အခန်း ၅၄၇

အခန်း ၅၄၇ -အချိန်မြစ်ကို ဖြတ်ကျော်၍ဟောကြားခြင်း - ၂

မည်သို့ပင်ဆိုစေကာမူ မည်သူမျှ ကန့်ကွက်ခြင်းမရှိကြပေ။ ကုဖုန်းချန် 'ကြယ်တာယာ တာအိုခန္ဓာ' နိုးထလာစဉ်က ဖြစ်ပေါ်ခဲ့သော ကောင်းကင်နှင့် မြေကြီး၏ ထူးခြားဖြစ်ရပ်များမှာ အရပ်မျက်နှာအနှံ့ကို တုန်လှုပ်စေခဲ့ပြီး သွေးကန်ထဲတွင် ကျင့်ကြံနေသူများပင် သတိပြုမိခဲ့ကြသည်။ ကုဖုန်းချန်ထံတွင် ဖြစ်ပျက်ခဲ့သည့်အရာမှာ မရိုးရှင်းကြောင်း အားလုံး သိထားကြသဖြင့် ကုချင်းဖန်၏ ဆုံးဖြတ်ချက်ကို လက်ခံကြသည်။

ကုမျိုးရိုးမှ လူငယ်များ ထွက်ခွာသွားပြီးနောက် ကုချင်းဖန်သည် ကုဖုန်းချန်ကို မြို့တော်ခန်းမသို့ ခေါ်ဆောင်သွားပြီး ကုယန်မှာမူ တိုင်းပြည်ရေးရာများကို စီမံရန် မြို့တော်သို့ ပြန်သွားခဲ့သည်။

မြို့တော်ခန်းမအတွင်း၌ ကုချင်းဖန်သည် မိမိရှေ့တွင် ရိုသေစွာ ရပ်နေသော ကုဖုန်းချန်ကို ကြည့်ကာ အသာအယာ ပြောလိုက်သည်။ "ငါတို့က မိသားစုဝင်တွေပဲ၊ ဒီလောက်ကြီး တင်းတင်းကြပ်ကြပ် မနေပါနဲ့။"

"ဟုတ်ကဲ့"

ကုဖုန်းချန်က အနည်းငယ် စိတ်လျှော့လိုက်သော်လည်း ရိုးရိုးသားသားပင် ဆက်လက် ရိုသေနေဆဲဖြစ်သည်။ မျိုးနွယ်စုအရှင်သခင်ကြီးနှင့် တွေ့ဆုံရသည့် အကြိမ်ရေမှာ အလွန်နည်းပါးလှသဖြင့် ချက်ချင်း ရင်းနှီးကျွမ်းဝင်ရန် ခက်ခဲနေခြင်းမှာ သဘာဝပင် ဖြစ်သည်။

"ငါ ထင်တာ မမှားဘူးဆိုရင် မင်း ကြယ်တာယာ တာအိုခန္ဓာ နိုးထလာပြီး ရှေးဟောင်း ကြယ်တာယာ တာအို အမွေအနှစ်တွေကို ရရှိခဲ့တာ မဟုတ်လား"

"အဘိုးက တကယ်ကို အမြင်စူးရှတာပဲ"

ကုဖုန်းချန်၏ ရင်ထဲ၌ ထိတ်လန့်သွားပြီး ကုချင်းဖန်ကို ပိုမို ကြည်ညိုသွားတော့သည်။ သူသည် ဖုံးကွယ်မထားဘဲ ပွင့်ပွင့်လင်းလင်း ဝန်ခံလိုက်သည်။

"မြေးတော် 'ထိုက်ရွှီ ကြယ်တာယာ နယ်မြေ ကျမ်းစာ' လို့ ခေါ်တဲ့ ကျင့်စဉ်ကို ရရှိခဲ့ပါတယ်။ အဲဒီကျမ်းစာကို အထွတ်အထိပ်အထိ လေ့ကျင့်နိုင်ရင် ခန္ဓာကိုယ်က ဧကရာဇ်လက်နက်တစ်ခုလို ကြံ့ခိုင်လာမယ်လို့ ပြောပါတယ်"

ထိုစကားကို ကြားသောအခါ ကုချင်းဖန်၏ မျက်နှာတွင် အနည်းငယ် အံ့အားသင့်သွားသည်။ အချိန်မြစ်ကို ဖြတ်ကျော်၍ လွှဲပြောင်းပေးသော ကျင့်စဉ်မှာ မရိုးရှင်းနိုင်ကြောင်း သူ သိထားသော်လည်း ဧကရာဇ်လက်နက်နှင့် ယှဉ်နိုင်သော ခန္ဓာကိုယ်မျိုးကို ပိုင်ဆိုင်စေနိုင်သည့် ကျမ်းစာမှာ သူ ပိုင်ဆိုင်ထားသော 'ရှေးဟောင်း နတ်ဘုရားဘုရင် ကျမ်းစာ' ထက် အဆင့်မနိမ့်ကြောင်း သေချာလှသည်။

"ဒါပေမဲ့ မြေးတော် ရရှိထားတဲ့ အမွေအနှစ်က စိတ်ဝိညာဉ်ထဲမှာ 'တာအိုမျိုးစေ့' အဖြစ် တည်ရှိနေတာပါ။ တကယ်လို့ မြေးတော် ကိုယ်တိုင် အောင်မြင်အောင် မကျင့်နိုင်ရင် တခြားသူကို လွှဲပြောင်းပေးလို့ မရပါဘူး။"

"စိတ်မပူပါနဲ့၊ ဧကရာဇ်ကျမ်းစာဆိုတာ တန်ဖိုးရှိပေမဲ့ မြေးတစ်ယောက်ရဲ့ အခွင့်အရေးကို လုယူဖို့အထိတော့ ငါ မလုပ်ပါဘူး။ မင်းမှာ ဒီအမွေအနှစ်ရှိနေမှတော့ အနာဂတ်မှာ ကောင်းကောင်း ကျင့်ကြံပါ။ နားမလည်တာရှိရင်လည်း ငါ့ကို လာမေးလို့ ရတယ်။"

ထို့နောက် ကုချင်းဖန်က လက်ကို မြှောက်ကာ ကုဖုန်းချန်၏ စိတ်ထဲသို့ တာအိုစီးချက်များ ထည့်သွင်းပေးလိုက်သည်။

"ဒီနေ့ ငါ မင်းကို အသူရာကျမ်းစာ' လို့ခေါ်တဲ့ ဧကရာဇ်ကျမ်းစာ တစ်ခုကို ထပ်ပြီး ပေးမယ်။ မင်းရဲ့ အဆင့်အရ လောလောဆယ် သူတော်စင်ဘုရင် အခန်းအထိပဲ သင်ပေးထားမယ်။ မဟာသူတော်စင် အထွတ်အထိပ် ရောက်တဲ့အခါ ကျန်တာတွေကို ထပ်ပေးမယ်။"

ကုဖုန်းချန်မှာ ကျမ်းစာမှ တာအိုစီးချက်များကြောင့် မိန်းမောသွားရသည်။ ခဏအကြာ သတိပြန်ဝင်လာသောအခါတွင် မိမိ၏ စိတ်ထဲ၌ 'ထိုက်ရွှီ ကြယ်တာယာ နယ်မြေ ကျမ်းစာ' ကဲ့သို့ပင် အလွန် နက်ရှိုင်းသော ကျင့်စဉ်တစ်ခု ရောက်ရှိနေသည်ကို တွေ့လိုက်ရသည်။

"မြေးတော်ကို ကျင့်စဉ်တွေ ချီးမြှင့်တဲ့အတွက် ကျေးဇူးတင်ပါတယ် အဘိုး"

ကုဖုန်းချန်သည် စိတ်လှုပ်ရှားမှုကို အတင်းအကျပ် ထိန်းချုပ်ကာ ကုချင်းဖန်ကို ရိုသေစွာ ဦးညွှတ်လိုက်သည်။ ဧကရာဇ်ကျမ်းစာ နှစ်ခုလုံးကို ပိုင်ဆိုင်ခွင့် ရလိုက်ခြင်းမှာ မည်သူမျှ မယုံနိုင်လောက်သော ကံကောင်းမှု ဖြစ်သည်။

ထို့နောက် ကုချင်းဖန်သည် 'ထိုက်ရွှီ ကြယ်တာယာ နယ်မြေ ကျမ်းစာ' အကြောင်းကို အသေးစိတ် မေးမြန်းကြည့်ရာ ဤကျင့်စဉ်မှာ ခန္ဓာကိုယ်အတွင်းရှိ အကြောမှတ်ပေါင်း တစ်သိန်းရှစ်ထောင်ကို ဖွင့်လှစ်ပြီး အမှတ်တစ်ခုချင်းစီတွင် ရှေးဟောင်း ကြယ်တာယာများကို မွေးမြူရခြင်း ဖြစ်ကြောင်း သိလိုက်ရသည်။ အကယ်၍ ထိုကြယ်တာယာများအားလုံး ပြည့်စုံသွားပါက လက်လှုပ်ရုံဖြင့် ကြယ်တာယာ တစ်သိန်းရှစ်ထောင်၏ အစွမ်းကို အသုံးချနိုင်မည် ဖြစ်သည်။ အကယ်၍ ဧကရာဇ် တစ်ဦး ပြန်လည် မွေးဖွားလာလျှင်ပင် ထိုစွမ်းအားကို တားဆီးနိုင်ရန် ခက်ခဲပေလိမည်။

ကုဖုန်းချန် ထွက်ခွာသွားပြီးနောက် ကုချင်းဖန်သည် မိမိ၏ ကျင့်ကြံမှုကို သူတော်စင်ဘုရင် ပထမအဆင့်မှ ဒုတိယအဆင့်သို့ မြှင့်တင်လိုက်သည်။ သူတော်စင်ဘုရင် အဆင့်များကြား တိုးတက်မှုမှာ အလွန် သိသာလှပြီး သူ၏ အင်အားမှာ အနည်းဆုံး ငါးဆယ်ရာခိုင်နှုန်းခန့် တိုးတက်လာသည်ဟု ခံစားရသည်။

"နောက်ထပ် အဆင့်မြှင့်မှတ် ခုနစ်သောင်းလောက်ရှိရင် သူတော်စင်ဘုရင် ကိုးထပ် အထွတ်အထိပ်ကို ရောက်နိုင်မယ်။ အဲဒီကနေတစ်ဆင့် 'ဧကရာဇ်တစ်ပိုင်း' အဆင့်ကို တက်လှမ်းနိုင်လိမ့်မယ်။"

ကုချင်းဖန်က မျက်မှောင်ကြုတ်ကာ စဉ်းစားလိုက်သည်။ ဧကရာဇ်အဆင့်နှင့် မိမိကြားရှိ ကွာဟချက်မှာ အလွန်အလှမ်းမဝေးတော့ကြောင်း သူ ခံစားမိသည်။ သူတော်စင်ဘုရင် ပထမအဆင့်မှာတင် ဧကရာဇ်တစ်ပိုင်း ပညာရှင်ကို ယှဉ်နိုင်ခဲ့လျှင် ယခု သူတော်စင်ဘုရင် ဒုတိယအဆင့်တွင် သူ၏ အစွမ်းမှာ ပိုမို ကြီးမားလာမည်မှာ သေချာသည်။ သို့သော် ဧကရာဇ်တစ်ဦး၏ အစွမ်းမှာ အလွန် နက်နဲလှသဖြင့် သူသည် လောလောဆယ်တွင် ဧကရာဇ်ကို စိန်ခေါ်ရန် အစီအစဉ် မရှိသေးပေ။