အခန်း ၅၆၃

အခန်း ၅၆၃ - ဘေးဒုက္ခကို ဘေးကင်းစွာ ဖြတ်ကျော်ပြီး အဆင့် (၅) အခွင့်အရေးကို ရယူခြင်း (၂)

"ဘာကြောက်စရာရှိလို့လဲ။ ငါတို့ ဟွာမင်မြို့ကို အဆင့် ၄ အစီအရင် နဲ့ ကာကွယ်ထားတာပဲဟာ။ တိမ်တိုက် တာအိုမိတ်ဆွေက ယွမ်ယင်း လေးယောက် ခေါ်လာရင်တောင်မှ ဟွာမင်မြို့ထဲကို ဖောက်ဝင်နိုင်မှာ မဟုတ်ဘူး။"

"မင်းပြောတာ မှန်တယ်။ ဟွာမင်မြို့မှာ ယွမ်ယင်း သုံးယောက်ပဲ ရှိတယ် ဆိုပေမယ့်၊ တကယ်တမ်း တိုက်ပွဲ ဖြစ်လာရင် တိမ်တိုက် တာအိုမိတ်ဆွေ နဲ့ သူ့အဖွဲ့ က အသာစီး ရချင်မှရမှာ။"

"ဟုတ်တယ်၊ ဟုတ်တယ်။ ကောင်းကင်ကြီး ပြိုကျလာရင်တောင် အရပ်ရှည်တဲ့သူတွေက အရင် ခံပေးလိမ့်မယ်။ ဒီအခြေအနေကို အကြောက်ဆုံးက ငါတို့လို လွတ်လပ်သော ကျင့်ကြံသူတွေ မဟုတ်ဘူး၊ ဟွာမင်မြို့က အထက်တန်း ကျင့်ကြံသူတွေပဲ။ သူတို့ကသာ မြို့ပျက်စီးသွားမှာကို အဖြစ်မခံချင်ဆုံးသူတွေ။"

"ဒါဆို အခု ငါတို့ ဘာလုပ်သင့်လဲ။"

"ဘာမှမလုပ်နဲ့။ ပုံမှန်အတိုင်းပဲ စားမယ်၊ သောက်မယ်၊ ကျင့်ကြံမယ်။ ဘာပဲဖြစ်ဖြစ် ငါတို့က ဟွာမင်မြို့ထဲမှာ ပိတ်မိနေပြီဆိုတော့ ထွက်သွားဖို့က မဖြစ်နိုင်တော့ဘူးလေ။"

ကျင့်ကြံသူ အများအပြားသည် ဆူညံစွာ ဆွေးနွေးနေကြ၏။

သူတို့ တစ်ဦးစီ၏ မျက်နှာပေါ်တွင် ခါးသီးသော အမူအရာများ ရှိနေကြသည်။

သူတို့အတွက်မူ ဤသည်မှာ မမျှော်လင့်ထားသော ဘေးအန္တရာယ် တစ်ရပ်ပင် ဖြစ်၏။

မူလက သူတို့သည် ဟွာမင်မြို့တွင် ကောင်းမွန်စွာ နေထိုင်နေကြသည်။ ဤကဲ့သို့သော အခြေအနေမျိုးသို့ ရောက်သွားလိမ့်မည်ဟု မည်သူက ထင်မှတ်ထားခဲ့မည်နည်း။

သို့သော် ယခုအခါ သူတို့သည် ကူကယ်ရာမဲ့ ဖြစ်နေပြီး ဖြစ်လာမည့် အခြေအနေကို တစ်ဆင့်ချင်း ရင်ဆိုင်ရန်သာ တတ်နိုင်တော့သည်။

သို့သော်လည်း ဤအဖြစ်အပျက်ကြောင့် ဟွာမင်မြို့ အတွင်း၌ ကမောက်ကမ ဖြစ်မှုများ စတင် ပြန့်နှံ့လာခဲ့၏။

အချို့သော ကျင့်ကြံသူများသည် အခွင့်အရေး တစ်ရပ်ကို ရှာတွေ့သွားသကဲ့သို့ ခံစားလိုက်ရပြီး၊ ကမောက်ကမ အခြေအနေများ ကြားတွင် ရတနာများကို လုယူရန် ဖျက်ဆီးခြင်း၊ ခိုးယူခြင်း နှင့် လုယက်ခြင်းများကို စတင် ပြုလုပ်လာကြသည်။

မည်သို့ဆိုစေ ဟွာမင်မြို့မှ အထက်တန်း ကျင့်ကြံသူများသည် မြို့၏ လုံခြုံရေးကို သေချာစေရန် မဟာ အစီအရင်ကြီးကို လည်ပတ် ထိန်းချုပ်နေရသဖြင့် အလုပ်များနေကြရာ စည်းကမ်း ထိန်းသိမ်းရန် အချိန် သို့မဟုတ် စွမ်းဆောင်ရည် မရှိတော့ချေ။

…

ညနက်ပိုင်း အချိန်၊ ဟွာမင်မြို့ရှိ သွေးဓား စံအိမ် အနီး၌။

ဝှစ် ဝှစ် ဝှစ်။

ပုံရိပ် သုံးခုသည် စံအိမ်သို့ တိတ်ဆိတ်စွာ ရောက်ရှိလာခဲ့၏။

သူတို့ အားလုံးမှာ ရွှေအမြုတေ ကျင့်ကြံသူများ ဖြစ်ကြပြီး သတ္တမအလွှာ ရွှေအမြုတေ ကျင့်ကြံသူ ဖြစ်သည့် ရှီလျန်တန်က ဦးဆောင်လာခြင်း ဖြစ်သည်။

အခြား နှစ်ဦးမှာ ရှီဟန်ယွီ နှင့် ရှီဝမ်ဆန်တို့ ဖြစ်ကြ၏။

ဤ သုံးဦးမှာ ဟွာမင်မြို့၏ နာမည်ကြီး ရှီ မိသားစု ညီအစ်ကိုများ ဖြစ်ကြပြီး နာမည်ဆိုးဖြင့် ကျော်ကြားသော ဘေးဒုက္ခ ကျင့်ကြံသူများ (လုယက်သတ်ဖြတ်သူများ) ပင် ဖြစ်သည်။

သူတို့၏ လက်ချက်ဖြင့် သေဆုံးသွားခဲ့ရသော ကျင့်ကြံသူ အရေအတွက်မှာ ရေတွက်၍ပင် မရနိုင်တော့ချေ။

ရက်စက်ကြမ်းကြုတ်မှု နှင့် ပတ်သက်လာလျှင် သွေးဓား တာအိုမိတ်ဆွေပင်လျှင် သူတို့နှင့် ယှဉ်ပါက မှေးမှိန်သွားရပေမည်။

ဤအခိုက်အတန့်တွင် ရှီလျန်တန် နှင့် အခြားသူများသည် ပုံသဏ္ဍာန်မဲ့ စွမ်းအား တစ်ရပ်၏ လွှမ်းခြုံခြင်းကို ခံထားရပြီး သူတို့၏ တည်ရှိမှုကို ဖျောက်ဖျက်ထားသကဲ့သို့ ရောင်ဝါ နှင့် တည်ရှိမှု အားလုံးကို ဖုံးကွယ်ထားရာ ဝိညာဉ်အာရုံဖြင့်ပင် သူတို့ကို မရှာဖွေနိုင်ချေ။

သူတို့ ဤကဲ့သို့ စွမ်းဆောင်နိုင်ရခြင်း၏ အကြောင်းရင်းမှာ ရှီလျန်တန်သည် လျှို့ဝှက် ရတနာ တစ်ခု ဖြစ်သည့် ကောင်းကင် ပုစဉ်းရင်ကွဲ ဝိညာဉ် သစ်ရွက်ကို ပိုင်ဆိုင်ထားသောကြောင့်ပင် ဖြစ်၏။

သူ ကလေးဘဝတုန်းက ဤ လျှို့ဝှက် ရတနာကို မတော်တဆ ရှာတွေ့ခဲ့ခြင်း ဖြစ်သည်။

ဤ ရတနာ၏ စွမ်းအားကို သက်ဝင်လှုပ်ရှားစေခြင်းဖြင့် ကိုယ်ပျောက်သွားနိုင်ပြီး မိမိ၏ တည်ရှိမှုကို ဖျောက်ဖျက်ပစ်နိုင်ပေသည်။

ဤ လျှို့ဝှက် ရတနာကို အားကိုး၍ သူသည် ကျင့်ကြံခြင်း လောကတွင် လျင်မြန်စွာ တိုးတက်လာခဲ့ပြီး မြင်တွေ့၍ မရနိုင်သော လုပ်ကြံသတ်ဖြတ်သူ တစ်ဦး ဖြစ်လာခဲ့၏။

အခြား ကျင့်ကြံသူများကို ချောင်းမြောင်း တိုက်ခိုက်ခြင်း မှတစ်ဆင့် သူသည် မရေမတွက်နိုင်သော ရတနာများ နှင့် အရင်းအမြစ်များကို ရရှိခဲ့သည်။

ဒုတိယ မျိုးဆက် နတ်သက်တမ်းရှည် တစ်ဦး၏ ကြွယ်ဝမှုပင်လျှင် သူ၏ ကြွယ်ဝမှု နှင့် နှိုင်းယှဉ်ပါက အရေးမပါလှချေ။

"အစ်ကိုကြီး၊ ငါတို့ တကယ်ပဲ သွေးဓား နတ်သက်တမ်းရှည် မဟာမိတ်အဖွဲ့ ကို ပစ်မှတ်ထားတော့မှာလား။ နည်းနည်း အန္တရာယ် မများလွန်းဘူးလား။"

ရှီဟန်ယွီက တုံ့ဆိုင်းစွာဖြင့် ပြောလိုက်၏။

"သေချာတာပေါ့၊ ဒီညက အကောင်းဆုံး အခွင့်အရေးပဲ။"

"ဟွာမင်မြို့ကို ယွမ်ယင်း ငါးယောက် ဝိုင်းရံထားတယ်၊ လောလောဆယ်တော့ ဖောက်ဝင်လို့ မရသေးဘူး။"

"ဒီအချိန် အတွင်း ဟွာမင်မြို့က အထက်တန်း ကျင့်ကြံသူတွေက ပြည်တွင်းရေးတွေကို အာရုံမစိုက်နိုင်ကြဘူး။"

"အခု အချိန်မှာ ရွှေအမြုတေ ကျင့်ကြံသူ တစ်ယောက် သေသွားရင်တောင် သူတို့ စုံစမ်းစစ်ဆေးနိုင်မှာ မဟုတ်ဘူး။"

ရှီလျန်တန်က သတ်ဖြတ်လိုသည့် ရည်ရွယ်ချက်များဖြင့် ပြောလိုက်၏။

ဟွာမင်မြို့သည် လုံးလုံးလျားလျား ကမောက်ကမ ဖြစ်နေကြောင်း သူ သိထားသည်။ ၎င်းမှာ လှုပ်ရှားရန် အကောင်းဆုံး အချိန် ဖြစ်ပေသည်။

ထိုသို့ဆိုလျှင် အကယ်၍ သူသာ သွေးဓား တာအိုမိတ်ဆွေကို သတ်ဖြတ်လိုက်မည် ဆိုလျှင်တောင် သူ သေဆုံးရသည့် အကြောင်းရင်းကို မည်သူမျှ စုံစမ်းစစ်ဆေးမည် မဟုတ်ချေ။

ပုံမှန် အချိန်များတွင်သာ ဆိုပါက ရွှေအမြုတေ တစ်ဦး၏ သေဆုံးမှုသည် ကြီးမားသော ဆူညံပွက်လောရိုက်မှုကို သေချာပေါက် ဖြစ်ပေါ်စေမည် ဖြစ်၏။

သို့သော် ယခုအခါ လူတိုင်းသည် မိမိကိုယ်ကို ကာကွယ်ရန် ရုန်းကန်နေရသဖြင့် မည်သူကမျှ ဂရုစိုက်လိမ့်မည် မဟုတ်ပေ။

တခြား ကျင့်ကြံသူများ၏ ကိစ္စများကို မည်သူကများ အာရုံစိုက်နေမည်နည်း။

"ဒါပေမယ့် အစ်ကိုကြီး၊ သွေးဓား တာအိုမိတ်ဆွေက အတော်လေး အစွမ်းထက်တယ်။ သူက အနည်းဆုံးတော့ နဝမအလွှာ ရွှေအမြုတေ ကျင့်ကြံသူ တစ်ယောက်လေ။"

"သူ့လို လူမျိုးကို ပေါ့ပေါ့ဆဆ ကိုင်တွယ် ဖြေရှင်းတာက ကြီးမားတဲ့ ဘေးဒုက္ခကို ဖြစ်စေနိုင်တယ်။"

ရှီဝမ်ဆန်က တည်ကြည်လေးနက်စွာ ပြောလိုက်၏။

သွေးဓား တာအိုမိတ်ဆွေကို သတ်ဖြတ်ရန်မှာ ရိုးရှင်းသော အလုပ် တစ်ခု မဟုတ်ကြောင်း သူ ခံစားရသည်။

မည်သို့ဆိုစေ မည်သည့် နဝမအလွှာ ရွှေအမြုတေ ကျင့်ကြံသူမဆို အလွန် အစွမ်းထက်ကြသည့် အတွက် သတ်ဖြတ်ရန် မလွယ်ကူလှပေ။

"ငါ အဲဒါကို အစောကြီးကတည်းက စဉ်းစားထားပြီးပြီ။"

"အရင်က အဆင့် ၃ အဆိပ် ဖြစ်တဲ့ ကောင်းကင်လောင် မီးတောက်ကို ရဖို့အတွက် ငါ ကြီးမားတဲ့ တန်ဖိုးတစ်ခု ပေးဆပ်ခဲ့ရတယ်။"

"နဝမအလွှာ ရွှေအမြုတေ ကျင့်ကြံသူ တစ်ယောက်တောင်မှ ကောင်းကင်လောင် မီးတောက်နဲ့ ထိတွေ့မိသွားပြီ ဆိုတာနဲ့ သူတို့ရဲ့ ခန္ဓာကိုယ်က လျင်မြန်စွာ ပျက်စီးယိုယွင်းသွားပြီး၊ သူတို့ရဲ့ ဝိညာဉ်ပါ ပြာအဖြစ် လောင်ကျွမ်းသွားလိမ့်မယ်။"

"သေချာတာက ငါ အခွင့်အရေး ရပြီဆိုတာနဲ့ သွေးဓား တာအိုမိတ်ဆွေ အနားကို ကပ်သွားပြီး ညင်သာစွာ တိုက်ခိုက်မယ်။ ပြီးရင် သူရဲ့ ခန္ဓာကိုယ်ကို ထိုးဖောက်လိုက်မယ်။ ဟော သူ့ကို မြန်မြန် သတ်ဖြတ်နိုင်ပြီဘဲ‌လေ။"

ရှီလျန်တန်က သူ၏ အစီအစဉ်ကို တည့်တိုးပင် ထုတ်ဖော်ပြောဆိုလိုက်၏။

"အစ်ကိုကြီးက အဲဒီ ကောင်းကင်လောင် မီးတောက် အဆိပ်ကို ရလာခဲ့တာ အံ့သြစရာပဲ။ ဒီအစီအစဉ်က သေချာပေါက် အောင်မြင်မယ့်ပုံပဲ။"

"ဒါပေမယ့် ဘာလို့ သွေးဓား တာအိုမိတ်ဆွေကို သီးသန့် ပစ်မှတ်ထားရတာလဲ။"

"ချမ်းသာတဲ့ ရွှေအမြုတေ ကျင့်ကြံသူတွေ အနေနဲ့ဆိုရင် သူ တစ်ယောက်တည်း ရှိတာမှ မဟုတ်တာ။"

ရှီဝမ်ဆန်က သိချင်စိတ်ဖြင့် မေးလိုက်၏။

ဟွာမင်မြို့တွင် အခြား ပိုမို ချမ်းသာသော ရွှေအမြုတေ ကျင့်ကြံသူများ ရှိနေသေးသည်။

"အကြောင်းရင်းက ရိုးရှင်းပါတယ်။"

"စောစောက၊ သွေးဓား တာအိုမိတ်ဆွေဂာ ယွမ်ယင်း ဝိညာဉ်ဆေးဝါး ဖြစ်တဲ့ နတ်ဘုရား မွေးကင်းစ သစ်သီးကို ရရှိထားတယ် ဆိုတဲ့ အရေးကြီးတဲ့ သတင်းအချက်အလက် တစ်ခု ငါ ရခဲ့တယ်။"

"အကယ်၍ သွေးဓား တာအိုမိတ်ဆွေကို ငါတို့ သတ်နိုင်ရင် နတ်ဘုရား မွေးကင်းစ သစ်သီးကို သေချာပေါက် ငါတို့ ရမှာပေါ့။"

"ယွမ်ယင်း ဖွဲ့စည်းခြင်းကို ရောက်ဖို့ ငါတို့ အချိန် အတော်လေး လိုသေးပေမယ့် ကြိုတင် ပြင်ဆင်မှုတွေ စလုပ်ဖို့ အချိန်တန်ပြီ။"

ရှီလျန်တန်က ရည်မှန်းချက် ကြီးမားစွာဖြင့် ပြောလိုက်၏။

"ငါ နားလည်ပြီ။"

ဤသည်ကို ကြားလိုက်ရချိန်တွင် သူတို့၏ အစ်ကိုကြီးသည် သွေးဓား တာအိုမိတ်ဆွေ အပေါ် အဘယ်ကြောင့် အာရုံစိုက်နေပြီး၊ ယွမ်ယင်း ဝိညာဉ်ဆေးဝါး ဖြစ်သော နတ်ဘုရား မွေးကင်းစ သစ်သီးကို အဘယ်ကြောင့် အလိုရှိနေသနည်း ဆိုသည်ကို ရှီဝမ်ဆန် နှင့် ရှီဟန်ယွီတို့ နားလည် သဘောပေါက်သွားကြ၏။

အရှေ့ပိုင်း တိုက်ကြီးတွင်ပင် လွတ်လပ်သော ကျင့်ကြံသူ တစ်ဦးအနေဖြင့် ယွမ်ယင်း ဝိညာဉ်ဆေးဝါးကို ရရှိရန်မှာ မလွယ်ကူလှချေ။

ယွမ်ယင်း ဝိညာဉ်ဆေးဝါး တစ်ခုစီတိုင်းကို ဝိညာဉ်ကျောက်တုံးဖြင့် ဝယ်ယူ၍ မရနိုင်ပေ။

သာမန် ရွှေအမြုတေ ကျင့်ကြံသူများ အတွက် ယွမ်ယင်း ဝိညာဉ်ဆေးဝါးကို ရရှိခြင်းမှာ ကံကြမ္မာ အပေါ်တွင်သာ မူတည်ပေသည်။

ဘယ် ရွှေအမြုတေ ကျင့်ကြံသူမှာများ ဒီလို ကံကြမ္မာမျိုး ရှိလို့လဲ။

ဤအကြောင်းကြောင့် ရှီလျန်တန်သည် သွေးဓား တာအိုမိတ်ဆွေ အပေါ် အာရုံစိုက်ထားပြီး သူ့ထံမှ ယွမ်ယင်း ဝိညာဉ်ဆေးဝါးကို ခိုးယူရန် ရည်ရွယ်ထားခြင်း ဖြစ်၏။

အကယ်၍ အောင်မြင်ခဲ့မည် ဆိုပါက ၎င်းသည် သူ့အား ယွမ်ယင်း ဖွဲ့စည်းခြင်းသို့ ခြေတစ်လှမ်း ပိုမို နီးကပ်လာစေမည် ဖြစ်သည်။

"ကောင်းပြီ၊ ပြောတာ တော်လောက်ပြီ။"

"အရင်ဆုံး သွေးဓား စံအိမ်ထဲ ဝင်မယ်၊ ပြီးရင် သွေးဓား တာအိုမိတ်ဆွေကို ရှာပြီး သူ့ကို ရှင်းပစ်မယ်။"

ရှီလျန်တန်က တည်ကြည်လေးနက်သော လေသံဖြင့် ပြောလိုက်၏။

ဝှစ် ဝှစ် ဝှစ်။

မျက်တောင်တစ်ခတ် အတွင်းမှာပင် သူတို့ သုံးဦးသည် သွေးဓား စံအိမ် အတွင်းသို့ တိတ်ဆိတ်စွာ ဝင်ရောက်သွားကြ၏။

ပတ်ဝန်းကျင်တွင် ကျင့်ကြံသူ အများအပြား ရှိနေသော်ငြားလည်း မည်သူကမျှ သူတို့၏ တည်ရှိမှုကို အာရုံမခံမိကြပေ။ အစီအရင်ကပင် သူတို့ကို သတိမပြုမိခဲ့ချေ။

သူတို့သည် မတည်ရှိသော သူများကဲ့သို့ပင် ဖြစ်နေခဲ့သည်။

လျှို့ဝှက် ရတနာ ကောင်းကင် ပုစဉ်းရင်ကွဲ ဝိညာဉ် သစ်ရွက်၏ စွမ်းအားသည် အမှန်တကယ်ပင် လျှို့ဝှက်ဆန်းကြယ်ပြီး နက်နဲကာ ခန့်မှန်း၍ မရနိုင်လှပေ။

ဤသည်မှာ ရှီလျန်တန် အသက်ရှင် ရပ်တည်ရန် အားကိုးနေရသော လျှို့ဝှက်ဆန်းကြယ်သည့် နည်းလမ်းပင် ဖြစ်၏။

"အစ်ကိုကြီး၊ တစ်ယောက်ယောက်က ငါတို့ကို တွေ့သွားပြီ ထင်တယ်။"

ရှီဝမ်ဆန် စံအိမ် အတွင်းသို့ ခြေချလိုက်သည် နှင့်တစ်ပြိုင်နက် မမျှော်လင့်ဘဲ ရှေ့တွင် ရွှေအမြုတေ ကျင့်ကြံသူ တစ်ဦး ရှိနေကြောင်း တွေ့ရှိလိုက်ရသည်။ ထိုသူက မည်သည့် စကား တစ်ခွန်းမျှ မပြောဘဲ ချက်ချင်း တိုက်ခိုက်လာ၏။

ဧရာမ ရွှေရောင် ဓား အလင်းတန်းကြီး တစ်ခု ပေါက်ကွဲထွက်ပေါ်လာသည်။ ယင်းသည် အရာအားလုံးကို ထိုးဖောက်သွားနိုင်သကဲ့သို့ ကြောက်မက်ဖွယ်ကောင်းသော ကန်းသတ္တု စွမ်းအားများဖြင့် ပြည့်နှက်နေကာ နတ်ဘုရား သားရဲ ကျားဖြူ၏ ပုံရိပ် တစ်ခုနှင့်အတူ ပူးတွဲပါလာခဲ့သည်။

"ငါတို့ကို တစ်ယောက်ယောက်က ဘယ်လိုလုပ် တွေ့သွားနိုင်မှာလဲ။"

ရှီလျန်တန်သည် အလွန်အမင်း ဇဝေဇဝါ ဖြစ်သွားခဲ့၏။

သူ၏ လျှို့ဝှက် ရတနာ ကောင်းကင် ပုစဉ်းရင်ကွဲ ဝိညာဉ် သစ်ရွက်သည် ရှုံးနိမ့်ခြင်း မရှိနိုင်ဟု သူ ယုံကြည်ထားခဲ့သည်။ ယွမ်ယင်း ကျင့်ကြံသူများပင်လျှင် သူ၏ တည်ရှိမှုကို အာရုံမခံနိုင်ကြချေ။

သို့သော် ဤ ရွှေအမြုတေ ကျင့်ကြံသူက ဤနေရာတွင် ဘာလာလုပ်နေသနည်း။

သွေးဓား စံအိမ်ထဲ ဝင်ဝင်ချင်းမှာပဲ ဘာလို့များ တိုက်ခိုက်ခံလိုက်ရတာလဲ။

ဝုန်း ဒိုင်း~~

သူ မတုံ့ပြန်နိုင်မီမှာပင်၊ ကြောက်မက်ဖွယ်ကောင်းသော ရွှေရောင် ဓား အလင်းတန်းသည် သူ၏ ရှေ့မှောက်သို့ ရောက်ရှိလာသည်။ ထိုအခါ သူ၏ ကာကွယ်ရေး မှော်ရတနာသည် အတားအဆီး တစ်ခုကို ချက်ချင်း ဖန်တီးကာ တိုက်ခိုက်မှုကို ခုခံရန် ကြိုးပမ်းလိုက်၏။

သို့သော် ၎င်းမှာ အချည်းနှီး သက်သက်သာ ဖြစ်သည်။ အဘယ်ကြောင့်ဆိုသော် ကြောက်မက်ဖွယ်ကောင်းသော ထိုးဖောက်နိုင်စွမ်း ပါဝင်သည့် ကျားဖြူ ဓား အလင်းတန်းသည် သူ၏ ကာကွယ်ရေး အတားအဆီးကို အားစိုက်ထုတ်စရာမလိုဘဲ ထိုးဖောက် ဝင်ရောက်သွားပြီး သူ၏ ဦးခေါင်းကို ရိုက်ချလိုက်သောကြောင့်ပင် ဖြစ်၏။

တိုက်ခိုက်မှု တစ်ချက်တည်းဖြင့် ဖရဲသီး တစ်လုံး ကွဲအက်သွားသကဲ့သို့ သူ၏ ဦးခေါင်းသည် မျက်တောင်တစ်ခတ် အတွင်း ပေါက်ကွဲ ကွဲကြေသွားခဲ့သည်။

"ပြီးသွားပြီ။"

ရှီဟန်ယွီ နှင့် ရှီဝမ်ဆန်တို့သည်လည်း အလားတူ ကံကြမ္မာကို ခံစားခဲ့ကြရ၏။ ရုတ်တရက် ချောင်းမြောင်း တိုက်ခိုက်ခံရမှုကြောင့် သူတို့မှာ ပြန်လည် မတိုက်ခိုက်နိုင်ကြဘဲ သူတို့၏ ဦးခေါင်းများသည်လည်း ရွှေရောင် ဓား အလင်းတန်း၏ ထိုးဖောက်ခြင်းကို ခံလိုက်ရသည်။

ဒေါင်။

နောက်တစ်စက္ကန့်တွင် ရှီ မိသားစု ညီအစ်ကိုများသည် မျက်တောင်တစ်ခတ်အတွင်း သတ်ဖြတ်ခံလိုက်ရပြီး သွေးများ စီးကျလာခဲ့၏။

ကိုယ်ပျောက်နေသော အခြေအနေမှနေ၍ သူတို့ ထွက်ပေါ်လာကြပြီး ခေါင်းပြတ်နေသော အလောင်း သုံးလောင်း အဖြစ်သို့ ပြောင်းလဲသွားကြသည်။

သူတို့သည် လုံးလုံးလျားလျား နာကြည်း ခံပြင်းနေခဲ့ကြ၏။

ဤနေရာရှိ ရွှေအမြုတေ ကျင့်ကြံသူများကို လုပ်ကြံ သတ်ဖြတ်ရန်လာခဲ့ခြင်း ဖြစ်သော်ငြားလည်း သူတို့ မလှုပ်ရှားရသေးမီမှာပင် သတ်ဖြတ်ခံလိုက်ရသည်။

တကယ်တမ်း ဘာတွေ ဖြစ်ပျက်သွားခဲ့တာလဲ။

"တကယ်ပဲ လူတွေ ရှိနေတာလား။"

"သူတို့ ဒီကို ဘယ်လို ဖောက်ဝင်လာတာလဲ။"

သေချာသည်မှာ တိုက်ခိုက်သူမှာ ကျန်းဖန်ပင် ဖြစ်သည်။ သူသည် လန့်သွားခဲ့၏။

သူသည် ခြံဝင်းအတွင်း လမ်းလျှောက်နေရင်း ကျားဖြူ ကန်းရွှေ အင်း၏ စွမ်းအားကို စမ်းသပ်ကြည့်လိုသော ဆန္ဒတစ်ရပ်ကို ရုတ်တရက် ခံစားလိုက်ရခြင်း ဖြစ်သည်။

သူသည် ဤ အသက်သွေးကြောအင်း၏ စွမ်းအားကို ပေါ့ပေါ့ပါးပါးပင် ထုတ်လွှတ်လိုက်၏။

၎င်းက ရွှေအမြုတေ ကျင့်ကြံသူ သုံးဦးကို ထိမှန်သွားပြီး မျက်တောင်တစ်ခတ် အတွင်း သူတို့ကို သတ်ဖြတ်လိုက်လိမ့်မည်ဟု မည်သူက ထင်မှတ်ထားခဲ့မည်နည်း။

ယခုအခါ သူသည် လုံးလုံးလျားလျား ဇဝေဇဝါ ဖြစ်သွားခဲ့တော့၏။

……..