အခန်း ၃၀၉

အခန်း (၃၀၉)

" ချင်က စစ်စခန်းနှစ်ခုကို စေလွှတ်ထားပြီးစုစုပေါင်းအင်အား ရှစ်သိန်းနီးပါးရှိတယ်။ တကယ်လို့ ငါတို့က ဟဲလျိုမြို့ကို စွန့် ျှတ်ပြီး အဲ့ဒီစစ်သည်နှစ်သိန်းကိုပြန်ဆုတ်ခိုင်းလိုက်ရင် ငါတို့ တလျန်မြို့တော်က အသစ်ဖွဲ့စည်းထားတဲ့ ဝူအန်းစခန်းအပြင် ဟန်ကုစခန်းကိုလည်း ရင်ဆိုင်ရလိမ့်မယ်။ " ဝေဝူကျိက ပြတ်သားစွာ ပြောလိုက်သည်။

" ငါ ဘယ်လောက်ပဲ ပြင်ဆင်ထားပါစေ။ တလျန်မြို့တစ်ခုတည်းက စစ်သည်ရှစ်သိန်းရဲ့ တိုက်ခိုက်မှုကို မခံနိုင်ဘူး။ ဟဲလျိုမြို့ရဲ့ ခံစစ်ကို ရုတ်သိမ်းလို့မရဘူး။ "

လက်ရှိစစ်မြေပြင်က အခက်အခဲများ ရှိနေသော်လည်း ဟဲလျိုမြို့မှ စစ်တပ်ကို ပြန်ခေါ်လိုက်လျှင် ၎င်းက ကြီးမားသော ကပ်ဘေးတစ်ခု ဖြစ်သွားပေလိမ့်မည်။

" ကျွန်တော်နားလည်ပါပြီ။ " ဝန်ကြီးက ချက်​ချင်း နောက်ဆုတ်သွားသည်။

" ချီနဲ့ယန်တို့က စောင့်ကြည့်နေကြပေမယ့် ငါတို့ ဝေက အကူအညီတောင်းတာကို ရပ်တန့်လို့မရဘူး။ ငါ့အမိန့်ကို ထုတ်ပြန်လိုက်။ ချီနဲ့ယန်ကို သံတမန်တွေ စေလွှတ်ပြီး စစ်ရေးအကူအညီတောင်းခံစေ။ " ဝေဝူကျိက လေးနက်စွာ ပြောလိုက်သည်။

" အမိန့်အတိုင်းပါ။ " ဝန်ကြီးတစ်ယောက်က ပြန်ပြောလိုက်သည်။

" သတင်းပို့ပါတယ်။ ချူနိုင်ငံက အရေးပေါ်သတင်းရောက်လာပါတယ်။ " သတင်းပို့သူက ခန်းမအတွင်းသို့ အပြေးအလွှား ရောက်လာသည်။

ချူနိုင်ငံက အရေးပေါ်သတင်းဟု ကြားလိုက်ရသောအခါ ဝန်ကြီးများ၏ မျက်လုံးများက တောက်ပသွားကြသည်။

" မြန်မြန် ယူလာခဲ့။ " ဝေဝူကျိက ချက်ချင်း ပြောလိုက်သည်။

သတင်းပို့သူက ချက်ချင်း လာပြီး အရေးပေါ်အစီရင်ခံစာကို တင်ပြလိုက်သည်။ ဝေဝူကျိက တံဆိပ်ခတ်ထားသော စာကို ဖွင့်ဖတ်ကြည့်လိုက်သောအခါ သူ၏ မျက်နှာက ချက်ချင်း ဖြူဖျော့သွားပြီး သူ၏ ခြေထောက်များက တုန်ယင်သွားသည်။

" အရှင် " ဝန်ကြီးတစ်ယောက်က အပြေးအလွှားရောက်လာပြီး ဝေဝူကျိကို ထိန်းပေးလိုက်သည်။

" ဦးရီးတော် ဘာဖြစ်လို့လဲ။ " ဝေဘုရင်က စိုးရိမ်တကြီး ပြောလိုက်သည်။

" ချွန်းရှန်ကျွမ်းသေပြီ။ လီယွမ်က သတ်လိုက်တာပဲ။ " ဝေဝူကျိက တုန်ယင်နေသော အသံဖြင့် ပြောလိုက်သည်။ " ချူဘုရင်နဲ့ ကိုယ်​လုပ်တော်တွေ သားသမီးတွေအားလုံးကိုလည်း လီယွမ်က သတ်ပစ်လိုက်တယ်။ ချူနိုင်ငံမှာ အကြီးအကျယ် ​ပြောင်းလဲသွားပြီ။ "

ညီလာခံမှ ဝန်ကြီးများအားလုံးက မိုးကြိုးပစ်ခံလိုက်ရသကဲ့သို့ ခံစားလိုက်ရသည်။ ချူနိုင်ငံက ဖရိုဖရဲဖြစ်နေပြီဖြစ်သောကြောင့် ချင်ကို တိုက်ခိုက်ရန် မဖြစ်နိုင်တော့ပေ။ ချူနိုင်ငံ၏ ပြည်တွင်းမငြိမ်သက်မှုများကို အပြီးတိုင် ဖိနှိပ်ရန် အနည်းဆုံး တစ်နှစ်ကျော် ကြာမြင့်ပေလိမ့်မည်။

ပထမဆုံးအနေဖြင့် ဟွမ်ရှဲ၏ အာဏာများက လီယွမ်၏ ထိန်းချုပ်မှုအောက်သို့ တဖြည်းဖြည်း ရောက်လာရမည်ဖြစ်ပြီး ဟွမ်ရှဲအပေါ် သစ္စာစောင့်သိသူများကို နှိမ်နင်းရပေလိမ့်မည်။ ထို့အပြင် ချူတော်ဝင်မိသားစုက သေဆုံးကုန်ပြီဖြစ်သောကြောင့် လီယွမ်က ဘုရင်အသစ်ကို နန်းတင်ရပေလိမ့်မည်။

" ဦးရီးတော် ကျုပ်တို့ ဘာလုပ်ကြမလဲ။ ချူနိုင်ငံက ဖရိုဖရဲဖြစ်နေပြီ​ဆိုတော့ ကျွန်တော်တို့ ဝေနိုင်ငံကို ထိန်းသိမ်းထားနိုင်ပါဦးမလား။ " ဝေဘုရင်က စိုးရိမ်စွာဖြင့် မေးလိုက်သည်။

" ချင် တကယ်ကို ကျွမ်းကျင်တဲ့ နည်းလမ်းတွေပါလား။ " ဝေဝူကျိက တုန်ယင်နေသော အသံဖြင့် ပြောလိုက်သည်။

ချူနိုင်ငံ၏ ရုတ်တရက် ပြောင်းလဲမှုက ချင်၏ ကြိုးကိုင်မှုကြောင့် ဖြစ်သည်မှာ ထင်ရှားနေသည်။

" အရှင်မင်းကြီး ချင်ဆီမှာ အညံ့ခံချင်လား။ " ဝေဝူကျိက ဝေဘုရင်ကို လှည့်ကြည့်ပြီး မေးလိုက်သည်။

ထိုမေးခွန်းက ဝေဘုရင်၏ စိတ်ကို တိုက်ရိုက်ထိုးနှက်သွားခဲ့သည်။ သို့သော် ခဏအတွင်း ဝေဘုရင်က ချက်ချင်း ထရပ်ပြီး ကျယ်လောင်စွာ ပြောလိုက်သည်။ " ငါတို့ ဝေရဲ့ ရာစုနှစ်ရှိတဲ့ တောင်တန်းတွေနဲ့ မြစ်ချောင်းတွေ၊ ငါက တော်ဝင်မိသားစုရဲ့ သွေးမျိုးဆက်ဖြစ်တယ်။ ငါ ဘယ်တော့မှ အရှုံးမပေးဘူး။ "

ဝေဝူကျိ၏ မျက်နှာတွင် စိတ်သက်သာရာကသော အရိပ်အယောင်တစ်ခု ပေါ်လာသည်။

" ဒါက ဝေဘုရင်ပဲ။ ဒီလူအိုကြီးက အရှင်မင်းကြီးအတွက် ဂုဏ်ယူပါတယ်။ ကျွန်တော်မျိုးက အရှင်မင်းကြီးနဲ့အတူ အသေခံသွားပါမယ်။ " ဝေဝူကျိက ဝေဘုရင်ကို ဥိးညွှတ်လိုက်သည်။

" ကျွန်တော်မျိုးတို့ ဝေနိုင်ငံနဲ့အတူ အသေခံသွားပါမယ်။ " ဝေအပေါ် သစ္စာရှိသော ဝန်ကြီးများက တစ်ယောက်ပြီးတစ်ယောက် ဦးညွှတ်လိုက်ကြသည်။

" ကောင်းပြီ။ ဝန်ကြီးတို့ ငါမင်းတို့နဲ့အတူ ချင်ကို ရင်ဆိုင်သွားမယ်။ ချင်က ဝေနိုင်ငံကို ဖျက်ဆီးဖို့ ကြိုးစားနေတယ်။ ဒါပေမယ့် ငါကတော့ ချင်ကို ကြီးမားတဲ့ ဆုံးရှုံးမှုတွေ ဖြစ်စေဖို့ ရည်ရွယ်ထားတယ်။ " ဝေဝူကျိက အေးစက်စွာ ပြောလိုက်သည်။

ရှန်းယန်မြို့တော်၊ ညီလာခံခန်းမ။

" အရှင်မင်းကြီး ချူနိုင်ငံက သတင်းကောင်းရှိပါတယ်။ ဟွမ်ရှဲက လီယွမ်ရဲ့ သတ်ဖြတ်ခြင်း ခံလိုက်ရပါပြီ။ လီယွမ်က ချူဘုရင်က ဟွမ်ရှဲရဲ့ တရားမဝင်ကလေးဖြစ်တယ်ဆိုတဲ့ အကြောင်းပြချက်နဲ့ ချူဘုရင်ရဲ့ မိသားစုတစ်ခုလုံးကို သုတ်သင်ပစ်လိုက်ပါတယ်။ အခုချိန်မှာ ချူနိုင်ငံက ဖရိုဖရဲဖြစ်နေပါပြီ။ " ဝမ်ဝမ်က စိတ်လှုပ်ရှားစွာ ပြောလိုက်သည်။

သတင်းကို ကြားလိုက်ရသောအခါ ဝန်ကြီးများအားလုံးက အလွန်ဝမ်းသာသွားကြသည်။

" ဟားဟားဟား ချူနိုင်ငံသံတမန်က ချင်ကို စစ်ကြေညာမယ်လို့ ကြွားလုံးထုတ်ခဲ့တာ အခု ဘာတတ်နိုင်သေးလဲ။ "

" ဟွမ်ရှဲက တကယ်ကို ​ဗိုလ်ကျလွန်းတယ်။ သူ့ရဲ့ နောက်လိုက်လက်ထဲမှာ သေရလိမ့်မယ်လို့ ဘယ်သူက ထင်ထားမှာလဲ။ "

" ချူနိုင်ငံက ဖရိုဖရဲ ဖြစ်နေတော့ အခြားဘယ်နိုင်ငံတွေက ချင်ကို ဆန့်ကျင်ရဲဦးမှာလဲ။ ဝေကို ကူညီမယ့်သူလည်း မရှိတော့ဘူး။ "

ညီလာခံတစ်ခုလုံး ပျော်ရွှင်စွာ အော်ဟစ်သံများက ထွက်ပေါ်လာသည်။ သို့သော် ပလ္လင်ပေါ်တွင် ထိုင်နေသော ရင်ကျန့်က တည်ငြိမ်စွာ ရှိနေသည်။ သူက ထိုသတင်းကို ကြိုတင်ရရှိထားသည်မှာ ထင်ရှားသည်။ ထို့အပြင် ဟွမ်ရှဲနှင့် ပက်သက်သော ဖြစ်ရပ်က သူ၏ အမိန့်အရ ဟေးပင်းထိုင်မှ လုပ်ဆောင်ခဲ့ခြင်းဖြစ်သည်။

ရင်ကျန့်က လက်မြှောက်လိုက်ပြီး ညီလာခံတစ်ခုလုံးက တိတ်ဆိတ်သွားသည်။ " ချူနိုင်ငံက ဖရိုဖရဲ ဖြစ်နေပြီ။ အချိန်တိုအတွင်း သူတို့က ချင်ကို တိုက်ခိုက်နိုင်တော့မှာ မဟုတ်ဘူး။ ချူနိုင်ငံအတွက် စိုးရိမ်စရာ မလိုတော့ဘူး။ အခု အ‌ရေးကြီးဆုံးက ဝေနိုင်ငံပဲ။ "

" အရှင်မင်းကြီး စစ်သေနာပတိချုပ်ဟွမ်ယိက ဟဲလျိုမြို့ကို ထိုးဖောက်နိုင်ခဲ့ပါပြီ။ " ဝမ်ဝမ်က ကျယ်လောင်စွာ ပြောလိုက်သည်။ " ဟဲလျိုမြို့ကို ထိုးဖောက်နိုင်ခဲ့ပြီဆိုတော့ ဝေဝူကျိ တည်ဆောက်ထားတဲ့ ခံစစ်စည်းနှစ်ခုလုံးက ပြိုလဲသွားပါပြီ။ ဝေနိုင်ငံက ပျက်စီးဖို့ သေချာနေပါပြီ။ "

" မှန်ပါတယ်။ အခုဆိုရင် ဝေနိုင်ငံက ချင်ကို ဆက်ပြီး တားဆီးနိုင်စွမ်းမရှိတော့ပါဘူး။ ဝေနိုင်ငံက နောက်ထပ်နှစ်ဝက်အတွင်း ဝေနိုင်ငံက သေချာပေါက် ကျဆုံးပါလိမ့်မယ်။ ဟန်ကုစခန်းက နှစ်ပတ်အတွင်း စစ်သည်နှစ်သိန်းကျော် ကာကွယ်ထားတဲ့ ဟဲလျိုမြို့ကို ထိုးဖောက်နိုင်ခဲ့တယ်။ "

ဝန်ကြီးများက ထောက်ခံပြောဆိုလိုက်ကြသည်။

" အင်း " ရင်ကျန့်က ခေါင်းညိမ့်လိုက်ပြီး သူ၏ အမူအရာက တည်ငြိမ်နေသည်။

ဟန်ကုစခန်းက အောင်မြင်မှုရခဲ့သော်လည်း ဝူအန်းစခန်းနှင့်ယှဉ်လျှင် အလွန်နောက်ကျနေဆဲ ဖြစ်သည်။ ဝမ်ဝမ်နှင့် အခြားသူများ၏ မြှောက်ပင့်ပြောဆိုမှုများကို ရင်ကျန့်က တုန်လှုပ်ခြင်းမရှိပေ။

" ဝေနိုင်ငံမှာ အကူအညီမရှိတော့လို့ စစ်သေနာပတိချုပ်ဟွမ်ယိကို အစီအစဉ်တကျ ရှေ့ဆက်ဖို့နဲ့ အဆင်​အခြင်မဲ့ ရှေ့တိုးတာမျိုးမလုပ်ဖို့ ပြောလိုက်ပါ။ " ရင်ကျန့်က တည်ငြိမ်စွာ ပြောလိုက်သည်။

" အမိန့်အတိုင်းပါ။ "ယွီလျောင်က ချက်ချင်း ပြန်ပြောလိုက်သည်။

ညီလာခံပြီးဆုံးပြီးနောက် ကျန်းထိုင်နန်းဆောင်ထဲတွင်။

" အရှင်မင်းကြီး ဟေးပင်းထိုင်က လျို့ဝှက်အစောင့်တွေက ချူနိုင်ငံမှာ ရှိနေပါတယ်။ ဒီလိုမငြိမ်မသက်ဖြစ်တာကို အခွင့်ကောင်းယူပြီး သူတို့ရဲ့ စစ်ရေးဖြန့်ကျက်မှုတွေ ရိက္ခါဖြန့်ဝေမှုနွေကို ဟေးပင်းထိုင်က ရယူနိုင်ပါလိမ့်မယ်။ " သွမ်လောက ရိုသေစွာ ပြောလိုက်သည်။

" မင်း ကောင်းကောင်းလုပ်နိုင်ခဲ့တယ်။ ဟွမ်ရှဲသေသွားပြီဖြစ်လို့ ချူနိုင်ငံက ဖရိုဖရဲဖြစ်သွားပြီ။ ဒါကြောင့် ချင်က နောက်ထပ်စစ်မျက်နှာတစ်ခု ဖွင့်စရာမလိုတော့ဘူး။ "ရင်ကျန့်က ကျေနပ်စွာ ခေါင်းညိမ့်လိုက်သည်။

ချင်က ချူ၏ ကျူးကျော်မှုကို တုန့်ပြန်ရန် နိုင်ငံတော်အင်အားရှိသော်လည်း ဟွမ်ရှဲမသေခဲ့လျှင် သူက ချူ၏ အင်အားအလုံးအရင်းကို စုစည်းပြီး တိုက်ခိုက်နိုင်သောကြောင့် ချင်က အကျပ်အတည်းထဲ ကျရောက်သွားနိုင်သည်။ ဟွမ်ရှဲသေဆုံးသွားခြင်းကြောင့် အရာအားလုံး ပြေလည်သွားခဲ့သည်။

" အရှင်မင်းကြီး ချူနိုင်ငံက နိုင်ငံအင်အား ဆုတ်ယုတ်သွားပါပြီ။ လီယွမ်က အာဏာကို ရယူလိုက်ရင်တောင် ချူနိုင်ငံရဲ့ အင်အားက ဟွမ်ရှဲလက်ထက်တုန်းကလို ပြန်မဖြစ်နိုင်တော့ပါဘူး။ ဒါက ခဲတစ်လုံးနဲ့ ငှက်နှစ်ကောင်ကို ပစ်လိုက်တာပါပဲ။ " သွမ်လောက ပြောလိုက်သည်။

" ချူရဲ့ ကိစ္စတွေ ပြေလည်သွားပြီဆိုတော့ ဟေးပင်းထိုင်က ဝေစစ်မြေပြင်ကို အာရုံစိုက်ထား။ ဝေရဲ့ စစ်သူကြီးတွေနဲ့ ထောက်ပို့တာဝန်ခံတွေကို ဖြစ်နိုင်ရင် ဖယ်ရှားပစ်ပါ။ ဝေမှာ ပိုပြီးဖရိုဖရဲဖြစ်အောင် နည်းလမ်းမျိုးစုံသုံးပါ။ " ရင်ကျန့်က အေးစက်စွာ ပြောလိုက်သည်။

" အမိန့်အတိုင်းပါ။ "သွမ်လောက ဦးညွှတ်ပြီး ထွက်ခွာသွားသည်။

ထိုအချိန်တွင်

" အရှင်မင်းကြီး သမားတော်ရှ ရောက်လာပါပြီ။ " ကျောက်ကောင်းက ရိုသေစွာ ပြောလိုက်သည်။

" အခု အားလုံး ထွက်သွားကြ။ ငါ့အမိန့်မရှိဘဲ ဘယ်သူမှမဝင်စေနဲ့။ သမားတော်ရှကိုလည်း ဝင်ခိုင်းလိုက်။ " ရင်ကျန့်က အမိန့်ပေးလိုက်သည်။

" အမိန့်အတိုင်းပါ။ " ကျောက်ကောင်းက ဦးညွှတ်ပြီး ဆုတ်ခွာသွားသည်။

ခဏကြာသောအခါ ရှဝူချယ်က ခန်းမထဲသို့ ဝင်ရောက်လာသည်။

" အရှင်မင်းကြီးကို ဂါရဝပြုပါတယ်။ " ရှဝူချယ်က ဦးညွှတ်လိုက်သည်။

" ယောက္ခမကြီးက ကျုပ်ကို ရှောင်ဖို့အတွက် တော်တော်လေး ဝေတဲ့နေရာကို သွားခဲ့တာပဲ။ " ရင်ကျန့်က ရှဝူချယ်ကို ကြည့်ပြီး ကူကယ်ရာမဲ့စွာ ပြောလိုက်သည်။

ထိုစကားများကို ကြားသောအခါ ရှဝူချယ်က ထိတ်လန့်သွားပြီး ချက်ချင်း ပြန်ပြောလိုက်သည်။ " အရှင်မင်းကြီး ကျွန်တော်မျိုးက အရှင်မင်းကြီးကို ရှောင်ဖို့ ရည်ရွယ်တာမဟုတ်ပါဘူး။ အပန်းဖြေရုံသက်သက်ပါပဲ။ လွန်ခဲ့တဲ့ နှစ်ဝက်အတွင်း အပြင်မှာ သမားတော်တစ်ယောက်အနေနဲ့ နယ်လှည့်ပြီး ဆေးကုတာ အတော်လေး အဆင်ပြေပါတယ်။ "