အခန်း (၈၄၈-၈၅၀)

အခန်း ၈၄၈ - ကြားခံဝိညာဉ် သွေးမြွေကို ဖမ်းယူခြင်း

"ကြားခံဝိညာဉ် သွေးမြွေပဲ... အဲဒါ ပြန်ပေါ်လာပြန်ပြီ"

ယီယွင် ဖန်တီးလိုက်သော အံ့အားသင့်ဖွယ် လှုပ်ခတ်မှုကြောင့် ရှိနေကြသော လော့မျိုးနွယ်စု တပည့်များသည် သတ္တမအဆင့်တွင် ဖြစ်ပျက်နေသမျှကို အလွန်ပင် အာရုံစိုက်နေကြသည်။ သူတို့ထဲမှ အချို့မှာ သူတို့၏ ကျင့်ကြံခြင်းကိုပင် ဂရုမစိုက်နိုင်တော့ချေ။

ရုတ်တရက် ပေါ်လာသော ကြားခံဝိညာဉ် သွေးမြွေမှာ သူတို့၏ မျက်စိမှ လွတ်ကင်းသွားခြင်း မရှိခဲ့ပေ။ ထို့အပြင် ကြားခံဝိညာဉ် သွေးမြွေတွင် ထူးခြားသော အရှိန်အဝါတစ်ခု ရှိနေသဖြင့် ၎င်းကို သတိမပြုမိရန် ခက်ခဲလှသည်။

ကြားခံဝိညာဉ် သွေးမြွေမှာ လေနက်ချိုင့်ဝှမ်း စမ်းသပ်မှု၏ အရေးကြီးဆုံးသော အခွင့်အရေး ဖြစ်သည်။ ၎င်းကို မည်သူက မလိုချင်ဘဲ နေပါမည်နည်း။ အခု သူတို့သည် ယီယွင် မတ်တပ်ရပ်လိုက်သည်ကို မြင်တွေ့လိုက်ရသည်။ သူသည် ကြားခံဝိညာဉ် သွေးမြွေကို ဖမ်းယူရန် လှုပ်ရှားတော့မည် ဖြစ်သည်။

"ယီယွင်က ကြားခံဝိညာဉ် သွေးမြွေကို ဖမ်းဖို့ ကြိုးစားနေတာပဲ။ အရှင်ကန်းမန်က လော့ထျန်၊ ကုလော့နဲ့ ရန်ယွီတို့ကို ခက်ခဲတဲ့ ပုစ္ဆာတစ်ပုဒ် ပေးချင်ခဲ့တာ... ဒါပေမဲ့ အခုတော့ ယီယွင်တစ်ယောက်တည်းကပဲ ကြားခံဝိညာဉ် သွေးမြွေကို ဖမ်းသွားနိုင်တော့မယ့်ပုံပဲ"

"ငါ့အထင်တော့ ဒါက ရေထဲက ငါးပဲ။ အခက်ခဲဆုံး အတားအဆီးဖြစ်တဲ့ ဝိညာဉ်နက် နဂါးကြီးက ယီယွင်နဲ့ ရှေးဟောင်း ကောင်းကင်ဝါးမြို နဂါးကြီးရဲ့ ဆွဲဖြတ်ဝါးမြိုတာကို ခံလိုက်ရပြီးပြီ။

နဂါးကြီးကိုတောင် စားပစ်နိုင်တာ... မြွေသေးသေးလေးတစ်ကောင်ကို စားဖို့က မခက်ခဲတော့ဘူးမလား။ ရန်ယွီတို့တစ်သိုက် ဘာတွေတွေးနေမလဲ ငါသိချင်မိတယ်။ ဒါက သူတို့နဲ့ ဘာမှမဆိုင်တော့သလိုပဲ... "

ရှိနေကြသော လော့မျိုးနွယ်စု တပည့်များသည် တီးတိုးဆွေးနွေးနေကြရင်း သူတို့ထဲမှ အချို့မှာ ရန်ယွီထံသို့ မတတ်နိုင်ဘဲ ကြည့်လိုက်မိကြသည်။

သဘာဝကျစွာပင် ရန်ယွီသည်လည်း သူတို့၏ စကားများကို ကြားလိုက်ရသည်။ သူ၏ မျက်နှာမှာ အပြာရောင် ပြောင်းသွားခဲ့ရသည်။ အိမ်ရှေ့မင်းသား စာကျက်ရာတွင် လိုက်ပါရသူ ဟူသော စကားပုံသည် အနိုင်ရရန် မည်သည့် မျှော်လင့်ချက်မျှ မရှိဘဲ ပြိုင်ပွဲတစ်ခုတွင် ဘေးလူအဖြစ် ပါဝင်နေရသူ ဟူသောအချက်မှာ မီးလျှံတိမ်တိုက်ပြည်နယ်တွင် ရှိစဉ်က ရန်ယွီနှင့် သက်ဆိုင်ခဲ့ခြင်း ဖြစ်သည်။

ထိုစဉ်က သူသည် အိမ်ရှေ့မင်းသား ဖြစ်ခဲ့ပြီး အခြားလူများက သူ၏ စာကျက်ဖော်များ ဖြစ်ခဲ့ကြသည်။ သို့သော် သူက အခြားလူများ၏ စာကျက်ဖော်အဖြစ် ပြောင်းလဲသွားပြီး အနိုင်ရရန် မည်သည့် မျှော်လင့်ချက်မျှ မရှိဖြစ်သွားရသည့်အလှည့်က ဘယ်တုန်းက ရောက်လာခဲ့ပါသနည်း။

မြစိမ်းတောင် လေ့ကျင့်ရေးမှာ ရန်ယွီအတွက်တော့ ညှဉ်းပန်းနှိပ်စက်မှုတစ်ခု ဖြစ်နေခဲ့သည်။

ဤအခိုက်အတန့်တွင် ယီယွင် လှုပ်ရှားလိုက်သည်။ ထူထပ်လှသော မြူနက်များနှင့် ၎င်းတို့အတွင်းရှိ ကြားခံဝိညာဉ် သွေးမြွေကို ဆန့်ကျင်လျက် ကြမ်းတမ်းပြီး ခွန်အားကြီးလှသော နဂါးဟိန်းဟောက်သံတစ်ခုမှာ ယီယွင်၏ ရင်ဘတ်အတွင်းမှ ထွက်ပေါ်လာခဲ့သည်။

"အုန်း........"

ဂျိုတစ်ချောင်းတည်းရှိသော နဂါးကြီးတစ်ကောင်မှာ ယီယွင်၏ နောက်ကွယ်မှ တိုးထွက်လာခဲ့ပြီး ကြားခံဝိညာဉ် သွေးမြွေထံသို့ တည့်တည့် တိုးဝင်သွားခဲ့သည်။ ယီယွင်သည် ကောင်းကင်ဝါးမြို နဂါး ရှုထောင့်ပုံရိပ်ကို ထပ်မံ၍ ဆင့်ခေါ်လိုက်ခြင်း ဖြစ်သည်။

ကောင်းကင်ဝါးမြို နဂါးကြီးမှာ ရှေးဟောင်းခေတ်ဦးကာလမှ ခွန်အားကြီးသော ဖေးတစ်ကောင် ဖြစ်သည်။ ၎င်း၏ ပေါ်လာမှုနှင့် ဆူပွက်လာသော ရှေးဟောင်းဖေး အရှိန်အဝါကို ကြားခံဝိညာဉ် သွေးမြွေက ခံစားလိုက်မိသည်။

ကြားခံဝိညာဉ် သွေးမြွေမှာ လေနက်ချိုင့်ဝှမ်း၏ သတ္တမအဆင့်ရှိ ဝိညာဉ်တစ်ခု ဖြစ်သည်။ ၎င်းသည် အန္တရာယ်ကို ခံစားလိုက်ရပြီး စူးရှသော အသံတစ်ခုနှင့်အတူ အလင်းတန်းတစ်ခုအဖြစ် ပြောင်းလဲကာ မြူနက်များ၏ အနက်ရှိုင်းဆုံး နေရာဆီသို့ တိုးဝင်သွားတော့သည်။

ကြားခံဝိညာဉ် သွေးမြွေမှာ အလွန်ပင် မြန်ဆန်လှသည်။ ကောင်းကင်ဝါးမြို နဂါးကြီး၏ သွေးမျိုးဆက်မှာ အစွမ်းထက်လှသည်ဆိုသော်လည်း အရှိန်အဟုန်ပိုင်းတွင်မူ ကြားခံဝိညာဉ် သွေးမြွေကို မမှီချေ။

ဒါကလည်း ကြားခံဝိညာဉ် သွေးမြွေကို ကိုင်တွယ်ရန် ခက်ခဲရခြင်း၏ အဓိက အကြောင်းရင်း ဖြစ်သည်။ ၎င်းသည် အန္တရာယ်များ နေရာအနှံ့ ပုန်းကွယ်နေသော လေနက်ချိုင့်ဝှမ်း၏ သတ္တမအဆင့်တွင် ရှိနေခြင်း ဖြစ်သည်။ ၎င်း၏ ထိတ်လန့်စရာကောင်းလှသော အရှိန်အဟုန်ကြောင့် ၎င်းကို ဖမ်းယူရန် ကြိုးစားခြင်းမှာ အလွန်အမင်း ခက်ခဲလှသည်။

ကြားခံဝိညာဉ် သွေးမြွေမှာ မြူနက်များ၏ အနက်ရှိုင်းဆုံး နေရာဆီသို့ ပျောက်ကွယ်သွားတော့မည်ကို သတိပြုမိသောအခါ ကောင်းကင်ဝါးမြို နဂါးကြီးသည် ၎င်း၏ ပါးစပ်ကြီးကို ဟလိုက်တော့သည်။

ကောင်းကင်ဝါးမြိုခြင်း။

"ဝူး ဝူး ဝူး... "

၎င်း၏ ပါးစပ်အတွင်း၌ ကြီးမားလှသော မြူနက် ဝဲကရက်ကြီးတစ်ခု ပေါ်လာခဲ့ပြီး ပတ်ဝန်းကျင်ရှိ မြူနက်အားလုံးမှာ ၎င်းထံသို့ စုပ်ယူခြင်း ခံလိုက်ရသည်။

ကောင်းကင်ဝါးမြို နဂါးကြီး၏ ဝါးမြိုခြင်း ဥပဒေသ ၉၀ ရာခိုင်နှုန်းမှာ ကြားခံဝိညာဉ် သွေးမြွေ၏ အပေါ်သို့ ကျရောက်သွားခဲ့သည်။ ချက်ချင်းပင် ကြားခံဝိညာဉ် သွေးမြွေ၏ အရှိန်မှာ အကြီးအကျယ် လျော့နည်းသွားခဲ့ရသည်။

"ရှူး "

ကြားခံဝိညာဉ် သွေးမြွေသည် စူးရှလှသော အော်ဟစ်သံတစ်ခုကို ထုတ်ဖော်လိုက်သည်။ ၎င်းမှာ အလွန်ပင် စူးရှလှသဖြင့် မြှားတစ်စင်းက လူတစ်ယောက်၏ နားစည်အတွင်းသို့ စိုက်ဝင်သွားသကဲ့သို့ ခံစားရစေသည်။

လေနက်ချိုင့်ဝှမ်း၏ စတုတ္ထနှင့် ပဉ္စမအဆင့်တွင် ရှိနေကြသော ကျင့်ကြံသူများသည်ပင် ထိုအသံကို ကြားရသောအခါ သူတို့၏ နားများကို မတတ်နိုင်ဘဲ ပိတ်ထားလိုက်ကြရသည်။

သို့သော် ကြားခံဝိညာဉ် သွေးမြွေ မည်မျှပင် အော်ဟစ်နေပါစေဦးတော့ ၎င်းသည် ကောင်းကင်ဝါးမြို နဂါးကြီး၏ စုပ်ယူမှု အားပြင်းချက်မှ ရုန်းထွက်နိုင်ခြင်း မရှိခဲ့ပေ။

ရှေးဟောင်း ကောင်းကင်ဝါးမြို နဂါးကြီးမှာ ကမ္ဘာကြီးတစ်ခုလုံးကိုပင် ဝါးမြိုနိုင်သည်ဟု လူသိများသည်။ ၎င်း၏ ဝါးမြိုခြင်း ဥပဒေသမှာ ရှေးဟောင်းဖေးများထဲတွင် ထိပ်ဆုံး၌ ရှိနေခဲ့သည်။ ထို့အပြင် သဘာဝတရား၏ အဆင့်အတန်း ကွာဟချက်ကြောင့် ကြားခံဝိညာဉ် သွေးမြွေမှာ ၎င်းကို ဆက်လက်၍ မတောင့်ခံနိုင်တော့ချေ။

ကြားခံဝိညာဉ် သွေးမြွေမှာ မြူနက်များ၏ အနက်ရှိုင်းဆုံး နေရာဆီသို့ မပျံသန်းနိုင်ရုံမျှမက ၎င်းသည် ကောင်းကင်ဝါးမြို နဂါးကြီး၏ ဝါးမြိုခြင်း စွမ်းအားများ၏ ချည်နှောင်ခြင်းကို ခံလိုက်ရသည်။ ၎င်းသည် တစ်ရွေ့ရွေ့နှင့် ကောင်းကင်ဝါးမြို နဂါးကြီး၏ ပါးစပ်ထံသို့ ဆွဲငင်ခြင်း ခံနေရသည်။

ဒါကို မြင်ရသောအခါ လူတို့မှာ တိတ်တဆိတ် ထိတ်လန့်သွားကြရသည်။ ကြားခံဝိညာဉ် သွေးမြွေမှာ ကိုင်တွယ်ရန် မလွယ်ကူကြောင်း သူတို့ သိထားကြသည်။ ၎င်းသည် တစ်ကြိမ်က ကုလော့၏ လက်ဖဝါးကိုပင် ဖောက်ထွက်သွားခဲ့ဖူးပြီး ၎င်း၏ ပြိုင်ဘက်ကင်းလှသော အရှိန်အဟုန်ကြောင့် သတ္တမအဆင့်တွင် ဝိညာဉ်နက် နဂါးကြီး မရှိတော့လျှင်ပင် ကြားခံဝိညာဉ် သွေးမြွေကို ဖမ်းယူရန်မှာ မလွယ်ကူသေးချေ။

ကောင်းကင်ဝါးမြို နဂါးကြီးမှာ ၎င်း၏ အမည်နှင့် လိုက်ဖက်လှသည်။ ၎င်းမှာ တကယ့် ရှေးဟောင်းခေတ်ဦးကာလမှ ခွန်အားကြီးသော ဖေးတစ်ကောင် ဖြစ်သည်။ ၎င်း၏ ရှုထောင့်ပုံရိပ်တစ်ခုတည်းကပင် အလွန် ထိတ်လန့်စရာ ကောင်းလှပြီ ဖြစ်သည်။

"ရှူး "

ကြားခံဝိညာဉ် သွေးမြွေမှာ ရူးသွပ်စွာ အော်ဟစ်နေခဲ့ပြီး ၎င်း၏ ခန္ဓာကိုယ်မှာ ပိုမို နီရဲလာခဲ့ရာ ကြားခံဝိညာဉ် သွေးမြွေ၏ ခန္ဓာကိုယ်တစ်လျှောက် သွေးကြောလမ်းကြောင်းများ ထွက်ပေါ်လာသကဲ့သို့ ရှိနေခဲ့သည်။

အို.....

ယီယွင်၏ စိတ်မှာ ကောင်းကင်ဝါးမြို နဂါးကြီးနှင့် ချိတ်ဆက်ထားခြင်း ဖြစ်သည်။ သူသည် သေးငယ်လှသော ကြားခံဝိညာဉ် သွေးမြွေမှာ တစ်စုံတစ်ခုသော ပြောင်းလဲမှုကို ကြုံတွေ့နေရကြောင်း ရုတ်တရက် ခံစားလိုက်ရသည်။ ၎င်း၏ ခန္ဓာကိုယ်မှာ စွမ်းအင်များကို ဖြည်းဖြည်းချင်း စုဆောင်းနေပြီး ၎င်း၏ နီရဲသော ခန္ဓာကိုယ်ထံမှ ထူးခြားသော အနံ့တစ်ခု ထွက်ပေါ်လာခဲ့သည်။

ထိုအခိုက်အတန့်တွင် ဝိညာဉ်နက် ပုံရိပ်အချို့မှာ ဤအနံ့၏ ဆွဲဆောင်မှုကို ခံလိုက်ရပုံရပြီး သူတို့သည် လေနက်ချိုင့်ဝှမ်း၏ အဋ္ဌမအဆင့်မှနေ၍ သတ္တမအဆင့်ထံသို့ ချဉ်းကပ်လာကြသည်။

ဒါကို မြင်ရသောအခါ ယီယွင်သည် မျက်မှောင်ကြုတ်လိုက်မိသည်။ အဋ္ဌမအဆင့်မှ သတ္တမအဆင့်သို့ ရောက်ရှိလာသော ဝိညာဉ်နက် ပုံရိပ်များသည် အဋ္ဌမအဆင့်ရှိ ပိုမို အားနည်းသော သူများ ဖြစ်နိုင်ချေ များလှသည်။ ခွန်အားပိုင်းအရဆိုလျှင် သူတို့မှာ သတ္တမအဆင့်ကို တစ်ကောင်တည်း စိုးမိုးထားခဲ့သော ဝိညာဉ်နက် နဂါးကြီးကို ယှဉ်နိုင်မည် မဟုတ်ပေ။

အကယ်၍ ဒါက အခြားအချိန်မျိုးဆိုပါက သူတို့မှာ ကောင်းကင်ဝါးမြို နဂါးကြီးအတွက် အစာသာ ဖြစ်လာပေလိမ့်မည်။

သို့သော် ဤအချိန်တွင် အပြောင်းအလဲများ ရှိနေသဖြင့် ဒါက ယီယွင်၏ စိတ်ကို လေးလံသွားစေခဲ့သည်။

သူသည် ဒါကို အမြန်ဆုံး အဆုံးသတ်ရမည် ဖြစ်သည်။

"နဂါးမြီး"

ယီယွင်က အော်ဟစ်လိုက်သည်။

ကောင်းကင်ဝါးမြို နဂါးကြီးသည် ဟိန်းဟောက်လိုက်ပြီး ၎င်း၏ ခန္ဓာကိုယ်မှာ ရုတ်တရက် တိုးထွက်သွားခဲ့ကာ ၎င်း၏ ကြီးမားလှသော နဂါးမြီးမှာ အောက်သို့ ဝှေ့ယမ်း ကျဆင်းလာခဲ့တော့သည်။

"ဒုန်း"

တောင်ပြိုကျလာသကဲ့သို့ အလွန် လေးလံလှသော နဂါးမြီးမှာ ကြားခံဝိညာဉ် သွေးမြွေ၏ ခန္ဓာကိုယ်ပေါ်သို့ ပြင်းထန်စွာ ရိုက်ခတ်လိုက်သည်။ မြွေမှာ ထိုကဲ့သို့သော တိုက်ခိုက်မှုမျိုးကို မတောင့်ခံနိုင်သည်မှာ ထင်ရှားလှသည်။

၎င်း၏ ခန္ဓာကိုယ်မှာ တုန်ခါသွားခဲ့ပြီး ၎င်း၏ အကြေးခွံအချို့မှာ ကျိုးကြေသွားကာ ဒဏ်ရာများထံမှ သွေးများ ပန်းထွက်လာခဲ့သည်။

အဋ္ဌမအဆင့်မှ ရောက်ရှိလာကြသော ဝိညာဉ်နက် ပုံရိပ်များမှာမူ ကောင်းကင်ဝါးမြို နဂါးကြီး၏ တိုက်ခိုက်မှုကြောင့် မှင်တက်သွားကြရသည်။ သူတို့သည် ခဏတာအတွင်း တိုက်ခိုက်ရန် မဝံ့မရဲ ဖြစ်နေခဲ့ကြသည်။

ရှေးဟောင်း ကောင်းကင်ဝါးမြို နဂါးကြီးမှာ တကယ်ကို အစွမ်းထက်လွန်းလှသည်။ ၎င်းမှာ အဆုံးတွင်တော့ တကယ့် ရှေးဟောင်းဖေးတစ်ကောင် ဖြစ်သည်။

၎င်း၏ အရှိန်အဝါသည် လေနက်ချိုင့်ဝှမ်း၏ အသက်သွေးခွန်အားများဖြင့် ဖွဲ့စည်းထားသော ဝိညာဉ်နက်များအပေါ် သဘာဝတရား၏ အဆင့်အတန်း ကွာဟချက်အရ ဖိအားကြီးတစ်ခုကို ပေးစွမ်းနေခဲ့သည်။

ကြည့်ရသလောက်တော့ ကြားခံဝိညာဉ် သွေးမြွေ၏ နောက်ဆုံး ရုန်းကန်မှုမှာ ကောင်းကင်ဝါးမြို နဂါးကြီး၏ လက်ချက်ဖြင့် ရက်ရက်စက်စက် ခြေမွခြင်း ခံလိုက်ရပြီ ဖြစ်သည်။ အကယ်၍ ဒါက ဆက်လက် ဖြစ်ပွားနေမည်ဆိုပါက ကြားခံဝိညာဉ် သွေးမြွေမှာ သေချာပေါက် ယီယွင်၏ အပိုင် ဖြစ်လာပေလိမ့်မည်။

စတုတ္ထနှင့် ပဉ္စမအဆင့်ရှိ လော့မျိုးနွယ်စု တပည့်များသည် ဤမြင်ကွင်းကို မြင်ရသောအခါ အလွန်ပင် မနာလို ဖြစ်နေခဲ့ကြရသည်။ ဆဋ္ဌမအဆင့်တွင် ရှိနေသော ရန်ယွီမှာမူ သူ၏ မျက်လုံးများထဲတွင် အလင်းတန်းတစ်ခု ဖြတ်သန်းသွားခဲ့ရင်း မျက်နှာ ပျက်နေခဲ့ရသည်။

အကယ်၍ ဒါက ဆက်လက် ဖြစ်ပွားနေမည်ဆိုပါက လေနက်ချိုင့်ဝှမ်းရှိ အကျိုးကျေးဇူး အားလုံးမှာ ယီယွင်၏ အပိုင် ဖြစ်သွားမည်ကို ရန်ယွီ ကောင်းစွာ သိရှိထားသည်။

စည်းစိမ်ဥစ္စာဆိုသည်မှာ စွန့်စားခြင်းမှ ရရှိတတ်သောအရာ ဖြစ်သည်။ လေနက်ချိုင့်ဝှမ်း၏ သတ္တမအဆင့်တွင် ကောင်းကင်ဝါးမြို နဂါးကြီးသည် အခြေအနေကို ထိန်းချုပ်ထားနိုင်ခဲ့ပြီဟု ထင်ရသော်လည်း အမှန်တကယ်တွင်မူ ကြားခံဝိညာဉ် သွေးမြွေမှာ မရပ်မနား ရုန်းကန်နေဆဲ ဖြစ်သည်။ အဋ္ဌမအဆင့်မှ ရောက်ရှိလာကြသော ဝိညာဉ်နက် ပုံရိပ်အချို့မှာလည်း လောဘတကြီး စောင့်ကြည့်နေကြသည်။

အခြေအနေ အနည်းငယ်မျှ ပြောင်းလဲသွားရုံနှင့်တင် တကယ့် အနိုင်ရရှိသူကို ဆုံးဖြတ်ပေးနိုင်ပေလိမ့်မည်။

ထိုအချက်ကို တွေးမိသောအခါ ရန်ယွီ၏ မျက်လုံးများထဲတွင် ကောက်ကျစ်လှသော အရိပ်အယောင်တစ်ခု ဖြတ်သန်းသွားခဲ့သည်။ သူသည် ဆဋ္ဌမအဆင့်မှနေ၍ သတ္တမအဆင့်ထံသို့ ခုန်ဆင်းသွားခဲ့တော့သည်။

"အို..... ရန်ယွီလား"

လူတို့မှာ အခြေအနေ ပြောင်းလဲသွားမှုကို မြင်ရသောအခါ အံ့အားသင့်သွားကြရသည်။ လေနက်ချိုင့်ဝှမ်း၏ တိုက်ပွဲမှာ သွေးမျိုးဆက်ချင်း ပြိုင်ဆိုင်ခြင်း ဖြစ်သည်။ ရန်ယွီ၏ ရန်ယီငါး သွေးမျိုးဆက်မှာ ရှေးဟောင်း ကောင်းကင်ဝါးမြို နဂါးကြီးထက် များစွာ ပိုမို အားနည်းလှသည်။

သတ္တမအဆင့်ရှိ တိုက်ပွဲတွင် သူ ဝင်ရောက် စွက်ဖက်နိုင်ရန် မည်သို့မျှ နည်းလမ်းမရှိချေ။ ရန်ယွီသည် အဋ္ဌမအဆင့်မှ ရောက်ရှိလာသော အားအနည်းဆုံး ဝိညာဉ်နက်ပုံရိပ်များကိုပင် ယှဉ်နိုင်မည် မဟုတ်ပေ။

"ရန်ယွီက ဘာလို့ ဆင်းသွားတာလဲ။ သူက အဲဒီ ဝိညာဉ်နက်တွေကို မနိုင်ဘူးလေ၊ ပြီးတော့ သူ ယီယွင်ကို တိုက်ခိုက်လို့လည်း မရဘူး၊ အဲလိုလုပ်ရင် သူက စမ်းသပ်မှုရဲ့ စည်းမျဉ်းတွေကို ချိုးဖောက်ရာ ရောက်သွားလိမ့်မယ်"

လူတိုင်းသည် ဤမြင်ကွင်းကို လွတ်သွားမည် စိုးသဖြင့် မျက်လုံးအစုံကို ပြူး၍ စိုက်ကြည့်နေကြသည်။ ရန်ယွီ ရုတ်တရက် ရောက်ရှိလာခြင်းမှာ အဆုံးအဖြတ် ပေးထားပြီးသား ဖြစ်နေသော အခြေအနေတစ်ခုတွင် အပြောင်းအလဲအသစ်တစ်ခုကို ဖန်တီးပေးလိုက်ခြင်း ဖြစ်လေတော့သည်။

အခန်း ၈၄၉ - ဝင်းပနေသော နဂါးအကြေးခွံများ

ရန်ယွီ သတ္တမအဆင့်သို့ ရုတ်တရက် ခုန်ဆင်းလာခြင်းကို ယီယွင် သေချာပေါက် သတိပြုမိလိုက်သည်။ ဤအခိုက်အတန့်တွင် သတ္တမအဆင့်၌ မုန်တိုင်းတစ်ခု တိုက်ခတ်နေပြီး ၎င်းမှာ ယီယွင်အနေဖြင့် ကြားခံဝိညာဉ် သွေးမြွေကို ဖမ်းယူရန်အတွက် အရေးကြီးဆုံးသော အချိန် ဖြစ်နေခဲ့သည်။

သို့သော် ရန်ယွီမှာ ရုတ်တရက် ပေါ်လာခဲ့ပြီး သူ မြေပြင်ပေါ်သို့ ဆင်းသက်လိုက်သည့် အခိုက်အတန့်မှာပင် ကြားခံဝိညာဉ် သွေးမြွေထံသို့ တည့်တည့် တိုးဝင်သွားခဲ့ခြင်း ဖြစ်သည်။

"အို"

ယီယွင်သည် အံ့အားသင့်သွားခဲ့ရသည်။ ရန်ယွီသည် ဤအချိန်တွင် ကြားခံဝိညာဉ် သွေးမြွေထံသို့ တိုးဝင်သွားခြင်းမှာ ကျားပါးစပ်အတွင်းမှ အစာကို လုယူရန် ကြိုးစားခြင်း ဖြစ်နိုင်ပါ့မလား။

လေနက်ချိုင့်ဝှမ်းတွင် ဝိညာဉ်နက်ပုံရိပ်များကို တိုက်ခိုက်ရာ၌ ကမ္ဘာမြေစွမ်းအင် များမှာ အသုံးမဝင်ပေ။ ဒါက သွေးမျိုးဆက်နှင့် ခန္ဓာကိုယ် ခွန်အားချင်း ယှဉ်ပြိုင်ရခြင်း ဖြစ်သည်။

ကမ္ဘာမြေစွမ်းအင် ပိုင်းတွင်မူ ရန်ယွီ၌ သူ၏ ကောင်းကင်တက်လှမ်းခြင်းအဆင့်ကျင့်ကြံခြင်း ရှိနေသော်လည်း သွေးမျိုးဆက်ပိုင်းသို့ ရောက်ရှိလာသောအခါ သူသည် ကောင်းကင်ဝါးမြို နဂါးကြီးကို မည်သို့မျှ ယှဉ်နိုင်ခြင်း မရှိချေ။

မျက်စိတစ်မှိတ်အတွင်းမှာပင် ရန်ယွီသည် ကြားခံဝိညာဉ် သွေးမြွေ၏ အနီးအနားသို့ ရောက်ရှိသွားခဲ့ပြီ ဖြစ်သည်။ ထိုအခိုက်အတန့်တွင်မှ လူတို့သည် သူ၏ ပန်းတိုင်မှာ ကြားခံဝိညာဉ် သွေးမြွေ မဟုတ်ဘဲ လေနက်ချိုင့်ဝှမ်း၏ အဋ္ဌမအဆင့်မှ သတ္တမအဆင့်သို့ ရောက်ရှိလာကြသော ဝိညာဉ်နက် ပုံရိပ်အချို့ ဖြစ်နေကြောင်း သဘောပေါက်လိုက်ကြတော့သည်။

ဤဝိညာဉ်နက် ပုံရိပ်များသည် သွေးဆာနေကြသူများ ဖြစ်ကြသည်။ သူတို့သည် ကောင်းကင်ဝါးမြို နဂါးကြီးကို ကိုင်တွယ်ရန်အတွက် ကြားခံဝိညာဉ် သွေးမြွေ၏ ဆင့်ခေါ်ခြင်းကို ခံလိုက်ရခြင်း ဖြစ်သည်။

သို့သော် သူတို့သည်လည်း ကောင်းကင်ဝါးမြို နဂါးကြီးကြောင့် ထိတ်လန့်နေကြသဖြင့် ရမ်းသန်း၍ မလှုပ်ရှားရဲ ဖြစ်နေခဲ့ကြသည်။ အခု ရန်ယွီက သူတို့ထံသို့ တိုးဝင်လာသောအခါ သူတို့သည် သူတို့၏ ပါးစပ်ကြီးများကို ဟလိုက်ကြပြီး ရန်ယွီကို ကိုက်ခဲရန် ပြင်ဆင်လိုက်ကြတော့သည်။

သူတို့သည် ရန်ယွီကို အရင်ဆုံး ဝါးမြိုပစ်ကြမည် ဖြစ်သည်။

ရှူး ရှူး ရှူး......

ဝိညာဉ်နက် ပုံရိပ်များသည် အတူတကွ တိုးဝင်သွားကြသည်။ ဝိညာဉ်နက်များ၏ ဝန်းရံခြင်းကို ခံရတော့မည့် အခိုက်အတန့်တွင်ပင် ရန်ယွီ၏ မျက်နှာတွင် ရူးသွပ်လှသော မျက်နှာထားတစ်ခု ပေါ်လာခဲ့သည်။

ဟိုက် ယား..........

ရန်ယွီသည် ဟိန်းဟောက်လိုက်ပြီး သူ၏ နောက်ကွယ်တွင် ရန်ယီငါး သွေးမျိုးဆက် ရှုထောင့်ပုံရိပ် ပေါ်လာခဲ့သည်။ သူ၏ အသက်သွေးခွန်အားမှာ ဆူပွက်လာခဲ့ပြီး လျင်မြန်စွာ တိုးပွားလာခဲ့သည်။

"ဒီရန်ယွီကတော့"

ဤမြင်ကွင်းကို မြင်ရသောအခါ လူတိုင်းမှာ အံ့အားသင့်သွားကြရသည်။ ဤဝိညာဉ်နက် ပုံရိပ်များသည် သတ္တမအဆင့်ကို တစ်ကောင်တည်း စိုးမိုးထားခဲ့သော ဝိညာဉ်နက် နဂါးကြီးကို မယှဉ်နိုင်ကြသော်လည်း ရန်ယွီအနေဖြင့်မူ သူတို့ကို ယှဉ်နိုင်ရန် လမ်းမရှိသေးချေ။

လူတို့က ရန်ယွီသည် ကြားခံဝိညာဉ် သွေးမြွေကို ဖမ်းယူရန်အတွက် အသည်းအသန် ရုန်းကန်နေခြင်း ဖြစ်သည်ဟု ထင်မှတ်နေကြစဉ်မှာပင် ရန်ယွီသည် ရုတ်တရက် နောက်သို့ ဆုတ်လိုက်ပြီး လှည့်ပြေးပါလေတော့သည်။

ဝိညာဉ်နက် ပုံရိပ်အချို့မှာမူ ရန်ယွီ၏နောက်သို့ မလွှတ်တမ်း လိုက်လံ မောင်းနှင်နေကြသည်။

ကောင်းကင်ဝါးမြို နဂါးကြီးမှာ သူတို့ ကိုင်တွယ်နိုင်သော တည်ရှိမှုမျိုး မဟုတ်သော်လည်း ရန်ယွီ ဆင့်ခေါ်ထားသော ရန်ယီငါး သွေးမျိုးဆက်မှာမူ သူတို့ လောဘတက်စရာ အရာတစ်ခု ဖြစ်သည်။

အကယ်၍ သူတို့သည် ရန်ယီငါး သွေးမျိုးဆက်ကို ဝါးမြိုနိုင်မည်ဆိုပါက သူတို့၏ ခွန်အားများကိုလည်း မြှင့်တင်နိုင်ပေလိမ့်မည်။

ရန်ယွီသည် အလွန်ပင် မြန်ဆန်စွာ ပျံသန်းနေခဲ့သည်။ ယီယွင်က ဝိညာဉ်နက် နဂါးကြီးကို သတ်ဖြတ်လိုက်ပြီး ဖြစ်သဖြင့် သတ္တမအဆင့်ရှိ အဟန့်အတားများမှာ များစွာ လျော့နည်းသွားခဲ့ပြီ ဖြစ်သည်။ ရန်ယွီသည် ပေအနည်းငယ်မျှ ပြေးသွားပြီးနောက် ရုတ်တရက် လှည့်လိုက်ပြီး ယီယွင်ရှိရာဆီသို့ ဦးတည် ပြေးလွှားသွားတော့သည်။

အို......

လူတိုင်းသည် ရုတ်တရက် သဘောပေါက်သွားခဲ့ကြပြီး ရန်ယွီ၏ အကြံအစည်ကို နားလည်သွားကြတော့သည်။

ရန်ယွီသည် ဘေးအန္တရာယ်ကို လွှဲပြောင်းရန် ကြိုးစားနေခြင်း ဖြစ်သည်။

ယီယွင်မှာ အစွမ်းထက်လှသည်ဆိုသော်လည်း သူ၏ ခွန်အားမှာ အမှန်တကယ်တော့ ရှေးဟောင်း ကောင်းကင်ဝါးမြို နဂါး သွေးမျိုးဆက်ထံမှ လာခြင်း ဖြစ်သည်။ ယီယွင်၏ ကိုယ်ပိုင် ခန္ဓာကိုယ်ကော။ ဒါက အလွန်ပင် အားနည်းလွန်းလှသည်။

ယီယွင်သည် စတုတ္ထနှင့် ပဉ္စမအဆင့်ရှိ ဖိအားများကို တောင့်ခံရန်အတွက်ပင် သူ၏ ဗဟိုချက်ရှုထောင့်ပုံရိပ်များကို မှီခိုခဲ့ရခြင်း ဖြစ်ရာ သတ္တမအဆင့်အတွက်ဆိုလျှင် ပြောနေစရာပင် မလိုတော့ချေ။

ကောင်းကင်ဝါးမြို နဂါး သွေးမျိုးဆက်သာ မရှိပါက ယီယွင်မှာ ဘာမှမဟုတ်တော့ပေ။

ယခင်က ကောင်းကင်ဝါးမြို နဂါး သွေးမျိုးဆက်၏ ခြိမ်းခြောက်မှုကြောင့် ဝိညာဉ်နက် ပုံရိပ်များသည် ယီယွင်၏အနီးသို့ မချဉ်းကပ်ရဲ ဖြစ်နေခဲ့ကြခြင်း ဖြစ်ပြီး ယခုအခါ ကောင်းကင်ဝါးမြို နဂါးကြီးမှာ ကြားခံဝိညာဉ် သွေးမြွေနှင့် တိုက်ပွဲ ဖြစ်ပွားနေခဲ့ပြီ ဖြစ်ရာ ဒါက ယီယွင်ကို ပစ်မှတ် ဖြစ်သွားစေခဲ့ခြင်း ဖြစ်သည်။

ယီယွင်၏ ကိုယ်ပိုင် ခန္ဓာကိုယ်မှာ သူ၏ အကြီးမားဆုံးသော အားနည်းချက် ဖြစ်နေခဲ့သည်။

"ဒီရန်ယွီက တကယ်ကို ကောက်ကျစ်လွန်းတာပဲ" ဟု ဖီးနစ်ပင်ပြည်နယ်မှ တပည့်တစ်ဦးက ပြောလိုက်သည်။ ရန်ယွီသည် အခြေအနေကို အခွင့်ကောင်းယူပြီး အမြတ်ထုတ်ရန် အကြံမရှိဘဲ ဒဏ်ရာပေါ် ဆားဖြူးရန် ကြိုးစားနေခြင်း ဖြစ်သည်။

သူ့အတွက် အခြေအနေကို အခွင့်ကောင်းယူပြီး အမြတ်ထုတ်ရန်မှာ အလွန်အမင်း ခက်ခဲလှသည်။

သို့သော် သူက ဖျက်လိုဖျက်ဆီး လုပ်ရန်အတွက်ဆိုလျှင်မူ အရာအားလုံးမှာ များစွာ ပိုမို လွယ်ကူသွားပေလိမ့်မည်။ သူသည် ယီယွင်ကို ပြင်းထန်သော ဒဏ်ရာများ ရရှိအောင် (သို့မဟုတ်) သေဆုံးအောင် လုပ်နိုင်သရွေ့ ယီယွင် ထိန်းချုပ်ထားသော ရှေးဟောင်း ကောင်းကင်ဝါးမြို နဂါးကြီးသည်လည်း ၎င်း၏ လှုပ်ရှားနိုင်စွမ်းများကို ဆုံးရှုံးသွားပေလိမ့်မည်ဖြစ်ရာ မည်သည့် ခြိမ်းခြောက်မှုမျိုးကိုမျှ ပေးနိုင်တော့မည် မဟုတ်ပေ။

ထိုသို့ဆိုလျှင် လေနက်ချိုင့်ဝှမ်းရှိ အခွင့်အရေးများကို ရန်ယွီတို့တစ်သိုက်က စိတ်ကြိုက် စိုးမိုးသွားနိုင်မည် မဟုတ်ပါလား။ သူတို့သည် ကြားခံဝိညာဉ် သွေးမြွေကို ဖြည်းဖြည်းချင်း ဖမ်းယူနိုင်ကြပေလိမ့်မည်။

"မင်းတို့ ဘာတွေ ပြောနေတာလဲ။ ဘာလဲ... ကောက်ကျစ်တယ် ဟုတ်လား။ ဒါက တကယ်တော့ အလိမ္မာဆုံး မဟာဗျူဟာပဲ။ အခြားလူတွေရဲ့ ခွန်အားကို အသုံးချပြီး အခြေခံ အကျဆုံး ပြဿနာကို ဖြေရှင်းတာပဲ။ စီနီယာအစ်ကို ရန်ရဲ့ အကွက်က ယီယွင်ရဲ့ အားနည်းချက်ကို တည့်တည့် နှက်လိုက်တာပဲ။

ဒါတင်မကသေးဘူး... စီနီယာအစ်ကို ရန်က ယီယွင်ကို တိုက်ရိုက် တိုက်ခိုက်မှာ မဟုတ်တဲ့အတွက် စမ်းသပ်မှုရဲ့ စည်းမျဉ်းတွေကို ချိုးဖောက်ရာလည်း မရောက်ဘူး။ ဒါက တကယ့် ပြတ်သားပြီး ရည်မှန်းချက်ကြီးတဲ့ လူတစ်ယောက်ရဲ့ ပုံစံအစစ်ပဲ။ ယီယွင်တော့ သောပြီ... ဟားဟားဟား" လီယာ၏ ရူးသွပ်လှသော ရယ်မောသံကြီး ထွက်ပေါ်လာခဲ့သည်။

ယီယွင် ဤမျှအထိ အောင်မြင်မှု လှိုင်းလုံးများကို စီးနင်းနေခဲ့သည်ကို မြင်တွေ့ခဲ့ရပြီးနောက် ယခု ယီယွင် ဒုက္ခရောက်တော့မည့်အချိန်တွင် သူ မည်သို့လျှင် လှောင်ပြောင်ခြင်း မပြုဘဲ နေနိုင်ပါမည်နည်း။

မျက်စိတစ်မှိတ်အတွင်းမှာပင် ရန်ယွီသည် ယီယွင်၏ ရှေ့မှောက်သို့ ရောက်ရှိလာခဲ့ပြီ ဖြစ်သည်။

ယီယွင်သည် ရန်ယွီ၏ နှုတ်ခမ်းထက်ရှိ ကောက်ကျစ်လှသော အပြုံးကြီးကို ရှင်းလင်းစွာ မြင်တွေ့လိုက်ရသည်။

ရန်ယွီ လှည့်ထွက်ပြီး ထွက်ပြေးရန် ပြင်ဆင်လိုက်သည့် အခိုက်အတန့်မှာပင် ယီယွင်သည် ရန်ယွီ၏ ရည်ရွယ်ချက်ကို ခန့်မှန်းမိပြီး ဖြစ်သည်။ သူ့ကို သတ်ဖြတ်ရန်အတွက် ဝိညာဉ်နက် ပုံရိပ်များကို အသုံးပြုခြင်းအားဖြင့် စမ်းသပ်မှုတွင် ပါဝင်နေကြသော အခြားတပည့်များကို မတိုက်ခိုက်ရဟူသော စည်းမျဉ်းကို ချိုးဖောက်ခြင်းမှ ရှောင်လွှဲနိုင်မည် ဖြစ်ရာ ဒါက အမှန်တကယ်ပင် အကောင်းဆုံးသော နည်းလမ်း ဖြစ်သည်။

"ယီယွင်... ငရဲကို သွားလိုက်စမ်း။ အပြစ်တင်စရာ ရှိရင် မင်းရဲ့ ခန္ဓာကိုယ် အားနည်းတာကိုပဲ အပြစ်တင်လိုက်တော့... ဟားဟားဟား" ရန်ယွီက အော်ဟစ်လိုက်သည်။

သူသည် ယီယွင်နှင့် မီတာအနည်းငယ်မျှသာ ကွာဝေးတော့သော အချိန်တွင် ရုတ်တရက် ခုန်တက်လိုက်ပြီး ယီယွင်၏အပေါ်မှနေ၍ ဖြတ်ကျော် ခုန်လွှားသွားခဲ့တော့သည်။

"ဂျူနီယာမောင်လေး ယီ"

ဤမြင်ကွင်းကို မြင်ရသောအခါ လော့ဖုန်းလင်မှာ မအော်ဘဲ မနေနိုင်တော့ချေ။

ယီယွင်၏ စိတ်မှာမူ တည်ငြိမ်နေခဲ့သည်။ သူ၏ စိတ်စွမ်းအင်မှာ ရန်ယွီ သူ၏ထံသို့ တိုးဝင်လာခဲ့သည့် အခိုက်အတန့်ကတည်းက ကောင်းကင်ဝါးမြို နဂါးကြီးနှင့် ချိတ်ဆက်ထားပြီး ဖြစ်သည်။ ထိုသို့ဖြင့် သူသည် သူ၏ အသက်သွေးခွန်အား အားလုံးကို ပေါက်ကွဲစေလိုက်တော့သည်။

ဒုန်း......

ကောင်းကင်ဝါးမြို နဂါး ရှုထောင့်ပုံရိပ်မှာ မြူနက်လုံးကြီးတစ်ခုအဖြစ် ရုတ်တရက် ပေါက်ကွဲသွားခဲ့သည်။

တစ်ချိန်တည်းမှာပင် ရန်ယွီ၏နောက်သို့ လိုက်ပါလာကြသော ဝိညာဉ်နက် ပုံရိပ်များသည်လည်း ရှေ့သို့ တိုးဝင်လာကြသည်။ သူတို့သည် ယီယွင်ကို သတိပြုမိလိုက်ကြပြီး လှည့်ပတ်နေသော လေနက်ကြီးများကို စောင့်ကြည့်နေရင်း ရှောင်တိမ်းရန် မည်သည့် ရည်ရွယ်ချက်မျှ မရှိကြပေ။

သူတို့သည် ယီယွင်၏ အသက်သွေးခွန်အားများကို မျက်စိတစ်မှိတ်အတွင်း ဝါးမြိုပစ်နိုင်တော့မည့်အတိုင်း ဖြစ်နေခဲ့သည်။

"လာခဲ့စမ်း"

ယီယွင်၏ ကျယ်လောင်လှသော အော်ဟစ်သံနှင့်အတူ .....

ဒုန်း.........

ကောင်းကင်ဝါးမြို နဂါးကြီး ပေါက်ကွဲသွားရာမှ ထွက်ပေါ်လာသော မြူနက်များသည် ကောင်းကင်တံတားကြီးတစ်ခုကဲ့သို့ လေထုကို ဖြတ်သန်းသွားခဲ့သည်။ ၎င်းမှာ ကောင်းကင်ယံထက်မှ ကျဆင်းလာသော မြူနက် ရေတံခွန်ကြီးတစ်ခုကဲ့သို့ ယီယွင်၏ ခန္ဓာကိုယ်အတွင်းသို့ တည့်တည့် တိုးဝင်သွားခဲ့တော့သည်။

ထိုအခိုက်အတန့်တွင် ယီယွင်၏ ခန္ဓာကိုယ်အတွင်းမှ ပေါက်ကွဲသံများ ဆက်တိုက် ထွက်ပေါ်လာခဲ့သည်။ ကောင်းကင်ဝါးမြို နဂါးကြီး၏ မြူနက်များသည် ယီယွင်၏ ခန္ဓာကိုယ်ပေါ်တွင် စုစည်းလာခဲ့ပြီး လျင်မြန်စွာ ပွားများလာသော နဂါးအကြေးခွံနက်များအဖြစ် ပုံဆောင်လာခဲ့သည်။

နဂါးအကြေးခွံများသည် ယီယွင်၏ ပါးပြင်များထက်တွင် စတင် ပေါ်ပေါက်လာခဲ့ပြီး သူ၏ ခန္ဓာကိုယ်တစ်ခုလုံးကို ဖုံးလွှမ်းသွားခဲ့သည်။

ချက်ချင်းပင် ယီယွင်၏ ခန္ဓာကိုယ်မှာ နက်မှောင်သော နတ်ဘုရားအလင်းတန်းများဖြင့် ဝင်းပလာခဲ့သည်။ ကြမ်းတမ်းပြီး ခွန်အားကြီးလှသော အရှိန်အဝါတစ်ခုမှာ ယီယွင်၏ ခန္ဓာကိုယ်အတွင်းမှ ထွက်ပေါ်လာခဲ့သည်။

၎င်းမှာ ရှေးဦးခေတ်က ကမ္ဘာကြီးတစ်ခုလုံးကို ယီယွင်၏ ခန္ဓာကိုယ်အတွင်း၌ ချိတ်ပိတ်ထားသကဲ့သို့ ခံစားရစေပြီး အခု ထိုကမ္ဘာကြီးကို ဖွင့်လှစ်လိုက်ခြင်း ဖြစ်သည်။ ရှေးဟောင်းဖေးတစ်ကောင်၏ အရှိန်အဝါမှာ မုန်တိုင်းတစ်ခုကဲ့သို့ အရပ်မျက်နှာ အနှံ့အပြားသို့ ပျံ့နှံ့သွားခဲ့တော့သည်။

ဒါက ဘာလဲ။

လေနက်ချိုင့်ဝှမ်းရှိ လော့မျိုးနွယ်စု တပည့်အားလုံးမှာ ထိတ်လန့် ဆွံ့အသွားကြရသည်။

ယီယွင်၏ ခန္ဓာကိုယ်အတွင်းမှ ထွက်ပေါ်လာသော အရှိန်အဝါသည်... သူတို့၏ ဖေးမျိုးနွယ်စု သွေးမျိုးဆက်အားလုံးကို လှုပ်ခတ်သွားစေခဲ့သည်။ ၎င်းမှာ ယီယွင်သည် ထိုအခိုက်အတန့်တွင် ရှေးဦးခေတ်မှ ဖေးဘုရင် တစ်ပါးအဖြစ် ပြောင်းလဲသွားသကဲ့သို့ ခံစားရစေသည်။ သူတို့မှာ ထိတ်လန့် အံ့သြနေကြရသည်။

ဒါက... ယီယွင်က ရှေးဟောင်းဖေး သွေးမျိုးဆက်နဲ့ ပေါင်းစပ်သွားတာ ဖြစ်နိုင်ပါ့မလား။

လူတိုင်းသည် မယုံကြည်နိုင်လောက်အောင် ဖြစ်နေကြသဖြင့် မျက်လုံးအစုံကို ပြူးပြီး စိုက်ကြည့်နေကြသည်။

ဖေးမျိုးနွယ်စု သွေးမျိုးဆက်ကို ဆင့်ခေါ်ပြီးနောက် ထိုသွေးမျိုးဆက်နှင့် ပြန်လည် ပေါင်းစပ်ခြင်းမှာ မဆန်းလှပေ။ ယခင်က လော့ထျန်သည်လည်း ထိုသို့ ပြုလုပ်ခဲ့ဖူးသည်၊ သို့သော် လော့ထျန်၏ ပေါင်းစပ်မှုမှာ ကောင်းကင်ဘုံဖေး သွေးမျိုးဆက်နှင့် ဖြစ်ပြီး ယီယွင်၏ ပေါင်းစပ်မှုမှာမူ ရှေးဟောင်းဖေး သွေးမျိုးဆက်နှင့် ဖြစ်နေခဲ့ခြင်း ဖြစ်သည်။

လော့ထျန် ပေါင်းစပ်ပြီးနောက်တွင် သူ၏ ခန္ဓာကိုယ်မှာ ဧရာမ နတ်ဆိုးမျောက်ဝံကြီး၏ အသွင်သဏ္ဌာန် ပေါ်လာခဲ့သော်လည်း ယီယွင်အတွက်မူ သူ ပေါင်းစပ်ပြီးနောက်တွင် သူ၏ ခန္ဓာကိုယ်တစ်ခုလုံးမှာ နဂါးအကြေးခွံများဖြင့် ဖုံးလွှမ်းသွားခဲ့ခြင်း ဖြစ်သည်။

"ပျက်စီးစမ်း"

သူ့ထံသို့ တိုးဝင်လာကြသော ဝိညာဉ်နက် ပုံရိပ်များကို ကြည့်ရင်း ယီယွင်သည် ဟိန်းဟောက်လိုက်ပြီး ရုတ်တရက် လက်သီးတစ်ချက် လွှဲရိုက်လိုက်တော့သည်။

ထိုလက်သီးချက်၏ ခွန်အားမှာ နတ်ဘုရားတောင်ကြီးတစ်လုံးကို သေးငယ်သော အထုပ်လေးတစ်ခုအဖြစ် ချုံ့ထားသကဲ့သို့ ခံစားရစေသည်။ ဟင်းလင်းပြင်မှာ သိမ်မွေ့စွာ တုန်ခါသွားခဲ့ပြီး ယီယွင်၏ ရှေ့မှောက်ရှိ ဝိညာဉ်နက် ပုံရိပ်များသည် ယီယွင်၏ လက်သီးတစ်ချက်တည်းဖြင့်တင် ဆွဲဖြတ်ခြင်း ခံလိုက်ရသည်။

မြူနက်အမြောက်အမြောက်မှာ ပေါက်ကွဲသွားခဲ့ပြီး အရပ်မျက်နှာ အနှံ့အပြားသို့ လွင့်စင်သွားခဲ့တော့သည်။

အဋ္ဌမအဆင့်မှ ရောက်ရှိလာကြသော ဝိညာဉ်နက် ပုံရိပ်အချို့မှာ ယီယွင်၏ လက်သီးတစ်ချက်တည်းဖြင့်တင် အကုန်လုံး ပျက်စီးသွားခဲ့ရပြီ ဖြစ်သည်။

ဤမြင်ကွင်းကို မြင်ရသောအခါ ရှိနေကြသော လော့မျိုးနွယ်စု တပည့်အားလုံးမှာ ပါးစပ်အစုံ ပွင့်သွားခဲ့ကြရပြီး ပြန်ပိတ်ရန်ပင် ခက်ခဲနေခဲ့ကြသည်။

ခုနကတင်... ယီယွင်၏ ခန္ဓာကိုယ်မှာ အလွန်ပင် အားနည်းလှသည်ဟု ပြောနေကြသည် မဟုတ်ပါလား။

အခန်း ၈၅၀ - ပိတ်မိသွားသော ရန်ယီငါး

"ဝိညာဉ်နက် ပုံရိပ်လေးခုကို လက်သီးတစ်ချက်တည်းနဲ့ အကုန်ချေမှုန်းပစ်လိုက်တာ... သူက လက်သီးသက်သက်ကိုပဲ သုံးသွားတာနော်"

လေနက်ချိုင့်ဝှမ်း၏ စတုတ္ထနှင့် ပဉ္စမအဆင့်များတွင် ရှိနေကြသော မီးလျှံတိမ်တိုက်ပြည်နယ်နှင့် ဖီးနစ်ပြည်နယ်မှ တပည့်များသည် ဆွံ့အမှင်တက်နေကြရသည်။ ယခင်က သူတို့သည် ယီယွင်၏ အားနည်းသော ခန္ဓာကိုယ်ကိုသာ အာရုံစိုက်ပြီး သူသည် သတ္တမအဆင့်သို့ ရောက်ရှိရန်အတွက် သူ၏ ဗဟိုချက်ရှုထောင့်ပုံရိပ်နှင့် ရှေးဟောင်းဖေး သွေးမျိုးဆက်ကိုသာ မှီခိုခဲ့ရခြင်း ဖြစ်ကြောင်း ပြောဆိုခဲ့ကြသည်။

အကယ်၍ သန့်စင် ခန္ဓာကိုယ်ချင်း ယှဉ်ပြိုင်ရမည်ဆိုပါက ယီယွင်သည် လေနက်ချိုင့်ဝှမ်း၏ ဒုတိယ (သို့မဟုတ်) တတိယအဆင့်တွင်ပင် ခြေကုပ်မြဲအောင် လုပ်နိုင်လိမ့်မည် မဟုတ်ဟု ယူဆခဲ့ကြသည်။

သို့သော် အခုတော့ ယီယွင်၏ လက်သီးတစ်ချက်မှာ ကောင်းကင်ဘုံကို တုန်ခါစေလောက်အောင် အစွမ်းထက်ပြီး ပြတ်သားလှသည်။ ဤလူများသည် ထိုလက်သီးချက်၏ တိုက်ရိုက်ပစ်မှတ် မဟုတ်ခဲ့ကြသော်လည်း သူတို့၏ ရှေ့မှောက်တွင် ထိုလက်သီးချက်၏ ဖိအားကို ခံစားနေကြရဆဲ ဖြစ်သည်။

"ဒါက အမှန်တော့ ယီယွင်ရဲ့ ကိုယ်ပိုင် ခန္ဓာကိုယ် ခွန်အားမဟုတ်ဘူး။ ယီယွင်ရဲ့ ခန္ဓာကိုယ်က အခုထိ အရမ်းအားနည်းနေတုန်းပဲ၊ ဒါပေမဲ့ သူက ကောင်းကင်ဝါးမြို နဂါး သွေးမျိုးဆက်ကို ပြန်လည်ဆင့်ခေါ်ပြီး သူ့ခန္ဓာကိုယ်နဲ့ ပေါင်းစပ်လိုက်တာ။

ဒီလိုအခြေအနေမျိုးမှာ ကောင်းကင်ဝါးမြို နဂါးကြီးရဲ့ အသက်သွေးခွန်အားက သူ့ရဲ့ အသက်သွေးခွန်အား ဖြစ်သွားတာပဲ" ဟု ဖီးနစ်ပင်ပြည်နယ်မှ တပည့်တစ်ဦးက ပြောလိုက်သည်။

သူ၏ လေသံမှာ အံ့အားသင့်မှုများဖြင့် ပြည့်နှက်နေခဲ့ရုံမျှမက ယီယွင်၏ နောက်တွင် ပြတ်ကျန်ရစ်ခဲ့ရသည့်အတွက် နောင်တရမှုများလည်း စွက်ဖက်နေခဲ့သည်။

ပတ်ဝန်းကျင်ရှိ လော့မျိုးနွယ်စု တပည့်များသည် ဤစကားကို ကြားရသောအခါ စိတ်အခြေအနေ အမျိုးမျိုး ဖြစ်ပေါ်နေခဲ့ကြသည်။ ရှေးဟောင်းဖေး သွေးမျိုးဆက်ကို ဆင့်ခေါ်နိုင်ခြင်းကတင် လုံလောက်အောင် ကောင်းမွန်လှပြီ ဖြစ်သော်လည်း သူက ထိုအရာနှင့်ပင် ပေါင်းစပ်နိုင်ခဲ့သေးသည်။

ထိုသို့ဆိုလျှင် ယီယွင်၏ ခန္ဓာကိုယ် အားနည်းပါသည်ဟု မည်သူက ဆက်လက် ပြောဝံ့ပါဦးမည်နည်း။

သူသည် ခန္ဓာကိုယ် အားနည်းလှသဖြင့် ထိုအရာမှာ သူ၏ အားနည်းချက် ဖြစ်လာလိမ့်မည်ဟု လှောင်ပြောင်ခြင်း ခံခဲ့ရသည်။ သို့သော် အခု ယီယွင်က ကောင်းကင်ဝါးမြို နဂါးကြီးနှင့် ပေါင်းစပ်မှုကို အောင်မြင်စွာ ပြုလုပ်လိုက်ပြီးနောက်တွင်မူ သူသည် ရှေးဟောင်း ကောင်းကင်ဝါးမြို နဂါးကြီး၏ အသက်သွေးခွန်အားကို မျှဝေခံစားနိုင်ပြီ ဖြစ်သည်။

ထိုစွမ်းရည်မှာ အလွန်ပင် အားကျစရာ ကောင်းလှသည်။

ယီယွင်သည် ရှေးဟောင်းဖေး သွေးမျိုးဆက်ကို လေးရက်အတွင်း လုံးဝ စုပ်ယူနိုင်ခဲ့ခြင်း ဖြစ်ပြီး အခြားရက်များကိုပါ ထည့်တွက်လျှင်ပင် လဝက်ပင် မပြည့်သေးချေ ။

လူသားတစ်ယောက်က ရှေးဟောင်းဖေးအရိုးတစ်ခုကို ဤမျှအထိ လုံးဝဥဿုံ စုပ်ယူနိုင်ရန်အတွက် လဝက်ပင်မပြည့်သော အချိန်ကို အသုံးပြုခဲ့သည် တဲ့လား။

အခု ယီယွင်၏ ရှေ့မှောက်တွင် သူတို့သည် သူ၏ လူသားဟူသော အဆင့်အတန်းကိုပင် ဆက်လက် လှောင်ပြောင်ရန် စိတ်ကူးမရှိကြတော့ချေ။

အဘယ်ကြောင့်ဆိုသော် မိမိကိုယ်ကိုယ် ဖေးမျိုးနွယ်စုဝင်များဟု ခေါ်ဆိုရန်ပင် သူတို့ ရှက်ရွံ့နေကြရသောကြောင့် ဖြစ်သည်။ သွေးမျိုးဆက် သိပ်သည်းဆပိုင်းတွင် ဖြစ်စေ၊ ရှေးဟောင်းဖေးအရိုးများကို စုပ်ယူနိုင်မှုပိုင်းတွင် ဖြစ်စေ သူတို့မှာ ယီယွင်ကို များစွာ မမှီကြရာ သူတို့အနေဖြင့် ဖေးမျိုးနွယ်စုဝင် ဖြစ်ရသည်ကို မည်သို့လျှင် ဆက်လက် ဂုဏ်ယူနိုင်ပါမည်နည်း။

ဤအခိုက်အတန့်တွင် စိတ်ပိုင်းဆိုင်ရာ အကြီးမားဆုံး ပြိုလဲမှုကို ကြုံတွေ့နေရသူမှာ ရန်ယွီ ဖြစ်သည်။ သူသည် ယီယွင်နှင့် ကြားခံဝိညာဉ် သွေးမြွေတို့ ရုန်းကန်နေရသည့် အချိန်ကို အခွင့်ကောင်းယူကာ ပြတ်သားစွာ လှုပ်ရှားခဲ့ခြင်း ဖြစ်သည်။

သူသည် အဋ္ဌမအဆင့်ရှိ ဝိညာဉ်နက် ပုံရိပ်များကို ယီယွင်ရှိရာဆီသို့ ဆွဲခေါ်သွားခဲ့ပြီး စမ်းသပ်မှုတွင် တစ်ယောက်ကိုတစ်ယောက် မတိုက်ခိုက်ရဟူသော စည်းမျဉ်းကို မချိုးဖောက်ဘဲ ယီယွင်ကို သေရေးရှင်ရေး အန္တရာယ်အတွင်းသို့ တွန်းပို့နိုင်ခဲ့သည်။ ဒါက တကယ့် အကွက်ကောင်းတစ်ခုဟု သတ်မှတ်နိုင်ခဲ့သည်။

သို့သော် ထိုအရာပြီးနောက် ချက်ချင်းမှာပင် ယီယွင်က ကောင်းကင်ဝါးမြို နဂါး သွေးမျိုးဆက်နှင့် ပေါင်းစပ်သွားခဲ့သည်။ သူ၏ လက်သီးတစ်ချက်တည်းနှင့်တင် ရန်ယွီ၏ ကောက်ကျစ်လှသော အကြံအစည်များကို တစ်စစီ ခြေမွပစ်လိုက်ခြင်း ဖြစ်သည်။ ဒါက ယခင်က စီစဉ်ခဲ့သမျှ အားလုံးကို ပြက်လုံးတစ်ခုအဖြစ် ပြောင်းလဲသွားစေခဲ့သည်။

ရန်ယွီသည် ယီယွင်၏ ခန္ဓာကိုယ်တစ်ခုလုံးတွင် နဂါးအကြေးခွံများ ဖုံးလွှမ်းသွားသည်ကို မြင်ရသောအခါ လုံးဝ ထိတ်လန့်သွားခဲ့ရသည်။ ယီယွင်သည် ထိုနေရာတွင် သတ်ဖြတ်လိုသော အရှိန်အဝါများဖြင့် မတ်တပ်ရပ်နေခဲ့သည်။

ရန်ယွီအနေဖြင့် ဤနေရာမှ စိတ်ပျက်လက်ပျက်ဖြင့် ထွက်ခွာသွားရခြင်းမှာ အရှက်ရစရာ ကောင်းလှသည်ကို သိသော်လည်း သူ့တွင် အခြားရွေးချယ်စရာ မရှိတော့ချေ။ သတ္တမအဆင့်မှာ မလုံခြုံတော့ပေ။

ဝိညာဉ်နက် နဂါးကြီး သေဆုံးသွားခဲ့ပြီ ဖြစ်သော်လည်း သတ္တမအဆင့်၏ ပတ်ဝန်းကျင်တွင် အခြားသော ဝိညာဉ်နက် ပုံရိပ်များမှာ စဉ်ဆက်မပြတ် ပြန်လည် စုစည်းနေကြဆဲ ဖြစ်သည်။ ရန်ယွီအနေဖြင့် ထိုအရာကို မည်သို့မျှ တောင့်ခံနိုင်မည် မဟုတ်ပေ။

"ယီယွင်... မင်းကိုယ်မင်း ကံကောင်းတယ်လို့ပဲ မှတ်လိုက်တော့။ ဒါပေမဲ့ သိပ်ပြီးတော့ ဘဝင်မမြင့်သွားနဲ့ဦး။ မင်းက ကောင်းကင်တက်လှမ်းခြင်းအဆင့်ကိုတောင် မရောက်သေးဘူး။ မင်းရဲ့ အနာဂတ်က ဝေဝါးနေတုန်းပဲ။

လော့မျိုးနွယ်စုရဲ့ သမိုင်းမှာ ပါရမီရှင်တွေနဲ့ ထူးဆန်းတဲ့ အံ့ဖွယ်လူသားတွေ အများကြီး ရှိခဲ့ဖူးတယ်၊ ဒါပေမဲ့ စိတ်မကောင်းစရာက သူတို့တွေ မရင့်ကျက်ခင်မှာပဲ သေဆုံးသွားခဲ့ကြရတာပဲ။ ငါကတော့ မင်းကို ဆုတောင်းပေးပါတယ် ယီယွင်... သိပ်ပြီးတော့ စောစောစီးစီး မသေသွားပါစေနဲ့လို့"

ထိုကဲ့သို့သော ဆိုးရွားလှသည့် စကားလုံးများကို ထုတ်ဖော်ပြောဆိုခြင်းအားဖြင့် ရန်ယွီသည် သူ၏ သိက္ခာကို အနည်းငယ် ပြန်လည် ဆယ်ယူနိုင်ရန် မျှော်လင့်ခဲ့ခြင်း ဖြစ်သည်။ သူ၏ စကားလုံးများမှာ အဆိပ်အတောက် ဖြစ်စေလှသည်ဆိုသော်လည်း သူပြောသွားသောအရာမှာ အမှန်တရား ဖြစ်သည်။

လော့မျိုးနွယ်စုတွင် မျိုးဆက်သစ် အများစုမှာ အဆုံးအထိ မရင့်ကျက်နိုင်ဘဲ ပျက်စီးသွားခဲ့ကြရသည်။ ကောင်းကင်ဘုံ ၁၂ ဘုံ ဆိုသည်မှာ ကြီးမားလှသော လှိုင်းတံပိုးများ ရှိနေသည့် ကမ္ဘာကြီးတစ်ခု ဖြစ်သည်။ သိုင်းပညာလမ်းကြောင်းပေါ်တွင် သေဆုံးသွားရခြင်းမှာ အလွန်ပင် သာမန်ကိစ္စတစ်ခု ဖြစ်သည်။

ရန်ယွီသည် ထိုသို့ ပြောပြီးနောက် ဆဋ္ဌမအဆင့်သို့ ထွက်ပြေးရန် လှည့်ထွက်လိုက်သည်။ သူသည် ယီယွင်နှင့် ဆက်လက်၍ မပြိုင်ဆိုင်လိုတော့ချေ၊ အဘယ်ကြောင့်ဆိုသော် သူ မကိုင်တွယ်နိုင်တော့သောကြောင့် ဖြစ်သည်။

ရန်ယွီ ပျံတက်သွားသည့် အခိုက်အတန့်မှာပင် ယီယွင်၏ မျက်လုံးများထဲတွင် အေးစက်လှသော အလင်းတန်းတစ်ခု ဖြတ်သန်းသွားခဲ့သည်။

"မင်းက ဒီသတ္တမအဆင့်ကို မင်း စိတ်ကြိုက် လာချင်တိုင်းလာ၊ သွားချင်တိုင်းသွားလို့ရတဲ့ နေရာလို့ ထင်နေတာလား"

ယီယွင်သည် သူ၏ အသက်သွေးခွန်အား အားလုံးကို လောင်ကျွမ်းစေရင်း အော်ဟစ်လိုက်တော့သည်။

ဒါက ရှေးဟောင်း ကောင်းကင်ဝါးမြို နဂါးကြီး၏ အပိုင်ဖြစ်သော ခွန်အား ဖြစ်ပြီး အခု ယီယွင်၏ ခန္ဓာကိုယ်ကို ကြားခံအဖြစ် အသုံးပြုကာ အရပ်မျက်နှာ အနှံ့အပြားသို့ လုံးဝ ပေါက်ကွဲ ထွက်ပေါ်လာခဲ့ခြင်း ဖြစ်သည်။

ကောင်းကင်ဝါးမြိုခြင်း။

ဝူး ဝူး ဝူး......

ယီယွင်၏ ခန္ဓာကိုယ်ကို ဗဟိုချက်အဖြစ် ပြုလုပ်လျက် ဝါးမြိုခြင်း စွမ်းအားများသည် အရပ်မျက်နှာ အနှံ့အပြားသို့ ပြန့်နှံ့သွားခဲ့တော့သည်။

ကောင်းကင်ဝါးမြို နဂါးကြီးမှာ ယီယွင်၏ ခန္ဓာကိုယ်အတွင်းသို့ လုံးဝ ပေါင်းစပ်သွားခဲ့ပြီ ဖြစ်သဖြင့် ဝါးမြိုခြင်း စွမ်းအားမှာ ယခင်ကထက် များစွာ ပိုမို အစွမ်းထက်လှသည်။

ကြားခံဝိညာဉ် သွေးမြွေမှာ ယခင်ကတည်းက ဒဏ်ရာရရှိထားခဲ့ခြင်း ဖြစ်သဖြင့် ၎င်းသည် မည်သည့် အံ့သြစရာမျှမရှိဘဲ ဝါးမြိုခြင်း စွမ်းအား၏ နယ်ပယ်အတွင်း၌ ပိတ်မိသွားခဲ့ရသည်။

အဋ္ဌမအဆင့်မှ တိုးဝင်လာကြသော ဝိညာဉ်နက် ပုံရိပ် ခုနစ်ခု (သို့မဟုတ်) ရှစ်ခုခန့်ပင်လျှင် ထိုဝါးမြိုခြင်း စွမ်းအား၏ လွှမ်းမိုးခြင်းကို ခံလိုက်ရသည်။ သူတို့ထဲမှ မည်သူမျှ ရုန်းထွက်နိုင်ခြင်း မရှိခဲ့ကြပေ။

ထို့အပြင် ယီယွင်နှင့် အနီးဆုံးတွင် ရှိနေသော ရန်ယွီသည်လည်း ယခင်က သူ၏ ရန်ယီငါး သွေးမျိုးဆက်ကို ဆင့်ခေါ်ထားခဲ့ခြင်း ဖြစ်သည်။ အခု ဝါးမြိုခြင်း ဝဲကရက်ကြီး ရုတ်တရက် ပေါ်လာသောအခါ ရန်ယီငါး သွေးမျိုးဆက်မှာလည်း ထိုဝဲကရက်ကြီး၏ ချည်နှောင်ခြင်းကို ခံလိုက်ရတော့သည်။

"မင်း ဘာလုပ်နေတာလဲ"

ရန်ယွီ၏ ခန္ဓာကိုယ်မှာ ဆဋ္ဌမအဆင့်သို့ ရောက်ရှိလုနီးပါး ဖြစ်နေခဲ့ပြီ ဖြစ်သော်လည်း သူ ဆင့်ခေါ်ထားသော အသက်သွေးခွန်အား ရှုထောင့်ပုံရိပ်မှာမူ သတ္တမအဆင့်တွင် ပိတ်မိနေခဲ့ဆဲ ဖြစ်သည်။

ရန်ယွီသည် ဒေါသတကြီး စိုက်ကြည့်လိုက်သည်။ စီယန်တောင်တွင် လေ့ကျင့်နေစဉ်အတွင်း လော့မျိုးနွယ်စု တပည့်များသည် တစ်ယောက်ကိုတစ်ယောက် တိုက်ခိုက်ခြင်း မပြုရဟူ၍ တားမြစ်ထားခြင်း ဖြစ်သည်။ ဒါကလည်း ရန်ယွီအနေဖြင့် ယီယွင်၏ ရှေ့မှောက်တွင် ဤမျှအထိ ရဲတင်းသော လုပ်ရပ်မျိုးကို လုပ်ဝံ့ရခြင်း၏ အကြောင်းရင်း ဖြစ်သည်။

သို့သော် အခုတော့ ယီယွင်က သူ ဆင့်ခေါ်ထားသော ရန်ယီငါးကို တားဆီးရန်အတွက် ကောင်းကင်ဝါးမြို နဂါးကြီး၏ သွေးမျိုးဆက် ဖိနှိပ်မှုကို တိုက်ရိုက် ထုတ်သုံးလိုက်ခြင်း ဖြစ်သည်။

ရန်ယီငါး ရှုထောင့်ပုံရိပ်မှာ အဆုံးတွင်တော့ တကယ့် ရှေးဟောင်းဖေးတစ်ကောင် မဟုတ်ပေ။ ရှေးဟောင်းဖေး အရှိန်အဝါ၏ လွှမ်းမိုးခြင်းကို ခံလိုက်ရသောအခါ ၎င်းမှာ ချက်ချင်းပင် တုန်ခါသွားခဲ့ရသည်။

၎င်းသည် သူ၏ ခွန်အား အပြည့်အဝ၏ ၃၀ ရာခိုင်နှုန်းကိုပင် ထုတ်မသုံးနိုင်တော့သဖြင့် ဝါးမြိုခြင်း စွမ်းအား၏ ချည်နှောင်မှုမှ ရုန်းထွက်နိုင်ခြင်း မရှိ ဖြစ်နေခဲ့ရသည်။

"ယီယွင် မင်း ဘယ်လိုတောင် ဝံ့ရဲရတာလဲ။ မင်းက လေ့ကျင့်ရေးရဲ့ စည်းမျဉ်းတွေကို ပြောင်ပြောင်တင်းတင်း ချိုးဖောက်နေတာလား" ရန်ယွီက ဒေါသတကြီး အော်ဟစ်လိုက်သည်။

ရန်ယီငါး ရှုထောင့်ပုံရိပ်ဆိုသည်မှာ ရန်ယွီ၏ သွေးမျိုးဆက် အနှစ်သာရများ စုစည်းထားခြင်း ဖြစ်သည်။

ကောင်းကင်ဘုံဖေး တစ်ယောက်အတွက် သူတို့၏ သွေးမျိုးဆက် သိပ်သည်းဆမှာ သူတို့၏ အလားအလာနှင့် အနာဂတ် အောင်မြင်မှုများကို ကြီးမားစွာ ထင်ဟပ်စေသည်။

ကောင်းကင်ဘုံဖေး မိသားစုတစ်ခုတွင် ဒါက ထိုလူ၏အပေါ်၌ အရင်းအမြစ် မည်မျှအထိ ရင်းနှီးမြှုပ်နှံမည်ဆိုသည်ကို ဆုံးဖြတ်ပေးသော အချက်များထဲမှ တစ်ခုလည်း ဖြစ်သည်။

အကယ်၍ ရန်ယီငါး ရှုထောင့်ပုံရိပ်နှင့် ပတ်သက်၍ တစ်စုံတစ်ရာ ဆုံးရှုံးမှု ဖြစ်ပေါ်ခဲ့မည်ဆိုပါက ရန်ယွီမှာ အကြီးအကျယ် ထိခိုက်သွားပေလိမ့်မည်။ ဒါက ရန်ယွီ၏ လက်တစ်ဖက်ကို ဖြတ်ပစ်လိုက်ခြင်းနှင့် အတူတူပင် ဖြစ်သည်။

ယီယွင်သည် ရန်ယွီ၏ သတိပေးချက်ကို ဂရုမစိုက်ခဲ့ပေ။ သူ၏ ခန္ဓာကိုယ်ထံမှ မြူနက်များ ထွက်ပေါ်လာခဲ့ပြီး သူသည် ရှေးဦးခေတ်မှ ပြန်လည် နိုးထလာသော နတ်ဆိုးနတ်ဘုရားတစ်ပါးကဲ့သို့ ဖြစ်နေခဲ့သည်။

သူ၏ ရှေ့မှောက်တွင် စွမ်းအင် ဝဲကရက်ကြီးမှာ ပိုမို ကြီးမားလာခဲ့သည်။ ရှေးဟောင်း ကောင်းကင်ဝါးမြို နဂါး သွေးမျိုးဆက်၏ ဖိအားကြောင့် ထိတ်လန့်နေသော ရန်ယီငါးမှာ ယီယွင်ရှိရာဆီသို့ တစ်ရွေ့ရွေ့နှင့် ဆွဲငင်ခြင်း ခံနေရတော့သည်။

"ယီယွင် ဘာလုပ်နေတာလဲ။ သူက ရန်ယွီရဲ့ ကောင်းကင်ဘုံဖေး သွေးမျိုးဆက်ကို ဝါးမြိုဖို့ ကြိုးစားနေတာလား။ အကယ်၍ သူသာ အဲလိုလုပ်ရင် သူက စမ်းသပ်မှုရဲ့ စည်းမျဉ်းတွေကို သေချာပေါက် ချိုးဖောက်ရာ ရောက်သွားလိမ့်မယ်။ ယီယွင် အပြစ်ပေးခံရလိမ့်မယ်"

လေနက်ချိုင့်ဝှမ်း၏ စတုတ္ထနှင့် ပဉ္စမအဆင့်များတွင် ရှိနေကြသော လော့မျိုးနွယ်စု တပည့် အများအပြားမှာ အံ့အားသင့်သွားကြရသည်။ လော့မျိုးနွယ်စု၏ စည်းမျဉ်းများကို စိန်ခေါ်ခြင်းမှာ မိုက်မဲသော လုပ်ရပ်တစ်ခု ဖြစ်သည်မှာ သေချာလှသည်။

ရန်ယွီသည် ဒေါသအလွန်ထွက်သွားသဖြင့် ရယ်မောလိုက်မိသည်။

"အကြံကောင်းပဲ ယီယွင်။ ငါ့ကို လူအများရှေ့မှာ တိုက်ခိုက်ဝံ့တာ မင်း တကယ်ကို ရူးနေပြီပဲ။ တကယ်ပဲ... သွေးမတော် သားမစပ်တဲ့လူတွေက တကယ်ပဲ စိတ်သဘောထားချင်း မတူနိုင်ကြဘူး။ မင်း ဒီအတွက် တန်ဖိုးကြီးကြီး ပြန်ပေးရလိမ့်မယ်"

ထိုသို့ ပြောပြီးနောက် ရန်ယွီသည် ကောင်းကင်ယံထက်တွင် မြင့်မားစွာ ထိုင်နေသော ကန်းမန်ထံသို့ ရုတ်တရက် မော့ကြည့်လိုက်သည်။

"အရှင်ကန်းမန်... ယီယွင်က စုပေါင်းလေ့ကျင့်ရေးရဲ့ စည်းမျဉ်းတွေကို ချိုးဖောက်ပြီး ငါ့ရဲ့ သွေးမျိုးဆက်ကို ဖျက်ဆီးဖို့ ငါ့ကို ပြောင်ပြောင်တင်းတင်း တိုက်ခိုက်နေပါတယ်။ ကျွန်တော့်အထင်တော့ ယီယွင်က သူစိမ်းမျိုးနွယ်စုက လွှတ်လိုက်တဲ့ သူလျှိုတစ်ယောက် ဖြစ်ရပါမယ်။ လော့မျိုးနွယ်စုရဲ့ စည်းမျဉ်းတွေအရ သူ့ရဲ့ ကျင့်ကြံခြင်းကို ဖျက်ဆီးပစ်ရပါမယ်"

ဤအခိုက်အတန့်တွင် ရန်ယွီ၏ စိတ်လုံးဝ ဆူပွက်နေခဲ့ပြီ ဖြစ်သည်။ သို့သော် သူ မည်မျှပင် တိုင်တန်းနေပါစေဦးတော့ ကန်းမန်မှာမူ လေထုထဲတွင် လှုပ်ရှားခြင်းမရှိဘဲ ငြိမ်သက်နေဆဲ ဖြစ်သည်။

ကန်းမန်သည် မျက်မှောင် အနည်းငယ် ကြုတ်လိုက်မိသော်လည်း စကားတစ်ခွန်းမျှ မပြောခဲ့ပေ ။ အကယ်၍ ယီယွင်က ရန်ယွီ၏ သွေးမျိုးဆက်ကို အမှန်တကယ် ဝါးမြိုပစ်မည်ဆိုပါက သူအနေဖြင့် ငြိမ်ခံနေ၍ မရနိုင်သည်မှာ ထင်ရှားလှသည်။

သိုင်းပညာရှင်များ၏ ကမ္ဘာဆိုသည်မှာ အပြန်အလှန် လက်စားချေခြင်းများ ရှိနေတတ်သည်ဆိုသော်လည်း စည်းမျဉ်းဆိုသည်မှာ ချိုးဖောက်၍မရသော စည်းမျဉ်းသာ ဖြစ်သည်။

ဤအခိုက်အတန့်တွင် ယီယွင်သည် ပြုံးလိုက်ပြီး ပြောလိုက်သည်။

"ရန်ယွီ... မင်းက ငါ မင်းကို တိုက်ခိုက်နေတယ်လို့ ပြောတာလား။ ငါ ဘယ်တုန်းက မင်းကို တိုက်ခိုက်လို့လဲ။ ငါက ကြားခံဝိညာဉ် သွေးမြွေကို ဖမ်းဖို့အတွက် ဝါးမြိုခြင်း ဥပဒေသတွေကို သုံးနေတာပဲလေ။ ဒါက လော့မျိုးနွယ်စုရဲ့ စည်းမျဉ်းတွေကို ချိုးဖောက်တာလား။ ငါက ကြားခံဝိညာဉ် သွေးမြွေကို ဖမ်းဖို့ ဝါးမြိုခြင်း ဥပဒေသတွေကို သုံးနေတာ၊ ဒါပေမဲ့ မင်းရဲ့ ရန်ယီငါး သွေးမျိုးဆက်က ငါ့ရဲ့ ဝါးမြိုခြင်း ဥပဒေသတွေရဲ့ နယ်ပယ်ထဲကို ရောက်လာတာလေ၊ အဲဒါကို မင်းက ငါ့ကို လာအပြစ်တင်နေတာလား"