အခန်း ၈၈၁
Vol. 84 Ch. 881
အခန်း (၈၈၁) ခြံဝင်းလေးမှ ထွက်လာခြင်း
အချိန်တွေက ကုန်ဆုံးတာ မြန်လှပေသည်။
မကြာမီမှာပင် ပါရမီရှင် ရွေးချယ်ပွဲ ကျင်းပရန် လဝက်ခန့်သာ အချိန်ကျန်ပါတော့သည်။
ကျူးကျစ်ယန်က ရွေးချယ်ပွဲ စာရင်းပေးသွင်းစဉ်တွင် ကပ်ဘေးကို အောင်မြင်စွာ ဖြတ်ကျော်နိုင်ခဲ့ပြီးသည့် နောက်ပိုင်း၌ သူမ၏ နာမည်က ကျင်းရှန် မြို့အတွင်း ပိုမို၍ ကျော်ကြားလာခဲ့လေသည်။
တတိယမြောက်နေ့တွင် ဒုတိယအကြိမ် ကပ်ဘေးကို ဖြတ်ကျော်ခဲ့သည်။
ခုနစ်ရက်မြောက်နေ့တွင် တတိယအကြိမ် ကပ်ဘေးကို အောင်မြင်စွာ ဖြတ်ကျော်နိုင်ခဲ့ပြန်သည်။
ဆယ်ရက် မြောက်နေ့တွင်မူ စတုတ္ထအကြိမ်မြောက် ကပ်ဘေးကို ပြင်းထန်သော အရှိန်အဝါဖြင့် ချိုးဖျက်ပစ်ခဲ့သည်။
ထို့နောက် ရက်အနည်းငယ်ခြားတိုင်း ကျူးကျစ်ယန်က ကပ်ဘေးတစ်ခုကို ဖြတ်ကျော်ခဲ့ပြီး သာမန်ကျင့်ကြံသူများ၏ မျက်လုံးထဲတွင် ကျော်ဖြတ်ရန် ခက်ခဲလှသော တောင်တန်းကြီးများကို အလွန်ပြင်းထန်သော နည်းလမ်းများဖြင့် တစ်လုံးပြီးတစ်လုံး အလွယ်တကူ ကျော်လွှားသွားခဲ့သည်။
တစ်လကျော်အတွင်းမှာပင် သူမ၏ နာမည်က ဒုံးပျံတစ်စင်းလို အရှိန်အဟုန်ဖြင့် တက်လှမ်းသွားခဲ့ကာ အမည်မသိ ဂျူနီယာကျင့်ကြံသူ တစ်ဦးဘဝမှ လူအများ အာရုံစိုက်ရသော ထိပ်တန်း ပြိုင်ဘက်ကင်း ပါရမီရှင်များထဲမှ တစ်ဦး ဖြစ်လာခဲ့တော့သည်။
မြင့်မြတ်လှသော မြင့်မြတ်နန်းတော်ကပင် သူမထံသို့ အကြည့်များ ပို့လာခဲ့သည်။
ဤသည်ကလည်း ကျူးကျစ်ယန် ရရှိချင်သော ရလဒ်ပင် ဖြစ်သည်။
ပါရမီရှင် ရွေးချယ်ပွဲ ဆိုသည်မှာ မည်သူက အသန်မာဆုံးလဲ ဆိုသည်ကို ပြိုင်ဆိုင်ရခြင်း မဟုတ်ဘဲ မည်သူက ပို၍ ထူးထူးခြားခြား စွမ်းဆောင်နိုင်သလဲ ဆိုသည်ကိုသာ ကြည့်ခြင်း ဖြစ်ပြီး ထိုသို့ စွမ်းဆောင်နိုင်မှသာ မြင့်မြတ်နန်းတော်၏ မျက်နှာသာပေးမှုကို ရရှိနိုင်မည် ဖြစ်သည်။
တကယ်တော့ ခွန်အားကလည်း အလွန်အရေးကြီးသော စံနှုန်းတစ်ခု ဖြစ်သည်မှာ သေချာသော်လည်း တစ်ခုတည်းသော စံနှုန်းတော့ မဟုတ်ပေ။
ကျူးကျစ်ယန်ကဲ့သို့ ရွေးချယ်ပွဲ တရားဝင် မစတင်မီကတည်းက တစ်မြို့လုံးကို လှုပ်ခတ်စေခဲ့သော တည်ရှိမှုမျိုးဆိုလျှင် မြင့်မြတ်နန်းတော်၏ ရွေးချယ်ခြင်းကို ခံရမည့် ရာခိုင်နှုန်းက သိသိသာသာ မြင့်တက်သွားမည် ဖြစ်သည်။
ကျူးကျစ်ယန်က တစ်လရုံမျှသာ အချိန်ပေးပြီး 'အတိဒုက္ခဖြတ်ကျော်ခြင်းအဆင့်' ကို အောင်မြင်စွာ ဖြတ်ကျော်ကာ 'အင်မော်တယ်အဖြစ်ပြောင်းလဲခြင်း အဆင့်' သို့ ရောက်ရှိသွားသည်။
သူမက ယခုအကြိမ် ပါရမီရှင် ရွေးချယ်ပွဲတွင် ရေပန်းအစားဆုံး သတင်းကြီးနေသည့် ပါရမီရှင် အနည်းငယ်ထဲမှ တစ်ဦး ဖြစ်လာခဲ့ပြီ ဖြစ်သည်။
ကျင်းရှန် မြို့အတွင်းရှိ အင်အားကြီး မိသားစုအချို့ကလည်း ကျူးကျစ်ယန်ထံသို့ ကမ်းလှမ်းမှုများ စတင်ပြုလုပ်လာကြပြီး အခြားမြို့မှ ရောက်လာသော ဤပြိုင်ဘက်ကင်း ပါရမီရှင်ကို သူတို့၏ အဖွဲ့အစည်းအတွင်းသို့ ဆွဲဆောင်လိုကြသည်။
တစ်ယောက်ချင်းစီ တင်ပြလာသော အခြေအနေများမှာ အလွန်ပင် ဆွဲဆောင်မှု ရှိလှပေသည်။
သို့သော်လည်း နှမြောစရာကောင်းသည်မှာ ကျူးကျစ်ယန်၏ ရည်ရွယ်ချက်က မြင့်မြတ်နန်းတော်ထဲ ဝင်ရန် တစ်ခုတည်းသာ ရှိသည်။
သို့ရာတွင် အစောကတည်းက အင်အားကြီး မိသားစုမှ လာသူဖြစ်သဖြင့် လူမှုဆက်ဆံရေး နယ်ပယ်ကိုတော့ သူမ အလွယ်တကူပင် ကိုင်တွယ်နိုင်စွမ်း ရှိသည်။ သူမ၏ လိမ္မာပါးနပ်စွာ အလှည့်အပတ် ပြောဆိုမှုများအောက်တွင် ထိုအင်အားကြီး အဖွဲ့အစည်းများကိုလည်း စိတ်အနှောင့်အယှက် မဖြစ်စေဘဲ သူမကိုယ်ပိုင် လွတ်လပ်ခွင့်နှင့် ရွေးချယ်ခွင့် အခွင့်အရေးကိုလည်း ထိန်းသိမ်းထားနိုင်ခဲ့သည်။
အချုပ်အားဖြင့် ပြောရလျှင် မည်သည့် ပြဿနာမျှ ဖြစ်မလာခဲ့ပေ။
တစ်ခုတည်းသော ပြဿနာဟု ဆိုနိုင်သည်မှာ ထိုအင်အားကြီး အဖွဲ့အစည်းများမှ သခင်လေးများပင် ဖြစ်လိမ့်မည်။
ကျူးကျစ်ယန်က မူလကတည်းက အလွန်လှပသူ ဖြစ်ပြီး ကိုယ်ပေါ်တွင်လည်း အထက်တန်းလွှာ မိသားစုများ၏ စရိုက်လက္ခဏာများ ရှိနေသည့်အပြင် ယခုအခါတွင်မူ သူမ၏ အလွန်အမင်း အစွမ်းထက်သော ကျင့်ကြံခြင်း ပါရမီကိုပါ ပြသထားနိုင်ခဲ့ပြီပင်။
သူမကို လိုက်ပိုးပန်းသူများ မရှိလျှင်သာ မဖြစ်နိုင်သော ကိစ္စ ဖြစ်ပေလိမ့်မည်။
ထို့ကြောင့် ဤကာလအတွင်း ရှောင်ယင်နှင့် ထန်ထျန်းကြားတွင် ပြောစရာ အကြောင်းအရာများ ပိုမို စုံလင်လာခဲ့သည်။
ဘယ်မိသားစုက သခင်လေးကတော့ လူရှုပ်ကြီး ဖြစ်နေပြီး ဘယ်မိသားစုက သခင်လေးကတော့ အူတူတူ အတုံးလိုက် အတစ်လိုက် သေလုမတတ် ဖြစ်နေသည် စသည့် ရှုပ်ပွနေသော ကိစ္စများပင် ဖြစ်သည်။
ယခင်က ထန်ထျန်းဆိုလျှင် ဤကဲ့သို့သော အတင်းအဖျင်း များကို စိတ်ဝင်စားမည် မဟုတ်ပေ။
သို့သော်လည်း သူ အနားယူ ရန် ဆုံးဖြတ်ပြီးနောက်တွင်မူ ဤအရာများက တော်တော်လေး စိတ်ဝင်စားဖို့ ကောင်းသည်ဟု ခံစားရကာ ရှောင်ယင်နှင့် စကားလက်ဆုံ တည့်နေခဲ့သည်။
သို့သော် သူက တကယ်ပဲ အလကားနေ အလကားပျက် နေနေခြင်းမျိုးတော့ မဟုတ်ပေ။
သူက ဤကဲ့သို့သော သဘောထားမျိုးဖြင့် 'ငါးမွေးသူ' ၏ စိတ်ဆန္ဒကို စမ်းသပ်နေခြင်း ဖြစ်သည်။
ငါးမွေးသူက သူ့ကို ကမ္ဘာကြီး ထံသို့ အလွယ်တကူ ပြန်ခေါ်သွားလိမ့်မည် မဟုတ်ပေ။ သူမ၏ စိတ်ဆန္ဒကို မခန့်မှန်းနိုင်သည့်အတွက် ဤအတိုင်း အေးအေးဆေးဆေး ခဏမျှ စောင့်ဆိုင်းနေခြင်းက ပို၍ ကောင်းမွန်သည်။
အကယ်၍ ငါးမွေးသူတွင် တစ်ခုခု စီစဉ်ထားသည် ရှိပါက သေချာပေါက် ပေါ်လာလိမ့်မည်။
ဤသည်က သူနှင့် ငါးမွေးသူကြားက ကစားပွဲတစ်ခုဟုလည်း ဆိုနိုင်သည်။
မည်သို့ပင်ဖြစ်စေ ငါကတော့ ဒီအတိုင်း အဆုံးထိ ဇိမ်ခံနေမှာပဲ။
မင်း ငါ့ကို လုပ်စရာတစ်ခုခု ရှာပေးရင် ပေး၊ မပေးရင်လည်း ငါ ဒီအတိုင်း အပျင်းထူနေတာကိုပဲ ဆက်ကြည့်နေလိုက်တော့။
ဤသည်က ထန်ထျန်း၏ အကြံအစည် ဖြစ်သည်။
မတတ်နိုင်ပေ၊ အရာအားလုံးကို သိမြင်နိုင်ပြီး ခန့်မှန်း၍မရသော ထိုကဲ့သို့သော တည်ရှိမှုမျိုးကို ရင်ဆိုင်ရသည့်အခါ ဤသို့သာ လုပ်နိုင်တော့ သည်။
နေ့တိုင်း ဝိုင်သောက်၊ လက်ဖက်ရည်သောက်ရင်း 'အမှောင် ကာလ' ၏ ထူးခြားသော အစားအစာများကို မြည်းစမ်းကာ ရှောင်ယင် အပြင်ကနေ သယ်လာပေးသည့် အတင်းအဖျင်းများကို နားထောင်ရသည့် ဘဝက တော်တော်လေးကို ဇိမ်ကျလှပေသည်။
တစ်ခါတစ်ရံ စိတ်ကူးပေါက်လျှင်လည်း ကျူးကျစ်ယန်၏ ကျင့်ကြံခြင်းကို လမ်းညွှန်ပြသပေးတတ်သေးသည်။
ကျူးကျစ်ယန်၏ နားလည်နိုင်စွမ်း က မနိမ့်လှပေ၊ သွေးကြော ဖိနှိပ် ခံထားရမှုကြောင့်သာ ကန့်သတ်ခံထားရခြင်း ဖြစ်သည်။
ထန်ထျန်း၏ လမ်းညွှန်မှုကို ရရှိပြီးနောက်တွင်မူ သူမ၏ ကျင့်ကြံခြင်း အခြေခံနှင့် တာအိုကျင့်စဉ်အပေါ် နားလည်မှုက အဟုန်ပြင်းစွာ တိုးတက်လာခဲ့သည်။
တခြားလူများက ကျူးကျစ်ယန်၏ ကျင့်ကြံခြင်းအဆင့် လျင်မြန်စွာ တက်လှမ်းမှုကိုသာ အံ့သြနေကြသော်လည်း သူတို့ မသိကြသည်မှာ အဆင့်တက်ခြင်းက ကျူးကျစ်ယန်အတွက် တိုးတက်မှု အနှေးဆုံး အရာ ဖြစ်နေခြင်းပင်။
သူမက ခန္ဓာကိုယ်အတွင်းရှိ ကျင့်ကြံခြင်းအဆင့်ကို အစွမ်းကုန် ဖိနှိပ်ထားရခြင်း မဟုတ်ပါလား။
အကယ်၍ သူမသာ အကုန်လုံးကို လွှတ်ပေးလိုက်မည်ဆိုလျှင်...
သူတို့အားလုံး ပါးစပ်အဟောင်းသားနှင့် အံ့သြသွားကြပေလိမ့်မည်။
ဒီနေ့တွင်လည်း ထန်ထျန်းက မိုးမခပင်ကြီး အောက်၌ အေးအေးလူလူ လက်ဖက်ရည် သောက်နေဆဲ ဖြစ်သည်။
သူက ဘာမှမတွေးတောဘဲ နေထိုင်ရသည့် ဤကဲ့သို့သော ဘဝမျိုးကို စတင် အသားကျနေပြီ ဖြစ်သည်။
ရုတ်တရက် ရှောင်ယင်က အလောတကြီးဖြင့် ပြေးဝင်လာခဲ့သည်။
"အစ်ကိုထန်... အစ်ကိုထန်"
သူမ ပြန်ရောက်လာသည်နှင့် ထန်ထျန်းကို အော်ဟစ် ခေါ်လိုက်တော့သည်။
"ဘာလဲ... စိတ်လှုပ်ရှားစရာ အတင်းအဖျင်းအသစ် ရလာပြန်ပြီလား"
ထန်ထျန်းက ကိုယ်ကို မတ်လိုက်ပြီး စားပွဲပေါ်သို့ နေကြာစေ့ တစ်ဆုပ် ကို အဆင်သင့် ချလိုက်ကာ ပရိသတ်ကောင်း တစ်ဦး ဖြစ်ရန် ပြင်ဆင်လိုက်သည်။
"မဟုတ်ဘူး"
ရှောင်ယင်က ထန်ထျန်း၏ ရှေ့တွင် ထိုင်ကာ လက်ဖက်ရည် တစ်ငုံကို အတင်းသောက်ပြီးနောက် ပြော၏။ "ဧည့်ခံပွဲ"
"သခင်မလေး ဧည့်ခံပွဲ ဖိတ်ကြားခံရတယ်"
ထန်ထျန်း ချက်ချင်းပင် စိတ်ဝင်စားမှု ပျောက်ဆုံးသွားတော့သည်။
ဧည့်ခံပွဲက အတင်းအဖျင်းလောက် ဘယ်စိတ်ဝင်စားဖို့ ကောင်းပါ့မလဲ။
"စိတ်ဝင်စားစရာ ကိစ္စမှတ်လို့"
"ဧည့်ခံပွဲ တစ်ခုတင်ပဲဥစ္စာ... ဒီလောက်အထိ စိတ်လှုပ်ရှားနေဖို့ လိုလို့လား"
ထန်ထျန်းက နှုတ်ခမ်းမဲ့ကာ သူ့ဘာသာသူ နေကြာစေ့ ဆက်ကိုက်နေတော့သည်။
ရှောင်ယင်က အလျင်အမြန် ပြော၏။ "ဒါက သာမန်ဧည့်ခံပွဲ မဟုတ်ဘူးနော်"
"ဒါက ကျင်းရှန် မြို့ရဲ့ အမြင့်ဆုံး အဆင့်အတန်းရှိတဲ့ ဧည့်ခံပွဲပဲ၊ အစွမ်းအထက်ဆုံး အဖွဲ့အစည်းတွေ အားလုံး တက်ရောက်ကြမှာ"
" ပြီးတော့ ဒီအကြိမ် ပါရမီရှင် ရွေးချယ်ပွဲရဲ့ ထိပ်တန်း ပါရမီရှင် တွေလည်း အကုန် ဖိတ်ကြားခံရတယ်"
"ကျွန်မတို့ ဒီဧည့်ခံပွဲကို တက်ရောက်ခွင့် ရတယ်ဆိုတာ သခင်မလေးက ကျင်းရှန် မြို့ရဲ့ အမြင့်ဆုံး အသိုင်းအဝိုင်းထဲကို တရားဝင် ဝင်ရောက်သွားပြီဆိုတာကို ပြတာပဲ"
ထန်ထျန်းက "ဪ" ဟုသာ တစ်ချက် ဆိုလိုက်သည်။
ဤကဲ့သို့သော အရာများက သူ့အတွက် မည်သည့် ဆွဲဆောင်မှုမျှ မရှိပေ။ ဘယ်မိသားစုက သခင်လေးကတော့ ပြည့်တန်ဆာအိမ် သွားလည်ပြန်ပြီ စသည့် သတင်းများကို နားထောင်ရခြင်းက ပို၍ စိတ်ဝင်စားစရာ ကောင်းသေးသည်။
"အစ်ကို သွားမလား"
"ကျွန်မ ကြားတာတော့ အဲ့ဒီဧည့်ခံပွဲမှာ ထူးခြားတဲ့ ပါရမီရှင်တွေနဲ့ ပြိုင်ဘက်ကင်းတယ့်သူ တွေ အများကြီး ပေါ်လာလိမ့်မယ်တဲ့"
ရှောင်ယင်က ပြောသည်။
ထန်ထျန်းက ခေါင်းခါပြ၏။
"ပြိုင်ဘက်ကင်းတယ့်သူ တွေကို ငါ အများကြီး မြင်ဖူးလှပြီ"
" ငါ့မျက်စိထဲ ဝင်မယ့်လူ ရှိမယ် မထင်ပါဘူး"
ရှောင်ယင် ပါးစပ်အဟောင်းသား ဖြစ်သွားကာ "အစ်ကိုထန်... အစ်ကို အရမ်း တော်တယ်ဆိုတာ ကျွန်မ သိပါတယ်"
" ဒါပေမဲ့ ကျွန်မတို့က ကမ္ဘာပေါ်က သူရဲကောင်း တွေကို ဒီလောက်အထိတော့ လျှော့မတွက်သင့်ဘူးမလား"
သူမက ထန်ထျန်းကို အလွန်အမင်း မာန်တက်နေသည်ဟု ထင်မိသည်။
သို့သော် သူမ မသိသည်မှာ ထန်ထျန်းက တကယ်ပဲ အလကား လေလုံးထွားနေခြင်း မဟုတ်ပေ။
"မင်းတို့ပဲ သွားကြပါ"
" ငါကတော့ အိမ်မှာပဲ လက်ဖက်ရည်သောက်မယ်၊ မလှုပ်ချင်ဘူး"
ထန်ထျန်းက ပျင်းရိစွာဖြင့် အကြောဆန့်လိုက်ပြီး မျက်လုံးများကိုပါ မှိတ်လိုက်တော့သည်။
ရှောင်ယင်က မျက်လုံးလေး ကလည်ကလည် လုပ်ကာ "ဒါပေမဲ့ အဲ့ဒီလို ဧည့်ခံပွဲမျိုးက အတင်းအဖျင်းတွေ ထွက်ဖို့ အလွယ်ဆုံး နေရာပဲလေ"
" အစ်ကို အဲ့ဒီနေရာမှာ ကိုယ်တိုင် သွားမကြည့်ချင်ဘူးလား"
ထန်ထျန်း၏ မျက်တောင်များ လှုပ်ခတ်သွားပြီး မျက်လုံးကို အနည်းငယ် ဖွင့်ကြည့်လိုက်သည်။
ရှောင်ယင် ချက်ချင်းပင် ပြုံးသွားကာ ထန်ထျန်း၏ လက်မောင်းကို ဆွဲလျက် ပြော၏။ "သွားကြမယ်လေ"
"အစ်ကို ဒီခြံဝင်းလေးထဲမှာ နေနေတာ သုံးလကျော်ပြီ၊ တံခါးအပြင်ကိုတောင် တစ်ခါမှ မထွက်ဖူးသေးဘူး"
" ကျွန်မ ကြည့်ရတာတောင် မွန်းကျပ်လာပြီ"
"အပြင်ထွက် လမ်းလျှောက်တာက စိတ်ခံစားချက်ကို သက်သာစေနိုင်တယ်လေ၊ တစ်ခါတလေကျရင် အစ်ကို့ရဲ့ စိတ်ညစ်စရာတွေကို ဖြေရှင်းပေးနိုင်မယ့် အရာတစ်ခုခုကို ရှာတွေ့ရင် ရှာတွေ့နိုင်မှာပေါ့"
"အစ်ကို့ရဲ့ စိတ်ထဲမှာ ကိစ္စတစ်ခုခု ရှိနေတယ်ဆိုတာ ကျွန်မ သိသာပါတယ်နော်"
" သွားကြမယ်... သွားကြမယ်နော်~"
ရှောင်ယင်က ထန်ထျန်း၏ လက်မောင်းကို ဆွဲကာ ပြုံးစိစိဖြင့် ပြောနေတော့သည်။
ရှောင်ယင်၏ အတင်းအကျပ် ဆွဲခေါ်မှုအောက်တွင် နောက်ဆုံး၌ ထန်ထျန်းက မတ်တတ်ရပ်လိုက်ရပြီး သူနှင့် ကပ် မတတ် ဖြစ်နေသော ပက်လက်ကုလားထိုင်ပေါ်မှ ထွက်လာခဲ့ရလေသည်။
"ကြိုပြောထားမယ်နော်"
" ငါက အတင်းအဖျင်း သွားကြည့်ချင်လို့ မင်းနဲ့ လိုက်ခဲ့တာ မဟုတ်ဘူး"
ထန်ထျန်းက ပြော၏ ။
ရှောင်ယင်က တဟိဟိ ရယ်ကာ "ဟုတ်ကဲ့ပါ... ဟုတ်ပါတယ်၊ သေချာပေါက် မဟုတ်ပါဘူး"
"အစ်ကိုက စိတ်ခံစားချက် သက်သာအောင်နဲ့ ပိုပြီး လင်းလက်တဲ့ အနာဂတ်ကို ရှာဖွေဖို့ သွားတာပါ"
" ကြီးမြတ်လွန်းလို့ စကားလုံးတွေတောင် မလိုတော့ပါဘူး"
ထန်ထျန်း မျက်လုံး တွန့်သွားရသည်။
ဤကောင်မလေး၏ သရုပ်ဆောင်ချက်က တကယ်ကို ညံ့ဖျင်းလွန်းလှသည်။
"ကဲပါ... တော်ပြီ၊ မြန်မြန် သွားကြစို့"
" နောက်ကျနေ ရင် ဧည့်ခံပွဲ စတော့မယ်"
နောက်ဆုံးတွင် ရှောင်ယင်၏ အတင်းအကျပ် ဆွဲခေါ်မှုဖြင့် ထန်ထျန်းက တည်းခိုခန်း၏ ဤခြံဝင်းလေးထဲမှ ပထမဆုံးအကြိမ်အဖြစ် အပြင်သို့ ထွက်လာခဲ့ရလေတော့သည်။