အခန်း ၂၆၇

အပိုင်း ၂၆၇

​နည်းပညာအဆင့်မြင့်မားမှုနှင့် 3D Code၏ လုံခြုံရေးအာမခံချက်

​အမှန်စင်စစ် ယခင်ကတည်းက ကျူအာကုဒ် (QR Code) ဖြင့် ငွေပေးချေသည့်စနစ် ရှိခဲ့ဖူးသဖြင့် (3D Code) ဖြင့် ငွေပေးချေခြင်းသည် နည်းပညာသစ်တစ်ခုတော့ မဟုတ်ပေ။

သို့သော် 3D code၏ စစ်မှန်သော အနှစ်သာရမှာ နည်းပညာကို အဆင့်မြှင့်တင်ထားခြင်း (Technological Sublimation) ပင် ဖြစ်သည်။

ရိုးရိုး (2D Code) များနှင့် နှိုင်းယှဉ်ပါက ၃ ဒီကုဒ်တွင် သိမ်းဆည်းထားနိုင်သော အချက်အလက်များသည် ပိုမိုစုံလင်ပြီး သိမ်းဆည်းနိုင်စွမ်းလည်း ပိုမိုကြီးမားသည်။

​အရေးအကြီးဆုံးအချက်မှာ ထိုကုဒ်များသည် ၂ ဒီကုဒ်များထက် ပိုမိုလုံခြုံစိတ်ချရခြင်းပင် ဖြစ်သည်။ ဤစနစ် ခေတ်စားလာသည်နှင့်အမျှ မိုဘိုင်းဖုန်းနှင့် ကွန်ပျူတာတို့ကို တွဲဖက်အသုံးပြုနိုင်မည် ဖြစ်သည်။

ကျူအာကုဒ်ကဲ့သို့ပင် ထွက်ပေါ်လာသော ၃ဒီကုဒ် စကင်ဖတ်ရန် ပုံစံများကို ပရင့်ထုတ်၍ ဖုန်းဖြင့် စကင်ဖတ်နိုင်မည် ဖြစ်သည်။ ထိုအခါ ဤ ၃ဒီကုဒ်သည် အကြီးအကျယ် ခေတ်စားလာမည်ဖြစ်ပြီး ရလဒ်အနေဖြင့် ကုဋေကုဋာမကသော အကျိုးအမြတ်များ ရရှိလာပေလိမ့်မည်။

​ယခင် ကျူအာကုဒ် ခေတ်က ဂျပန်လူမျိုးများသည် ကျူအာကုဒ်၏ မူပိုင်ခွင့်ကို လက်ဝယ်ပိုင်ဆိုင်ထားသဖြင့် ကျူအာကုဒ်များ တစ်ကမ္ဘာလုံးသို့ ပြန့်နှံ့သွားသည့်အခါ ၎င်းတို့သည် အကျိုးအမြတ်များစွာ ရရှိခဲ့ကြသည်။

ယခုအခါ လုံထန်အုပ်စုသည် ဂျပန်တို့၏ ကျူအာကုဒ်ကို အလုံးစုံ အစားထိုးနိုင်မည့် ၃ ဒီကုဒ် နည်းပညာအသစ်ကို တီထွင်လိုက်ပြီ ဖြစ်သည်။

ယနေ့မှစ၍ ဤစည်းစိမ်ဥစ္စာ မြစ်ဖျားခံရာ လမ်းကြောင်းသည် လုံထန်အုပ်စု၏ လက်ထဲသို့ ရောက်ရှိလာတော့မည် ဖြစ်သည်။

​အမှန်စင်စစ် ၃ ဒီကုဒ်နှင့် ပတ်သက်သော သုတေသနများကို ကမ္ဘာတစ်ဝန်းတွင် ပြုလုပ်နေကြသည်မှာ ကြာပြီဖြစ်သည်။

သို့သော် ကျူအာကုဒ်နှင့် နှိုင်းယှဉ်လျှင် ၃ဒီကုဒ်သည် ကိန်းဂဏန်း ကွာခြားချက်မျှသာ မဟုတ်ဘဲ နည်းပညာရပ် နှစ်ခုအကြား ကြီးမားသော အတားအဆီးများ ရှိနေခဲ့သည်။

ထို့ကြောင့် ယခုအချိန်အထိ လုံထန်အုပ်စုမှလွဲ၍ မည်သူမျှ ၃ဒီကုဒ် နည်းပညာကို အပြည့်အဝ မတတ်ကျွမ်းနိုင်ကြသေးပေ။

ဤ ၃ဒီကုဒ် သုတေသနနှင့် ဖွံ့ဖြိုးတိုးတက်မှု လုပ်ငန်းစဉ်ကို အပြီးသတ်နိုင်ရန်အတွက် လုံထိန်အုပ်စုသည် ဆက်စပ်နည်းပညာရပ်များကို ဝယ်ယူရန်အတွက်တင် ယွမ် ၁ ဘီလီယံထက်မနည်း အသုံးပြုခဲ့ရပြီး လူအင်အား အမြောက်အမြားကိုလည်း ရင်းနှီးမြှုပ်နှံခဲ့ရသည်။

​"ဥက္ကဋ္ဌခင်ဗျာ၊ ကျူအာကုဒ်တွေမှာ လုံခြုံရေးအားနည်းချက်တွေ ရှိခဲ့ဖူးပါတယ်။ အဲဒီလို အားနည်းချက်မျိုး ကျွန်တော်တို့ရဲ့ ၃ဒီကုဒ်မှာလည်း ရှိနေနိုင်မလား။"

​ထိုအချိန်တွင် ကျိဖုပေါင်မှ အဆင့်မြင့်အရာရှိတစ်ဦးက လူတိုင်းစိတ်ဝင်စားသွားမည့် မေးခွန်းတစ်ခုကို ထုတ်ဖော်မေးမြန်းလိုက်သည်။

အားလုံးသိကြသည့်အတိုင်း ကျူအာကုဒ်ကို စတင်မိတ်ဆက်စဉ်က ဂျပန်လူမျိုးများသည် ၎င်းတို့၏ ကုဒ်စနစ်မှာ အပြည့်အဝ လုံခြုံပါသည်ဟု အာမခံချက် ပေးခဲ့ကြသည်။

သို့သော် လက်တွေ့တွင်မူ ဆန့်ကျင်ဘက်ဖြစ်ခဲ့သည်။ လူအများအပြားသည် ကျူအာကုဒ်များကို စိတ်ကြိုက် စကင်ဖတ်ခဲ့ကြရာမှ ဖုန်းအတွင်းရှိ အချက်အလက်များ ပေါက်ကြားခြင်းနှင့် ငွေကြေးဆုံးရှုံးခြင်းများ တိုက်ရိုက် ဖြစ်ပေါ်ခဲ့သည်။

ကျူအာကုဒ်များသည် ရိုးရိုး 'ထရိုဂျန်'ဗိုင်းရပ်စ်များကို လုံးဝ မတားဆီးနိုင်ခဲ့ပေ။ ထို့ကြောင့် ၎င်းတို့အနေဖြင့် ၃ ဒီကုဒ်၏ လုံခြုံရေးကို အထူးဂရုပြုရန် လိုအပ်လာခြင်းဖြစ်သည်။

၎င်းသည် ငွေပေးချေမှု ဆော့ဖ်ဝဲလ်တစ်ခု၏ အရေးအကြီးဆုံး အစိတ်အပိုင်းလည်း ဖြစ်သည်။

​"စိတ်ချလက်ချ ရှိနိုင်ပါတယ်။ ကျွန်တော်တို့ရဲ့ ၃ ဒီကုဒ် စကင်ဖတ်စနစ်ဟာ ပင်ဂွင်းအုပ်စုနဲ့ ပူးပေါင်းထားပြီး ဗိုင်းရပ်စ် ကာကွယ်ရေးစနစ် ကို တပါတည်း ထည့်သွင်းထားပါတယ်။ အကယ်၍ ထရိုဂျန်ဗိုင်းရပ်စ် ကျူးကျော်လာတာနဲ့ ၎င်းချိတ်ဆက်မှုကို အလိုအလျောက် ဖြတ်တောက်ပစ်မှာပါ" ဟု လင်းဖန်က စူးရှသော အကြည့်များဖြင့် လေးနက်စွာ ပြောကြားလိုက်သည်။

​"ဒါ့အပြင် လုံထန်အုပ်စုရဲ့ ထုတ်ကုန်တွေနဲ့ ထန်ရွမ်စနစ်တို့ ပေါင်းစပ်ထားမှုဟာ ဆိုက်ဘာတိုက်ခိုက်မှုတွေကို ခုခံဖို့အတွက် အရင်က မရှိဖူးတဲ့ အားသာချက်တွေ ရှိနေပါတယ်။"

​၎င်းမှာ နောက်ပြောင်ပြောဆိုခြင်း မဟုတ်ပေ။ ထန်ရွမ် စမတ်ဖုန်း လည်ပတ်မှုစနစ်၏ မူရင်းကုဒ်ကို မည်သည့်အခါမျှ လူသိရှင်ကြား ထုတ်ပြန်ခဲ့ခြင်းမရှိဘဲ လင်းဖန်၏ လက်ထဲတွင်သာ ရှိနေသည်။

အကယ်၍ တစ်စုံတစ်ဦးက Android သို့မဟုတ် Apple ၏ iOS စနစ်များကို ကူးစက်နိုင်သည့် ထရိုဂျန်ဗိုင်းရပ်စ်တစ်ခုကို တီထွင်ခဲ့လျှင်ပင်၊ ၎င်းတို့က ထန်ရွမ်စနစ်ကို ကူးစက်ရန် ကြိုးပမ်းသည့်အခါ ပြင်းထန်သော တုံ့ပြန်မှုကို ခံရမည်မှာ အသေအချာပင်။

ထန်ရွမ်စနစ်၏ ကိုယ်ပိုင်စစ်ဆေးရေးစနစ်က အဆိုပါ ပရိုဂရမ်သည် တရားဝင် ခွင့်ပြုချက်မရှိသော ပရိုဂရမ်ဖြစ်ကြောင်း ချက်ချင်း သိရှိသွားမည်ဖြစ်သည်။

ထန်ရွမ်စနစ်သည် အများသုံး Android စနစ်ကဲ့သို့ မဟုတ်ဘဲ လျှို့ဝှက်ချက်များကို အမြဲထိန်းသိမ်းထားသည့် စနစ်ဖြစ်ရာ မည်သူမျှ မူရင်းကုဒ်ကို စိတ်ကြိုက် ပြောင်းလဲ၍မရသဖြင့် ဗိုင်းရပ်စ်များ ရမ်းကားရန် မလွယ်ကူပေ။

​APPLE ဖုန်းများမှာမူ ယခင်က ၎င်းတို့၏ စနစ်ကို လူသိရှင်ကြား မထုတ်ပြန်ခဲ့သဖြင့် ထရိုဂျန်ဗိုင်းရပ်စ်များ ကူးစက်ခံရခြင်း နည်းပါးခဲ့သော်လည်း နောက်ပိုင်းတွင် ဟက်ကာ (Hacker) များ၏ ကျူးကျော်မှုကို ခံခဲ့ရကာ လုံခြုံရေးစနစ်နှင့် Cloud ပိုင်းတွင် ပြဿနာများ ဖြစ်ပေါ်ခဲ့သည်။

ထိုအချိန်မှစ၍ Apple သည် ၎င်းတို့၏ ဖုန်းများမှာ ဗိုင်းရပ်စ် လုံးဝ မကူးစက်နိုင်ပါဟု ၁၀၀ ရာခိုင်နှုန်း အာမခံချက် မပေးဝံ့တော့ပေ။

အကြောင်းမှာ ၎င်းတို့၏ Cloud နည်းပညာသည် ၁၀၀ ရာခိုင်နှုန်း စိတ်မချရတော့သောကြောင့် ဖြစ်သည်။

​သို့သော် ထန်ရွမ်စမတ်ဖုန်းစနစ်မှာမူ Cloud နည်းပညာနှင့် ပတ်သက်သည့် မည်သည့် အက်ပလီကေးရှင်းကိုမဆို 'မျက်သူငယ်နှစ်ထပ် လုံခြုံရေးစနစ်' (Dual Pupil Confidentiality System) ကို မဖြစ်မနေ ထည့်သွင်းစေရန် အတင်းအကျပ် စီစဉ်ထားသည်။

ဤစည်းကမ်းချက်ကို အက်ပလီကေးရှင်း ရေးသားသူများအနေဖြင့် ငြင်းပယ်ပိုင်ခွင့် မရှိပေ။ ၎င်းစနစ်ကို ထည့်သွင်းခြင်း သို့မဟုတ် ထမ်ရုံအက်ပလီကေးရှင်း ပလက်ဖောင်း၏ အဖွဲ့ဝင်အဖြစ်မှ ဖယ်ထုတ်ခံခြင်း နှစ်ခုအနက် တစ်ခုကိုသာ ရွေးချယ်ရမည်ဖြစ်သည်။

​ယနေ့ခေတ်တွင် မျက်သူငယ်နှစ်ထပ်စနစ်သည် အလွန်အစွမ်းထက်ပြီး သီးခြားလည်ပတ်နိုင်သည်။ ဤစနစ်ကို မိမိ၏ Cloud စနစ်တွင် ထည့်သွင်းလိုပါက ဝန်ဆောင်ခ ပေးဆောင်ရသော်လည်း ထိုနှုန်းထားမှာ မများလှပေ။

ဥပမာအားဖြင့် အွန်လိုင်းဂိမ်းတစ်ခုအတွက် Cloud နည်းပညာဖြင့် အချက်အလက်ညှိနှိုင်းရာတွင် မျက်သူငယ်နှစ်ထပ်စနစ်ကို အသုံးပြုရန်အတွက် ယွမ် ၁၀,၀၀၀ ခန့်သာ ကျသင့်ရာ ၎င်းသည် အလွန်ပင် သက်သာလှသော နှုန်းထားဖြစ်သည်။

ယနေ့ခေတ် လူ့အဖွဲ့အစည်းတွင် ယွမ် ၁၀,၀၀၀ ဆိုသည်မှာ လက်ခံနိုင်သော ပမာဏ ဖြစ်သည်။

​သို့သော် ၎င်းတို့အား ပေးသုံးထားသည့် စနစ်မှာ မျက်သူငယ်နှစ်ထပ်စနစ် တစ်ခုလုံးတော့ မဟုတ်ပေ။

အကြောင်းမှာ အပြည့်အစုံတွင် အခြားသော အစွမ်းထက်သည့် လုပ်ဆောင်ချက်များစွာ ရှိနေသောကြောင့် ဖြစ်သည်။ ၎င်းတို့အား ခွင့်ပြုထားသည်မှာ လုံခြုံရေးစနစ်၏ အစိတ်အပိုင်းတစ်ခုဖြစ်သော အသွင်ဝှက်ခြင်းလုပ်ဆောင်ချက်မျှသာ ဖြစ်သည်။

ဤကဲ့သို့ ကန့်သတ်ချက်များစွာ ထားရှိရခြင်းမှာ အန္တရာယ်ကင်းသော ဂေဟစနစ်တစ်ခုကို ဖန်တီးရန်ဟူသော ပန်းတိုင်တစ်ခုတည်းအတွက် ဖြစ်သည်။

​နီဗားနားဖုန်းစီးရီး ဖုန်းများ ကျော်ကြားပြီး လူကြိုက်များရသည့် အကြောင်းရင်းတစ်ရပ်မှာ 'လုံခြုံရေး' ကြောင့် ဖြစ်သည်ဟု ဆိုရပေမည်။

ယနေ့ခေတ်တွင် မလုံခြုံမှုများလွန်းသဖြင့် ယုံကြည်မှုတည်ဆောက်ရန် ခက်ခဲနေချိန်တွင် လုံခြုံရေးကို အလေးထားသည့် နီဗားနားဖုန်းများသည် လူအများ၏ ချစ်ခင်နှစ်သက်မှုကို ရရှိနေခြင်း ဖြစ်သည်။

​"အင်း!"

​လင်းဖန်၏ ရှင်းပြချက်ကို ကြားရသည့်အခါ တက်ရောက်လာသော ကျိဖုပေါင်မှ အဆင့်မြင့်အရာရှိအားလုံး ခေါင်းငြိမ့် ထောက်ခံလိုက်ကြသည်။

အမှန်အတိုင်းဆိုရလျှင် ၎င်းတို့သည် ထမ်ရုံစနစ်၏ လုံခြုံရေး စွမ်းဆောင်ရည်အပေါ် အလွန် အကောင်းမြင်ထားကြသည်။

အကြောင်းမှာ ကျိဖုပေါင် ကုမ္ပဏီကိုယ်တိုင်က ထမ်ရုံစနစ်၏ လုံခြုံရေးအပေါ် အခြေခံ၍ တည်ဆောက်ထားခြင်းကြောင့် ဖြစ်သည်။ ၃ ဒီကုဒ်၏ လုံခြုံရေးပြဿနာ ပြေလည်သွားပြီဆိုပါက ကျန်ရှိသော ကိစ္စရပ်များမှာလည်း အဆင်ပြေသွားမည်ဟု အားလုံးက ယုံကြည်ကြသည်။

​"ခေတ်တွေက တိုးတက်ပြောင်းလဲနေတာပါ။"

​ထို့နောက်တွင် လင်းဖန်က ပိုမိုပြတ်သားစွာ ဆက်ပြောလိုက်သည်။ "ကျွန်တော်တို့ဟာ စမတ်ဖုန်းတွေကို အခြေခံပြီး ကိုယ့်ကိုယ်ကိုယ် ထပ်မံ ကျော်ဖြတ်ချင်ပါတယ်။ ဉာဏ်ရည်တု မိုဘိုင်းလက်ထောက်စနစ်နဲ့ ပူးပေါင်းပြီး ဂျီဖူးပေါင်ကို အသုံးပြုလိုက်တာနဲ့ တစ်စက္ကန့်အတွင်း စကင်ဖတ်မှု ပြီးမြောက်ရပါမယ်။ စနစ်တွေ အမြဲတမ်း အဆင့်မြှင့်တင်နေသလို စွမ်းဆောင်ရည်နဲ့ ဟာ့ဒ်ဝဲတွေကိုလည်း မြှင့်တင်နေတာမို့ နောက်ပိုင်းမှာ စကင်ဖတ်ချိန်ဟာ တစ်စက္ကန့်အောက်တောင် လျော့နည်းသွားနိုင်ပါတယ်။"

​"ကျိဖုပေါင်ရဲ့ နောက်ဆုံးပန်းတိုင်ကတော့ ခေတ်ကာလ တိုးတက်မှုနဲ့အညီ လူတွေရဲ့ ဘဝကို စမတ်ကျစေဖို့ပါပဲ။ ဖုန်းတစ်လုံးရှိရုံနဲ့ အလုပ်ရော၊ နေ့စဉ်ဘဝကိုပါ အလုံးစုံ လွှမ်းခြုံနိုင်ရမယ်။"

​"ဝါး!!!"

​ထိုစကားကြောင့် အစည်းအဝေးခန်းမရှိ လူတိုင်း၏ မျက်နှာအမူအရာများ ချက်ချင်း ပြောင်းလဲသွားခဲ့သည်။ ဤကဲ့သို့သော ရလဒ်မျိုးကို ၎င်းတို့ တစ်ခါမျှ မတွေးခဲ့ဖူးသလို၊ လုပ်ဆောင်ရန်လည်း မဝံ့ရဲခဲ့ကြပေ။ ပြည်မကြီးတွင် ဖုန်းတစ်လုံးရှိရုံဖြင့် ပစ္စည်းဝယ်ခြင်း၊ ဟိုတယ်တည်းခြင်း စသည့် ကိစ္စအဝဝကို ငွေသားမလိုဘဲ ဖြေရှင်းနိုင်နေပြီ ဖြစ်သော်လည်း၊ ကမ္ဘာ့စီးပွားရေးစနစ်များ ကွာခြားလွန်းလှသဖြင့် ယခုအချိန်အထိ အမေရိကန်ကဲ့သို့ အတိုးတက်ဆုံးနိုင်ငံပင်လျှင် ဤမျှအထိ မလုပ်ဆောင်နိုင်သေးပေ။

ဖုန်းတစ်လုံးတည်းဖြင့် ကမ္ဘာပတ်နိုင်ရန် မည်သူက မလိုလားဘဲ နေမည်နည်း။ သို့သော် ဤပန်းတိုင်ကို လူတိုင်း မအောင်မြင်နိုင်ကြသည်မှာ အမှန်ပင် ဖြစ်ပါတော့သည်။

..........................................................