အခန်း ၇၈၃

အခန်း (၇၈၃) - ကြက်သွေးရောင် သွေးသီး

~“သွေးမိစ္ဆာ ကြေးစားအဖွဲ့ပဲ... မြန်မြန် ဒီကနေ ထွက်သွားကြ”

“တတိယတပ်မှူး ချိုးယွမ်ရှန်ပါလား... ကြည့်ရတာ နောက်ထပ် တစ်ယောက်ယောက်တော့ အလုခံရပြန်ပြီ ထင်တယ်”

“တကယ့်ကို ရွံစရာကောင်းတာပဲဟ... ဒီလူတွေက အရှက်ကို မရှိကြဘူး”

“ရှူး... တိုးတိုးလုပ်စမ်းပါ... မင်းက အသက်ရှင်ရတာ ငြီးငွေ့နေပြီလား”

ရှုမီ ချောက်ကမ်းပါး၏ ဝင်ပေါက်တွင် သွေးမိစ္ဆာ ကြေးစားအဖွဲ့ ဝင်ရောက်လာသည်ကို ကြည့်ရင်း လူတိုင်းမှာ သွေးမိစ္ဆာ ကြေးစားအဖွဲ့အပေါ် ရွံရှာမုန်းတီးမှုများဖြင့် ပြည့်နှက်နေပြီး တိုးတိုးတိတ်တိတ် ရေရွတ်နေကြသည်။

သူတို့ထဲမှ လူအများအပြားမှာ ယခင်က သွေးမိစ္ဆာ ကြေးစားအဖွဲ့၏ ရတနာများ လုယူခြင်းကို ခံခဲ့ရဖူးသူများ ဖြစ်ကြောင်း ထင်ရှားလှပေသည်။

သို့သော် သွေးမိစ္ဆာ ကြေးစားအဖွဲ့၏ ကြီးမားလှသော အင်အားကြောင့် သူတို့သည် မိမိတို့၏ ဒေါသများကို မျိုသိပ်ထားရုံမှလွဲ၍ အသံထွက်ရန် သို့မဟုတ် ပြန်လည်တိုက်ခိုက်ရန် မဝံ့ရဲကြပါချေ။

“တတိယတပ်မှူး... နောက်ဆုံးတော့ ရောက်လာပြီပဲ”

ကျိုးရီသည် ဝင်ပေါက်အနီးတွင် စောင့်ဆိုင်းနေခဲ့ပြီး သွေးမိစ္ဆာ ကြေးစားအဖွဲ့ဝင်များကို မြင်လိုက်သည်နှင့် အလျင်အမြန်ပင် ရိုသေစွာ သွားရောက် နှုတ်ဆက်လိုက်သည်။

“လုထျန်းချန်တို့ ဘယ်မှာလဲ”

တတိယတပ်မှူးက အေးစက်စွာ မေးလိုက်သည်။

ဦးဆောင်လာသော သက်လတ်ပိုင်း အမျိုးသားမှာ သွေးမိစ္ဆာ ကြေးစားအဖွဲ့၏ တတိယတပ်မှူး ချိုးယွမ်ရှန်ပင် ဖြစ်ပါ၏။ သူ၏ ကျင့်ကြံခြင်းအဆင့်မှာ ထျန်းကျီဘုံ အဆင့် (၃) အထွတ်အထိပ်သို့ ရောက်ရှိနေပြီး သူ၏ ရက်စက်ကြမ်းကြုတ်သော ရုပ်သွင်မှာ တစ်ချက်ကြည့်ရုံဖြင့်ပင် ကြောက်မက်ဖွယ်ကောင်းလှပေသည်။

ကျိုးရီက ရိုသေစွာဖြင့် ...

“တတိယတပ်မှူး... သူတို့လေးယောက်က သိပ်မဝေးတဲ့ နေရာမှာပါ၊ ကြည့်ရတာ ဒဏ်ရာတွေကို ကုသဖို့ ဆေးဖက်ဝင် အပင်တွေ ရှာနေပုံရတယ်” ဟု သတင်းပို့လိုက်သည်။

“ကောင်းတာပေါ့... ငါတို့သာ မြင့်မြတ်သော လင်းယုန် ကြေးစားအဖွဲ့ကို ဝါးမြိုလိုက်နိုင်ရင် မင်းအတွက် ဆုလာဘ်တွေ အများကြီး ရှိမှာပါ... သွားကြစို့”

ချိုးယွမ်ရှန်က အေးစက်စွာ ရယ်ရင်း ပြောလိုက်လေရာ သူ၏ ရက်စက်သော မျက်လုံးများမှာ ပိုမို မှေးစင်းသွားတော့၏။

ကျိုးရီက စိတ်လှုပ်ရှားစွာဖြင့် ...

“စိတ်ချပါ တတိယတပ်မှူး... ဒီတစ်ကြိမ်တော့ သူတို့ လွတ်မြောက်ဖို့ လုံးဝ နည်းလမ်းမရှိပါဘူး၊ ကျွန်တော် သူတို့ကို စောင့်ကြည့်ဖို့ လူတွေ လွှတ်ထားပြီးပါပြီ၊ လုထျန်းချန်နဲ့ ထန်ယွင်ရှန်ကို ရှင်းထုတ်လိုက်တာနဲ့ မြင့်မြတ်သော လင်းယုန် ကြေးစားအဖွဲ့က ပြီးဆုံးသွားပြီပဲ” ဟု ပြောလိုက်သည်။

“မြင့်မြတ်သော လင်းယုန် ကြေးစားအဖွဲ့က ငါတို့ သွေးမိစ္ဆာ ကြေးစားအဖွဲ့ကို အမြဲတမ်း ဆန့်ကျင်နေတာလေ၊ ဒီနေ့တော့ ငါတို့ ဘယ်လောက် အစွမ်းထက်လဲဆိုတာ သူတို့ကို ပြသရမှာပေါ့”

ချိုးယွမ်ရှန်က ရက်စက်စွာ ကြုံးဝါးလိုက်သည်။

ယခုအချိန်တွင် လုထျန်းချန်နှင့် သူ၏အဖွဲ့သည် ကုသရေး ဆေးပင်တစ်ပင်ကို ရှာတွေ့ထားပြီး ခူးယူနေကြကာ အန္တရာယ်က သူတို့အနီးသို့ ချဉ်းကပ်လာနေသည်ကို လုံးဝ သတိမထားမိကြပါချေ။

---

“ဘယ်လိုလဲ... တစ်ခုခု အာရုံခံမိသေးလား”

လျိုချင်းယန်နှင့် ကျန်းကျွင့်လန်တို့ မြေအောက်မှ ထွက်လာသည်နှင့် ယီထျန်းချင်းက ချက်ချင်း မေးလိုက်သည်။

လျိုချင်းယန်က ခေါင်းခါယမ်းလိုက်ပြီး ...၊

“ရှာရတာ ဒီလောက် လွယ်နေရင် သူ့ကို ကမ္ဘာဦး စွမ်းအားလို့ ဘယ်ခေါ်တော့မလဲ၊ ဒီမိုင်ရာနဲ့ချီတဲ့ ပတ်ဝန်းကျင်မှာ ဘာမှမရှိဘူး၊ ငါတို့ တခြားနေရာကို ပြောင်းရမယ်”

ဤနေရာမှာ လျိုချင်းယန်နှင့် သူ၏အဖွဲ့ ရှာဖွေခဲ့သော တတိယမြောက် နေရာဖြစ်ပြီး ယခုအချိန်အထိ မည်သည့် တုံ့ပြန်မှုမျှ မရှိသေးပါချေ။

အခြားတစ်နေရာတွင် ယဲ့ထျန်းဝေနှင့် သူ၏အဖွဲ့သည် မြေပုံပေါ်တွင် အမည်းရောင် မှတ်သားထားသော နေရာတစ်ခုသို့ ရောက်ရှိနေကြသည်။ ဒါက သီးသန့်ဖြစ်နေသော တောင်ကြားလေးတစ်ခု ဖြစ်ပြီး ဝိညာဉ်စွမ်းအင်များ အလွန် သိပ်သည်းစွာ ပြည့်နှက်နေကာ အလွန်တရာ တိတ်ဆိတ်ငြိမ်သက်နေသဖြင့် ကျင့်ကြံရန်အတွက် အကောင်းဆုံး နေရာတစ်ခုပင် ဖြစ်ပါ၏။

ထိုတောင်ကြားလေးမှာ မိုးထိမတတ် မြင့်မားသော တောင်ထွတ်များဖြင့် လုံးဝ ဖုံးကွယ်နေပြီး သာမန်လူများအနေဖြင့် အလွယ်တကူ ရှာဖွေတွေ့ရှိနိုင်ရန် မလွယ်ကူလှပါချေ။

“ကျင့်ကြံဖို့အတွက် တကယ့် နေရာကောင်းပဲကွာ၊ ပတ်ဝန်းကျင်က ဝိညာဉ်စွမ်းအင်တွေ ဒီနေရာကို စုစည်းလာတာကို ငါ ခံစားမိတယ်၊ မိုယင် သလင်းကျောက်တွေက ဘယ်လောက်တောင် အစွမ်းထက်လဲဆိုတာ ကြည့်ကြသေးတာပေါ့”

ယဲ့ထျန်းဝေမှာ အနည်းငယ် စိတ်လှုပ်ရှားနေပြီး ချက်ချင်းပင် ကျင့်ကြံရန် ပြင်ဆင်နေတော့၏။

လေ့ထျန်းကျွယ်ကလည်း စိတ်အားထက်သန်စွာဖြင့် ...

တိုက်တွန်းလိုက်သည်။

“အစ်ကိုလု ပေးလိုက်တဲ့ မြေပုံက တကယ့် ရတနာပဲ၊ တောင်ကြားထဲမှာ ဝိညာဉ်စွမ်းအင်တွေက အသိပ်သည်းဆုံးပဲ၊ တခြားရတနာတွေများ ရှိနေမလားမသိဘူး... သွားကြည့်ကြရအောင်”။

တစ်ချိန်တည်းမှာပင် ယဲ့ထျန်းဝေနှင့် သူ၏ သူငယ်ချင်းများ ရှိနေသော တောင်ကြားလေးနှင့် မလှမ်းမကမ်းတွင် လူငယ် ကျင့်ကြံသူ အမျိုးသား၊ အမျိုးသမီး ခြောက်ဦး သို့မဟုတ် ခုနစ်ဦးခန့် ချဉ်းကပ်လာနေပြီး သူတို့၏ ကျင့်ကြံခြင်းအဆင့်များမှာလည်း အထင်ကြီးလောက်စရာပင်။

အရေးအကြီးဆုံးမှာ သူတို့၏ ဝတ်စုံများပေါ်တွင် 'သန့်ရှင်းသော ဝိညာဉ်' ဟူသော စာလုံးနှစ်လုံး ပါရှိနေခြင်းပင် ဖြစ်သည်။

သန့်ရှင်းသော ဝိညာဉ် ကျောင်းတော်မှ ကျောင်းသားများ၊ ပါရမီရှင်များပင် ဖြစ်ပါတော့၏။

---

အချိန်မှာ နာရီဝက်ခန့် ကုန်လွန်သွားခဲ့၏။

“အစ်ကိုဖုန်း... တစ်ခုခု အာရုံခံမိသေးလား”

လေထဲတွင် အလျင်အမြန် ပျံသန်းနေရင်း ကျင့်ကြံသူ များစွာကို တွေ့ရသည်မှလွဲ၍ မည်သည့် ထူးခြားမှုမျှ မတွေ့ရသဖြင့် မြောင်ချင်းချင်းက မနေနိုင်တော့ဘဲ မေးလိုက်သည်။

“မရသေးဘူး... အချိန်စွမ်းအားကို ရှာရတာ အဲဒီလောက် မလွယ်ကူဘူးလေ”

ဟု ဖုန်းဝူချန်က ခေါင်းကို အသာအယာ ခါယမ်းရင်း ဖြေလိုက်၏။

“သခင်... တန်ဖိုးကြီး ဆေးပင်တွေရဲ့ ရနံ့ ရနေတယ်”

တောင်ခြေတွင် အချိန်စွမ်းအားကို ရှာဖွေနေစဉ် ထူးခြားသော ဆေးဖက်ဝင် အပင်များ၏ ရနံ့က ဖုန်းဝူချန်နှင့် အခြားသူများထံသို့ လွင့်ပျံလာပြီး လန်ယွဲ့က သတိထားမိသွားသည်။

ဖုန်းဝူချန်က ခေါင်းညိတ်လိုက်ပြီး ထူးခြားသော ဆေးပင်များ၏ ရနံ့ကို သူလည်း အာရုံခံမိကြောင်း ပြသလိုက်ကာ ခပ်ပြုံးပြုံးဖြင့် ... ဆိုလိုက်သည်။

“အဆင့် (၇) ဆေးလုံး ဖော်စပ်ဖို့ လိုအပ်တဲ့ ဆေးပင်တွေပဲ၊ ရှုမီ ချောက်ကမ်းပါးက တကယ့်ကို အံ့ဩစရာကောင်းတဲ့ နေရာပါလား၊ ဒီလောက် တန်ဖိုးကြီးတဲ့ ဆေးပင်တွေကို ဒီမှာ ဒီလောက် လွယ်လွယ်ကူကူ ရနိုင်တယ်ဆိုတော့... ရှုမီ ချောက်ကမ်းပါးထဲမှာ အဆင့် (၈) ဆေးလုံး ဖော်စပ်ဖို့ လိုအပ်တဲ့ ပစ္စည်းတွေတောင် ရှိနိုင်တယ်ဗျ”

ဖုန်းဝူချန် စကားပြောပြီးသည်နှင့် တစ်ပြိုင်နက် သူ၏ မျက်နှာပေါ်တွင် အံ့အားသင့်မှု အရိပ်အယောင်များ ဖြတ်ပြေးသွားရသည်။

“ကြက်သွေးရောင် သွေးသီး... ဒါ ကြက်သွေးရောင် သွေးသီးရဲ့ ရနံ့ပဲ”

“ကြက်သွေးရောင် သွေးသီး ဟုတ်လား”

မြောင်ချင်းချင်းက သူမ၏ လှပသော မျက်ခုံးလေးများကို တွန့်ချိုးလိုက်ပြီး ဖုန်းဝူချန် ဤမျှ စိတ်လှုပ်ရှားနေသည်ကို မြင်သောအခါ စပ်စုချင်စိတ်ဖြင့် ... မေးလိုက်၏။

“အစ်ကိုဖုန်း... ကြက်သွေးရောင် သွေးသီးက ဘာအတွက် အသုံးဝင်လို့လဲ”

“ကြက်သွေးရောင် သွေးသီးက ကျင့်ကြံခြင်းအဆင့်ကို မြှင့်တင်ပေးနိုင်တယ်လေ၊ သူ့ကို သဘာဝတရားက မွေးဖွားပေးထားတာဖြစ်ပြီး ကောင်းကင်နဲ့ မြေကြီးရဲ့ အဆီအနှစ်တွေကို စုပ်ယူထားတဲ့အတွက် အလွန်တရာ အစွမ်းထက်တဲ့ စွမ်းအားတွေ ပါဝင်တယ်၊ သူ့ကို သန့်စင်စရာမလိုဘဲ တိုက်ရိုက် စုပ်ယူလို့ ရတယ်”

ဖုန်းဝူချန်က စိတ်လှုပ်ရှားစွာ ရှင်းပြလိုက်ပြီး အလျင်အမြန်ပင် ပြေးထွက်သွားလေတော့သည်။

“တိုက်ရိုက် စုပ်ယူလို့ ရတယ် ဟုတ်လား... ဒါဆို သွေးကျောက်စိမ်း ဗောဓိနဲ့ အတူတူပဲပေါ့”

မြောင်ချင်းချင်းက အံ့အားသင့်စွာဖြင့် ရေရွတ်လိုက်ပြီး ဖုန်းဝူချန်၏ နောက်သို့ အမြန် လိုက်သွားသည်။

“သခင်... ဟိုမှာ”

လန်ယွဲ့က တောင်ခါးပန်းဆီသို့ လက်ညှိုးထိုးပြလိုက်၏။ နတ်သူငယ်မျိုးနွယ် တစ်ဦးအနေဖြင့် သူမ၏ အာရုံခံစားမှုများမှာ ရနံ့များကို အလွန်တရာ တိကျစွာ ခွဲခြားနိုင်စွမ်း ရှိလှပေ၏။

တောင်ခါးပန်းရှိ ကျောက်တုံး အက်ကွဲကြောင်းများကြားတွင် အနီရောင် အသီးများ သီးနေသော အပင်သုံးပင်ကို ဖုန်းဝူချန်နှင့် သူ၏ အပေါင်းအပါများ မြင်တွေ့လိုက်ရသည်။

ကြက်သွေးရောင် သွေးသီးမှာ နဂါးမျက်လုံးအရွယ်ခန့်သာ ရှိပြီး ကြက်သွေးကဲ့သို့ နီရဲနေသဖြင့် ထိုအမည်ကို ရရှိခဲ့ခြင်း ဖြစ်ပါ၏။

၎င်းသည် ကျောက်တုံး အက်ကွဲကြောင်းများတွင်သာ ပေါက်ရောက်လေ့ရှိပြီး တောင်တန်းများ၏ ဝိညာဉ်စွမ်းအင်များကို စုပ်ယူကာ ကြီးထွားလာခြင်း ဖြစ်သည်။

“ကြက်သွေးရောင် သွေးသီး အပင်သုံးပင်... အသီးက အလုံး (၂၀) တောင် ပါလား”

ဖုန်းဝူချန်က အလွန်အမင်း စိတ်လှုပ်ရှားစွာဖြင့် အော်ဟစ်လိုက်သည်။

“ဒီလောက် သေးငယ်တဲ့ ကြက်သွေးရောင် သွေးသီးတွေက တကယ်ပဲ အဲဒီလောက် အစွမ်းထက်လို့လား၊ ပြီးတော့ သူတို့ဆီကနေ ဝိညာဉ်စွမ်းအင် အငွေ့အသက်လေးတောင် မရဘူးနော်”

မြောင်ချင်းချင်းက မယုံကြည်နိုင်စွာဖြင့် မေးလိုက်သည်။ သူမအနေဖြင့် ချက်ချင်း လက်ခံနိုင်ရန် ခက်ခဲနေပုံရ၏။

“ဒါကြောင့်မို့လို့ပဲ တခြားသူတွေ အလွယ်တကူ မရှာတွေ့နိုင်ကြတာပေါ့... ဒါတွေက တကယ့် ရတနာတွေပဲ၊ မင်းသာ တစ်လုံး စားလိုက်မယ်ဆိုရင် ထျန်းကျီဘုံကို ချိုးဖြတ်နိုင်ဖို့ အများကြီး အထောက်အကူ ဖြစ်လိမ့်မယ်”

ဖုန်းဝူချန်က ဝမ်းသာအားရ ပြောလိုက်ပြီး မတုံ့ဆိုင်းဘဲ ကြက်သွေးရောင် သွေးသီးများကို သူ၏ သိုလှောင် လက်စွပ်ထဲသို့ သိမ်းဆည်းလိုက်သည်။

“တကယ်လား”

မြောင်ချင်းချင်းမှာ ပို၍ပင် အံ့အားသင့်သွားရသည်။

“ဒါပေါ့... ဒီကြက်သွေးရောင် သွေးသီးတွေနဲ့ဆိုရင် မင်း ထျန်းကျီဘုံကို အလွယ်တကူ ချိုးဖြတ်နိုင်မှာ သေချာတယ်၊ ရှုမီ ချောက်ကမ်းပါးက တကယ့်ကို ရတနာတွေနဲ့ ပြည့်နှက်နေတာပဲ၊ သေချာ ရှာကြည့်ကြရအောင်... တခြားရတနာတွေများ တွေ့ဦးမလား မသိဘူး”

ဖုန်းဝူချန်က ဝမ်းသာလုံးဆို့စွာဖြင့် ပြောလိုက်သည်။ ကြက်သွေးရောင် သွေးသီး (၂၀) ဆိုသည်မှာ သေးငယ်သော အကျိုးအမြတ် မဟုတ်ပါချေ။

ဖုန်းဝူချန် ရတနာများ ရှာတွေ့နေချိန်တွင် လုထျန်းချန်မှာ သွေးမိစ္ဆာ ကြေးစားအဖွဲ့၏ အလစ်အငိုက် တိုက်ခိုက်မှုကို ခံရပြီး သူ၏ အသက်မှာ ဆံခြည်တစ်မျှင်ပေါ်တွင် တွဲလောင်းကျနေပြီ ဖြစ်ကြောင်းကိုမူ ဖုန်းဝူချန် လုံးဝ မသိရှိခဲ့ပါချေ။

လုထျန်းချန်မှာ အစွမ်းထက်သော်ငြားလည်း ချိုးယွမ်ရှန်ကို မယှဉ်နိုင်ခဲ့သလို ထန်ယွင်ရှန်မှာလည်း ကျိုးရီ၏ ဖိနှိပ်မှုကို ခံနေရသဖြင့် ယွင်ယွင်နှင့် ချန်းချန်းတို့ နှစ်ဦးတည်းသာ ကျန်ရှိတော့၏။ ထိုမိန်းကလေး နှစ်ဦးမှာ သွေးမိစ္ဆာ ကြေးစားအဖွဲ့ဝင် ဆယ်ယောက်ကျော်၏ ပြင်းထန်သော ပူးပေါင်း တိုက်ခိုက်မှုကို အသည်းအသန် ခုခံနေကြရသည်။

အခြေအနေမှာ အလွန်တရာ အန္တရာယ်များနေပြီး လုထျန်းချန်နှင့် ထန်ယွင်ရှန်တို့မှာ မည်သည့်အချိန်တွင်မဆို အသက်ဆုံးရှုံးသွားနိုင်သည့် အနေအထားတွင် ရှိနေသည်။

ထို့အပြင် ယဲ့ထျန်းဝေ၊ လေ့ထျန်းကျွယ်နှင့် အခြားသူများမှာလည်း ကျင့်ကြံရန် နေရာကောင်းတစ်ခုကို လုယက်ရာမှ သန့်ရှင်းသော ဝိညာဉ် ကျောင်းတော်မှ ပါရမီရှင် ကျောင်းသားများနှင့် ပဋိပက္ခ ဖြစ်ပွားကာ တိုက်ပွဲ စတင်နေကြပြီတည်း။

ယဲ့ထျန်းဝေမှာ ထျန်းကျီဘုံ အဆင့် (၃) သို့ ရောက်ရှိနေသော်လည်း လေ့ထျန်းကျွယ်နှင့် ပေတိုယန်တို့မှာ ထျန်းကျီဘုံသို့ မရောက်ရှိသေးပါချေ။ သူတို့သုံးဦး၏ ခွန်အားသက်သက်ဖြင့် သန့်ရှင်းသော ဝိညာဉ် ကျောင်းတော်မှ ပါရမီရှင် ကျောင်းသား ခုနစ်ဦးကို လုံးဝ မယှဉ်နိုင်ပါချေ။

အကယ်၍သာ လျှပ်တစ်ပြက် နေရာရွှေ့ပြောင်းခြင်းကဲ့သို့သော အစွမ်းထက်ပြီး အံ့မခန်း ကိုယ်ဖော့ပညာကို ပိုင်ဆိုင်မထားပါက ယဲ့ထျန်းဝေမှာ စောစောစီးစီး ရှုံးနိမ့်သွားမည်မှာ သေချာလှပေသည်။

“ဒီလောက် အစွမ်းလေးနဲ့များ ငါတို့ကို ယှဉ်ချင်နေတာလား၊ တကယ့်ကို ကိုယ့်ကိုယ်ကိုယ် အထင်ကြီးလွန်းနေတာပဲ”

ထျန်းကျီဘုံ အဆင့် (၃) ရှိသော ပါရမီရှင် ကျောင်းသား တစ်ဦးက မထီမဲ့မြင် ပြောလိုက်သည်။

“ငါတို့က သန့်ရှင်းသော ဝိညာဉ် ကျောင်းတော်က ကျောင်းသားတွေမို့လို့ အကြောင်းမဲ့ လူမသတ်ဘူး၊ ဒီကနေ ထွက်သွားစမ်း”

ထျန်းကျီဘုံ အဆင့်ရှိ အခြား ကျောင်းသား တစ်ဦးကလည်း အေးစက်စွာ အော်ဟစ်လိုက်သည်။

“သန့်ရှင်းသော ဝိညာဉ် ကျောင်းတော်က ပါရမီရှင် ကျောင်းသားတွေဆိုတဲ့ နာမည်နဲ့ လိုက်ဖက်ပါပေတယ်၊ မင်းတို့ရဲ့ ခွန်အားက တကယ်ကို အံ့ဩစရာကောင်းတာပဲ”

ယဲ့ထျန်းဝေက သူ၏ နှုတ်ခမ်းထောင့်မှ သွေးများကို သုတ်လိုက်ရင်း အေးစက်စွာ ပြောလိုက်ပြီး ဆက်လက်၍ ... ဆိုလိုက်လေတော့၏။

“ဒါပေမဲ့ တော်တော်လေးတော့ စိတ်ပျက်ဖို့ ကောင်းတယ်၊ သန့်ရှင်းသော ဝိညာဉ် ကျောင်းတော်က မင်းတို့ကို အနိုင်ကျင့်ဖို့နဲ့ မောက်မာဖို့လောက်ပဲ သင်ပေးထားတာလား”

wunzinnosp