အခန်း ၈၅၇

အခန်း ၈၅၇ - မိဖုရားခေါင်ကြီး လော့၏ တည်ခင်းဧည့်ခံပွဲ

"ဟုတ်ကဲ့ပါ မယ်တော်... "

လော့ဟော်အာက စိတ်ပါဝင်စားမှု လုံးဝမရှိသည့် ပုံစံဖြင့် ငြီးငွေ့စွာပင် ပြန်လည် ဖြေကြားလိုက်သည်။ သူမ၏ မယ်တော်က သူမအား ဤပွဲသို့ တက်ရောက်ခိုင်းရသည့် အကြောင်းအရင်းမှာ ပါရမီရှင်များကို ပိုမို ဆွဲဆောင်နိုင်ရန်နှင့် ပါရမီရှင်များအပေါ် သူမ၏ တန်ဖိုးထား မြတ်နိုးမှုကို ကမ္ဘာသိအောင် ပြသရန်အတွက် ဖြစ်ကြောင်း လော့ဟော်အာ ကောင်းကောင်း သိရှိထားသည်။

အကယ်၍ သူမသာ ဤသို့ မပြုလုပ်ခဲ့လျှင်... နောက်ထပ် ပါရမီရှင်များနှင့် သူတို့၏ နောက်ကွယ်က မိသားစုများက သူတို့၏ အစုအဖွဲ့ဘက်သို့ ဝင်ရောက်ပူးပေါင်းရန် မည်သို့ စိတ်အားထက်သန် ကြပါတော့မည်နည်း။

မယ်တော် ရွှမ်ဟို့သည် လော့ဟော်အာကို တစ်ချက် လှမ်းကြည့်လိုက်ပြီး သူမ၏ စိတ်ထဲတွင် သက်ပြင်းချလိုက်မိသည်။ လော့ဟော်အာက ဤကိစ္စများကို စိတ်ထဲ၌ ထည့်မထားသော်လည်း ကောင်းကင်နီမင်းသား ကမူ အလွန်ပင် ကြီးမားလှသော အင်အားစုတစ်ခုကို တည်ဆောက်ထားခဲ့ပြီး ဖြစ်ကာ ၎င်းမှာ အဆက်မပြတ် တိုးချဲ့လျက် ရှိနေခဲ့သည်။

အကယ်၍ သူတို့ဘက်ကသာ ပြင်းထန်လှသော အရေးယူ ဆောင်ရွက်မှုများကို မပြုလုပ်ခဲ့လျှင် သူတို့ဘက်တွင် ရပ်တည်နေခဲ့ကြသည့် မိသားစုစုစုများနှင့် အစုအဖွဲ့များပင်လျှင် ကောင်းကင်နီမင်းသား၏ စည်းရုံးသိမ်းသွင်းမှုကို ခံရပြီး ဘက်ပြောင်းသွားကြပေလိမ့်မည်။

ထီးနန်းလွှဲပြောင်းပေးရမည့် အချိန်မှာ နီးကပ်လာခဲ့ပြီ ဖြစ်သဖြင့် မယ်တော် လော့နှင့် ကောင်းကင်နီမင်းသားတို့မှာ ရနိုင်သမျှသော နည်းလမ်းပေါင်းစုံကို အသုံးပြုနေကြခြင်း ဖြစ်သည်။

ထိုအချိန်၌ အလင်းတန်းတစ်ခု ဖြတ်သန်းသွားခဲ့ပြီး မယ်တော် ရွှမ်ဟို့၏ ရှေ့မှောက်တွင် အသံလွှင့်မန္တန်ပြားကလေးတစ်ခု ပေါ်ထွက်လာခဲ့သည်။

ထိုအသံလွှင့်မန္တန်ပြားထဲက သတင်းအချက်အလက်ကို ကြားသိလိုက်ရပြီးနောက် မယ်တော် ရွှမ်ဟို့၏ မျက်မှောင် ချက်ချင်းပင် အနည်းငယ် ကြုတ်သွားခဲ့ရသည်။

"ဒါက မယ်တော် လော့ဆီက လာတဲ့ အသံလွှင့်မန္တန်ပြားလားခင်ဗျာ။"

ရွှမ်းကျွင်းယွဲ့က မေးမြန်းလိုက်သည်။ မယ်တော် လော့တွင် ထူးခြားလှသော အသံလွှင့်မန္တန်ပြား ရှိနေခဲ့သဖြင့် ဘေးနားတွင် ရပ်နေခဲ့သော သူက ၎င်းကို တစ်ချက်ကြည့်ရုံမျှဖြင့်တင် မှတ်မိလိုက်ခြင်း ဖြစ်သည်။

"ဟုတ်တယ်... " မယ်တော် ရွှမ်ဟို့က ခေါင်းညိတ်လိုက်သည်။

"မယ်တော် လော့က တည်ခင်းဧည့်ခံပွဲတစ်ခု ပြုလုပ်ထားပြီး ငါတို့ကို စမ်းသပ်မှုမှာ ပါဝင်မယ့် ပါရမီရှင်တွေကို တက်ရောက်ဖို့အတွက် ဖိတ်ကြားထားတယ်။ ကြည့်ရတာ သူမက သူမရဲ့ အင်အားကို ထုတ်ဖော်ပြသဖို့အတွက် စီစဉ်နေတဲ့ ပုံပဲ။"

"ဒါဆိုရင် ကျွန်တော်တို့ ဘာလုပ်ကြမလဲ။"

ရွှမ်းကျွင်းယွဲ့က ဤကိစ္စကို အနည်းငယ် ခက်ခဲသည်ဟု ယူဆလိုက်မိသည်။ သူတို့၏ လက်ရှိ အင်အားမှာ သဘာဝအတိုင်းပင် မယ်တော် လော့၏ အင်အားထက် အများကြီး လျော့နည်းနေဆဲ ဖြစ်သည် မဟုတ်လား။

"ငါတို့ သွားကြတာပေါ့။ ငါတို့ဘက်က ဆွဲဆောင်ထားခဲ့တဲ့ ပါရမီရှင်တွေလည်း သေချာပေါက် ဖိတ်ကြားခြင်း ခံထားရမှာပဲ။ အကယ်၍ ငါတို့သာ မသွားခဲ့ရင်... ထိုပါရမီရှင်တွေက ငါတို့က မယ်တော် လော့ကို ကြောက်ရွံ့နေတယ်လို့ ထင်သွားကြလိမ့်မယ်။ အဲဒီအချိန်ကျရင် သူတို့က ဟိုဘက်အဖွဲ့ရဲ့ စည်းရုံးသိမ်းသွင်းမှုကို ခံသွားရနိုင်တယ်။"

မယ်တော် ရွှမ်ဟို့သည် ထိုအသံလွှင့်မန္တန်ပြားကို ချေဖျက်ပစ်လိုက်ပြီး လော့ဟော်အာကို လှမ်းကြည့်လိုက်သည်။

"ဟော်အာ... မင်း မယ်တော် လော့ရဲ့ နေရာကို ရောက်ရင် လျှောက်ပြီး မဆော့ရဘူး။ မင်းသမီးတစ်ယောက်က မင်းသမီးတစ်ယောက်လိုပဲ ပြုမူနေထိုင်ရမယ်။ မင်းရဲ့ အဓိပ္ပာယ်မရှိတဲ့ အပြုအမူတွေကို အိမ်မှာတင် ထားခဲ့လို့ ရပေမဲ့ အပြင်ကို ရောက်တဲ့အခါမှာတော့... မင်းသာ အရှက်ကွဲအောင် ပြုမူမိမယ်ဆိုရင် အခြားလူတွေက မင်းအပေါ် ဘယ်လိုမျိုး ထင်မြင်သွားကြမလဲဆိုတာ ဘယ်သူမှ မသိနိုင်ဘူး။ ကျေးဇူးပြုပြီး ငါ့ကို စိတ်အေးချမ်းခွင့် ပေးပါဦး"

"ဟုတ်ကဲ့ပါ မယ်တော်။"

လော့ဟော်အာသည် သူမ၏ ချစ်စရာကောင်းလှသော လျှာကလေးကို ထုတ်ပြလိုက်သည်။ သို့သော်လည်း သူမက မယ်တော် ရွှမ်ဟို့၏ ဆုံးမစကားများကို စိတ်ထဲ၌ မှတ်သားထားခြင်း ရှိမရှိကိုမူ မည်သူမျှ မသိရှိနိုင်ကြချေ။

"ငါတို့ လော့မျိုးနွယ်စုရဲ့ တော်ဝင်မြို့တော်ဆီကို ရောက်တော့မယ်။"

ဝိညာဉ်သင်္ဘောထက်တွင် မီးလျှံတိမ်တိုက်ပြည်နယ်မှ တပည့်တစ်ဦးက စိတ်လှုပ်ရှားစွာဖြင့် ပြောလိုက်သည်။

လော့ဖုန်းလင်၏ မျက်လုံးများထဲတွင်ပင် လျှင်မြန်စွာဖြင့် စိတ်လှုပ်ရှားမှု အရိပ်အယောင်များ ဖြတ်သန်းသွားခဲ့ရသည်။

သူမသည် သိုင်းပညာလမ်းကြောင်းကို လိုက်စားရန်အတွက် ပြင်းထန်စွာ ကျင့်ကြံအားထုတ်လာခဲ့ခြင်း ဖြစ်သည်။ သူမသည် အခက်အခဲများစွာကို ကျော်ဖြတ်ပြီး တက်လှမ်းလာခဲ့ရခြင်း ဖြစ်ကာ ယခုအချိန်၌မူ သူမ အမြဲတမ်း တောင့်တခဲ့ရသော သန့်ရှင်းမွန်မြတ်လှသည့် မြေကမ္ဘာဖြစ်သော လော့မျိုးနွယ်စု၏ တော်ဝင်မြို့တော်ဆီသို့ ခိုင်မာလှသော ခြေလှမ်းတစ်လှမ်းကို နောက်ဆုံးတွင် လှမ်းတက်နိုင်ခဲ့ပြီ ဖြစ်သည်။

လော့မျိုးနွယ်စု၏ တော်ဝင်မြို့တော် ဆိုသည်မှာ မည်သူမဆို မိမိစိတ်ကြိုက် လာရောက်နိုင်သော နေရာမျိုး မဟုတ်ချေ။

လော့မျိုးနွယ်စု တော်ဝင်မြို့တော်၏ ဘေးပတ်ပတ်လည်တွင် လှည့်ပတ်နေကြသော မြောက်မြားစွာသော နက်ဗျူလာ အလင်းတန်းများမှာ မြို့တော်ကို ကာကွယ်ပေးထားသည့် အစီအရင်ကြီးတစ်ခု ဖြစ်သည်။ မြို့တော်အတွင်းသို့ ဝင်ရောက်ခွင့် လက်မှတ်ကို မရရှိထားခဲ့ပါက ဝင်ရောက်နိုင်ရန်မှာ လုံးဝ မဖြစ်နိုင်ချေ။

သာမန်တပည့်များအနေဖြင့် သူတို့၏ တစ်သက်တာလုံးတွင် လော့မျိုးနွယ်စု တော်ဝင်မြို့တော်အတွင်းသို့ ဝင်ရောက်နိုင်မည့် အခွင့်အရေးမျိုးကို ဘယ်သောအခါမှ ရရှိနိုင်ကြလိမ့်မည် မဟုတ်ချေ။

"ငါတို့ရဲ့ အရှေ့တည့်တည့်မှာ ရှိနေတာက လော့မျိုးနွယ်စု တော်ဝင်မြို့တော်ပဲ။ မင်းတို့ကို လော့နတ်ဘုရားခန်းမဆီကို တိုက်ရိုက် ပို့ဆောင်ပေးမှာ ဖြစ်ပြီး မင်းတို့က အဲဒီမှာပဲ တည်းခိုရလိမ့်မယ်။

ဒါပေမဲ့... အပျော်မစောကြပါနဲ့ဦး။ မင်းတို့ရဲ့ ဘေးပတ်ပတ်လည်ကို တစ်ချက်လောက် လှည့်ကြည့်လိုက်ကြဦး။"

သူတို့ကို ဦးဆောင်ခေါ်ယူလာခဲ့သော မီးလျှံတိမ်တိုက်ပြည်နယ်မှ တာဝန်ခံပုဂ္ဂိုလ်က ခပ်အေးအေးပင် ပြောလိုက်သည်။

ဝိညာဉ်သင်္ဘော နှစ်စီးထက်တွင် ရှိနေကြသော တပည့်များက ဘေးပတ်ပတ်လည်သို့ လှည့်လည် ကြည့်ရှုလိုက်ကြသောအခါ... တော်ဝင်မြို့တော်၏ ဘေးပတ်လည် နက်ဗျူလာ အလင်းတန်းများ၏ အနီးအနားတွင် ဆိုက်ကပ်ထားကြသော အခြားသော ဝိညာဉ်သင်္ဘော မြောက်မြားစွာကို မြင်တွေ့လိုက်ရတော့သည်။

သူတို့သည် အခြားသော ပြည်နယ်များမှ လာရောက်ကြသည့် ဝိညာဉ်သင်္ဘော မြောက်မြားစွာကို မြင်တွေ့လိုက်ရခြင်း ဖြစ်သည်။

ထိုဝိညာဉ်သင်္ဘောများထက်တွင် ကွဲပြားခြားနားလှသော ပြည်နယ်များ၏ အလံများကို စိုက်ထူထားကြသည်။

"ဟိုက မိုးနတ်သမီးပြည်နယ် (ရဲ့ ဝိညာဉ်သင်္ဘောပဲ၊ ပြီးတော့ ဟိုဘက်က ဝိညာဉ်သင်္ဘောကတော့ မြေကမ္ဘာပျက်စီးခြင်းပြည်နယ် ရဲ့ သင်္ဘောပဲ။" ဟု တပည့်တစ်ဦးက ပြောလိုက်သည်။

တစ်ချက် လှမ်းကြည့်လိုက်ရုံမျှဖြင့်တင် သူတို့သည် အနည်းဆုံး ပြည်နယ်ပေါင်း နှစ်ဆယ်ကျော်ခန့်၏ အလံများကို မြင်တွေ့လိုက်ရခြင်း ဖြစ်သည်။

မြောက်မြားစွာသော အလံများမှာ လေထဲတွင် တဖျတ်ဖျတ် လွင့်ပျံနေကြပြီး ဝိညာဉ်သင်္ဘော တစ်ရာကျော်ခန့်မှာ တော်ဝင်မြို့တော်ဆီသို့ ဦးတည်၍ မောင်းနှင်နေကြသည်။

လော့မျိုးနွယ်စုတွင် စုစုပေါင်း ပြည်နယ် ၁၉၆ ခု ရှိနေကြောင်းနှင့် အချို့သော ပြည်နယ်များမှာ မီးလျှံတိမ်တိုက်ပြည်နယ်နှင့် ဖီးနစ်ပြည်နယ်တို့ထက် အဆပေါင်းများစွာ ပိုမို ကြီးမားကြောင်းကို သူတို့ သိရှိထားကြသည်ဆိုလျှင်ပင်... ဤမြင်ကွင်းက လူတိုင်းကို အလွန်ပင် တုန်လှုပ်ခြောက်ခြားဖွယ်ကောင်းသော ခံစားချက်မျိုးကို ပေးစွမ်းနေဆဲ ဖြစ်သည်။

ထိုပြည်နယ် ၁၉၆ ခုအပြင်... နက်ရှိုင်းလှသော အမွေအနှစ်များ ရှိကြသည့် ရှေးဟောင်း မိသားစုကြီးများလည်း ရှိနေကြသေးသည်။ ဥပမာအားဖြင့် ရွှီရွှေရန်မျိုးနွယ်စုမှာ ထိုကဲ့သို့သော မိသားစုစုစုကြီးထဲမှ တစ်ခု ဖြစ်သည်။ ၎င်းကလည်း မိသားစုအတွင်းမှ ထူးချွန်လှသော ပါရမီရှင်များကို သီးသန့် ပြုစုပျိုးထောင်ပေးပြီး လော့မျိုးနွယ်စု၏ တော်ဝင်မြို့တော်ဆီသို့ စေလွှတ်ခဲ့ခြင်း ဖြစ်သည်။

ဤကဲ့သို့သော မိသားစုကြီးများသည် များသောအားဖြင့် တကယ့်ကို ထူးခြားဆန်းပြားလှသော ထိပ်သီး ပါရမီရှင်များကို သူတို့ကိုယ်တိုင်သာ ပြုစုပျိုးထောင်ပေးလေ့ ရှိကြသည်။ ရန်ယွီ ကဲ့သို့သော အနည်းငယ် ပိုမို အားနည်းသူများကိုသာ အခြားသော ပြည်နယ်များဆီသို့ စေလွှတ်၍ စမ်းသပ်မှုများ ပြုလုပ်စေခဲ့ခြင်း ဖြစ်သည်။

ထို့ကြောင့် တော်ဝင်မြို့တော်သည် ထူးချွန်လှသော အထက်တန်းလွှာ ပါရမီရှင်များဖြင့် ပြည့်နှက်နေရန်အတွက် ကြိုတင် သတ်မှတ်ထားပြီးသား ဖြစ်ပေသည်။

ဒါကို သိရှိထားကြသည်ဆိုသော်လည်း... အဆုံးမရှိနိုင်လောက်အောင် အစီအရီ ထူထပ်စွာ တည်ရှိနေကြသော၊ အလွန်ပင် ကြီးမားလှသော ဝိညာဉ်သင်္ဘောကြီးများ၏ မြင်ကွင်းကို ကိုယ်တိုင် ကိုယ်ကျ မြင်တွေ့လိုက်ရသည့် ခံစားချက်မှာမူ တကယ်ကို အံ့ဩမှင်သက်ဖွယ် ကောင်းလှပေသည်။

ထိုနေရာတွင် ရှိနေကြသော မီးလျှံတိမ်တိုက်ပြည်နယ်မှ လူများမှာ သက်ပြင်းတစ်ချက် မချဘဲ မနေနိုင်ကြတော့ဘဲ သူတို့ကိုယ်သူတို့ ဘယ်လောက်တောင် သေးငယ်လှကြောင်းကို နားလည်သွားကြတော့သည်။

သူတို့သည် ဤကဲ့သို့သော လူများနှင့် ယှဉ်ပြိုင်ရမည် ဖြစ်သဖြင့် သူတို့ထဲက လူအများစုမှာ ပန်းကလေးများကို ပိုမို ပေါ်လွင်စေရန်အတွက် ခြံရံပေးထားရသည့် သစ်ရွက်စိမ်းကလေးများသာ ဖြစ်လာကြရန် ကံကြမ္မာ သတ်မှတ်ခြင်း ခံထားရကြောင်းကို ကောင်းကောင်း သဘောပေါက်လိုက်ကြသည်။

"အို... ဟိုက ကောင်းကင်ပျက်စီးခြင်းပြည်နယ်ရဲ့ ဝိညာဉ်သင်္ဘောပဲ" တပည့်တစ်ဦးက ရုတ်တရက် အော်ပြောလိုက်သည်။

ကောင်းကင်ပျက်စီးခြင်းပြည်နယ် ဆိုသည်မှာ ပြည်နယ် ၁၉၆ ခုထဲတွင် ထိပ်သီး အဆင့်ငါးဆင့်အတွင်း၌ ရပ်တည်နေသော ပြည်နယ်ကြီးများထဲမှ တစ်ခု ဖြစ်သည်။

မီးလျှံတိမ်တိုက်ပြည်နယ် ကမူ အလယ်အလတ် အဆင့်လောက်မှာသာ ရှိနေခဲ့သဖြင့် ပြည်နယ်နှစ်ခုကြားက စွမ်းအား ကွာခြားချက်မှာ လုံးဝ သေးငယ်ခြင်း မရှိချေ။

ကောင်းကင်ပျက်စီးခြင်းပြည်နယ်၏ ဝိညာဉ်သင်္ဘောမှာ စံနှုန်းမီ ဝိညာဉ်သင်္ဘောတစ်စီး ဖြစ်သည်ဆိုသော်လည်း ၎င်း၏ အရွယ်အစားမှာ မီးလျှံတိမ်တိုက်ပြည်နယ်၏ သင်္ဘောထက် အဆပေါင်းများစွာ ပိုမို ကြီးမားလှပေသည်။

ထိုဝိညာဉ်သင်္ဘောကြီးထက်တွင် တင်ဆောင်လာခဲ့သော လူငယ် အထက်တန်းလွှာ ပါရမီရှင်များ၏ အရေအတွက်မှာ မီးလျှံတိမ်တိုက်ပြည်နယ်ထက် အများကြီး ပိုမို များပြားနေမည်မှာ သံသယဖြစ်ဖွယ် မရှိချေ။ ဤကဲ့သို့သော ပြည်နယ်ကြီးတစ်ခုအတွက် နေရာပိုမို ရရှိခြင်းမှာ သဘာဝကျလှပေသည်။

ယီယွင်သည် ကောင်းကင်ပျက်စီးခြင်းပြည်နယ်၏ အလံကို လှမ်းကြည့်လိုက်ရာ ၎င်းတွင် ပေါက်ကွဲထွက်လုနီးပါး ဖြစ်နေသော မီးလျှံတစ်ခု ပါဝင်နေသည်ကို မြင်တွေ့လိုက်ရသည်။ ၎င်း၏ တောက်ပလှသော မီးလျှံအနီရောင်မှာ မျက်စိကိုပင် ကျိန်းစပ်သွားစေနိုင်သည်။

"လော့နတ်ဘုရားခန်းမ စမ်းသပ်မှုမှာ ပြိုင်ဆိုင်မှုက အလွန်ပင် ပြင်းထန်လိမ့်မယ်။ မင်းတို့က မီးလျှံတိမ်တိုက်ပြည်နယ်မှာတော့ အတော်ဆုံးတွေ ဖြစ်နိုင်ကြပေမဲ့ ပြည်နယ် ၁၉၆ ခုက လာကြတဲ့ ပါရမီရှင်တွေ ကြားထဲမှာတော့ မင်းတို့က ဒီလောက်အထိ အာရုံစိုက်မှုကို ခံရမှာ မဟုတ်ဘူး။

ဒါ့အပြင်... မမေ့ပါနဲ့ဦး၊ အဲဒီနေရာမှာ အင်အားအကောင်းဆုံး အစုအဖွဲ့တစ်ခု ရှိနေသေးတယ်၊ အဲဒါကတော့ လော့မျိုးနွယ်စု တော်ဝင်မြို့တော်ပဲ။ လော့မျိုးနွယ်စု တော်ဝင်မြို့တော်ရဲ့ စွမ်းအားက ဘယ်ပြည်နယ်၊ ဘယ်မိသားစုစုစုထက်မဆို အများကြီး ပိုမို သာလွန်တယ်။ မင်းတို့အနေနဲ့ လော့နတ်ဘုရားခန်းမ စမ်းသပ်မှုမှာ ကောင်းမွန်တဲ့ ရလဒ်တစ်ခု ရရှိနိုင်ဖို့အတွက် မင်းတို့ရဲ့ ကိုယ်ပိုင် ကြိုးစားအားထုတ်မှုအပေါ်မှာပဲ မူတည်လိမ့်မယ်။"

သူတို့ကို ဦးဆောင်လာခဲ့သော တာဝန်ခံပုဂ္ဂိုလ်က ပြောကြားလိုက်ပြီးနောက် သူ၏ လက်ကို ဝှေ့ယမ်းလိုက်ရာ ဝိညာဉ်သင်္ဘော နှစ်စီးမှာ နက်ဗျူလာ အလင်းတန်းများကို ဖြတ်သန်းသွားခဲ့ကြပြီး လော့မျိုးနွယ်စု တော်ဝင်မြို့တော်ဆီသို့ ဦးတည်၍ မောင်းနှင်သွားခဲ့တော့သည်။

ဝိညာဉ်သင်္ဘောသည် နက်ဗျူလာ အလင်းတန်းများကို အထပ်ထပ် ဖြတ်သန်းသွားခဲ့ပြီးနောက် ထက်မြက်လှသော ဓားတစ်စင်းအလား မတ်မတ်ရပ်တည်နေသည့် နတ်ဘုရားတောင်တန်းတစ်ခု၏ အနီးနားသို့ လျင်မြန်စွာပင် ချဉ်းကပ်သွားခဲ့သည်။

ယီယွင်သည် အောက်ဘက်သို့ ငုံ့ကြည့်လိုက်ပြီး လေကို ခပ်ဖွဖွလေး ရှူထုတ်လိုက်မိသည်။

ဤပြိုင်ဆိုင်မှုက တကယ်ကို ပြင်းထန်လှပေသည် တကား။

သို့သော်လည်း ဤအရာက ယီယွင်၏ စိတ်ထဲတွင် စိတ်လှုပ်ရှားမှုများကို ပိုမို ဖြစ်ပေါ်လာစေခဲ့သည်။ သူသည် အခုလေးတင် အဆင့်တက်လှမ်းထားခဲ့ခြင်း ဖြစ်သဖြင့် သူ၏ ကိုယ်ပိုင် စွမ်းအားများကို စမ်းသပ်ကြည့်ချင်နေခဲ့သည် မဟုတ်လား။

ဝူး........

လေပြင်းများ တိုက်ခတ်နေစဉ်မှာပင် ပြည်နယ် ၁၉၆ ခုမှ လော့နတ်ဘုရားခန်းမ စမ်းသပ်မှုတွင် ပါဝင်ဆင်နွှဲကြမည့် ပါရမီရှင်များကို တင်ဆောင်လာခဲ့ကြသော ဝိညာဉ်သင်္ဘောများမှာ တော်ဝင်မြို့တော်ဆီသို့ ဆိုက်ရောက်လာခဲ့ကြပြီ ဖြစ်သည်။

သူတို့သည် ကျယ်ပြန့်လှသော စင်မြင့်ကြီးတစ်ခု တည်ဆောက်ထားသည့် တောင်တန်းကြီးတစ်ခုပေါ်သို့ ဆင်းသက်လိုက်ကြသည်။

ထိုစင်မြင့်ကြီးမှာ ဘေးပတ်ပတ်လည်ရှိ အခြားသော နတ်ဘုရားတောင်တန်းများနှင့် တစ်သားတည်း ဖြစ်နေခဲ့ပြီး လေထဲတွင် လွင့်မျောနေသည့် ပြားချပ်လှသော မြေပြင်ကျယ်ကြီးတစ်ခုအလား ထင်မှတ်ရပေသည်။ ကြီးမားလှသော ဝိညာဉ်သင်္ဘောကြီးတစ်စီးပင်လျှင် ထိုစင်မြင့်ကြီးပေါ်သို့ ဆင်းသက်လိုက်သောအခါ ဖုန်မှုန့်ကလေးတစ်ခုမျှသာ ဖြစ်သွားရတော့သည်။

ထိုစင်မြင့်ကြီး၏ ဘေးပတ်ပတ်လည်တွင် ကြီးမားပြီး ခမ်းနားထည်ဝါလှသော နန်းတော်ကြီးများ ရှိနေကြပြီး ယီယွင်သည်လည်း ၎င်းတို့ထဲမှ နန်းတော်တစ်ခုဆီသို့ သတ်မှတ်ခြင်း ခံလိုက်ရသည်။

ထိုနန်းတော်ကြီးမှာ လင်းထိန်နေပြီး ကျယ်ဝန်းလှကာ အသုံးအဆောင် ပစ္စည်းကိရိယာများလည်း စုံလင်စွာ ရှိနေခဲ့သည်။ ထို့အပြင် သူ့ကို ပြုစုလုပ်ကျွေးရန်အတွက် အစေခံ ဆယ်ယောက်မကလည်း ရှိနေခဲ့သေးသည်။ နန်းတော်၏ အလယ်ကောင်ရှိ စားပွဲတစ်ခုပေါ်တွင်မူ ဖိတ်စာတစ်စောင် ရှိနေခဲ့သည်။

၎င်းကို ဖွင့်ကြည့်လိုက်သောအခါ... ယီယွင်သည် ၎င်းမှာ တည်ခင်းဧည့်ခံပွဲ ဖိတ်စာတစ်စောင် ဖြစ်ကြောင်းနှင့် ၎င်း၏ အောက်ခြေတွင် လက်မှတ်ရေးထိုးထားသူမှာ မိဖုရားခေါင်ကြီး လော့ ဖြစ်ကြောင်းကို သိရှိလိုက်ရတော့သည်။

ယီယွင် ခဏမျှ စဉ်းစားလိုက်မိသည်။ မိဖုရားခေါင်ကြီး လော့သည် ကောင်းကင်နီမင်းသား၏ မယ်တော်အရင်း ဖြစ်ကြောင်းကို သူ သိရှိထားသည်။ လော့နတ်ဘုရားခန်းမ စမ်းသပ်မှုကြီးက ဤမျှလောက်အထိ ပြင်းထန်လှသော မုန်တိုင်းတစ်ခုအလား ဖြစ်ပေါ်နေရခြင်းမှာ အဓိကအားဖြင့် ကောင်းကင်နီမင်းသား နှင့် မင်းသမီး ခရမ်းပြာဝိညာဉ်တို့ကြားက ပြိုင်ဆိုင်မှုကြောင့် ဖြစ်ရခြင်း ဖြစ်သည်။

"မိဖုရားခေါင်ကြီး လော့က ငါတို့ကိုတင် တည်ခင်းဧည့်ခံပွဲကို ဖိတ်ကြားထားတာ မဟုတ်ဘဲ မယ်တော် ရွှမ်ဟို့ကိုပါ ဖိတ်ကြားထားတာပဲ... "

ယီယွင်သည် ဖိတ်စာထဲက မိတ်ဆက်စာသားများကို ဖတ်ရှုလိုက်ပြီး အနည်းငယ် အံ့အားသင့်သွားခဲ့ရသည်။ သို့သော်လည်း ဘာပဲဖြစ်ဖြစ် အခုအချိန်၌ သူသည် လော့မျိုးနွယ်စု၏ တပည့်တစ်ဦး ဖြစ်နေခဲ့ပြီ ဖြစ်သဖြင့် မိဖုရားခေါင်ကြီးတစ်ပါး၏ တည်ခင်းဧည့်ခံပွဲ ဖိတ်ကြားချက်ကို ငြင်းပယ်ရန်အတွက်မူ ဘာအကြောင်းပြချက်မှ မရှိချေ။