အခန်း ၃၉၃

အခန်း (၃၉၃)

ရှာဟောက်နန်က လက်နက်ချအညံ့ခံလိုသည်ဟူသော စကားကို ကြားလိုက်ရသောအခါ ရှောင်မိုမှာ သူ အကြားအာရုံများ မှားယွင်းနေသလားဟုပင် တွေးတောမိသွားကာ တစ်ခဏမျှ မှင်တက်သွားရလေ၏။

ရှောင်မို၏ အမြင်တွင် ရှာဟောက်နန်ကဲ့သို့သော လူတစ်ယောက်က လက်နက်ချရန် ဖြစ်နိုင်ခြေမှာ အလွန်အမင်းကို နည်းပါးလွန်းလှပေသည်။

"စစ်သူကြီးရှာဟောက်က ဒီလိုကြီး တိုက်ရိုက်လက်နက်ချလိုက်တာပဲလား။ ဘာအပေးအယူ စည်းကမ်းချက်မှ မပါဘူးလား" ဟု ရှောင်မိုက သံတမန်ကို မေးမြန်းလိုက်လေ၏။

"လက်နက်ချမယ့်ကိစ္စနဲ့ ပတ်သက်တဲ့ တိကျတဲ့အသေးစိတ်အချက်အလက်တွေအတွက်ကတော့ စစ်သူကြီးရှာဟောက်က ဆီးနှင်းမင်းသားနဲ့ တွေ့ဆုံဆွေးနွေးချင်ပါတယ်တဲ့။ တွေ့ဆုံမယ့်နေရာက တပ်မတော်နှစ်ခုကြားက နေရာဖြစ်ရပါမယ်တဲ့။ ဆီးနှင်းမင်းသားအနေနဲ့များ သဘောတူနိုင်မလား သိချင်ပါတယ်" ဟု သံတမန်က ပြောဆိုလိုက်ပေသည်။

ရှောင်မိုက တစ်ခဏမျှ စဉ်းစားတွေးတောလိုက်ပြီးနောက် ခေါင်းညိတ်ပြလိုက်လေသည် "အဲဒီလိုဆိုရင်တော့ စစ်သူကြီးရှာဟောက်ကို ပြောလိုက်ပါ၊ မနက်ဖြန် မွန်းတည့်ချိန်ကျရင် သူ့ကို ငါ စောင့်နေပါ့မယ်လို့။"

"ဟုတ်ကဲ့ပါ"

သံတမန်က အရိုအသေပြုလိုက်ပြီးနောက် နောက်ဆုတ်ထွက်ခွာသွားလေ၏။

"စစ်သူကြီး... ခင်ဗျား ဒါကို သဘောမတူသင့်ဘူး။" သံတမန် ထွက်သွားပြီးနောက် လီကျင်းနှင့် အခြားသူများက အကြံပေးလာကြလေသည် "ကျွန်တော်တို့ရဲ့ အမြင်အရတော့ ဒီကိစ္စမှာ သေချာပေါက် မသင်္ကာစရာ တစ်ခုခု ရှိနေမှာပဲ။"

"တကယ်ကိုပဲ" ကျောက်ကွမ်းကလည်း ဝင်ရောက်ပြောဆိုလာပေသည် "ရှာဟောက်နန်က လက်နက်ချဖို့ဆိုတာ ဖြစ်နိုင်ခြေ သိပ်ကို နည်းလွန်းပါတယ်။ ဒါက လှည့်ကွက်တစ်ခုဖြစ်နေမှာကို ကျွန်တော် စိုးရိမ်မိတယ်။"

"အခု ရှာဟောက်နန်က မြို့ကိုပါ စွန့်လွှတ်ဖို့ အတင်းအကျပ် ဖိအားပေးခံခဲ့ရပြီဖြစ်ပြီး မင်းသားကြီးကလည်း မကြာခင် ရောက်လာတော့မယ်ဆိုတော့ ရှာဟောက်နန်က အရှိန်ကုန်သွားတဲ့ မြားတစ်စင်းထက် မပိုတော့ပါဘူး။ ဝေ့တိုင်းပြည်ရဲ့ ကံတရားကလည်း ကုန်ခမ်းသွားခဲ့ပြီဆိုတော့ သူ့ရဲ့ လက်နက်ချမှုကို ဘာလို့များ ငါတို့က လက်ခံဖို့ လိုအပ်နေဦးမှာလဲ။"

"အဲဒါ အမှန်ပဲ။"

စစ်သူကြီးများ အသီးသီးကလည်း တစ်ယောက်ပြီးတစ်ယောက် ဝင်ရောက်ပြောဆိုလာကြပြီး ဤကိစ္စမှာ မသင့်လျော်ကြောင်းကို ခံစားနေကြရလေ၏။

ရှောင်မိုက လက်ကို ဝှေ့ယမ်းပြလိုက်ရာ လူအုပ်ကြီး၏ အသံများမှာ တဖြည်းဖြည်း တိတ်ဆိတ်သွားလေတော့သည်။

"မင်းတို့ပြောသွားတာတွေ အားလုံးကို ငါ သဘာဝကျကျ သိထားပြီးသားပါ။ ဒါပေမဲ့ ငါလိုချင်တာက ဝေ့တိုင်းပြည်တစ်ခုတည်း မဟုတ်ဘူး" ဟု ရှောင်မိုက ဖြည်းညင်းစွာ ပြောဆိုလိုက်ပေသည်။

"စစ်သူကြီးက ဘာကိုဆိုလိုချင်တာလဲ" ဟု ရှောင်ကွေ့က နားမလည်နိုင်စွာဖြင့် မေးမြန်းလိုက်လေ၏။

"လောလောဆယ် ငါတို့ လက်ခံထားတဲ့ ဝေ့တိုင်းပြည်စစ်သည်တွေ အရေအတွက်က နှစ်သိန်းလောက် ရှိနေပြီ။ ဒီလူတွေက ငါတို့တပ်မတော်ဆီကို လက်နက်ချအညံ့ခံလာကြပေမယ့် သူတို့ရဲ့ နှလုံးသားတွေကတော့ ငါတို့နဲ့အတူ မရှိနေသေးဘူး။"

ရှာဟောက်နန်က တပ်မတော်အတွင်းမှာ ကြီးမားလှတဲ့ ဩဇာတိက္ကမကို ပိုင်ဆိုင်ထားသူပဲ။

အကယ်၍ ရှာဟောက်နန်သာ မြောက်ပိုင်းဆီကို အမှန်တကယ် လက်နက်ချလိုက်မယ်ဆိုရင် ဒီစစ်သည်တွေရဲ့ နှလုံးသားတွေကလည်း အနည်းနဲ့အများတော့ ငြိမ်သက်သွားမှာပါပဲ။

ဒါ့အပြင် ရှာဟောက်နန်ဆိုတာက တကယ်ကို ဒီလောကမှာ နာမည်ကျော်ကြားတဲ့ စစ်သူကြီးတစ်ဦးပဲလေ။

ငါ့အမြင်အရဆိုရင် သူ့ရဲ့တန်ဖိုးက ဝေ့တိုင်းပြည်ထက်တောင် အများကြီး ပိုပြီးမြင့်မားနေသေးတယ်။"

ရှောင်မိုက သဲပုံစံငယ်လေးကို စိုက်ကြည့်လိုက်လေ၏။

"မနက်ဖြန်အတွက် သေရည်နဲ့ အစားအသောက်တွေကို ပြင်ဆင်ထားကြ။ စစ်သူကြီးရှာဟောက်ကို သေရည်အတူသောက်ဖို့ ငါ ဖိတ်ခေါ်ပါ့မယ်။"

နောက်တစ်နေ့ မွန်းတည့်ချိန်၌

ရှောင်ရှီ နောက်မှပို့ပေးလိုက်သော စစ်ကူများနှင့် ဤကာလအတွင်း ရှောင်မို လက်ခံရရှိထားခဲ့သော လက်နက်ချစစ်သည်များကိုပါ ပေါင်းထည့်လိုက်မည်ဆိုပါက စုစုပေါင်း နှင်းနင်းနဂါးမြင်းသည်တော် ရှစ်သောင်းနှင့် ခြေလျင်တပ်သား ငါးသိန်းခန့်က စစ်မြေပြင်ပေါ်တွင် နေရာယူထားကြလေ၏။

အလားတူပင် ရှာဟောက်နန်၏ စစ်သည်အင်အား ခြောက်သိန်းရှိသော တပ်မတော်ကလည်း အသင့်အနေအထားဖြင့် ရပ်တည်နေကြပေသည်။

တပ်မတော်နှစ်ခုကြားရှိ အလယ်ဗဟိုတည့်တည့်နေရာတွင်မူ သစ်သားစားပွဲတစ်လုံးနှင့် ထိုင်ခုံအခင်းနှစ်ခုကို နေရာချထားနှင့်ပြီး ဖြစ်လေ၏။

ယနေ့တွင် ရှောင်မိုက နဂါးကြေးခွံ သံချပ်ကာကို ဝတ်ဆင်မလာခဲ့ချေ။ ယင်းအစား သူက ဝတ်ရုံဖြူတစ်စုံကို ဝတ်ဆင်ထားပြီး မြင်းဖြူတစ်ကောင်ကို စီးနင်းလျက် အစားအသောက်သေတ္တာတစ်လုံးကို သယ်ဆောင်ကာ အလယ်ဗဟိုဆီသို့ တစ်လှမ်းချင်း ချဉ်းကပ်လာခဲ့ပေသည်။

ရှာဟောက်နန်ကလည်း သာမန်အဝတ်အစားများကို ဝတ်ဆင်ထားပြီး သာမန်သိုင်းပညာရှင်တစ်ဦးအလား ရှောင်မိုဆီသို့ လျှောက်လှမ်းလာခဲ့လေ၏။

တပ်မတော်နှစ်ခုစလုံးမှ ဒုတိယစစ်သူကြီးများမှာမူ မြင်းဇက်ကြိုးများကို တင်းကျပ်စွာ ဆုပ်ကိုင်ထားကြပြီး ရှေ့သို့ စူးရဲစွာ စိုက်ကြည့်နေကြပေသည်။

အကယ်၍ တစ်ဖက်မှ လှုပ်ရှားမှုတစ်ခုခု ပြုလုပ်လာခဲ့ပါက ကြီးမားလှသော စစ်ပွဲကြီးမှာ တစ်ခဏအတွင်းမှာပင် ပေါက်ကွဲထွက်ပေါ်လာမည်သာ ဖြစ်လေတော့သည်။

"မတွေ့ရတာ အတော်တောင် ကြာသွားပြီပဲ၊ ဆီးနှင်းမင်းသားက တစ်နေ့ထက်တစ်နေ့ ပိုပြီး အရည်အချင်းရှိတဲ့သူတစ်ယောက်လို ဖြစ်လာပါလား" ဟု ရှာဟောက်နန်က အပြုံးဖြင့် ဆိုလာလေ၏။

"ဟဲ ဟဲ... တကယ်တော့ စစ်သူကြီးက အရင်ကထက် အတော်လေး အိုမင်းသွားသလိုပဲနော်" ဟု ရှောင်မိုက အမှန်အတိုင်း ပြောဆိုလိုက်ပေသည်။

"ဟား ဟား ဟား" ရှာဟောက်နန်က ကျယ်လောင်စွာ ရယ်မောလိုက်လေသည်။ "ဆီးနှင်းမင်းသား... ထိုင်ပါဦး။"

"စစ်သူကြီးရှာဟောက်လည်း ထိုင်ပါဦး။"

နှစ်ဖက်စလုံး တင်ပျဉ်ခွေ ထိုင်လိုက်ကြလေ၏။

ရှောင်မိုက အစားအသောက်သေတ္တာကို ဖွင့်လိုက်ပြီး သေရည်နှင့် အစားအသောက်များကို ထုတ်ယူကာ ရှာဟောက်နန်အတွက် ကိုယ်တိုင် သေရည်တစ်ခွက် ငဲ့ပေးလိုက်ပေသည်

"ဒီဂျူနီယာ ယူဆောင်လာတဲ့ အစားအသောက်တွေကို စစ်သူကြီးရှာဟောက် စားရဲပါ့မလား။"

"ငါက ဘာလို့ မစားရဲရမှာလဲ။" ရှာဟောက်နန်က သူရဲကောင်းဆန်ဆန်ပင် သေရည်ခွက်ကို လှမ်းယူလိုက်ပြီး တစ်ကျိုက်တည်းဖြင့် မော့သောက်လိုက်ကာ နှုတ်ခမ်းကို သပ်လိုက်လေ၏။

"မင်းတို့ မြောက်ပိုင်းရဲ့ ဒီဆန်းလော့သေရည်က တကယ်ကို ပြင်းရှလွန်းတယ်။ အစတုန်းကတော့ ငါက ဒါကို အရသာရှိတယ်လို့ မထင်ခဲ့မိဘူး။ ဒါပေမဲ့ နောက်ပိုင်းကျတော့ တဖြည်းဖြည်းနဲ့ စွဲလမ်းသွားခဲ့ရတယ်။ တစ်ခါကဆိုရင် လူတွေကိုတောင် ဒီသေရည်ကို အတုခိုးပြီး ချက်ခိုင်းဖူးသေးတယ်၊ ဒါပေမဲ့ သူတို့က မင်းတို့ဆီက ဒီအရသာမျိုးကိုတော့ မဖန်တီးနိုင်ခဲ့ကြဘူး။"

"ဆန်းလော့သေရည်ကို ပထမဆုံးအကြိမ် စသောက်တဲ့အချိန်မှာ ကျင့်သားရဖို့ အတော်လေးကို ခက်ခဲပါတယ်။ ဒါပေမဲ့ ဒါကိုသောက်ပြီးသွားရင်တော့ တခြားသေရည်တွေက အရသာပေါ့ပျက်သွားပြီး ဒါကိုပဲ ထပ်သောက်ချင်နေမိတော့တာပဲ။" ရှောင်မိုက သေရည်တစ်ငုံ သောက်လိုက်လေသည်။

"စစ်သူကြီးဟောင်း တုကလည်း ဒါကို သောက်ရတာ ကြိုက်တယ်လေ။"

စစ်သူကြီးဟောင်း တုအကြောင်းကို ကြားလိုက်ရသောအခါ ရှာဟောက်နန်၏ မျက်နှာအမူအရာမှာ မှိုင်းညို့သွားပြီး သက်ပြင်းချလိုက်ပေသည်။

"မူလက မဟာတိုင်လုံးကြီးအနေနဲ့ နန်းတွင်းကနေ အနားယူပြီး သူ့ရဲ့ နောက်ဆုံးနှစ်တွေကို အေးအေးချမ်းချမ်း ဖြတ်သန်းနေခဲ့ပြီလေ။ ငါကပဲ စစ်သူကြီးဟောင်းကို စစ်မြေပြင်ဆီ ဆွဲခေါ်လာဖို့ အတင်းအကျပ် လုပ်ခဲ့မိတာ၊ ဒါက ငါ့ရဲ့ အပြစ်ပါပဲ။ ငါ စစ်သူကြီးဟောင်းကို မျက်နှာပျက်စေခဲ့ပါပြီ။"

"ဖြစ်နိုင်တာပေါ့လေ။" ရှောင်မိုက သူ့ကိုယ်သူနှင့် ရှာဟောက်နန်အတွက် သေရည်တစ်ခွက်စီ ထပ်မံငဲ့ထည့်လိုက်လေ၏။

"ဒါပေမဲ့ စစ်သူကြီးဟောင်း တု မကွယ်လွန်ခင်တုန်းက သူက စစ်သူကြီးကို လုံးဝ အပြစ်မတင်ခဲ့သလို ဘာနောင်တမှလည်း မရခဲ့ပါဘူး။"

ရှာဟောက်နန်က သေရည်ခွက်ကို တင်းကျပ်စွာ ဆုပ်ကိုင်လိုက်ပေသည်။

"စစ်သူကြီးဟောင်း တု မကွယ်လွန်ခင်တုန်းက နောက်ဆုံးစကားတစ်ခွန်းခွန်းများ ချန်ထားခဲ့သေးလား။"

"စစ်သူကြီးဟောင်း တုက အဲဒီလွင်ပြင်မှာပဲ သူ့ကို မြှုပ်နှံပေးဖို့ ဆန္ဒရှိခဲ့ပါတယ်။ ပြီးတော့ ဆန်းလော့သေရည်ကို နောက်ဆုံးအနေနဲ့ တစ်ငုံလောက် သောက်သွားချင်ခဲ့တယ်လေ" ဟု ရှောင်မိုက အမှန်အတိုင်း ပြောဆိုလိုက်လေသည်။

"နောင်တစ်ချိန်ကျရင် စစ်သူကြီးရှာဟောက်အနေနဲ့ သေရည်ယူလာပြီး သွားရောက်ဂါရဝပြုနိုင်ပါတယ်။"

ရှာဟောက်နန်က ခေါင်းညိတ်လိုက်ပြီး သေရည်ခွက်ကို မြှောက်တင်လိုက်လေ၏။

"ဒီတစ်ခွက်ကတော့ ဆီးနှင်းမင်းသားအတွက်ပါ။ စစ်သူကြီးဟောင်းကို သူ့ရဲ့ နောက်ဆုံးဂုဏ်သိက္ခာကို ပေးအပ်ခဲ့တဲ့အတွက် ဆီးနှင်းမင်းသားကို ကျေးဇူးတင်ပါတယ်။"

"ဒါက လုပ်သင့်လုပ်ထိုက်တာကို လုပ်ခဲ့တာပါ။" ရှောင်မိုကလည်း သေရည်ခွက်ကို ပြန်လည်မြှောက်တင်ကာ တုံ့ပြန်လိုက်ပေသည်။ "စကားမစပ်... စစ်သူကြီးရှာဟောက်က ကျွန်တော်တို့ မြောက်ပိုင်းကို အမှန်တကယ်ပဲ လက်နက်ချအညံ့ခံချင်နေတာလား။"

ရှာဟောက်နန်က ပြုံးလိုက်လေ၏။ "ဆီးနှင်းမင်းသားကရော ဘယ်လိုထင်လဲ။"

"အဲဒီလိုပုံ မပေါ်ပါဘူး။" ရှောင်မိုက ခေါင်းယမ်းပြလိုက်လေသည် "ကျွန်တော် ထင်တာကတော့ စစ်သူကြီးရှာဟောက်က လက်နက်ချချင်ယောင် ဆောင်နေတာပဲဖြစ်မယ်။

ဒါပေမဲ့ ခင်ဗျားရဲ့ စည်းကမ်းချက်ကတော့ ခင်ဗျားရဲ့ မူလလက်အောက်ငယ်သားတွေအပြင် ကျွန်တော့်လက်ထဲမှာရှိနေတဲ့ ဝေ့တိုင်းပြည်ရဲ့ လက်နက်ချစစ်သည်တွေကိုပါ ပြန်လည်ကွပ်ကဲဖို့ ဖြစ်လိမ့်မယ်။ အဲဒီနောက်မှာ စစ်သူကြီးရှာဟောက်က အခွင့်အရေးကို စောင့်ဆိုင်းပြီး တိုက်ခိုက်ကာ ကျွန်တော့်ရဲ့ တပ်မတော်ကို ချေမှုန်းပြီးတော့ နောက်ဆုံးမှာ အခြေအနေအရပ်ရပ်ကို ပြောင်းပြန်လှန်ပစ်ဖို့ ရည်ရွယ်ထားတာ ဖြစ်ရမယ်။"

"မျှော်လင့်ထားတဲ့အတိုင်း ဆီးနှင်းမင်းသားဆီကနေ ဘာကိုမှ ဖုံးကွယ်ထားလို့ မရနိုင်ဘူးပဲ။"

"သုံးနှစ်အရွယ် ကလေးတစ်ယောက်ကလွဲရင် စစ်ရေးဗျူဟာအကြောင်း နည်းနည်းပါးပါး ဖတ်ဖူးတဲ့ ဘယ်သူမဆို စစ်သူကြီးရှာဟောက်ရဲ့ ရည်ရွယ်ချက်ကို သိနိုင်မှာပါပဲ။"

"ဟား ဟား ဟား" ရှာဟောက်နန်က ဆက်လက်၍ ကျယ်လောင်စွာ ရယ်မောလိုက်လေသည်။ ရယ်သံများ တဖြည်းဖြည်း တိတ်ဆိတ်သွားချိန်တွင်မူ သူက ရှောင်မို၏ မျက်လုံးများကို တည့်တည့်မတ်မတ် စိုက်ကြည့်လိုက်ရာ သူ၏ အကြည့်များမှာ သိမ်းငှက်တစ်ကောင်အလား စူးရှထက်မြက်နေခဲ့ပေသည်။

"မှန်ပါတယ်။ ဆီးနှင်းမင်းသား ပြောတဲ့အတိုင်း အတိအကျပါပဲ။ ဒါဆို ဆီးနှင်းမင်းသားက ငါ့ရဲ့ လက်နက်ချမှုကို လက်ခံဦးမှာလား။"

"ကျွန်တော် လက်ခံပါတယ်။" ရှောင်မိုက ခေါင်းညိတ်လိုက်လေ၏။

"စစ်သူကြီးရှာဟောက်က ကျွန်တော့်ဆီကို လက်နက်ချပြီး ဝေ့တိုင်းပြည်က စစ်သည်တွေအားလုံးကိုလည်း စစ်သူကြီးရှာဟောက်ရဲ့ ကွပ်ကဲမှုအောက်မှာပဲ ဆက်လက်ထားရှိပေးပါမယ်။"

"..."

ရှာဟောက်နန်က မျက်လုံးများကို ကျဉ်းမြောင်းလိုက်ပေသည်။

"ဆီးနှင်းမင်းသားက နောက်ပြောင်နေတာ မဟုတ်ဘူးမလား။"

"ကျွန်တော်က နောက်ပြောင်လေ့ မရှိပါဘူး။" ရှောင်မိုက ခေါင်းယမ်းလိုက်လေသည်။ "ဘာလို့လဲဆိုတော့ စစ်သူကြီးရှာဟောက်ကို အဲဒီအခွင့်အရေး ရဖို့ ခွင့်ပြုပေးမှာ မဟုတ်သလို ကျွန်တော့်မှာလည်း ဒီကိစ္စကို ကိုင်တွယ်ဖြေရှင်းဖို့ ကိုယ်ပိုင်နည်းလမ်းတွေ ရှိနေလို့ပါပဲ။"

"ဆီးနှင်းမင်းသားက တကယ်ကို ယုံကြည်မှုရှိတာပဲ။" ရှာဟောက်နန်က သေရည်တစ်ခွက် သောက်လိုက်လေ၏။

"ဖြစ်နိုင်ပါတယ်။ ဒါပေမဲ့ နောက်ထပ် အကြောင်းပြချက်တစ်ခုလည်း ရှိပါသေးတယ်" ဟု ရှောင်မိုက အပြုံးဖြင့် ဆိုလာလေသည်။

"ငါ နားထောင်နေပါတယ်။"

"စစ်သူကြီးဟောင်းတု မကွယ်လွန်ခင်တုန်းက သူလည်း လောကကြီး ပေါင်းစည်းသွားတဲ့ ရွှေခေတ်ကြီးကို မြင်တွေ့ချင်တယ်လို့ ကျွန်တော့်ကို ပြောခဲ့တယ်လေ။ ဒါပေမဲ့ ကံမကောင်းစွာနဲ့ပဲ သူကတော့ အဲဒါကို မြင်တွေ့ခွင့် ရနိုင်တော့မှာ မဟုတ်ဘူး။ ပြီးတော့ ကျွန်တော် သိသလောက်ကတော့ စစ်သူကြီးရှာဟောက်က စစ်သူကြီးဟောင်း တုရဲ့ဆီမှာ အချိန်ကာလတစ်ခုအထိ ပညာသင်ယူခဲ့ဖူးတယ်ဆိုတော့ ခင်ဗျားတို့က ဆရာတပည့်လို့တောင် သတ်မှတ်လို့ရပါတယ်။"

လေအေးအေးလေးတစ်ချက်က ရှောင်မို၏ ဆံပင်များနှင့် ဝတ်ရုံဖြူကို ဖြတ်သန်းတိုက်ခတ်သွားပြီး သူ၏ အသံမှာလည်း အေးအေးလူလူ လွင့်ပျံလာခဲ့လေ၏။

"ကျွန်တော် စဉ်းစားနေတာက... စစ်သူကြီးရှာဟောက်အနေနဲ့ စစ်သူကြီးဟောင်းတုရဲ့နေရာမှာ အစားဝင်ပြီး အနာဂတ်မှာ နိုင်ငံတွေအားလုံး ပေါင်းစည်းသွားတာကို မြင်တွေ့ဖို့ဆိုရင်ကော...။"

ရှာဟောက်နန် "..."

ရှောင်မိုက ဖြည်းညင်းစွာ မတ်တပ်ထရပ်လိုက်ပြီး သူ၏ အဝတ်အစားများပေါ်ရှိ ဖုန်များကို ခါထုတ်လိုက်ကာ လက်ယှက်၍ အရိုအသေပြုလိုက်လေတော့သည်။

"စစ်သူကြီးက ခေတ်တစ်ခေတ်ရဲ့ ပါရမီရှင်တစ်ဦးဖြစ်ပြီး ဝေ့တိုင်းပြည်လောက်နဲ့တင် အကန့်အသတ်ဖြစ်မနေသင့်ဘူးလေ။

ကျွန်တော်မိုက စစ်သူကြီးကို ကြီးမားတဲ့ ကတိတွေ မပေးနိုင်ပေမယ့်၊

အနာဂတ်မှာ စစ်သူကြီးအနေနဲ့ နိုင်ငံအသီးသီးကို စစ်ချီတက်တဲ့အခါ လောကက နာမည်ကျော် စစ်သူကြီးအားလုံးနဲ့ တွေ့ဆုံရပြီး နိုင်ငံတိုင်းရဲ့ မြေသားတွေကို နင်းလျှောက်ခွင့်ရမယ်ဆိုတာကိုတော့ ကျွန်တော် အာမခံရဲပါတယ်။

အကယ်၍ စစ်သူကြီးမှာသာ အဲဒီလို ဆန္ဒမျိုး ရှိနေမယ်ဆိုရင် ကျွန်တော်မိုက စစ်သူကြီးကို စောင့်ကြိုနေပါ့မယ်။"

ထိုစကားများ ပြောဆိုပြီးနောက် ရှောင်မိုသည် လှည့်ထွက်သွားခဲ့လေ၏။

ရှာဟောက်နန်မှာမူ ထိုင်ခုံအခင်းပေါ်တွင် တစ်ယောက်တည်း ထိုင်နေရစ်ခဲ့ပြီး ရှောင်မို၏ အသံများက သူ၏ နားထဲတွင် အဆက်မပြတ် ပဲ့တင်ထပ်နေခဲ့ပေသည်။

ရှာဟောက်နန်က အသိစိတ်ပြန်ဝင်လာပြီး ခေါင်းမော့ကြည့်လိုက်ချိန်တွင်မူ ထိုအဖြူရောင် ဝတ်ရုံနှင့်ပုံရိပ်မှာ အဝေးသို့ လျှောက်လှမ်းသွားခဲ့ပြီ ဖြစ်လေတော့သတည်း။

"စစ်ပွဲဖြစ်ပွားနေသော နိုင်ငံများ၏ အတ္ထုပ္ပတ္တိများ - ဆီးနှင်းမင်းသား မှတ်တမ်း"

တွင် ဤသို့ မှတ်တမ်းတင်ထားလေသည်။

မြောက်ပိုင်းတပ်မတော်သည် ဝေ့တိုင်းပြည် မြို့တော်သို့ ရောက်ရှိပြီးနောက် ရက်ပေါင်းနှစ်ဆယ်အကြာတွင် ဝေ့စစ်သူကြီး ရှာဟောက်နန်သည် သံချပ်ကာကိုချွတ်၍ လက်နက်ချအညံ့ခံရန် တောင်းဆိုခဲ့ပြီး စစ်ဘက်ဆိုင်ရာ အာဏာအားလုံးကို လွှဲပြောင်းပေးအပ်ခဲ့လေသည်။ ဆီးနှင်းမင်းသား ရှောင်မိုသည် ဆယ်လီအကွာအထိ ကိုယ်တိုင်ထွက်၍ သူ့ကို ကြိုဆိုခဲ့ကာ သူ၏လက်ကိုဆွဲလျက် ဝေ့တိုင်းပြည် မြို့တော်ကို တိုက်ခိုက်ရန် အတူတကွ ဝင်ရောက်သွားခဲ့ကြလေတော့သတည်း။