အခန်း ၇၈၈
Vol. 53 Ch. 788
အခန်း (၇၈၈) - ယန်မိသားစုမှ အကြီးအကဲများနှင့် တိုက်ခိုက်ခြင်း
~“ဝုန်း”
တတိယ အကြီးအကဲသည် လွှမ်းမိုးဖိနှိပ်နိုင်သော အရှိန်အဝါများ ပေါက်ကွဲထွက်လာပြီး မိုးချုန်းသံကဲ့သို့ ဟိန်းဟောက်ကာ အဟုန်ပြင်းစွာ ပြေးဝင်လာသည်။ သူ ဖြတ်သန်းသွားရာ နေရာတိုင်းတွင် မြေကြီးများ တုန်ခါပြီး တောင်တန်းများပင် တုန်လှုပ်သွားရလောက်အောင် သူ၏ အစွမ်းမှာ ကြောက်မက်ဖွယ်ကောင်းလှပေသည်။
ထျန်းကျီဘုံ အဆင့် (၈) ဆိုသည်မှာ အလွန်တရာ ကြောက်စရာကောင်းသော အဆင့်တစ်ခုပင်။
စောင့်ကြည့်နေကြသော ကျင့်ကြံသူများစွာမှာ တတိယ အကြီးအကဲ၏ ကောင်းကင်ထိ ထိုးတက်နေသော ဖိအားအောက်တွင် မျက်နှာများ ဖြူရော်နေပြီး ကြောက်ရွံ့တုန်လှုပ်နေကြသည်။
ဖုန်းဝူချန်၏ မျက်နှာပေါ်တွင်မူ မည်သည့် ကြောက်ရွံ့မှုမျှ မရှိဘဲ လုံးဝ တည်ငြိမ်နေသည်။
သို့သော် သူ၏ ခန္ဓာကိုယ်အတွင်းမှ အထွတ်အထိပ် ခန္ဓာကိုယ် ဒုတိယအဆင့်၏ စွမ်းအားများ ပေါက်ကွဲထွက်လာပြီး တောက်ပသော သွေးရောင် အလင်းတန်းများ ရူးသွပ်စွာ ဝင်းလက်လာတော့၏။
“ထျန်းကျီဘုံ အဆင့် (၅) ပါလား... သူ့ရဲ့ အရှိန်အဝါက မျက်တောင်တစ်ခတ်အတွင်း ထျန်းကျီဘုံ အဆင့် (၇) ကို ချိုးဖြတ်သွားပြီပဲ”
တတိယ အကြီးအကဲ၏ နှလုံးသားမှာ ပြင်းထန်စွာ တုန်လှုပ်သွားပြီး သူ၏ မျက်လုံးများပင် ပြူးကျယ်သွားရ၏။
“ထျန်းကျီဘုံ အဆင့် (၅) တဲ့လား... ဘယ်လိုတောင် ကြောက်စရာကောင်းတဲ့ တိုက်ခိုက်ရေး စွမ်းအားလဲ”
သခင်လေးယန်နှင့် ကျောင်းသား အချို့မှာ အလွန်အမင်း အံ့အားသင့်သွားကြသည်။
“သူ့ရဲ့ အရှိန်အဝါက ထျန်းကျီဘုံ အဆင့် (၇) အထိ တက်သွားပြီ... မျက်တောင်တစ်ခတ်အတွင်း နှစ်ဆင့်တောင် တက်သွားတာလား”
ပတ်ဝန်းကျင်ရှိ ကျင့်ကြံသူများမှာ ကြောက်လန့်တကြား အော်ဟစ်လိုက်ကြပြီး လုံးဝ မှင်သက်နေကြတော့၏။
ချီလင် ချပ်ဝတ်နှင့် နဂါးနတ်ဘုရား လက်အိတ်များကို ဆင့်ခေါ်လိုက်ပြီးနောက် ဖုန်းဝူချန်၏ အရှိန်အဝါမှာ နောက်တစ်ကြိမ် တစ်ဟုန်ထိုး မြင့်တက်လာပြန်သည်။
“အင်မော်တယ်လက်နက်... ဒါ အဆင့်မြင့် အင်မော်တယ်လက်နက်တွေပဲ”
“အဆင့် (၈) သွန်းလုပ်ထားတဲ့ အင်မော်တယ်လက်နက်တွေပါလား”
“ဒါ ငါ့ရဲ့ စိတ်ကူးယဉ်မှုများလား... ငါ တကယ်ပဲ အင်မော်တယ်လက်နက်ကို မြင်နေရတာလား”
အစွမ်းထက် ပညာရှင် များစွာမှာ ထိတ်လန့်တကြား အော်ဟစ်လိုက်ကြပြီး ထိုနေရာ တစ်ဝိုက်တွင် ဆူညံပွက်လောရိုက်သွားတော့၏။
အင်မော်တယ်လက်နက်များကို ဆင့်ခေါ်လိုက်ပြီးနောက် မျက်တောင်တစ်ခတ်အတွင်းမှာပင် ဖုန်းဝူချန်၏ အရှိန်အဝါသည် ထျန်းကျီဘုံ အဆင့် (၈) သို့ ရောက်ရှိသွား၏။
“ဟယ်...”
ကြောက်မက်ဖွယ်ကောင်းလောက်အောင် မြင့်တက်လာသော စွမ်းအားများကြောင့် စောင့်ကြည့်နေကြသူများ အားလုံးမှာ ထိတ်လန့်တကြား ပင့်သက်ရှိုက်မိသွားကြရသည်။
သူ၏ လွှမ်းမိုးဖိနှိပ်နိုင်ပြီး ကြောက်မက်ဖွယ်ကောင်းသော စွမ်းအားများသည် အရာအားလုံးကို တိုက်စားသွားမည့် ဖျက်ဆီးခြင်း စွမ်းအင်လှိုင်းကြီးများအဖြစ် ရစ်သိုင်းလာပြီး ဤကြောက်မက်ဖွယ် အရှိန်အဝါ သက်သက်ဖြင့်ပင် ပြေးဝင်လာသော တတိယ အကြီးအကဲကို နောက်သို့ ဆုတ်ခွာသွားအောင် တွန်းထုတ်နိုင်ခဲ့သည်။
ဖုန်းဝူချန်က လက်တစ်ချက် ဝှေ့ယမ်းလိုက်ရာ တောက်ပနေသော သွေးရောင် အလင်းတန်းများမှာ မျက်တောင်တစ်ခတ်အတွင်း ပျောက်ကွယ်သွားပြီး သူ၏ ရက်စက်ကြမ်းကြုတ်သော ရုပ်သွင်ကို စောင့်ကြည့်နေသူများရှေ့တွင် ထင်ရှားစွာ မြင်တွေ့လိုက်ရ၏။
“ထျန်းကျီဘုံ အဆင့် (၈) ပါလား”
တတိယ အကြီးအကဲ၏ မျက်နှာပေါ်တွင် အံ့အားသင့်မှုများ ပြည့်နှက်နေပြီး လူငယ်လေး တစ်ယောက်က ဤမျှ ကြောက်စရာကောင်းသော စွမ်းအားများကို ပိုင်ဆိုင်ထားသည်ကို သူ လုံးဝ မယုံကြည်နိုင်အောင် ဖြစ်နေရသည်။
“ငါတို့ ကျောင်းတော်က ထိပ်တန်း ပါရမီရှင်တောင် ဒီလောက် ကြောက်စရာကောင်းတဲ့ စွမ်းအားမျိုး မရှိဘူး... သူ့ရဲ့ ကျင့်ကြံခြင်းအဆင့်က ဆရာ ရှင်းယီလောက်နီးပါး ကြောက်ဖို့ကောင်းနေပါလား”
သခင်လေးယန်မှာ တစ်ကိုယ်လုံး တုန်ရီနေပြီး သူ၏ မျက်နှာမှာ ပြာနှမ်းနေတော့၏။
“ဒါ ဘယ်လိုလုပ် ဖြစ်နိုင်မှာလဲ...”
ကျောင်းသား အချို့မှာလည်း သူတို့ မြင်တွေ့နေရသည်ကို လုံးဝ မယုံကြည်နိုင်အောင် ဖြစ်နေကြသည်။ ဖုန်းဝူချန်မှာ သူတို့နှင့် ရွယ်တူခန့်သာ ရှိသော်လည်း သူ၏ ကျင့်ကြံခြင်းအဆင့်မှာ သူတို့ထက် များစွာ သာလွန်နေပြီး သန့်ရှင်းသော ဝိညာဉ် ကျောင်းတော်၏ ထိပ်တန်း ပါရမီရှင်ထက်ပင် သာလွန်နေသေးသည် မဟုတ်ပါလော။
သန့်ရှင်းသော ဝိညာဉ် ကျောင်းတော်၏ ထိပ်တန်း ပါရမီရှင်မှာ အလွန်တရာ ကြောက်စရာကောင်းနေပြီဟု သူတို့ အစက ထင်မှတ်ထားခဲ့ကြသည်။
သို့သော် ဖုန်းဝူချန်မှာ ပို၍ပင် ကြောက်စရာကောင်းနေမည်ဟု မည်သူက ထင်မှတ်ထားခဲ့ပါမည်နည်း။
ကောင်းကင်ဘုံကို အန်တုသောသူ... ကောင်းကင်ဘုံကို အန်တုသော ဖြစ်တည်မှု တစ်ခုပါပေ။
“အံ့ဩစရာပဲ... သူ ဒီလောက် မောက်မာနေတာ မဆန်းပါဘူး၊ သူ့ဆီမှာ တကယ်ကို အရည်အချင်း ရှိတာပဲ”
တတိယ အကြီးအကဲက လေးနက်တည်ကြည်သော မျက်နှာထားဖြင့် ရေရွတ်လိုက်၏။
စကားပြောပြီးသည်နှင့် တတိယ အကြီးအကဲသည် နောက်တစ်ဖန် အဟုန်ပြင်းစွာ ပြေးဝင်လာပြီး ဖုန်းဝူချန်အနီးသို့ ရောက်ရှိလာကာ အလွန်တရာ ပြင်းထန်လှသော လက်ဝါးရိုက်ချက် တစ်ချက်ဖြင့် တိုက်ခိုက်လိုက်သည်။
“မြေကမ္ဘာအဆင့် အဆင့်မြင့် သိုင်းကွက်... သမုဒ္ဒရာကို လှန်ပစ်မယ့် တိမ်တိုက်လက်ဝါး”
တတိယ အကြီးအကဲသည် မြေကမ္ဘာအဆင့် အဆင့်မြင့် သိုင်းကွက်တစ်ခုဖြင့် တိုက်ခိုက်လိုက်ပြီး မည်သည့် သနားညှာတာမှုမျှ မရှိပါချေ။ ဧရာမ လက်ဝါးကြီးမှာ ဖုန်းဝူချန်အား လက်ဝါးတစ်ချက်တည်းဖြင့် သတ်ပစ်တော့မည့်အလား ရှိနေတော့၏။
ယဲ့ထျန်းဝေက မျက်မှောင်ကြုတ်လိုက်ပြီး ...မှတ်ချက်ချလိုက်သည်။
“ဒီအဘိုးကြီးက တော်တော် ရက်စက်တာပဲ၊ နည်းနည်းလေးတောင် သက်ညှာပေးမယ့်ပုံ မပေါ်ဘူး” “သူ သေတွင်းတူးနေတာပဲလို့ ငါထင်တယ်”
လျိုချင်းယန်က လှောင်ပြောင်သည့် လေသံဖြင့် ဆိုလိုက်၏။
“တတိယ အဆင့် ကောင်းကင်ဒေါသ လက်ဝါး”
ဖုန်းဝူချန်ကလည်း အနည်းငယ်မျှ မရွံ့ဘဲ သူ၏ လက်ဝါးဖြင့် ပြန်လည် တိုက်ခိုက်လိုက်သည်။
“ဝုန်း”
“ဝီ... ဝီ...”
လက်ဝါးနှစ်ခုမှာ မျက်တောင်တစ်ခတ်အတွင်း ပြင်းထန်စွာ ရိုက်ခတ်သွားပြီး ကောင်းကင်နှင့် မြေကြီးကို တုန်လှုပ်သွားစေသော ပေါက်ကွဲသံ ထွက်ပေါ်လာကာ ဖျက်ဆီးခြင်း အားလှိုင်းများ အရပ်မျက်နှာ အနှံ့အပြားသို့ ပျံ့နှံ့သွားတော့၏။ တောင်တန်းများပေါ်ရှိ ပန်းမန်များ၊ မြက်ခင်းများနှင့် သစ်ပင်များမှာ မျက်စိရှေ့တွင်ပင် ပျက်စီးသွားပြီး မိုးထိမတတ် မြင့်မားသော တောင်ထွတ်များစွာမှာလည်း တစ်ခုပြီးတစ်ခု ပြိုကျကုန်သည်။
သို့သော် တတိယ အကြီးအကဲ၏ အားပြင်းသည့် စွမ်းအားများက ဖုန်းဝူချန်ကို လက်ဝါးတစ်ချက်တည်းဖြင့် သတ်ပစ်ရန် မဆိုထားနှင့်၊ ခြေတစ်ဝက်မျှပင် နောက်သို့ ဆုတ်ခွာသွားအောင် မလုပ်နိုင်ခဲ့ပါချေ။
တုန်းဖန်းလဲ့နှင့် နှိုင်းယှဉ်နိုင်သော တတိယ အကြီးအကဲ၏ ကျင့်ကြံခြင်းအဆင့်မှာ ဖုန်းဝူချန်ကို ရင်ဆိုင်ရန် လုံလောက်မှု လုံးဝ မရှိပါချေ။
“ဘာ...”
တတိယ အကြီးအကဲ၏ နှလုံးသားမှာ ပြင်းထန်စွာ တုန်လှုပ်သွားပြီး သူ၏ ရက်စက်သော မျက်နှာပေါ်တွင် အံ့အားသင့်မှုများ ပြည့်နှက်သွားသည်။ အဘယ်ကြောင့်ဆိုသော် ဖုန်းဝူချန်၏ မျက်နှာပေါ်တွင် တည်ငြိမ်မှုနှင့် အပြုံးတစ်ခု ရှိနေဆဲ ဖြစ်သည်ကို မြင်လိုက်ရသောကြောင့်ပင်။
“သူက တတိယ အကြီးအကဲရဲ့ မြေကမ္ဘာအဆင့် သိုင်းကွက်ကို တကယ်ကြီး တားဆီးနိုင်တာလား”
သခင်လေးယန်မှာ အလွန်အမင်း အံ့အားသင့်သွားပြီး သူ၏ မျက်နှာထားမှာ တောင့်တင်းနေတော့၏။
အခြား ကျောင်းသား တစ်ဦးကလည်း ထိတ်လန့်တကြားဖြင့် …
အော်ဟစ်လိုက်မိသည်။
“တတိယ အကြီးအကဲ သုံးလိုက်တာက အဆင့်မြင့် မြေကမ္ဘာအဆင့် သိုင်းကွက်နော်၊ သူ့ရဲ့ စွမ်းအားက ထျန်းကျီဘုံ အဆင့် (၈) အထွတ်အထိပ်လောက်တောင် ရှိတယ်၊ အဲဒါကို သူက အလွယ်လေး တားဆီးလိုက်တာလား”
ဖုန်းဝူချန်၏ စွမ်းအားမှာ သခင်လေးယန်၏ စိတ်ကူးယဉ်မှုကို လုံးဝ ကျော်လွန်နေချေပြီ။
“ဂလု...”
အရပ်မျက်နှာ အသီးသီးမှ စောင့်ကြည့်နေကြသော ကျင့်ကြံသူများမှာ ကြောက်ရွံ့မှုကြောင့် တံတွေးများ မျိုချနေမိကြတော့၏။
“လူငယ်လေး တစ်ယောက်က အကြီးအကဲယန်ကို တကယ် ယှဉ်နိုင်တာလား... ငါ မြင်နေရတာ အစစ်ပဲလား”
“ဒါက... ဒါက မယုံနိုင်စရာပဲ... လုံးဝ လက်ခံနိုင်စရာ မရှိဘူး”
“ဒီလောက် ကြောက်စရာကောင်းတဲ့ ပါရမီရှင်မျိုး သန့်ရှင်းသော ဝိညာဉ် ကျောင်းတော်တောင် မွေးထုတ်နိုင်ပါ့မလား”
စောင့်ကြည့်နေကြသော ကျင့်ကြံသူများမှာ အတိုင်းအဆမသိ အံ့အားသင့်နေကြပြီ ဖြစ်သည်။
“အဘိုးကြီး... ခင်ဗျားက သူတို့ကို ယုံကြည်တယ်... ကျုပ်ကလည်း ကျုပ် သူငယ်ချင်းတွေကို ယုံကြည်တယ်ဗျ”
ဖုန်းဝူချန်က မှင်သက်နေသော တတိယ အကြီးအကဲကို စိုက်ကြည့်ရင်း တည်ငြိမ်စွာ ပြောလိုက်၏။
တတိယ အကြီးအကဲက အံ့အားသင့်မှုမှ အလျင်အမြန် သတိပြန်ဝင်လာပြီး သူ၏ အိုမင်းနေသော မျက်နှာမှာ ဒေါသကြောင့် မှောင်မိုက်သွားကာ ...
ဟိန်းဟောက်လိုက်သည်။
“အဓိပ္ပာယ်မရှိတဲ့ စကားတွေ လာမပြောနဲ့”
“ဝုန်း ဝုန်း ဝုန်း”
“ဝီ... ဝီ...”
တတိယ အကြီးအကဲက ဒေါသတကြီးဖြင့် အရူးအမူး တိုက်ခိုက်လေတော့ရာ ရှုမီ ချောက်ကမ်းပါး၏ ကောင်းကင်ယံထက်တွင် ပြင်းထန်သော တိုက်ပွဲကြီးတစ်ခု ဖြစ်ပွားလာတော့၏။ ကောင်းကင်နှင့် မြေကြီးကို တုန်လှုပ်သွားစေသော ပေါက်ကွဲသံများ ထွက်ပေါ်လာပြီး ဖျက်ဆီးခြင်း စွမ်းအင်များက ပေသောင်းချီ ကျယ်ဝန်းသော ဟင်းလင်းပြင်ကို ဖုံးလွှမ်းသွားသည်။
တိုက်ပွဲ စတင်သည်နှင့် ကျင့်ကြံသူ များစွာကို ပိုမို ဆွဲဆောင်လာနိုင်ခဲ့၏။
“ယန်မိသားစုရဲ့ တတိယ အကြီးအကဲလား... ဟိုကောင်လေးက ဘယ်သူလဲ၊ သူက တတိယ အကြီးအကဲကို တကယ် ယှဉ်နိုင်ပါလား”
“ထျန်းကျီဘုံ အဆင့် (၈) ရဲ့ အရှိန်အဝါပဲ... အဲဒီကောင်လေးက တကယ်ကြီး ထျန်းကျီဘုံ အဆင့် (၈) သို့ ရောက်နေတာလား... ပြီးတော့ သူ့ဆီမှာ အင်မော်တယ်လက်နက်လည်း ရှိတယ်နော်”
“သူတို့ပဲ... ငါ သူတို့ကို ရှုမီ ချောက်ကမ်းပါး ဝင်ပေါက်မှာ တွေ့ခဲ့တယ်... သူတို့က မြင့်မြတ်သော လင်းယုန် ကြေးစားအဖွဲ့ရဲ့ ဒုတိယ ခေါင်းဆောင်နဲ့ အတူ ဝင်လာခဲ့တာထင်တယ်”
ပွဲကြည့်ရန် လာရောက်သူ များပြားလာပြီး တောင်ကြားလေး၏ ပတ်လည်တွင် လူထောင်ပေါင်းများစွာ စုဝေးလာကြလေရာ ထိုအထဲတွင် ထျန်းကျီဘုံ ပညာရှင်များစွာလည်း ပါဝင်သည်။
“ဝှစ် ဝှစ် ဝှစ်”
“ဝုန်း ဝုန်း ဝုန်း”
ကောင်းကင်ယံထက်တွင် လူနှစ်ဦးသည် ပြင်းထန်စွာ တိုက်ခိုက်နေကြပြီး သူတို့၏ ကိုယ်ဖော့ပညာများကိုလည်း အပြိုင်အဆိုင် အသုံးပြုနေကြ၏။ သူတို့၏ ကိုယ်ဟန်များမှာ အဆက်မပြတ် ပေါ်လိုက် ပျောက်လိုက် ဖြစ်နေပြီး အမြန်နှုန်းမှာ လွန်စွာ မြန်ဆန်လှသဖြင့် လူရိပ်ထောင်ပေါင်းများစွာ ပေါ်ထွက်လာကာ စစ်တပ်ကြီးတစ်ခုအလား ထင်မှတ်ရသည်။
“ဒီကောင်လေးက ဘယ်သူလဲ... ဘာလို့ တိုက်လေ ပိုသန်မာလာလေ ဖြစ်နေတာလဲ... သူ့ရဲ့ စွမ်းအားက ဘာကြီးလဲ... သူက ဘယ်လိုလုပ်ပြီး ဒီလောက် သန်မာတဲ့ ခန္ဓာကိုယ်မျိုးကို ပိုင်ဆိုင်ထားရတာလဲ”
ပြင်းထန်သော တိုက်ပွဲအတွင်း၌ တတိယ အကြီးအကဲမှာ ပို၍ပင် ထိတ်လန့်လာပြီး သူ၏ စိတ်ထဲတွင် မေးခွန်းပေါင်းများစွာ ပေါ်ထွက်လာတော့၏။
အရူးအမူး ထိပ်တိုက် ရင်ဆိုင်မှုများအောက်တွင် သူသည် ဖုန်းဝူချန်အား မဖိနှိပ်နိုင်သည့်အပြင် သူကိုယ်တိုင်ကသာ ဖိနှိပ်ခံနေရပြီး တတိယ အကြီးအကဲမှာ ခြေလက်များ အလွန်အမင်း နာကျင်လာကာ အဆက်မပြတ် ဒုက္ခရောက်နေရသည်။
တတိယ အကြီးအကဲ နောက်သို့ ဆုတ်ခွာနေရသည်ကို ကြည့်ရင်း စောင့်ကြည့်နေကြသော ကျင့်ကြံသူများမှာ လုံးဝ ဆွံ့အသွားကြ၏။
“ဘုန်း ဘုန်း ဘုန်း”
တတိယ အကြီးအကဲမှာ အရေးနိမ့်လာသည်နှင့်အမျှ သူ၏ လှုပ်ရှားမှုများမှာ ပျာယာခတ်လာပြီး ဖုန်းဝူချန်၏ ရက်စက်သော တိုက်ကွက်များကို မခုခံနိုင်တော့ဘဲ ဖုန်းဝူချန်၏ လက်သီးများက တတိယ အကြီးအကဲ၏ ခန္ဓာကိုယ်ပေါ်သို့ ဆက်တိုက် ကျရောက်လာတော့၏။
“အဘိုးကြီး... ဆက်မတောင့်ခံနိုင်တော့ဘူးလား”
ဖုန်းဝူချန်က အေးစက်စွာ ရယ်ရင်း မေးလိုက်သည်။
ထိုစကားကို ကြားသောအခါ တတိယ အကြီးအကဲ၏ အိုမင်းနေသော မျက်နှာကြီးမှာ နီမြန်းသွားပြီး ဒေါသများ ပြင်းထန်စွာ လောင်ကျွမ်းလာတော့၏။ သူသည် အသည်းအသန် တောင့်ခံနေရသော်လည်း အရှုံးပေးရန် မာနကြီးလွန်းနေသဖြင့် ခေါင်းမာစွာဖြင့် ...ပြန်လည် ချေပလိုက်သည်။
“အရမ်း မောက်မာမနေနဲ့... ခဏနေရင် မင်း နောင်တရသွားအောင် လုပ်ပေးမယ်”
“အဲ့လိုလား”
ဖုန်းဝူချန်က အေးစက်သော အပြုံးဖြင့် ...
“ဒါဆိုရင်တော့ ကျုပ်ရဲ့ အစွမ်းကုန်ကို ထုတ်သုံးရတော့မှာပေါ့... ကျုပ်လည်း နောင်တမရချင်ဘူးဗျ”
“ဘာ”
ဖုန်းဝူချန်၏
စကားကို ကြားလိုက်ရသည့်အခါ တတိယ အကြီးအကဲ၏ အိုမင်းနေသော မျက်နှာကြီးမှာ မျက်တောင်တစ်ခတ်အတွင်း ပြောင်းလဲသွားပြီး စိမ်းဖပ်သွားတော့၏။
ဖုန်းဝူချန်က စွမ်းအားကုန်ကို မထုတ်သုံးရသေးဘူး တဲ့လား။
တတိယ အကြီးအကဲမှာ ဝိညာဉ်ပင် လွင့်ထွက်မတတ် ကြောက်လန့်သွားရသည်။ သူ၏ တိုက်ခိုက်ရေး စွမ်းအားကို သုံးဆအထိ မြှင့်တင်ထားပြီးဖြစ်ပါလျက် အစွမ်းကုန် မထုတ်သုံးရသေးဘူးဟု ဆိုလာသည်ဖြစ်ရာ ဤကောင်လေးက ဘယ်လို မိစ္ဆာကောင်မျိုး ဖြစ်နေသနည်း။
“အဆင့်မြင့် မြေကမ္ဘာအဆင့် သိုင်းကွက်...လောကဖျက် ကောင်းကင်ဘုံ အပြစ်ဒဏ် ဓားချက်”
ဖုန်းဝူချန်က ရုတ်တရက် ကျယ်လောင်စွာ အော်ဟစ်လိုက်ပြီး သူ့လက်ဖြင့် အားပြင်းသော စွမ်းအားများကို စုစည်းကာ မတုံ့ဆိုင်းဘဲ ခုတ်ချလိုက်လေတော့၏။
wunzinnosp