား”

ဖန်းယိုလိက ဦးဆောင်တိုက်ခိုက်လိုက်သည်။

အခြားသော တာအိုနယ်ပယ်သိုင်းပညာရှင်များ၏ ခန္ဓာကိုယ်ကြံ့ခိုင်မှုမှာ အတော်လေး မြင့်မားကြသော်လည်း သူတို့သည် အဓိကတိုက်ခိုက်ရေးနည်းစနစ်အဖြစ် ကြယ်တာရာချီအား သက်ဝင်စေရန် တာအိုနယ်ပယ်၏ စွမ်းအားကိုသာ အသုံးပြုကြလေသည်။

သို့သော် ဖန်းယိုလိအတွက်မူ တာအိုနယ်ပယ်၏ စွမ်းအားသည် သူ၏ အသားနှင့် သွေးများထဲသို့ စိမ့်ဝင်နေပြီး ကြယ်တာရာချီအား ခုခံနိုင်လောက်အောင် သူ၏ ခန္ဓာကိုယ်ကို သန်မာစေခဲ့လေသည်။

‘ဘယ်လောက်မြန်လိုက်လဲ၊ တကယ့်ကို ကြောက်စရာကောင်းတဲ့ အရှိန်အဝါပဲ’

ဤအရာကို ရင်ဆိုင်လိုက်ရသောအခါ တည်ငြိမ်နေသောတပည့်၏ မျက်နှာအမူအရာမှာ ပြောင်းလဲသွားတော့သည်။

လူပုံသဏ္ဌာန်ရှိသော မိစ္ဆာသားရဲတစ်ကောင်အား သူ့ဆီသို့ အမြောက်ဆံတစ်ခုကဲ့သို့ ရုတ်တရက် ပစ်လွှတ်လိုက်သလို ခံစားလိုက်ရ‌လေသည်။

ဝှစ်…

ပုဆိန်ကြီးက ပိုင်းချလိုက်လေသည်။

ဒိုင်း…

တည်ငြိမ်နေသောတပည့်သည် သူ၏ဓားရှည်ဖြင့် ခုခံလိုက်သော်လည်း မျက်စိတစ်မှိတ်အတွင်း လွင့်စဉ်သွားရတော့သည်။

သူသည် လေထဲတွင် ခန္ဓာကိုယ်အား ခက်ခက်ခဲခဲလှည့်ပတ်လိုက်ပြီး သက်တောင့်သက်သာ ကျဆင်းနိုင်ရန် ကြိုးစားလိုက်သည်။

သို့သော်လည်း ဖန်းယိုလိသည် နေရာယူပြီးဖြစ်ကာ သူ၏ခေါင်းအထက်တွင် ပေါ်လာလေသည်။

“ဟား”

ဖန်းယိုလိမှ ထပ်မံဟိန်းဟောက်လိုက်သည်။

နောက်ထပ် ပုဆိန်တစ်ချက်မှာ ကောင်းကင်မှ ကျဆင်းလာပြန်သည်။

ဘုန်း…

ဤတစ်ကြိမ်တွင် တည်ငြိမ်နေသောတပည့်မှာ မြေပြင်ပေါ်သို့ ရိုက်ချခံလိုက်ရပြီး နက်ရှိုင်းသော တွင်းကြီးတစ်ခု ဖြစ်ပေါ်သွားလေသည်။

ချက်ချင်းပင် နေရာတစ်ခုလုံးမှာ တိတ်ဆိတ်သွားတော့သည်။

ကျွန်း၏မြေပြင်သည် အလွန်မာကျောလှပေသည်။

ယခင်က တပည့်များကြား တိုက်ပွဲများသည် မြေပြင်အား ရံဖန်ရံခါ ထိခိုက်စေခဲ့သော်လည်း အချိုင့်အရာများသာ ကျန်ရစ်ခဲ့လေသည်။

သို့သော် ယခုအခါ ဖန်းယိုလိသည် ကာယခွန်အားသက်သက်ဖြင့် မြေပြင်တွင် တွင်းကြီးတစ်ခုအား ဖြစ်ပေါ်စေခဲ့လေသည်။

ရွှီနင်သည် ထိုသို့ ကြောက်မက်ဖွယ်ကောင်းသည့် လူမျိုးအား မည်သည့်နေရာမှ ရှာတွေ့ခဲ့သနည်း။

“သူ့ကိုကယ်ကြ”

အကြီးအကဲဝေ့သည် မိန်းမောနေရာမှ သတိဝင်လာပြီး အကာအကွယ်အတွင်းသို့ ပြေးဝင်ကာ တည်ငြိမ်နေသောတပည့်ကို တွင်းထဲမှ ဆွဲထုတ်လိုက်လေသည်။

တည်ငြိမ်နေသောတပည့်မှာ လုံးဝ သတိလစ်နေချေပြီ။ သူ၏ခန္ဓာကိုယ်မှာ ပျော့ခွေနေပြီး နံရိုးများနှင့် အရိုးအများစုသည်လည်း ကျိုးကြေနေလေသည်။

‘ဧရာမအင်အားကြီးတစ်ခုက သူ့ခန္ဓာကိုယ်ထဲ ဝင်ရောက်လာပြီး အကုန်ဖျက်ဆီးပစ်လိုက်တာပဲ’

အကြီးအကဲဝေ့မှာ အလွန် တုန်လှုပ်သွားရသည်။

အဆင့်တူမိစ္ဆာသားရဲတော်တော်များများပင် သူတို့၏ ခန္ဓာကိုယ်အင်အားဖြင့် ထိုသို့လုပ်နိုင်မည် မဟုတ်ပေ။

ထိပ်တန်းအဆင့်မိစ္ဆာသားရဲများ သို့မဟုတ် ဒဏ္ဍာရီလာ အထွတ်အထိပ်မိစ္ဆာသားရဲများသာ ထိုသို့လုပ်နိုင်ပေလိမ့်မည်။

‘ဒီကောင်လေးက မိစ္ဆာသားရဲတစ်ကောင်တော့ မဖြစ်နိုင်ဘူးမလား’

အတွေ့အကြုံရင့်ကျက်သော အကြီးအကဲဝေ့ပင်လျှင် ဖန်းယိုလိအား အံ့ဩထိတ်လန့်စွာ ကြည့်နေမိသည်။

ပွဲကြည့်ပရိသတ်များမှာလည်း တိတ်ဆိတ်နေကြလေသည်။

“လူပုံစံ မိစ္ဆာသားရဲပဲ”

သွမ့်ဟွေးယောင့်မှာ မျက်မှောင်ကြုံ့လိုက်ပြီး သွမ့်ဟွေးယွဲ့ထံသို့ အသံပို့လွှတ်လိုက်သည်။

“မဟုတ်ဘူး”

သွမ့်ဟွေးယွဲ့က ပြန်ဖြေလိုက်သည်။

“သူကလူပဲ၊ ဒါပေမဲ့ သူ့ခန္ဓာကိုယ်ထဲမှာ မိစ္ဆာသားရဲတစ်ကောင်ရဲ့ သွေးမျိုးဆက်ပါနေတယ်။ အဲဒီမိစ္ဆာသားရဲက ဝါးမြိုခြင်းသားရဲဖြစ်လောက်တယ်”

“မိစ္ဆာသားရဲတွေရဲ့ သွေးမျိုးဆက်က ဘယ်လိုလုပ်ပြီး လူတစ်ယောက်ဆီ ရောက်သွားတာလဲ”

သွမ့်ဟွေးယောင့်က မေးလိုက်သည်။

“ငါလည်းမသိဘူး”

သွမ့်ဟွေးယွဲ့က ပြန်ဖြေလိုက်သည်။

“မင်းမလုပ်နိုင်ဘူးလား”

သွမ့်ဟွေးယောင့်က ထပ်မေးလိုက်သည်။

“ငါမလုပ်နိုင်ဘူး”

သွမ့်ဟွေးယွဲ့က ဖြေလိုက်လေသည်။

“ဒါဆို ဘယ်သူက လုပ်နိုင်မှာလဲ”

သွမ့်ဟွေးယောင့်သည် တစ်စုံတစ်ခုအား ရုတ်တရက် သဘောပေါက်သွားပုံရသည်။

“အဲဒါက ပြင်ပကမ္ဘာက နည်းစနစ်တစ်ခု ဖြစ်နိုင်တယ်”

သွမ့်ဟွေးယွဲ့သည် ဖန်းယိုလိအား စိုက်ကြည့်နေသည်။

သွမ့်ဟွေးယောင့်မှာ ခေတ္တမျှ တိတ်ဆိတ်သွားပြီးနောက် ပြောလိုက်သည်။

“ယွီကျီးယင်တစ်ယောက်တည်းကပဲ ပြင်ပကမ္ဘာက နည်းစနစ်တွေကို ဒီကမ္ဘာထဲ ယူလာနိုင်တာမလား”

“ဖြစ်နိုင်တယ်”

သွမ့်ဟွေးယွဲ့သည် ဖန်းယိုလိအား ကြည့်နေဆဲပင်။

“ဒါဆို ဖန်းယိုလိဆိုတဲ့တပည့်က ယွီကျီးယင်ရဲ့ လူပေါ့”

သွမ့်ဟွေးယောင့် ထပ်မေးလိုက်ပြန်သည်။

“မသေချာဘူး၊ သူက ယွီကျီးယင်ရဲ့ ကိရိယာသက်သက်လည်း ဖြစ်နိုင်တာပဲ”

သွမ့်ဟွေးယွဲ့က ပြောလိုက်သည်။

“နောက်မှ သူ့ကို စုံစမ်းကြည့်လိုက်ရင် သိရမှာပေါ့”

“အင်း...”

သွမ့်ဟွေးယောင့်သည် ခေါင်းညိတ်လိုက်ပြီး သူတို့နှစ်ဦး တိတ်ဆိတ်သွားကြလေတော့သည်။

“ရွှီနင်ဘက်က နိုင်တယ်”

အကြီးအကဲဝေ့သည် တည်ငြိမ်နေသောတပည့်အား အကာအကွယ်ထဲမှ ထုတ်ယူကာ အားဖြည့်ဆေးပြားတစ်ပြား တိုက်ကျွေးပြီးနောက် ရလဒ်ကို ကြေညာလိုက်သည်။

“ဖေပင်း... မင်း သူ့ကို အနိုင်ယူဖို့ ဘယ်လောက် ယုံကြည်မှုရှိလဲ”

သွမ့်ချောင်မြန်၏ တည်ငြိမ်နေသော မျက်နှာထားမှာ လေးနက်သွားသည်။

သူသည် ဖန်းယိုလိအား ထူးခြားလိမ့်မည်ဟု မျှော်လင့်ထားခဲ့သော်လည်း ဤမျှအထိ သန်မာလိမ့်မည်ဟု မထင်ထားခဲ့ပေ။

“ငါးဆယ်ရာခိုင်နှုန်းပါ... ကျွန်တော်သာ အဲဒီထိပ်တန်း လျှို့ဝှက်ရတနာကို သုံးလိုက်ရင် သူ့ကို အနိုင်ယူဖို့ ခုနစ်ဆယ်ရာခိုင်နှုန်း အခွင့်အရေးရှိတယ်”

ဖန်းယိုလိမှာ မည်မျှ ကြောက်မက်ဖွယ်ကောင်းကြောင်းကို မြင်တွေ့ပြီးနောက် ဖေပင်းမှာ စိတ်လှုပ်ရှားခြင်းမရှိသည့်အပြင် အကာအကွယ်ထဲဝင်ကာ တိုက်ခိုက်လိုစိတ်များ ပြင်းပြနေလေသည်။

“ကောင်းပြီ... အစွမ်းကုန် ကြိုးစားလိုက်”

သွမ့်ချောင်မြန်သည် ဖေပင်း၏ပခုံးအား အားပါးတရပုတ်လိုက်ပြီး သူ့မျက်လုံးများတွင် မျှော်လင့်ချက်များဖြင့် ပြည့်နှက်နေလေသည်။

“စိတ်မပူပါနဲ့ အရှင်မင်းသား”

ဖေပင်းသည် လူအုပ်ထဲမှ ထွက်လာခဲ့လေသည်။

“ဖေပင်း”

ဖေပင်းသည် သူ၏အမည်အား ဦးစွာ မိတ်ဆက်လိုက်သည်။

“ဖန်းယိုလိ”

ဖန်းယိုလိသည်လည်း အပြန်အလှန် လေးစားမှု ပြသလိုက်သည်။

သူသည် ဖေပင်း၏ခန္ဓာကိုယ်မှ ကြမ်းတမ်းသော တိုက်ခိုက်လိုစိတ်ကိုလည်း ခံစားနိုင်လေသည်။

“လာခဲ့စမ်းပါ”

ဖေပင်းသည် သူ့လက်ထဲရှိ ရွှေရောင်လှံအား ကျစ်ကျစ်ပါအောင် ဆုပ်ကိုင်လိုက်သည်။

“လာစမ်း”

နှစ်ဖက်လုံးမှာ စတင်တိုက်ခိုက်ကြလေတော့သည်။

ယခင်ကလိုပင် ဖန်းယိုလိ၏ လှုပ်ရှားမှုများမှာ လွတ်လပ်ပြီး သန်မာလှသည်။

ပုဆိန်ခုတ်ပိုင်းလိုက်တိုင်း လေကိုခွင်းသည့်အသံများ ထွက်ပေါ်လာလေသည်။

သို့သော် ဖေပင်း၏ခွန်အားမှာ ယခင် တည်ငြိမ်နေသောတပည့်ထက် သိသိသာသာ သာလွန်နေသည်။

သူသည် ဖန်းယိုလိ၏ တိုက်ခိုက်မှုကို ရှောင်ရှားနိုင်ရုံသာမက ဖန်းယိုလိအား တိုက်ခိုက်နိုင်စွမ်းလည်း ရှိပေသည်။

‘ရွှီနင်ကိုယ်တိုင်က သန်မာရုံတင် မကဘူး ဒီလိုတပည့်မျိုးကိုပါ ရှာတွေ့ထားတာပဲ...’

ဤအခိုက်အတန့်တွင် ယွိချောင့်တစ်ယောက် ရွှီနင်အား စတင် လေးစားလာမိသည်။

ဖန်းယိုလိနှင့် ဖေပင်းတို့၏တိုက်ပွဲတွင် မည်သူက ပိုသန်မာသည်ကို ပြောရန်ခက်ခဲသော်လည်း ဖန်းယိုလိမှာ တာအိုနယ်ပယ်အဆင့်သုံးတွင်သာရှိသေးရာ ဖေပင်းထက် တစ်ဆင့်နိမ့်နေပေသည်။ ဤသည်မှာ နယ်ပယ်ကျော်လွန်၍ တိုက်ခိုက်ခြင်းပင်။

ရွှီနင်သည် မိမိထက်အဆင့်မြင့်သော ရန်သူများကို ယှဉ်ပြိုင်တိုက်ခိုက်နိုင်သည့် သိုင်းပညာရှင်တစ်ဦးဖြစ်ကြောင်း ယွိချောင့်သိထားလေသည်။ ယခုအခါ သူ၏တပည့်သည်ပင် ဤသို့ လုပ်ဆောင်နိုင်နေလေပြီ။

ဖန်းယိုလိသည် ရွှီနင်လောက် မထူးချွန်နိုင်သော်လည်း သူသည် ရှားပါးသော ပါရမီရှင်တစ်ဦး ဖြစ်နေဆဲပင်။

‘ဒီလူက ဒီလောက်ကြာကြာ တိုက်ခိုက်နေတာတောင် ပင်ပန်းတဲ့ပုံစံ လုံးဝမပေါ်ဘူး’

ပို၍တိုက်ခိုက်လေလေ၊ ဖေပင်းမှာ ပို၍အံ့အားသင့်လေလေ ဖြစ်လာသည်။

သူ၏ ခန္ဓာကိုယ်ထဲတွင် သိုလှောင်ထားသော တာအိုနယ်ပယ်စွမ်းအားများမှာ လျင်မြန်စွာ ကုန်ဆုံးသွားသည်ကို သူခံစားသိရှိနိုင်လေသည်။

ဤအတိုင်းသာဆက်သွားပါက သူသည် သေချာပေါက် ရှုံးနိမ့်ပေလိမ့်မည်။

‘ကြည့်ရတာ ငါအဲဒီထိပ်တန်း လျှို့ဝှက်ရတနာကို သုံးရတော့မယ် ထင်တယ်’

ဖေပင်းသည် သူ့စိတ်သူ ပိုင်းဖြတ်ကာ ဆုံးဖြတ်ချက်တစ်ခု ချလိုက်တော့သည်။