အခန်း ၅၉

59 01

အခန်း 59 လှိုင်းလုံးထန်ချိန်

ယခုနှစ် ဒီဇင်ဘာလတွင် နန်းမြို့တော်၏ လေယူလေသိမ်းတို့သည် ရုတ်ခြည်းပြောင်းလဲ၍ ဒေါသထန်သော ပင်လယ်လှိုင်းလုံးတို့ပမာ ဂယက်ထလျက်ရှိ၏။

လ၏ အစပထမ တစ်ဝက်တွင်၊ ဦးစွာ တော်ဝင်ဦးရီးတော်သည် မည်သည့် ရှေ့ပြေးနိမိတ်မျှ မရှိဘဲ ပြဿနာပေါ်ခဲ့၏။ ညဉ့်အချိန်မတော်တွင် နန်းမြို့အပြင်ဘက်၊ သူ၏ အငယ် ဇနီးမယား ထားရှိရာ အဆောင်တွင် ဧကရာဇ်တပ်များဖြင့် လက်ပူးလက်ကြပ် ဖမ်းမိ၍ ချက်ချင်းပင် တော်ဝင်အကျဉ်းထောင်သို့ ပို့ဆောင်ခြင်း ခံရသည်။

ရက်အနည်းငယ်အကြာတွင် မယ်တော်ကြီးသည် မြို့တော်မှ နှင်ထုတ်ခံရပြီး အရှေ့မြောက်ဘက်ရှိ နန်းတွင်းဥယျာဉ်သို့ ပြောင်းရွှေ့နေထိုင်ရန်၊ မင်္ဂလာတရားများဖြင့် ချမ်းသာစွာနေရန်နှင့် မြေးများနှင့် ပျော်ရွှင်စွာ နေထိုင်ရန် စသည့် အမည်ခံများဖြင့် စေလွှတ်ခြင်း ခံရလေသည်။

မှူးမတ်အရာရှိ ဒါဇင်ပေါင်းများစွာတို့သည် ကျီချင်းနန်းတော်မုခ်ဝတွင် ဒူးထောက် တောင်းပန်ရန် ဝင်ရောက် လာကြသော်လည်း လမ်းခုလတ်၌ စာပေအမတ် မေဝမ့်ရှူးသည် မကျန်းမာသော အခြေအနေဖြင့် နန်းတော်သို့ အပြေးအလွှား ရောက်ရှိလာပြီး ၎င်းတို့အား တောင်းပန်ဖျောင်းဖျ၍ ဆုတ်ခွာစေခဲ့ရာ ထိုကိစ္စသည် မပြီးပြတ်ဘဲ အဆုံးသတ်ခဲ့ရလေသည်။

နန်းတွင်းနှင့် နန်းပြင်တွင်ကား ဧကရာဇ်နှင့် မိခင်ကြား မည်သို့သော အငြင်းပွားမှုများ ပေါ်ပေါက်ခဲ့ပြီး အဘယ်ကြောင့် ဤမျှ အခြေအနေ ဆိုးရွားလာရကြောင်း ဆွေးနွေးမှုများ ဆူညံလျက် ရှိကြ၏။

မထင်မှတ်ဘဲ မှူးမတ်တို့ ဒူးထောက်တောင်းပန်သော နေ့လယ်ပိုင်းတွင်ပင် ဧကရာဇ်တပ်သား ရာပေါင်းများစွာတို့သည် ဦးရီးတော်၏ ရုန်းအန်းအိမ်တော်ကို ဝိုင်းရံပိတ်ဆို့ပြီး၊ မယ်တော်ကြီး၏ မိဘမျိုးရိုး အဆက်အနွယ် တစ်စုလုံးကို ဖမ်းဆီးချုပ်နှောင်၍ အကျဉ်းထောင်သို့ ပို့ဆောင်ခဲ့လေသည်။

နောက်တစ်နေ့ ညဉ့်နက်ပိုင်းတွင် ဧကရာဇ်တပ်သားများသည် မြို့တောင်ပိုင်းရှိ ဟွေးယန်လမ်းကျဉ်းသို့ ညတွင်းချင်း ဝင်ရောက်၍ တံခါးကို ဖျက်ဆီးကာ၊ အိပ်စက်နေပြီ ဖြစ်သော ဓလေ့ထုံးတမ်းဝန်ကြီး ယဲ့ချန်ကော်ကို မေးမြန်းစစ်ဆေးရန် ခေါ်ဆောင်သွားခဲ့သည်။

တတိယမြောက်နေ့ နံနက်စောစောတွင် ဧကရာဇ်တပ်သားများသည် ထပ်မံထွက်ခွာ၍ မြို့အရှေ့ပိုင်းရှိ မေအိမ်တော်ကို ဝိုင်းရံခဲ့ကြ၏။

တပ်သားများကို ဦးဆောင်၍ တံခါးဝသို့ ရောက်ရှိလာသူမှာ အခြားသူမဟုတ်၊ မေဝမ့်ရှူး ဆယ်နှစ်နီးပါး သိကျွမ်းခဲ့သော အကျွမ်းတဝင်ရှိသူ၊ နန်းတော်စစ်သည်တော်များ၏ စစ်သူကြီး ချီကျန့်ဟန်ပင် ဖြစ်သည်။

ထိုအချိန်က နေထွက်သည်မှာ မကြာသေးဘဲ မေဝမ့်ရှူးသည် အိပ်ရာမှ ထကာ မျက်နှာသစ်ပြီးစီး၍ အိမ်ထဲတွင် နံနက်စာ ဆန်ပြုတ် သောက်နေစဉ်၊ အိမ်ဝင်းတံခါးကို ဧကရာဇ်တပ်သားများ လာရောက်ခေါက်ခြင်း ဖြစ်သည်။

ချီကျန့်ဟန်သည် အပြည့်အစုံဝတ်စုံနှင့် မေအိမ်တော် အလယ်ဗဟိုတွင် ရပ်လျက်၊ မျက်နှာတစ်ခုလုံး ရှက်ရွံ့နေဟန်ဖြင့် လက်သီးအုပ်မိုးကာ လျှောက်တင်လေသည်။ “ပညာရှင်အမတ်မင်း... စော်ကားမိပါတယ် ကျွန်တော်က တာဝန်အရ ရောက်လာရတာ ဖြစ်ပြီး တခြားရွေးချယ်ဖို့ မရှိပါဘူး”

မေဝမ့်ရှူးသည်ကား အလွန်ပင် တည်ငြိမ်အေးချမ်းလျက် တူများကို ချ၍ လက်ကို သုတ်လိုက်သည်။

“ညတုန်းက ကျွန်တော့် ဆရာ အိမ်တော် ဖျက်စီးပြီး အဝိုင်းခံရသည်ကို ကြားရတော့ ဒီနေ့ ကျွန်တော့်အိမ်တော်အလှည့် ဆိုပြီး တွေးထင်မိပြီးသားပါ”

ချီကျန့်ဟန်သည် အံ့အားသင့်လျက် ချက်ချင်းပင် ရှင်းလင်းတင်ပြသည်။

59 02

“ပညာရှင်အမတ်မင်းကို ဘယ်သူက မှားယွင်းပြောဆိုတာကို မသိပါဘူး။ ညတုန်းက ယဲ့အမတ်မင်းအိမ်တော်ကို ကျွန်တော်ကိုယ်တိုင် ဦးဆောင်ပြီး လူတွေကို သွားခေါ်ခဲ့တာပါ။ သက်သေတချို့ကိုသာ ရရှိခဲ့တာပါ။ ယဲ့အမတ်ကြီးကို မေးမြန်းဖို့ ခေါ်သွားရုံလေးပါ။ အိမ်ကိုလည်း မဖျက်ဆီးသလို ဖမ်းဆီးတာလည်း မဟုတ်ပါဘူး။ မေပညာရှိအမတ်အနေနဲ့ ကောလာဟလတွေကို မယုံပါနဲ့”

မေဝမ့်ရှူးသည် အနည်းငယ် ပြုံးပြပြီးနောက် ဇွန်းကို ပြန်ကောက်ယူကာ ဆန်ပြုတ်ကြည်ကို ဖြည်းညှင်းစွာ ခပ်မွှေလိုက်သည်။

“အကယ်၍ ကောလာဟလတွေပဲ ဖြစ်ပြီး အိမ်ဖျက်တာ၊ ဖမ်းဆီးတာ မဟုတ်ဘူးဆိုရင် ကျွန်တော် စိတ်အေးရပြီ။ စစ်သူကြီးချီ... ကျွန်တော် မေးပါရစေဦး။ ကျွန်တော့်ရဲ့ဆရာက ဘယ်လို အမှုကိစ္စကို ကျူးလွန်ခဲ့လို့လဲ၊ သုံးခေတ်တောင် အမှုထမ်းခဲ့တဲ့ အကြီးအကဲတစ်ယောက်ကို ညဉ့်အိပ်၍တောင် ကောင်းကောင်း မအိပ်စက်နိုင်စေဘဲ ဧကရာဇ်တပ်သားတွေက ညအချိန်မတော် လာခေါ်ပြီး စစ်ဆေးမေးမြန်းရတာလဲ”

ချီကျန့်ဟန်က အခက်တွေ့တဲ့ပုံစံနှင့် ဆိုလိုက်သည်။ “ယဲ့အမတ်မင်းက... ကြီးလေးတဲ့ အမှုမှာ ပါဝင်ပတ်သက်နေပါတယ်။ အဲဒါက ဦးရီးတော်ဟယ်ရဲ့ အမှုနဲ့ ဆက်စပ်နေပါတယ်”

“အခြေအမြစ်မရှိတဲ့ စကားပဲ” မေဝမ့်ရှူးက အေးစက်သော အမူအရာဖြင့် ဇွန်းကို ပန်းကန်ထဲ ပစ်ချလိုက်တော့ တိန်ခနဲ မြည်သံ ထွက်လာသည်။

“ဆရာက အမတ်အရာရှိ ဘဝတစ်လျှောက်လုံး ဖြောင့်မတ်သန့်ရှင်းစွာ ကျင့်ကြံခဲ့ပြီး ဂုဏ်သိက္ခာကို အလေးထားသူပါ။ အပြင်ဘက်က ဆွေမျိုးတော်စပ်တဲ့ အာဏာရှိသူတွေနဲ့တောင် နီးနီးကပ်ကပ် မပေါင်းသင်းခဲ့ဘူး။ ဦးရီးတော်ဟယ်က ဆရာရဲ့မျက်နှာကိုတောင် မြင်ဖူးတာ မဟုတ်ဘူး။ ဘယ်လို အမှုမှာ ပတ်သက်နိုင်မှာလဲ။ စစ်သူကြီးချီ... ပိုကောင်းတဲ့ အကြောင်းပြချက်ကို ရှာသင့်ပါတယ်”

မေဝမ့်ရှူးသည် လူအများအား အမြဲတစေ နူးညံ့သိမ်မွေ့သော သဘောထားဖြင့် ဆက်ဆံလေ့ရှိသူဖြစ်ရာ၊ ရုတ်တရက် အေးစက်သော အသွင်အပြင်သို့ ပြောင်းလဲလိုက်ပြီး၊ သူမ၏ လေသံတွင် ပြောင်လှောင်သံများ ပါဝင်လာခဲ့သည်။ ချီကျန့်ဟန်သည် သူမနှင့် နှစ်ပေါင်းများစွာ သိကျွမ်းလာခဲ့သော်လည်း ဤမျှ အေးစက်စွာ ဆက်ဆံခံရခြင်းမျိုး မရှိခဲ့ဖူးပေ။ မျက်နှာချင်းဆိုင် ဆဲဆိုခံရခြင်းထက်ပင် ပိုမိုခံရခက်လှပေသည်။

ခဏချင်းတွင် စစ်သူကြီးချီသည် ကျောရိုးများပင် ချမ်းစိမ့်သွားအောင် ခံစားခဲ့ရပြီး၊ ဤကဲ့သို့သော ကံဆိုးသည့် တာဝန်ကို မိမိ အဘယ်ကြောင့် ယူခဲ့ရပါသနည်းဟု စိတ်ထဲမှ ကျိန်ဆဲမိလေသည်။

ချီကျန့်ဟန်သည် မရှုနိုင် မကယ်နိုင် ပုံစံဖြင့် ခေါင်းမာမာ ဆက်လက် ရှင်းပြလေသည်။

“ဦးရီးတော်ရဲ့ပြစ်မှုက အရမ်း ကြီးလေးလွန်းလို့ ဒီနေရာမှာ ပြောပြဖို့ မသင့်တော်ပါဘူး။ အတိုချုပ်ပြောရရင်၊ ဟယ်မိသားစု တစ်စုလုံး၊ ဟယ်အဘွားအိုကစလို့ ဦးရီးတော်တို့ ဇနီးမောင်နှံ၊ သူ့ရဲ့ အဆက်အနွယ် ညီအစ်ကို မောင်နှမ မြေးမြစ်တွေ အပါအဝင် လူပေါင်း နှစ်ရာကျော်ကို ဖမ်းပြီး အကျဉ်းချထားပါတယ်။ မေးမြန်းစစ်ဆေးရင်းနဲ့ မထင်မှတ်တဲ့ အချက်အလက်တချို့ကို ရခဲ့ပါတယ်”

59 03

“မယ်တော်ကြီးက နန်ဟယ်ခရိုင်မင်းသမီးဖြစ်တဲ့ သူ့ရဲ့တူမအရင်းကို အရမ်းချစ်ပါတယ်။ ဟယ်အဘွားအိုနဲ့ တိတ်တဆိတ် တိုင်ပင်ပြီး နန်ဟယ်မင်းသမီးကို ဧကရီအဖြစ် ရွေးချယ်ဖို့ ရည်ရွယ် ထားခဲ့ပါတယ်။ လွန်ခဲ့တဲ့ တစ်လ၊ နှစ်လလောက်က ဓလေ့ထုံးတမ်းဝန်ကြီးဌာနက အမတ်ကြီးတွေက ဧကရီကို ရွေးချယ်ပြီး စာတင်ဖို့ စီစဉ်နေမှန်း သိတော့၊ မယ်တော်ကြီးက လူလွှတ်ပြီး အမတ်မင်းယဲ့ကို ခေါ်ယူစေကာ၊ နှစ်ယောက်သား လျှို့ဝှက်စွာ ဆွေးနွေးခဲ့ကြပါတယ်”

မေဝမ့်ရှူး အနည်းငယ် အံ့အားသင့်သွားပြီး မျက်လုံးတွေ မော့ကြည့်လိုက်တယ်။

“ဆရာ ဘာပြောခဲ့ပါလဲ”

“အမတ်မင်းယဲ့က မယ်တော်ကြီးက သူ့ကို သီးသန့်မေးမြန်းခဲ့တာကို ဝန်ခံခဲ့ပါတယ်။ နန်ဟယ်မင်းသမီးကို ဧကရီ ရွေးချယ်မဲ့ စာရင်းထဲ ထည့်သွင်းနိုင်ခြင်း ရှိ၊ မရှိ မေးမြန်းခဲ့ပါတယ်။ အမတ်မင်းယဲ့က အဲဒီအချိန်မှာ နန်ဟယ်မင်းသမီးဟာ ရုပ်ရည်၊ မျိုးရိုး၊ အသက် စတဲ့ ရွေးချယ်ခံရမဲ့ သတ်မှတ်ချက်တွေနဲ့ ကိုက်ညီကြောင်း မယ်တော်ကြီးကို လျှောက်တင်ခဲ့ပါတယ်”

မေဝမ့်ရှူးက ခဏစဉ်းစားပြီး ဆိုသည်။ “ဆရာရဲ့ အဖြေက လုပ်ထုံးလုပ်နည်းအတိုင်းပဲ ဖြစ်လို့ မှားယွင်းမှု မရှိဘူး”

ချီကျန့်ဟန်က သက်ပြင်းချရင်း ဆိုသည်။ “မသင့်တော်ပါဘူး။ လုံးဝ မသင့်လျော်ပါဘူး။ ဒီလို အခြေအနေမျိုးမှာ ဟယ်မိသားစုနဲ့ ပတ်သက်တဲ့ လူနဲ့ ကိစ္စအားလုံးက လုံးဝ မသင့်လျော်ပါဘူး”

သူသည် ဘယ်ညာ မရွေးချယ်နိုင်သည့် အခြေအနေမျိုးနှင့် ရင်ဆိုင်နေရသည်။ “ပညာရှင်အမတ်မင်း ကြည့်ပါဦး။ ဦးရီးတော်ရဲ့ အမှုက အမတ်မင်းယဲ့အထိ ပတ်သက်လာတယ်။ ဧကရာဇ်တပ်သားတွေဟာ တစ်ညလုံး မအိပ်ဘဲ ယဲ့အိမ်တော်ကို ရှာဖွေခဲ့ကြတော့ အမတ်မင်းယဲ့နဲ့ ပညာရှင်အမတ်မင်းတို့ရဲ့ ပေါင်းသင်းဆက်ဆံရေးက နက်ရှိုင်းလွန်းလို့၊ စာကြည့်တိုက်က ပညာရှင်အမတ်မင်းနဲ့ အပြန်အလှန် ပေးပို့ခဲ့တဲ့ စာများစွာကို တွေ့ရှိခဲ့ရပါတယ်။ အဲဒါကပဲ ပညာရှင်အမတ်မင်းကိုပါ ဒုက္ခရောက်စေခဲ့တယ်”

ဒီနေရာရောက်တော့ ချီကျန့်ဟန်ဟာ သတ္တိကို မွေးပြီး လက်သီးအုပ်မိုးကာ ပြောလိုက်သည်။ “အမိန့်အရ ကျွန်တော်ဟာ အိမ်တော်ထဲ ဝင်ရောက် ရှာဖွေစစ်ဆေးရမှာ ဖြစ်လို့၊ စော်ကားမိတာကို နားလည်ပေးပါ”

ထိုသို့ဆိုပြီးနောက် ချီကျန့်ဟန်သည် အနည်းငယ် နောက်သို့ ဆုတ်လိုက်ကာ၊ အနောက်ဘက်သို့ လက်ဝှေ့ယမ်းပြလိုက်သည်။

နောက်လိုက် တပ်သား ရာပေါင်းများစွာတို့သည် ဝံပုလွေနှင့် ကျားတို့ပမာ အပြေးအလွှားပင် အိမ်ဝင်းရှိ ဘယ်ညာနှစ်ဖက်ရှိ အခန်းများထဲသို့ ဝင်ရောက်ကာ၊ သေတ္တာများနှင့် ဗီရိုများကို ဖွင့်လှန် ရှာဖွေစစ်ဆေးကြလေသည်။

မေဝမ့်ရှူး၏ အကြည့်များသည် ပတ်ဝန်းကျင်တွင် အလုပ်ရှုပ်နေသော ဧကရာဇ်တပ်သားများထံ ကျရောက်နေ၏။

59 04

ဤအချိန်တွင် သူမသည် အိမ်မကြီးထဲတွင် ထိုင်နေသည်။ သူမ၏ ရာထူး ဂုဏ်ပုဒ်ကြောင့် တပ်သားများသည် ဘယ်ညာ အခန်းနှစ်ဖက်ကိုသာ ရှာဖွေဆဲဖြစ်သည်။ သို့သော် ခဏကြာပြီးနောက် အခန်းများကို ရှာဖွေပြီးပါက ပင်မအိမ်တော်ကိုပါ ရှာဖွေလိမ့်မည်ဟု သူမ စိုးရိမ်မိသည်။

သူမ၏ ပင်မအိမ်တော်ကို သခင်သည် တိတ်ဆိတ်ငြိမ်သက်ခြင်းကို နှစ်သက်သူ ဟူသော အမည်နာမဖြင့် အစေခံများအား လွယ်ကူစွာ ဝင်ခွင့်မပြုခဲ့ပေ။ အိမ်ပြင်တွင် တံမြက်စည်းလှည်း၊ သန့်ရှင်းရေးလုပ်သော အစေခံများပင်လျှင် ယန်ရန်၏ ကြီးကြပ်မှုအောက်တွင်သာ လုပ်ဆောင်ခဲ့ရသည်။ အိမ်မကြီးထဲသို့ ဝင်နိုင်သူသည်ကား ယန်ရန်နှင့် ချန်ပေါ်သာ ရှိသည်။

အရေးကြီးသော ပစ္စည်းအချို့၊ ဥပမာအားဖြင့်... ရှင်းယိနင်က သူမအား လစဉ် သောက်ရန် ပေးထားသော ဆေးဝါးများ၊ အလင်းရောင် မထိတွေ့သင့်သော အမျိုးသမီး အသုံးအဆောင်များ၊ မွေးရပ်မြေရွာမှ ပေးပို့သော စာများ... အားလုံးကို အိမ်မကြီးထဲတွင် သိမ်းဆည်းထားသည်။

ထိုအချိန်တွင် စိတ်ထဲ၌ အတွေးများ လျှပ်တစ်ပြက် ပြောင်းလဲသွားစဉ်၊ အလျင်စလို ခြေသံများကို ကြားလိုက်ရရာ၊ ယန်ရန်သည် သတင်းကြားသဖြင့် အိမ်ထဲသို့ အပြေးအလွှား ဝင်လာခဲ့သည်။

++++++