အခန်း ၇၆၂

အခန်း (၇၆၂) - ဆဋ္ဌမအဆင့် ဆေးဖော်စပ်ပညာရှင်အဖြစ် အဆင့်တက်ခြင်း၊ ကံကြမ္မာသားတော်၏ အခွင့်အရေးနှင့် မိုးကြိုးအင်မော်တယ်စံအိမ်(၂)။

ဤအခိုက်အတန့်၌ အမှတ် (၈၈) တာအိုကျောင်းတော်၊ ခြံဝင်းတစ်ခုအတွင်း။

ဆေးဖော်ခန်းတစ်ခု၌။

ပတ်ဝန်းကျင်တစ်ခုလုံးမှာ ပရမ်းပတာ ဖြစ်နေပြီး မြေပြင်ပေါ်တွင် ချိုင့်ခွက်များ ပြည့်နှက်နေကာ ကျောက်စရစ်ခဲများ နေရာအနှံ့ လွင့်စဉ်နေ၏။ ၎င်းတို့အားလုံးမှာ မိုးကြိုးကပ်ဘေး၏ တိုက်ခိုက်ခံထားရသော လက္ခဏာများပင် ဖြစ်သည်။ ပတ်ဝန်းကျင်တစ်ခုလုံးတွင် တူးခြစ်နေသော အနံ့အသက်များ ပျံ့နှံ့နေလေသည်။

လွန်ခဲ့သောအချိန်လေးက ဆေးလုံးကပ်ဘေးသည် မည်မျှအထိ ပြင်းထန်ကာ ကြောက်မက်ဖွယ်ကောင်းခဲ့မည်ကို တွေးကြည့်ရုံဖြင့် သိနိုင်ပေသည်။

ကျိုးစွေ့သည် မြေပြင်ပေါ်တွင် တင်ပျဉ်ခွေထိုင်နေပြီး သူ၏ ရှေ့မှောက်၌ ရွှေရောင်ဆေးဖိုတစ်ခု ရှိနေ၏။ ၎င်းအတွင်းတွင် ရွှေရောင်တောက်ပနေသော ဆေးလုံးသုံးလုံးမှာ ငြိမ်သက်စွာ လဲလျောင်းနေပြီး ၎င်းတို့၏ မျက်နှာပြင်ပေါ်တွင် ဆေးလုံးပုံစံအစင်းကြောင်း သုံးခု ပေါ်ထွက်နေလေသည်။

တစ်ချိန်တည်းမှာပင် ဤဆေးလုံးသုံးလုံးသည် အစီအရင်အတားအဆီးတစ်ခု၏ ဖုံးလွှမ်းခြင်းကို ခံထားရဟန်ရှိပြီး အဆုံးမဲ့သော ဆေးစွမ်းအာနိသင်များ ပေါင်းစပ်ပါဝင်နေ၏။ ၎င်းတို့၏ အပေါ်ယံတွင် သိပ်သည်းရှုပ်ထွေးသော မန္တန်အင်းကွက်များ ပေါ်ထွက်နေပြီး အဆုံးအစမရှိသော လျှို့ဝှက်နက်နဲမှုများ ပါဝင်နေလေသည်။

မပီဝိုးတဝါးဖြင့် ဤဆေးလုံးသုံးလုံးသည် ကောင်းကင်မြေကြီး၏ ဝိညာဉ်စွမ်းအင်များကို စုပ်ယူထုတ်လွှတ်နေပြီး ကောင်းကင်ယံထက်တွင် ကောင်းကင်မြေကြီး၏ ဓမ္မရုပ်သွင်တစ်ခု ပေါ်ထွက်လာဟန်ရှိ၏။ အဆုံးမဲ့သော တိုက်ကြီးတစ်ခုပေါ်တွင် သစ်ပင်ပေါင်းများစွာ ပေါ်ပေါက်လာကာ ထူထပ်သော သစ်တောကြီးတစ်ခုအလား သက်ဝင်လှုပ်ရှားနေလေသည်။

မြစိမ်းရောင် သစ်ပင်တစ်ပင်စီတိုင်းတွင် အဆုံးမဲ့သော သက်ဝင်လှုပ်ရှားမှုများ ပါဝင်နေပေသည်။

ဤသည်မှာ ဆဋ္ဌမအဆင့် ရတနာဆေးလုံး - သစ်ပင်တစ်သောင်း ရွှမ်ယင်ဆေးလုံးပင် ဖြစ်လေသည်။

ပဉ္စမအဆင့် ရတနာဆေးလုံးနှင့် ဆဋ္ဌမအဆင့် ရတနာဆေးလုံး မည်သို့ ကွာခြားသနည်းဆိုသည်ကို သိရှိထားရပေမည်။ ၎င်းမှာ ဆဋ္ဌမအဆင့် ရတနာဆေးလုံးကို ဖော်စပ်အောင်မြင်သွားသည်နှင့် တစ်ပြိုင်နက် ကောင်းကင်မြေကြီး၏ အံ့ဖွယ်နိမိတ်လက္ခဏာများ ဖြစ်ပေါ်လာပြီး ကောင်းကင်မြေကြီး ဓမ္မရုပ်သွင်၏ စွမ်းအားများ ပါဝင်လာခြင်းပင် ဖြစ်၏။

ဆဋ္ဌမအဆင့် ရတနာဆေးလုံး တစ်လုံးစီတိုင်းတွင် ကြောက်မက်ဖွယ် ဆေးစွမ်းအာနိသင်များ ပါဝင်ပြီး ပြိုင်ဘက်ကင်းစွာ အဖိုးတန်လှပေသည်။

ဤသစ်ပင်တစ်သောင်း ရွှမ်ယင်ဆေးလုံးမှ သစ်ပင်တစ်သောင်း၏ အံ့ဖွယ်နိမိတ်လက္ခဏာများ ပေါ်ထွက်လာမည်မှာ သိသာထင်ရှားလှ၏။

ယခင်က ပိုင်စုကျဲ့ ရရှိခဲ့သော ရောင်ခြည်ခုနစ်ဖြာ ကြာပန်းဆေးလုံးမှလည်း ကြာပန်း၏ အံ့ဖွယ်နိမိတ်လက္ခဏာများ ပေါ်ထွက်လာခဲ့ပေသည်။

ထို့ကြောင့် ဆဋ္ဌမအဆင့် ရတနာဆေးလုံး တစ်လုံးကို ဖော်စပ်ရန်မှာ အလွန်တရာ ခက်ခဲသော ကိစ္စတစ်ရပ် ဖြစ်လေသည်။

ဆဋ္ဌမအဆင့် ဆေးဖော်စပ်ပညာရှင်ဖြစ်လျှင်ပင် ဆဋ္ဌမအဆင့် ရတနာဆေးလုံးတစ်ဖိုကို ဖော်စပ်နိုင်ရန် ဆယ်စုနှစ်ပေါင်းများစွာမှသည် နှစ်တစ်ရာနီးပါးအထိ အချိန်ယူရမည် ဖြစ်သည်။

ဤသို့သော အကြောင်းပြချက်များကြောင့်သာလျှင် ဆဋ္ဌမအဆင့် ရတနာဆေးလုံးများသည် တန်ဖိုးမဖြတ်နိုင်အောင် အဖိုးတန်နေရခြင်း ဖြစ်၏။

တစ်ကြိမ်တစ်ခါ ပေါ်ထွက်လာသည်နှင့် ရေတွက်၍မရနိုင်သော လေဟာနယ်သန့်စင်ခြင်းအဆင့် ဘိုးဘေးများ၏ အပြိုင်အဆိုင် လိုက်လံရှာဖွေခြင်းနှင့် ရူးသွပ်မတတ် လေလံဆွဲခြင်းတို့ကို ခံရမည်မှာ သေချာပေသည်။

"နောက်ဆုံးတော့ ဆဋ္ဌမအဆင့် ဆေးဖော်စပ်ပညာရှင် ဖြစ်လာခဲ့ပြီပဲ...”

ကျိုးစွေ့၏ မျက်နှာထက်တွင် အပြုံးတစ်ခု အလိုအလျောက် ပေါ်ထွက်လာလေသည်။

နှစ်တစ်ရာတိုင်တိုင် ပြင်းပြင်းထန်ထန် ကျင့်ကြံအားထုတ်ပြီးနောက်တွင် သူသည် သူ၏ဆေးဖော်စပ်ပညာရှင်အဆင့်ကို ပဉ္စမအဆင့် အထွတ်အထိပ်မှ ဆဋ္ဌမအဆင့် အောက်ခြေအထိ အောင်မြင်စွာ တိုးမြှင့်နိုင်ခဲ့လေပြီ။

အဆင့်တစ်ဆင့်သာ တက်သွားခြင်းဖြစ်သော်လည်း ယင်းသည် အရည်အသွေးပိုင်းဆိုင်ရာတွင် ကြီးမားလှသော အပြောင်းအလဲကြီးတစ်ရပ် ဖြစ်ပေသည်။

သူသည် ဆေးဖော်စပ်ခြင်း၌ သခင်ကြီးတစ်ဦး ဖြစ်လာခဲ့ပြီဟု ဆိုရမည်သာ ဖြစ်သည်။

ဤကဲ့သို့သော ဆေးဖော်စပ်ပညာရှင်အဆင့်မျိုးသည် ဖုန်းရှီးမြို့တွင်ပင် အလွန်တရာမှ ရှားပါးလှ‌သည်။

လက်ချိုးရေတွက်၍ရနိုင်လောက်အောင် နည်းပါးလှသည်ဟု ဆိုလျှင်လည်း မမှားပေ။

'ဆဋ္ဌမအဆင့် အဖိုးတန်ဆေးလုံးတွေကို အောင်မြင်စွာ ဖော်စပ်နိုင်ဖို့အတွက် အရေးအကြီးဆုံးက မူလဝိညာဉ်စွမ်းအား ကြီးမားဖို့နဲ့ အစီအရင်တွေကို နားလည်ထားဖို့ပဲ...’

'ဘာဖြစ်လို့လဲဆိုတော့ ဆဋ္ဌမအဆင့် အဖိုးတန်ဆေးလုံး ဖော်စပ်တဲ့အခါ ဆေးအငွေ့အသက်တွေနဲ့ အစီအရင် ဖွဲ့စည်းဖို့ လိုအပ်လို့ပဲ...’

'ဆေးအငွေ့အသက်နဲ့ အစီအရင် ဖွဲ့စည်းနိုင်မှသာ ဆဋ္ဌမအဆင့် နတ်ဆေးပင်တွေရဲ့ ဆေးစွမ်းကို အပြည့်အဝ ဖော်ထုတ်နိုင်မှာ...’

ကျိုးစွေ့ မျက်လုံးများကို အနည်းငယ် မှေးကျဉ်းလိုက်၏။

မှန်ပေသည်၊ ဆဋ္ဌမအဆင့် နတ်ဆေးပင်များသည် နှစ်သောင်းချီ သက်တမ်းရှိသော ဆေးပင်များဖြစ်ကြပြီး ၎င်းတို့၏ဆေးစွမ်းမှာ သာမန်ဆေးပင်များနှင့် နှိုင်းယှဉ်၍မရနိုင်အောင် ပြင်းထန်ပေသည်။

နှစ်သောင်းချီ နတ်ဆေးပင်၏ ဆေးစွမ်းကို အပြည့်အဝ ဖော်ထုတ်နိုင်ရန်အတွက် သာမန်နည်းလမ်းများကို အသုံးပြု၍ မရနိုင်တော့ချေ။

နတ်ဆေးပင်အများအပြားကို ရိုးရှင်းစွာ ပေါင်းစပ်လိုက်ရုံဖြင့် ဆဋ္ဌမအဆင့် အဖိုးတန်ဆေးလုံးတစ်လုံးအဖြစ် ဖော်စပ်နိုင်မည် မဟုတ်ပေ။

ထို့ကြောင့် ဆေးဖော်စပ်ပညာရှင်အများအပြား၏ နှစ်ပေါင်းများစွာ စမ်းသပ်မှုများအပြီးတွင် ဆဋ္ဌမအဆင့် အဖိုးတန်ဆေးလုံး ဖော်စပ်သည့်နည်းလမ်းနှင့် နှစ်သောင်းချီ နတ်ဆေးပင်များ၏ ဆေးစွမ်းကို အပြည့်အဝ ဖော်ထုတ်နိုင်မည့် နည်းလမ်းကို ရှာဖွေတွေ့ရှိခဲ့ကြသည်။

ထိုအရာမှာ ဆေးအငွေ့အသက်ဖြင့် အစီအရင် ဖွဲ့စည်းခြင်းပင် ဖြစ်လေသည်။

ဥပမာအားဖြင့် ယခု သူဖော်စပ်နေသော သစ်ပင်တစ်သောင်း ရွှမ်ယင်ဆေးလုံးတွင် အဓိကဆေးပင်များမှာ နှစ်သောင်းချီ ကောင်းကင်သစ်သားသီး၊ နှစ်သောင်းချီ ရွှမ်ယင်မြက် အစရှိသည်တို့ ဖြစ်ကြ၏။

သူသည် ဆေးတာအိုလမ်းစဉ်၏ နတ်ဘုရားစွမ်းရည်ဖြစ်သော ကောင်းကင်နှင့်မြေကြီး ဆေးပေါင်းဖိုပညာရပ်ကို အသုံးပြု၍ ထိုနှစ်သောင်းချီ နတ်ဆေးပင်နှစ်မျိုးကို အပြည့်အဝ သန့်စင်လိုက်ပြီး အညစ်အကြေးများကို ဖယ်ရှားကာ အသန့်စင်ဆုံး ဆေးအငွေ့အသက်များအဖြစ်သို့ ပြောင်းလဲလိုက်သည်။

သို့ရာတွင် ဤနှစ်သောင်းချီ နတ်ဆေးပင်များ၏ ဆေးစွမ်းကို အပြည့်အဝ ဖော်ထုတ်နိုင်ရန်အတွက် ဆေးဖော်စပ်ပညာရှင်သည် သူ၏ မူလဝိညာဉ်စွမ်းအားကို အသုံးပြု၍ ထိုဆေးအငွေ့အသက်များကို စီစဉ်ဖွဲ့စည်းကာ မဟာအစီအရင်တစ်ခုအဖြစ် ပုံဖော်ရန် လိုအပ်ပေသည်။

ဆေးအငွေ့အသက် မဟာအစီအရင်တစ်ခု ဖွဲ့စည်းနိုင်မှသာ ဆေးစွမ်းအားလုံးကို တစ်သားတည်း ပေါင်းစပ်နိုင်ပြီး အပြင်းထန်ဆုံးသော ဆေးစွမ်းကို ပေါက်ကွဲထွက်စေ၍ အဆိုးမှအကောင်းသို့ ပြောင်းလဲပေးနိုင်မည့် အံ့မခန်းအာနိသင်ကို ဖော်ထုတ်နိုင်မည် ဖြစ်၏။

နှစ်သောင်းချီ နတ်ဆေးပင်များ၏ ဆေးစွမ်းနှင့်သဘာဝက မည်မျှပင် ပြင်းထန်သနည်းဆိုလျှင် အဆင့်နိမ့် နတ်ဆေးပင်များနှင့် လုံးဝ နှိုင်းယှဉ်၍ မရနိုင်ပေ။

အဆင့်နိမ့် နတ်ဆေးပင်များဆိုလျှင် ရိုးရှင်းစွာ ပေါင်းစပ်လိုက်၍ ရနိုင်သေးသည်။

သို့သော် နှစ်သောင်းချီ နတ်ဆေးပင်များမူကား ရေနှင့် မီးကဲ့သို့ပင် ပေါင်းစပ်ရန် အလွန်တရာ ခက်ခဲလှပေသည်။

ဆေးအငွေ့အသက် မဟာအစီအရင်၏ အကူအညီဖြင့် ကွဲပြားခြားနားသော ဆေးအငွေ့အသက်များကို စီစဉ်ဖွဲ့စည်းမှသာ အဖိုးတန်ဆေးလုံးတစ်လုံးအဖြစ် ပုံဖော်နိုင်မည် ဖြစ်လေသည်။

ထို့ကြောင့် ဆဋ္ဌမအဆင့် ဆေးဖော်စပ်ပညာရှင်အဖြစ်သို့ တက်လှမ်းလိုပါက အစီအရင်များနှင့် ပတ်သက်၍ အတိုင်းအတာတစ်ခုအထိ နားလည်ထားရန် လိုအပ်ပေသည်။

သို့မဟုတ်ပါက ဤတစ်သက်တွင် ဆဋ္ဌမအဆင့် ဆေးဖော်စပ်ပညာရှင်ဖြစ်လာရန်နှင့် ဆဋ္ဌမအဆင့် အဖိုးတန်ဆေးလုံးကို ဖော်စပ်နိုင်ရန် လုံးဝ ဖြစ်နိုင်မည် မဟုတ်ချေ။

'လောကကြီးမှာ လမ်းစဉ်တွေ အများကြီးရှိပေမယ့် နောက်ဆုံးကျတော့ အားလုံးက ပန်းတိုင်တစ်ခုတည်းကိုပဲ သွားကြတာပဲ...’

'အင်မော်တယ်ကျင့်ကြံခြင်း အတတ်ပညာတစ်ရာကလည်း ဒီလိုပါပဲ...’

'အပေါ်ယံကြည့်ရင်တော့ ပညာရပ်တွေက တစ်ခုနဲ့တစ်ခု မသက်ဆိုင်သလို ထင်ရတယ်...’

'ဒါပေမဲ့ ပိုမြင့်တဲ့ အဆင့်တွေကို ရောက်လာတဲ့အခါ တကယ်တော့ ဒီပညာရပ်တွေ အားလုံးက ဆက်စပ်နေပြီး ပေါင်းစပ်သွားကြတာပဲ...’

'ပညာရပ်တွေကို ပေါင်းစပ်နိုင်မှသာ ရှေ့ကို ဆက်လှမ်းနိုင်မှာ...’

'ဆေးတာအိုလမ်းစဉ်ကလည်း အတူတူပဲ...’

'ဆဋ္ဌမအဆင့် ဆေးဖော်စပ်ပညာရှင် ဒါမှမဟုတ် အဲဒီထက်ပိုမြင့်တဲ့ အဆင့်တွေကို တက်လှမ်းချင်ရင် အစီအရင်တွေကို နားလည်ထားဖို့ လိုအပ်သလို မန္တန်အက္ခရာတွေကိုတောင် သိထားဖို့ လိုတယ်...’

'တကယ်တော့ လက်နက်ဖန်တီးခြင်းကလည်း ဒီလိုပဲ...’

'မန္တန်အက္ခရာတွေနဲ့ အစီအရင်တွေကို မကျွမ်းကျင်ဘူးဆိုရင် ထိပ်တန်း မှော်လက်နက်တွေကို ဖန်တီးနိုင်မှာ မဟုတ်ဘူး...’ ဟု သူ ဆက်လက် တွေးတောနေမိလေသည်။

ကျိုးစွေ့က မျက်လုံးများကို ထပ်မံမှေးကျဉ်းလိုက်ပြန်၏။

ဆဋ္ဌမအဆင့် ဆေးဖော်စပ်ပညာရှင်ဖြစ်လာပြီးနောက်တွင် သူသည် ဆေးတာအိုလမ်းစဉ်နှင့် ပတ်သက်၍ ပိုမို နားလည်သဘောပေါက်လာခဲ့သည်။

အဆင့်နိမ့် ကျင့်ကြံသူများဆိုလျှင် လမ်းစဉ်တစ်ခုတည်းကိုသာ အထူးပြုလေ့လာနိုင်မည် ဖြစ်၏။

မည်သို့ပင်ဆိုစေကာမူ အဆင့်နိမ့် ကျင့်ကြံသူများသည် သက်တမ်းတိုတောင်းလှသဖြင့် ဗဟုသုတများစွာကို လေ့လာသင်ယူရန် နည်းလမ်းမရှိပေ။

သို့သော် နတ်ဘုရားအသွင်ပြောင်းအဆင့်နှင့် လေဟာနယ်သန့်စင်ခြင်းအဆင့်များသို့ ရောက်ရှိသွားချိန်တွင်မူ သက်တမ်းမှာ နှစ်ထောင်ပေါင်း၊ သောင်းပေါင်းများစွာ ရှိနေပြီ ဖြစ်သည်။

ထိုသို့ဖြစ်လာပါက ဤဗဟုသုတများနှင့် အင်မော်တယ်ကျင့်ကြံခြင်း အတတ်ပညာတစ်ရာကို လေ့လာရန် အချိန်များစွာ ရရှိလာမည် ဖြစ်လေသည်။

တစ်နည်းအားဖြင့် ဤသည်က ကျင့်ကြံသူများကို ဘက်စုံစွမ်းရည်ရှိသော အဆင့်သို့ရောက်ရန် ဖိအားပေးနေသကဲ့သို့ပင် ဖြစ်ပေသည်။

အမှန်အတိုင်းဆိုရလျှင် ပါရမီမလုံလောက်ပါက ထိုပညာရပ်များကို တတ်မြောက်နိုင်မည် မဟုတ်ချေ။

ထို့ကြောင့် ဝိညာဉ်လောကထဲတွင် လေဟာနယ်သန့်စင်ခြင်းအဆင့် ဘိုးဘေးအရေအတွက်မှာ မနည်းလှ။ သို့ရာတွင် ဆဋ္ဌမအဆင့် ဆေးဖော်စပ်ပညာရှင်ဖြစ်လာနိုင်သူများမှာမူ အလွန်တရာမှ နည်းပါးပြီး ရှားပါးလှသည်။

ကံကောင်းထောက်မစွာဖြင့် သူသည် အစကတည်းက ဘက်စုံတော်သော ပါရမီရှင်တစ်ဦးဖြစ်ပြီး အင်မော်တယ်ကျင့်ကြံခြင်း အတတ်ပညာတစ်ရာကို ကျွမ်းကျင်ကာ ဗဟုသုတ အလွန်ကြွယ်ဝသူ ဖြစ်သည်။

ထို့ကြောင့် ဤအခက်အခဲသည် သူ့အတွက် ကြီးကြီးမားမား မဟုတ်ဘဲ လက်တစ်ဖက်ကို လှန်လိုက်သကဲ့သို့ လွယ်ကူလှပေသည်။

"ဒီ ဆဋ္ဌမအဆင့် အဖိုးတန်ဆေးလုံးကို စမ်းကြည့်ရအောင်...”

ထိုသို့တွေးလိုက်ရင်း ကျိုးစွေ့သည် သစ်ပင်တစ်သောင်း ရွှမ်ယင်ဆေးလုံးကို ပါးစပ်ထဲသို့ ပစ်ထည့်လိုက်လေသည်။

ဝုန်း...။

ထိုခဏတွင်ပင် ဧရာမ ဆေးစွမ်းကြီးတစ်ခုက ရေလွှမ်းမိုးသည့်အလား ရုတ်တရက် ပေါက်ကွဲထွက်လာပြီး သူ၏ ခြေလက်အင်္ဂါများ၊ သွေးကြောများအပြင် ဒန်တျန်ချီပင်လယ်၏ အနက်ရှိုင်းဆုံး နေရာများအထိ စီးဆင်းဝင်ရောက်သွားလေသည်။

အကယ်၍ သာမန် နတ်ဘုရားအသွင်ပြောင်းနှောင်းပိုင်းအဆင့် ကျင့်ကြံသူတစ်ဦးသာ ဆိုပါက ချက်ချင်းပင် ခန္ဓာကိုယ် ပေါက်ကွဲသွားလောက်သည်။ သာမန် နတ်ဘုရားအသွင်ပြောင်းအဆင့် ကျင့်ကြံသူများအနေဖြင့် လေဟာနယ်သန့်စင်ခြင်းအဆင့် ဆေးလုံးများ၏ ဆေးစွမ်းကို လုံးဝ ခံနိုင်ရည်ရှိမည် မဟုတ်ချေ။

သို့သော် ကျိုးစွေ့ကမူ ထိုသို့မဟုတ်ပေ။

သူ၏ ခန္ဓာကိုယ်ကြံ့ခိုင်မှုသည် အလွန်တရာ စွမ်းအားကြီးမားပြီး နဂါးဆင်ခန္ဓာကိုယ် ဖြစ်နေသောကြောင့် ဤမျှလောက်သော ဆဋ္ဌမအဆင့် အဖိုးတန်ဆေးလုံးလေးက သူ့အတွက် မပြောပလောက်ချေ။

အမှန်တကယ်တွင် ကူနတ်ဘုရားကျင့်စဉ်ကို ကျင့်ကြံထားသောကြောင့် သူ၏ခန္ဓာကိုယ်အတွင်းရှိ မှော်စွမ်းအင်များသည် အလွန်တရာ သိပ်သည်းနေပြီး ဆယ်ဆထက်မက ပိုမိုကြီးမားနေသည်။

ဤသို့ဖြစ်နေခြင်းကြောင့် သူ၏ကျင့်ကြံမှုအမြန်နှုန်းသည် အခြားကျင့်ကြံသူများထက် ပို၍ နှေးကွေးနေခြင်း ဖြစ်သည်။