အခန်း ၅၆၁

အခန်း ၅၆၁ - ဘေးအန္တရာယ်ကြီး ပေါက်ကွဲထွက်ပေါ်လာခြင်း၊ မြို့တော် ဝိုင်းရံခံရခြင်း (၂)

ထို့ကြောင့် ဤ လျှို့ဝှက်နယ်မြေ ကမ္ဘာများ၏ ဝင်ပေါက်များကို ရှာဖွေရန် အတွက် ကျင့်ကြံသူများသည် ကြွေကျ နတ်သက်တမ်းရှည် တောင်တန်း၏ နက်ရှိုင်းသော နေရာများသို့ ဝင်ရောက်ကြရန် လိုအပ်ပေသည်။

ရှာတွေ့သွားသည် နှင့်တစ်ပြိုင်နက် ၎င်းသည် လွတ်လပ်သော ကျင့်ကြံသူများ အတွက် ကြီးမားလှသော အခွင့်အရေး တစ်ခုကို ကိုယ်စားပြုပေသည်။

သို့သော် ထိုကဲ့သို့သော ရှာဖွေမှုများမှာ အလွန်အမင်း အန္တရာယ်များလှ၏။

အဘယ်ကြောင့်ဆိုသော် ကြွေကျ နတ်သက်တမ်းရှည် တောင်တန်းသို့ ဝင်ရောက်လာသော ကျင့်ကြံသူ အရေအတွက်မှာ များပြားလွန်းသောကြောင့်ပင် ဖြစ်သည်။

အကယ်၍ လူသူကင်းမဲ့သော တောရိုင်းထဲတွင် အခြား ကျင့်ကြံသူများ နှင့် ကြုံတွေ့ရပါက၊ ကြီးမားသော တိုက်ပွဲ တစ်ခု နှင့် သေချာပေါက် ရင်ဆိုင်ရမည် ဖြစ်၏။

နေ့စဉ်နေ့တိုင်း ဘေးဒုက္ခ ကျင့်ကြံသူများ၏ သတ်ဖြတ်ခြင်းကို ခံရသော ကျင့်ကြံသူ အတော်များများ ရှိပေသည်။

သို့သော် ထိုသို့ ဖြစ်လင့်ကစား ကြွေကျ နတ်သက်တမ်းရှည် တောင်တန်းတွင် ပါဝင်သော အကျိုးကျေးဇူးများမှာ ကြီးမားလွန်းလှ၏။

အခွင့်အရေးများကို ရှာဖွေရန် အတွက် တောင်တန်း နက်ရှိုင်းရာသို့ စွန့်စား ဝင်ရောက်ရန် ဤကဲ့သို့သော အန္တရာယ်များကို ရင်ဆိုင်လိုသော ကျင့်ကြံသူ အများအပြား ရှိကြပေသည်။

အမှန်တကယ်တော့ ကျင့်ကြံသူ အများအပြားသည် အောင်မြင်ခဲ့ကြပြီးနောက် ကောင်းကင်ယံ အထိ တက်လှမ်းသွားခဲ့ကြ၏။

ဟွာရှန် သန့်ရှင်းသော မြေမြတ်မဟာ လေးခုမှ ဟွာရှန် ကျင့်ကြံသူများ၏ တက်လှမ်းမှုများပင်လျှင် ကြွေကျ နတ်သက်တမ်းရှည် တောင်တန်းနှင့် နီးကပ်စွာ ဆက်စပ်နေပေသည်။

ဤသည်က ထိုနေရာကို မရေမတွက်နိုင်သော ကျင့်ကြံသူများ၏ စိတ်နှလုံးထဲတွင် သန့်ရှင်းသော မြေမြတ်မဟာ တစ်ခု ဖြစ်လာစေခဲ့၏။

နှစ်စဉ်နှစ်တိုင်း မရေမတွက်နိုင်သော ကျင့်ကြံသူများသည် ကြွေကျ နတ်သက်တမ်းရှည် တောင်တန်းသို့ လာရောက်ကြသည်။

"အင်း။"

ဤသည်ကို ကြားလိုက်ရချိန်တွင် စုဝေဝေသည်လည်း သက်သာရာရစွာ သက်ပြင်းချလိုက်၏။

သူမ၏ ခင်ပွန်းသည် အခွင့်အရေးတစ်ခု အတွက် အန္တရာယ်များအား လျစ်လျူရှုမည်ကို သူမ စိုးရိမ်နေခဲ့သည်။

သို့သော် အခြေအနေကို ကြည့်ရသလောက်တော့ သူမ၏ ခင်ပွန်းသည် သူမ ထင်မှတ်ထားသည်ထက် ပိုမို သတိထားတတ်ပုံ ရပေသည်။

"ဒါနဲ့လေ ယောက်ျား။"

"အကယ်၍ ယောက်ျားက ကိုယ့်ရဲ့ ကျင့်ကြံမှုကို မြန်မြန် မြှင့်တင်ချင်တယ် ဆိုရင်၊ ယိုယိုကို စဉ်းစားကြည့်သင့်တယ်။"

"သူမမှာ ထုံယွီ ဖီးနစ် ရိုးတွင်းခြင်ဆီ ခန္ဓာကိုယ် ရှိတယ်၊ သူမရဲ့ ခန္ဓာကိုယ်ထဲမှာ ဝိညာဉ်ချီတွေ ပါဝင်နေတာက သူမကို ထိပ်တန်း အဆင့် မီးဖို တစ်ခု ဖြစ်လာစေတယ်။"

"အကယ်၍ ယောက်ျားသာ သူမ နဲ့အတူ တွဲဖက် ကျင့်ကြံမယ်ဆိုရင်၊ ယောက်ျားရဲ့ ကျင့်ကြံမှုက သေချာပေါက် မြန်မြန် တိုးတက်လာလိမ့်မယ်။"

စုဝေဝေသည် ကျန်းဖန်ကို အလေးအနက် ကြည့်ပြီး သူမ၏ အကြံပြုချက်ကို ပြောလိုက်၏။

"ဘာလို့ ရုတ်တရက်ကြီး ဒီကိစ္စကို ပြောလာရတာလဲ။"

ကျန်းဖန် မျက်လုံးများကို တဖျပ်ဖျပ် ခတ်လိုက်သည်။ စုဝေဝေက ဤကိစ္စကို တက်ကြွစွာ ပြောဆိုလာလိမ့်မည်ဟု သူ မမျှော်လင့်ထားခဲ့ချေ။

မည်သို့ဆိုစေ ဤသည်မှာ မယားငယ် ယူရန် အကြံပြုနေခြင်း မဟုတ်ပါလား။

"ယောက်ျားက ရွှေအမြုတေ ကျင့်ကြံသူလေ၊ အနာဂတ် ကျင့်ကြံခြင်း လောကရဲ့ မဟာ စွမ်းအားရှင် တစ်ယောက်ပဲ။"

"မယား သုံးယောက်၊ မယားငယ် လေးယောက် ဆိုရင်တောင်မှ၊ အဲဒါက အတော်လေး ပုံမှန်ပါပဲ။"

"ပြီးတော့ ယောက်ျားရဲ့ ကျင့်ကြံခြင်း အတွက်လည်း ပါတာပေါ့။"

"အကယ်၍ ယောက်ျားရဲ့ ကျင့်ကြံမှုသာ တိုးတက်လာနိုင်မယ်ဆိုရင် အရာအားလုံးက တန်ပါတယ်။"

"ပိုပြီး အရေးကြီးတာက ဟိုတလောက ယောက်ျား နဲ့ ရင်ပေါင်တန်းနိုင်ဖို့ ငါ တော်တော်လေး အခက်အခဲ ဖြစ်နေရတယ်။"

စုဝေဝေ၏ မျက်နှာလေး ရဲတက်သွားသည်။ သူမ၏ လှပသော မျက်လုံးများမှာ အရည်လဲ့နေကာ ကျန်းဖန်ကို ရှက်ရွံ့စွာဖြင့် ကြည့်လိုက်၏။

အစပိုင်းတွင်တော့ သူမသည် သက်တောင့်သက်သာ ရှိခဲ့ပြီး အသာစီး ရထားခဲ့သည်ဟုပင် ခံစားခဲ့ရသည်။

သို့သော် သူမ ခင်ပွန်း၏ ကျင့်ကြံမှုသည် အဆက်မပြတ် ဖောက်ထွင်း ကျော်လွန်လာပြီး သူ၏ ခန္ဓာကိုယ်မှာ နတ်ဘုရား သားရဲတစ်ကောင်ကဲ့သို့ ပိုမို ကြံ့ခိုင်လာလိမ့်မည်ဟု မည်သူက ထင်မှတ်ထားခဲ့မည်နည်း။

ဤသည်က သူမ အတွက် အရာအားလုံးကို ပို၍ပို၍ ခက်ခဲလာစေခဲ့ပြီး သူမသည် အပြင်းအထန် ကြိုးစားနေရ၏။

ရိုးရိုးသားသားဆိုရလျှင် ကျင့်ကြံခြင်း လောကရှိ မဟာ စွမ်းအားရှင်များတွင် အဘယ်ကြောင့် လက်တွဲဖော် အများအပြား ရှိလေ့ ရှိသနည်း ဆိုသည်ကို သူမ နားလည် သဘောပေါက်သွားခဲ့သည်။

သူတို့၏ ခန္ဓာကိုယ်များမှာ အလွန်အမင်း အစွမ်းထက်လွန်းသဖြင့် တာအို လက်တွဲဖော် တစ်ဦးတည်း နှင့် မလုံလောက်သောကြောင့် ဖြစ်တန်ရာသည်။

ထို့ကြောင့် တာအို လက်တွဲဖော် အများအပြား ရှိနေခြင်းက သဘာဝကျလှပေသည်။

ထို့အပြင် ဤကဲ့သို့သော ကိစ္စများနှင့် ပတ်သက်၍ သူမတွင် မည်သည့် ဆန့်ကျင်မှုမျှ မရှိခဲ့ချေ။

မည်သို့ဆိုစေ သေမျိုး လောကတွင် ဖြစ်စေ ကျင့်ကြံခြင်း လောကတွင် ဖြစ်စေ စွမ်းဆောင်ရည် ရှိသော မည်သည့် အမျိုးသားမဆို ဇနီးများ နှင့် မယားငယ် အများအပြား ရှိလေ့ ရှိသည် မဟုတ်ပါလား။

ဤအဆင့်တွင် တာအို လက်တွဲဖော် တစ်ဦးတည်းသာ ရှိခြင်းက အတော်လေး ရှားပါးလှပေသည်။

ပို၍ အရေးကြီးသည်မှာ လုယိုယို၏ ထူးခြားသော ခန္ဓာကိုယ် ဖွဲ့စည်းပုံသည် သူမ၏ ခင်ပွန်း အတွက် အမှန်တကယ် အကျိုးရှိပေသည်။

လုယိုယို နှင့်အတူ တွဲဖက် ကျင့်ကြံခြင်းက သူ့ကို သေချာပေါက် အကူအညီ ဖြစ်စေမည် ဖြစ်ရာ၊ ၎င်းမှာ မှန်ကန်သော ရွေးချယ်မှု တစ်ခုပင် ဖြစ်၏။

အဘယ်ကြောင့်ဆိုသော် ခင်ပွန်း၏ ကျင့်ကြံမှု ပိုမို အစွမ်းထက်လာလေလေ အနာဂတ်မှာ ပိုမို လုံခြုံ ဘေးကင်းလေလေ ဖြစ်သောကြောင့်ပင် ဖြစ်သည်။

"ဟုတ်ပါတယ်။ ယိုယို့ဘက်ကို ယောက်ျား စိုးရိမ်ပူပန်နေစရာ မလိုပါဘူး။"

"အရင်က၊ ဒီအကြောင်းကို ငါ အရိပ်အမြွက် ပြောခဲ့ဖူးတယ်၊ ပြီးတော့ ယိုယိုကလည်း ဆန္ဒ ရှိတယ်တဲ့။" စုဝေဝေက ပြောလိုက်၏။

"အကယ်၍ သူမက ဆန္ဒရှိတယ် ဆိုရင်တော့၊ သူမကို လက်ခံလိုက်တာက ဘာမှ ဆိုးကျိုး မရှိပါဘူး။"

ကျန်းဖန် သူ၏ မေးစေ့ကို ပွတ်သပ်လိုက်သည်။

လုယိုယိုတွင် သူမ၏ ခန္ဓာကိုယ် အတွင်း၌ ရှေးဟောင်း ဝိညာဉ်တစ်ခု ဖုံးကွယ် တည်ရှိနေသည့် လျှို့ဝှက်ချက်များ ရှိသော်ငြားလည်း ၎င်းမှာ အရေးမကြီးချေ။ အဘယ်ကြောင့်ဆိုသော် ကျင့်ကြံခြင်း လောကရှိ ကျင့်ကြံသူတိုင်းတွင် လျှို့ဝှက်ချက်များ ရှိကြသောကြောင့်ပင် ဖြစ်၏။

တစ်ဖက်လူကို သူ ထိန်းချုပ်နိုင်စွမ်း ရှိနေသရွေ့တော့ ၎င်းမှာ ကြီးမားသော ပြဿနာ တစ်ခု မဟုတ်ပေ။

ထို့အပြင် သူသာ လုယိုယိုကို လက်ခံနိုင်မည် ဆိုပါက ၎င်းသည် နှစ်ဦးနှစ်ဖက် အကျိုးရှိစေမည့် အခြေအနေ တစ်ရပ် ဖြစ်လာနိုင်ပေသည်။

ဤသည်ကို ကြားလိုက်ရချိန်တွင် စုဝေဝေသည် သက်သာရာ ရသွားသည်။ ဤအမျိုးသား နှင့် ရင်ဆိုင်ရာတွင် အနာဂတ်၌ သူမတွင် ညီမ တစ်ဦး ရှိလာတော့မည် ဖြစ်ကြောင်း သူမ သဘောပေါက်သွားခဲ့၏။

ဤအမျိုးသား မည်မျှ ပြင်းထန် ကြမ်းတမ်းကြောင်းကို ထည့်တွက် စဉ်းစားလိုက်ပါက သူမ အနေဖြင့် ဝန်ပိနေသည်ဟု ခံစားရခြင်းမှာ သူမ၏ အမှား မဟုတ်ချေ။

သူ့ထံတွင် ဤမျှလောက်များပြားသော ခံနိုင်ရည် နှင့် စွမ်းအင်များကို ဘယ်နေရာကနေ ရရှိလာသနည်း ဆိုသည်ကို သူမ နားမလည်နိုင်ခဲ့ချေ။ ယင်းမှာ အဆုံးအစမရှိသကဲ့သို့ပင် ဖြစ်၏။

ဝုန်း ဒိုင်း~~

ဤအခိုက်အတန့်တွင် ဧရာမ တုန်ခါမှုကြီး တစ်ခုသည် အပြင်ဘက်မှ ရုတ်တရက် ထွက်ပေါ်လာခဲ့ပြီး ကောင်းကင်နှင့် မြေကြီးကို ဖျက်ဆီးပစ်နိုင်သော စွမ်းအား တစ်ရပ်သည် ကောင်းကင်ယံမှ ဆင်းသက်လာကာ ဟွာမင်မြို့ကို လုံးလုံးလျားလျား ဖျက်ဆီးပစ်ရန် ကြိုးစားနေသကဲ့သို့ ပြင်းထန်စွာ ရိုက်ချလိုက်၏။

သို့သော် ဟွာမင်မြို့၏ အဆင့် ၄ အစီအရင်သည် ချက်ချင်း သက်ဝင်လှုပ်ရှားလာခဲ့၏။ ပုံသဏ္ဍာန်မဲ့ အတားအဆီး တစ်ခုသည် အရပ်မျက်နှာ အနှံ့အပြားသို့ လွှမ်းခြုံသွားကာ သိပ်သည်းသော အစီအရင် အင်းကွက်များဖြင့် ဖုံးလွှမ်းသွားခဲ့သည်။

စွမ်းအား နှစ်ခုသည် မျက်တောင်တစ်ခတ် အတွင်း ရိုက်ခတ်သွားပြီး ကြောက်မက်ဖွယ်ကောင်းသော လှိုင်းများကို ဖြစ်ပေါ်စေခဲ့၏။

မြေကြီး တစ်ခုလုံး တုန်ခါသွားခဲ့သည်။

သို့သော် ဤသို့ ဖြစ်လင့်ကစား၊ အဆင့် ၄ အစီအရင်၏ အကာအကွယ်အောက်တွင် ဟွာမင်မြို့သည် မည်သည့် ထိခိုက်မှုမျှ မရရှိခဲ့ချေ။

"ဘာတွေ ဖြစ်ကုန်တာလဲ။"

စုဝေဝေသည် ချက်ချင်း ဇဝေဇဝါ ဖြစ်သွားခဲ့သည်။ ဘာတွေ ဖြစ်ပျက်ခဲ့သနည်း။ ဤမျှ ကြီးမားသော ဆူညံ ပွက်လောရိုက်မှုကြီး ဘာကြောင့် ဖြစ်ပေါ်လာရသနည်းကို သူမ မသိခဲ့သော်ငြားလည်း ကြောက်မက်ဖွယ်ကောင်းသော ဖျက်ဆီးခြင်း စွမ်းအားကို သူမ ခံစားနိုင်ပေသည်။

"ယွမ်ယင်း ကျင့်ကြံသူ တစ်ယောက် လှုပ်ရှားလိုက်တာပဲ၊ ဟွာမင်မြို့ကို တိုက်ခိုက်နေတာ။"

ကျန်းဖန်၏ မျက်နှာ အမူအရာမှာ အလွန် တည်ကြည်လေးနက်နေခဲ့၏။

သူ၏ ဝိညာဉ်အာရုံသည် အပြင်ဘက်သို့ ပြန့်နှံ့သွားပြီး အရပ်မျက်နှာ အနှံ့အပြားသို့ လွှမ်းခြုံသွားသည်။ ထိုအခါ ကောင်းကင်ယံတွင် မီးခိုးရောင် ဝတ်စုံဝတ် အကြီးအကဲ တစ်ဦး ထွက်ပေါ်လာသည်ကို သူ အာရုံခံမိလိုက်၏။ ထို့အပြင် အခြား အကြီးအကဲ လေးဦးလည်း ရှိနေကာ သူတို့ တစ်ဦးစီတိုင်းသည် ယုံကြည်နိုင်စရာ မရှိလောက်အောင် အစွမ်းထက်သော ရောင်ဝါကို ထုတ်လွှတ်နေလေသည်။ သူတို့အားလုံးမှာ ယွမ်ယင်း အဆင့်တွင် ရှိကြ၏။

သံသယဖြစ်ဖွယ် မရှိအောင်ပင် ဟွာမင်မြို့ တစ်ခုလုံးကို ဝိုင်းရံထားသော ယွမ်ယင်း စုစုပေါင်း ငါးဦး ဤနေရာတွင် ပေါ်လာခြင်း ဖြစ်သည်။

"ဘာလို့ ယွမ်ယင်းတွေက ဟွာမင်မြို့ကို တိုက်ခိုက်ရတာလဲ။"

စုဝေဝေသည် အလွန်အမင်း ဇဝေဇဝါ ဖြစ်နေခဲ့၏။

အဘယ်ကြောင့်ဆိုသော် မြို့နှင့် ပတ်သက်သော သူမ၏ နားလည်မှုအရ ဟွာမင်မြို့သည် ရန်သူများ၏ တိုက်ခိုက်ခြင်းကို မခံရသည်မှာ အချိန်အတော် ကြာမြင့်နေပြီ ဖြစ်သောကြောင့်တည်း။

သို့သော် ယခုအခါ ယွမ်ယင်း ကျင့်ကြံသူ ငါးဦး လာရောက် တိုက်ခိုက်နေခြင်းမှာ တကယ်ကို နားလည်ရခက်လှပေသည်။

"ဖြစ်နိုင်တာက ပန်းပွင့် လောကနိဗ္ဗာန် တာအိုမိတ်ဆွေ နဲ့ တစ်ခုခု ပတ်သက်နေတာ ဖြစ်မယ်။"

"သူက ကြွေကျ နတ်သက်တမ်းရှည် တောင်တန်းမှာ ရတနာ တစ်ခုခု ရခဲ့တယ်လို့ ပြောကြတယ်။"

"အရင်က သူ တိမ်တိုက် တာအိုမိတ်ဆွေနဲ့တောင် ကြီးမားတဲ့ တိုက်ပွဲကြီး တစ်ခု ဖြစ်ခဲ့ပြီး၊ နှစ်ယောက်စလုံး ပြင်းထန်တဲ့ ဒဏ်ရာတွေ ရခဲ့ကြတာလေ။"

"ယွမ်ယင်း ငါးယောက်က လက်စားချေဖို့ ရောက်လာတာ ဖြစ်နိုင်တယ်လို့ ငါ သံသယရှိတယ်၊ ငါတို့က ကံဆိုးပြီး သူတို့ရဲ့ ကြားထဲ ညပ်သွားတာပဲ။"

ကျန်းဖန်သည် မျက်လုံးများကို မှေးကျဉ်းလိုက်ပြီး၊ အတိတ်က အဖြစ်အပျက်များကို ပြန်လည် အမှတ်ရလိုက်၏။

ဟွာမင်မြို့သို့ မရောက်လာမီ သူသည် ယွမ်ယင်း နှစ်ဦး အကြား တိုက်ပွဲတစ်ခုကို မြင်တွေ့ခဲ့ရသည်။

သူတို့မှာ ပန်းပွင့် လောကနိဗ္ဗာန် တာအိုမိတ်ဆွေ နှင့် တိမ်တိုက် တာအိုမိတ်ဆွေတို့ပင် ဖြစ်၏။

ပန်းပွင့် လောကနိဗ္ဗာန် တာအိုမိတ်ဆွေသည် အသာစီး ရရှိခဲ့ပြီး တိမ်တိုက် တာအိုမိတ်ဆွေကို နောက်ဆုတ်သွားစေနိုင်ခဲ့သော်ငြားလည်း၊ သူသည်လည်း သိပ်ပြီး အခြေအနေ ကောင်းလှသည် မဟုတ်ပေ။ ပြင်းထန်သော ဒဏ်ရာများ ရရှိထားနိုင်ခြေ များလှပေသည်။

ထို့ကြောင့် သူသည် ဟွာမင်မြို့တွင် ပုန်းအောင်းနေခဲ့ပြီး ဘယ်သောအခါကမျှ အပြင်သို့ မထွက်ခဲ့ချေ။

"ယောက်ျား အကယ်၍ ဒါက အမှန်တကယ် ဆိုရင်၊ ဟွာမင်မြို့က ယွမ်ယင်း ငါးယောက်ရဲ့ တိုက်ခိုက်မှုကို ခုခံနိုင်ပါ့မလား။"

စုဝေဝေက စိုးရိမ်တကြီးဖြင့် မေးလိုက်၏။

ပန်းပွင့် လောကနိဗ္ဗာန် တာအိုမိတ်ဆွေ နှင့် အပြင်ဘက်ရှိ ယွမ်ယင်း ငါးဦးတို့ အကြားရှိ ရန်ငြိုးများကို သူမ စိုးရိမ်ပူပန်နေခြင်း မဟုတ်ပေ။ သူမ နှင့် သူမ၏ ခင်ပွန်း သည် ဤ ယွမ်ယင်း ကျင့်ကြံသူများ၏ သက်ရောက်မှုကို ခံရမည်လား ဆိုသည်ကိုသာ သူမ စိုးရိမ်နေခြင်း ဖြစ်သည်။

မည်သို့ဆိုစေ အခြေခံအားဖြင့် ဤကိစ္စသည် သူတို့နှင့် မည်သို့မျှ သက်ဆိုင်ခြင်း မရှိဘဲ ပန်းပွင့် လောကနိဗ္ဗာန် တာအိုမိတ်ဆွေကြောင့်သာ သွယ်ဝိုက်သော နည်းလမ်းဖြင့် ပါဝင်ပတ်သက်နေရခြင်း ဖြစ်၏။

သို့သော် ဤလောကတွင် ဘေးအန္တရာယ်များသည် ထိုကဲ့သို့ပင် ရောက်ရှိလာတတ်သည်။ အပြစ်ကင်းစင်သူ တစ်ဦး ဖြစ်ရုံသက်သက်ဖြင့် ဘေးဒုက္ခမှ ကင်းလွတ်ခွင့်ရမည် မဟုတ်ချေ။

အားနည်းခြင်းသည် အမှန်တကယ်ပင် အကြီးမားဆုံးသော မူလ အပြစ်တစ်ခုပင် ဖြစ်၏။

အစွမ်းထက်သူများထံမှ သာမန် ဆိုးရွားသော ရည်ရွယ်ချက်လေး တစ်ခုကပင် သေစေနိုင်လောက်အောင် အန္တရာယ်များလှပေသည်။

"စိတ်ချပါ၊ ဟွာမင်မြို့ဂာ နှစ်တစ်ထောင် သက်တမ်းရှိတဲ့ မြို့တစ်မြို့ပဲ။"

"ပြီးတော့ အဆင့် ၄ အစီအရင် ရဲ့ အကာအကွယ်လည်း ရှိတယ်။"

"ယွမ်ယင်း ငါးယောက်ရဲ့ ဝိုင်းရံ တိုက်ခိုက်မှုကို ရင်ဆိုင်ရရင်တောင်မှ အချိန်အတိုင်းအတာ တစ်ခု အထိတော့ တောင့်ခံထားနိုင်မှာပါ။"

"ကာလတို အတွင်းမှာတော့ ကြီးကြီးမားမား ပြဿနာ သိပ်ရှိလာမှာ မဟုတ်ဘူး။"

ကျန်းဖန်က အေးအေးဆေးဆေးပင် ပြောလိုက်၏။

ရိုးရိုးသားသား ဆိုရလျှင် သူ၏ လုံခြုံရေး အတွက်လည်း သူ အထူးတလည် စိုးရိမ်ပူပန်မနေခဲ့ချေ။

လေဟာနယ် တံခါးပေါက်၏ စွမ်းအားဖြင့် သူသည် အချိန်မရွေး ထွက်ပြေး လွတ်မြောက်နိုင်ပြီး ဟွာမင်မြို့ မှ ထွက်ခွာ နိုင်ပေသည်။

"ဒါ ကောင်းတာပေါ့။"

ဤသည်ကို ကြားလိုက်ရချိန်တွင် စုဝေဝေသည် သက်သာရာရစွာ သက်ပြင်းချလိုက်၏။

ယွမ်ယင်း ငါးဦးက မြို့ကို မဖောက်ထွင်းနိုင်သရွေ့တော့ သူတို့သည် အတော်လေး လုံခြုံ ဘေးကင်းနေမည် ဖြစ်သည်။

ဝုန်း ဒိုင်း~~

ချက်ချင်းဆိုသလိုပင် သူ၏ 'ဒန်တျန်' နှင့် 'ချီပင်လယ်' နက်ရှိုင်းရာရှိ နိမိတ်ဖတ်အင်းသည် စတင် တုန်ခါလာပြီး၊ သတင်းစကား တစ်ရပ်သည် သူ၏ အသိစိတ် နက်ရှိုင်းရာသို့ လျင်မြန်စွာ ဝင်ရောက်လာကြောင်း ကျန်းဖန် အာရုံခံမိလိုက်၏။

"ယွမ်ယင်း ဘေးအန္တရာယ်၊ အပြစ်မဲ့သူတွေကို ပါဝင်ပတ်သက်စေမည်။ ဆူညံ ပွက်လောရိုက်မှု ကြီးမားသော်ငြားလည်း စစ်မှန်သော အန္တရာယ် မရှိပါ။"

"ဟွာမင်မြို့ မှ ကြောက်လန့်တကြား ထွက်ပြေးပြီး ယွမ်ယင်း ကျင့်ကြံသူများ၏ ဒေါသကို ဆွဲဆောင်မည်။ သေရေးရှင်ရေး အန္တရာယ် နှင့် ကြုံတွေ့ရမည်။ အလွန်အမင်း နိမိတ်မကောင်းပါ။"

"လေဟာနယ် တံခါးပေါက်မှတစ်ဆင့် သားရဲ တစ်သောင်း တောင်တန်းသို့ ထွက်ပြေး လွတ်မြောက်မည်၊ မည်သည့် အကျိုးအမြတ်မျှ မရှိ၊ ကြားနေ အခြေအနေ ဖြစ်သည်။"

"သွေးဓား စံအိမ်တွင် ဆက်နေပါ၊ တည်တည်ငြိမ်ငြိမ်နေပြီး ဘာမှ မလုပ်ပါနှင့်။ ယနေ့ညတွင် အဆင့် (၅) အခွင့်အရေး တစ်ခုကို ရရှိနိုင်သည်၊ မည်သည့် အန္တရာယ် သို့မဟုတ် ဖုံးကွယ်နေသော ပြဿနာမျှ မရှိ၊ အလွန်အမင်း ကောင်းမွန်သော နိမိတ် ဖြစ်သည်။"

ဤ သတင်းစကားကို သိမြင်လိုက်ရချိန်တွင်၊ ကျန်းဖန် သူ၏ မေးစေ့ကို ပွတ်သပ်လိုက်ပြီး၊ သူ၏ အတွင်းစိတ်ထဲတွင် သိချင်စိတ်များ ဖြစ်ပေါ်လာခဲ့၏။

သူ ခန့်မှန်းထားသည့် အတိုင်းပင် ဖြစ်ပုံရသည်၊ ယွမ်ယင်း ငါးဦး၏ ရောက်ရှိလာမှုသည် ကြောက်မက်ဖွယ် ကောင်းပုံရသော်ငြားလည်း၊ အမှန်တကယ်တော့ အန္တရာယ် မရှိချေ။ သူ တည်တည်ငြိမ်ငြိမ် ရှိနေပြီး ပေါ့ပေါ့ဆဆ မလှုပ်ရှားသရွေ့တော့ ကြီးမားသော ပြဿနာ တစ်စုံတစ်ရာ ရှိလာမည် မဟုတ်ချေ။

ထို့အပြင် သွေးဓား စံအိမ်တွင် ဆက်နေပြီး ဘာမှ မလုပ်ဘဲနေခြင်းဖြင့် သူသည် အဆင့် (၅) အခွင့်အရေး တစ်ခုကိုပင် ရရှိနိုင်သေး၏။

ဤသည်မှာ သူ၏ မျှော်လင့်ချက်များထက်ပင် အမှန်တကယ် သာလွန်နေခဲ့သည်။

……..