အခန်း ၈၆၄

အခန်း ၈၆၄ - မင်းက လူလိမ်ပဲ

"လော့ရှောင်သဲ... လော့ခွေ့..."

ယီယွင်သည် ခန္ဓာကိုယ် တည်ဆောက်ပုံချင်း အလွန်ပင် ကွာခြားလှသော ထိုအမျိုးသားနှင့် အမျိုးသမီးကို လှမ်းကြည့်လိုက်သည်။ လော့ဟော်အာ ပြောပြချက်အရ မယ်တော် လော့၏ နောက်ကွယ်တွင် ပါရမီရှင်များစွာ ရှိနေပြီး လော့ရှောင်သဲနှင့် လော့ခွေ့တို့မှာ ၎င်းတို့ထဲက အနည်းငယ်မျှသာ ရှိသေးသည်ဟု သိရသည်။

တစ်နည်းအားဖြင့် ပြောရမည်ဆိုလျှင် မယ်တော် လော့၏ ဤတည်ခင်းဧည့်ခံပွဲကြီးမှာ သူမ၏ ခွန်အားများကို အစွမ်းပြသရန်အတွက် ရည်ရွယ်ချက် အောင်မြင်သွားခဲ့ပြီ ဖြစ်သည်။ မယ်တော် ရွှမ်ဟို့မှာမူ ကဏ္ဍတိုင်းတွင် သူမထက် အဘက်ဘက်က နိမ့်ကျနေခဲ့ရသည်။

သို့သော်လည်း မယ်တော် လော့သည် ဤမျှလောက်နှင့်တင် အားရကျေနပ်ခြင်း မရှိသေးချေ။ မယ်တော် ရွှမ်ဟို့သည် ရွှမ်းမိသားစု၏ ပါရမီရှင်များကို ဤပွဲသို့ ခေါ်ဆောင်မလာဘဲ တမင်တကာ တိုက်ပွဲကို ရှောင်လွှဲသွားခဲ့သဖြင့် မယ်တော် လော့အနေဖြင့် ဂွမ်းပုံကြီးတစ်ခုကို လက်သီးဖြင့် ထိုးလိုက်ရသည့်အလား မထိရောက်ဟု ခံစားနေရခြင်း ဖြစ်သည်။

"ရွှမ်းကျွင်းယွဲ့သာ ဤနေရာမှာ မရှိတော့ တကယ့်ကို ပျင်းစရာ ကောင်းလှတာပဲဗျာ။"

လော့ခွေ့က စည်းမဲ့ကမ်းမဲ့ လေသံဖြင့် အော်ဟစ်ပြောဆိုလိုက်ရာ သူ၏ စကားသံကြီးက ခန်းမတစ်ခုလုံးတွင် ဟိန်းထွက်သွားခဲ့သည်။

လော့ခွေ့က သူတစ်ပါးကို ပေးလိုက်သည့် အထင်အမြင်မှာ တကယ့်ကို စည်းကမ်းမရှိသည့် တောသားရိုင်းတစ်ယောက်အလား ဖြစ်ပေသည်။

ထို့ပြင် သူက ဤအချက်ကို အသုံးချပြီး ဘောင်ကျော်လှသော စကားများကို တမင်တကာ ပြောဆိုနေခြင်း ဖြစ်ကာ မယ်တော် ရွှမ်ဟို့၏ သည်းခံနိုင်စွမ်း အောက်ခြေစည်းကို ထပ်ခါတလဲလဲ စိန်ခေါ်နေခဲ့ခြင်း ဖြစ်သည်။

မယ်တော် လော့သည် စပျစ်သီးအချို့ကို စားသုံးနေရင်း သူမ၏ မျက်နှာထက်တွင် အပြုံးတစ်ခု ချိတ်ဆွဲထားခဲ့သည်။ သူမတွင် လော့ခွေ့ကို မာန်မဲတားဆီးရန် မည်သည့် ရည်ရွယ်ချက်မျိုးမျှ ရှိမနေခဲ့ချေ။

လော့ခွေ့သည် မိမိကိုယ်ကို ပိုမို၍ တွန်းအားပေးခြင်းခံလိုက်ရသည့်အလား ခံစားလိုက်ရသည်။ သူက မိမိ၏ ထိုင်ခုံနေရာမှ ထရပ်လိုက်ပြီးနောက် လက်နှစ်ဖက်ကို ဆုပ်ကိုင်ကာ လူတိုင်းကို လှမ်း၍ ပြောလိုက်သည်။

"အားလုံးပဲ... ငါတို့တွေက ဒီအတိုင်း စားသောက်နေကြရုံတင်ဆိုရင်တော့ အနည်းငယ် ပျင်းစရာ ကောင်းနေလိမ့်မယ်။ ငါ အားလုံးအတွက် စိတ်လှုပ်ရှားစရာ ကောင်းမွန်တဲ့ အရာတစ်ခုကို ထပ်ဖြည့်ပေးပါရစေ။"

လော့ခွေ့သည် ဤသို့ ပြောဆိုလိုက်ပြီးနောက် သူ၏ အကြည့်များကို မယ်တော် ရွှမ်ဟို့ဘက်က လူငယ် ပါရမီရှင်များဆီသို့ ဝေ့ဝဲကြည့်ရှုလိုက်သည်။ မယ်တော် ရွှမ်ဟို့၏ အင်အားစုထဲတွင် လူငယ် ပါရမီရှင် အတော်များများ ရှိနေခဲ့သည်မှာ ထင်ရှားလှပေသည် (ဥပမာအားဖြင့် ယီယွင်၊ ကုချင်၊ လင်ဝူ )

သို့သော်လည်း လော့ခွေ့အနေဖြင့် သူတို့ကို တိုက်ရိုက် ထွက်လာရန် ခေါ်ယူပြီး ရိုက်နှက်ဆုံးမ၍ မရနိုင်ချေ။ အဘယ်ကြောင့်ဆိုသော် ထိုသို့ ပြုလုပ်ခြင်းက အကျိုးသက်ရောက်မှု မရှိနိုင်သောကြောင့် ဖြစ်သည်။ ယီယွင်ကို ဥပမာထားကြည့်မည်ဆိုပါက သူက ကောင်းကင်တက်လှမ်းခြင်း အဆင့်၏ အစောပိုင်း အဆင့်မျှသာ ရှိသေးသည်။

အကယ်၍ လော့ခွေ့က သူ့ကို အနိုင်ကျင့် ရိုက်နှက်လိုက်လျှင်ပင် မည်သည့် အောင်မြင်မှု အထိမ်းအမှတ်မျိုးမျှ ခံစားရမှာ မဟုတ်ချေ။ ထို့အစား သူက အားနည်းသူကို အနိုင်ကျင့်သည့် လူတစ်ဦးအဖြစ်သာ အများ၏ ကဲ့ရဲ့ခြင်းကို ခံရပေလိမ့်မည်။

သို့သော်လည်း အကယ်၍ သူက ဤလူများကို အနိုင်မတိုက်ခိုက်ဘူးဆိုပါက မယ်တော် ရွှမ်ဟို့၏ ဘက်တွင်လည်း တကယ့်ကို ရင်ဆိုင်ရမည့်သူ လုံးဝ ရှိမနေခဲ့ချေ။

လော့ခွေ့သည် မိမိ၏ မေးစေ့ကို ပွတ်သပ်လိုက်ရင်း သူ၏ အကြည့်များကို တည်ခင်းဧည့်ခံပွဲ ခန်းမကြီးအတွင်း ဝေ့ဝဲကြည့်ရှုလိုက်ရာ. နောက်ဆုံးတွင် လော့ဟော်အာ ထံ၌ ရပ်တန့်သွားခဲ့ရတော့သည်။ ၎င်းနှင့်အတူ ချက်ချင်းပင် သူ၏ နှုတ်ခမ်းထောင့်စွန်းတွင် အပြုံးတစ်ခု ပေါ်ထွက်လာခဲ့သည်။

"မင်းသမီး ခရမ်းပြာဝိညာဉ်... မင်းသမီးရဲ့ မီးဓာတ်ဆိုင်ရာ ဥပဒေသတွေ မှာ ရရှိထားတဲ့ အောင်မြင်မှုတွေက အနှိုင်းမဲ့လှပြီး ပျက်စီးခြင်းကောင်းကင် အတတ်ပညာ မှာလည်း အလွန်ပင် ကျွမ်းကျင်နှံ့စပ်လှတယ်လို့ ကြားသိထားရပါတယ်။ မင်းသမီးရဲ့ သက်တူရွယ်တူတွေထဲမှာ ဘယ်သူမှ မယှဉ်ပြိုင်နိုင်ဘူးလို့လည်း သိရပါတယ်။

ကျွန်တော်မျိုးကလည်း မကြာသေးခင်ကတင် ဤမီးဓာတ်ဆိုင်ရာ ဥပဒေသတွေနဲ့ ပျက်စီးခြင်းကောင်းကင် အတတ်ပညာရပ်ကို လေ့လာစူးစမ်းနေခဲ့တာ ဖြစ်ပြီး အဲ့ဒါတွေအပေါ် အလွန်ပင် စိတ်ဝင်စားမှု ရှိနေခဲ့တာ ဖြစ်ပါတယ်။ သို့သော်လည်း ကျွန်တော်မျိုးက လက်တွေ့ အသုံးချမှုအပိုင်းမှာတော့ အများကြီး မကျွမ်းကျင်သေးပါဘူး။ မင်းသမီးကြီးအနေနဲ့ ကျွန်တော်မျိုးကို အနည်းငယ်မျှ အကြံဉာဏ် ပေးစွမ်းနိုင်မလားခင်ဗျာ။"

လော့ခွေ့က ဤသို့ ပြောဆိုလိုက်သည့် အခါတွင် ထိုနေရာတွင် ရှိနေကြသော လူတိုင်းမှာ တုန်လှုပ်အံ့အားသင့်သွားခဲ့ကြရတော့သည်။

လော့ခွေ့က အကြံဉာဏ် တောင်းခံနေခြင်း ဖြစ်သည်ဆိုသော်လည်း. အကယ်၍ လော့ဟော်အာသာ သူ၏ တောင်းဆိုမှုကို လက်ခံလိုက်မည်ဆိုပါက သူက ဤ အကြံဉာဏ်ပေးခြင်း အခိုက်အတန့်အတွင်း ဆိုးရွားလှသော အပြုအမူတစ်ခုခုကို လုပ်ဆောင်လာရန် အလွန် ဖြစ်နိုင်ချေ ရှိနေသည်။

အကယ်၍ အဲဒီလိုမျိုးသာ ဖြစ်လာခဲ့မည်ဆိုလျှင် ၎င်းက ရိုးရှင်းလှသော အကြံဉာဏ်ပေးခြင်း ကိစ္စရပ်တစ်ခုမျှသာ ဖြစ်တော့မည် မဟုတ်ချေ။

လော့ဟော်အာက ဘယ်လိုမျိုး အဆင့်အတန်း အထောက်အထားကို ပိုင်ဆိုင်ထားတာလဲ။

လော့ခွေ့သည် ရိုက်နှက်ဆုံးမရမည့် သားကောင်ကို ရှာမတွေ့တော့သည့် အခါတွင် လော့ဟော်အာကို ပစ်မှတ်ထား တိုက်ခိုက်လာလိမ့်မည်ဟု မည်သူကမျှ ထင်မှတ်မထားခဲ့ကြချေ။ ၎င်းက တကယ့်ကို စည်းမဲ့ကမ်းမဲ့ နိုင်လွန်းလှပေသည်။

သေချာတာပေါ့ မယ်တော် ရွှမ်ဟို့၏ မျက်နှာထားမှာ ချက်ချင်းပင် ပျက်ယွင်းသွားခဲ့ရတော့သည်။

သူမသည် မယ်တော် လော့က ဤပွဲတွင် ခွန်အားပြသလာလိမ့်မည်ကို ကြိုတင် သိရှိထားပြီး ဖြစ်သဖြင့် ထပ်ခါတလဲလဲ သည်းခံခဲ့ခြင်း ဖြစ်သည်။

သို့သော်လည်း မယ်တော် လော့က လော့ဟော်အာအပေါ်အထိ ပစ်မှတ်ထား စူးစိုက်လာလိမ့်မည်ဟုတော့ သူမ ထင်မှတ်မထားခဲ့ချေ။

တိုင်းပြည်၏ မင်းသမီးတစ်ပါးအနေဖြင့် လော့ခွေ့ကဲ့သို့သော တောသားရိုင်းတစ်ယောက်နှင့် ယှဉ်ပြိုင်ရခြင်းမှာ မည်သည့် ရလဒ်မျိုး ပေါ်ထွက်လာသည်ဖြစ်စေ လော့ဟော်အာ၏ ဂုဏ်သိက္ခာကို ညှိုးနွမ်းစေမှာ သေချာလှပေသည်။

တကယ်တမ်းကျတော့ ၎င်းက ပျက်စီးခြင်းကောင်းကင် အတတ်ပညာသက်သက်သာ ဆိုလျှင်မူမယ်တော် ရွှမ်ဟို့အနေဖြင့် လော့ဟော်အာက အနိုင်ရရှိလိမ့်မည်ဟု ယုံကြည်ထားခဲ့သည်။

သို့သော်လည်း လော့ခွေ့က ပထမဆုံးသော စမ်းသပ်ချက်တစ်ခုမျှသာ ဖြစ်ရန် အလွန် ဖြစ်နိုင်ချေ ရှိနေသည်။ လော့ခွေ့ကို အနိုင်ယူပြီးသွားသည့် အခါတွင် ပိုမို အစွမ်းထက်လှသော လူတစ်ဦးက သူ့နေရာတွင် ဝင်ရောက် အစားထိုးလာမှာ သေချာလှပေသည်။

အကယ်၍ လော့ဟော်အာက လော့ခွေ့၏ စိန်ခေါ်မှုကို လက်ခံလိုက်ပြီးနောက် နောက်ထပ် လူ၏ ပြိုင်ပွဲကို ငြင်းပယ်လိုက်မည်ဆိုပါက ၎င်းက လော့ဟော်အာအနေဖြင့် မိမိကိုယ်ကို ယုံကြည်မှု မရှိခြင်းကြောင့် စိန်ခေါ်မှုကို ကြောက်ရွံ့နေခဲ့ခြင်း ဖြစ်သည်ဟု အခြားသူများ၏ ထင်မြင်ယူဆခြင်းကို ခံရပေလိမ့်မည်။

ဤအခိုက်အတန့်တွင် မင်းသား ချီရှန်းက ပြုံးလိုက်ရင်း ပြောလိုက်သည်။

"လူငယ်တွေအနေနဲ့ ပိုမို တိုးတက်ချင်စိတ် ရှိကြတာက အလွန် ကောင်းမွန်တဲ့ အရာတစ်ခုပါ။ ညီမတော် ခရမ်းပြာဝိညာဉ်က အမြဲတမ်း ကြင်နာတတ်တဲ့ စိတ်နှလုံး ရှိပြီး ပါရမီရှင်တွေကို ချစ်ခင်မြတ်နိုးတတ်တာက လူသိများလှတဲ့ အချက်တစ်ခုပဲလေ။ အကယ်၍ မင်းက သူမဆီကနေ စစ်မှန်တဲ့ နှလုံးသားနဲ့ အကြံဉာဏ် တောင်းခံတာဆိုရင်တော့ သူမအနေနဲ့ မင်းကို လမ်းညွှန်ပြသပေးဖို့ တွန့်ဆုတ်နေမှာ မဟုတ်ပါဘူး။"

မင်းသား ချီရှန်း၏ စကားစုမှာ လော့ခွေ့၏ ရုတ်တရက် ပေါ်ထွက်လာခဲ့သော အတွေးအမြင်ကို ထောက်ခံ အသိအမှတ်ပြုပေးလိုက်ခြင်း ဖြစ်ပေသည်။

လူအများစုကမူ မယ်တော် လော့အနေဖြင့် မယ်တော် ရွှမ်ဟို့ဘက်က လူငယ် ပါရမီရှင်များကိုသာ ဖိနှိပ်ရန် စီစဉ်ထားခဲ့ခြင်း ဖြစ်သည်ဟု ထင်မြင်ထားခဲ့ကြသော်လည်း သူတို့က မင်းသမီး ခရမ်းပြာဝိညာဉ်၏ ဂုဏ်သတင်းကောင်းကိုပါ ညှိုးနွမ်းအောင် ဖျက်ဆီးပစ်ရန်အထိ စီစဉ်ထားလိမ့်မည်ဟု မည်သူကမျှ ထင်မှတ်မထားခဲ့ကြချေ။

ဤအခိုက်အတန့်တွင် လော့ဟော်အာသည် လော့ခွေ့ကို လှမ်းကြည့်လိုက်ရင်း နှာခေါင်းရှုံ့ကာ ပြောလိုက်သည်။

"လော့ခွေ့... မင်းက တိုင်းပြည်ရဲ့ ဘွဲ့ထူးဂုဏ်ထူး အဆင့်အတန်း ကို ချီးမြှင့်ခြင်း ခံထားရလို့လား။"

လော့ဟော်အာ၏ မေးခွန်းကို ရင်ဆိုင်လိုက်ရသည့် အခါတွင်မူ လော့ခွေ့အနေဖြင့် ချက်ချင်း ပြန်လည် ဖြေကြားနိုင်ခြင်း မရှိတော့ချေ။ ဖေးမျိုးနွယ်စု ၏ မျိုးဆက်သစ် လူငယ်များအကြားတွင် သူ၏ နောက်ခံနောက်ကြောင်းမှာ ဆိုးရွားလှခြင်း မရှိသည်မှာ သေချာလှပေသည်။ သူက မိုးတိမ်တိုက် နေမင်း လော့မျိုးနွယ်စု က ဖြစ်သဖြင့် ၎င်းက လော့ဟော်အာထက် နိမ့်ကျသည်ဆိုသော်လည်း လော့မျိုးနွယ်စုအတွင်းရှိ အကောင်းဆုံးသော အင်အားစု အစိတ် (၂၀) ထဲတွင် ပါဝင်နေဆဲ ဖြစ်သည်။

ရန်ရွှဲ့ယီနှင့် တုန်းလင်းယုတို့နှင့် နှိုင်းယှဉ်မည်ဆိုပါက သူက အနည်းငယ်မျှပင် နိမ့်ကျခြင်း မရှိချေ။ သို့သော်လည်း လော့ဟော်အာသည် လော့ခွေ့၏ နောက်ခံနောက်ကြောင်းကို တမင်တကာ ရှောင်လွှဲလိုက်ပြီး ထို့အစား တိုင်းပြည်၏ ဘွဲ့ထူးဂုဏ်ထူး အဆင့်အတန်း မရှိခြင်းကိုသာ ထောက်ပြလိုက်ခြင်း ဖြစ်သည်။

ဂုဏ်သရေရှိလှသော မိသားစုကြီးတစ်ခု၏ မျိုးဆက်များအနေဖြင့် စည်းစိမ်ချမ်းသာရှိလှသော ဘဝကို လွယ်လွယ်ကူကူ ဖြတ်သန်းနိုင်ကြသည်ဆိုသော်လည်း အကယ်၍ တိုင်းပြည်၏ ဘွဲ့ထူးဂုဏ်ထူးများကို ချီးမြှင့်ခြင်း ခံရရန်အတွက်မူ သူတို့အနေဖြင့် တိုင်းပြည်အတွက် စစ်မှန်သော စွမ်းဆောင်ရည်များကို ထုတ်ဖော်ပြသနိုင်ခဲ့ရန် လိုအပ်ပေသည်။

လော့ခွေ့က အသက်ငယ်ရွယ်သေးသည့်အတွက် သူ့တွင် မည်သည့်စွမ်းဆောင်ရည်မျိုးမျှ ရှိမနေခဲ့သေးချေ။ သူ့တွင် တိုင်းပြည်၏ ဘွဲ့ထူးဂုဏ်ထူး မရှိသော်လည်း လော့ဟော်အာမှာမူ ထီးနန်းကို ဆက်ခံမည့်သူတစ်ဦး ဖြစ်သဖြင့် သူမက တော်ဝင် မင်းသမီးတစ်ပါးအဖြစ် ဘွဲ့ထူးဂုဏ်ထူးများကို ရရှိထားပြီး ဖြစ်ပေသည်။

သူတို့၏ နောက်ခံနောက်ကြောင်း ကွာခြားချက်မှာ သေးငယ်လှသည်ဟု ဆိုနိုင်သော်လည်း သူတို့၏ ဘွဲ့ထူးဂုဏ်ထူး အဆင့်အတန်း ကွာခြားချက်မှာမူ ကောင်းကင်နှင့် မြေကြီးအလား ကြီးမားလှပေသည်။

လော့ဟော်အာသည် လော့ခွေ့၏ အားနည်းချက်ကို တိုက်ရိုက် တိုက်ခိုက်လိုက်သည့် အခါတွင် သူ၏ မျက်နှာထားမှာ တကယ့်ကို ရုပ်ဆိုးသွားခဲ့ရတော့သည်။ သူက မကျေမနပ်ဖြစ်နေသည့် လေသံဖြင့် ပြန်ပြောလိုက်သည်။

"ကျွန်တော်မျိုးရဲ့ အဆင့်အတန်းက နိမ့်ပါးလှပါတယ်။ စည်းကမ်းတွေအရ ဆိုရင်တော့ မင်းသမီးဆီကနေ အကြံဉာဏ် ရယူဖို့အတွက် အရည်အချင်း လုံးဝ မရှိတာ အမှန်ပါပဲ။ သို့သော်လည်း... စည်းကမ်းတွေဆိုတာက တစ်ခါတလေကျရင် အကြွင်းမဲ့ ဖြစ်မနေတတ်ပါဘူး... ဥပမာအားဖြင့် ဤတည်ခင်းဧည့်ခံပွဲမှာဆိုရင် ထိုင်ခုံနေရာတွေကို စည်းကမ်းတွေအတိုင်း သတ်မှတ်ထားတာမျိုး မဟုတ်ဘူးမလား။"

လော့ခွေ့က ဤသို့ ပြောဆိုလိုက်သည့် အခါတွင် လူတိုင်း၏ အကြည့်များမှာ မတတ်သာဘဲ ယီယွင်၏ ထံသို့ ဝေ့ဝဲရောက်ရှိသွားခဲ့ကြရတော့သည်။

လော့ဟော်အာက လော့ခွေ့ကို စည်းကမ်းမရှိဟု မာန်မဲခဲ့သော်လည်း... လော့ခွေ့ကမူ မိမိ၏ တည်ငြိမ်မှုကို ထိန်းသိမ်းထားရင်း ချက်ချင်းပင် ပြန်လည် တိုက်ခိုက်လိုက်ခြင်း ဖြစ်သည်။

သေချာတာပေါ့... လော့ဟော်အာအနေဖြင့် ယီယွင်ကို သူမ၏ ဘေးတွင် ထိုင်ခွင့်ပြုထားခြင်းမှာ တကယ့်ကို စည်းကမ်းများနှင့် ညီညွတ်ခြင်း မရှိလှချေ။

"ဒီအစ်ကိုကြီး... မင်းက တကယ့်ကိုပဲ အစားအသောက် အားကောင်းလှတာပဲ။"

လော့ခွေ့က ယီယွင်၏ အရှေ့တွင် အရိုးစုပုံကြီးတစ်ခုအဖြစ် ပြောင်းလဲသွားခဲ့ပြီ ဖြစ်သော ဝိညာဉ်အစားအစာများကို လှမ်းကြည့်လိုက်ရင်း ခပ်ဖွဖွ ပြုံးကာ ပြောလိုက်သည်။

ယီယွင်သည်လည်း တိုက်ပွဲ၏ ပစ်မှတ်မြှားဦးမှာ မိမိဆီသို့ ရုတ်တရက် ပြန်လည် ရောက်ရှိလာလိမ့်မည်ဟု ထင်မှတ်မထားခဲ့ချေ။

"ငါ သိချင်တာက ဤအစ်ကိုကြီးက ဘယ်လိုမျိုး မိသားစုမျိုးနွယ်စုက လာခဲ့တာလဲ... ပြီးတော့ သူ့မှာ တိုင်းပြည်ရဲ့ ဘွဲ့ထူးဂုဏ်ထူး အဆင့်အတန်းကော ရှိရဲ့လား။"

သူက သိလျက်နှင့်ပင် ထိုမေးခွန်းကို မေးမြန်းလိုက်ခြင်း ဖြစ်သည်။

မယ်တော် လော့၏ အင်အားစုအောက်က လူများစွာမှာ ယီယွင်ကို လှမ်းကြည့်လိုက်ကြရင်း သူ ဘယ်လိုမျိုး အရှက်ကွဲသွားမလဲဆိုတာကို စောင့်ကြည့်နေခဲ့ကြသည်။ သို့သော်လည်း သူတို့သည် ယီယွင်၏ မျက်နှာထက်တွင် မည်သည့် စိုးရိမ်ပူပန်မှု အမူအရာမျိုးကိုမျှ မြင်တွေ့လိုက်ရခြင်း မရှိချေ။

ယီယွင်သည် စားပွဲထက်မှ နှင်းဖြူရောင် ပိုးထည်လက်သုတ်ပုဝါကို ဆွဲထုတ်လိုက်ရင်း သူ၏ နှုတ်ခမ်းကို ဖြည်းညှင်းစွာ သုတ်လိုက်သည်။

"ကျွန်တော်မျိုးက အောက်မြေကမ္ဘာက တောရွာလေးတစ်ရွာက လာခဲ့တာ ဖြစ်ပါတယ်။ ကျွန်တော့်ရဲ့ နောက်ခံနောက်ကြောင်းနဲ့ ပတ်သက်ရင်တော့... ကျွန်တော့်ရဲ့ ဘိုးဘွားဘီဘင်တွေ အားလုံးက လယ်သမားတွေချည်းပါပဲ။"

ယီယွင်၏ ပြန်လည် ဖြေကြားချက်ကြောင့် လူတိုင်း၏ မျက်ဝန်းများမှာ တကယ့်ကို ပြုတ်ကျလုမတတ် ဖြစ်သွားခဲ့ရတော့သည်။ မယ်တော် ရွှမ်ဟို့ဘက်က လူများ ဖြစ်ကြသည့် လင်ဝူနှင့် ကုချင်တို့ပင် ယီယွင်၏ သတ္တိအပေါ် အလွန်ပင် အံ့အားသင့်သွားခဲ့ရသည်။

အကယ်၍ မည်သူမဆို ဤကဲ့သို့ ဖိအားပေးခြင်း ခံရမည်ဆိုပါက ပုံမှန်အားဖြင့် မိမိကိုယ်ကို ဖုံးကွယ်ထားရန် ကြိုးစားကြမှာ သေချာလှပေသည်။ သို့သော်လည်း သူကမူ ၎င်းကို အလွန်ပင် တည်တည်ငြိမ်ငြိမ်ဖြင့် အလေးအနက် ပြန်လည် ဖြေကြားနိုင်ခဲ့သည် မဟုတ်ပါလား။

"ဟားဟားဟား။"

လော့ခွေ့က ကျယ်လောင်စွာ ရယ်မောလိုက်တော့သည်။

"အစ်ကိုကြီး... မင်းက တကယ့်ကို ရိုးသား လှတာပဲ။ အစ်ကိုကြီး... မင်းအနေနဲ့ မင်းသမီးခရမ်းပြာဝိညာဉ်နဲ့ အောက်မြေကမ္ဘာမှာ ဆုံတွေ့ခဲ့ရတာ ဖြစ်ရမယ်။ မင်းသမီးက တကယ့်ကို စိတ်နှလုံး ကောင်းမွန်လှပြီး ပါရမီရှင်တွေကို ငဲ့ညှာတတ်တာမို့လို့... အောက်မြေကမ္ဘာက လာတဲ့ လူသားတစ်ယောက်ကို အခုလို အခွင့်ထူးမျိုးကို ပေးအပ်ထားခဲ့တာ ဖြစ်ရမယ်။"

လော့ခွေ့က ဤသို့ ပြောဆိုလိုက်သည့် အခါတွင် လူတိုင်းက ချက်ချင်းပင် သဘောပေါက်သွားခဲ့ကြရတော့သည်။ သြော်... ဒီကောင်က အောက်မြေကမ္ဘာမှာတုန်းက မင်းသမီး ခရမ်းပြာဝိညာဉ်နဲ့ သိကျွမ်းခဲ့ရတာ ဖြစ်ရမယ်။ ခရမ်းပြာဝိညာဉ်မင်းသမီးက တကယ့်ကို အတွေ့အကြုံ မရှိသေးတာပဲ။ သူမက ဘာဖြစ်လို့ အောက်မြေကမ္ဘာမှာ သိကျွမ်းခဲ့ရတဲ့ ကောင်တစ်ယောက်ကို ဤမျှလောက်အထိ မျက်နှာလိုက်ထားရတာလဲ။

မယ်တော် လော့သည် မယ်တော် ရွှမ်ဟို့ကို လှမ်းကြည့်လိုက်ရင်း သူမ၏ နှုတ်ခမ်းထောင့်စွန်းတွင် သရော်လှောင်ပြောင်လိုသည့် အပြုံးတစ်ခု ပေါ်ထွက်လာခဲ့သည်။ အလွန်ပင် စိတ်ကြီးလှသော လော့ဟော်အာသည် ယီယွင်ကဲ့သို့သော လူမျိုးအပေါ် ချစ်ကြိုက်မိသွားလိမ့်မည်ဟု သူမ မယုံကြည်သော်လည်း... အကယ်၍ သူမသာ ဤဇာတ်လမ်းကို ပုံကြီးချဲ့ပြီး လော့ဧကရာဇ်မင်းမြတ်ထံသို့ တင်ပြလိုက်မည်ဆိုပါက... လော့ဧကရာဇ်မင်းမြတ်သည် လော့ဟော်အာအပေါ် မည်မျှပင် အလိုလိုက်ထားသည်ဖြစ်စေ အလွန်ပင် ဒေါသထွက်သွားမှာ သေချာလှပေသည်။

၎င်းက တော်ဝင်မိသားစုအတွက် တကယ့်ကို အရှက်ရစရာ ကောင်းလှသည် မဟုတ်ပါလား။

ဤအခိုက်အတန့်တွင် ယီယွင်သည် သူ၏ နှုတ်ခမ်းကို သုတ်ပြီးသွားခဲ့ပြီ ဖြစ်ကာ နှင်းဖြူရောင် ပိုးထည်လက်သုတ်ပုဝါကို အသုံးပြု၍ သူ၏ လက်များကို သေသေချာချာ သုတ်လိုက်ပြန်သည်။

ထို့နောက် သူက လက်သုတ်ပုဝါကို အောက်သို့ လွှင့်ပစ်လိုက်ရင်း ပြောလိုက်သည်။

"ကျွန်တော်က အောက်မြေကမ္ဘာမှာတုန်းက ပျက်စီးခြင်းကောင်းကင် အတတ်ပညာရပ်ကို အနည်းငယ်မျှ လေ့လာခဲ့ဖူးပါတယ်။ ကျွန်တော် ခရမ်းပြာဝိညာဉ်မင်းသမီးနဲ့အတူတူ ငါးလ သို့မဟုတ် ခြောက်လခန့် ပျက်စီးခြင်းကောင်းကင် အတတ်ပညာရပ်ကို သင်ယူလေ့လာခဲ့ဖူးတာ ဖြစ်လို့ အဲ့ဒီအပိုင်းမှာ အနည်းငယ်မျှတော့ အောင်မြင်မှု ရှိတယ်လို့ သတ်မှတ်နိုင်ပါတယ်။"

"မင်းက ခရမ်းပြာဝိညာဉ်မင်းသမီးဆီကနေ ပျက်စီးခြင်းကောင်းကင် အတတ်ပညာရပ်နဲ့ ပတ်သက်ပြီး လမ်းညွှန်ချက် တောင်းခံချင်နေတာ မဟုတ်ဘူးလား။ မင်းကိုယ်တိုင်လည်း ပြောခဲ့တယ်လေ... မင်းက ပျက်စီးခြင်းကောင်းကင် အတတ်ပညာရပ်ကို စတင် လေ့လာစူးစမ်းကာစပဲ ရှိသေးတယ်ဆိုတော့... ငါ့အထင် မင်းရဲ့ အဆင့်အတန်းက မြင့်မားနိုင်ဦးမှာ မဟုတ်သေးပါဘူး။ မင်းက ငါ့ရဲ့ အဆင့်အတန်းကိုတောင် မှီချင်မှ မှီဦးမှာပါ။

အကယ်၍ မင်းက မင်းသမီးကြီး ခရမ်းပြာဝိညာဉ်ဆီကနေ တိုက်ရိုက် လမ်းညွှန်ချက် တောင်းခံမယ်ဆိုရင်... မင်းအနေနဲ့ အဲ့ဒါကို နားလည်သဘောပေါက်နိုင်လိမ့်မည် မဟုတ်မှာကို ငါ စိုးရိမ်မိတယ်။ ဒါကြောင့် ငါက မင်းကို ဘယ်လိုအရင်ဆုံး လမ်းညွှန်ပြသပေးရမလဲ။"

ယီယွင်က ဤသို့ ပြောဆိုလိုက်သည့် အခါတွင် ထိုနေရာတွင် ရှိနေကြသော လူတိုင်းမှာ ဆွံ့အအံ့အားသင့်သွားခဲ့ကြရတော့သည်။

လော့ခွေ့တင်မကဘဲ မယ်တော် လော့ကိုယ်တိုင်ပင် အနည်းငယ်မျှ ဆွံ့အသွားခဲ့ရသည်။

ယီယွင်၏ စကားစုများထဲတွင် အချက်အလက်များစွာ ပါဝင်နေခဲ့သည်။ သူတို့သည် ယီယွင်က နီလာ လှိုင်းတောင် စုပေါင်းလေ့ကျင့်မှုတွင် ပထမနေရာ ရရှိခဲ့ကြောင်း သိရှိထားကြပြီး ဖြစ်ပေသည်။ ယီယွင်၏ နောက်ခံနောက်ကြောင်းနှင့်ဆိုလျှင် ဤကဲ့သို့သော စွမ်းဆောင်ရည်မျိုးကို ရရှိခဲ့ခြင်းမှာပင် အလွန်ပင် အံ့အားသင့်စရာ ကောင်းလှပေပြီ ဖြစ်သည်။

ဒါပေမဲ့... ယီယွင်က ပျက်စီးခြင်းကောင်းကင် အတတ်ပညာရပ်ကိုပါ သိရှိထားသေးတာလား။

"ပျက်စီးခြင်းကောင်းကင် အတတ်ပညာရပ်ကို ငါးလ သို့မဟုတ် ခြောက်လခန့် သင်ယူလေ့လာခဲ့ဖူးတယ်" တဲ့လား။

"၎င်းမှာ အနည်းငယ်မျှတော့ အောင်မြင်မှု ရှိတယ်လို့ သတ်မှတ်နိုင်ပါတယ်" တဲ့လား။

ပျက်စီးခြင်းကောင်းကင် အတတ်ပညာရပ်မှာ အလွန်ပင် နက်နဲဆန်းပြားလှသော အရာတစ်ခု ဖြစ်ပေသည်။ နှစ်ပေါင်းများစွာကြာအောင် ကြိုးစားအားထုတ်မှု မရှိဘဲနှင့် မည်သည့် အောင်မြင်မှုမျိုးကိုမျှ ရရှိနိုင်ရန် လုံးဝ မဖြစ်နိုင်ချေ။ ယီယွင်က တကယ့်ကို အကြီးအကျယ် ကြွားဝါနေခြင်းမှာ ထင်ရှားလှပေသည်။

သို့သော်လည်း အကယ်၍ ယီယွင်သည် ပျက်စီးခြင်းကောင်းကင် အတတ်ပညာရပ်ကို နှစ်ပေါင်းများစွာကြာအောင် လေ့လာခဲ့ဖူးသည်ဟု ပြောလျှင်လည်း ၎င်းက မဖြစ်နိုင်ပြန်ချေ။ သူက အောက်မြေကမ္ဘာက လာခဲ့သည့် စစ်သည်တော်တစ်ဦး ဖြစ်ပြီး သူ၏ အရိုးသက်တမ်းမှာ လေးဆယ်ပင် မပြည့်သေးချေ။

ကိုယ်ခံပညာရပ်များကပင် သူ၏ အချိန်အများစုကို ယူဆောင်သွားခဲ့မှာ သေချာလှသဖြင့်... သူက ပျက်စီးခြင်းကောင်းကင် အတတ်ပညာရပ်ကို လေ့လာရန်အတွက် ဘယ်လိုလုပ်ပြီး အချိန်ပို ထွက်ပေါ်လာနိုင်ပါ့မလဲ။

"ယွင်လေး... မင်း ဘာတွေ လျှောက်ပြောနေတာလဲ။"

ဤအခိုက်အတန့်တွင် လော့ဟော်အာ၏ ယွမ်ချီ အသံလွှင့်မန္တန်က ယီယွင်၏ နားထဲတွင် ဟိန်းထွက်လာခဲ့သည်။

"ယွင်လေး... မင်း ပျက်စီးခြင်းကောင်းကင် အတတ်ပညာရပ်မှာ ပါရမီအနည်းငယ် ရှိတယ်ဆိုတာကို ငါ သိပါတယ်၊ ဒါပေမဲ့ မင်း မသိတာက ဆယ်ပါးသော ဖေးတစ်သောင်း ကောင်းကင်ဘုံရဲ့ ပျက်စီးခြင်းကောင်းကင် အတတ်ပညာရပ်က တစ်လောကလုံးရှိ တိုက်ခိုက်ရေး ကောင်းကင်ဘုံ (၁၂) ခုစလုံးထဲမှာ အကောင်းဆုံး ဖြစ်တယ်ဆိုတာပဲ။

အဲ့ဒါကအောက်မြေကမ္ဘာက ပျက်စီးခြင်းကောင်းကင် အတတ်ပညာရပ်နဲ့ လုံးဝကို ခြားနားလှတာ။ အတတ်ပညာရပ် ဖြစ်စေ၊ လက်ဟန်တွေ ဖြစ်စေ... နည်းလမ်းအားလုံးက မတူညီကြဘူး။ မင်း ဖေးတစ်သောင်း ကောင်းကင်ဘုံကို ရောက်လာပြီးတဲ့နောက်မှာရော ဒီနေရာက ပျက်စီးခြင်းကောင်းကင် အတတ်ပညာရပ်ကို လေ့လာဖူးလို့လား။"

ယီယွင်က ခေါင်းခါလိုက်သည်။ သူက လော့ဟော်အာ၏ စကားနောက်ကွယ်က အကြောင်းပြချက်ကို သဘာဝအတိုင်း နားလည်ထားပြီး ဖြစ်ပေသည်။ ယီယွင်တွင် ခရမ်းရောင်သလင်းကျောက် ရှိနေခဲ့သည်ဆိုသော်လည်း သူ ပျက်စီးခြင်းကောင်းကင် အတတ်ပညာရပ်ကို လေ့လာခဲ့သည့် အချိန်ကာလမှာ တိုတောင်းလွန်းလှပေသည်။

အောက်မြေကမ္ဘာမှာတုန်းကပင် သူ ပျက်စီးခြင်းကောင်းကင် အတတ်ပညာရပ်ကို လေ့လာခဲ့သည့် အချိန်မှာ လအနည်းငယ်မျှသာ ရှိခဲ့ပြီး ဖေးတစ်သောင်း ကောင်းကင်ဘုံသို့ ရောက်ရှိလာပြီးသည့်နောက်တွင်တော့ ပို၍ပင် အချိန်မရှိခဲ့ချေ။

"ဟားဟားဟား။"

လော့ခွေ့က ရုတ်တရက်ပင် အော်ဟစ်ရယ်မောလိုက်တော့သည်။

"မင်း အခု ဘာပြောလိုက်တာလဲ။ မင်းက ငါ့ကို လမ်းညွှန်ပြသပေးချင်တယ် ဟုတ်လား။ တကယ့်ကို စိတ်ဝင်စားစရာ ကောင်းလှတာပဲဗျာ။ ငါက ပျက်စီးခြင်းကောင်းကင် အတတ်ပညာရပ်ကို အခုမှ စတင်လေ့လာစူးစမ်းကာစပဲ ရှိသေးတယ်လို့ စကားအဖြစ်နဲ့တင် ပြောလိုက်တာကို... မင်းလိုမျိုး ပျက်စီးခြင်းကောင်းကင် အတတ်ပညာရပ်ကို ငါးလ ဒါမှမဟုတ် ခြောက်လလောက်ပဲ လေ့လာဖူးတဲ့ ကောင်က ငါ့ကို လမ်းညွှန်ပေးဖို့ ထွက်လာရဲတယ်လား။

မင်းလိုမျိုး လူတစ်ယောက်က တကယ်ပဲ မင်းသမီးရဲ့ မျက်နှာသာပေးမှုကို ရရှိထားတာလား။ မင်းက လူလိမ်တစ်ယောက် မဟုတ်ဘူးလား။ မင်းက မင်းသမီးရဲ့ ပါရမီရှင်တွေအပေါ် ငဲ့ညှာတတ်တဲ့ အချက်ကို အသုံးချပြီး သူမကို လှည့်စားထားတာပဲ။"

လော့ခွေ့က မရပ်မနား သရော်လှောင်ပြောင်လိုက်တော့သည်။

သူက ခရမ်းပြာဝိညာဉ်မင်းသမီးကို တိုက်ရိုက် စော်ကားဝံ့ခြင်း မရှိသော်လည်း... ယီယွင်နှင့် ပတ်သက်၍မူ သူက မည်သည့် စိုးရိမ်ပူပန်မှုမျိုးမျှ ရှိမနေခဲ့ချေ။ ယီယွင်သည် ခရမ်းပြာဝိညာဉ်မင်းသမီးကို လှည့်စားထားသည်ဖြစ်စေ၊ မလှည့်စားထားသည်ဖြစ်စေ... ယီယွင်ကို ဤသို့ လှောင်ပြောင် သရော်လိုက်ခြင်းက ခရမ်းပြာဝိညာဉ်မင်းသမီး၏ ဂုဏ်သတင်းကိုပါ ဖျက်ဆီးပစ်လိုက်ခြင်းနှင့် အတူတူပင် ဖြစ်ပေသည်။

ဤအခိုက်အတန့်တွင် ယီယွင်သည် ထိုင်ရာမှ ထရပ်လိုက်ပြီ ဖြစ်သည်။

လော့ခွေ့သည် ယီယွင်ကို မထီမဲ့မြင် ပြုသည့် အကြည့်တစ်ခုဖြင့် လှမ်းကြည့်လိုက်သည်။ သူက ရည်မှန်းချက် ကြီးမားလှသူ ဖြစ်ပြီး ထိုနေရာတွင် ရှိနေကြသော ပါရမီရှင်များကို အထင်သေးတတ်သူ ဖြစ်သည်။ သူက မြင့်မြတ်လှသော တော်ဝင် မင်းသမီးတစ်ပါးကို နင်းခြေပြီးမှသာ မိမိ၏ နာမည်ကို ကျော်ကြားအောင် ပြုလုပ်နိုင်မှာ ဖြစ်ပေသည်။

မင်းသား ချီရှန်းကို ထီးနန်းအာဏာ ရရှိအောင် ကူညီပေးခြင်းအားဖြင့် နောက်ဆုံးတွင် သူက တိုင်းပြည်၏ ဘွဲ့ထူးဂုဏ်ထူးများကို ချီးမြှင့်ခြင်း ခံရမှာ ဖြစ်ပေသည်။

သို့သော်လည်း ယခုအချိန်တွင် သူက တော်ဝင် မင်းသမီးတစ်ပါးကိုပင် မနင်းခြေရသေးမီမှာပင် သေးငယ်လှသော လူမိုက်တစ်ယောက်က သေတွင်းထဲသို့ မိမိဘာသာ ဝင်ရောက်လာခဲ့ပြီ ဖြစ်သည်။

လော့ခွေ့သည် ကျင့်ကြံခြင်း သက်တမ်းအားဖြင့် နှစ်ပေါင်း ရှစ်ဆယ်ခန့် ရှိနေခဲ့ပြီ ဖြစ်ကာ ပျက်စီးခြင်းကောင်းကင် အတတ်ပညာရပ်ကို ဆယ်စုနှစ်တစ်ခုမကကြာအောင် သေသေချာချာ လေ့လာခဲ့ဖူးသူ ဖြစ်သည်။ သူက တကယ့်ကို ကြိုတင် ပြင်ဆင်မှုများ ပြုလုပ်ပြီးမှ လာခဲ့ခြင်း ဖြစ်ပေသည်။

အကယ်၍ လော့ဟော်အာနှင့် ဆုံတွေ့ရလျှင်ပင် သူက သူမနှင့် ရင်ဆိုင်ယှဉ်ပြိုင်နိုင်လိမ့်မည်ဟု မိမိကိုယ်ကို ယုံကြည်မှု အပြည့် ရှိနေခဲ့သည်။

ထိုနေရာတွင် ရှိနေကြသော လူများစွာမှာ လော့ခွေ့၏ နောက်ခံနောက်ကြောင်းကို သိရှိထားကြသဖြင့် သူတို့က ယီယွင်ကို လှမ်းကြည့်လိုက်ကြရင်း ခေါင်းကို ခါယမ်းလိုက်ကြတော့သည်။ ၎င်းက တကယ့်ကို ဟာသပြဇာတ်တစ်ခုမျှသာ ဖြစ်ပေသည်။

ဤကိစ္စရပ်ကို ဆက်လက် တားဆီး၍ မရနိုင်တော့ကြောင်း မြင်တွေ့လိုက်ရသည့် အခါတွင် လော့ဟော်အာ၏ နှုတ်ခမ်းများမှာ အနည်းငယ်မျှ တုန်ရီသွားခဲ့ရသည်။ နောက်ဆုံးတွင် သူမက ဒီအတိုင်း နှုတ်ဆိတ်နေရန်သာ ရွေးချယ်လိုက်တော့သည်။ သူမက ယီယွင်ကို ကောင်းကောင်း နားလည်ထားသည်။

ယီယွင်သည် အမြဲတမ်း မျှော်လင့်မထားသော အရာများကို လုပ်ဆောင်တတ်ကြောင်း သူမ သိရှိထားသည်။ ယခင်က တိုင်အာ နတ်ဘုရားမြို့တော် တွင် ရှိစဉ်တုန်းက လော့ဟော်အာသည် သူမအနေဖြင့် သူ့ကို အသေအချာ အနိုင်ယူနိုင်လိမ့်မည်ဟု ယုံကြည်ထားခဲ့သော်လည်း နောက်ဆုံးတွင် သူမသာ အမြဲတမ်း ဆုံးရှုံးမှုများကို ရင်ဆိုင်ခဲ့ရသည် မဟုတ်ပါလား။

သို့သော်လည်း ယခုတစ်ကြိမ်တွင်မူ လော့ဟော်အာအနေဖြင့် ယီယွင်က လော့ခွေ့ကို ဘယ်လိုမျိုး နည်းလမ်းဖြင့် အနိုင်ယူမှာလဲဆိုတာကို လုံးဝ စဉ်းစား၍ မရနိုင်တော့ချေ။