အခန်း ၁၇၆

အခန်း ၁၇၆ - ခုနစ်စဉ်ကြယ်တောင်ထိပ်နှင့် နဂါးနတ်ဘုရားကျောက်စာတိုင်

ထျန်းဟန်ဂိုဏ်း...

မြင်းနက်ကြီးသည် ထျန်းဟန်ဂိုဏ်းကို ကြည့်ကာ မျက်တောင်တခတ်ခတ် ပြုလုပ်နေ၏။ သူက စူးစမ်းလိုစိတ်ဖြင့် တီးတိုးရေရွတ်လိုက်သည်။-

“ထူးဆန်းလိုက်တာ... ဒီနေရာမှာ ဘာလို့ တောင်ထိပ် ခုနစ်ခုပဲ ရှိနေရတာလဲ...”

ကြောင်နက်ကြီးသည်လည်း စိတ်ဝင်စားသွားပြီး မြင်းနက်ကြီး ညွှန်ပြရာသို့ လှမ်းကြည့်လိုက်ရာ အမှန်တကယ်ပင် တောင်ထိပ် ခုနစ်ခုသာ ရှိသည်ကို တွေ့လိုက်ရပေသည်။ တောင်ထိပ်တစ်ခုစီမှာ အတော်ပင် ကြီးမားလှပြီး ၎င်းတို့၏အပေါ်တွင် ရေတွက်၍မရနိုင်သော အဆောင်အဦးများနှင့် နန်းတော်များစွာ တည်ရှိနေပေသည်။

“ဦးလေးမြင်း... ထျန်းဟန်ဂိုဏ်းက နာမည်ကသာ ခန့်ညားတာ... တောင်ထိပ် ခုနစ်ခုပဲ ရှိတာဆိုတော့ တော်တော်လေး ကပ်စေးနှဲတာပဲ...”

ကြောင်နက်ကြီးက နှုတ်ခမ်းဆူကာ ပြောလိုက်၏။

“ကြောင်လေး... မင်းရဲ့ အမြင်က ဘယ်တော့မှ တိုးတက်လာမှာလဲ...”

မြင်းနက်ကြီးက ၎င်းအား အထင်အမြင်သေးစွာဖြင့် တစ်ချက် ကြည့်လိုက်သည်။

“ဦးလေးမြင်း... တစ်ခုခု ရှာတွေ့လို့လား...”

ကြောင်နက်ကြီး၏ ရင်ခုန်သံမှာ မြန်ဆန်သွားပြီး အလျင်အမြန် မေးမြန်းလိုက်၏။

“အဲ့ဒီ တောင်ထိပ် ခုနစ်ခုကို သေချာကြည့်စမ်း... ခုနစ်စဉ်ကြယ် အစီအစဉ်အတိုင်း ရှိနေတာနဲ့ မတူဘူးလား...”

မြင်းနက်ကြီးက လေးနက်စွာ ပြောလိုက်သည်။

ကြောင်နက်ကြီးက အသေအချာ ပြန်ကြည့်လိုက်သည့်အခါ သူ၏မျက်နှာပေါ်တွင် ထိတ်လန့်သွားသည့် အမူအရာတစ်ခု ချက်ချင်း ပေါ်လာခဲ့၏။ သူက အာမေဍိတ်သံဖြင့် ပြောလိုက်သည်။

“တကယ်ပဲ... ပြည့်စုံတဲ့ ခုနစ်စဉ်ကြယ် အစီရင်ကြီးပဲ... အဲ့ဒါက အတိအကျ...”

ဤနေရာတွင် သူက စကားကို ရုတ်တရက် ရပ်လိုက်သည်။ ကြောင်နက်ကြီးသည် နဂါးနတ်ဘုရားဂိုဏ်း၏ မြေအောက်အနက်ပိုင်းရှိ ဧရာမ နဂါးနက်ကြီး၏ ခန္ဓာကိုယ်ပေါ်တွင် စိုက်ဝင်နေသော မြားတို ခုနစ်စင်းကို သတိရသွားခြင်း ဖြစ်ပေသည်။ ထိုစဉ်ကလည်း ၎င်းမှာ ခုနစ်စဉ်ကြယ် အစီရင်တစ်ခု ဖြစ်နေသည် မဟုတ်ပါလား။ သူတို့ရှေ့ရှိ ထျန်းဟန်ဂိုဏ်းမှာလည်း ထိုကဲ့သို့ပင် ဖြစ်နေသည်များလား။

“မင်း ပြောတာ မှန်တယ်... ဒါကလည်း အစီရင်တစ်ခုပဲ...”

မြင်းနက်ကြီးက ထောက်ခံလိုက်သည်။

“ဒါပေမဲ့ ခုနစ်စဉ်ကြယ်ကို အခြေခံထားတဲ့ အစီရင်တွေက အများကြီး ရှိတာပဲ... ဒါကြောင့် ဒါကို တမင်တကာ လုပ်ထားတာလို့တော့ အတိအကျ ပြောလို့ မရသေးဘူး...”

“ဦးလေးမြင်း ပြောတာ မှန်ပါတယ်...”

ကြောင်နက်ကြီးက ပြုံးလျက် အလျင်အမြန်ပင် မြှောက်ပင့်ပြောဆိုလိုက်၏။

ထိုအခိုက်အတန့်တွင် ရီယွင်သည် ရထားလုံးအတွင်း၌ မျက်လုံးမှိတ်ထားသော်လည်း ထျန်းဟန်ဂိုဏ်း၏ တောင်ထိပ် ခုနစ်ခုကို အနှံ့အပြား စူးစမ်းပြီးသွားပြီ ဖြစ်သည်။ မြင်းနက်ကြီး ပြောသည်မှာ မှန်ကန်ပေသည်။ ဤသည်မှာ အမှန်တကယ်ပင် ခုနစ်စဉ်ကြယ် ဧရာမအစီရင်ကြီး တစ်ခု ဖြစ်နေခဲ့သည်။ ရီယွင်သည် တောင်ထိပ် ခုနစ်ခု၏ မြေအောက်အနက်ပိုင်းကိုပါ အသေအချာ ရှာဖွေခဲ့သော်လည်း ထူးခြားသော ဟင်းလင်းပြင်မျိုးကိုမူ ရှာမတွေ့ခဲ့ချေ။

သို့သော်လည်း ရီယွင်သည် ထျန်းဟန်ဂိုဏ်း၏ ကွင်းပြင်ကျယ်အတွင်း၌ ရင်းနှီးသော အရာတစ်ခုကို တွေ့မြင်လိုက်ရသည်။ ထိုနေရာ၌ ပေ ၇၀ ခန့် မြင့်မားသော ဧရာမ ကျောက်ပြာတုံးကြီး တစ်ခု ရှိနေပေသည်။ ၎င်း၏ မျက်နှာပြင်ပေါ်တွင် သက်ရှိထင်ရှားရှိနေသည့်အလား ထင်မှတ်ရသော ဧရာမ နဂါးကြီးတစ်ကောင်ကို ရေးထွင်းထားသည်။

‘စိတ်ဝင်စားစရာပဲ... ဒီလို အဆင့်နိမ့်တဲ့ ထျန်းဟန်ဂိုဏ်းကတောင် ငါ့ရဲ့ နဂါးနတ်ဘုရားဂိုဏ်းကို ချုပ်နှောင်ထားချင်နေတယ်ပေါ့လေ...’

ရီယွင်က တိုးညင်းစွာ ရေရွတ်လိုက်ပြီး သူ၏မျက်ဝန်းများအတွင်း၌ မှိန်ဖျော့သော ဒေါသအရိပ်အယောင်များ ဝင်းလက်သွား၏။

ဤကျောက်စာတိုင်မှာ လွန်ခဲ့သော နှစ်ပေါင်းတစ်သိန်းတုန်းကဆိုလျှင် ချန်းနန်ကုန်းမြေကြီး တစ်ခုလုံးကို တုန်လှုပ်စေခဲ့သည့် ‘နဂါးနတ်ဘုရားကျောက်စာတိုင်’ ဟူသော အမည်ဖြင့် ကျော်ကြားခဲ့သည် မဟုတ်ပါလား။ နဂါးနတ်ဘုရားဂိုဏ်းတွင် နဂါးနတ်ဘုရားကျောက်စာတိုင် စုစုပေါင်း တစ်ဆယ့်သုံးတိုင် ရှိခဲ့ပေသည်။ ထျန်းဟန်ဂိုဏ်းတွင် သူ မြင်နေရသော ကျောက်စာတိုင်မှာ တစ်ဆယ့်သုံးတိုင်မြောက်ဖြစ်ပြီး ရီယွင်ကိုယ်တိုင် ရေးထွင်းခဲ့ခြင်း ဖြစ်သည်။

ဤသည်မှာ အကြောင်းမဲ့ ပြုလုပ်ခဲ့ခြင်း မဟုတ်ချေ။ နဂါးနတ်ဘုရားဂိုဏ်း၏ ပထမဆုံးသော ဘိုးဘေးကြီးသည် နဂါးနတ်ဘုရားကျောက်စာတိုင် တစ်တိုင်ကို ထုလုပ်ခဲ့သည်။ ဒုတိယ၊ တတိယနှင့် နောက်ပိုင်းမျိုးဆက် ဂိုဏ်းချုပ်များအားလုံးသည် တစ်ဆယ့်သုံးဆက်မြောက် ရီယွင်အထိ ဤရိုးရာကို ဆက်လက်ထိန်းသိမ်းခဲ့ကြပြီး မျိုးဆက်တစ်ခုစီတိုင်းသည် ကျောက်စာတိုင်အသစ် တစ်တိုင်စီကို ထုလုပ်ခဲ့ကြသည်။ ယခင်က ရီယွင်သည် နဂါးနတ်ဘုရားဂိုဏ်း၏ ဂိုဏ်းချုပ်တိုင်းက ဘာကြောင့် ဤကျောက်စာတိုင်ကို ထုလုပ်ရသနည်းဟူသည်ကို နားမလည်ခဲ့ချေ။ သို့သော်လည်း ယခုအခါတွင်မူ သူ သဘောပေါက်သွားပြီ ဖြစ်၏။

နဂါးနတ်ဘုရားကျောက်စာတိုင် တိုင်တိုင်းမှာ နဂါးနတ်ဘုရားဂိုဏ်း၏ ကံကြမ္မာတရားကို သယ်ဆောင်ထားခြင်း ဖြစ်ပေသည်။ ကျောက်စာတိုင် အရေအတွက် များလေလေ နဂါးနတ်ဘုရားဂိုဏ်း၏ ကံကြမ္မာတရားမှာ ပိုမို အားကောင်းလာလေလေ ဖြစ်၏။ သဘာဝကျကျပင် နဂါးနတ်ဘုရားကျောက်စာတိုင်များသာမက အခြားသော အရာများစွာသည်လည်း ဂိုဏ်း၏ ကံကြမ္မာတရားကို သယ်ဆောင်ထားကြပေသည်။ နဂါးနတ်ဘုရားကျောက်စာတိုင်မှာ ထိုသို့သော ပြယုဒ်တစ်ခုမျှသာ ဖြစ်ပေသည်။

မူလ နဂါးနတ်ဘုရားကျောက်စာတိုင် တစ်ဆယ့်သုံးတိုင်စလုံးမှာ နဂါးနတ်ဘုရားဂိုဏ်း၏ တောင်တံခါးရှေ့ရှိ လမ်းမကြီးပေါ်တွင် အစဉ်လိုက် တည်ရှိခဲ့ကြသည်။ ဂိုဏ်းသို့ လာရောက်သမျှ မည်သူမဆို ၎င်းတို့ကို ဖြတ်သန်းသွားကြရသည်။ ရီယွင်မှာ ချန်းနန်ကုန်းမြေကြီး၏ ထာဝရနယ်ပယ်တွင် အဆင့်မြင့်ဆုံးသော ကျင့်ကြံသူဖြစ်သည့်အတွက် သူ ထုလုပ်ခဲ့သော ကျောက်စာတိုင်တွင် သူ၏ ဝိညာဉ်နှင့် ဆန္ဒများ ကိန်းအောင်းနေပေသည်။ ထိုစဉ်က ဤကျောက်စာတိုင်ကို ဖြတ်သန်းသွားသော ကျင့်ကြံသူအားလုံးသည် သူတို့၏ နှလုံးခုန်သံများ မြန်ဆန်လာပြီး အသက်ရှူသံများပင် မတည်မငြိမ် ဖြစ်သွားသည်အထိ ခံစားခဲ့ကြရသည်။

သို့သော်လည်း ထျန်းဟန်ဂိုဏ်းရှိ နဂါးနတ်ဘုရားကျောက်စာတိုင်မှာ နှစ်ပေါင်းတစ်သိန်း ကြာမြင့်ခဲ့ပြီးနောက် ၎င်း၌ ကိန်းအောင်းနေသော မူလ ဝိညာဉ်နှင့် ဆန္ဒများမှာ ကြာမြင့်စွာကပင် ပျောက်ကွယ်သွားခဲ့ပြီ ဖြစ်၏။ ယခုအခါတွင်မူ ၎င်းမှာ သာမန် ဧရာမ ကျောက်တုံးကြီးတစ်ခုမျှသာ ဖြစ်တော့သည်။ သို့သော်လည်း ဤကျောက်စာတိုင်တွင် နဂါးနတ်ဘုရားဂိုဏ်း၏ အတိတ်က ကံကြမ္မာတရား အချို့ ကျန်ရှိနေဆဲ ဖြစ်သည်။

သို့သော် ယခုအခါတွင်မူ ထိုကျောက်စာတိုင်မှာ တောင်ထိပ် ခုနစ်ခုဖြင့် ဖွဲ့စည်းထားသော ခုနစ်စဉ်ကြယ် ဧရာမအစီရင်ကြီး၏ ဖိနှိပ်ခြင်းကို ခံထားရသည်။ ဤတောင်ထိပ် ခုနစ်ခုမှာ သဘာဝအတိုင်း ဖြစ်ပေါ်လာခြင်း မဟုတ်ဘဲ ကောင်းကင်နှင့် မြေကြီးကို ပြောင်းလဲနိုင်သည့် မဟာနတ်ဘုရားအဆင့် စွမ်းရည်ရှင်များက တောင်ထိပ်များကို ပြန်လည် ပုံဖော်ထားခြင်း ဖြစ်သည်။ သူတို့သည် ဤသဘာဝအစီရင်ကို အသုံးပြု၍ နဂါးနတ်ဘုရားကျောက်စာတိုင်ကို ဖိနှိပ်ထားခြင်း ဖြစ်လေသည်။

ရီယွင်က အနည်းငယ် ထပ်မံ ပြုံးလိုက်၏။ သူ၏ ယခင် တွေးတောချက်များမှာ အနည်းငယ် အမြင်ကျဉ်းနေခဲ့ကြောင်းကို သူ ရုတ်တရက် သတိပြုမိလိုက်ခြင်းပင်။ လွန်ခဲ့သော နှစ်ပေါင်းတစ်သိန်းအတွင်း နဂါးနတ်ဘုရားဂိုဏ်း၏ အမွေအနှစ် အရာဝတ္ထုများစွာမှာ အမျိုးမျိုးသော အင်အားစုများ၏ ဖိနှိပ်ခြင်းကို ခံထားရနိုင်သည် မဟုတ်ပါလား။ အခြားအရာများကို မဆိုထားနှင့် ဤနဂါးနတ်ဘုရားကျောက်စာတိုင် တစ်ဆယ့်သုံးတိုင်ကို ကြည့်မည်ဆိုလျှင် အနည်းဆုံး ဂိုဏ်းပေါင်း တစ်ဆယ့်သုံးဂိုဏ်းက ၎င်းတို့ကို ဖိနှိပ်ထားကြပေလိမ့်မည်။

ရီယွင်သည် သူ၏မေးစေ့ကို ပွတ်သပ်ရင်း မေးခွန်းတစ်ခုကို ဆင်ခြင်နေမိ၏။ နဂါးနတ်ဘုရားဂိုဏ်းကဲ့သို့သော ဂိုဏ်းငယ်လေးမှာ နတ်ဘုရားနယ်မြေမှ နတ်ဘုရားများ၏ အမြင်တွင် ထာဝရအဆင့်မျှသာ ရှိပေသည်။ ဤမျှအထိ အနုစိတ်စွာ ဖိနှိပ်ရန် တကယ်ပဲ ထိုက်တန်ပါသလော။ နဂါးနတ်ဘုရားဂိုဏ်း၌ မိမိကိုယ်တိုင်ပင် မသိရှိသေးသော လျှို့ဝှက်ချက်များ ရှိနေနိုင်သည်လား။

ဤသို့ တွေးမိသည့်အခါ ရီယွင်က ရယ်မောလိုက်မိသည်။

‘ငါက နဂါးနတ်ဘုရားဂိုဏ်းရဲ့ ဂိုဏ်းချုပ်ဖြစ်ပြီး ဂိုဏ်းမှာ ပိုပြီးကြီးမားတဲ့ လျှို့ဝှက်ချက်တွေ ရှိနေတာကို မသိဘူးဆိုတာက တကယ့်ကို ရယ်စရာကောင်းတာပဲ...’

“ဆရာ... အို... ဆရာ... ဆရာက ဘာလို့ ကျွန်တော့်ကို နဂါးနတ်ဘုရားဂိုဏ်းရဲ့ လျှို့ဝှက်ချက်တွေကို မပြောပြခဲ့တာလဲ... ဆရာကိုယ်တိုင်လည်း မသိခဲ့တာများလား...”

ရီယွင်က ရယ်မောရင်း ပြောလိုက်၏။ သူ၏ ဆရာမှာ နဂါးနတ်ဘုရားဂိုဏ်း၏ တစ်ဆယ့်နှစ်ဆက်မြောက် ဂိုဏ်းချုပ် ဖြစ်ပေသည်။ သူသည် ရီယွင်အပေါ် ဖခင်တစ်ဦးကဲ့သို့သော်လည်းကောင်း၊ ဆရာတစ်ဦးကဲ့သို့သော်လည်းကောင်း အလွန်ပင် ကောင်းမွန်စွာ ဆက်ဆံခဲ့သဖြင့် ယုတ္တိအရဆိုလျှင် သူသည် ရီယွင်အပေါ်၌ လျှို့ဝှက်ချက်များကို ဖုံးကွယ်ထားလိမ့်မည် မဟုတ်ချေ။ သို့သော်လည်း အမှန်တရားမှာမူ ဆန့်ကျင်ဘက် ဖြစ်နေပုံရသည်။

ယခု နှစ်ပေါင်းတစ်သိန်း ကြာမြင့်ပြီးနောက် ဤခရီးစဉ်အတွင်း သူ မြင်တွေ့ကြားသိခဲ့ရသမျှကို ကြည့်လျှင် နဂါးနတ်ဘုရားဂိုဏ်းတွင် ကြီးမားသော လျှို့ဝှက်ချက်တစ်ခုကို သေချာပေါက် ဖုံးကွယ်ထားကြောင်း ရီယွင် သဘောပေါက်လိုက်သည်။ ဤလျှို့ဝှက်ချက်ကို ဖြစ်နိုင်သည်မှာ နဂါးနတ်ဘုရားဂိုဏ်း၏ ပထမဆုံးသော ဘိုးဘေးကြီးသာလျှင် အနည်းငယ် သိရှိနိုင်ပေလိမ့်မည်။ နောက်ပိုင်း ရောက်ရှိလာသော နဂါးနတ်ဘုရားဂိုဏ်းရှိ လူတိုင်းမှာ ဘာကိုမျှ မသိရှိခဲ့ကြချေ။ သို့သော်လည်း အမှောင်ထုအတွင်း ပုန်းကွယ်နေသော နောက်ကွယ်မှ ကြိုးကိုင်သူမှာမူ အရာအားလုံးကို အသေအချာ သိရှိနေပေသည်။

‘စိတ်ဝင်စားစရာပဲ... တကယ်ကို စိတ်ဝင်စားစရာကောင်းတာပဲ...’

ရီယွင်က ထပ်မံ ရယ်မောလိုက်ပြီးနောက် နဂါးနတ်ဘုရားဂိုဏ်း၏ တပည့်ငယ် သုံးဦးကို ရထားလုံးအတွင်းသို့ ခေါ်ယူလိုက်သည်။ သူတို့၏ လေ့ကျင့်မှုမှာ ဦးစားပေးကိစ္စ ဖြစ်နေဆဲ ဖြစ်သည်။ နဂါးနတ်ဘုရားကျောက်စာတိုင်၏ ကိစ္စကိုမူ နောက်မှသာ ကိုင်တွယ်ဖြေရှင်း ရပေလိမ့်မည်။

“ဘိုးဘေးကြီးကို ဂါရဝပြုပါတယ်...”

လော့လီ၊ ကျွင်းမော့ရှောင်နှင့် စုဝမ်ယီတို့မှာ ရီယွင်အား အလျင်အမြန်ပင် နှုတ်ဆက်လိုက်ကြ၏။

“ဒီတစ်ခါ မင်းတို့ရဲ့ ပစ်မှတ်က ထျန်းရှင်းမင်းဆက်ရဲ့ ထျန်းဟန်ဂိုဏ်းပဲ... သူတို့ကို အကုန်လုံး သတ်ပစ်ဖို့ ဝန်မလေးကြနဲ့... တစ်ယောက်မှ အသက်မချန်ထားနဲ့...”

ရီယွင်က ပေါ့ပေါ့ပါးပါးပင် ပြောလိုက်၏။

ဤစကားကို ကြားလိုက်ရသည့်အခါ သူတို့ သုံးဦးစလုံးမှာ အနည်းငယ် အံ့အားသင့်သွားကြသည်။ ကျွင်းမော့ရှောင်က အလျင်အမြန်ပင် မေးမြန်းလိုက်သည်။

“ဘိုးဘေးကြီး... ဒီ ထျန်းဟန်ဂိုဏ်းက ကျွန်တော်တို့ နဂါးနတ်ဘုရားဂိုဏ်းကို နှိပ်စက်ခဲ့တဲ့ အဓိက တရားခံများလား...”

ရီယွင်က ခေါင်းခါပြလိုက်သည်။ ထို့နောက် သူသည် တပည့်ငယ် သုံးဦးအား နဂါးနတ်ဘုရားကျောက်စာတိုင်၏ ကိစ္စကို ပြောပြလိုက်၏။ ဤကိစ္စကို ဖုံးကွယ်ထားရန် မလိုအပ်ချေ။ အထူးသဖြင့် လော့လီမှာ လက်ရှိ ဂိုဏ်းချုပ် ဖြစ်သည့်အတွက် သူမအနေဖြင့် နဂါးနတ်ဘုရားဂိုဏ်း၏ ကိစ္စရပ်များကို ပိုမို သိရှိထားရန် လိုအပ်သည် မဟုတ်ပါလား။ နဂါးနတ်ဘုရားဂိုဏ်း၏ ပထမဆုံးသော ခေါင်းဆောင်ကဲ့သို့ အရေးကြီးသော လျှို့ဝှက်ချက်ကို ဖုံးကွယ်ထားမိသဖြင့် နောက်ပိုင်းတွင် ဂိုဏ်း၌ ကြီးမားသော ဘေးအန္တရာယ်များ ကျရောက်ခဲ့ရသည့် အမှားမျိုးကို ရီယွင်အနေဖြင့် ထပ်မံ အဖြစ်မခံလိုတော့ချေ။

“ဘိုးဘေးကြီး... ဒီထျန်းဟန်ဂိုဏ်းက ကျွန်မတို့ဂိုဏ်းရဲ့ နဂါးနတ်ဘုရားကျောက်စာတိုင်ကို အမှန်တကယ် ပိုင်ဆိုင်ထားတာပေါ့လေ... ကျွန်မတို့ အဲ့ဒါကို ပြန်သိမ်းရမယ်...”

လော့လီက မတ်တတ်ရပ်လိုက်ပြီး သူမ၏မျက်ဝန်းများအတွင်း၌ ဒေါသမီးလျှံများ တောက်လောင်နေပေသည်။

“ငါတို့ နဂါးနတ်ဘုရားဂိုဏ်းရဲ့ အပိုင်ဖြစ်တဲ့ အရာကို ငါတို့ သေချာပေါက် ပြန်သိမ်းရမယ်...”

ကျွင်းမော့ရှောင်၏ မျက်ဝန်းများအတွင်းမှာလည်း သတ်ဖြတ်လိုစိတ်များ ပြည့်နှက်နေတော့သည်။

အခန်း ၁၇၆ ပြီးပါပြီ။

---