အခန်း ၁၈၅

အခန်း (၁၈၅)

ဝမ်ရှောင်ရို့၏ ဝမ်းကွဲညီမ

လျန်ထျန်း၏ မေးခွန်းကို ကြားသောအခါ ဝမ်ရှောင်ကျင်း၏ လှပသော မျက်လုံးများမှာ ချက်ချင်း ပြူးကျယ်သွား ပြီး သူမက ရုတ်တရက် ထမေးလိုက်လေသည်။

"ရှင် ကျွန်မရဲ့ ဝမ်းကွဲအစ်မကို သိလို့လား...။"

ဤတုံ့ပြန်မှုကို ကြားသောအခါ လျန်ထျန်းက ချက်ချင်း ခေါင်းညိတ်ပြလိုက်လေသည်၊

"သေချာတာပေါ့ မင်းတို့ နာမည်တွေက တော်တော်ဆင်နေတာကိုး...။ ဝမ်ရှောင်ရို့နဲ့ ဝမ်ရှောင်ကျင်း စာလုံးတစ် လုံးပဲ ကွာတယ်လေ...။"

"ပြီးတော့ မင်းက ရှောင်ရို့နဲ့ တော်တော်လေးကို ရုပ်ဆင်တယ်...။ မင်းတို့က တကယ်ပဲ ဆွေမျိုးတွေ၊ ဝမ်းကွဲ ညီအစ်မတွေ ဖြစ်နေတာကိုး...။"

ထိုအချိန်တွင် လျန်ထျန်းက စိတ်ထဲမှ ကြိတ်၍ တွေးလိုက်လေသည်၊

*ကံကောင်းလို့ ငါ လက်ပိုက်ကြည့်မနေမိခဲ့တာ…၊ မဟုတ်ရင် နောင်တစ်ချိန်ကျမှ ရှောင်ရို့နဲ့ ငါ ဒီဝမ်းကွဲညီမ လေး နဲ့ အတူဆုံမိတဲ့အခါ အရမ်းကို အနေရခက်သွားမှာပဲ...။*

ထို့နောက် ချက်ချင်းပင် ဝမ်ရှောင်ကျင်းက နောက်ထပ်မေးခွန်းတစ်ခု ထပ်မေးလိုက်ပြန်လေသည်၊

"ရှင်က ကျွန်မရဲ့ ဝမ်းကွဲအစ်မကို သိနေတယ်ဆိုတော့ သူနဲ့ ရှင်က ဘယ်လို ပတ်သက်နေတာလဲ...။"

လျန်ထျန်းက ပြုံးလိုက်ပြီး ဟန်ဆောင်မှု ကင်းမဲ့စွာဖြင့် ပြောလိုက်လေသည်။

"ကိုယ်က မင်းရဲ့ ဝမ်းကွဲအစ်မ ချစ်သူလေ၊ ကိုယ့်နာမည်က လျန်ထျန်းပါ...။ မင်းရဲ့ ဝမ်းကွဲအစ်မက ကိုယ့်အ ကြောင်း ပြောပြဖူးလား...။"

ဝမ်ရှောင်ကျင်းက ခေါင်းခါလိုက်ပြီး ပွင့်လင်းစွာပင် ပြောလိုက်လေသည်၊

"ဟင့်အင်း...။"

လျန်ထျန်း၏ အပြုံးမှာ ခေတ္တမျှ ရပ်တန့်သွားပြီး သူ၏ရင်ထဲတွင် ရှင်းပြမတတ်အောင် ဟာတာတာ ဖြစ်သွားရ လေသည်။

ကံကောင်းထောက်မစွာဖြင့် ဝမ်ရှောင်ကျင်းက ခေတ္တမျှ ရပ်နားပြီးနောက် ဆက်ပြောလာခဲ့လေသည်။

"တကယ်တော့ ကျွန်မနဲ့ ဝမ်းကွဲအစ်မနဲ့ အဆက်အသွယ် ပြတ်နေတာ ကြာလှပြီ...။"

"ငယ်ငယ်တုန်းက အရမ်းရင်းနှီးခဲ့ကြပေမဲ့ မိသားစုကိစ္စ အချို့ကြောင့် လွန်ခဲ့တဲ့ နှစ်အနည်းငယ်ကတည်းက အဆက်အသွယ် ပြတ်သွားခဲ့တာ...။"

ထိုစကားကို ကြားသောအခါ လျန်ထျန်းမှာ တိတ်တဆိတ် သက်ပြင်းချလိုက်နိုင်လေသည်။

*ဩော်...၊ ဒီလိုကိုး...။ လန့်သွားတာပဲ...၊ မိသားစု ပြဿနာတွေကြောင့် ဒီဝမ်းကွဲညီမလေးနဲ့ ရှောင်ရို့တို့ ဝေးကွာ သွားခဲ့တာပေါ့လေ...။*

ထိုသို့ တွေးနေစဉ်မှာပင် ဝမ်ရှောင်ကျင်းက အလောတကြီး မေးလာသည်ကို ကြားလိုက်ရလေသည်။

"ရှင်က ကျွန်မ ဝမ်းကွဲအစ်မရဲ့ ချစ်သူဆိုတော့ သူ့အခြေအနေကို ရှင်သိမှာပဲနော်...။ ကျွန်မကို ပြောပြလို့ ရမ လား...။"

"ကျွန်မ သူ့ကို အရမ်းလွမ်းတာပဲ...။ ဒါပေမဲ့ အဲ့ဒီကိစ္စ ဖြစ်ပြီးကတည်းက အဖေက ဝမ်းကွဲအစ်မရဲ့ မိသားစုနဲ့ အဆက်အသွယ် လုပ်ခွင့် ပိတ်ပင်ထားခဲ့တယ်...။ ကျွန်မတို့ရဲ့ ဆက်သွယ်ဖို့ အချက်အလက်တွေ အကုန်လုံးကို တောင် ဖျက်ပစ်ခဲ့တာ...။"

"ဒါပေမဲ့ ဒီနှစ်တွေ အများကြီး ကြာခဲ့ပြီးတဲ့နောက် မိသားစုရဲ့ အကျိုးစီးပွား ပဋိပက္ခတွေထဲမှာ ကျွန်မ မပါဝင်ချင် တော့ဘူး... ။ ဝမ်းကွဲအစ်မနဲ့ ငယ်ဘဝ သံယောဇဉ်ကိုပဲ ကျွန်မ ဂရုစိုက်တယ်...။"

ထိုစကားကို ကြားပြီးနောက် လျန်ထျန်းမှာ အနည်းငယ် အံ့အားသင့်သွားခဲ့ရလေသည်။

"မင်းနဲ့ ရှောင်ရို့က ဝမ်းကွဲညီအစ်မတွေဆိုတော့ မင်းရဲ့အဖေနဲ့ ရှောင်ရို့ရဲ့အဖေက ညီအစ်ကိုတွေ ဖြစ်ရမှာပေါ့...။"

"ညီအစ်ကိုတွေကြားမှာ အဆက်အသွယ် အကုန် ဖြတ်တောက်လိုက်တာက ဆွေမျိုးအဆက်အသွယ် ဖြတ်လိုက် တာနဲ့ အတူတူပဲလေ...။ အဲ့ဒီတုန်းက ဘာတွေများ ဖြစ်ခဲ့လို့ ရှောင်ရို့ မိသားစုအပေါ် ဒီလောက်တောင် ပြတ်သား ရက်စက်ရတာလဲ...။"

ဝမ်ရှောင်ကျင်းမှာ မှတ်ဉာဏ်အချို့ကို နှိုးဆွခံလိုက်ရပုံပေါ်ပြီး သူမ၏ မျက်နှာထားမှာ ညှိုးနွမ်းသွားကာ ပြော လိုက်လေသည်။

"အကုန်လုံးက လူကြီးတွေကြားက အာဏာလုပွဲ ဆိုတာတွေချည်းပါပဲ...။ ကျွန်မတို့ ဝမ်မိသားစုက စီးပွားရေး လုပ်လာတာ မျိုးဆက် သုံးဆက်တောင် ရှိပြီဆိုတာကို ရှင် သိမှာပေါ့နော်...။"

လျန်ထျန်းက ခေါင်းညိတ်လိုက်လေသည်။

"ကိုယ် ကြားဖူးပါတယ်...၊ ဦးလေးဝမ် ကိုယ်တိုင် ကိုယ့်ကို ပြောပြဖူးတယ်...။ ဝမ်မိသားစုက အယ်လ် မြို့တော် မှာ အရမ်းကို ထွန်းတောက်ခဲ့တဲ့ အချိန်ကာလတစ်ခု ရှိခဲ့ပေမဲ့ နောက်ပိုင်းမှာ တဖြည်းဖြည်း ကျဆင်းလာခဲ့တယ် ဆိုတာကိုလေ...။"

ဝမ်ရှောင်ကျင်းက ခေါင်းညိတ်လိုက်လေသည်။

"ဟုတ်တယ်...။ လွန်ခဲ့တဲ့ ဆယ်နှစ်ကျော်လောက်ကဆို ကျွန်မတို့ ဝမ်မိသားစုက တကယ်ကို အာဏာအထွတ် အထိပ်ကို ရောက်နေပြီး ဩဇာလွှမ်းမိုးမှုမှာ ပြိုင်ဘက်ကင်းခဲ့တာ...။"

"အဲ့ဒီတုန်းက ကျွန်မ အရမ်းငယ်သေးတော့ သိပ်နားမလည်ခဲ့ဘူး...။ အယ်လ် မြို့တော်က စီးပွားရေးသမားတွေ အကုန်လုံး သူတို့ ဘာစီးပွားရေးပဲ လုပ်လုပ် ကျွန်မတို့အိမ်ကို လာပြီး လက်ဆောင်တွေ ပေးကြတယ်ဆိုတာကိုပဲ မှတ်မိတယ်...။"

"ဒါပေမဲ့ အဘိုး ဆုံးပါးသွားပြီးတဲ့နောက် အရာအားလုံး ပြောင်းလဲသွားခဲ့တယ်...။ အရင်တုန်းက သဟဇာတ ဖြစ်နေတဲ့ မြင်ကွင်းတွေ ပျောက်ကွယ်သွားပြီး အဖေနဲ့ ဦးလေးက စာကြည့်ခန်းထဲမှာ ခဏခဏ စကားများကြ တယ်...။"

"တစ်နေ့မှာတော့ ဦးလေးက မိသားစု စီးပွားရေးကို လွှဲယူပြီး ကြီးမားတဲ့ ဆုံးဖြတ်ချက် တစ်ခုကို ချမှတ်ခဲ့ပေမဲ့ ကျရှုံးသွားခဲ့တယ်...။"

"အဲ့ဒီအချိန်ကစပြီး အယ်လ် မြို့တော် စီးပွားရေးလောကမှာ ဝမ်မိသားစုရဲ့ အဆင့်အတန်းက အရင်လို မဟုတ် တော့ဘဲ တဖြည်းဖြည်း ကျဆင်းလာခဲ့တော့တာပဲ...။"

"မိသားစုထဲက လူကြီးတော်တော်များများက အရမ်းဒေါသထွက်ကြပြီး အမှားတွေအတွက် ဦးကြီးကိုပဲ အပြစ် တင်ခဲ့ကြတယ်လေ...။ သူ့မိသားစုကို ဆွေမျိုးအသိုင်းအဝိုင်းထဲကနေ နှင်ထုတ်တဲ့အထိပဲ...။"

"ကျွန်မ အဖေက မိသားစု စီးပွားရေးကို ပြန်လွှဲယူပြီးတဲ့နောက် အခြေအနေကို ပြန်ဆယ်ပြီး အရင်က အထွတ် အထိပ်ကို ပြန်မရောက်နိုင်ခဲ့ပေမဲ့ အနည်းဆုံးတော့ အခြေခံအုတ်မြစ် တစ်စိတ်တစ်ပိုင်းကို ထိန်းသိမ်းထား နိုင်ခဲ့တယ်...။"

"နောက်ပိုင်းမှာ ကြားရတာက ဦးလေးတို့ မိသားစု ဆွေမျိုးအသိုင်းအဝိုင်းကနေ ထွက်သွားပြီးတဲ့နောက် အယ်လ် မြို့တော်မှာပဲ စီးပွားရေး ဆက်လုပ်နေကြပေမဲ့ အတိုင်းအတာ သေးသေးလေးပဲ လုပ်နိုင်ကြတော့တယ်တဲ့...။"

"လွန်ခဲ့တဲ့ နှစ်အနည်းငယ်က သူတို့ အကြွေးပြဿနာတွေ တက်ပြီး ဒေဝါလီခံရမယ့် အခြေအနေ ရောက်နေ တယ်လို့ ကြားခဲ့တယ်...။ ကျွန်မက ဝမ်းကွဲအစ်မအတွက် အရမ်းစိုးရိမ်လို့ သူတို့ကို ကူညီပေးဖို့ အဖေ့ကို တောင်းဆိုခဲ့ပါသေးတယ်...။"

"ဒါပေမဲ့ အဖေက ခေါင်းမာလွန်းတယ်...။ ကျွန်မ ဘာပဲပြောပြော ကူညီပေးဖို့ ငြင်းဆန်တဲ့အပြင် ဝမ်းကွဲအစ်မနဲ့ နောက်ထပ် အဆက်အသွယ် မလုပ်ဖို့ပါ ပိတ်ပင်ခဲ့တာ...။"

"ကျွန်မ တကယ် နားမလည်နိုင်ဘူး...။ မိသားစု သံယောဇဉ်ထက် ကိုယ်ကျိုးစီးပွားက တကယ်ပဲ ပိုအရေးကြီးနေ တာလား...။ ဘာပဲဖြစ်ဖြစ် ကျွန်မတို့က တစ်ချိန်တုန်းက မိသားစုဝင်တွေ ဖြစ်ခဲ့ကြတာလေ...။ အကျိုးအမြတ် အတွက်နဲ့ ဘယ်လိုလုပ် တစ်ယောက်နဲ့တစ်ယောက် ရန်သူတွေလို ဖြစ်သွားနိုင်ရတာလဲ...။"

"ပြီးတော့ အဲ့ဒီတုန်းက ဦးလေး အမှားလုပ်ခဲ့ရင်တောင် နောက်ဆုံးရလဒ်က ဒီလောက်ထိ ဆိုးရွားမသွားဘူးလို့ ကျွန်မ ထင်တယ်...။"

"ထိန်းသိမ်းထားနိုင်ခဲ့တဲ့ မိသားစုပိုင်ဆိုင်မှု အစိတ်အပိုင်းက ဝမ်မိသားစုကို မျိုးဆက်ပေါင်းများစွာ သက် တောင့်သက်သာ နေထိုင်နိုင်ဖို့ သေချာစေဖို့ လုံလောက်နေတာပဲလေ...။ ဘာလို့ ဒီလောက်ထိ ဒုက္ခခံနေရဦး မှာလဲ...။"

ဤအရာအားလုံးကို တိတ်ဆိတ်စွာ နားထောင်ပြီးနောက် လျန်ထျန်းက ခေတ္တမျှ တွေးတောလိုက်ပြီး သက်ပြင်း ချကာ ပြောလိုက်လေသည်။

"အရင်မျိုးဆက်တွေရဲ့ ရန်ငြိုးတွေက တကယ်တော့ မင်းနဲ့ မဆိုင်ပါဘူး...။ ဒါပေမဲ့ သူတို့ရဲ့ အမှားအမှန် အပြည့် အစုံကို ငါတို့က မသိနိုင်တဲ့အတွက် ဆုံးဖြတ်ချက်ချဖို့တော့ ခက်ခဲလိမ့်မယ်...။"

"ဒါပေမဲ့ ကိုယ်က ဦးလေးဝမ်နဲ့ အကြိမ်ကြိမ် တွေ့ဆုံဖူးပြီး လက်ရှိမှာလည်း သူနဲ့ ကျယ်ကျယ်ပြန့်ပြန့် ပူးပေါင်း ဆောင်ရွက်နေတာဆိုတော့ ဦးလေးဝမ်က လုံးဝကို ဖြောင့်မတ်မှန်ကန်တဲ့လူ ဖြစ်တယ်ဆိုတာကို မင်းကို အာမခံ ရဲတယ်...။"

"ရှောင်ရို့အတွက် မင်း စိုးရိမ်နေတာနဲ့ ပတ်သက်ပြီး ကိုယ် အခု ပြောပြနိုင်တာက မင်း စိုးရိမ်ဖို့ မလိုဘူးဆို တာပါပဲ...။ သူမက မိသားစုကိစ္စတွေအတွက် စိတ်ပူစရာ မလိုတော့ဘဲ လက်ရှိမှာ နိုင်ငံခြားမှာ ပညာသင်နေ ပါတယ်...။"

"အချိန်ကို တွက်ကြည့်မယ်ဆိုရင် နောက်ထပ် လအနည်းငယ်နေရင် သူမ ဘွဲ့ရပြီး ပြန်လာနိုင်လောက်ပါပြီ...။ အဲ့ဒီအချိန်ကျရင် ကိုယ်တို့ စေ့စပ်ပွဲနဲ့ မင်္ဂလာပွဲအတွက် စတင် ပြင်ဆင်ဖြစ်လောက်တယ်...။"

လျန်ထျန်း၏ စကားများကို ကြားသောအခါ ဝမ်ရှောင်ကျင်းမှာ ချက်ချင်းပင် ဝမ်းသာအားရ ဖြစ်သွားလေတော့ သည်။

"ဝမ်းသာလိုက်တာ...။ ရှင်ပြောတာကို ကျွန်မ ယုံပါတယ်...၊ ရှင် စောစောက ပြသခဲ့တဲ့ စွမ်းရည်တွေက ကျွန်မရဲ့ ဝမ်းကွဲအစ်မကို သေချာပေါက် ကောင်းကောင်း စောင့်ရှောက်နိုင်မှာပါ...။"

"ကျွန်မရဲ့ ဝမ်းကွဲအစ်မက ရှင့်လို အရည်အချင်းရှိတဲ့ ချစ်သူမျိုး ရထားတာ အရမ်းကံကောင်းတာပဲ...။ ပြီးတော့ ငယ်လည်းငယ် ချောလည်းချောတယ်လေ...။ တကယ်တော့ ကျွန်မတောင် နည်းနည်း မနာလိုဖြစ်မိတယ်...။"

ဝမ်ရှောင်ကျင်း၏ ပို၍ အားကျလာသော အကြည့်များကို မြင်သောအခါ လျန်ထျန်းက ပြုံးလျက် ပြောလိုက် လေသည်။

"မနာလို မဖြစ်ပါနဲ့...။ မင်းက ရှောင်ရို့ရဲ့ ဝမ်းကွဲညီမဆိုတော့ နောင်ကျရင် ကိုယ့်ရဲ့ ညီမလေး ဖြစ်လာမှာပဲ လေ...။"

"ဩော်...၊ စကားမစပ် ကိုယ် မင်းကို နောက်တစ်ချက် ပြောပြရဦးမယ်...။ ကိုယ့်မှာ ညီမလေး တစ်ယောက် ရှိ တယ်...။ တိုက်တိုက်ဆိုင်ဆိုင်ပဲ သူ့နာမည်မှာလည်း ကျင်း ဆိုတဲ့ စာလုံးလေး ပါတယ်...၊ သူ့ရဲ့ နာမည်ပြောင်က လည်း ရှောင်ကျင်း ပဲလေ...။"

"ဒါကြောင့် အခုကစပြီး ကိုယ်က မင်းကို ကိုယ့်ညီမအရင်းလိုပဲ သဘောထားပါ့မယ်...။ ဝမ်မိသားစုရဲ့ အတွင်းရေး ဆက်ဆံမှုတွေက ဘယ်လိုပဲဖြစ်နေပါစေ မင်း အကူအညီ လိုအပ်တဲ့အချိန်တိုင်း ကိုယ့်ဆီ အချိန်မရွေး လာနိုင်ပါ တယ်...။"

ဝမ်ရှောင်ကျင်းထံတွင် ဝမ်းကွဲအစ်မဖြစ်သူ ဝမ်ရှောင်ရို့ကဲ့သို့ပင် ပွင့်လင်းဖြောင့်မတ်ပြီး ကြင်နာတတ်သော ကိုယ်ရည်ကိုယ်သွေးမျိုး ရှိနေသည်ကို လျန်ထျန်း မြင်တွေ့လိုက်ရလေသည်။

သူမသည် အနည်းငယ် ထူးဆန်းလာသော်လည်း ဥပမာအားဖြင့် အခြားသူများ၏ နှောင့်ယှက်မှုကို ဖယ်ရှားရန် အတွက် အစားအသောက်ပို့သူ တစ်ဦးကို သူမ၏ ရည်းစားအဖြစ် ဟန်ဆောင်ပေးရန် တောင်းဆိုသည့် စိတ်ကူး မျိုး ရုတ်တရက် ရလာတတ်ခြင်းမျိုး ဖြစ်သည်။

သို့သော် သူမ၏ စိတ်ထားမှာ မဆိုးရွားလှပေ။ ထို့အပြင် သူမသည် သံယောဇဉ်ကို အလွန် တန်ဖိုးထားတတ်လေ သည်။ သူမ၏ မိသားစုက ဝမ်ရှောင်ရို့၏ မိသားစုနှင့် အဆက်အသွယ် ဖြတ်တောက်ခဲ့သော်လည်း နှစ်ပေါင်းများ စွာ ကြာသည်အထိ ဝမ်းကွဲအစ်မဖြစ်သူကို လွမ်းဆွတ်နေဆဲ ဖြစ်လေသည်။

ဤအကြောင်းရင်းများကြောင့်ပင် လျန်ထျန်းသည် ဝမ်ရှောင်ကျင်းအပေါ် အလွန် သဘောကျမိသွားခြင်း ဖြစ်လေ သည်။ သေချာသည်မှာ ညီမလေး တစ်ယောက်အပေါ် သဘောကျသည့် အချစ်မျိုးသာ ဖြစ်ပေသည်။

ဝမ်ရှောင်ကျင်းကလည်း လျန်ထျန်းအပေါ် ထိုနည်းတူပင် သဘောထားကာ ဆက်သွယ်ရန် အချက်အလက်များ ဖလှယ်ကြပြီးနောက် ဝမ်းကွဲအစ်မဖြစ်သူ ဝမ်ရှောင်ရို့၏ ဆက်သွယ်ရန် အချက်အလက်များကို ရယူပြီးနောက် အတန်းထဲသို့ ပျော်ရွှင်စွာ ပြန်ပြေးသွားခဲ့လေတော့သည်။

ထိုနေ့ ညနေပိုင်းတွင် လျန်ထျန်းက ဝမ်ရှောင်ရို့နှင့် ဗီဒီယိုကောလ် ပြောဆိုရင်း ထိုကိစ္စကို စကားစလိုက်လေ သည်။

(အချိန်ကွာခြားမှုကြောင့် လျန်ထျန်းအတွက် ညဉ့်နက်နေချိန်မှာ ဝမ်ရှောင်ရို့အတွက်မူ မနက်ခင်း ဖြစ်နေလေ သည်။)

ဝမ်ရှောင်ရို့က နားထောင်ပြီးနောက် ပြုံးကာ ပြောလိုက်လေသည်၊

"အဲ့ဒီ ကောင်မလေးက ငါ့ကို ရုတ်တရက်ကြီး ဘယ်လိုလုပ် ဆက်သွယ်လာနိုင်တာလဲလို့ အံ့ဩနေတာ...။ နင်နဲ့ တွေ့သွားလို့ကိုး...၊ တိုက်ဆိုင်လိုက်တာ...။"

"ရိုးရိုးသားသား ပြောရရင် ငါလည်း သူ့ကို အမြဲတမ်း လွမ်းနေခဲ့တာပါ...။ ဒါပေမဲ့ မိသားစုထဲမှာ ရှုပ်ထွေးတဲ့ ကိစ္စ တချို့ ရှိနေလို့ နှစ်အတော်ကြာအောင် ငါတို့ အဆက်အသွယ် ပြတ်သွားခဲ့ရတာ...။"

"တာထျန်းထျန်း...၊ ငါ နင့်ကို နောက်တစ်ချက် ပြောပြရဦးမယ်...။ အဖေက အဲ့ဒီတုန်းက သူချမှတ်ခဲ့တဲ့ ဆုံးဖြတ် ချက် အပေါ် အမြဲတမ်း အပြစ်ရှိသလို ခံစားနေရတာ...။"

(တာထျန်းထျန်း ဆိုသည်မှာ ဝမ်ရှောင်ရို့က လျန်ထျန်းကို ခေါ်သည့် ချစ်စနိုးအမည် ဖြစ်သည်။ လျန်ထျန်းက ဝမ်ရှောင်ရို့ကို ခေါ်သည့် ချစ်စနိုးအမည်မှာ ရှောင်ရို့ရို့ ဖြစ်သည်။ ဟားဟား။)

"ဆွေမျိုးအသိုင်းအဝိုင်းကနေ ထွက်လာပြီးတဲ့နောက် အဖေက စီးပွားရေးလောကမှာ ဆက်လုပ်ဖို့ တင်းခံခဲ့ပြီး အခက်အခဲတွေနဲ့ ကြုံတွေ့ရတဲ့ အချိန်မှာတောင် ဘယ်တော့မှ လက်မလျှော့ခဲ့ဘူး...။"

"အကုန်လုံးက တစ်နေ့ကျရင် မိသားစုရဲ့ ဂုဏ်ကျက်သရေကို ပြန်လည်ရရှိအောင် ကူညီပေးပြီး သူ့ရဲ့ အတိတ်က အမှားတွေအတွက် ပြန်လည်ပေးဆပ်ချင်လို့ပါပဲ...။"

"နောက်ပိုင်း ဘာဖြစ်သွားလဲဆိုတာကို နင် သိပြီးသားပဲလေ...။ အဖေ ပြိုလဲလုနီးပါး ဖြစ်နေချိန်မှာ ကံကောင်း ထောက်မစွာနဲ့ နင်နဲ့ တွေ့ဆုံခဲ့ရတာ...။"

"စိမ်းကားတယ်လို့ ထင်ရပေမဲ့ ငါက နင့်ကို အမြဲတမ်း ကျေးဇူးတင်နေခဲ့တာပါ...။"

လျန်ထျန်းက သူမကို အလျင်အမြန် ဖြတ်ပြောလိုက်ပြီး နောက်ပြောင်လိုက်လေသည်၊

"ကိုယ်က နှုတ်နဲ့ ကျေးဇူးတင်တာကို မလိုချင်ဘူး...။ မင်း ပြန်လာတဲ့အခါကျရင် ကိုယ်နဲ့ လက်ထပ်တာမျိုး ဒါမှ မဟုတ် ကလေး နည်းနည်းပါးပါး မွေးပေးတာမျိုးလို လက်တွေ့ လုပ်ရပ်နဲ့ပဲ ကျေးဇူးဆပ်စေချင်တာ...။"

ထိုစကားကို ကြားသောအခါ ဝမ်ရှောင်ရို့၏ လှပသော မျက်နှာလေးမှာ ချက်ချင်းပင် ရဲတက်သွားပြီး ရှက်သွေး ဖြာကာ ခေါင်းငုံ့သွားခဲ့လေသည်။

"အာ...၊ နင်က ဘာလို့ အဲ့ဒီလိုမျိုး စကားစပြီးတော့မှ အတည်ပေါက်ကြီး ဖြစ်သွားရတာလဲ...။"

သို့သော် ခေတ္တမျှ ရပ်နားပြီးနောက် ဝမ်ရှောင်ရို့က အလွန်တိုးညင်းသော အသံဖြင့် ဆက်ပြောလေသည်။

"အဲ့ဒီကိစ္စတွေက နင် ငါ့ကို ပြောစရာမလိုပါဘူး ငါ့ဘာသာငါ လုပ်နိုင်ပါတယ်...။"

ထို့နောက် လျန်ထျန်းသည် သူ၏ဖုန်းကို ကိုင်ထားရင်း အိပ်ပျော်သွားသည်အထိ သူတို့နှစ်ဦးသည် ချိုမြိန်သော စကားလေးများ ဖလှယ်ခဲ့ကြလေသည်။

ဝမ်ရှောင်ရို့က သူ့ကို ခေတ္တမျှ တိတ်ဆိတ်စွာ စိုက်ကြည့်နေပြီးနောက် အတန်းမစမီ ကင်မရာမှတစ်ဆင့် အနမ်း တစ်ခု ပေးကာ မချင့်မရဲဖြင့် ဖုန်းချသွားလေတော့သည်။

...

နောက်တစ်နေ့တွင် လျန်ထျန်းသည် ထုံးစံအတိုင်း အမှာစာများ လက်ခံခြင်းနှင့် အစားအသောက် ပို့ဆောင်ခြင်း တို့တွင် မိမိကိုယ်ကို နှစ်မြှုပ်ထားခဲ့လေသည်။

အချိန်ကို တွက်ကြည့်မည်ဆိုလျှင် ကမ္ဘာ့ကုန်ဈေးနှုန်းများ အဆတစ်သန်း ငွေကြေးတန်ဖိုး ကျဆင်းသွားသော နေ့မှစ၍ တစ်နှစ်ကျော် ကြာမြင့်ခဲ့ပြီ ဖြစ်သော်လည်း လျန်ထျန်း၏ အစားအသောက် ပို့ဆောင်ခ ကော်မရှင်များ မှာမူ ထိခိုက်မှု မရှိခဲ့ပေ။

ဤနှစ်များအတွင်း လျန်ထျန်းသည် အစားအသောက် ပို့ဆောင်ရာတွင် ပိုမို ထိရောက်သော နည်းလမ်းများ သို့မဟုတ် အမှာစာ တစ်ခုချင်းစီအတွက် အမြတ်အစွန်း အများဆုံး ရရှိစေမည့် ပုံစံများကို ကြိုးစားရှာဖွေခဲ့ လေသည်။

ဥပမာအားဖြင့် အနီးအနားရှိ စတိုးဆိုင် အချို့တွင် ရင်းနှီးမြှုပ်နှံပြီး သူတို့ကို အချင်းချင်း အမှာစာများ မှာယူ စေခြင်းဖြင့် လျန်ထျန်းအနေဖြင့် အမှာစာများကို ကိုင်တွယ်ကာ လမ်းတစ်လမ်းတည်းတွင် အားလုံးကို ပို့ဆောင် နိုင်မည် ဖြစ်သဖြင့် လုပ်ငန်းစွမ်းဆောင်ရည်ကို များစွာ တိုးတက်စေမည် ဖြစ်လေသည်။

သို့သော် သူ စမ်းသပ်ကြည့်လိုက်သည်နှင့် သူ၏ ပို့ဆောင်သူ အက်ပလီကေးရှင်းက "အတုအယောင် မှာယူခြင်း" စည်းကမ်းကို ဖောက်ဖျက်မှုအဖြစ် သတိပေးချက် ထွက်ပေါ်လာပြီး သူ၏ အကောင့်မှာ ချက်ချင်းပင် သုံးနာရီ ကြာ ပိတ်ပင်ခံလိုက်ရလေတော့သည်။

အလားတူ လုပ်ရပ်မျိုး ထပ်မံ ကျူးလွန်ပါက အကောင့်ကို အပြီးတိုင် ပိတ်သိမ်းမည့် အန္တရာယ်ရှိကြောင်းကို လည်း စနစ်က သတိပေးချက် ထုတ်ပြန်ခဲ့လေသည်။

ဤအဖြစ်အပျက်က လျန်ထျန်းကို ချက်ချင်းပင် လန့်ဖြန့်သွားစေကာ လိမ္မာသွားစေပြီး အမှာစာများကို ထုံးစံ အတိုင်း လက်ခံကာ ပို့ဆောင်ရုံမှလွဲ၍ အခြား ရွေးချယ်စရာ မရှိတော့ပေ။

နောက်ပိုင်းတွင် သူသည် ပန်းစည်း တစ်စည်းကို မိန်းကလေး ငါးဦးထံ ပို့ဆောင်ရမည့် အမှာစာတစ်ခုကို လက်ခံ ရရှိခဲ့လေသည်။ ဘောက်ဆူးပေးသည့် လုပ်ဆောင်ချက်၏ ချိုမြိန်မှုကို သူ မြည်းစမ်းခဲ့ရပြီး ၎င်းမှာ ငွေပေးချေမှု တစ်ခုစီအတွက် အမြတ်အစွန်း အများဆုံး ရရှိစေသည့် ပုံစံတစ်ခု ဖြစ်သည်မှာ သေချာလှပေသည်။

သို့သော် လူတိုင်း သိကြသည့်အတိုင်း ပထမ အကြိမ်အနည်းငယ်တွင် အဆင်ပြေခဲ့သော်လည်း အကြိမ်အရေ အတွက် များလာသောအခါ သို့မဟုတ် တစ်ကြိမ်တည်း ပေးကမ်းသည့် ပမာဏမှာ ကြီးမားလွန်းသွားသောအခါ ချက်ချင်းပင် စည်းကမ်းဖောက်ဖျက်မှုအဖြစ် သတ်မှတ်ခံရလေသည်။

ထို့ကြောင့် ယခုအခါတွင် လျန်ထျန်းသည် စည်းမျဉ်းများကို အပြည့်အဝ ဆုပ်ကိုင်ထားနိုင်ပြီ ဖြစ်ကာ နားလည် သဘောပေါက်နေပြီ ဖြစ်လေသည်။

*ကမ္ဘာ့ကုန်ဈေးနှုန်းတွေ အဆတစ်သန်း ငွေကြေးတန်ဖိုး ကျဆင်းသွားခဲ့ပေမဲ့ ငါ့ရဲ့ ပို့ဆောင်ခ ကော်မရှင်ကတော့ ထိခိုက်မှု မရှိဘူး...။ ဒီဟာကတင် ကောင်းကင်ဘုံက ပေးတဲ့ အကြီးမားဆုံး ကောင်းချီးမင်္ဂလာ ဖြစ်နေပြီမို့ ဖြတ်လမ်းက သွားဖို့ မတွေးသင့်တော့ဘူး...။*

ဖြတ်လမ်းများက ပို၍ ရနိုင်သည်ဟု ထင်ရသော်လည်း အဆုံးတွင်မူ ကောင်းကျိုးထက် ဆိုးကျိုးကိုသာ ဖြစ်စေ တတ်ပြီး ရသည်ထက် ဆုံးရှုံးရသည်က ပိုများတတ်လေသည်။

နှမ်းစေ့ အနည်းငယ်အတွက်နဲ့ မိမိရင်ခွင်ထဲက ဖရဲသီးကို အဆုံးရှုံးခံ၍ မဖြစ်ပေ။

လျန်ထျန်းသည် ထုံးစံအတိုင်း အမှာစာများကို လုံ့လဝီရိယရှိရှိ ဂရုတစိုက် လက်ခံကာ အစားအသောက်များကို ပို့ဆောင်ခဲ့ပြီး အခြား ပို့ဆောင်သူများနှင့် ခြားနားမှု မရှိပုံပေါ်လေသည်။

ဝန်ဆောင်မှု ပေးနေစဉ်တစ်လျှောက်လုံး သူသည် ဖော်ရွေပြီး တာဝန်ယူမှုရှိသော သဘောထားကို ထိန်းသိမ်း ထားကာ အမှာစာ တစ်ခုစီကို ကောင်းမွန်စွာ ပို့ဆောင်ပေးပြီး ဖောက်သည်တိုင်းကို ကျေနပ်မှု ရရှိစေရန် ကြိုးပမ်းအားထုတ်ခဲ့လေသည်။

သို့သော် ရံဖန်ရံခါတွင် ထူးဆန်းသော ဖောက်သည် အနည်းငယ်နှင့် ကြုံတွေ့ရခြင်းကိုမူတော့ ရှောင်လွှဲ၍ မရနိုင်ခဲ့ပေ။