အခန်း ၂၅၄၅

အပိုင်း(၂၅၄၅)

အထွတ်အထိပ် သူတော်စင် တစ်ပါး၏ ပေါက်ကွဲမှုမှ ကသောင်းကနင်း အကြွင်းအကျန်များ အတွင်း၌ လျှို့ဝှက်အရှင် အဆင့်၏ သက်ရှိလက္ခဏာကို ရှာတွေ့ခြင်းက မည်သူ့၏ မျှော်လင့်ချက်ကိုမဆို များစွာ ကျော်လွန်နေခဲ့သည်။ သို့သော် အဂ္ဂိရတ် တာအို တွင် ယုတ္တိမတန်သော ပါရမီ ကောင်းချီးရထားသည့် လူငယ်တစ်ယောက်၏ ခန္ဓာကိုယ်ကို ရှေးဟောင်း တည်ရှိမှု တစ်ခုက ဝင်ရောက် ပူးကပ်ထားကြောင်း မကြာသေးမီက ထွက်ပေါ်လာခဲ့သော စွပ်စွဲချက်များအပေါ် နားပါးသူ အနည်းငယ်ကတော့ ချွင်းချက် ဖြစ်ပေလိမ့်မည်။

အာရုဏ်ဦး အာဏာရှင် ဧကရာဇ်ပင် ဖြစ်ပေလိမ့်မည်။

သိမ်မွေ့စွာ၊ လျှို့ဝှက်စွာနှင့် သတိကြီးစွာဖြင့် ဝိညာဉ်အာရုံနှင့် ဆင်တူသော လှိုင်းအမျိုးမျိုးက ထိုနယ်မြေကို တိကျစွာ အာရုံစိုက်ကာ ရှင်းလင်း ရှာဖွေသွားကြသည်။

ဤလှိုင်းများကြားတွင်တော့ အစစ်အမှန် အထွတ်အထိပ် တည်ရှိမှုများ ၏ လျှို့ဝှက် အာရုံခံစားမှုများက ဂရုတစိုက် ရောယှက် ပါဝင်နေခဲ့၏။ သူတို့၏ ဟန်ဆောင်ဖုံးကွယ်ထားမှုက အပြစ်အနာအဆာကင်းလုနီးပါး ဖြစ်နေခဲ့သည်။ သူတို့ ပါဝင်ပတ်သက်နေကြောင်းကို ခွဲခြားသိမြင်နိုင်ရန် မျှော်လင့်နိုင်သူ အနည်းငယ်သာ ရှိပြီး ထိုအနည်းငယ်သော သူများမှာပင် သံသယအချို့ ရှိနေနိုင်လေသည်။

ကလန့်...

အထီးကျန်စွာ မျောလွင့်နေသော လူရိပ်၏ ဆေဘာ ရည်ရွယ်ချက်က သူ၏ ပိုင်ရှင်ကို ကာကွယ်ရန် တာဝန်ပေးခံထားရသော အစောင့်ခွေး တစ်ကောင်အလား ကာကွယ်မှုပုံစံဖြင့် ပေါက်ကွဲထွက်လာ၏။ ထိုအခါ ဆေဘာ ဟစ်ကြွေးသံတစ်ခုက အပြင်ဘက်သို့ စူးရှစွာ ထွက်ပေါ်လာကာ ထိုလှိုင်းများကို တန်ပြန် တိုက်ခိုက်လိုက်လေသည်။ နောက်ပြန် သက်ရောက်သွားသော တုံ့ပြန်မှုကြောင့် သင်္ဘော အများအပြား တုန်ခါသွားခဲ့ရသည်။ သို့သော်လည်း သင်္ဘောသားများကြားတွင်တော့ စိတ်လှုပ်ရှားမှုများ လွှမ်းမိုးသွားခဲ့၏။

"ဆေဘာ နှလုံးသား ရည်ရွယ်ချက် ပဲ... လျှို့ဝှက်ကောင်းကင် အဆင့် ရတနာ တစ်ပါးဗျို့... နုနယ်တဲ့ ဝိညာဉ် လက်နက် ဝိညာဉ် ပဲ..."

ဗဟုသုတကြွယ်ဝသည့် စောင့်ကြည့်သူများထံမှ အကဲဖြတ် မှတ်ချက် အများအပြား ထွက်ပေါ်လာခဲ့သည်။ သင်္ဘောသားများက ရှုပ်ယှက်ခတ် လှုပ်ရှားနေကြသော်လည်း သူတို့သည် ထူးဆန်းစွာပင် ဖြေလျှော့ထားသော ပုံစံဖြင့် နေရာယူထားကြ၏။

အပျက်အစီး ဖြစ်ရပ်များ၏ အရိပ်အယောင် တစ်စုံတစ်ရာ ပေါ်ပေါက်လာပါက တစုတစည်းတည်းသော ရေယာဉ်စု တစ်ခုအနေဖြင့် ကာကွယ်ရန် သို့မဟုတ် ဆုတ်ခွာရန် အသင့်ဖြစ်နေခဲ့ကြသည်။ ဤကဲ့သို့ မကြာသေးမီကမှ ဖျက်ဆီးခံထားရသော နယ်မြေမျိုးသည် ဟင်းလင်းပြင် မုဆိုး များအတွက် သေစေနိုင်သော အန္တရာယ်များ ပေါက်ဖွားရာ နေရာတစ်ခု ဖြစ်လေ့ရှိပေသည်။

ထူးဆန်းသည်မှာ အပြင်ပန်း စစ်ဆေးသူများထဲ၌ သူတော်စင် သို့မဟုတ် ထိုထက်မြင့်မားသော တည်ရှိမှု တစ်ဦးတစ်ယောက်မျှ ရှိမနေခဲ့ခြင်းပင် ဖြစ်သည်။ ထို့အပြင် အချိန်ကာလ ထိန်းသိမ်းသူ ၏ လုပ်ရပ်ကြောင့် ဖြစ်ပေါ်လာသော စုပ်ယူနေသည့် လေဆင်နှာမောင်းကိုလည်း သူတို့သည် ရည်ရွယ်ချက်ရှိရှိ လျစ်လျူရှုထားကြ၏။ ထိုအရာသည် အချို့သော အဆင့်မြင့် သတ္တဝါများသာလျှင် သိရှိ သို့မဟုတ် ရှာဖွေတွေ့ရှိနိုင်ရန် မျှော်လင့်နိုင်သည့် အရာမျိုး ဖြစ်သည်။ သို့သော်လည်း သူတို့က ထိုသို့ စုပ်ယူနေရသည့် အကြောင်းရင်းကို စုံစမ်းစစ်ဆေးရန် သိပ်ပြီး အာရုံမစိုက်ကြချေ။ ၎င်းမှာ မစုံစမ်းရန် သတိပေးခံထားရသကဲ့သို့ပင် ဖြစ်နေခဲ့သည်။

ထို့အစား.. သူတို့သည် အရာအချို့ကို စုံစမ်းစစ်ဆေးရန် စိတ်အားထက်သန်နေပုံရပြီး၊ ပီပြင်မှုမရှိသော သက်ရှိလက္ခဏာကို တွေ့ရှိလိုက်ရသောအခါ ရေယာဉ်စု၏ အာရုံစိုက်မှုက လုံးလုံးလျားလျား စုစည်းသွားခဲ့သည်။

သူတို့ လမ်းကြောင်း တစ်ခု စတင်ရေးဆွဲနေချိန်တွင် အမှောင် ဟင်းလင်းပြင် အတွင်း ကျန်ရစ်နေသော တစ်ခုတည်းသော သက်ရှိဖြစ်သည့် တစ်ပိုင်းသေနေသော အလောင်းကောင်ကြီးကတော့ တိတ်ဆိတ်နေခဲ့၏။ သို့သော်လည်း တစ်စိတ်တစ်ပိုင်း ပျက်စီးနေသော ဓားအိမ်အတွင်း ပိတ်မိနေသည့် ဆေဘာကတော့ ၎င်း၏ ကိုယ်ပိုင် စွမ်းအားဖြင့် လှုပ်ရှားနိုင်ရန် ရုန်းကန်နေခဲ့ပြီး၊ ဝင်ရောက်လာမည့် အန္တရာယ်များကို ကာကွယ်ခြင်းထက် ပို၍ မည်သည့်အရာကိုမျှ မလုပ်ဆောင်နိုင်ဘဲ အဆက်မပြတ် ကျရှုံးနေခဲ့သည်။ ၎င်းသည် အခြားတစ်နေရာတွင် ခိုလှုံရန် ရှာဖွေရင်း အာကာသ ဒိုင်မန်းရှင်းထဲတွင် အပေါက်တစ်ခုကို တက်ကြွစွာ ဖောက်ထုတ်ရန် ကြိုးစားနေပုံရလေသည်။

သို့သော်လည်း ကြိုးစားမှုတိုင်းက ၎င်း၏ ဓားအိမ်ကို အနည်းငယ် ထပ်မံ ပျက်စီးစေသည့် ပေါက်ကွဲမှုတစ်ခုနှင့်သာ ရင်ဆိုင်ခဲ့ရသည်။ ထို့နောက် ၎င်းသည် ပိုင်ရှင်ဖြစ်သူကို အင်ပါယာ ဥပဒေသ ၏ အော်ရာများ ပေါင်းစပ်ထားသော ပိုမိုမြင့်မားသည့် လျှို့ဝှက် စွမ်းအင်များဖြင့် အတင်းအကျပ် ကာကွယ်ပေးရပြန်၏။ ၎င်းသည် အစစ်အမှန် လျှို့ဝှက်ကောင်းကင် အဆင့် ရတနာ တစ်ပါး၏ လက္ခဏာပင် ဖြစ်သည်။ ဤသည်မှာ ၎င်း၏ အားနည်းမှုကြောင့် မဟုတ်ဘဲ အာကာသ၏ ဒိုင်မန်းရှင်း သုံးခုနှင့် ဟင်းလင်းပြင် အတွင်း ကသောင်းကနင်းများက ကျန်ရှိနေသေးသောကြောင့် ဖြစ်သည်။ ၎င်းသည် အာကာသ အမျိုးအစား လျှို့ဝှက်ကောင်းကင် ရတနာ တစ်ပါး မဟုတ်သောကြောင့် ထိုနေရာတွင် တည်ရှိနေသော အနှောင့်အယှက်ဖြစ်စေသည့် ကသောင်းကနင်း ဖြစ်ရပ်များကို တည်ငြိမ်စေရန် ကျရှုံးနေခြင်းသာ ဖြစ်လေသည်။

ဤအခြေအနေကို သင်္ဘော ခုနစ်စီး၏ အရည်အချင်းရှိသော သင်္ဘောသားများက အကြိမ်ကြိမ် ခွဲခြမ်းစိတ်ဖြာပြီး သတင်းပို့နေခဲ့ကြသည်။ ဆေဘာ၏ ကြိုးစားမှုများကို ဖုံးကွယ်ထားသော အရာ တစ်ခုမျှ မရှိခဲ့ချေ။ ၎င်းသည် သတိလစ်နေသော ပိုင်ရှင်ကို ပြိုကျနေသော အိမ်ထဲမှ ဆွဲထုတ်ရန် ကြိုးစားနေသည့် အားနည်းနေသော သစ္စာရှိ ခွေးတစ်ကောင်နှင့် တူနေခဲ့ပြီး ထွက်ပေါက်တိုင်းက ပိတ်ဆို့နေသဖြင့် မလုပ်ဆောင်နိုင် ဖြစ်နေခဲ့သည်။ လောဘသာ မရှိခဲ့လျှင် ဤမြင်ကွင်းက သနားစရာ ကောင်းနေနိုင်ပေသည်။

လောလောလတ်လတ် တည်ထောင်ထားသော စိတ်အာရုံနယ်ပယ် တစ်ခုကို အသုံးပြု၍ အထွတ်အထိပ် သူတော်စင် အများအပြားသည် အနည်းငယ်မျှသော တုန်ခါမှု အရိပ်အယောင်လေးကိုပင် ချန်မထားခဲ့ဘဲ ဆက်သွယ်နေကြ၏။ အလွန် ပါးနပ်သော ဆက်သွယ်ရေး နည်းလမ်းမှတစ်ဆင့် သူတို့၏ တည်ရှိမှုကို ဖုံးကွယ်ထားခြင်း ဖြစ်သည်။ စိတ်ပိုင်းဆိုင်ရာ ပုံတူကိုယ်ပွားများမှတစ်ဆင့် အသံများ ပဲ့တင်ထပ် ထွက်ပေါ်လာခဲ့ပြီး၊ ထိုကိုယ်ပွားများထဲတွင် ရင်းနှီးနေသော ပုံရိပ်များ ပါဝင်နေခဲ့သည်။

ပင့်ကူ မျိုးနွယ်များ၏ အထွတ်အထိပ် သူတော်စင် နှစ်ပါးဖြစ်သော ဂိုလိုင်ယက်ငှက် အရှင်သခင် နှင့် ရိုးရွဲ သူတော်စင် မဟူရာ မုဆိုး အရှင်သခင်မ၊ ထို့ပြင် ပြင်ပ အထွတ်အထိပ် သူတော်စင် များအဖြစ် လူသိများသော ရိုးရွဲ သူတော်စင် ယန်ကျိ နှင့် ရိုးရွဲ သူတော်စင်တီတို့လည်း ပါဝင်နေခဲ့၏။ သူတို့သည် ဤစစ်ဆင်ရေးကို ဦးဆောင်ခဲ့ကြသူများ ဖြစ်သည်။ သို့သော်လည်း ထို့ထက် ပိုမို၍ ရှိနေသေးသည်။

ရိုးရွဲ သူတော်စင် အများအပြား ပါဝင်နေသော ဤစစ်ဆင်ရေး၏ အရိပ်ထဲတွင်၊ ချောမွေ့ပြီး ဖောင်းမို့နေသော ကလေးအသားအရေမျိုးနှင့် လုံးဝန်းသော ဗိုက်တစ်လုံးကို ပိုင်ဆိုင်ထားပြီး အထွတ်အထိပ် သူတော်စင် တစ်ပါး၏ ခမ်းနားသော အော်ရာ လုံးဝကင်းမဲ့နေသည့် အရပ်ပုပု၊ ခန္ဓာကိုယ် တုတ်တုတ်နှင့် ထိပ်ပြောင်နေသော အမျိုးသား တစ်ဦးဖြစ်သည့် အဆောင် ကြယ်တာရာ နန်းတော်သခင် နှင့်၊ ခန္ဓာကိုယ် ကောက်ကြောင်းများ အားလုံးကို ဖုံးကွယ်ထားသော အထပ်ထပ် ဝတ်ရုံများ၊ လေလွင့်နေသော မီးခိုးရောင် ဆံပင်ရှည်တို့နှင့် အရပ်ရှည်ရှည်၊ ပိန်ပါးပါး အမျိုးသမီး တစ်ဦးဖြစ်သည့် အပျက်အစီး ကြယ်တာရာ နန်းတော်သခင် တို့သည်လည်း ဝိညာဉ်ကိုယ်ပွားများအဖြစ် ဤနေရာတွင် ရှိနေခဲ့ကြသည်။

စစ်ဆင်ရေးအတွင်း တောက်ပသော ကြယ် နန်းတော် ၏ နန်းတော်သခင် ကို "ဆွေးနွေးမှု" တစ်ခုတွင် ပါဝင်နေစေရန် အာရုံလွှဲထားဖို့ သူတို့ကို တာဝန်ပေးထားခြင်း ဖြစ်သည်။

ကောင်းကင်ဖခင် အရှင်သခင် နှင့် သူ၏ မိသားစုဖြစ်သော မြေကမ္ဘာမိခင် အရှင်သခင် နှင့် ကြာပန်းနှစ်သွယ် အရှင်သခင် တို့သည်လည်း စောစောစီးစီး နုတ်ထွက်မသွားခဲ့လျှင် ဤနေရာတွင် ရှိနေခဲ့မည် ဖြစ်သည်။

စာရင်းသွင်းထားသော ပုဂ္ဂိုလ်များ အားလုံးကို ရေတွက်ကြည့်မည်ဆိုပါက ရိုးရွဲ သူတော်စင် ယွီရှီ ၏ ကိုယ်ပွား အပါအဝင် ရိုးရွဲ သူတော်စင် ခုနစ်ပါးနှင့်၊ ဒုက္ခိတ တစ်ပိုင်း ဖြစ်နေသော လုံရှီယာ ကို ထည့်သွင်းစဉ်းစားမည်ဆိုလျှင် ပေါင်းစည်းထားသော သို့မဟုတ် မပေါင်းစည်းရသေးသော ကောင်းကင်ငယ် တမန်တော် ရှစ်ပါး ပါဝင်ပတ်သက်နေခဲ့သည်။ ဤစစ်ဆင်ရေး၏ အတိုင်းအတာသည် လုံးဝကို ကွဲပြားသော အဆင့်တစ်ခုတွင် ရှိနေခဲ့ခြင်းပင်။

ဂလက်ဆီ အများစုတွင် ပဲ့တင်ထပ် ဝိညာဉ် အဆင့် ကျင့်ကြံသူ တစ်ယောက်ပင် မရှိကြပေ။ ၁၅ ယောက်တောင် ပူးပေါင်း အလုပ်လုပ်နေသည်ဆိုလျှင် ဆိုဖွယ်ရာ မရှိတော့ချေ။

အတင်းအကျပ် ကျေးကျွန်ပြုခံရခြင်း သို့မဟုတ် ပြတ်သားသော အလိုအလျောက် သိစိတ်ကြောင့် သေဆုံးမှုများ သို့မဟုတ် နုတ်ထွက်မှုများ ရှိနေသော်ငြား၊ ဤသည်မှာ ရက်စက်စွာ သွားရည်ကျစရာ ကောင်းသော လူစာရင်း တစ်ခုပင် ဖြစ်သည်။ သို့သော်လည်း ထိုမူလ အရေအတွက်များကတော့ သိသိသာသာ လျော့ကျသွားခဲ့ပြီ ဖြစ်၏။

ပညာရှိ သူတော်စင် တစ်ပါး ပြောခဲ့သလိုပင်။

"လူတွေက အစီအစဉ်ဆွဲပြီး၊ ကောင်းကင်ဘုံက ရယ်မောတယ်..."

၁၅ ယောက်မှသည် ရိုးရွဲ သူတော်စင် သုံးပါးဖြစ်သည့် မဟူရာ မုဆိုး အရှင်သခင်မ၊ ယန်ကျိ နှင့် တီ တို့အပြင်၊ ပေါင်းစည်းထားသော သို့မဟုတ် မပေါင်းစည်းရသေးသော ကောင်းကင်ငယ် တမန်တော် သုံးပါးဖြစ်သည့် ဂိုလိုင်ယက်ငှက်၊ အပျက်အစီး ကြယ်တာရာ နန်းတော်သခင် နှင့် အဆောင် ကြယ်တာရာ နန်းတော်သခင် တို့ အထိသာ ကျုံ့ဝင်သွားခဲ့သည်။ ၁၅ ယောက်မှနေ၍ သိသိသာသာ လျော့ကျသွားခဲ့ခြင်းပင်။ သို့သော်လည်း...

"ဒီအရာကို မင်း စီစဉ်ခဲ့တာ မဟုတ်လား..."

ရိုးရွဲ သူတော်စင် တီ သည် မှုန်ကုပ်ကုပ် ဖြစ်ကာ ဒေါသထွက်နေပြီး ရိုးရွဲ သူတော်စင် မဟူရာ မုဆိုး အရှင်သခင်မ ကို အနည်းငယ်မျှ ယဉ်ကျေးမှုမရှိဘဲ တိုက်ရိုက် မေးခွန်းထုတ်လိုက်သည်။ သူသည် ပေါက်ကွဲမှု၏ ရလဒ်များကို စုံစမ်းစစ်ဆေးရန် အရှင်သခင် သံမဏိ အစောင့်အရှောက် နောက်သို့ လိုက်သွားတော့မည် ဖြစ်သည်။ သို့သော် သူ ကသောင်းကနင်းထဲသို့ ဝင်ရောက်သွားသောအခါ သူ၏ စိတ်ကိုယ်ပွားသည် ရပ်တန့်သွားကာ ပိုင်ရှင်ဖြစ်သူနှင့် အဆက်အသွယ် ပြတ်တောက်သွားခဲ့၏။ နတ်ဘုရားဆန်ဆန် အင်အားတစ်ခုကြောင့် အချိန်ကာလ ထိန်းသိမ်းသူ က သူ့ကို ဖျက်ဆီးပစ်လိုက်ခြင်းပင် ဖြစ်လေသည်။

သူသည် ဟင်းလင်းပြင် ရေစီးကြောင်း တစ်ခုအတွင်း ပိတ်မိသွားခဲ့ပြီး၊ မတူညီသော အချိန်ကာလမျဉ်း နှင့် အာကာသ သတ်မှတ်ချက် တစ်ခုအတွင်းသို့ ဝင်ရောက်သွားစေခဲ့ကာ သူ၏ အထဲတွင် တည်ဆောက်ထားသော ပြင်းထန်သည့် ဝိရောဓိ စွမ်းအင်များကို မဖယ်ရှားနိုင်ခဲ့သည်မှာ သေချာပေသည်။ ထို့နောက် ၎င်းထဲမှ လွတ်မြောက်လာသောအခါ အချိန်ကာလ ထိန်းသိမ်းသူ ၏ အပြစ်ပေးခြင်းကို ခံလိုက်ရခြင်း ဖြစ်၏။ ၎င်းသည် ဤနေရာရှိ လူတိုင်း၏ တညီတညွတ်တည်းသော ကောက်ချက်ချမှုပင် ဖြစ်သည်။

အဘယ်ကြောင့်ဆိုသော် ပဲ့တင်ထပ် ဝိညာဉ် တစ်ခု၏ ပေါက်ကွဲမှုသည်သာလျှင် ဟင်းလင်းပြင် ရေစီးကြောင်း တစ်ခုကို ဖော်ထုတ်နိုင်သည်အထိ ဟင်းလင်းပြင် ကို အနှောင့်အယှက် ပေးနိုင်သော တစ်ခုတည်းသော အရာ ဖြစ်နေသောကြောင့်ပင်။

“အရူးကောင်...”

သံမဏိ အစောင့်အရှောက်သည် ရက်စက်ကြမ်းကြုတ်သော အရူးတစ်ယောက် ဖြစ်သော်လည်း၊ သူငယ်ချင်းတစ်ယောက် ဖြစ်ခဲ့သည်။ သူသည် သူ၏ အရူးတစ်ယောက် ဖြစ်ခဲ့၏။ ယခုအခါတွင်တော့ ကမ္ဘာကြီးအပေါ် သူ၏ လွှမ်းမိုးမှု အရိပ်အယောင် အားလုံးသည် အချိန်ကာလ မှတ်တမ်းများထဲမှ ဖျက်ပစ်ခံလိုက်ရပြီ ဖြစ်သည်။ အခြားသူများ၏ မှတ်ဉာဏ်ထဲတွင် ခွဲခြားမရနိုင်သော အရိပ်မည်းတစ်ခုအဖြစ်သာ ကျန်ရစ်ခဲ့ပြီး၊ သူ တစ်ချိန်က ဖန်တီးခဲ့ဖူးသော ခံစားချက်များကိုသာ ပြန်လည် နှိုးဆွပေးနိုင်တော့လေသည်။

သို့သော်လည်း ရိုးရွဲ သူတော်စင် မဟူရာ မုဆိုး အရှင်သခင်မ ဖန်တီးထားသော နောက်ကွယ်မှ ယုတ်မာသည့် အကြံအစည်ကိုတော့ သူ မသိရှိခဲ့ပေ။ အပေါ်ယံတွင်တော့ သူတို့အားလုံး တုန်လှုပ်နေခဲ့ကြသော်လည်း အမှန်တရားကို သိနေသူ နှစ်ယောက် ရှိနေခဲ့၏။

ထိုသူနှစ်ယောက်သည် ရိုးရွဲ သူတော်စင် မဟူရာ မုဆိုး အရှင်သခင်မ နှင့် အဆောင် ကြယ်တာရာ နန်းတော်သခင် တို့မှလွဲ၍ အခြားသူများ မဟုတ်ကြပေ။ သို့သော်လည်း... သူတို့ နားမလည်နိုင်သည်က အထွတ်အထိပ် သူတော်စင် သုံးပါးနှင့် ကိုယ်ပွားတစ်ခု ဆုံးရှုံးရသည်အထိ မည်သို့မည်ပုံ ဆိုးရွားစွာ မှားယွင်းသွားခဲ့သနည်း ဆိုသည်ကိုပင်။

***