အခန်း ၅၅၀

အခန်း ၅၅၀ - တတိယမြောက် အဘိုး

"ကုချင်းဖန်"

ဟန့်ဟိုင် နတ်ဆိုးဧကရာဇ်၏ အမူအရာမှာ အေးစက်နေပြီး နယ်စပ်ဝင်ပေါက်ကို စိုက်ကြည့်နေသော်လည်း လှုပ်ရှားခြင်းမရှိပေ။ အခုနက အဝေးမှနေ၍ အပြန်အလှန် ရင်ဆိုင်ခဲ့ရမှုအရ ကုချင်းဖန်၏ အင်အားမှာ ယခင်ကထက် ပိုမို ကြောက်မက်ဖွယ်ကောင်းလာကြောင်း သူ နားလည်လိုက်သည်။

ထို့ကြောင့် ဟန့်ဟိုင်သည် သံသယဝင်လာမိသည်။ အစကတည်းက ထိုသူက သူ၏ အစွမ်းကို ဖုံးကွယ်ထားခဲ့ခြင်းလော။ သို့မဟုတ်လျှင် ဤမျှ တိုတောင်းသော အချိန်အတွင်း မည်သို့ ဤမျှ ပြောင်းလဲသွားနိုင်မည်နည်း။ သူတို့ကဲ့သို့ အဆင့်မျိုးတွင် နှစ်ပေါင်း ရာချီကြာလျှင်ပင် တိုးတက်မှုရရန် မလွယ်ကူပေ။

ထိုအချိန်တွင် အခြားသော နတ်ဆိုးဧကရာဇ်များ ရောက်ရှိလာကြသည်။

"ဟန့်ဟိုင်... လူသားမျိုးနွယ်ရဲ့ ဧကရာဇ်တစ်ပိုင်းတစ်ယောက် နတ်ဆိုးနယ်မြေထဲ ဝင်လာတာလား။"

"ခုနက လူကတော့ ငါ အရင်က ပြောဖူးတဲ့ သိုင်းနတ်ဘုရားမင်းဆက်ရဲ့ အရှင်သခင်ကြီး ကုချင်းဖန်ပဲ။ သူ့ရဲ့ အင်အားကို ငါ တတ်နိုင်သလောက် အမြင့်ဆုံး ခန့်မှန်းထားခဲ့ပေမဲ့ အခုတော့ ငါ ခန့်မှန်းတာ နည်းနေသေးတယ်လို့ ထင်တယ်။ ဒီလူရဲ့ အစွမ်းက 'ဧကရာဇ်အဆင့် 'တစ်ဝက်ကို ရောက်နေပြီ"

ဟန့်ဟိုင်၏ စကားကြောင့် ရောက်ရှိလာသော နတ်ဆိုးဧကရာဇ်များ၏ မျက်နှာထားမှာ ချက်ချင်း ပြောင်းလဲသွားသည်။

ဧကရာဇ်အဆင့် တစ်ဝက်

ဤအဆင့်ရှိသော ပညာရှင်မှာ သာမန် ဧကရာဇ်တစ်ပိုင်းထက် သာလွန်ပြီး နတ်ဆိုးနယ်မြေတွင်ဆိုလျှင် 'နတ်ဆိုးဧကရာဇ် တစ်ပိုင်း' ဟု ခေါ်ဆိုနိုင်သည်။

"ဟန့်ဟိုင်... မင်း ကြည့်တာ မမှားဘူးဆိုတာ သေချာလား။"

"မင်းဘာသာ ကြည့်လိုက်လေ"

ဟန့်ဟိုင်က သူ၏ လက်ဝါးကို ဖြန့်ပြလိုက်ရာ ကုချင်းဖန် ပိုင်းဖြတ်ခဲ့သော ဓားဒဏ်ရာမှာ ယခုထက်ထိ မကျက်သေးဘဲ ထိုဒဏ်ရာမှ ထွက်ပေါ်နေသော ဓားရည်ရွယ်ချက်ကြောင့် အခြား နတ်ဆိုးဧကရာဇ်မှာပင် ထိတ်လန့်သွားရသည်။

"ဒီဓားချက်ရဲ့ အစွမ်းက သာမန် နတ်ဆိုးဧကရာဇ် တစ်ယောက် ပိုင်ဆိုင်နိုင်တဲ့ အရာမဟုတ်ဘူး။ မင်းပြောသလိုပဲ သူက ဧကရာဇ်အဆင့်တစ်ဝက်လောက် ရှိနေတာ ဖြစ်နိုင်တယ်။"

ဧကရာဇ်တစ်ပိုင်း နှင့် ဧကရာဇ်အဆင့်တစ်ဝက်။

နှစ်ခုလုံးမှာ ဧကရာဇ်ဘွဲ့ ပါသော်လည်း အမှန်တကယ်တွင်မူ ဧကရာဇ်အဆင့်တစ်ဝက် ဆိုသည်မှာ ဧကရာဇ်နယ်ပယ်နှင့် အလွန်ပင် နီးကပ်နေသူဖြစ်ပြီး သာမန် ဧကရာဇ်တစ်ပိုင်းထက် အဆပေါင်းများစွာ ပိုမို သန်မာသည်။ လူသားမျိုးနွယ်တွင် ဤကဲ့သို့သော ပညာရှင်တစ်ဦး ပေါ်ပေါက်လာခြင်းမှာ နတ်ဆိုးများအတွက် သတင်းကောင်း မဟုတ်ပေ။

သို့သော် ဟန့်ဟိုင်က ကောင်းကင်ယံသို့ မော့ကြည့်ရင်း ပြောလိုက်သည်။

"နတ်ဆိုးဘုရင်ကြီးနိုးထတော့မယ်။ ဒါက ငါတို့ နတ်ဆိုးမျိုးနွယ်တွေ နှစ်ပေါင်းများစွာ ပြင်ဆင်လာခဲ့တဲ့ အချိန်ပဲ။ ဧကရာဇ်တစ်ဝက် အဆင့်လောက်နဲ့တော့ ငါတို့ကို တားဆီးနိုင်မှာ မဟုတ်ဘူး။"

"ရှေးဟောင်းကာလက 'ထိုက်ရိ နတ်ဘုရားမင်းဆက်' က ကမ္ဘာလောကကြီးကို စိုးမိုးခဲ့ဖူးတယ်။ ဒါပေမဲ့ သူတို့ ပျောက်ကွယ်သွားပြီးကတည်းက လူသားမျိုးနွယ်ဟာ ကျဆင်းလာခဲ့တာပဲ။ အခု ဒီခေတ်က ငါတို့ နတ်ဆိုးမျိုးနွယ်တွေရဲ့ ခေတ်ဖြစ်ရမယ်"

ဟန့်ဟိုင်သည် လက်ကို နောက်ပစ်ကာ ယုံကြည်ချက်အပြည့်ဖြင့် ပြောလိုက်သည်။ သူသည် နယ်စပ်ဝင်ပေါက်ကို ကုချင်းဖန် စောင့်နေသဖြင့် အခြားသော ဝင်ပေါက်များမှတစ်ဆင့် လှုပ်ရှားရန်နှင့် လူသားကမ္ဘာ၏ တည်နေရာ ကို ကောင်းကင်ယံမှ ရှာဖွေရန် စီစဉ်လိုက်တော့သည်။

အခြားတစ်ဖက်တွင်...

နတ်ဆိုးနှိမ်နင်းရေး မသေမျိုးမြို့တော်သို့ ပြန်ရောက်လာသောအခါမှ ကုရှို့သည် သတိပြန်ဝင်လာတော့သည်။ ကုချင်းဖန်က အသာအယာ ချောင်းဟန့်လိုက်ရာ ကုရှို့သည် တုန်လှုပ်သွားပြီး အလျင်အမြန်ပင် ဦးညွှတ်လိုက်သည်။

"ခမည်းတော်"

သူသည် မိမိရှေ့ရှိ ရင်းနှီးသလိုရှိသော်လည်း အလွန်ပင် စိမ်းသက်လှသော လူကို ကြည့်လိုက်သည်။ သူ ယခုတင် ဘာကို မြင်လိုက်ရသနည်း။ သူ၏ ခမည်းတော်သည် နတ်ဆိုးဧကရာဇ် တစ်ဦးကို တစ်ချက်တည်းဖြင့် ဒဏ်ရာရအောင် လုပ်နိုင်ပြီး ဟန့်တားနိုင်ခဲ့သည်။ ဤသည်မှာ ကုရှို့ ထင်ထားသည်ထက် များစွာ ကျော်လွန်နေသည်။

ကုရှို့သာမက သူ၏ စိတ်ထဲရှိ ဧကရာဇ်အထွတ်အထိပ် မဟာသူတော်စင်သည်လည်း ထိတ်လန့်တုန်လှုပ်နေသည်။ လွန်ခဲ့သော နှစ်အနည်းငယ်က ကုချင်းဖန်၏ အစွမ်းကို သူ သိထားသော်လည်း ယခုအခါ ဆယ်စုနှစ် အနည်းငယ်အတွင်းမှာပင် ဤမျှ တိုးတက်လာခြင်းမှာ မယုံနိုင်စရာ ဖြစ်သည်။

"နှစ်တွေ အတော်ကြာသွားပေမဲ့ မင်းရဲ့ ကျင့်ကြံမှုက ငါ့ကို စိတ်မပျက်စေဘူး။ နတ်ဆိုးတစ်ပိုင်းသူတော်စင် အဆင့်နဲ့ ဒုတိယအဆင့် သူတော်စင်လောက်ရှိတဲ့ နတ်ဆိုးကို သတ်နိုင်တာ တော်တော်လေး ကောင်းပါတယ်။"

ကုချင်းဖန်က ကုရှို့ကို ကြည့်ကာ ချီးကျူးလိုက်သည်။ ကုရှို့၏ လက်ထဲတွင် ဧကရာဇ်လက်နက် အပိုင်းအစ ရှိနေသော်လည်း နတ်ဆိုးတစ်ကောင်ကို တစ်ခဏအတွင်း သုတ်သင်နိုင်ခြင်းမှာ လွယ်ကူသော အရာမဟုတ်သည်ကို ကုချင်းဖန် သိသည်။