အခန်း ၂၅၃၇

အပိုင်း(၂၅၃၇)

ရိုးရွဲ သူတော်စင်တွမ် သေဆုံးသွားခြင်းနှင့် ကောင်းကင်ရှန့်ထို မိုးကြိုးကောင်းကင် ပျက်သုဉ်းသွားခြင်းတို့က ဝေ့ဝူယင်ကို မကျေနပ်မှုများ ဖြစ်ပေါ်စေခဲ့သည်။ အကြောင်းပြချက်လား... အမြင့်မားဆုံးသော ရလဒ်ကို ရရှိရန်အတွက် အနည်းဆုံးသော အားထုတ်မှုကိုသာ သူ အသုံးပြုခဲ့ရသောကြောင့် ဖြစ်၏။ သူ၏ ဆေဘာ သည် အိမ်ထဲတွင်သာ ရှိနေခဲ့သည်။ သူ၏ သတ်ဖြတ်လိုစိတ်များသည်လည်း ပြည့်ဝစွာ မပြေပျောက်ခဲ့ချေ။

ထိုရိုးရွဲ သူတော်စင် များသည် အဖြစ်ဆိုးနှင့် မကြုံတွေ့ရမီ အထိ သူတို့၏ အစစ်အမှန် စွမ်းအားကို ထုတ်ဖော်ပြသနိုင်ခြင်း မရှိခဲ့ကြပေ။ ထို့အပြင် ရိုးရွဲ သူတော်စင် ယွီရှီ ၏ ကိုယ်ပွား သည် သူမ၏ ပထမဆုံး တိုက်ခိုက်မှု ကျရှုံးပြီးနောက်တွင် ထွက်ပြေးဖို့သာ ဦးတည်ခဲ့သည်။ ထိုအရာကပင် ပြတ်သားသော ရှုံးနိမ့်မှုဆီသို့ ဦးတည်သွားစေခဲ့သည်။

ထိုအခြေအနေများကြောင့် ဝေ့ဝူယင်သည် အဆင့်တက်လှမ်းပြီးနောက် သူ၏ အစစ်အမှန် စွမ်းအားကို အတည်မပြုနိုင်ခဲ့ပေ။ ထို့ကြောင့် သူသည် မကျေနပ်မှုကို ခံစားနေရခြင်း ဖြစ်သည်။

သို့သော်လည်း အစီအရင် တစ်ခုဖြင့် အတင်းအကျပ် ခိုင်းစေကာ လုံရှီယာ ၏ ပဲ့တင်ထပ် ဝိညာဉ် ကို အဝေးမှ ဖောက်ခွဲလိုက်ခြင်းက သူ၏ အစစ်အမှန် စွမ်းအားကို ဖော်ပြနေခြင်းပင် ဖြစ်သည်။

လုံရှီယာ၏ ပေါက်ကွဲမှုမှ ထွက်ပေါ်လာသော ကမောက်ကမ အခြေအနေများသည် ဆက်လက်ဖြစ်ပေါ်နေဆဲဖြစ်ကြောင်း ဝေ့ဝူယင် အာရုံခံမိလိုက်သည်။ ထို့ကြောင့် သူသည် မူလ ဟင်းလင်းပြင် ဖန်တီးခြင်း အာဏာရှင် ဝိညာဉ်ကျင့်စဉ် ၏ တည်ငြိမ်မှုအောက်တွင် ဟင်းလင်းပြင် ထဲသို့ အေးဆေးတည်ငြိမ်စွာ ပြန်လည်နစ်မြုပ်သွားခဲ့သည်။

"အာဏာရှင် ကျင့်စဉ်တွေကို အသုံးချနိုင်တဲ့ မင်းရဲ့ စွမ်းရည်က ထူးကဲလွန်းတယ်..."

အတုအယောင် လျှို့ဝှက် သင်္ကေတများ သည် ဝေ့ဝူယင်၏ ဘေးပတ်လည်တွင် နာခံမှုရှိစွာ ဆက်လက်လည်ပတ်နေစဉ် မားဂတ် က ပေါ့ပါးစွာ မှတ်ချက်ချလိုက်သည်။

"ကံမကောင်းတာက မူလ နဂါး ဖန်ဆင်းခြင်း ဝိညာဉ်ကျင့်စဉ် က လျှို့ဝှက် အမြုတေ နှစ်ခုရဲ့ စွမ်းအားတွေကိုပဲ အသုံးပြုပြီး အထွတ်အထိပ် သူတော်စင် တွေကို အန္တရာယ် မပေးနိုင်တာပဲ..."

ဝေ့ဝူယင်သည် သက်ပြင်းတစ်ချက် ချလိုက်ပြန်သည်။ မူလ နဂါး ဖန်ဆင်းခြင်း ဝိညာဉ်ကျင့်စဉ် သည် လမ်းစဉ်ကိုးခု အာဏာရှင် ဝိညာဉ်ကျင့်စဉ် တစ်ခု ဖြစ်သည်။ ၎င်းကို ယေဘုယျအားဖြင့် ဥပဒေသ များ၏ အော်ရာကို လိုအပ်သော အာဏာရှင် ဝိညာဉ်ကျင့်စဉ်များ မတိုင်မီ အာဏာရှင် ဝိညာဉ်ကျင့်စဉ် များ၏ အကြွင်းမဲ့ အထွတ်အထိပ် အဆင့်ဟု ယူဆထားကြသည်။ နောက်တစ်ဆင့်တွင် ကောင်းကင်၏ စွမ်းအားများကို သဘာဝအလျောက် ဆွဲယူနိုင်သော ကောင်းကင် ပဲ့တင်ထပ် ချီစွမ်းအင် ကို လိုအပ်သည့် ပဲ့တင်ထပ် ဝိညာဉ်ကျင့်စဉ်များ ရှိသေးသည်။

သို့သော်လည်း လျှို့ဝှက် လမ်းစဉ် အပေါ်တွင်သာ အားထားနေရသော မူလ နဂါး ဖန်ဆင်းခြင်း ဝိညာဉ်ကျင့်စဉ်သည် ကာကွယ်ရေး တုံ့ပြန်မှု တစ်ခုကိုသာ လှုံ့ဆော်ပေးနိုင်ပေသည်။ မကြာသေးမီက ဖြစ်ပွားခဲ့သော တိုက်ပွဲ၏ အချက်အလက်များကို သေချာစွာ ပြန်လည်သုံးသပ်ကြည့်သောအခါ ၎င်းသည် မည်သည့် ရိုးရွဲ သူတော်စင် ၏ ကာကွယ်မှုကိုမျှ မချိုးဖျက်နိုင်ခဲ့ကြောင်း တွေ့ရသည်။

"ငါတို့ ဒီဇိုင်းဆွဲထားတဲ့ မူလ ကျင့်စဉ်က ငါတို့ အားလုံး ကို အသုံးပြုထားတာ..."

ဧဒင်က ရှားရှားပါးပါး စိတ်ပျက်ဒေါသထွက်မှု အရိပ်အယောင်များဖြင့် ပြောဆိုလိုက်သည်။ မူလ ကျင့်စဉ်သည် မူလ နဂါး ဖန်ဆင်းခြင်း ဝိညာဉ်ကျင့်စဉ် မဟုတ်ခဲ့ပေ။ ခရာတို နှင့် အိုရီ တို့၏ ပူးတွဲဆုံးဖြတ်ချက်ကြောင့် ၎င်းကို ပြန်လည်မွမ်းမံထားခြင်း ဖြစ်သည်။

၎င်းတို့၏ မိခင် ကျင့်စဉ်မှာ ကောင်းကင် အာရုဏ်ဦး ဖန်ဆင်းခြင်း ဝိညာဉ်ကျင့်စဉ် ပင် ဖြစ်သည်။ တိုက်ရိုက်ဆိုရလျှင် ၎င်းသည် အကြောင်းအမျိုးမျိုးအတွက် ကောင်းကင်ခန္ဓာများကို ဖန်တီးရန် ဒီဇိုင်းဆွဲထားခြင်း ဖြစ်သည်။ ထိုအရာများတွင် တွင်းနက်ကြီးများကို ဖန်တီး၍ အကျဉ်းချခြင်း၊ နေကြယ်များ မှတစ်ဆင့် သန့်စင်ခြင်းတို့ ပါဝင်ရုံသာမက ဂြိုဟ်များနှင့် လ များကို ဥက္ကာပျံများကဲ့သို့ ဖိနှိပ်သည့် နည်းလမ်းဖြင့် တိုက်ရိုက် ထိခိုက်စေခြင်းတို့ ပါဝင်ပေသည်။

"ငါ မပါဘူးနော်..."

မားဂတ်က အတုအယောင် ဝမ်းနည်းပူဆွေးမှုဖြင့် ခပ်ဆောင့်ဆောင့် ပြောလိုက်သည်။ ယုတ္တိဗေဒကို ဖီဆန်ကာ ဖြစ်ပေါ်လာသော ပဉ္စမမြောက် လျှို့ဝှက် ဝိညာဉ် တစ်ခုအနေဖြင့် မားဂတ်ကို သူတို့၏ မည်သည့် အစီအစဉ်များတွင်မျှ ထည့်သွင်းစဉ်းစားထားခြင်း မရှိခဲ့ချေ။ အမှန်စင်စစ်... မားဂတ် သည် ထိုကျင့်စဉ်ကို အများစု တီထွင်ခဲ့ခြင်း ဖြစ်သည်။ ၎င်းသည် ပကတိအတိုင်းပင် သူ၏ ကိုယ်ပိုင် အမှားသာ ဖြစ်နေလေသည်။

"ဘယ်လိုပဲဖြစ်ဖြစ် တိုက်ပွဲက မပြီးသေးပါဘူး..."

ခရာတိုက ဆိုလိုက်၏။

"ငါတို့ ကျန်တဲ့ အာဏာရှင် ဝိညာဉ်ကျင့်စဉ် သုံးခုကို စမ်းသပ်လို့ရသေးတာပဲ..."

၎င်းက သိသာထင်ရှားသော စိတ်လှုပ်ရှားမှု အပြုံးဖြင့် ပြောလိုက်သည်။

မူလ ဟင်းလင်းပြင် ဖန်တီးခြင်း အာဏာရှင် ဝိညာဉ်ကျင့်စဉ် သည် ဝေ့ဝူယင် တီထွင်ထားသော အရာတစ်ခုဖြစ်ပြီး ဥပဒေသ များ၏ ရှုပ်ထွေးနက်နဲမှုများကို ပေါင်းစပ်ထားသည်။ သို့သော် မားဂတ် သည် လျှို့ဝှက် ဝိညာဉ် တစ်ခုစီကို စိတ်ထဲထား၍ ဒီဇိုင်းဆွဲထားသော လမ်းစဉ်ကိုးခု ခြေချခြင်း ဝိညာဉ်ကျင့်စဉ် လေးခုပါဝင်သည့် အစုတစ်ခုကို ဖန်တီးခဲ့သည်။ ကောင်းကင်အာရုဏ်ဦး ဖန်ဆင်းခြင်း ဝိညာဉ်ကျင့်စဉ် သည် အိုရီကို အဓိက အာရုံစိုက်၍ ဒီဇိုင်းဆွဲထားခြင်း ဖြစ်သည်။

"နှစ်မိနစ်နဲ့ သုံးဆယ့်ခုနစ် စက္ကန့်..."

ဘုရင်က အခြားမည်သည့်စကားကိုမျှ မဆိုဘဲ တိုးညင်းစွာ ပြောလိုက်သည်။ သို့သော် သူတို့ အားလုံး နားလည်ကြသည်။ လုံရှီယာ ၏ ပေါက်ကွဲမှုမှ ထွက်ပေါ်လာသော ကမောက်ကမ အခြေအနေများသည် လက်ခံနိုင်သော အဆင့်အထိ တဖြည်းဖြည်း လျော့ကျသွားနေပြီ ဖြစ်သည်။ ထိုအချိန်ကာလအတွင်းတွင် သူသည် သတ်ဖြတ်မှုကို ဆက်လက် ပြုလုပ်နိုင်ပေလိမ့်မည်။

"အသီနာ... မင်း အဆင်ပြေရဲ့လား..."

အိုရီက အသိစိတ် အနည်းငယ်ကို စိတ်အာရုံ မျက်လုံး ထဲသို့ ပို့လွှတ်လိုက်ရင်း မေးလိုက်သည်။ အသီနာသည် ရိုးရွဲ သူတော်စင် တွမ် ကို ဖြစ်တည်မှု အဆင့်တွင် သတ်ဖြတ်ခဲ့သော်လည်း အပြည့်အဝ သတ်ဖြတ်နိုင်ခဲ့ခြင်း မဟုတ်ချေ။

သူမသည် ဆက်စပ်မှု စစ်အလံနှင့် အလားတူ စွမ်းအားများကို သုံးကာ ရိုးရွဲ သူတော်စင် တွမ် ကို စစ်ပွဲမှ ရရှိသော တိုက်ပွဲဝင် ပစ္စည်းတစ်ခုအဖြစ် သိမ်းပိုက်နေခဲ့ခြင်း ဖြစ်သည်။ သို့သော်လည်း... အစစ်အမှန် ဝိညာဉ် အပါအဝင် ပဲ့တင်ထပ် ဝိညာဉ် အဆင့် ကျင့်ကြံသူ တစ်ဦး၏ စွမ်းအားများသည် ကောင်းကင်မှ ပြဋ္ဌာန်းထားသည့်အတိုင်း သူမ သိမ်းပိုက်နိုင်သော အရာများ မဟုတ်ခဲ့ပေ။

အနည်းဆုံးတော့ ဝေ့ဝူယင်၏ လက်ရှိ စစ်ဥပဒေသ အဆင့်ဖြင့်တော့ မဖြစ်နိုင်ပေ။ အလွန်အမင်း မျိုးရိုးဗီဇပြောင်းလဲမှုကို တွေ့ကြုံခဲ့ရသော်လည်း ၎င်းသည် သာမည အာဏာ အဆင့်တွင်ပင် မရှိသေးချေ။ ဤသည်မှာ သူမသည် ပြောင်းလဲခြင်း လုပ်ငန်းစဉ် အတွင်း၌သာ ရှိနေသေးသောကြောင့် ဖြစ်လေသည်။

ဆက်စပ်မှု စစ်အလံသည် အစစ်အမှန် ဝိညာဉ် များကို မသိမ်းပိုက်နိုင်ပေ။ သို့သော်လည်း... ၎င်းသည် ကောင်းကင် တာအို ၏ တစ်ဖက်သတ် စည်းမျဉ်းများကို မချိုးဖောက်ဘဲ ဝိညာဉ်များကို သိမ်းပိုက်နိုင်စွမ်း ရှိလေသည်။ ကံဆိုးစွာပင် ပဲ့တင်ထပ် ဝိညာဉ် သည် အစစ်အမှန် ဝိညာဉ် နှင့် ပေါင်းစပ်သွားကြောင်း ဝေ့ဝူယင် မကြာသေးမီကမှ သိရှိခဲ့ရသည်။ ထိုအချက်က ပဲ့တင်ထပ် ဝိညာဉ် အဆင့် ကျင့်ကြံသူ များကို သိမ်းပိုက်ခြင်း လုပ်ငန်းစဉ်သည် သူ၏ နားလည်နိုင်စွမ်းနှင့် အာဏာပိုင်စိုးမှုထက် ကျော်လွန်နေကြောင်း ဆိုလိုနေသည်။

သို့သော်လည်း... ဤအခိုက်အတန့်တွင်ပင် ကောင်းကင်စစ်ဝိညာဉ် တစ်ပါးအဖြစ် အသီနာ ၏ စွမ်းအားများကို ထုတ်ဖော်ပြသလိုက်ပြီ ဖြစ်သည်။ သူမသည် ဖြစ်တည်မှုကို တိုက်ရိုက် ပစ်မှတ်ထားနိုင်စွမ်း ရှိလေသည်။ သူမသည် အစစ်အမှန် ဝိညာဉ် ကို မသိမ်းပိုက်နိုင်သော်လည်း ကျန်ရှိနေသော အခြားအရာအားလုံးကို ရယူနိုင်ခဲ့သည်။ သူမသည် အနုပညာရှင် တစ်ဦးနှင့်ပင် တူနေပေသည်။ သက်ဆိုင်ရာ အစိတ်အပိုင်းများကို သဘာဝကျကျ ထုဆစ်ပြီး ခွဲထုတ်ကာ ပဲ့တင်ထပ် ဝိညာဉ် ၏ ဖွဲ့စည်းတည်ဆောက်ပုံမှလွဲ၍ အရာအားလုံးကို ယူဆောင်သွားခဲ့၏။

သူ၏ မွေးရာပါ စွမ်းအင်များ အားလုံး၊ သူ၏ သွေးမျိုးဆက် ၏ အခြေခံ တည်ဆောက်ပုံ၊ အသိစိတ်ပင်လယ်၊ ဝိညာဉ်စွမ်းအင်၊ ထျန်းတျန် နှင့် ကောင်းကင်ငယ် အပါအဝင် အရာအားလုံးပင် ဖြစ်လေသည်။

ဟင်းလင်းပြင် သလင်းကျောက် ကို သူမ ယူဆောင်သွားချိန်တွင် ခရာတိုသည် မည်သည့် ကန့်ကွက်သံကိုမျှ မထုတ်ဖော်ခဲ့ချေ။ ၎င်းသည် ပွင့်ပွင့်လင်းလင်း ဝန်ခံမည် မဟုတ်သော်လည်း စိတ်လှုပ်ရှားစွာဖြင့် သူမအတွက် တိတ်တဆိတ် အားပေးနေခဲ့၏။

ထို့အပြင်... ဝေ့ဝူယင်သည် သူ၏ သီအိုရီကို စမ်းသပ်ရန်အတွက် ဟင်းလင်းပြင် သလင်းကျောက် ကို စားသုံးရန် လောလောဆယ် မကြိုးစားနိုင်သေးပေ။ သို့သော်လည်း အခြား ကောင်းကင်ငယ် တစ်ခုကို အမြန်ဆုံး ရယူရန်တော့ သူ ရည်ရွယ်ထားခဲ့သည်။

ကောင်းကင်ငယ်သည် သူမ၏ ကောင်းကင်တံခါး ထဲသို့ စုပ်ယူခံလိုက်ရပြီး သူမ၏ ဖြည်းညှင်းစွာ ချေဖျက်ခြင်းကို ခံနေရသည်။ ကျန်ရှိနေသော အရာများသည်ကား မှန်းဆ၍မရနိုင်သော လုပ်ငန်းစဉ်တစ်ခုအောက်တွင် ဖွဲ့စည်းနေကြသည်။ အနာဂတ်တွင် စစ်သည်တော် တစ်ဦးကို ဖွဲ့စည်းနိုင်ခြေ ရှိနေပေသည်။

"ငါ... အဆင်ပြေ... ပါတယ်... ဒီလုပ်ငန်းစဉ်က... အချိန်နည်းနည်း... ယူရလိမ့်မယ်..."

အသီနာက ပြတ်တောင်းပြတ်တောင်း လေသံဖြင့် ပြောလိုက်သည်။ သူမသည် ပြောင်းလဲခြင်း လုပ်ငန်းစဉ်နှင့် စစ်ဝိညာဉ် တစ်ခုအား သန့်စင်ခြင်း လုပ်ငန်းစဉ်တို့ကို တစ်ပြိုင်နက်တည်း လုပ်ဆောင်နေရသဖြင့် ဆက်သွယ်ရန် သိသိသာသာ ရုန်းကန်နေရပုံပေါ်သည်။ သူမသည် ဆက်စပ်မှု စစ်အလံ တစ်ခုနှင့်ပင် တူနေပေသည်။ မဟုတ်သေး...။ ဆက်စပ်မှု စစ်အလံသည် သူမ၏ သိမ်းပိုက်ခြင်းကို ခံလိုက်ရပြီး သူမ၏ လက်နက်တိုက် အစိတ်အပိုင်း တစ်ခု ဖြစ်လာသည်ဟု ဆိုလျှင် ပို၍ မှန်ကန်ပေလိမ့်မည်။

"ငါတို့ ကူညီပေးလို့ရမယ့် နည်းလမ်း ရှိလား..."

အိုရီ က စိတ်အားထက်သန်စွာ မေးလိုက်သည်။ ၎င်း၏ စိတ်ထဲတွင် အသီနာ သည် မိသားစုဝင် တစ်ဦး ဖြစ်သည်။ ထို့ကြောင့် သူမအတွက် သူ မလုပ်ပေးနိုင်သည့်အရာဟူ၍ မရှိပေ။ ကောင်းကင်ကို ဆန့်ကျင်၍ စစ်ခင်းရမည် သို့မဟုတ် ငရဲ ပြည်ကို ဝိုင်းရံတိုက်ခိုက်ရမည် ဆိုလျှင်တောင်မှ ဝန်လေးမည် မဟုတ်ချေ။ ထို့အပြင် အိုရီ သည် အခြားသူများ၏ အတွေးများကို သိရှိနေသဖြင့် မည်သည့် တွေဝေမှုမျှမရှိဘဲ 'ငါ' ဟု မသုံးနှုန်းဘဲ 'ငါတို့' ဟူ၍သာ ပြောဆိုခဲ့ခြင်း ဖြစ်သည်။

"တကယ်တော့... ရှိတယ်... ဝိညာဉ်... ဝိညာဉ်အလင်း..."

အသီနာ၏ အသံ ပဲ့တင်ထပ် ထွက်ပေါ်လာခဲ့သည်။ ဝိညာဉ်အလင်းသည် ဥပဒေသ မျိုးစေ့ များ၏ အာဟာရ ဖြစ်သည်။ သို့သော် ၎င်းသည် စစ်ဝိညာဉ်များ မပါဝင်ဘဲ စစ်သည်တော် များကို ပြုစုပျိုးထောင်ရန်အတွက် အစားထိုးစရာ တစ်ခုလည်း ဖြစ်ပေသည်။ ထိုစစ်ဝိညာဉ်များ ဆိုသည်မှာ ကောင်းကင်စစ်ပွဲနယ်မြေ ထံမှ ဖန်တီး၍ ဆွဲထုတ်ထားသော ကောင်းကင်ရောင်ခြည် အစုအဝေးများပင် ဖြစ်သည်။

ဖီဆန်လေးထံမှ တုန်ခါနေသော အသံတစ်ခု ပဲ့တင်ထပ်သွားခဲ့သည်။ ၎င်းသည် ၎င်း၏ နေကြယ် ဝိညာဉ် ထံမှ မြစ်ဖျားခံလာသော များပြားလှသည့် နေဝိညာဉ်အလင်း များကို ပို့လွှတ်ပေးလိုက်သည်။ အာဟာရဖြည့်တင်းခြင်း သို့မဟုတ် သန့်စင်ခြင်း ကိစ္စရပ်များနှင့် ပတ်သက်လာလျှင် နေကြယ် များမှ အရာအားလုံးသည် ထိပ်တန်းအဆင့်တွင် ရှိနေပေသည်။ သက်ရှိသတ္တဝါများ အသက်ရှင်သန်ရန်နှင့် ဆင့်ကဲပြောင်းလဲရန် မှီခိုအားထားရသော အမတေ ၏ အခြေခံသည် နေကြယ် များထံမှ မြစ်ဖျားခံလာခြင်း ဖြစ်သည်။

အသီနာသည် ချက်ချင်းပင် ဝမ်းမြောက်သွားပြီး ၎င်းတို့အားလုံးကို ကြိုဆိုလက်ခံလိုက်သည်။ ဤအရာက လုပ်ငန်းစဉ်ကို အဆတစ်ထောင်ခန့် ပိုမို မြန်ဆန်သွားစေလိမ့်မည်။ လျှို့ဝှက် ဝိညာဉ် ငါးခုစလုံးပင် ကူညီပေးရန် မလိုအပ်တော့ပေ။ ဖီဆန်ပေါက်စ သည် နေဝိညာဉ်အလင်း များ၏ ကြီးမားကျယ်ပြန့်သော သိုလှောင်ရုံကြီး တစ်ခု ဖြစ်သည်။ ထို့အပြင် လျှို့ဝှက် ကပ်ဘေး အတွင်း၌ ကိုယ်ပိုင် ခွဲထွက်ခြင်း၊ ချဲ့ထွင်ခြင်းနှင့် ပေါင်းစပ်ခြင်းတို့ကို ဖြတ်သန်းပြီးနောက်တွင် ၎င်း၏ သိုလှောင်ထားမှုများသည် ဖော်ပြ၍မရနိုင်လောက်အောင် အဆုံးအစမဲ့ နေခဲ့ပြီ ဖြစ်သည်။

၎င်းကို မြင်တွေ့လိုက်ရသောအခါ အိုရီ သည် ဝမ်းသာအားရဖြင့် တခစ်ခစ် ရယ်မောလိုက်လေသည်။ အကယ်၍ သူတို့သာ စောစောကတည်းက သိခဲ့လျှင် ဤထက်ပို၍ စောစီးစွာ ကူညီပေးခဲ့မည် ဖြစ်သည်။ သို့သော် လုံးဝ မကူညီသည်ထက် စာလျှင် ယခု ကူညီသည်က အနည်းဆုံတော့ ပိုမို ကောင်းမွန်သည် မဟုတ်ပါလား။

ထိုအတောအတွင်း ဘုရင် နှင့် ခရာတိုတို့သည်လည်း ကိုယ်ပိုင် ရည်ရွယ်ချက်များဖြင့် ပွက်ပွက်ဆူနေခဲ့ကြသည်။ တစ်ခုက သန့်စင်သော သတ်ဖြတ်လိုစိတ် ဖြစ်ပြီး အခြားတစ်ခုကမူ အာဏာရှင်ဆန်သော စိတ်ဓာတ်ပင် ဖြစ်လေတော့သည်။

ဝေ့ဝူယင်သည် ဓားအိမ်ထဲတွင် ထည့်သွင်းထားသော ဒြပ်စင် ထံမှ သဲ့သဲ့မျှ ထွက်ပေါ်နေသည့် ဆေဘာတွန်သံများကို ခံစားနေရသည်။ တစ်ချိန်တည်းမှာပင် သူ၏ နှလုံးသားသည် ကြမ်းတမ်းသော အင်အားများဖြင့် ပြင်းထန်စွာ ခုန်ပေါက်နေခဲ့၏။ အကယ်၍ သူ၏ ရင်ဘတ်ကိုသာ ဖွင့်ဟလိုက်မည်ဆိုလျှင် ကောင်းကင်ကို ဆုတ်ဖြဲပြီး လောကကြီးများကို ချေမွပစ်နိုင်လောက်သည့် အင်အားများပါဝင်သော ရိုက်ခတ်လှိုင်းများ ပေါက်ကွဲထွက်ပေါ်လာမည် ဖြစ်ပေသည်။ ထို့ကြောင့် သူသည် သူ၏ စိတ်ကို ငြိမ်သက်အောင် ထိန်းချုပ်လိုက်ရလေသည်။

***