အခန်း ၈၆၃

အခန်း ၈၆၃ - ခွန်အားပြသခြင်း

ရန်ရွှဲ့ယီနှင့် တုန်းလင်းယုတို့ နှစ်ဦးစလုံးကမူ အကယ်၍ သူတို့သာ ဤကဲ့သို့ လူအများအာရုံစိုက်လှသော နေရာမျိုးတွင် ထိုင်နေရမည်ဆိုပါက (ထို့အပြင် လော့ဟော်အာ၏ ဘေးနားတွင် ဖြစ်နေပါက) သူတို့၏ တင်ပါးကို ခုံ၏ သုံးပုံတစ်ပုံခန့်သာ တင်ပြီး ကျောကုန်းကို အလွန်ပင် မတ်မတ်ထားကာ ထိုင်နေကြလိမ့်မည်ဟု တွေးတောမိကြသည်။

သူတို့အနေဖြင့် အစားအစာများကို အတတ်နိုင်ဆုံး ယူဆောင်စားသောက်လိမ့်မည် မဟုတ်ဘဲ အကယ်၍ စားသောက်မည်ဆိုလျှင်ပင် သေးငယ်လှသော အစိတ်အပိုင်းလေးများကိုသာ စားကြလိမ့်မည် ဖြစ်သည်။

စားသောက်နေစဉ်အတွင်း သူတို့၏ သွားများကို အပြင်သို့ မမြင်စေရန် ထိန်းသိမ်းထားကြမည် ဖြစ်သလို ဝါးစားသည့် အသံမျိုးကိုလည်း လုံးဝ ထွက်ပေါ်လာစေလိမ့်မည် မဟုတ်ချေ။

အကယ်၍ ဝိညာဉ်အရက်ကို သောက်သုံးမည်ဆိုပါကလည်း အရက်ခွက်ကို လက်နှစ်ဖက်ဖြင့် သေသေချာချာ ကိုင်မြှောက်ပြီး ရိုသေလေးစားစွာ သောက်ကြလိမ့်မည် ဖြစ်သည်။

ထို့အပြင် အကယ်၍ မယ်တော်ကြီးနှစ်ဦးက အရက်ခွက်ကို မကိုင်မြှောက်သေးသရွေ့ သူတို့၏ အရက်ခွက်ကို လုံးဝ ထိတွေ့ကြလိမ့်မည် မဟုတ်ချေ။

သို့သော်လည်း ယီယွင်ကို လှမ်းကြည့်လိုက်သည့် အခါတွင်မူ... သူက တကယ့်ကို အနှိုင်းမဲ့နေခဲ့သည်။ သူက အစားအစာများကို တစ်လုတ်ပြီးတစ်လုတ် အငန်းမရ ငုံ့စားနေခဲ့သည်။ မည်သည့် ဟင်းလျာက ပိုမို လက်ရာမြောက်ပုံရသလဲ သို့မဟုတ် မည်သည့် ဟင်းလျာတွင် ယွမ်ချီ အရှိန်အဝါ ပိုမို ကြွယ်ဝနေသလဲဆိုသည်ကို ကြည့်ပြီး ၎င်းတို့ကိုသာ ရွေးချယ်စားသောက်နေခဲ့သည်။

အရက်နှင့် ပတ်သက်၍မူ သူက အစားအစာများကို အလွန်အကျွံ စားမိ၍ သီးသွားမှာကို စိုးရိမ်နေသည့်အလား အစားစားရင်း တစ်ကျိုက်ချင်းစီ သောက်သုံးနေခဲ့ပြီး အစားအစာများ ဗိုက်ထဲသို့ အလွယ်တကူ လျှောကျသွားစေရန်အတွက် ဝိညာဉ်အရက်ကို အသုံးပြုနေခဲ့သည်။

ဤအရာက တကယ့်ကို တောသားတစ်ယောက်၏ စရိုက်လက္ခဏာကို ပြီးပြည့်စုံစွာ ပြသနေခြင်းပင် ဖြစ်တော့သည်။

ကံကောင်းထောက်မစွာဖြင့် မယ်တော် လော့၏ စိတ်ရှည်သည်းခံနိုင်စွမ်းမှာ အလွန်ပင် ကောင်းမွန်လှပေသည်။ စည်းကမ်းတွေကို လုံးဝ မသိနားမလည်ဘဲနှင့် ဤနေရာတွင် ထိုင်ကာ ပြဿနာရှာနေသည့် လူသားကောင်လေးတစ်ယောက် ရှိနေခဲ့သည်ဆိုသော်လည်း သူမက ဒါကို မမြင်ချင်ယောင်ဆောင်ပြီး လျစ်လျူရှုထားပေးနိုင်ခဲ့သည်။

"ယွင်လေး... မင်းက ငတ်မွတ်နေတဲ့ သရဲတစ်ကောင် ဝင်စားလာတာလား။ ဘာဖြစ်လို့ ဒီလောက်တောင် အမြန်ကြီး စားနေရတာလဲ။"

လော့ဟော်အာသည် ယီယွင်၏ အပြုအမူများကို ကြည့်ပြီး အလွန်ပင် သဘောကျနေခဲ့ကာ ရယ်မောချင်စိတ်များ ဖြစ်ပေါ်နေခဲ့သည်။ သို့သော်လည်း အပြင်ပန်းတွင်မူ သူမက မိမိ၏ မြင့်မြတ်တင့်တယ်လှသော တော်ဝင် မင်းသမီးတစ်ပါး၏ ပုံစံကို ဆက်လက် ထိန်းသိမ်းထားဆဲ ဖြစ်သည်။

လော့ဟော်အာသည် ဤကဲ့သို့သော အခမ်းအနားမျိုးကို အလွန်ပင် မုန်းတီးလှသည်။ ၎င်းက ပျင်းစရာ ကောင်းလွန်းလှရုံတင်မကဘဲ တော်ဝင်ကျင့်ဝတ်များကိုလည်း အမြဲတမ်း ဂရုစိုက်နေရခြင်းကြောင့် ဖြစ်ပေသည်။ မိမိကိုယ်ကို ဖျော်ဖြေသည့်အနေဖြင့် ယီယွင်နှင့် စကားပြောဆိုနေရခြင်းက ပိုမို၍ ကောင်းမွန်လှပေသည်။

"မယ်တော်ကြီး လော့က ငါတို့ကို တည်ခင်းဧည့်ခံနေတာပဲလေ။ ဒါ့အပြင် သူမက မင်းရဲ့ ကျောင်းတော်က ရန်သူကြီး ဖြစ်နေတာမလား။ သူမက ဒီလောက်တောင် ကောင်းမွန်လှတဲ့ ဝိညာဉ် အစားအစာတွေကို ထုတ်ပေးထားတာမို့လို့ ငါက ၎င်းတို့ကို အဝစားပစ်တာက ပိုကောင်းတာပေါ့။ ဒါက ငါ့ဘက်က နစ်နာစရာ အကြောင်းမှ မရှိတာ။"

ယီယွင်က ၎င်းကို သဘာဝကျလှသည့်အလား အသံပို့လွှတ်ကာပြောလိုက်သည်။

သူ၏ လေသံထဲတွင် မယ်တော် လော့အပေါ် ကြောက်ရွံ့ခြင်း သို့မဟုတ် ရိုသေလေးစားခြင်းမျိုး လုံးဝ ရှိမနေခဲ့ချေ။

"ဟိဟိ... အကယ်၍ မင်းမှာ သူမကို ဒေဝါလီခံသွားအောင်အထိ စားပစ်နိုင်တဲ့ အရည်အချင်း ရှိမယ်ဆိုရင်တော့ ပိုတောင် ကောင်းသေးတာပေါ့။ ငါ မင်းကို ပြောပြမယ်... အဲ့မြေခွေးမအိုကြီးက အပြင်ပန်းမှာ ကမ္ဘာကြီးရဲ့ မိခင်ကြီးတစ်ဦးအလား ဟန်ဆောင်နေပေမယ့်... တကယ်တမ်းကျတော့ သူမရဲ့ အရိုးထဲအထိကို ယုတ်မာကောက်ကျစ်တာ သိလား။"

တော်ဝင်နန်းတော်အတွင်း၌ လော့ဟော်အာသည် နည်းလမ်းအမျိုးမျိုးဖြင့် ချုပ်ထိန်းခြင်း ခံထားရသဖြင့် သူမက မည်သည့် စကားစုကိုမျှ စည်းမဲ့ကမ်းမဲ့ မပြောဆိုဝံ့ခဲ့ချေ။ ယခုအခါတွင်မူ သူမသည် မိမိ၏ မိတ်ဆွေဟောင်းတစ်ဦးနှင့် ပြန်လည် ဆုံတွေ့ခဲ့ရပြီ ဖြစ်သဖြင့် လော့ဟော်အာအနေဖြင့် စကားပြောဆိုရာတွင် မည်သည့် စိုးရိမ်ပူပန်မှုမျိုးမျှ ရှိမနေခဲ့တော့ချေ။

ယခင်က လော့ဟော်အာ ဆုံတွေ့ခဲ့ရဖူးသမျှ လူတိုင်းမှာ မယ်တော် လော့ ဖြစ်စေ၊ မယ်တော် ရွှမ်ဟို့ ဖြစ်စေ သို့မဟုတ် သူမကိုယ်တိုင် ဖြစ်စေ အားလုံးအပေါ်တွင် အလွန်ပင် ရိုသေကျိုးနွံစွာ ဆက်ဆံလေ့ ရှိကြသည်။ သူတို့က အလွန်ပင် အောက်ကျို့လွန်းလှသဖြင့် သူတို့၏ မျက်ဝန်းများကို မြေပြင်ပေါ်တွင်သာ ထားရှိချင်နေကြပြီး သူတို့၏ ကျောကုန်းများမှာလည်း ပုစွန်ထုပ်ကြီးတစ်ကောင်အလား ကွေးညွတ်နေလေ့ ရှိကြသည်။

လော့ဟော်အာသည် မိမိကဲ့သို့ပင် စည်းကမ်းတွေကို စိတ်ထဲ၌ ထည့်မထားတတ်သည့် ယီယွင်ကို မြင်တွေ့လိုက်ရသည့် အခါတွင် မိမိ၏ ရင်ဖွင့်ဖော် ရင်ဖွင့်ဖက်တစ်ဦးကို ပြန်လည် ရှာဖွေတွေ့ရှိလိုက်ရသည့်အလား အလွန်ပင် ပျော်ရွှင်သွားခဲ့ရတော့သည်။

ယီယွင်နှင့် လော့ဟော်အာတို့က ယွမ်ချီ အသံလွှင့်ခြင်းမှတစ်ဆင့် ပျော်ရွှင်စွာ စကားပြောဆိုနေကြစဉ်မှာပင် အခြားသော ဖက်၌မူ တည်ခင်းဧည့်ခံပွဲကြီးက သာယာချောမွေ့စွာ လည်ပတ်နေခြင်း မရှိတော့ချေ။

မယ်တော် ရွှမ်ဟို့သည် မယ်တော် လော့က ဤတည်ခင်းဧည့်ခံပွဲကို ကျင်းပရခြင်း၏ ရည်ရွယ်ချက်ကို ကောင်းကောင်း သိရှိထားသည်။ သူမက မိမိ၏ အင်အားစုများကို ပြသချင်နေခဲ့ခြင်း ဖြစ်ပြီး လော့နတ်ဘုရားခန်းမ စမ်းသပ်မှုများတွင် ပါဝင်ကြမည့် လူငယ် ပါရမီရှင်များကို လော့မျိုးနွယ်စု၏ စစ်မှန်သော မိခင်ကြီးမှာ ဘယ်သူလဲဆိုတာကို သိရှိသွားအောင် ပြုလုပ်ချင်နေခြင်း ဖြစ်သည်။

ထိုသို့ ပြုလုပ်ခြင်းအားဖြင့် ပိုမိုများပြားလှသော လူငယ် ပါရမီရှင်များအနေဖြင့် မယ်တော် လော့၏ အင်အားစုများအတွင်းသို့ ဝင်ရောက်ရန် ရွေးချယ်ကြမည် ဖြစ်ပြီး မယ်တော် ရွှမ်ဟို့ကို ကျောခိုင်းသွားကြမည် ဖြစ်ပေသည်။

"ကြားရတာတော့ ညီမတော်က ငါတို့ လော့မျိုးနွယ်စုရဲ့ လော့နတ်ဘုရားခန်းမ စမ်းသပ်မှုတွေမှာ ပါဝင်ဖို့အတွက် မင်းရဲ့ မိသားစုထဲက လူတော်တော်များများကို ခေါ်ဆောင်လာခဲ့တယ်ဆို။

အထူးသဖြင့် ထိုရွှမ်းကျွင်းယွဲ့ ပေါ့ သူက အခုလက်ရှိ ရွှမ်းမိသားစုရဲ့ မျိုးဆက်သစ်တွေထဲမှာ အတော်ဆုံးလို့ ကြားထားမိတယ်။ ဘာဖြစ်လို့ ငါက တူတော်မောင် ကျွင်းယွဲ့ကို ဒီနေ့ပွဲမှာ မမြင်ရတာလဲ။ ငါ သူ့ဆီကိုလည်း ဖိတ်စာတစ်စောင် ပေးပို့ခဲ့တယ်လို့ မှတ်မိနေပါသေးတယ်။"

မယ်တော် လော့က မယ်တော် ရွှမ်ဟို့ကို ရုတ်တရက် လှမ်း၍ မေးမြန်းလိုက်သည်။

သူမ၏ အသံမှာ အလွန်ပင် ကျယ်လောင်လှခြင်း မရှိသော်လည်း ထိုနေရာတွင် ရှိနေကြသော လူတိုင်းကမူ သေသေချာချာ ကြားလိုက်ရပေသည်။

ရွှမ်းကျွင်းယွဲ့သည် ရွှမ်းမိသားစု၏ မျိုးဆက်သစ်လူငယ်များအကြားတွင် ဩဇာညောင်းလှသော ပုဂ္ဂိုလ်တစ်ဦး ဖြစ်ပေသည်။ ရန်ရွှဲ့ယီနှင့် တုန်းလင်းယုတို့နှင့် နှိုင်းယှဉ်မည်ဆိုပါက သူ၏ ကျော်ကြားမှုမှာ သူတို့ထက် အများကြီး ပိုမို ကျော်လွန်လှပေသည်။

သူက တော်ဝင်မြို့တော်၏ ကြီးမြတ်သော သခင်လေး လေးပါးထဲတွင် ပါဝင်ခြင်း မရှိရခြင်းမှာ ရွှမ်းမိသားစုက တော်ဝင်မြို့တော်အတွင်း၌ အခြေစိုက်ထားခြင်း မရှိသောကြောင့် ဖြစ်သည်။

မယ်တော် ရွှမ်ဟို့က ပြုံးလိုက်ရင်း ပြန်ပြောလိုက်သည်။

"ကျွင်းယွဲ့က အခုအချိန်မှာ သီးသန့် ကျင့်ကြံခြင်း ဝင်နေဆဲမို့လို့ သူက နောက်လာမယ့် ရက်အနည်းငယ်အတွင်းမှာ တံခါးအပြင်ဘက်သို့ တစ်လှမ်းမျှပင် ထွက်လာလိမ့်မည် မဟုတ်ပါဘူး။ သူက လော့နတ်ဘုရားခန်းမ စမ်းသပ်မှုတွေအတွက် ပြင်ဆင်မှုတွေ ပြုလုပ်နေတာ ဖြစ်ပါတယ်။"

မယ်တော် ရွှမ်ဟို့သည် ထိုမေးခွန်းကို ရှောင်လွှဲရန်အတွက် ဆင်ခြေတစ်ခုကို အသုံးပြုလိုက်ခြင်း ဖြစ်သည်။ ရွှမ်းကျွင်းယွဲ့က သီးသန့် ကျင့်ကြံခြင်း ဝင်နေခြင်း မရှိမှာ သေချာလှပေသည်။

ထိုအချိန်တုန်းက သူသည် လော့ဟော်အာ၏ နန်းတော်သို့ သွားရောက်ခဲ့ပြီး လော့ဟော်အာထံသို့ သတင်းစကားများ ပေးပို့ခဲ့သေးသည် မဟုတ်ပါလား။

သို့သော်လည်း မယ်တော် ရွှမ်ဟို့သည် ရွှမ်းကျွင်းယွဲ့ကို မယ်တော် လော့ ကျင်းပသည့် ဤတည်ခင်းဧည့်ခံပွဲသို့ တက်ရောက်ခွင့်ပြုလိမ့်မည် မဟုတ်ချေ။ အဘယ်ကြောင့်ဆိုသော် မယ်တော် ရွှမ်ဟို့အနေဖြင့် မယ်တော် လော့က ဤပွဲတွင် မိမိ၏ ခွန်အားများကို အစွမ်းပြချင်နေကြောင်း ကောင်းကောင်း သိရှိထားပြီး သူမအနေဖြင့် ရွှမ်းကျွင်းယွဲ့ကို ပထမဆုံးသော သားကောင်အဖြစ် အသုံးချပြီး စတင် တိုက်ခိုက်လာရန် အလွန်ပင် ဖြစ်နိုင်ချေ ရှိနေသောကြောင့် ဖြစ်သည်။

ရွှမ်းကျွင်းယွဲ့က ရွှမ်းမိသားစု၏ အတော်ဆုံးသော ပါရမီရှင်တစ်ဦး ဖြစ်ပြီး သူတို့၏ အဓိက ဂုဏ်ဆောင် အလံတော်တစ်ခုအဖြစ် သတ်မှတ်ထားခြင်း ဖြစ်သည်။ အကယ်၍ မယ်တော် လော့သာ ဤတည်ခင်းဧည့်ခံပွဲတွင် ရွှမ်းကျွင်းယွဲ့ကို ပစ်မှတ်ထား တိုက်ခိုက်လာခဲ့မည်ဆိုပါက ရွှမ်းကျွင်းယွဲ့သာ ရှုံးနိမ့်သွားခဲ့မည်ဆိုလျှင် မယ်တော် ရွှမ်ဟို့၏ အင်အားစုများဘက်မှ ကြီးမားလှသော သိက္ခာကျဆင်းမှုမျိုးကို ရင်ဆိုင်ရမှာ သေချာလှပေသည်။

လော့နတ်ဘုရားခန်းမ စမ်းသပ်မှုများ မစတင်မီအချိန်တွင် မယ်တော် ရွှမ်ဟို့အနေဖြင့် မည်သည့် အရာကိုမျှ ဆုံးရှုံးခံနိုင်စွမ်း မရှိချေ။

မိမိကိုယ်ကို အားနည်းပုံပြပြီး တိုက်ပွဲကို ရှောင်လွှဲခြင်းက တိုက်ရိုက် ရှုံးနိမ့်ရခြင်းထက် အများကြီး ပိုမို ကောင်းမွန်လှပေသည်။

"သီးသန့် ကျင့်ကြံခြင်း ဟုတ်လား။ ကျွန်တော် ထင်တာကတော့ အစ်ကို ကျွင်းယွဲ့က ကြောက်လို့ မလာရဲတာ ထင်တယ်ဗျာ။"

ဤအခိုက်အတန့်တွင် ကျယ်လောင်လှသော စကားသံကြီးတစ်ခု ထွက်ပေါ်လာခဲ့တော့သည်။

လူတိုင်းက အံ့အားသင့်တုန်လှုပ်စွာဖြင့် ခေါင်းကို လှည့်ကြည့်လိုက်ကြပြီး ၎င်းကို ပြောဆိုလိုက်သည့် လူကို လှမ်းကြည့်လိုက်ကြသည်။ ထိုလူသည် မင်းသမီး မြေခွေးဖြူ၏ အောက်ဘက် တစ်ဆင့်နိမ့်သော နေရာတွင် ထိုင်နေခဲ့ခြင်း ဖြစ်သည်။

ထိုထိုင်ခုံနေရာမှာ ရန်ရွှဲ့ယီနှင့် တုန်းလင်းယုတို့၏ နေရာနှင့် အဆင့်အတန်းချင်း အတူတူပင် ဖြစ်သဖြင့် အလွန်ပင် မြင့်မြတ်လှသော နေရာတစ်ခုအဖြစ် သတ်မှတ်နိုင်ပေသည်။

ထိုစားပွဲတွင် လူနှစ်ဦး ထိုင်နေခဲ့ကြပြီး အမျိုးသားတစ်ဦးနှင့် အမျိုးသမီးတစ်ဦး ဖြစ်ကြသည်။ အမျိုးသမီးမှာ ကလေးငယ်တစ်ဦးအလား သေးငယ်လှသော ခန္ဓာကိုယ်ကို ပိုင်ဆိုင်ထားပြီး အမျိုးသားမှာမူ ငယ်ရွယ်နုပျိုကာ ကြွက်သားအမြှောင်းမြှောင်းနှင့် သန်မာထွားကျိုင်းလှသူ ဖြစ်သည်။

သူက အနီရောင် တိုက်ပွဲဝင် ချပ်ဝတ်တန်ဆာကို ဝတ်ဆင်ထားပြီး သူ၏ စကားပြောသံမှာ စည်တော်ကြီးတစ်ခုကို တီးခတ်လိုက်သည့်အလား ထစ်ချုန်း ထွက်ပေါ်လာခဲ့ခြင်း ဖြစ်သည်။

ရွှမ်းကျွင်းယွဲ့ကို လူသိရှင်ကြား လှောင်ပြောင် သရော်လိုက်သည့် လူမှာဤသန်မာထွားကျိုင်းလှသော လူငယ် ဖြစ်နေခဲ့တော့သည် တကား။

မယ်တော် ရွှမ်ဟို့က မျက်မှောင်ကြုတ်လိုက်သည်။ သူမ ပိုင်ဆိုင်ထားသည့် အဆင့်အတန်းနှင့်ဆိုလျှင် ဤကဲ့သို့သော မျိုးဆက်သစ် လူငယ်လေးတစ်ဦးက သူမအပေါ် ဤတည်ခင်းဧည့်ခံပွဲတွင် ရိုသေလေးစားမှု မရှိဘဲ ဆက်ဆံလာခြင်းကို ဘယ်လိုမျိုး ခွင့်ပြုထားနိုင်ပါ့မလဲ။

သို့သော်လည်း မယ်တော် ရွှမ်ဟို့ စကားတစ်ခွန်းမျှ မပြောရသေးမီအချိန်မှာပင် မယ်တော် လော့က ချက်ချင်းပင် ထိုလူကို လှမ်း၍ မာန်မဲလိုက်တော့သည်။

"လော့ခွေ့ ငါက မယ်တော်ကြီး ရွှမ်ဟို့နဲ့ စကားပြောနေတာလေ၊ မင်း ဝင်ပါစရာ အကြောင်း မရှိဘူး။"

မယ်တော် လော့၏ စကားသံမှာ အလွန်ပင် ပြင်းထန်လှပြီး သူမ၏ အရှိန်အဝါမှာ မယ်တော် ရွှမ်ဟို့ထက် ပိုမို မြန်ဆန်နေခဲ့သည်။

သူမ၏ စကားစုမှာ လော့ခွေ့ကို မာန်မဲနေသည့်အလား ထင်မှတ်ရသော်လည်း တကယ်တမ်းတွင် ၎င်းမှာ မယ်တော် ရွှမ်ဟို့၏ နှုတ်ကို ပိတ်ပစ်လိုက်ခြင်း ဖြစ်ပေသည်။

မာန်မဲခြင်း ခံရရုံမျှဖြင့် အသားတစ်တုံး ပြုတ်ကျသွားမှာ မဟုတ်ချေ။ ဒါ့အပြင် လော့ခွေ့ ပြောဆိုလိုက်သည့် စကားစုမှာ မယ်တော် လော့ကိုယ်တိုင်က နောက်ကွယ်မှနေ၍ ခိုင်းစေထားခဲ့ခြင်း ဖြစ်ရန်ပင် အလွန် ဖြစ်နိုင်ချေ ရှိနေသည်။

အိမ်ရှင်တစ်ဦးအနေဖြင့် သူမက အချို့သော စကားများကို တိုက်ရိုက် ပြောဆို၍ မရနိုင်ချေ။ ဤကဲ့သို့သော စည်းမဲ့ကမ်းမဲ့ မျိုးဆက်သစ် လူငယ်လေးတစ်ဦးကို အသုံးချပြီး ထိုစကားများကို ပြောဆိုစေခြင်းက ဘာမှအပြစ်မရှိသော်လည်း ၎င်းက မယ်တော် ရွှမ်ဟို့၏ မျက်နှာကို ဖြတ်ရိုက်လိုက်သည့်အလား အကျိုးသက်ရောက်မှုကို ရရှိစေခဲ့သည် မဟုတ်ပါလား။

ထိုနေရာတွင် ရှိနေကြသော လူငယ် ပါရမီရှင် အထက်တန်းလွှာများမှာ ချက်ချင်းပင် ဤတည်ခင်းဧည့်ခံပွဲကြီးအတွင်း၌ ပေါက်ကွဲတော့မည့်ယမ်းများ စတင် ရရှိလာခဲ့ပြီ ဖြစ်ကြောင်း ခံစားလိုက်ရတော့သည်။

သေချာတာပေါ့ မယ်တော် လော့နှင့် မယ်တော် ရွှမ်ဟို့တို့က ကျောင်းတော်က ရန်သူကြီးများ ဖြစ်ကြသည်။ သူတို့က ဘယ်လိုလုပ်ပြီး တည်ခင်းဧည့်ခံပွဲတစ်ခုတွင် အေးအေးချမ်းချမ်း အတူတူ ရှိနေနိုင်ကြပါ့မလဲ။

သို့သော်လည်း မယ်တော် ရွှမ်ဟို့မှာမူ ပိုမို၍ အကွက်စေ့လှပြီး ဆိုးရွားလှသော အကျိုးဆက်များကို ရှောင်လွှဲရန်အတွက် ရွှမ်းကျွင်းယွဲ့ကို ဤပွဲသို့ မတက်ရောက်စေရန် တမင်တကာ တားဆီးထားခဲ့ခြင်း ဖြစ်သည်။

၎င်းက လှပသော လှုပ်ရှားမှုတစ်ခု ဖြစ်သည်ဆိုသော်လည်း မယ်တော် ရွှမ်ဟို့အနေဖြင့် မယ်တော် လော့ကို တစ်ပန်း အရှုံးပေးလိုက်ရခြင်း ဖြစ်ပေသည်။

ယီယွင်သည် သူ၏ နှုတ်ခမ်းကို သုတ်လိုက်ရင်း လော့ခွေ့ကို လှမ်းကြည့်လိုက်သည်။ သူ၏ ကျင့်ကြံခြင်း အဆင့်အတန်းမှာ ကောင်းကင်တက်လှမ်းခြင်း အဆင့်၏ ပြီးပြည့်စုံခြင်း အဆင့်သို့ ရောက်ရှိနေခဲ့ပြီ ဖြစ်သည်။

သူ့တွင် နက်ရှိုင်းလှသော ယွမ်ချီ အခြေခံအုတ်မြစ်နှင့် ကြီးမားလှသော သွေးမျိုးဆက် စွမ်းအားများ ရှိနေသည်။ သူ၏ စစ်မှန်သော ခွန်အားမှာ နားလည်ရခက်လှပေသည်။

၎င်းက ယီယွင်က သူ့အပေါ် ပေးလိုက်သည့် အကဲဖြတ်ချက် ဖြစ်ပေသည်။

"အခုနက ပြောတဲ့ ရွှမ်းကျွင်းယွဲ့က အဲ့လူကောင်ကြီးကို မနိုင်ဘူးလား။"

ယီယွင်က လော့ဟော်အာထံသို့ ယွမ်ချီအသံပို့လွှတ်ကာမေးမြန်းလိုက်သည်။

လော့ဟော်အာက နှာခေါင်းရှုံ့လိုက်ရင်း ပြန်ပြောလိုက်သည်။

"သူ့ကို မနိုင်ဘူးလို့တော့ အသေအချာ ပြောလို့မရပါဘူး၊ ဒါပေမဲ့ ငါနဲ့ မယ်တော်ရဲ့ နောက်ကွယ်မှာ ရှိတဲ့ လူဦးရေက တော်တော်လေးကို နည်းပါးလွန်းလှတယ်။ အတော်ဆုံး တစ်ယောက်ကတော့ ရွှမ်းကျွင်းယွဲ့ပဲပေါ့။

ဒါပေမဲ့ မယ်တော်ကြီး လော့ရဲ့ ဘက်မှာတော့ လူတွေ အများကြီး ပိုရှိနေတာလေ။ အခု မင်း မြင်တွေ့နေရတဲ့ လော့ခွေ့က ၎င်းတို့ထဲက တစ်ယောက်ပဲ ရှိသေးတယ်။ အကယ်၍ ငါတို့က တကယ်တမ်း ပြိုင်ဆိုင်ကြမယ်ဆိုရင် ငါတို့ဘက်က ဆုံးရှုံးမှုတွေ ရှိလာမှာ သေချာတယ်။"

"ဒါဆိုရင်တော့ ငါ နားလည်ပါပြီ။"

လက်သီးနှစ်ဖက်က လက်လေးဖက်ကို ယှဉ်ပြိုင်ရန် ခက်ခဲလှသည်ဟူသော စကားပုံအတိုင်းပင် လူဦးရေ ပိုမိုများပြားခြင်းက အမြဲတမ်း အားသာချက် ရှိနေမှာ သေချာလှပေသည်။ မယ်တော် ရွှမ်ဟို့နှင့် လော့ဟော်အာတို့၏ အခြေခံ အုတ်မြစ်များမှာ တကယ့်ကို အလွန် အားနည်းလွန်းနေသေးသည် မဟုတ်ပါလား။

"မင်း ပြောချင်တာက မယ်တော်ကြီး လော့က ဤတည်ခင်းဧည့်ခံပွဲကို အသုံးပြုပြီး လော့နတ်ဘုရားခန်းမ စမ်းသပ်မှုတွေထဲ ဝင်ရောက်ကြမယ့် တပည့်တွေကို ခွန်အားပြသချင်နေတာပေါ့ ဒါမှ ထိုလူတွေက သူမရဲ့ အင်အားစုတွေထဲကို ဝင်ရောက်ကြမှာမို့လို့လား။"

"ဟုတ်တယ်... အဲ့ဒီမြေခွေးအိုမကြီးက တကယ့်ကို အကွက်စေ့လွန်းလှတာပဲ"

"သူတို့က ဘယ်လိုမျိုး ယှဉ်ပြိုင်ကြမှာလဲ။ ငါတို့က ဤတည်ခင်းဧည့်ခံပွဲ ခန်းမကြီးထဲမှာတင် တိုက်ခိုက်ကြမှာတော့ မဟုတ်လောက်ပါဘူးနော်။"

ယီယွင်က အနည်းငယ်မျှ စိတ္တဇ ဖြစ်သွားခဲ့ရသည်။ တည်ခင်းဧည့်ခံပွဲ ခန်းမကြီး၏ အလယ်ဗဟိုတွင် နေရာအများကြီး ရှိမနေခဲ့ချေ။ ထို့ကြောင့် အကယ်၍ တိုက်ပွဲတစ်ခု ဖြစ်ပွားလာခဲ့မည်ဆိုပါက ၎င်းက တည်ခင်းဧည့်ခံပွဲ ခန်းမကြီးတစ်ခုလုံးကို ပရမ်းပတာ ဖြစ်သွားစေလိမ့်မည် ဖြစ်သည်။

"အဲဒီလိုမျိုး တိုက်ရိုက် တိုက်ခိုက်ကြမှာတော့ မဟုတ်ပါဘူး။ အခြားသော ကဏ္ဍတွေမှာ အစွမ်းပြတာမျိုး ဖြစ်နိုင်တယ် မင်းရဲ့ အတတ်ပညာတွေကို အကောင်းဆုံး ပြသတာမျိုး ဖြစ်ဖြစ် သို့မဟုတ် တည်ခင်းဧည့်ခံပွဲကို ပိုမို စိတ်ဝင်စားစရာ ကောင်းလာအောင် ပြုလုပ်နိုင်မယ့် အရာမျိုး ဖြစ်ဖြစ်ပေါ့။

အကယ်၍ တကယ်တမ်း လက်ရုံးရည်ချင်း ယှဉ်ပြိုင်ကြမယ်ဆိုရင် ရုပ်ပျက်ဆင်းပျက် ဖြစ်သွားလိမ့်မယ်။ ဘာလဲ မင်းက အဲ့လူကောင်ကြီးနဲ့ ယှဉ်ပြိုင်ချင်နေလို့လား။"

လော့ဟော်အာက ပြုံးရင်း မေးမြန်းလိုက်သည်။

သို့သော်လည်း ယီယွင်က ခေါင်းခါလိုက်ပြီး

"ငါက အဲ့လူကောင်ကြီးကို နိုင်ချင်မှ နိုင်လိမ့်မယ်။"

ရန်သူက ကောင်းကင်တက်လှမ်းခြင်း အဆင့်၏ ပြီးပြည့်စုံခြင်း အဆင့်တွင် ရှိနေခဲ့ပြီး ယီယွင်မှာမူ ကောင်းကင်တက်လှမ်းခြင်း အဆင့်၏ အစောပိုင်း အဆင့်သို့ ဝင်ရောက်ရုံမျှသာ ရှိသေးသည်။

လော့မျိုးနွယ်စု တော်ဝင်မြို့တော်အတွင်း၌ ပါရမီရှင်များစွာ ရှိနေကြသည်။ ယီယွင်သည် မိမိကိုယ်ကို ယုံကြည်မှု ရှိနေခဲ့သည်ဆိုသော်လည်း သူက ဤမျှလောက်အထိ ကြီးမားလှသော ကျင့်ကြံခြင်း အဆင့်အတန်း ကွာခြားချက်ကို ကျော်ဖြတ်ပြီး လော့မျိုးနွယ်စု၏ အကောင်းဆုံးသော ပါရမီရှင် လူငယ်တစ်ဦးကို အနိုင်ယူနိုင်လိမ့်မည်ဟုတော့ အသေအချာ မပြောနိုင်ချေ။

သူ့အနေဖြင့် လော့ခွေ့တွင် မည်သည့် လျှို့ဝှက်ချက် အတတ်ပညာများ ရှိနေလဲဆိုတာကို လုံးဝ မသိရှိရသေးချေ။

အခြားသော ဖက်က လူများမှာမူ ကြိုတင် ပြင်ဆင်မှုများ ပြုလုပ်ပြီးမှ လာခဲ့ကြခြင်း ဖြစ်သဖြင့် အကယ်၍ သူက စိတ်လိုက်မာန်ပါ ပြုလုပ်မိသွားခဲ့မည်ဆိုပါက တိုက်ပွဲ ဖြစ်ပွားလာသည့် အခါတွင် သူက ဆုံးရှုံးမှုများကို ရင်ဆိုင်ရရန် အလွန် ဖြစ်နိုင်ချေ ရှိပေသည်။

"ဟဲဟဲ မင်းက တော်တော်လေးကို တည်ငြိမ်လှတာပဲ။ ယွင်လေး... မင်း နီလာ လှိုင်းတောင်စမ်းသပ်မှုမှာ ပထမနေရာ ရရှိခဲ့တယ်ဆိုတာ ငါ သိပါတယ်။အဲ့လို စွမ်းဆောင်ရည်မျိုးကို ရရှိဖို့အတွက် မင်းအနေနဲ့ အောက်မြေကမ္ဘာမှာ စိတ်ဝင်စားစရာ ကောင်းလှတဲ့ အဖြစ်အပျက်တချို့ကို ကြုံတွေ့ခဲ့ရမှာ သေချာပါတယ်။

ဒါပေမဲ့ တော်ဝင်မြို့တော်က ပါရမီရှင်တွေနဲ့ နှိုင်းယှဉ်မယ်ဆိုရင် မီးလျှံတိမ်တိုက်ပြည်နယနဲ့ ဖီးနစ်ပြည်နယ် တို့က အများကြီး မပြောပလောက်ပါဘူး။ သူတို့ထဲက အများကြီးက တကယ်ကိုပဲ အင်အားကြီးမားတယ်။ မင်းက သူ့ထက် အဆင့်အတန်း အများကြီး ပိုပြီး နိမ့်ကျနေတာလေ၊ အဲဒါကို မင်းက သူ့ကို နိုင်ချင်တာလား။

ခက်ခဲလိမ့်မယ် ဒါ့အပြင် နောက်ထပ် ခြေလှမ်းပေါင်း သောင်းချီ နောက်ဆုတ်ပြီး ပြောရမယ်ဆိုရင်တောင် မင်း သူ့ကို အနိုင်ရခဲ့ရင်တောင် သူ့မှာ အဖော်တွေ အများကြီး ရှိသေးတယ်လေ။ မင်းက သူတို့ ဒါဇင်ဝက်မက ရှိတဲ့ လူတွေကို တစ်ယောက်တည်းနဲ့ အားလုံးကို အနိုင်တိုက်ပစ်နိုင်မှာမို့လို့လား။

အဲ့ဒီကသေးငယ်လှတဲ့ မိန်းကလေးကို လှမ်းကြည့်လိုက်စမ်းပါ။ သူမရဲ့ နာမည်က

လော့ရှောင်သဲ တဲ့... သူမကလည်း လွယ်လွယ်နဲ့ ရင်ဆိုင်လို့ရမယ့် လူစားမျိုး မဟုတ်ဘူးနော်"