အခန်း ၁၁၂၃

အခန်း (၁၁၂၃) နန်ယန်မှ စုန့်ဖုန်းကို ရောင်ပြန်ဟပ်ခြင်း ၂

လူအများ၏ မျက်စိရှေ့မှောက်တွင်ပင်..

ဓားသွားသည် လင်းယုန်နတ်ဆိုး၏ခေါင်းကို ခုတ်ပိုင်းလိုက်ရာ၊ ရွှေရောင်အက္ခရာ ဓားရှည်က ချက်ချင်းကွဲကြေသွားခဲ့သော်လည်း၊ တစ်ချိန်တည်းမှာပင် ကပ်ဘေးစွမ်းအား၏ဖျက်ဆီးမှုကို ခံလိုက်ရသော လင်းယုန်နတ်ဆိုး၏ခေါင်းကလည်း ပေါက်ကွဲသွားခဲ့သည်။

"..." ရှန်းယီ ပေါ့ပေါ့ပါးပါးလက်ဟန်ပြလိုက်ရာ၊ လျှို့ဝှက်ဆန်းကြယ်သောရွှေရောင်အလင်းတန်းက သူ၏လက်ဖဝါးထဲသို့ ပြန်လည်ဝင်ရောက်လာပြီး ဓားရှည်တစ်လက်၏ပုံသဏ္ဌာန်အဖြစ်သို့ ပြန်လည် စုစည်းသွားခဲ့၏။

တိမ်မည်းများက သူ၏အနောက်တွင် ဆက်လက် လွင့်ဝဲနေပြီး၊ မိုးနှင့်မြေကိုဖြတ်သန်းကာ မျဉ်းတစ်ကြောင်းရေးဆွဲထားသကဲ့သို့ ဖြစ်နေပေသည်။

ထိုမျဉ်းကိုဖြတ်ကျော်လာခဲ့သော လင်းယုန်နတ်ဆိုးမှာမူ ယခုအခါအသက်ဝိညာဉ်လုံးဝ ကင်းမဲ့သွားခဲ့၏။

"ဟာ.." ဤမြင်ကွင်းက နတ်ဆိုးများကို တုန်လှုပ်သွားစေရုံသာမက၊မြို့ရိုးဆီသို့ အလျင်စလိုပြေးလာကြသော အမည်ခံစစ်သူကြီးများနှင့် ထျန်းတုန်းနတ်သမီးတို့ကိုပါ အံ့အားသင့်သွားစေခဲ့ပြီး၊ အားလုံးကအံ့သြမှင်တက်နေသော အမူအရာများဖြစ်သွားကြသည်။

စတုတ္ထအဆင့်နတ်ဆိုးမသေမျိုးတစ်ကောင်၏ သက်စောင့်စွမ်းအားမှာ အလွန်တရာခိုင်မာအားကောင်းလှရာ၊ခြေလက်များ ပြတ်တောက်သွားခြင်း သို့မဟုတ် ဦးခေါင်းခွံများကွဲကြေသွားခြင်းကို မဆိုထားနှင့်၊ ထိုထက် ပိုမိုပြင်းထန်သော ဒဏ်ရာများပင်လျှင် ဤကဲ့သို့လွယ်လွယ်ကူကူသေဆုံးသွားစေမည် မဟုတ်ချေ။

ယခု သေဆုံးသွားပြီဖြစ်သော လင်းယုန်နတ်ဆိုးသာလျှင် သိရှိနိုင်ပေလိမ့်မည်။

၎င်း၏ခန္ဓာကိုယ်အတွင်းသို့ ထိုးဖောက်ဝင်ရောက်သွားသော ရေတွက်၍မရနိုင်သည့် ဓားသွားများ တစ်ခုစီတိုင်းတွင် နတ်ဆိုးများအတွက် သေစေနိုင်လောက်သော ပြင်းထန်သောအဆိပ်ကဲ့သို့ ဖြစ်သည့် ရွှေရောင်စွမ်းအင်များ ပါဝင်နေပြီး၊ နဂါးနှင့် ကျား၏စွမ်းအားများဖြင့် သေဒဏ်ပေးသည့် အမိန့်စာကဲ့သို့ သက်ရောက်နေခဲ့ခြင်းဖြစ်၏။

နောက်ဆုံး ထိုးနှက်ချက်မှာ ဤရွှေရောင်စွမ်းအင် အားလုံးကို မီးတောက်သွားစေသည့် စနက်ကြိုးသက်သက်သာဖြစ်ပါသည်။

ကပ်ဘေးတစ်ထောင်က စတုတ္ထအဆင့်အတွက် အနိမ့်ဆုံး သတ်မှတ်ချက်ပင်။

သို့သော် ကပ်ဘေးသုံးထောင့်ငါးရာရှိသော ထိုက်ရွှီရွှေရောင်ဆေးလုံး တာအိုအသီးအပွင့်နှင့် ကပ်ဘေး သုံးထောင်ရှိသော ကျားနဂါးဖိနှိပ်ခြင်း အသီးအပွင့်တို့ကို ပိုင်ဆိုင်ထားသော ရှန်းယီနှင့် ဤနတ်ဆိုးများက တစ်နည်းအားဖြင့် တူညီသော နယ်ပယ်အဆင့်တွင် ရှိမနေကြတော့ချေ။

တွေးထင်ထားသလောက် မခက်ခဲသလိုပင်။

ရှန်းယီ သူ၏ဓားကို အနည်းငယ် လှုပ်ယမ်းလိုက်၏။

ထိုလုပ်ရပ်က နတ်ဆိုးများ၏အမြင်တွင် သူတို့၏ခြေလှမ်းများကို တစ်ခဲနက် ရပ်တန့်သွားစေခဲ့သည်။

ကောင်းကင်ယံတစ်ခွင် ဆန့်တန်းနေသော တိမ်မည်းကြီးက လင်းယုန်နတ်ဆိုး သေဆုံးပြီးနောက်တွင်ဖြတ်ကျော်၍မရနိုင်သော အဆုံးအစမဲ့ ချောက်ကမ်းပါးကြီးတစ်ခုအဖြစ်သို့ ပြောင်းလဲသွားခဲ့၏။

"အဲဒီ သူခိုးဘုန်းကြီးတွေရဲ့စကားကို ယုံလို့မရဘူးလို့ ငါ စောစောကတည်းက ပြောသားပဲ"

ကျားနတ်ဆိုးက ဓားရိုးကိုတင်းကျပ်စွာ ဆုပ်ကိုင်ထားလိုက်၏။ နှစ်ပေါင်းများစွာ သူနှင့်အတူရှိနေခဲ့ပြီး ကျင့်ကြံသူမရေမတွက်နိုင်အောင် သတ်ဖြတ်ခဲ့သောဓားက ယခုအခါတွင် သူအားယုံကြည်မှု အနည်းငယ်မျှပင် မပေးစွမ်းနိုင်တော့ချေ။

၎င်းသည် ကျန်ရစ်နေသေးသော ကြောက်ရွံ့မှုဖြင့် တံတွေးမြိုချလိုက်၏။

ရယ်စရာကောင်းသည်မှာတော့ သူကကံကောင်းသည်ဟုပင် ခံစားနေရ၏။

သူက ပထမဆုံးတိုက်ခိုက်ခဲ့သူဖြစ်သော်လည်း၊ အသက်ရှင်လျက် ဤနေရာတွင် ရပ်နေနိုင်ဆဲဖြစ်ရာ ထိုလူငယ်လေးက ထိန်းချုပ်ပေးခဲ့သည့်အတွက် ကျေးဇူးတင်ရမလိုပင်။

နတ်ဆိုးများက ရက်စက်ကြမ်းကြုတ်စွာ ရောက်ရှိလာကြခြင်းမှာ ယခင်က စုဆောင်းထားသော သတင်းအချက်အလက်များကြောင့်သာမက၊ သူတို့၏နောက်ကွယ်ရှိ ဗောဓိဂိုဏ်းမှ အားပေးအားမြှောက်ပြုမှုကြောင့်လည်း ဖြစ်၏။ ထိုဘုန်းကြီးများ၏ဖော်ပြချက်တွင် နတ်ဘုရားမင်းဆက်က ယခုအခါ အထီးကျန်ကာယိမ်းယိုင်နေပြီး အလွယ်တကူဖြုတ်ချနိုင်မည့်အလား ထင်မှတ်ရပါသည်။

သို့သော် ဤလျှို့ဝှက်ဆန်းကြယ် ချပ်ဝတ်တန်ဆာ ကျင့်ကြံသူက သူ၏လက်ထဲရှိ ဓားကို အသုံးပြုကာ နတ်ဆိုးများကို လုံးဝထိပ်လန့်သွားစေခဲ့သည်။

တစ်ချိန်က သူတို့ကို မြေရိုင်းဒေသများဆီသို့ ထွက်ပြေးစေရန် အတင်းအကျပ်တွန်းအားပေးခဲ့သော နတ်ဘုရားမင်းဆက်က မသေမျိုးခုံရုံးကို မှီခိုနေရုံသက်သက်သာမဟုတ်ဘဲ၊ ၎င်းကိုယ်တိုင်ကပင် နားလည်သဘောပေါက်ရန် ခက်ခဲလှသော ကြီးမားကျယ်ပြန့်သည့် အရာကြီးတစ်ခုဖြစ်နေသည်။

မှတ်ထားရမည်မှာ၊ ယခုအချိန်အထိ စုန့်ဖုန်းစီရင်စုမှ လူတစ်ယောက်တည်းသာ ထွက်ပေါ်လာသေးခြင်း ဖြစ်၏။

"တစ်ခုခု မှားနေပြီ၊အရင် ဆုတ်ကြမယ်၊ ပြန်ရောက်မှ အဲဒီဘုန်းကြီးတွေကို ရှင်းကြတာပေါ့"

လင်းယုန်နတ်ဆိုး၏အလောင်းကို ကိုင်ဆောင်ထားသော အခြားငှက်မျိုးနွယ်ဖြစ်သည့် ဒေါင်း မဟာနတ်ဆိုးက မြို့ရိုးပေါ်ရှိ ပုံရိပ်များဆီသို့ လှမ်းကြည့်လိုက်၏။ သူတို့ တစ်ဦးစီတိုင်းက ထိုက်ယင်အစစ်အမှန်မသေမျိုးတစ်ပါး၏အရှိန်အဝါကို ထုတ်လွှတ်နေကြပြီး၊အထူးသဖြင့် အစိမ်းနှင့် အဖြူရောင်ဝတ်ဆင်ထားသော အမျိုးသမီးငယ်လေးမှာ အလွန်ရင်းနှီးနေပုံရပါသည်။

သူတို့က စွမ်းအင်ဖုံးကွယ်ခြင်း နည်းစနစ်ကို အသုံးပြု၍ ရောက်ရှိလာကြပြီး၊ မူလက စုန့်ဖုန်းစီရင်စုကို အငိုက်ဖမ်းရန် စီစဉ်ထားခဲ့ကြခြင်း ဖြစ်၏။

ယခုအခါ မြို့ကိုထိုးဖောက်ရန်မျှော်လင့်ချက် မရှိတော့ရာ၊ အကယ်၍ နတ်ဘုရားမင်းဆက်၏ တတိယအဆင့် စွမ်းအားရှင်များ ရောက်လာသည်အထိ စောင့်နေမည်ဆိုပါက၊ ယနေ့ မည်သူမျှ လွတ်မြောက်နိုင်တော့မည် မဟုတ်ချေ။

ဤစကားကို ကြားသောအခါ နတ်ဆိုးများက တိတ်ဆိတ်သွားခဲ့ကြသည်။

ကောင်းကင်ယံရှိ အနီရောင် တိမ်တိုက်များသာ အဝေးသို့ တိတ်ဆိတ်စွာဆုတ်ခွာသွားကြတော့၏။

စုန့်ဖုန်းစီရင်စုရှိ လက်ဖက်ရည်ဆိုင် တစ်ဆိုင်တွင် ငယ်ရွယ်သောဘုန်းကြီး‌၏မျက်နှာက အလွန်အမင်းညှိုးနွမ်းနေပြီး၊လက်ဖက်ရည်ပန်းကန်ကို နှုတ်ခမ်းနားသို့ တေ့ထားသော်လည်းပါးစပ်ကို ဟ၍ မရနိုင်တော့ချေ။

ဗောဓိဂိုဏ်းက အချိန်အတော်ကြာကတည်းက အစီအစဉ်များကိုရေးဆွဲခဲ့ပြီး၊ မဟာနတ်ဆိုးများ၏နာကြည်းမှုကို မသေမျိုးသုံးပါးဂိုဏ်းက ဆွဲဆောင်နိုင်စေရန်နှင့် နောက်ပိုင်းတွင် သူတို့၏ ကိုယ်ပိုင် အာဟတ်များလှုပ်ရှားရန် အဆင်ပြေစေရန် ရည်ရွယ်ခဲ့ခြင်းဖြစ်၏။

သို့သော် ထျန်းတုန်းနတ်သမီး လှုပ်ရှားမှု မလုပ်ရသေးမီမှာပင်၊ ဤမိစ္ဆာသတ္တဝါများက နောက်ဆုတ်ရန် တွေးတောနေကြပြီ ဖြစ်ရာ...

နတ်ဆိုးအင်အားစု သုံးခုက ဗောဓိဂိုဏ်းကို သေချာပေါက် အပြစ်တင်ကြတော့မည်။

ဤအရာကို ပြန်လည်တွေးတောမိသောအခါ၊ သူ၏ဘေးရှိ စစ်တပ်ဖွဲ့စည်းပုံထံမှ အထိတ်တလန့် အော်ဟစ်သံများက ပို၍ပင် နားကလော်စရာ ကောင်းနေသည်။ သူလက်ဖက်ရည်ပန်းကန်ကို အလျင်အမြန် ချထားလိုက်ပြီး ထွက်ခွာရန် ပြင်ဆင်လိုက်၏။

"နတ်ဆိုးဘေးအန္တရာယ်ကြီး ဆုတ်ခွာသွားပြီဟေ့"

သပ်ရပ်သော စစ်တပ်ဖွဲ့စည်းပုံက မြို့အပြင်ဘက်သို့ စူးစိုက်ကြည့်နေကြ၏။ အင်ပါယာခုံရုံးတွင် နတ်ဆိုးဘေးအန္တရာယ်များကို ကိုင်တွယ်ဖြေရှင်းရန် သီးသန့်အစိုးရရုံးတစ်ခု ရှိပြီး ၎င်းတွင် စွမ်းအားကြီးမားသောကျင့်ကြံသူများ ပါဝင်ကြောင်းကို သူတို့ သိရှိထားကြ၏။

သို့သော် ဤအကြီးအကဲများက ဤမျှလောက် လွှမ်းမိုးနိုင်စွမ်းရှိလိမ့်မည်ဟု သူတို့ ဘယ်သောအခါကမျှ စိတ်ကူးမယဉ်ခဲ့ဖူးချေ။

လူတစ်ယောက်တည်းနဲ့ နတ်ဆိုးများကို လူစုကွဲသွားစေခဲ့သည်ဆိုတော့ ဘယ်လိုတောင် နတ်ဘုရားစွမ်းအားမျိုးလဲ။

"ဒါက..." မြို့ရိုးမျှော်စင်ပေါ်တွင်၊ မုတ်ဆိတ်နက်နှင့် လူ၏မျက်နှာက ရှုပ်ထွေးနေပြီးအံ့အားသင့်မှုများနှင့် ထူးဆန်းသည့် အရိပ်အယောင်အနည်းငယ်တို့ ပြည့်နှက်နေ၏။

စစ်သူကြီးနန်ယန်၏စွမ်းရည်များဖြင့်ဆိုလျှင်၊ သခင်ကြီးရန်ကို သတင်းပို့ရန် အမှန်တကယ် လိုအပ်ချက် ရှိပါသေးသည်လော။

အနောက်ဘက်ရှိ စီရင်စုကိုးခုတွင် ပြဿနာများ ပေါ်ပေါက်မလာခဲ့ခြင်းမှာ ဖုံးကွယ်ထားမှုကြောင့် မဟုတ်နိုင်ပေ။ နတ်ဆိုးသုတ်သင်ရေးဌာနမှ အရာရှိများထက်ပင် စစ်သူကြီးနန်ယန်၏ကြောက်မက်ဖွယ်ကောင်းသော တည်ရှိမှုကို နတ်ဆိုးများက ပို၍ စောစီးစွာ သဘောပေါက်သွားခဲ့ကြခြင်းဖြစ်ပေလိမ့်မည်။

ထို့ကြောင့်ပင် သူတို့က စုန့်ဖုန်းစီရင်စုကို ပစ်မှတ်ထားခဲ့ကြခြင်း ဖြစ်နိုင်ပြီး၊ ၎င်းက သခင်ကြီးရန်ကို အခြေအနေအပေါ်မှားယွင်းစွာ ဆုံးဖြတ်မိစေခဲ့ခြင်း ဖြစ်၏။

ကျောက်စိမ်းရေကန် ထျန်းတုန်း၊ ထျန်းဝူ ရွှမ်ဝူ၊ ကျားနဂါးဖိနှိပ်ခြင်း မဟာအလင်းဘုရင်၊ သူတို့၏အမည်ခံစစ်သူကြီးက ဤသတ္တဝါများနှင့် ယှဉ်နိုင်စွမ်း ရှိပုံရပါသည်။

"ကြည့်ရတာ ငါ့ကို မလိုအပ်တော့ဘူး ထင်ပါတယ်" ထျန်းတုန်းနတ်သမီးက အဆောက်အအုံပေါ်မှ ပထမဆုံး ခုန်ဆင်းလာစဉ်က သူမ ပြောခဲ့သော စကားများကိုပြန်လည် သတိရမိပြီး အနည်းငယ် အနေရခက်သွားသလို ခံစားလိုက်ရ၏။

သူမက သူတို့ကိုကယ်တင်ရန် လာခဲ့သည်ဟု ထင်မှတ်ခဲ့သော်လည်း၊ နတ်ဘုရားမင်းဆက်၏ မြို့စောင့်တပ်ဖွဲ့က ဤမျှလောက် ခိုင်မာအားကောင်းနေပြီး အပြင်ပန်းအကူအညီ လုံးဝ မလိုအပ်လိမ့်မည်ဟု မည်သူက တွေးထင်ထားခဲ့မည်နည်း။

"လူကြီးမင်းတို့၊ ကျွန်မက ကျောက်စိမ်းရေကန်က ထျန်းတုန်းပါ။ သတင်းရလို့ စုန့်ဖုန်းစီရင်စုကို ကူညီဖို့ လာခဲ့တာပါ။ နောက်ကျရင် စစ်သူကြီးနန်ယန်နဲ့ မိတ်ဆက်ပေးလို့ ရမလား"

သူမက အခြားသူများကို ဦးညွှတ်လိုက်သော်လည်း၊ ဘွဲ့ရစစ်သူကြီး သုံးဦးက သူမကို တိတ်ဆိတ်စွာ ကြည့်နေကြပြီး သူတို့၏မျက်နှာများတွင် ကျေးဇူးတင်သည့် အမူအရာ လုံးဝ မရှိသည်ကိုသာ မြင်တွေ့လိုက်ရ၏။

သတင်းရလို့ ဟုတ်လား။

နတ်ဆိုးသုတ်သင်ရေးဌာန ကိုယ်တိုင်ပင်လျှင် ဤကိစ္စကို စစ်သူကြီးနန်ယန်ထံမှ ယခုလေးတင် သိရှိခဲ့ရခြင်းဖြစ်သည်။ ကျင့်ကြံသူဂိုဏ်းတစ်ခုသက်သက်သာဖြစ်သော ကျောက်စိမ်းရေကန် မသေမျိုးဂိုဏ်းက နတ်ဆိုးဘေးအန္တရာယ်အကြောင်းကို အင်ပါယာခုံရုံးထက် စော၍မည်သို့ သိရှိနိုင်မည်နည်း၊ထို့အတူ ဤနေရာတွင်တမင်သက်သက်လာရောက် စောင့်ဆိုင်းနေခဲ့ခြင်းလော။

သူတို့၏ရည်ရွယ်ချက်များမှာ ဤထက် ပို၍ ရှင်းလင်းနိုင်စရာ မရှိတော့ချေ။

ပါးနပ်စွာငြင်းဆန်ရန် အကြောင်းပြချက်တစ်ခု ရှာဖွေဖို့ သူ တွေးလိုက်မိစဉ်မှာပင်၊ မုတ်ဆိတ်နက်နှင့် လူ၏အမူအရာက အနည်းငယ် ပြောင်းလဲသွားပြီး မြို့အပြင်ဘက်သို့ ရုတ်တရက် ပြန်လည် လှမ်းကြည့်လိုက်သည်။

"ညီအစ်ကို...မင်း အနိုင်ရသွားပြီ။ ဒီနေ့တော့ ဒီနယ်နိမိတ်ကိုဖြတ်ကျော်ဖို့ ငါတို့ဆီမှာယုံကြည်မှု မရှိတော့တာ အမှန်ပဲ"