အန္တရာယ်အငွေ့အသက်
Vol. 28 Ch. 285
ထိုနေ့ ညနက်ပိုင်းတွင် ကြယ်တာရာရေကန်သို့ စုန့်ဝမ် ရောက်လာသည်။ လေဟာနယ်ခွဲဓား၏ စွမ်းအားကို လွတ်လွတ်လပ်လပ် စမ်းသပ်နိုင်ရန် ခရီးရှည် နှင်လာခဲ့ခြင်း ဖြစ်သည်။ ဤနေရာတွင် ဝိညာဉ်စွမ်းအင် နည်းပါးပြီး ကျင့်ကြံသူများ လာရောက်လေ့ မရှိသဖြင့် အခြားသူများ၏ အာရုံစိုက်ခြင်း မခံရဘဲ လေဟာနယ်ခွဲဓားကို စမ်းသပ်ရန် အကောင်းဆုံး နေရာပင် ဖြစ်သည်။
အတွေးတစ်ချက်ဖြင့် လေဟာနယ်ခွဲဓား ပျံထွက်လာပြီး ရေကန်အောက်ခြေသို့ တိုးဝင်သွားသည်။ အားပြင်းသော ဓားချီနှင့်အတူ လွင့်ပျံသွားသော လေဟာနယ်ခွဲဓားမှာ ၎င်းရှေ့ရှိ မည်သည့်အရာကိုမဆို ဖြတ်တောက်နိုင်စွမ်း ရှိပုံရသည်။
ငြိမ်သက်နေသော ကန်ရေပြင်မှာ ရုတ်တရက် နှစ်ခြမ်းကွဲသွားပြီး အောက်ခြေမှ ရေကန်ကြမ်းပြင်ကိုပင် မြင်လိုက်ရသည်။ ရေများမှာ လှိုင်းထကာ အရပ်ရပ်သို့ လွင့်စင်ကုန်သည်။ ကန်တစ်ခုလုံး ထိုဓားချက် တစ်ချက်တည်းဖြင့် တုန်ခါသွားခဲ့သည်။
စုန့်ဝမ်လည်း စိတ်ကျေနပ်သွားပြီး ရေကန်ကြမ်းပြင်တွင် စိုက်ဝင်နေသော လေဟာနယ်ခွဲဓားကို ပြန်ခေါ်ကာ ထွက်ခွာရန် ပြင်လိုက်သည်။ ထိုဓားချက် တစ်ချက်တည်းမှာပင် သူ့ဝိညာဥ်စွမ်းအား ၇၀ ရာခိုင်နှုန်းခန့် ကုန်ဆုံးသွားခဲ့သည်။ ရွှေအမြုတေ အစောပိုင်းအဆင့် ကျင့်ကြံမှုဖြင့် အလယ်အလတ်အဆင့် မှော်လက်နက်ကို အသုံးပြုရန်မှာ အတော်ပင် ခက်ခဲနေသေးသည်။ ၎င်းကို အရေးကြီးသော အခြေအနေများတွင်သာ အသုံးပြုရမည့် ဝှက်ဖဲအဖြစ် ထားရှိရမည် ဖြစ်သည်။
ထို့ပြင် လေဟာနယ်ခွဲဓားမှာ ဝိညာဉ်မီးတောက်များနှင့် မပေါင်းစပ်ရသေးပေ။ အကယ်၍ ပေါင်းစပ်မီးတောက်ကို ထည့်သွင်းပေးနိုင်လျှင် ကျောက်စိမ်းမီးတောက်စွမ်းအင်နှင့် ငရဲအလောင်းအအေးမီးတောက်စွမ်းအင် နှစ်မျိုးလုံး ကိန်းအောင်းလာမည် ဖြစ်သည်။ သို့ဆိုလျှင် စွမ်းအားနှင့် သတ်ဖြတ်နိုင်စွမ်းမှာ သိသိသာသာ တိုးလာမည်မှာ မြေကြီးလက်ခတ် မလွဲပင်။
ထို့နောက် စုန့်ဝမ်သည် ဂူအိမ်သို့ ပြန်လာပြီး ရွှေကျောက်စိမ်းဆေးနှင့် ဝိညာဉ်စွမ်းအင်ဆေးတို့ကို ဖော်စပ်ရန် စတင်ကြိုးစားသည်။ ဆေးနည်းများသာ ရှိပြီး သင်ကြားပေးမည့်သူ မရှိသဖြင့် ကိုယ်တိုင်သာ စမ်းသပ် လုပ်ကိုင်နေရသည်။
အကြိမ်ကြိမ် ကြိုးစားပြီးနောက် ဆေးနှစ်မျိုးလုံးကို အောင်မြင်စွာ ဖော်စပ်နိုင်ခဲ့သည်။ ရွှေကျောက်စိမ်းဆေးမှာ ရွှေအမြုတေအဆင့် ကျင့်ကြံသူများ ကျင့်ကြံမှု တိုးတက်စေရန် အသုံးပြုသော ဆေးဖြစ်သဖြင့် စုန့်ဝမ်သည် မိမိကိုယ်တိုင် တစ်လုံး သောက်သုံးကြည့်သည်။
သို့သော်လည်း ရလဒ်မှာ စိတ်ကျေနပ်စရာ မကောင်းပေ။ ရွှေကျောက်စိမ်းဆေး ဖော်စပ်ရန် ကုန်ကျစရိတ်နှင့် အချိန်မှာ သွေးဝိညာဉ်ဆေးထက် အဆများစွာ ပိုများသော်လည်း ကျင့်ကြံမှု တိုးတက်မှုနှုန်းမှာ သွေးဝိညာဉ်ဆေးလောက် မထိရောက်ပေ။ သွေးဝိညာဉ်ဆေး ဖော်စပ်ရန် လိုအပ်သော သားရဲသွေးနှင့် ဝိညာဥ်မှာ အဆုံးမဲ့ပင်လယ်ရှိ သားရဲများထံမှ ပေါများစွာ ရရှိနိုင်သည်။ အလွန်ပင် ပေါလှသည်။ ဝိညာဉ်ကျောက်တုံး ရာဂဏန်းခန့် သုံးရုံနှင့် ဒုတိယအဆင့် သားရဲတစ်ကောင်၏ သွေးနှင့် ဝိညာဉ်အားလုံးကို ဝယ်ယူနိုင်သည်။ ထို့ကြောင့် စုန့်ဝမ်သည် ရွှေကျောက်စိမ်းဆေးများကို မသုံးစွဲတော့ဘဲ ရောင်းချရန်သာ ဆုံးဖြတ်လိုက်သည်။
ကျင့်ကြံသူများ၏ ဝိညာဉ်စွမ်းအင်ကို ပြန်လည် ဖြည့်တင်းပေးသော ဝိညာဉ်စွမ်းအင်ဆေးကမူ အသုံးဝင်သဖြင့် မိမိကိုယ်တိုင် အသုံးပြုရန် တချို့တဝက် သိမ်းထားပြီး ပိုလျှံသည်များကို ရောင်းချရန် စီစဉ်ခဲ့သည်။
......
ထိုလ၏ ၁၀ ရက်မြောက်နေ့ညတွင် စုန့်ဝမ် ရတနာဖလှယ်ပွဲသို့ ရောက်ရှိလာခဲ့သည်။ လေလံပွဲနှင့် အရောင်းဆိုင်များတွင် သူရှာနေသော အရာများ မတွေ့ရသဖြင့် ကန်းဟုန်ထံ တိုက်ရိုက် သွားလိုက်သည်။
"စီနီယာကန်း... ကျွန်တော် စီနီယာကို အကူအညီတောင်းစရာ ကိစ္စလေး တစ်ခု ရှိလို့ပါ"
"မိတ်ဆွေလေးဝူ... ငါတို့ မတွေ့တာ လအတော်ကြာသွားပြီပဲ။ ဒီအတောအတွင်း မင်း တစ်ခါမှ ပေါ်မလာဘူးနော်"
ကန်းဟုန် မျက်နှာပေါ်ရှိ နွေးထွေးသောအပြုံးကို မြင်သောအခါ စုန့်ဝမ်၏ ရင်ထဲတွင် တင်းကျပ်သွားသည်။ ကန်းဟုန်သည် လွန်ခဲ့သော လအနည်းငယ်အတွင်း သူ ရတနာဖလှယ်ပွဲသို့ မလာခဲ့သည်ကို သိနေသည်။ ၎င်းက ပွဲကျင်းပတိုင်း ကန်းဟုန်သည် သူ ရှိ၊ မရှိကို အမြဲ ရှာဖွေနေကြောင်း ရှင်းလင်းစွာ ပြသနေသည်။ ရွှေအမြုတေ နှောင်းပိုင်းအဆင့် ကျင့်ကြံသူတစ်ဦး၏ အာရုံစိုက်ခြင်းကို ခံရခြင်းမှာ မည်သည့်အကြောင်းကြောင့်ဖြစ်စေ ကောင်းသော အခြေအနေ မဟုတ်ပေ။
စုန့်ဝမ်က ပြုံးပြီး "ဒီအတောအတွင်း ကျင့်ကြံမှု အားစိုက်နေရလို့ မလာဖြစ်တာပါ" ဟု ပြန်ဖြေလိုက်သည်။
ကန်းဟုန်က "နားလည်နိုင်ပါတယ်၊ ငါတို့ ကျင့်ကြံသူတွေအတွက်တော့ ကျင့်ကြံမှု အဆင့်က အရာအားလုံးရဲ့ အခြေခံဆိုတော့ အာရုံစိုက်သင့်တာပေါ့" ဟု ဆိုသည်။ ထို့နောက် လေသံပြောင်းကာ "မိတ်ဆွေလေးဝူ... ငါ့ကို ဘာကိစ္စနဲ့ ရှာတာလဲ" ဟု ဆက်မေးသည်။
စုန့်ဝမ်က ကျောက်စိမ်းပုလင်း နှစ်လုံးကို ထုတ်ပြလိုက်သည်။
"ဆရာ့ညွှန်ကြားချက်အရ ဆေးလုံးတချို့ လာရောင်းတာပါ၊ ပြီးတော့ ဝိညာဉ်ဆေးပင် တချို့လည်း ဝယ်ချင်လို့ပါ"
ကန်းဟုန် စိတ်ဝင်စားသွားသည်။
"ဒါတွေက ဘယ်လို ဆေးလုံးတွေလဲ။ အကယ်၍ ဒါတွေက ဒုတိယနဲ့ တတိယအဆင့် ဆေးလုံးတွေဆိုရင် ငါ ဝယ်ယူတဲ့ ဈေးနှုန်းက ဖန်မြို့တော်နဲ့ မှောင်ခိုဈေးထက် နည်းနည်း ပိုမြင့်လိမ့်မယ်"
"ရွှေကျောက်စိမ်းဆေးနဲ့ ဝိညာဉ်စွမ်းအင်ဆေးပါ။ ဆေးတစ်မျိုးစီ ဆယ်လုံးစီ ပါပါတယ်"
စုန့်ဝမ်သည် စကားပြောရင်း ကျောက်စိမ်းပုလင်း နှစ်လုံးကို ကန်းဟုန်ထံ ကမ်းပေးလိုက်သည်။
ဆေးလုံးများကို စစ်ဆေးကြည့်ပြီးနောက် ကန်းဟုန်က "ဆေးလုံးအရည်အသွေးက အတော်လေး ကောင်းတယ်။ ရွှေကျောက်စိမ်းဆေး တစ်လုံးကို ဝိညာဉ်ကျောက်တုံး ၄၀၀ နဲ့ ဝိညာဉ်စွမ်းအင်ဆေး တစ်လုံးကို ၈၀၀ ပေးမယ်။ ဒီဈေးကို မင်း လက်ခံနိုင်လား" ဟု မေးလိုက်သည်။
ရွှေကျောက်စိမ်းဆေး တစ်သုတ် ဖော်စပ်ရန်အတွက် ဝိညာဉ်ဆေးပင်များ၏ ကုန်ကျစရိတ်မှာ ဝိညာဉ်ကျောက်တုံး တစ်ထောင်ခန့် ရှိသည်။ တစ်သုတ်လျှင် ဆေးလုံး ၁၀ လုံး ထွက်ရှိပြီး ဆေးအောင်မြင်နှုန်းမှာ ၅၀ ရာခိုင်နှုန်းခန့် ရှိသည်။ ဆိုလိုသည်မှာ ရွှေကျောက်စိမ်းဆေး တစ်လုံး၏ ကုန်ကျစရိတ်မှာ ဝိညာဉ်ကျောက်တုံး ၂၀၀ ခန့် ဖြစ်သည်။ ဝိညာဉ်စွမ်းအင်ဆေး တစ်လုံး၏ ကုန်ကျစရိတ်မှာ ဝိညာဉ်ကျောက်တုံး ၄၀၀ ခန့် ဖြစ်သည်။
ကန်းဟုန်၏ ကမ်းလှမ်းမှုမှာ စုန့်ဝမ်အတွက် အမြတ် နှစ်ဆခန့် ရရှိစေသည်။ ၎င်းက ကန်းဟုန်သည် ရွှေကျောက်စိမ်းဆေးနှင့် ဝိညာဉ်စွမ်းအင်ဆေးတို့၏ ထုတ်လုပ်မှုစရိတ်ကို ကောင်းကောင်းသိနေကြောင်း သိသာစေသည်။ ဆေးဆိုင်များတွင် ရွှေကျောက်စိမ်းဆေးနှင့် ဝိညာဉ်စွမ်းအင်ဆေးတို့၏ ရောင်းဈေးမှာ အသီးသီး ၅၀၀ နှင့် ၁၀၀၀ စီ ဖြစ်သည်။
ရွှေအမြုတေအဆင့် ကျင့်ကြံသူများ ကျင့်ကြံရန် အသုံးပြုသော ရွှေကျောက်စိမ်းဆေးမှာ ရေရှည် သောက်သုံးရန် လိုအပ်သဖြင့် ဆိုင်၏အမြတ်မှာ နည်းပါးသော်လည်း များပြားသော အရောင်းပမာဏဖြင့် အမြတ်ထုတ်ကြသည်။ ဝိညာဉ်စွမ်းအင်ဆေးမှာ ဈေးကြီးသော်လည်း အသုံးနည်းသည်။ ရွှေအမြုတေအဆင့် ကျင့်ကြံသူ အများစုမှာ အရေးပေါ် အခြေအနေအတွက် အနည်းငယ်သာ ဆောင်ထားလေ့ ရှိကြသည်။
စုန့်ဝမ်က ခေါင်းညိတ်ပြပြီး "ကျေးဇူးတင်ပါတယ်" ဟု ဆိုလိုက်သည်။
ကန်းဟုန်က ဆေးများကို ယူလိုက်သော်လည်း စုန့်ဝမ်ကို ဝိညာဉ်ကျောက်တုံးများဖြင့် မပေးချေပေ။ ထိုအစား သူက "မင်းဝယ်ချင်တဲ့ ဝိညာဉ်ဆေးပင် ရှိသေးလား" ဟု မေးသည်။
"ဆန်းကြယ်ဝိညာဉ်မြစ် ဆယ်ခုနဲ့ ဇီဝပြောင်းလဲပုလဲတွေပါ။ ပြီးတော့ တတိယအဆင့် ဆေးနည်းတွေ ရှိရင်လည်း ဝယ်ချင်ပါတယ်"
စုန့်ဝမ် နောက်ဆုံးတစ်ခေါက်က ဝယ်ထားသည့်ထဲမှ ထိုနှစ်မျိုး ကုန်သွားပြီ ဖြစ်သော်လည်း ရွှေဝိညာဉ်မျိုးစေ့မှာမူ အများအပြား ကျန်ရှိနေသေးသည်။
ကန်းဟုန်က "ရတာပေါ့" ဟု ပြန်ဖြေကာ ဆေးမြစ်နှင့် ပုလဲများကို စုန့်ဝမ်ထံ အရင် ပေးလိုက်သည်။ ထို့နောက် ကျောက်စိမ်းပြားတစ်ခု ထုတ်ပေးရင်း "ငါ့ဆီမှာ တတိယအဆင့် ဆေးနည်းတွေ ရှိတယ်။ အဲဒီထဲက လိုချင်တာ ရွေးပါ"ဟု ဆိုသည်။
ကျောက်စိမ်းပြားအတွင်း၌ စုန့်ဝမ် လက်ဝယ်ရှိပြီးသား ရွှေကျောက်စိမ်းဆေးနှင့် ဝိညာဉ်စွမ်းအင်ဆေး အပါအဝင် ဆေးနည်း ၈ မျိုး ရှိသည်။
"ရွှေကျောက်စိမ်းဆေးနဲ့ ဝိညာဉ်စွမ်းအင်ဆေးကလွဲလို့ ကျန်တဲ့ ဆေးနည်း ၆ မျိုးလုံးကို ကျွန်တော် ယူမယ်။ အဲဒီဆေးနည်းတွေအတွက် လိုအပ်တဲ့ ဝိညာဉ်ဆေးပင်လည်း ဆယ်သုတ်စာစီ လိုချင်ပါတယ်"
တတိယအဆင့် ဆေးနည်းများမှာ ရှားပါးလှရာ ယခုကဲ့သို့ ရရှိရန် အခွင့်အရေး ရချိန်တွင် စုန့်ဝမ်က လက်လွှတ်မခံလိုပေ။
ကန်းဟုန်က ပြုံးပြီး "မိတ်ဆွေလေးက ပွင့်လင်းပြတ်သားတာပဲ။ ခဏစောင့်ပါဦး" ဟု ဆိုကာ ထွက်ခွာသွားသည်။ မကြာမီမှာပင် ပြန်လာကာ စုန့်ဝမ်ထံသို့ ပစ္စည်းအားလုံး လွှဲပြောင်းပေးပြီး "ဆေးနည်း ၆ မျိုးအတွက် ဝိညာဉ်ကျောက်တုံး ၈၀,၀၀၀ ကျသင့်ပြီး ဝိညာဉ်ဆေးပင်တွေအတွက် စုစုပေါင်း ၁၆,၈၀၀ ကျသင့်ပါတယ်။ မင်းဆီက ဝယ်တဲ့ ဆေးလုံးဖိုး ၄၈၀၀ ကို နှုတ်လိုက်ရင် ငါ့ကို ၉၂,၀၀၀ ပေးရမယ်။ တွက်ရလွယ်အောင် ကိုးသောင်းပဲ ပေးပါ" ဟု ပြောသည်။
စုန့်ဝမ်လည်း ပစ္စည်းများ လက်ခံရယူပြီး အလယ်အလတ်အဆင့် ဝိညာဉ်ကျောက် ၉၀ ကို ထုတ်ယူကာ ကန်းဟုန်ထံ ကမ်းပေးလိုက်သည်။
သို့သော်လည်း ကန်းဟုန်က ခေါင်းယမ်းပြပြီး ၎င်းတို့ကို မယူခဲ့ပေ။
"မိတ်ဆွေလေး... ငါ မင်းရဲ့ ဆရာ့ဆီက အကူအညီတစ်ခု တောင်းစရာ ရှိတယ်။ မင်း ငါ့ကို သူနဲ့ မိတ်ဆက်ပေးနိုင်မလား။ ဒီ ဝိညာဉ်ကျောက်တုံး ကိုးသောင်းက မင်းရဲ့ ကူညီပေးမှုအတွက် အခကြေးငွေလို့ သတ်မှတ်လိုက်ပါ။ မင်း ငါ့ကို ကူညီပေးနိုင်မလား"
"အဲ..."
စုန့်ဝမ်က တွေဝေသွားပြီး အတော်လေး အခက်တွေ့နေပုံ ရသည်။ သူစိမ်းတစ်ယောက်ကို ဆရာဖြစ်သူနှင့် မိတ်ဆက်ပေးပါက ပြစ်ဒဏ်ပေးခံရမည်ကို စိုးရိမ်နေသကဲ့သို့ ရှိသော်လည်း တစ်ဖက်တွင် ဝိညာဉ်ကျောက်တုံးများကို မက်မောနေပုံ ရသည်။ အခြေတည်အဆင့် ကျင့်ကြံသူတစ်ဦးအဖြစ် ဟန်ဆောင်ထားသူအတွက် ဝိညာဉ်ကျောက်တုံး ကိုးသောင်းမှာ အလွန်များပြားသော ပမာဏ ဖြစ်ပေသည်။
အတော်ကြာ တိတ်ဆိတ်သွားပြီးနောက် စုန့်ဝမ်က နောက်ဆုံးတွင် "စီနီယာကန်း... ကျွန်တော် မေးပါရစေ၊ စီနီယာက ကျွန်တော့်ဆရာနဲ့ ဘာကိစ္စ တွေ့ချင်တာလဲ။ ကျွန်တော့်ဆရာက စည်းကမ်းကြီးပြီး တစ်ယောက်တည်း နေတတ်သူပါ၊ သူစိမ်းတွေနဲ့ ဆက်ဆံရတာကို သူ မကြိုက်ဘူး။ စီနီယာကို သူနဲ့ မိတ်ဆက်ပေးဖို့ ကျွန်တော် တကယ် မဝံ့ရဲပါဘူး။ နားလည်ပေးမယ်လို့ မျှော်လင့်ပါတယ်" ဟု ပြောလိုက်သည်။
"တကယ်တော့ ဒီကိစ္စက မင်းရဲ့ဆရာအတွက်လည်း အခွင့်အရေးတစ်ခုပါ။ ငါ ဘာမှ ဖုံးကွယ်မထားပါဘူး။ ငါက ရှင်းမိသားစု သခင်ငယ် ရှင်းလီယန်ရဲ့ လက်အောက်မှာ အလုပ်လုပ်နေတာပါ။ သခင်ငယ်က အထူးဆေးလုံးတစ်လုံး ဖော်စပ်ဖို့ စီစဉ်နေတယ်။ အဲဒီဆေးလုံးက တတိယအဆင့် ဆေးဆရာ ၉ ယောက် အတူတူ ပူးပေါင်းလုပ်ဆောင်ဖို့ လိုအပ်နေပါတယ်"
စုန့်ဝမ်က မျက်မှောင်ကြုတ်ကာ "စီနီယာက တကယ်ပဲ ရှင်းမိသားစုအတွက် အလုပ်လုပ်နေတာလား" ဟု မေးလိုက်သည်။
"ဟုတ်တာပေါ့။ အဲဒီလိုမဟုတ်ရင် ဖန်မြို့တော်နဲ့ မှောင်ခိုဈေးမှာတောင် ရှာရခက်တဲ့ တတိယအဆင့် ဝိညာဉ်ပစ္စည်းတွေကို ငါ ဘယ်လိုလုပ် ရနိုင်မှာလဲ။ လေလွင့်ကျင့်ကြံသူတစ်ယောက်အနေနဲ့ ဒါတွေကို ဘယ်လို လက်လှမ်းမီနိုင်မှာလဲ။ ဒါတွေအားလုံးက သခင်ငယ် ရှင်းလီယန်ရဲ့ ပံ့ပိုးမှုကြောင့်ပဲ။ အကယ်၍ မင်းရဲ့ဆရာက အထူးဆေးလုံးဖော်စပ်တဲ့ လုပ်ငန်းစဥ်မှာ ပါဝင်နိုင်မယ်ဆိုရင် များပြားတဲ့ ဆုလာဘ်တွေ ရမယ့်အပြင်၊ သခင်ငယ်အပြင် တခြား တတိယအဆင့် ဆေးဆရာတွေနဲ့ပါ အဆက်အသွယ် ရဖို့ အခွင့်အလမ်းလည်း ရှိလိမ့်မယ်။ ဒါက သူ့ရဲ့ နောင်ရေး ကျင့်ကြံမှု လမ်းကြောင်းအတွက် အများကြီး အကျိုးရှိစေမှာပါ..."
ကန်းဟုန်က ဆွယ်တရားဟောနေသူတစ်ဦးကဲ့သို့ အလွန် လျင်မြန်စွာ ပြောဆိုနေသည်။
သို့သော်လည်း စုန့်ဝမ်ကမူ အလွန်အမင်း သံသယ ဝင်လာသည်။ အင်အားကြီးလှသော ရှင်းမိသားစုက တတိယအဆင့် ဆေးဆရာ ၉ ယောက်ကို သူတို့ဘာသာ မစုစည်းနိုင်ဘဲ ရှိပါ့မလား။ အပြင်က ဆေးဆရာတွေကို ရှာဖို့ လိုအပ်နေသေးတာလား။ ကန်းဟုန်၏ စကားများက အလွယ်တကူ ယုံကြည်ဖို့ရန် ခက်လှသည်။ ဤကိစ္စ နောက်ကွယ်တွင် ဖုံးကွယ်ထားသော အရာတစ်ခု ကျိန်းသေ ရှိနေရမည်။
စုန့်ဝမ်သည် ကန်းဟုန်၏ စကားထဲတွင် နစ်မျောသွားသည့်အလား စိတ်ဝင်စားသွားဟန် ဆောင်လိုက်သည်။ ထို့နောက် ဆရာဖြစ်သူထံ သတင်းပို့ တိုက်တွန်းမည့်အလား ဝိညာဉ်ကျောက်များ မပေးချေတော့ဘဲ ကန်းဟုန်၏ ကမ်းလှမ်းမှုကို လက်ခံလိုက်သည်။
"စီနီယာကန်းရဲ့ စကားက အဓိပ္ပာယ်ရှိပါတယ်။ အကယ်၍ ကျွန်တော်တို့သာ ရှင်းမိသားစုနဲ့ အဆက်အသွယ် ရမယ်ဆိုရင် ကျွန်တော်တို့ ဆရာတပည့်ရဲ့ ကျင့်ကြံမှု လမ်းကြောင်းက ပိုပြီး ချောမွေ့သွားမှာ သေချာပါတယ်။ ကံမကောင်းတာက ဆရာက ဂိုဏ်းတွေ၊ မိသားစုကြီးတွေနဲ့ ဆက်ဆံဖို့ အမြဲတမ်း ငြင်းဆန်ခဲ့တာပဲ။ အဲဒီလိုသာ မဟုတ်ရင် သူ့အရည်အချင်းနဲ့ဆို နာမည်ကျော် ဆေးဆရာကြီး ဖြစ်နေလောက်ပြီ"
ကန်းဟုန်က ပြုံးလိုက်သည်။
"မှန်တာပေါ့။ အဲဒါကြောင့်မို့လို့ပဲ ရှင်းမိသားစုကို ကူညီဖို့ မင်းရဲ့ဆရာကို နားချသင့်တယ်။ မင်းရဲ့ဆရာသာ တစ်နေ့မှာ ထင်ရှားကျော်ကြားလာရင် မင်းအတွက်လည်း အကျိုးများမယ် မဟုတ်လား"
စုန့်ဝမ်က သဘောတူသည့်အလား ခေါင်းညိတ်ပြသည်။
"အခုသွားပြီး ကျွန်တော့်ဆရာကို စီနီယာကန်းနဲ့ တွေ့ဖို့ နားချလိုက်ပါ့မယ်"
ထိုသို့ပြောပြီးနောက် စုန့်ဝမ်သည် လှည့်ထွက်သွားရန် ပြင်လိုက်သည်။
"မိတ်ဆွေလေး... ခဏစောင့်ဦး" ဟု ကန်းဟုန်က ရုတ်တရက် တားလိုက်သည်။
"စီနီယာကန်း... မှာစရာ ရှိသေးလို့လား"
စုန့်ဝမ်က လှည့်ကြည့်ကာ တည်ငြိမ်စွာ မေးလိုက်သည်။ အမှန်တကယ်တွင်မူ သူ အတော်လေး စိတ်မအေး ဖြစ်နေသည်။ အကယ်၍ ကန်းဟုန်က သူ့ကို အတင်းအဓမ္မ ထိန်းသိမ်းထားချင်ပါက လွတ်မြောက်နိုင်မည် မဟုတ်ပေ။
ကန်းဟုန်က စုန့်ဝမ်ထံသို့ ကျောက်စိမ်းပြားတစ်ခု ပစ်ပေးလိုက်သည်။
"ဒါက ငါ့ရဲ့ ဆက်သွယ်ရေးကျောက်စိမ်းပြားပါ။ ဒီကိစ္စက ဘယ်လိုပဲဖြစ်ဖြစ် ငါ့ကို မြန်မြန် ဆက်သွယ်ပေးပါ"
စုန့်ဝမ်က ကျောက်စိမ်းပြားကို ဖမ်းယူပြီး "နားလည်ပါပြီ စီနီယာ" ဟု ပြန်ဖြေကာ ထွက်လာခဲ့သည်။
ကာကွယ်ရေးအစီအရင် အပြင်ရောက်သည်နှင့် မြူခိုးများနှင့် တိမ်တိုက်များ ဖုံးလွှမ်းနေသော တောင်ထိပ်ကို နောက်လှည့်ကြည့်လိုက်သည်။ စုန့်ဝမ်သည် အနည်းငယ် နှမြောမိသွားသည်၊ တတိယအဆင့် ဝိညာဉ်ဆေးပင်များကို တည်ငြိမ်စွာ ရရှိနိုင်မည့် အရင်းအမြစ်တစ်ခုကို ရှာတွေ့ရန် မလွယ်ကူသော်လည်း ယခုအခါတွင်မူ ၎င်းကို စွန့်လွှတ်လိုက်ရပေတော့မည်။ ထို့ပြင် ဝူရှန်းဆိုသော သရုပ်သကန်ကိုလည်း နောက်ထပ် အသုံးပြု၍ မရတော့ပေ။
………