အခန်း ၁၁၂၁

အခန်း (၁၁၂၁) ဒီဓားရဲ့နာမည်က ရိုးရှင်းမှုအတွင်းမှ ပါးနပ်မှုကို ဖုံးကွယ်ခြင်း

အသက်နှစ်ဆယ်ပင် မပြည့်သေးသော ထိုနုပျိုပြီး ချောမောသည့်မျက်နှာလေးကို ကြည့်လိုက်ကြသည်။

ဓားက ဓားအိမ်ထဲမှမဆွဲထုတ်ရသေးဘဲ သူ၏လက်ထဲတွင် ရှိနေ၏။

လူငယ်လေး ရှန်းယီက ဓားကို ဆုပ်ကိုင်ထားပြီး၊ သူ၏သွယ်လျသောလက်ချောင်းငါးချောင်းများကို ဖြန့်ကာ ကျားနတ်ဆိုး၏လက်သည်းကြီးကို အားစိုက်ထုတ်စရာမလိုဘဲ ထောက်ကန်ထားသည်။

စောင့်ကြည့်နေသူများအဖို့ ၎င်းက သွယ်လျသော တိုင်တစ်တိုင်ကခမ်းနားထည်ဝါသော ခန်းမကြီးတစ်ခုကိုထောက်မထားသည့်အလားပင်။

စုန့်ဖုန်းစီရင်စုတွင်၊ ဆင့်ခေါ်ခံရသော နတ်ဆိုးသုတ်သင်ရေးအရာရှိများက သူတို့၏မှော်ရတနာများကို အလျင်စလိုဆွဲထုတ်လိုက်ကြပြီး အသေခံတိုက်ခိုက်ရန် ပြင်ဆင်လိုက်ကြ၏။ ကြိုတင်သတိပေးချက်ရရှိထားသော်လည်း၊ အလျင်စလိုဖြစ်လွန်းသဖြင့် မုတ်ဆိတ်မွေးနှင့်လူ အပါအဝင် အမည်ခံစစ်သူကြီးသုံးဦးသာ ပြန်လည်ရောက်ရှိလာနိုင်ခဲ့သည်။

ကံကောင်းထောက်မစွာဖြင့် ဤသုံးဦးစလုံးက စတုတ္ထအဆင့် ထိုက်ယင်အစစ်အမှန်မသေမျိုးများ ဖြစ်ကြပြီး၊ ဝူရှန်းထက် မည်သူမျှမအားနည်းကြရာ တိုက်ပွဲတွင်ပါဝင်ရန် အရည်အချင်း ပြည့်မီကြသည်။

သူတို့က ထျန်းတုံး နတ်သမီး၏ထွက်ပေါ်လာမှုကြောင့် အစပိုင်းတွင် အံ့အားသင့်သွားခဲ့သော်လည်း၊ သူတို့၏အကြည့်များက မြို့တံခါးအထက်ရှိပုံရိပ်ဆီသို့ လျင်မြန်စွာ တစ်ပြိုင်နက်တည်း ရွှေ့သွားခဲ့ကြ၏။

သူ၏ယခင်က မှင်ရည်ကဲ့သို့ နက်မှောင်သော ဝတ်စုံက ရိုးရှင်းလွန်းသောကြောင့်ဖြစ်ပြီး၊ယခု သူဝတ်ဆင်ထားသောချပ်ဝတ်တန်ဆာမှာ ခမ်းနားထည်ဝါနေသလို အေးစက်မှုများလည်းထွက်ပေါ်နေသည်။

မုတ်ဆိတ်မွေးနှင့်လူ ပင်လျှင် အချိန်အနည်းငယ်ယူပြီးမှသတိပြုမိသွားပြီး "ဒါက... ဒါက စစ်သူကြီးနန်ယန် လား" ဟု တီးတိုးရေရွတ်လိုက်သည်။

ဤမျှကြောက်မက်ဖွယ်ကောင်းသော နတ်ဆိုးဘေးအန္တရာယ်ကြီး၏ဖြစ်ရပ်အပေါ်မေးခွန်းထုတ်နေဆဲဖြစ်သော အခြားအမည်ခံစစ်သူကြီး နှစ်ဦးမှာမူ ယခုအခါမျက်လုံးများ ပြူးကျယ်သွားပြီး တိတ်ဆိတ်သွားကြ၏။

ထို လူငယ်ဂျူနီယာလေးက အံ့အားသင့်ဖွယ်ကောင်းလောက်အောင် လွှမ်းမိုးနိုင်စွမ်းရှိလွန်းလှပေသည်။

မည်သည့် စွမ်းအင်နည်းစနစ်ကိုမျှ ထုတ်ဖော်ပြသခြင်းမရှိဘဲ၊ သူ၏ရုပ်ပိုင်းဆိုင်ရာ ခန္ဓာကိုယ်သက်သက်ဖြင့် ဤကဲ့သို့ကြမ်းကြုတ်သော မဟာနတ်ဆိုးကြီးကို အတင်းအကျပ်ရပ်တန့်ပစ်နိုင်ခဲ့သည်။

နောက်တစ်ခဏတွင်ကား..

ရှန်းယီက ဓားအိမ်ကိုပြင်းထန်စွာ ဆုပ်ကိုင်လိုက်ရာ၊ရွှေရောင်အက္ခရာလျှို့ဝှက်ဆန်းကြယ်ဓားက ပေါက်ကွဲထွက်လာပြီး သူ၏ညာဘက်လက်ဖဝါးထဲသို့ ကျရောက်လာခဲ့၏။

ဓားအိမ်ကိုဆုပ်ကိုင်ထားဆဲဖြစ်သော သူ၏ဘယ်ဘက်လက်တွင်မူမြစ်ရှည်ကြီးတစ်ခု နောက်ပြန်စီးဆင်းသွားသည့်အလား ရွှေရောင်အလင်းတန်းများ ပေါက်ကွဲထွက်လာပြီး၊ ကျားနတ်ဆိုး၏ခန္ဓာကိုယ်ကို ပြင်းထန်သောအရှိန်အဟုန်ဖြင့် လွှမ်းခြုံသွားကာ ၎င်းကို နောက်သို့ ရက်စက်စွာ လွင့်စဉ်သွားစေခဲ့သည်။

တောင်တန်းတစ်ခုနှင့်တူသော ကျားခန္ဓာကိုယ်ကြီးက အလျားလိုက်လွင့်ထွက်သွားပြီး၊ လေထုကို ခွဲထွက်သွားသောအသံမှာ မိုးကြိုးပစ်သကဲ့သို့ ဆူညံနေရာ၊နောက်မှလိုက်ပါလာသော နတ်ဆိုးများ၏မျက်နှာများကိုထိတ်လန့်သွားစေပြီး အလျင်စလိုရှောင်တိမ်းရန် ထလာခဲ့ကြရ၏။

မြို့ကိုဖျက်ဆီးရန် ရည်ရွယ်ထားသော လက်သည်းကုတ်ချက်မှာ ဤကဲ့သို့ရှက်ဖွယ်ကောင်းသော မြင်ကွင်းအဖြစ်သို့ ပြောင်းလဲသွားခဲ့သည်။

နတ်ဆိုးအုပ်စုက မည်သူက ဤမျှလျင်မြန်စွာ တုံ့ပြန်ပြီး သူတို့ကိုတစ်ကိုယ်တော် ဝင်ရောက်ဟန့်တားခဲ့သနည်းဆိုသည်ကို သိလိုစိတ်ပြင်းပြစွာဖြင့် မြို့တံခါးအထက်ရှိ ကောင်းကင်ယံသို့ အလိုအလျောက် မော့ကြည့်လိုက်ကြ၏။

သို့သော် သူတို့၏မြင်ကွင်းထဲတွင်မူ အနည်းငယ် ကျဉ်းမြောင်းနေသော ရှန်းယီ၏မျက်လုံးများသာ ရှိနေပြီး၊ ထိုအနက်ရောင် မျက်ဝန်းများ အတွင်း၌ ဓား၏ ထက်မြက်သော အလင်းလက်မှုက ရောင်ပြန်ဟပ်နေလေသည်။

ရွှေရောင်အက္ခရာဓားရှည်က လေဟာနယ်ကို ဆုတ်ဖြဲသွားပြီး၊ကျယ်ပြန့်လှသော ကပ်ဘေးစွမ်းအားများက အဆုံးအစမဲ့သောဓားအလင်းတန်းများအဖြစ်သို့ ပြောင်းလဲသွားကာ၊ သာမန်မျက်စိဖြင့်မမြင်နိုင်သော အမြန်နှုန်းဖြင့် ပျံ့နှံ့သွားပြီး ကောင်းကင်ကန့်လန့်ကာကြီးကို ဆုတ်ဖြဲပစ်လိုက်၏။

ကျင့်ကြံခြင်းပိုမြင့်သည့် နတ်ဆိုးအုပ်စုက ၎င်းကို ရှောင်ရှားနိုင်သေးသော်လည်း၊သာမန် ပဉ္စမအဆင့် မဟာနတ်ဆိုးများက လျှပ်စီးကဲ့သို့ မြန်ဆန်သော ဓားအလင်းတန်းမှမလွတ်မြောက်နိုင်ခဲ့ကြချေ။

ရွှပ်...ရွှပ်

အသားများအပိုင်းပိုင်း ခုတ်ထစ်ခံရသည့် အသံများက ကောင်းကင်ယံတစ်ခွင်တွင်ပဲ့တင်ထပ်သွားခဲ့သည်။

ထိုတစ်ချက်တည်းသောတိုက်ခိုက်မှုကအားလုံးကို အံ့အားသင့်သွားစေခဲ့ပြီး စုန့်ဖုန်းစီရင်စုတစ်ခုလုံးကို တုန်လှုပ်သွားစေခဲ့၏။

ထျန်းတုန်းနတ်သမီး၏မျက်ဝန်းများပင် အနည်းငယ်ကျဉ်းသွားခဲ့သည်။

၎င်းမှာ ကျွမ်းကျင်မှုက နက်နဲနေခြင်းကြောင့် မဟုတ်ဘဲ ဆန့်ကျင်ဘက်ပင်။ ဤဓားချက်တွင် မည်သည့် နည်းစနစ်မျှမပါဝင်ဘဲ ကပ်ဘေးစွမ်းအားများကို အကြမ်းထည်သက်သက် ထုတ်လွှတ်လိုက်ခြင်းသာဖြစ်ပြီး၊စွမ်းအင်ကို သာမန်ကာရံသာသုံးလိုက်ခြင်းကို ပြသနေခြင်းပင်။

၎င်းက နတ်ဆိုးအုပ်စုအပေါ် သူ၏အထင်အမြင်သေးမှုကို ပွင့်ပွင့်လင်းလင်းဖော်ပြလိုက်ခြင်းပင် ဖြစ်ပေသည်။

ထျန်းတုန်းနတ်သမီးက နက်ရှိုင်းသော ကျင့်ကြံခြင်းရှိသည့် ဒုတိယမျိုးဆက် တပည့်များကြားတွင် ထူးချွန်သူတစ်ဦးဖြစ်ရာ၊ စီရင်စုမြို့တော်အတွင်းရှိ အမြင့်ဆုံးသော ကျင့်ကြံသူအချို့၏တီးတိုးရေရွတ်သံများကို သဘာဝကျကျပင်ကြားလိုက်ရသည်။

စစ်သူကြီးနန်ယန်...

ဒါ နန်းတွင်းအရာရှိတစ်ယောက်လား။

သူမ အံ့အားသင့်စွာဖြင့် သူမ၏ဓားကို ဆုပ်ကိုင်လိုက်၏။ "နတ်ဘုရားမင်းဆက်ထဲမှာ ဒီလိုလူမျိုး တကယ် တည်ရှိနေတာပဲ"

လူတိုင်းသိကြသည့်အတိုင်း၊ နတ်ဘုရားမင်းဆက်ရှိ စစ်ရေးခေါင်းဆောင်များကလည်း ကျင့်ကြံကြသည်။ သို့သော် လမ်းစဉ်သုံးသွယ်၏တမင်သက်သက်လုပ်ဆောင်မှုများကြောင့်၊ သူတို့က သီးသန့်ကျင့်ကြံသူများထက် အနည်းငယ်သာ ပိုကောင်းကြပြီး တာအိုအသီးအပွင့်များကို ထိတွေ့ခွင့်ရရန် အခွင့်အရေးသာရှိကြ၏။

သို့သော် များသောအားဖြင့်၊ သူတို့က လမ်းစဉ်သုံးသွယ်ထံမှ အကြွင်းအကျန်များကိုသာကောက်ယူရရှိကြပြီးသေသပ်မှုမရှိသော ရောနှောနေသည့် ပညာရပ်များကိုသာ သင်ယူကြရပါသည်။

လူသားဧကရာဇ်ချီကဲ့သို့သော ရတနာကို အားကိုးခြင်းဖြင့်၊ သူတို့၏ကျင့်ကြံခြင်းအမြန်နှုန်းမှာ မသေမျိုးဂိုဏ်းမှတပည့်များထက် မနိမ့်ကျဘဲ၊ အချို့သောရှုထောင့်များတွင် ၎င်းတို့ကိုပင် ကျော်လွန်နေသေး၏။

သို့တိုင်အောင် တိုက်ပွဲဝင်ရသည့်အခါ၊ သူတို့၏မသေသပ်သော အခြေခံအုတ်မြစ်များကြောင့်၊ သူတို့ကယေဘုယျအားဖြင့် မိမိတို့၏နယ်ပယ်အဆင့်တွင် အားအနည်းဆုံးသူများဖြစ်ကြသည်။

ဧကရာဇ်ချီ၏အကူအညီဖြင့်သာ မသေမျိုးတပည့်များကို ဆန့်ကျင်တိုက်ခိုက်နိုင်စွမ်းရှိကြ၏။ နတ်ဘုရားမင်းဆက်၏နယ်နိမိတ်များမှ ထွက်ခွာသွားသည်နှင့် တစ်ပြိုင်နက်၊သူတို့ကို စိုးရိမ်စရာတစ်ခုအဖြစ် မသတ်မှတ်ကြတော့ချေ။

သို့သော် ယခုလေးတင်မြင်တွေ့ခဲ့ရသော ထိုလှုပ်ရှားမှုနှစ်ခုကို ကြည့်ခြင်းအားဖြင့်..

ထျန်းတုန်းနတ်သမီး၏နှလုံးသားထဲတွင် အတွေးတစ်ခု ခပ်ရေးရေးပေါ်လာခဲ့၏။ ဤသူက သူမထက်ပင် အားနည်းမည်မဟုတ်ပေ။