အခန်း ၈၆၆

အခန်း ၈၆၆ - အလကားရတဲ့ အနိုင်လား

လော့ခွေ့ စတင်လိုက်ပြီ ဖြစ်သည်။ သူ၏ ပြိုင်ဘက်မှာ အမှိုက်တစ်စတစ်ယောက် ဖြစ်နေသော်လည်း လော့ခွေ့က အစွမ်းကုန် ကြိုးစားရန် စီစဉ်ထားခဲ့သည်။ ယီယွင်ကို ရိုက်နှက်ဆုံးမနေခြင်းက မည်သည့် အဓိပ္ပာယ်မျိုးမျှ ရှိမနေချေ။ ယခုအခါတွင်မူ သူက ထူးချွန်ခြင်း အဆင့်သို့ နီးကပ်လှသော ဆေးရတနာတစ်ပါးကို ဖော်စပ်နိုင်ရန်အတွက်သာ အာရုံစိုက်နေခဲ့ပြီး ၎င်းအားဖြင့် ထိုနေရာတွင် ရှိနေကြသော လူတိုင်းကို အံ့အားသင့်သွားအောင် ပြုလုပ်ရန် ရည်ရွယ်ထားခြင်း ဖြစ်သည်။

လော့ခွေ့သည် ဖေးသားရဲ အရိုးကို လကြတ်ဖိုအတွင်းသို့ လွှင့်ပစ်လိုက်ပြီးနောက်တစ်ပြိုင်နက်တည်းမှာပင် ၎င်းအတွင်းရှိ စွမ်းအင်အားလုံးကို တစ်ပါတ်တည်းဖြင့် ဆွဲထုတ်လိုက်တော့သည်။

ဘုန်း.....

လော့ခွေ့၏ ခန္ဓာကိုယ်ထက်တွင် ပြာလွင်လှသော မီးတောက်များ စတင် တောက်လောင်လာခဲ့ပြီးသူ၏ နောက်ကွယ်တွင်မူ ပေတစ်ထောင်ခန့် ကြီးမားလှသော ကောင်းကင်သို့ ထိုးတက်နေသည့် ပြာလွင်လှသော ကိန်းဂဏန်းကြီးတစ်ခု ပေါ်ထွက်လာခဲ့သည်။

၎င်းမှာ ပေတစ်ရာမက မြင့်မားလှသော ပိုးမွှားကောင်ကြီး ဖြစ်ပြီး ၎င်းက မျက်နှာကျက်ဆီသို့ တိုက်ရိုက် ထိုးတက်သွားခဲ့ခြင်း ဖြစ်သည်။

ပေတစ်ထောင် နတ်ဆိုးကြီးမှာ လော့ခွေ့၏ ရှေးဟောင်း ဖေးမျိုးနွယ်စု သွေးမျိုးဆက် ဖြစ်ပေသည်။ ၎င်း ပေါ်ထွက်လာပြီးသည့်နောက်တွင်တော့ လော့ခွေ့၏ လကြတ်ဖိုအတွင်းသို့ တိုက်ရိုက် တိုးဝင်သွားခဲ့တော့သည်။

"ဒါက..."

လူတိုင်းမှာ တုန်လှုပ်ခြောက်ခြားသွားခဲ့ကြရတော့သည်။ လော့ခွေ့က တကယ့်ကိုပဲ သူ၏ ရှေးဟောင်း ဖေးမျိုးနွယ်စု သွေးမျိုးဆက် စွမ်းအင်များကိုပါ အသုံးပြုပြီး ဤဖေးသားရဲ အရိုးကို ဆေးဖော်စပ်ဖို့ ကြံစည်နေတာလား။

လော့ခွေ့အနေဖြင့် ဆေးရတနာတစ်ပါးတည်းကို ဖော်စပ်ရန်အတွက် မိမိ၏ ရှေးဟောင်း ဖေးမျိုးနွယ်စု သွေးမျိုးဆက်ကို ပျက်စီးအောင် ပြုလုပ်မှာ မဟုတ်ကြောင်း လူတိုင်း သိရှိထားကြသော်လည်း... သူက ပေတစ်ထောင် နတ်ဆိုးကြီးကို လကြတ်ဖိုအတွင်း၌ ချိပ်ပိတ်လိုက်သည်ကို မြင်တွေ့လိုက်ရသည့် အခါတွင်မူ အလွန်ပင် အံ့အားသင့်ဖွယ်ရာ ကောင်းလှသော မြင်ကွင်းတစ်ခု ဖြစ်နေဆဲ ဖြစ်သည်။

"အဲဒီလိုမျိုး မဟုတ်ပါဘူး။"

ဤအခိုက်အတန့်တွင် ပျက်စီးခြင်းကောင်းကင် အတတ်ပညာရှင်တစ်ဦးက လှမ်း၍ ပြောလိုက်သည်။

"ပေတစ်ထောင် နတ်ဆိုးကြီးဆိုတာက ရှားပါးလှတဲ့ ပိုးမွှားအမျိုးအစား ရှေးဟောင်း ဖေးသားရဲတွေထဲက တစ်ကောင်ပဲ ဖြစ်တယ်။ သူတို့ရဲ့ ခန္ဓာကိုယ်က အလွန်ပင် အဆိပ်ပြင်းလှပြီး ရှေးဟောင်း ခွန်အားကြီး ပညာရှင်တွေပင်လျှင် ၎င်းရဲ့ ကိုက်ခဲခြင်းကို တစ်ကြိမ်မျှ ခံရရုံနဲ့တင် ခန္ဓာကိုယ် ပျက်စီးပြီး သေဆုံးသွားနိုင်ကြတာ ဖြစ်ပါတယ်။ ပေတစ်ထောင် နတ်ဆိုးဂဏန်းကြီးတွေက ပုံမှန်အားဖြင့် တန်ဖိုးကြီးလှတဲ့ ဆေးဖက်ဝင် အပင်တွေနဲ့ အဆိပ်အတောက် အမျိုးမျိုးကို စားသုံးရတာကို နှစ်သက်ကြတာ ဖြစ်တယ်။

တန်ဖိုးကြီး ဆေးဖက်ဝင် အပင်တွေနဲ့ ဖေးသားရဲ အရိုးတွေမှာ မတူညီလှတဲ့ ဆေးဖက်ဝင် အဆီအနှစ်တွေနဲ့ စွမ်းအင် အမျိုးမျိုး (ဒါမှမဟုတ် ဆန့်ကျင်ဘက် စွမ်းအင်တွေပင်လျှင်) ပါဝင်နေတတ်ကြပြီး ၎င်းတို့ကို နတ်ဆိုးဂဏန်းကြီးရဲ့ ခန္ဓာကိုယ်အတွင်းမှာ ဆေးဖော်စပ်နိုင်တာ ဖြစ်ပါတယ်။ ၎င်းက ဆေးဖက်ဝင် အဆီအနှစ်တွေကို အတူတူ ပေါင်းစပ်သွားစေနိုင်ပြီး နတ်ဆိုးဂဏန်းကြီးအတွက် အသုံးပြုနိုင်အောင် ပြုလုပ်ပေးနိုင်တာ ဖြစ်ပါတယ်။"

"ဒါကြောင့်မို့လို့ ရှေးဟောင်းခေတ်တုန်းကဆိုရင် ပေတစ်ထောင် နတ်ဆိုးကြီးတစ်ကောင်ရဲ့ တန်ဖိုးက အလွန်ပင် ကြီးမားလှပါတယ်သူ့ရဲ့ ခန္ဓာကိုယ်အတွင်းမှာ စုဆောင်းထားတဲ့ ဆေးဖက်ဝင် အဆီအနှစ် ပမာဏသက်သက်နဲ့တင် အကယ်၍ အသုံးပြုမယ်ဆိုရင် အဆင့်မြင့်မားလှတဲ့ ဆေးလုံးတစ်လုံးကို ဖော်စပ်နိုင်မှာ ဖြစ်ပါတယ်။"

ပျက်စီးခြင်းကောင်းကင် အတတ်ပညာရှင်၏ ရှင်းလင်းပြောကြားချက်ကြောင့် လူတိုင်းက ချက်ချင်းပင် သဘောပေါက်သွားခဲ့ကြရတော့သည်။ ပေတစ်ထောင် နတ်ဆိုးကြီးသည် သူ စားသုံးလိုက်သော ဆေးဖက်ဝင်အပင်များနှင့် ဖေးသားရဲ အရိုးအမျိုးမျိုးမှ စွမ်းအင်များကို ဆွဲထုတ်နိုင်စွမ်း ရှိပေသည်။

ထို့ကြောင့် လော့ခွေ့က သူ၏ နတ်ဆိုးကြီး သွေးမျိုးဆက်ကို လကြတ်ဖိုအတွင်းသို့ စေလွှတ်လိုက်ရခြင်း၏ အကြောင်းပြချက်မှာ အဆင့်မြင့်မားလှသော ဆေးရတနာတစ်ပါးကို ဖော်စပ်ရာတွင် မိမိကိုယ်မိမိ ကူညီပံ့ပိုးပေးနိုင်ရန်အတွက် ဖြစ်ပေသည်။

ပေတစ်ထောင် နတ်ဆိုးကြီးကို အသုံးပြုခြင်းအားဖြင့် ၎င်းက တစ်ဝက်မျှသာ ကြိုးစားအားထုတ်ရုံဖြင့် နှစ်ဆမျှသော ရလဒ်ကောင်းကို ရရှိစေနိုင်မှာ ဖြစ်သည်။

"လော့ခွေ့လိုမျိုး သန်မာထွားကျိုင်းလှတဲ့ အမျိုးသားတစ်ယောက်က ဘာဖြစ်လို့ ပျက်စီးခြင်းကောင်းကင် အတတ်ပညာရှင်တစ်ယောက် ဖြစ်လာဖို့ ရွေးချယ်ခဲ့ရပြီး ကျင့်ကြံခြင်းအတွက် တန်ဖိုးရှိလှတဲ့ အချိန်တွေကို ပေးဆပ်ခဲ့ရတာလဲဆိုတာ မဆန်းတော့ပါဘူး။ အဖြေက သူ့မှာ ပေတစ်ထောင် နတ်ဆိုးဂဏန်းကြီး ရှိနေခဲ့လို့ပဲ ဖြစ်ရမယ်"

"သေချာတာပေါ့... အကယ်၍ ပေတစ်ထောင် နတ်ဆိုးဂဏန်းကြီးက ဖေးသားရဲ အရိုးကို ဝါးမြိုပြီး စွမ်းအင်တွေကို ဆွဲထုတ်ရာမှာ ကူညီပေးနိုင်တာဆိုရင်တော့... သူ ပျက်စီးခြင်းကောင်းကင် အတတ်ပညာရှင်တစ်ယောက် ဖြစ်လာတာက အချိန်ဖြုန်းတာမျိုး မဟုတ်ပါဘူး။"

လူအများစုက မတ်တတ်ရပ်လျက်ဖြင့် အော်ဟစ်ဆွေးနွေးနေကြစဉ်မှာပင် သူတို့သည် လော့ခွေ့အပေါ် အနည်းငယ်မျှ မနာလိုဖြစ်မိသွားခဲ့ကြရသည်။ ပေတစ်ထောင် နတ်ဆိုးဂဏန်းကြီး၏ ကူညီပံ့ပိုးမှုဖြင့်ဆိုလျှင် လော့ခွေ့၏ ပျက်စီးခြင်းကောင်းကင် အတတ်ပညာရပ်မှာ တစ်နေ့နေ့တွင် အလွန်ပင် ကြီးမားလှသော အောင်မြင်မှုကို ရရှိသွားမှာ သေချာလှပေသည်။

ထို့အပြင် ပျက်စီးခြင်းကောင်းကင် အတတ်ပညာရှင်များသည် လော့မျိုးနွယ်စုအတွင်း၌ အလွန်ပင် မြင့်မားလှသော အဆင့်အတန်းကို ခံစားကြရသူများ ဖြစ်ကြသည်။ ဖေးတစ်သောင်းကောင်းကင်ဘုံမှ ခွန်အားကြီး ပညာရှင်များစွာပင်လျှင် လော့မျိုးနွယ်စုထံသို့ မကြာခဏ လာရောက်ကြရင်း တန်ဖိုးကြီးမားလှသော ဆေးရတနာများကို ဝယ်ယူလေ့ ရှိကြသည်။

ဥပမာအားဖြင့် လော့မျိုးနွယ်စု၏ တတိယမြောက် ကောင်းကင်ဘုံတော်ဝင်ဦးလေးကြီး သည် လက်ရှိတွင် အနားယူသွားခဲ့ပြီ ဖြစ်သော်လည်း သူက အထူးမြင့်မြတ်လှသော အဆင့်ရှိ ပျက်စီးခြင်းကောင်းကင် အတတ်ပညာရှင်ကြီးတစ်ဦး ဖြစ်ပေသည်။

သူက လော့ဧကရာဇ်မင်းမြတ်ကိုယ်တိုင်ပင် ဆုံတွေ့ရလျှင်ပင် မျိုးဆက်သစ် လူငယ်တစ်ဦးကဲ့သို့ ရိုသေလေးစားစွာဖြင့် ဦးညွှတ်နှုတ်ဆက်ရမည့် လူတစ်ဦး ဖြစ်ပေသည်။

အကယ်၍ ထိုတတိယမြောက် ကောင်းကင်ဘုံတော်ဝင်ဦးလေးကြီးသာ အနားမယူသေးဘူးဆိုလျှင်... အမှန်အတိုင်း ပြောရမည်ဆိုပါက သူက ခြေတစ်ချက် နင်းလိုက်ရုံမျှဖြင့်ပင် လော့မျိုးနွယ်စု၏ နောက်ထပ် ဧကရာဇ်မင်းမြတ်က ဘယ်သူဖြစ်လာမလဲဆိုတာကို တိုက်ရိုက် ဆုံးဖြတ်ပေးနိုင်စွမ်း ရှိပေသည်။ ထီးနန်းလုပွဲများ လုပ်ဆောင်နေစရာပင် လိုအပ်မှာ မဟုတ်ချေ။

ဤအခိုက်အတန့်တွင် လော့ခွေ့သည် နောက်ထပ် အရိုးအစအနများနှင့် ဆေးဖက်ဝင် အပင်အချို့ကို လကြတ်ဖိုအတွင်းသို့ ထပ်မံ ထည့်သွင်းလိုက်ပြန်သည်။

ဒေါင်......

အပို ဆေးဖက်ဝင်ပစ္စည်းများကို လကြတ်ဖိုအတွင်းသို့ ထည့်သွင်းပြီးသွားခဲ့ပြီ ဖြစ်သဖြင့် ၎င်း၏ ဖိုအဖုံးမှာ ချက်ချင်းပင် တင်းကျပ်စွာ ပိတ်ဆို့သွားခဲ့ရတော့သည်။

ထိုနေရာတွင် ရှိနေကြသော စူးစူးစိုက်စိုက် စောင့်ကြည့်နေကြသည့် လူငယ် ပါရမီရှင်အချို့ကမူ လော့ခွေ့က လကြတ်ဖိုအတွင်းသို့ ထည့်သွင်းလိုက်သော အရိုးအစအနများနှင့် ဆေးဖက်ဝင် အပင်များမှာ သာမန်မဟုတ်သော အရာများ ဖြစ်ကြကြောင်း တစ်ချက်ကြည့်ရုံမျှဖြင့်ပင် သိရှိနိုင်ကြပေသည်။

၎င်းတို့ထဲက အချို့မှာ သူ ပထမဆုံး ထုတ်ယူခဲ့သော တတိယအဆင့် ဖေးသားရဲ အရိုးထက်ပင် ပိုမို၍ တန်ဖိုးကြီးမားလှသေးသည်။

အပို ထည့်သွင်းလိုက်သော ဖေးသားရဲ အရိုးများ၏ တန်ဖိုးမှာ ပင်မ ဖေးသားရဲ အရိုးထက်ပင် ပိုမို မြင့်မားနေခဲ့ရသည်။

ဤအခြေအနေကို ကြည့်ခြင်းအားဖြင့် လော့ခွေ့သည် အဆင့်မြင့်မားလှသော ဆေးရတနာတစ်ပါးကို ဖော်စပ်နိုင်ရန်အတွက် အသေအချာ ဆုံးဖြတ်ထားခဲ့ခြင်း ဖြစ်ကြောင်း ထင်ရှားလှပေသည်။

သို့သော်လည်း တကယ်တမ်းကျတော့ ပိုမို တန်ဖိုးကြီးမားလှသော ဖေးသားရဲ အရိုးများကို အပိုပစ္စည်းအဖြစ် အသုံးပြုပြီး အဆင့်နိမ့် ဆေးရတနာတစ်ခု၏ အဆင့်အတန်းကို အတင်းအဓမ္မ မြှင့်တင်ရန် ကြိုးစားခြင်းက အနည်းငယ်မျှတော့ ပုံစံမကျလှချေ။

တကယ့်ကို စစ်မှန်သော ခွန်အားကြီး ပျက်စီးခြင်းကောင်းကင် အတတ်ပညာရှင်တစ်ဦးဆိုလျှင်မူ အဆင့်နိမ့် ဖေးသားရဲ အရိုးတစ်ချောင်းကိုပင် အဆင့်မြင့် ဆေးရတနာတစ်ပါး ဖြစ်လာအောင် ဆေးဖော်စပ်နိုင်စွမ်း ရှိပေသည်။ ထိုသို့ လုပ်ဆောင်နိုင်မှသာ စစ်မှန်သော တန်ဖိုး ရှိပေလိမ့်မည်။

သို့သော်လည်း ၎င်းက အလွန်ပင် ခက်ခဲလွန်းလှပေသည်။ လော့ခွေ့က ပျက်စီးခြင်းကောင်းကင် အတတ်ပညာရပ်ကို ဆယ်စုနှစ်တစ်ခုခန့်သာ လေ့လာခဲ့ဖူးသူ ဖြစ်သဖြင့် သူက ဤမျှလောက်အထိ လုပ်ဆောင်နိုင်ခြင်းကပင် အလွန်ပင် အံ့အားသင့်စရာ ကောင်းလှပြီ ဖြစ်သည်။

"လော့ခွေ့က အပို ဖေးသားရဲ အရိုးတွေ ဤမျှလောက်အထိ အသုံးပြုနေတာက ဤပြိုင်ပွဲကို အနည်းငယ်မျှ မမျှတအောင် ပြုလုပ်လိုက်သလိုပဲ။ ယီယွင်ကတော့ ဖေးသားရဲ အရိုးတစ်ချောင်းတည်းကိုပဲ အသုံးပြုနေပြီး တခြား ဘာမှ မရှိဘူးလေ။"

"အဲဒီလိုဆိုတော့ကော ဘာဖြစ်လဲ။ ပြိုင်ပွဲတစ်ခုပင် မဟုတ်ပါဘူး။ ၎င်းက လော့ခွေ့တစ်ယောက်တည်းရဲ့ ကိုယ်ပိုင် စွမ်းဆောင်ရည် ပြသပွဲသက်သက်သာ ဖြစ်တယ် ငါလည်း ပျက်စီးခြင်းကောင်းကင် အတတ်ပညာရပ်ကို အနည်းငယ် သိရှိထားပါတယ်။ ယီယွင် အသုံးပြုနေတဲ့ စက်ဝန်းက အပြင်ပန်းကို အပြည့်အဝ ထုတ်ဖော်ပြသထားတာ ဖြစ်တယ်။ သူ ဘယ်လိုမျိုး မန္တန်တွေကို ဖော်ဆောင်နေသည်ဖြစ်စေ ငါ အားလုံးကို ရှင်းရှင်းလင်းလင်း မြင်တွေ့နေရတယ်။

ယီယွင်ရဲ့ မန္တန်တွေက ကောင်းမွန်တဲ့ အဆင့်ရှိ ဆေးရတနာတွေကို လုံးဝ ဖော်စပ်နိုင်မှာ မဟုတ်ဘူး၊ ဒါကြောင့် သူ အနိုင်ရရှိဖို့ဆိုတာ ဘယ်လိုမှ မဖြစ်နိုင်ပါဘူး။ ထည့်ပြောရရင်တော့ သူရဲ့ အဆင့်နိမ့် မန္တန်တွေက တကယ့်ကို ပြည့်စုံမှု ရှိလှတယ်လို့ပင် မသတ်မှတ်နိုင်ပါဘူး။ အဲဒီလိုမျိုး အခြေအနေမှာ ဖေးသားရဲ အရိုးကို ဆေးဖော်စပ်နိုင်ခြင်းကပင် သူရဲ့ အမြင့်ဆုံး အကန့်အသတ် ဖြစ်ရလိမ့်မယ်။

သူက အပို ဖေးသားရဲ အရိုးတွေကို ထပ်မံ ထည့်သွင်းဖို့အတွက် ဘယ်လိုမှ တတ်နိုင်မှာ မဟုတ်ဘူး၊ အဲဒီတော့ မမျှတစရာ ဘာရှိဦးမှာလဲ။"

ပျက်စီးခြင်းကောင်းကင် အတတ်သင် ကလေးငယ်တစ်ဦးက လှမ်း၍ ပြောဆိုလိုက်သည်။

သူက ဘာမှ မစဉ်းစားဘဲ စကားပြောဆိုနေခြင်း မဟုတ်ချေ။

ယီယွင်တွင် ပျက်စီးခြင်းကောင်းကင် အတတ်ပညာရပ်ဆိုင်ရာ ပါရမီ ရှိနေနိုင်သည်ဆိုသော်လည်း သူ၏ အသက်သက်တမ်းမှာ လော့ခွေ့၏ ထက်ဝက်ပင် မရှိသေးချေ။ ပျက်စီးခြင်းကောင်းကင် အတတ်ပညာရှင်တစ်ဦး ဖြစ်လာရန်အတွက် အချိန်ကာလများစွာ စုဆောင်းထားခဲ့ရန် လိုအပ်ပေသည်။ ထို့အပြင် ယီယွင်သည် ဖေးတစ်သောင်းကောင်းကင်ဘုံ၏ ပျက်စီးခြင်းကောင်းကင် အတတ်ပညာရပ်များနှင့် လုံးဝ အပြည့်အဝ ထိတွေ့ဖူးခြင်း မရှိသေးသဖြင့် ရလဒ်ကတော့ ကြိုတင် သတ်မှတ်ပြီးသား ဖြစ်ပေသည်။

ဤအခိုက်အတန့်တွင် လော့ဟော်အာကိုယ်တိုင်ပင် အလွန်ပင် စိုးရိမ်ပူပန်မှုကို ခံစားနေရပြီ ဖြစ်သည်။

သူမသည် ယီယွင်က ရှုံးနိမ့်သွားမှာ မဟုတ်ကြောင်း သေချာပေါက် သိရှိထားခဲ့သည်။ သူက ရှေ့သို့ တိုးထွက်လာဝံ့သည်ဆိုကတည်းက သူ့တွင် မိမိကိုယ်မိမိ ယုံကြည်မှု ရှိလှသော အရာတစ်ခုခု ရှိနေရမှာ ဖြစ်သည်။ သို့သော်လည်း ယခုအခါတွင်မူ ယီယွင်၏ ဆေးရတနာမှာ (၇၀) ရာခိုင်နှုန်းခန့်အထိ ဆေးဖော်စပ်ပြီးသွားခဲ့ပြီ ဖြစ်သော်လည်း မည်သည့် အံ့ဖွယ် အခြင်းအရာမျိုးမျှ ပေါ်ထွက်လာခြင်း မရှိသေးချေ။

လော့ဟော်အာသည် ဤနေရာတွင် ရှိနေကြသော လူများထဲတွင် ဤပြိုင်ပွဲနှင့် ပတ်သက်၍ အကဲဖြတ်ရန်အတွက် အလိုအပ်ဆုံးသော လူတစ်ဦး ဖြစ်ပေသည်။ သူမသည် ဖေးတစ်သောင်းကောင်းကင်ဘုံ၏ ပျက်စီးခြင်းကောင်းကင် အတတ်ပညာရပ်ကို ကျွမ်းကျင်နှံ့စပ်လှရုံတင်မကဘဲ အောက်မြေကမ္ဘာက ပျက်စီးခြင်းကောင်းကင် အတတ်ပညာရပ်ကိုပါ ကျွမ်းကျင်သူ ဖြစ်ပေသည်။

ယီယွင် အသုံးပြုနေသော အတတ်ပညာရပ်များနှင့်ဆိုလျှင် သူ ဖော်စပ်လိုက်သော ဆေးရတနာများ၏ အရည်အသွေးမှာ ညံ့ဖျင်းခြင်း အဆင့် မျှသာ ဖြစ်လာလိမ့်မည် ဖြစ်ကြောင်း သူမ ကောင်းကောင်း သိရှိထားပေသည်။

အလွန်ပင် ရှေးကျလှသော နည်းလမ်းများကို အသုံးပြုပြီး ဆောက်လုပ်ရေး ပစ္စည်းပုံကြီးတစ်ခုဖြင့် ကျောက်တုံးတဲအိမ်လေးတစ်ခုကို တည်ဆောက်နေသည့်အလား ဖြစ်သဖြင့် ထိုကျောက်တုံးတဲအိမ်လေးက ပြီးစီးလုနီးပါး ဖြစ်နေသည့် အချိန်တွင် မည်သည့် ထိပ်တန်း ဗိသုကာပညာရှင်မျှ ၎င်းကို ခမ်းနားထည်ဝါလှသော နန်းတော်ကြီးတစ်ခုအဖြစ် ပြောင်းလဲပစ်နိုင်ရန် လုံးဝ မဖြစ်နိုင်တော့ချေ။

လော့ခွေ့နှင့် ပတ်သက်၍မူ သူက အထူးမြင့်မြတ်လှသော အဆင့်ရှိ ပျက်စီးခြင်းကောင်းကင်ဆေးဖိုကို အသုံးပြုနေခြင်း ဖြစ်ကာ အပို ဆေးဖော်စပ်ပစ္စည်းများစွာနှင့် ပေတစ်ထောင် နတ်ဆိုးဂဏန်းကြီး သွေးမျိုးဆက်တို့ ရှိနေသဖြင့် လော့ခွေ့ ဖော်စပ်လိုက်သော ဆေးရတနာ၏ အရည်အသွေးမှာ သန့်စင်ခြင်း နှင့် ထူးချွန်ခြင်း အဆင့်အကြားတွင် ရှိနေလိမ့်မည်ဟု လော့ဟော်အာ ခန့်မှန်းလိုက်မိသည်။ သူတို့ နှစ်ဦးကြားက ကွာခြားချက်မှာ နေ့နှင့် ညအလား ကြီးမားလှပေသည်။

၎င်းအပြင် လော့ခွေ့၏ ဆေးဖော်စပ်မှု အရှိန်အဟုန်မှာ ယီယွင်ထက် အများကြီး ပိုမို မြန်ဆန်လှပေသည်။ ယီယွင်က (၇၀) ရာခိုင်နှုန်းမျှသာ ဆေးဖော်စပ်ရသေးချိန်တွင် လော့ခွေ့မှာမူ (၉၀) ရာခိုင်နှုန်းခန့်အထိ ဆေးဖော်စပ်ပြီးသွားခဲ့ပြီ ဖြစ်သည်။

နောက်ထပ် သုံးမိနစ်ပင် မပြည့်တော့သော အချိန်အတွင်းမှာတင် လော့ခွေ့၏ ဆေးရတနာမှာ အပြီးသတ် ဖော်စပ်ပြီးသွားတော့မှာ ဖြစ်သည်။

သို့သော်လည်း ဆေးရတနာက အပြီးသတ် ဖော်စပ်ပြီးလုနီးပါး ဖြစ်နေသည့် အချိန်တွင် လော့ခွေ့အနေဖြင့် ၎င်းကို ဆက်လက် ထိန်းသိမ်းထားရန်အတွက် အခက်အခဲအချို့ စတင် ကြုံတွေ့နေရပြီ ဖြစ်ကြောင်း လော့ဟော်အာ မြင်တွေ့လိုက်သည်။

တကယ်တမ်းကျတော့ သူက အပို ဖေးသားရဲ အရိုးများစွာကို ထည့်သွင်း အသုံးပြုခဲ့ခြင်း ဖြစ်သဖြင့် ၎င်းက သူ၏ စိတ်ဝိညာဉ် ခွန်အားအပေါ် အလွန်ပင် ဖိအားများပြားစေခဲ့ခြင်း ဖြစ်သည်။ လော့ခွေ့၏ မန္တန်များအတွင်း၌ ချို့ယွင်းချက်အချို့ စတင် ပေါ်ထွက်လာခဲ့ပြီ ဖြစ်ကာ ဤအချက်က သူ ဖော်စပ်လိုက်သော ဆေးရတနာ၏ အရည်အသွေးမှာ သန့်စင်ခြင်း အဆင့် မျှသာ ဖြစ်လာတော့မှာ ဖြစ်ကြောင်း ညွှန်ပြနေခဲ့သည်။

စက္ကန့်များမှာ မိနစ်များအဖြစ်သို့ ပြောင်းလဲသွားခဲ့ရသည်။ ယီယွင်သည် တစ်ခုပြီးတစ်ခုသော မန္တန်များကို ဆက်တိုက် ဖော်ဆောင်နေခဲ့ပြီး သတ်မှတ်ထားသော စည်းကမ်းတကျအတိုင်း ဆက်လက် လုပ်ဆောင်နေခဲ့သည်မှာ သူက မည်သည့် စိုးရိမ်ပူပန်မှုမျိုးမျှ ရှိမနေခဲ့သည့်အလား ဖြစ်ပေသည်။

တစ်ချိန်တည်းမှာပင် ယီယွင်သည် သူ၏ စွမ်းအင် အမြင် ကို ဖွင့်ဟထားပြီး ဖြစ်ပေသည်။ အခြားသူများမှာ လကြတ်ဖိုအတွင်းက အခြေအနေကို မြင်တွေ့နိုင်ခြင်း မရှိကြသော်လည်း သူကတော့ အားလုံးကို ရှင်းရှင်းလင်းလင်း မြင်တွေ့နေရသည်။

လကြတ်ဖိုအတွင်း၌ ပေတစ်ထောင် နတ်ဆိုးဂဏန်းကြီးမှာ ၎င်း၏ အမြင့်ဆုံး အကန့်အသတ်သို့ ရောက်ရှိနေခဲ့ပြီ ဖြစ်သည်။ ၎င်းက စစ်မှန်သော ပေတစ်ထောင် နတ်ဆိုးဂဏန်းကြီး မဟုတ်ဘဲ လော့ခွေ့က ဖော်ဆောင်ထားခဲ့သော သွေးမျိုးဆက် တစ်ခုမျှသာ ဖြစ်ပေသည်။

တစ်ပါတ်တည်းဖြင့် စွမ်းအင်များစွာကို ဝါးမြိုလိုက်ပြီးသည့်နောက်တွင်တော့ ၎င်းက ၎င်းတို့ကို အပြည့်အဝ မခြေဖျက်နိုင်တော့ချေ။ ရလဒ်အနေဖြင့် ၎င်း၏ ခန္ဓာကိုယ်မှာ တကယ့်ကို ပေါက်ကွဲထွက်လုမတတ် အကြီးအကျယ် ဖောင်းကားလာခဲ့ရတော့သည်။

၎င်းနှင့် တစ်ချိန်တည်းမှာပင် လော့ခွေ့ ဖော်ဆောင်လိုက်သော စွမ်းအင်မန္တန်များမှာ အတူတူ စုစည်းလာခဲ့ကြပြီ ဖြစ်သည်။ သူက ၎င်းတို့ကို ဆေးရတနာတစ်ပါးအဖြစ် စတင် စုစည်းတော့မှာ ဖြစ်သည်။

လော့ဟော်အာ ပြောခဲ့သည့်အတိုင်း ထိုစွမ်းအင်မန္တန်များအတွင်း၌ ချို့ယွင်းချက်များ ရှိနေခဲ့သည်။ သာမန်လူများအနေဖြင့် ၎င်းတို့ကို ရှာဖွေတွေ့ရှိနိုင်ရန် မလွယ်ကူလှသော်လည်း ယီယွင်ကတော့ အားလုံးကို အလွန်ပင် ရှင်းရှင်းလင်းလင်း မြင်တွေ့နေရသည်။

သူက ထိုနေရာတွင် ချို့ယွင်းချက် မည်မျှလောက် ရှိနေသလဲဆိုတာကိုပါ အသေအချာ ပြောဆိုနိုင်စွမ်း ရှိပေသည်။

ယီယွင်သည် ဖေးတစ်သောင်းကောင်းကင်ဘုံ၏ ပျက်စီးခြင်းကောင်းကင် အတတ်ပညာရပ်ကို အပြည့်အဝ နားမလည်သေးသည်မှာ အမှန်ပင် ဖြစ်သော်လည်း ခရမ်းရောင်သလင်းကျောက် ရှိနေသဖြင့် ပြီးပြည့်စုံလှသော စွမ်းအင်ပုံစံက ဘယ်လိုမျိုး ရှိရမလဲဆိုတာကိုတော့ ယီယွင် ကောင်းကောင်း သိရှိထားပေသည်။

စွမ်းအင်များ ချို့ယွင်းနေခဲ့သော နေရာများမှာ တဖြည်းဖြည်းချင်း စုဆောင်းလာခဲ့ကြပြီး ၎င်းတို့၏ အရွယ်အစားမှာလည်း တဖြည်းဖြည်း ကြီးမားလာခဲ့ရသည်။ ဆေးရတနာက ပုံသဏ္ဌာန် စတင် ပေါ်ထွက်လာခဲ့သည့် အခိုက်အတန့်တွင် ထိုချို့ယွင်းချက် အားလုံးမှာ ချက်ချင်းပင် အတူတူ ပေါင်းစပ်သွားခဲ့ကြပြီး ၎င်းတို့၏ အကြီးမားဆုံးသော အရွယ်အစားသို့ ရောက်ရှိသွားခဲ့ကြသည်။

သို့သော်လည်း ၎င်းတို့က လော့ခွေ့၏ ဆေးရတနာဖြစ်တည်ခြင်း လက်ဟန်မန္တန်များ၏ အတင်းအဓမ္မ ဖိနှိပ်ခြင်းကို ခံလိုက်ရသဖြင့် ချက်ချင်း ပေါက်ကွဲထွက်သွားခြင်း မရှိခဲ့ချေ။ နောက်ဆုံးတွင်မူ ၎င်းတို့က ဆေးရတနာအတွင်း၌ ကျန်ရှိနေခဲ့ကြမှာ ဖြစ်ပြီး ဆေးရတနာ၏ စွမ်းအင် အပေါက်အပြဲများ ဖြစ်လာခဲ့ကြကာ ဆေးရတနာ၏ အဆင့်အတန်း သတ်မှတ်ချက်ကို ထိခိုက်စေမှာ ဖြစ်သည်။

တကယ်တမ်း လော့ခွေ့သည် စွမ်းအင်မန္တန်များကို အတူတူ ပေါင်းစပ်ရန်အတွက် လက်ဟန်မန္တန်တစ်ခုကို အသုံးပြုလိုက်သည့် အခိုက်အတန့်မှာစွမ်းအင်များ အငြိမ်သက်ဆုံး ဖြစ်နေသည့် အချိန်ကာလ ဖြစ်ပေသည်။

၎င်းက လော့ခွေ့၏ စိတ်ဝိညာဉ် ခွန်အားအပေါ် အလွန်ပင် ကြီးမားလှသော စိန်ခေါ်မှုတစ်ခု ဖြစ်ပေရာထို့ကြောင့်ပင် ဆေးရတနာ ဖြစ်တည်ခြင်း အဆင့်မှာ ပျက်စီးခြင်းကောင်းကင် အတတ်ပညာရှင်များ ဆေးဖော်စပ်ရာတွင် အရေးအကြီးဆုံးသော အဆင့်တစ်ခု ဖြစ်ရခြင်း ဖြစ်သည်။ မည်သည့် အမှားအယွင်းမျိုးမျှ ရှိ၍ မရနိုင်ချေ။

ဤအခိုက်အတန့်တွင် လော့ခွေ့၏ ဆေးရတနာမှာ အပြီးသတ် ဖော်စပ်ပြီးလုနီးပါး ဖြစ်နေခဲ့ပြီ ဖြစ်သည်။

ရာနှင့်ချီသော စွမ်းအင်မန္တန်များမှာ လော့ခွေ့၏ စုစည်းမှုကို ခံထားရပြီး ဖြစ်ပေသည်။ နောက်ဆုံးသော အဆင့်မှာ ၎င်းတို့ကို တစ်ခုတည်းအဖြစ် ပေါင်းစပ်ရန်သာ ကျန်ရှိတော့သည်။ သူက အပြည့်အဝ အာရုံစိုက်ထားခဲ့သဖြင့် သူ၏ နဖူးထက်တွင် ချွေးစက်များ စတင် စီးကျလာခဲ့ရတော့သည်။

၎င်းမှာ တတိယအဆင့် ဆေးရတနာတစ်ခုမျှသာ ဖြစ်သည်ဆိုသော်လည်း အပို ဖေးသားရဲ အရိုးများစွာကို ထည့်သွင်း အသုံးပြုခဲ့ခြင်း ဖြစ်သဖြင့် ထူးချွန်ခြင်း အဆင့်ရှိ ဆေးရတနာတစ်ခုကို ဖော်စပ်နိုင်ရန်အတွက် လော့ခွေ့အတွက် အလွန်ပင် ကြီးမားလှသော စိန်ခေါ်မှုတစ်ခု ဖြစ်နေခဲ့ရသည်။

သူသည်လည်း မိမိ၏ အမြင့်ဆုံး အကန့်အသတ်သို့ ရောက်ရှိနေခဲ့ပြီ ဖြစ်သည်။ အကယ်၍ ထိုသို့သာ မဟုတ်ဘူးဆိုလျှင် သူက နောက်ဆုံးအပိုင်းတွင် စွမ်းအင်မန္တန်များထက်၌ ဤမျှလောက်အထိ ချို့ယွင်းချက်များစွာကို ထွက်ပေါ်စေခဲ့မှာ မဟုတ်ချေ။

သူက ထူးချွန်ခြင်း အဆင့်ကို မွေးညင်းတစ်မျှဖြင့် လွဲချော်သွားခဲ့ရသည် ဖြစ်စေဦးတော့ လော့ခွေ့အနေဖြင့် ဤကဲ့သို့သော ရလဒ်ကောင်းကို ရရှိနိုင်ခြင်းကပင် သူ ဂုဏ်ယူနိုင်စရာ အကြောင်းတစ်ခု ဖြစ်ပေသည်။ တကယ်တမ်းကျတော့ သူက ကျင့်ကြံခြင်း သက်တမ်း နှစ်ပေါင်း ရှစ်ဆယ်မျှသာ ရှိသေးသော်လည်း သူ၏ ခွန်အားမှာ ထူးခြားလှရုံတင်မကဘဲ ပျက်စီးခြင်းကောင်းကင် အတတ်ပညာရပ်အပေါ်မှာပါ အာရုံစိုက်နိုင်စွမ်း ရှိခဲ့သည် မဟုတ်ပါလား။

"ပေါင်းစပ်စမ်း။"

လော့ခွေ့သည် အခြားသော အာရုံထွေပြားမှု အားလုံးကို ဖယ်ရှားလိုက်ရင်း မိမိ၏ ကျန်ရှိနေသေးသော စိတ်ဝိညာဉ် ခွန်အား အားလုံးကို လကြတ်ဖိုအတွင်းသို့ ပေးဆပ်လိုက်ကာ စွမ်းအင်မန္တန်များ ပေါင်းစပ်ခြင်းကို ထိန်းချုပ်လိုက်တော့သည်။

ရာနှင့်ချီသော စွမ်းအင်မန္တန်များမှာ လကြတ်ဖိုအတွင်း၌ နေမင်းကြီးအလား တောက်ပလှသော အလင်းတန်းများကို စတင် ထုတ်ဖော်လာခဲ့ကြသည်။ ၎င်းတို့က တစ်ခုတည်းအဖြစ် စတင် ပေါင်းစပ်လုနီးပါး ဖြစ်နေသည့် အချိန်မှာတင်...

မည်သူမျှ သတိမပြုမိနိုင်လှသော ဆွဲဆောင်မှု ခွန်အားတစ်ခုမှာ ထိုစွမ်းအင်မန္တန်များအတွင်းသို့ ရောနှော တိုးဝင်သွားခဲ့ရတော့သည်။ ဤဆွဲဆောင်မှု ခွန်အားမှာ မည်သည့် ပုံသဏ္ဌာန်မျိုးမျှ ရှိမနေခဲ့ဘဲ စကြဝဠာကြီး စတင် တည်ဆောက်စအချိန်က မူလ အစွမ်းများအလား ဖြစ်ပေရာ မယ်တော် လော့ ဖြစ်စေ၊ မယ်တော် ရွှမ်ဟို့ ဖြစ်စေ လော့ခွေ့ထက် ပိုမို ခွန်အားကြီးသူများပင်လျှင် ၎င်းကို လုံးဝ သတိပြုမိနိုင်ခြင်း မရှိခဲ့ကြချေ။

ဤအခိုက်အတန့်တွင် လူတိုင်းနီးပါး၏ အာရုံစိုက်မှုများမှာ လော့ခွေ့၏ လကြတ်ဖိုထံသို့သာ ရောက်ရှိနေခဲ့ကြသည်။ မည်သူကမျှ ယီယွင်ကို ဂရုမစိုက်ခဲ့ကြချေ။

ယီယွင်သည် ဘေးနားတွင် မတ်တတ်ရပ်နေခဲ့ရင်း မိမိ၏ စွမ်းအင်မန္တန်များကို စုစည်းနေကာ ခရမ်းရောင်သလင်းကျောက်ကို ထိန်းချုပ်လိုက်သည်။ သူက ရာနှင့်ချီသော စွမ်းအင်မန္တန်များကို ဖြည်းညှင်းစွာဖြင့် အနည်းငယ်မျှ တွန်းရွှေ့ လိုက်တော့သည်။

ဤကဲ့သို့သော အနည်းငယ်မျှ တွန်းရွှေ့လိုက်ခြင်းက အရေးအကြီးဆုံးသော စွမ်းအင် ပေါင်းစပ်မှု အမှတ်အသားကို ရွှေ့လျားသွားစေခဲ့သည်။

၎င်းက စွမ်းအင်မန္တန်များအတွင်းက ချို့ယွင်းချက်များစွာကို အတင်းအဓမ္မ ဖိနှိပ်လိုက်ခြင်း ဖြစ်ပေရာချက်ချင်းပင် ၎င်းက ရေနံတွင်းတစ်ခုအတွင်းသို့ မီးပွားတစ်ခု ကျဆင်းသွားခဲ့သည့်အလား ဖြစ်သွားခဲ့ရတော့သည်။ သိမ်မွေ့လှသော စွမ်းအင် တည်ငြိမ်မှု ဟန်ချက်ညီခြင်းမှာ လုံးဝ ပျက်စီးသွားခဲ့ရပြီ ဖြစ်သည်။

မိမိ၏ အမြင့်ဆုံး အကန့်အသတ်သို့ ရောက်ရှိနေခဲ့သော လော့ခွေ့သည် မျက်တောင်တစ်ခတ်စာမျှ နောက်ကျသွားခဲ့သည့် အချိန်ကျမှသာ... မည်သို့မျှ ရှာဖွေရခက်ခဲလှသော စွမ်းအင် ကမောက်ကမဖြစ်မှုကို သတိပြုမိလိုက်ရတော့သည်။

မျက်တောင်တစ်ခတ်စာ အချိန်ကာလမှာ အလွန်ပင် တိုတောင်းလှသည်ဆိုသော်လည်း ဆေးရတနာ ဖြစ်တည်ခြင်း၏ အရေးကြီးဆုံး အခိုက်အတန့်အတွက်မူ ၎င်းက တကယ့်ကို သေစေနိုင်လောက်သော အရာတစ်ခု ဖြစ်ပေသည်။

"မကောင်းတော့ဘူး။"

လော့ခွေ့သည် သူ၏ မျက်ဝန်းများကို အကြီးအကျယ် ပြူးကျယ်လိုက်မိရင်း သူ၏ မျက်စိသူငယ်အိမ်များမှာ သွေးချင်းချင်းနီသွားခဲ့ရတော့သည်။ သူက အော်ဟစ်လိုက်ရင်း မိမိ၏ သွေးမျိုးဆက် ခွန်အား အားလုံးကို စတင် တောက်လောင်စေခဲ့သည်။

လကြတ်ဖိုအတွင်းက ပေတစ်ထောင် နတ်ဆိုးဂဏန်းကြီးသည်လည်း ၎င်း၏ ပါးစပ်ကြီးကို အကြီးအကျယ် ဟလိုက်ရင်း ပြိုလဲပျက်စီးနေခဲ့ပြီ ဖြစ်သော စွမ်းအင်မန္တန်များကို ဝါးမြိုရန် ကြိုးစားလိုက်တော့သည်။

သူက ဆေးရတနာ၏ အရည်အသွေး ပျက်စီးသွားမည့် အန္တရာယ်ကို အရင်းပြုပြီး ဆေးရတနာကို ဆက်လက် ထိန်းသိမ်းထားရန် ကြိုးစားနေခြင်း ဖြစ်သည်။

သို့သော်လည်း ပေတစ်ထောင် နတ်ဆိုးဂဏန်းကြီးမှာ မူလကတည်းက အကြီးအကျယ် ဖောင်းကားနေခဲ့ပြီ ဖြစ်ကာ ၎င်း၏ အစွမ်းများ ကုန်ဆုံးလုနီးပါး ဖြစ်နေခဲ့ပြီ ဖြစ်ရာ... ၎င်းက ဘယ်လိုလုပ်ပြီး အောင်မြင်နိုင်ပါ့မလဲ။

ယီယွင်သည်လည်း အားနာနာဖြင့် ရပ်ကြည့်မနေခဲ့ဘဲ ခရမ်းရောင်သလင်းကျောက်ကို ထိန်းချုပ်လိုက်ကာ ဒုတိယမြောက် စွမ်းအင် ပေါင်းစပ်မှု အမှတ်အသားကို ထပ်မံ၍ တွန်းရွှေ့လိုက်ပြန်သည်။

ထိုသို့ လုပ်ဆောင်လိုက်သည့် အခွင့်အရေးနှင့်အတူ... စွမ်းအင်များ ပြိုလဲပျက်စီးခြင်းကို ဘယ်လိုမှ တားဆီး၍ မရနိုင်တော့ချေ။

ဘုန်း......

အလွန်ပင် ပြင်းထန်လှသော ပေါက်ကွဲမှုကြီးတစ်ခု ထွက်ပေါ်လာခဲ့ပြီး လေထုထဲတွင် လည်ပတ်နေခဲ့သော လကြတ်ဖိုကြီးမှာ အကြီးအကျယ် တုန်ရီသွားခဲ့ရတော့သည်။ ဆေးဖို၏ အဖုံးမှာ ချက်ချင်းပင် ပွင့်ထွက်သွားခဲ့ရပြီး မျက်နှာကျက်ဆီသို့ အပြင်းအထန် ထိုးတက်သွားခဲ့ရသည်။

၎င်းက မျက်နှာကျက်ထက်က ကျောက်ပြားတစ်ချောင်းကိုပါ အပိုင်းပိုင်းအစစ ဖြစ်သွားအောင် ရိုက်ခွဲပစ်လိုက်ခြင်း ဖြစ်ပေသည်။

ဝူး......

ပြာလွင်လှသော မီးတောက်လုံးကြီးတစ်ခုမှာ ကောင်းကင်သို့ ထိုးတက်သွားခဲ့ရသည်။ လော့ခွေ့၏ ပေတစ်ထောင် နတ်ဆိုးဂဏန်းကြီး သွေးမျိုးဆက် မှာ ထိုပြာလွင်လှသော မီးတောက်လုံးကြီးအတွင်း၌ ပိတ်မိသွားခဲ့ရပြီး နာကျင်စွာဖြင့် ရုန်းကန်နေခဲ့ရတော့သည်။

ပေတစ်ထောင် နတ်ဆိုးဂဏန်းကြီး သွေးမျိုးဆက်မှာ သန်မာလှသည်ဟု ဆိုနိုင်သော်လည်း ၎င်းက မိမိ၏ အမြင့်ဆုံး အကန့်အသတ်သို့ ရောက်ရှိနေချိန်တွင် ကြိုတင် ပြင်ဆင်မှု မရှိဘဲနှင့် အလွန်ပင် နီးကပ်လှသော အကွာအဝေးက ပေါက်ကွဲမှုလှိုင်းများ၏ ဝါးမြိုခြင်းကို ခံလိုက်ရခြင်း ဖြစ်ပေသည်။

ထို့အပြင် ၎င်းက လကြတ်ဖိုအတွင်းက ပိတ်ဆို့ထားသော နေရာတစ်ခုအတွင်း၌ ဖြစ်ပွားခဲ့ခြင်း ဖြစ်သဖြင့် ၎င်း၏ ဒဏ်ရာပြင်းထန်မှုကို ခန့်မှန်းကြည့်နိုင်ပေသည်။

ပေတစ်ထောင် နတ်ဆိုးဂဏန်းကြီးနှင့် စိတ်ချင်း ဆက်နွယ်နေခဲ့သော လော့ခွေ့သည်လည်း ညည်းတွားလိုက်မိရင်း နောက်သို့ လွင့်ထွက်သွားခဲ့ရကာ မြေပြင်ပေါ်သို့ လဲကျသွားခဲ့ရတော့သည်။ သူ၏ မျက်နှာတစ်ခုလုံးမှာ စက္ကူဖြူတစ်ချောင်းအလား ဖြူဖျော့သွားခဲ့ရပြီ ဖြစ်သည်။

လော့ခွေ့၏ နားစည်နှစ်ဖက်ဆီမှ မည်းနက်လှသော သွေးစက်နှစ်တန်း စီးကျလာခဲ့ရတော့သည်။ ၎င်းက ပေတစ်ထောင် နတ်ဆိုးဂဏန်းကြီး ရရှိသွားခဲ့သော ဒဏ်ရာကို အတိအကျ ဖော်ပြနေခြင်း ဖြစ်ပေသည်။ ပိတ်ဆို့ထားသော နေရာတစ်ခုအတွင်းက ပေါက်ကွဲမှုလှိုင်းများမှာ ပေတစ်ထောင် နတ်ဆိုးဂဏန်းကြီး၏ နားစည်များကို ဖြတ်သန်း ပေါက်ကွဲသွားခဲ့ခြင်း ဖြစ်သဖြင့် ၎င်းကို အပြင်းအထန် ဒဏ်ရာရရှိသွားစေခဲ့ခြင်း ဖြစ်သည်။

သူ ဤဒဏ်ရာများမှ ပြန်လည် နာလန်ထူလာရန်အတွက် အနည်းဆုံး လအနည်းငယ်မျှ ကြာမြင့်ဦးမှာ ဖြစ်သည်။

ဒုန်း........

လကြတ်ဖိုကြီးမှာ မြေပြင်ပေါ်သို့ အပြင်းအထန် ပြုတ်ကျလာခဲ့ရပြီး ၎င်းအတွင်းမှ မည်းနက်လှသော ပြာမှုန်များ ဖိတ်စင်ထွက်လာခဲ့ရတော့သည်။

လော့ခွေ့သည်လည်း သတိလက်လွတ် ဖြစ်သွားခဲ့ရပြီ ဖြစ်သည်။ သူ၏ မျက်နှာမှာ ဗလာဖြစ်နေခဲ့ပြီး မြေပြင်ပေါ်တွင် လိမ့်ပတ်နေခဲ့သော လကြတ်ဖိုကြီးကို ဒီအတိုင်း ကြောင်အစွာ လှမ်းကြည့်နေမိသည်။ သူ မိမိ၏ မျက်စိကိုပင် မိမိ မယုံကြည်နိုင် ဖြစ်နေခဲ့ရသည်။

ဆေးဖိုက ပေါက်ကွဲသွားခဲ့တာလား။ သူ ဆေးရတနာကို ဆေးဖော်စပ်ခြင်းက... နောက်ဆုံးတွင် ဆေးဖို ပေါက်ကွဲခြင်းဖြင့် အဆုံးသတ်သွားခဲ့ရတယ် ဟုတ်လား။

ဤမျှလောက်အထိ အရေးကြီးလှသော အခမ်းအနားမျိုးတွင် မယ်တော် လော့၊ မယ်တော် ရွှမ်ဟို့၊ တစ်လောကလုံးက ရောက်ရှိလာကြသော ကမ္ဘာကျော် ပညာရှင်များနှင့် သူ၏ အနာဂတ် သခင် ဖြစ်လာမည့် မင်းသား ချီရှန်းတို့ အားလုံး ရှိနေကြစဉ်မှာတင် သူက မိမိ၏ ဆေးဖိုကို ပေါက်ကွဲအောင် ပြုလုပ်လိုက်မိတာ ဖြစ်သည်။

လော့ခွေ့၏ ရင်ဘတ်တစ်ခုလုံးမှာ အပြင်းအထန် တုန်ခါနေခဲ့ရတော့သည်။

"ဒါက..."

ထိုနေရာတွင် ရှိနေကြသော လူငယ် ပါရမီရှင် အားလုံးမှာ သူတို့၏ မျက်ဝန်းများကို အကြီးအကျယ် ပြူးကျယ်လိုက်ကြမိသည်။ သူတို့ထဲက အချို့မှာ မိမိတို့ လက်ထဲက ဝိုင်ခွက်များကို တိုက်မိပြီး မှောက်ကျသွားခဲ့သည်ကိုပင် သတိမပြုမိနိုင်ကြတော့ချေ။

လော့ခွေ့သည် မူလက မိမိ၏ စွမ်းဆောင်ရည်များကို အားရပါးရ ပြသရင်း အနည်းဆုံးတော့ သန့်စင်ခြင်း အဆင့် ရှိ ဆေးရတနာတစ်ခုကို ဖော်စပ်ပြသတော့မည့် အခြေအနေ ဖြစ်ပေသည်။ သို့သော်လည်း နောက်ဆုံးသော အခိုက်အတန့်တွင်မူ သူက မိမိ၏ ဆေးဖိုကို ပေါက်ကွဲအောင် ပြုလုပ်လိုက်မိသည်။

ရလဒ်အနေဖြင့် သူ့တွင် အညံ့ဖျင်းဆုံး အဆင့်ရှိ ဆေးရတနာတစ်ခုမျှပင် ကျန်ရှိမနေခဲ့တော့ချေ။ ၎င်းက သန့်စင်ခြင်း အဆင့် ရှိ ဆေးရတနာတစ်ခု ဖြစ်လာမည့်အစား ပြာပုံကြီးတစ်ခုအဖြစ်သို့ တိုက်ရိုက် ပြောင်းလဲသွားခဲ့ရခြင်း ဖြစ်ပေသည်။ ဤကဲ့သို့သော ရုတ်တရက် ပြောင်းလဲသွားမှုကြီးက တကယ့်ကို ကြီးမားလွန်းလှပေသည်။

လော့ခွေ့က မိမိ၏ ဝိညာဉ် ပျောက်ဆုံးသွားခဲ့ရသည့်အလား ဖြစ်နေသည်ကို မြင်တွေ့လိုက်ရသည့် အခါတွင်... ဤရှုံးနိမ့်မှုကြီးက သူ၏ မိမိကိုယ်မိမိ ယုံကြည်မှုအပေါ် အလွန်ပင် ပြင်းထန်လှသော ရိုက်ခတ်မှုတစ်ခု ဖြစ်လာတော့မှာ ဖြစ်ကြောင်း လူတိုင်း သိရှိလိုက်ကြပေသည်။

အနာဂတ်တွင် လော့ခွေ့သည် ဆေးရတနာများကို ဆေးဖော်စပ်သည့် အခါတိုင်းတွင် စိတ်ဝိညာဉ်ဆိုင်ရာ နတ်ဆိုး တစ်ကောင်ကို ကြုံတွေ့ရရန် အလွန် ဖြစ်နိုင်ချေ ရှိနေသည်။ သူက အမျိုးမျိုးသော အရာများကို ကြောက်ရွံ့နေမိသွားနိုင်ပြီး ၎င်းက သူ၏ အနာဂတ် ပျက်စီးခြင်းကောင်းကင် အတတ်ပညာရပ်ဆိုင်ရာ အောင်မြင်မှုများကို ထိခိုက်စေမှာ ဖြစ်သည်။

ထိုနေရာတွင် ရှိနေကြသော ကမ္ဘာကျော် ပညာရှင်များနှင့် မယ်တော် လော့၊ မယ်တော် ရွှမ်ဟို့တို့ အားလုံးပင် လော့ခွေ့၏ ဆေးဖို ပေါက်ကွဲသွားမှုကြောင့် ဆွံ့အအံ့အားသင့်နေခဲ့ကြရသည်။ သို့သော်လည်း ထိုနေရာတွင် မည်သည့် ထိခိုက်မှုမျိုးမျှ မရှိဘဲ တည်ငြိမ်နေခဲ့သူ တစ်ဦး ရှိနေခဲ့သည်၊ ၎င်းကတော့... ယီယွင်ပဲ ဖြစ်သည်။

လူတိုင်းက မိမိတို့၏ အတွေးများကို ပြန်လည် စုစည်းလိုက်ကြသည့် အခါတွင် ယီယွင်သည် သူ၏ ကြမ်းတမ်းလှသော စက်ဝန်းကို ထိန်းချုပ်ထားဆဲ ဖြစ်ကာ ဖေးသားရဲ အရိုး ဆေးရတနာကို တည်ငြိမ်စွာဖြင့် ဆက်လက် ဆေးဖော်စပ်နေဆဲ ဖြစ်ကြောင်း မြင်တွေ့လိုက်ကြရတော့သည်။

သူ၏ အပြုအမူများကို တကယ့်ကို အေးအေးလူလူ ရှိလှသည်ဟုသာ ဖော်ပြနိုင်ပေသည်။ သူ မန္တန်များကို ဖော်ဆောင်နေခဲ့သည့် အရှိန်အဟုန်မှာ ဖေးသားရဲ အရိုး ဆေးရတနာတစ်ခုကို ဖော်စပ်နေသည့်ပုံစံနှင့် လုံးဝ တူညီခြင်း မရှိခဲ့ချေ။ ထို့အစား ၎င်းက သူ တောရိုင်းထဲတွင် မှိုတက်ကောက်နေသည့် ပုံစံမျိုးနှင့်ပင် တူညီလှသည်ဟု ဆိုနိုင်ပေသည်။

တစ်ဖက်တွင်မူ တစ်ဦးက မိမိ၏ ဆေးဖိုကို ပေါက်ကွဲအောင် ပြုလုပ်လိုက်မိပြီး ဖြစ်ကာ အခြားတစ်ဖက်တွင်မူ အခြားတစ်ဦးက အလွန်ပင် သက်တောင့်သက်သာ ရှိလှသော အသွင်သဏ္ဌာန် ရှိနေခဲ့သည်။ ဤကဲ့သို့သော ကွာခြားချက်ကြီးက တကယ့်ကို ကြီးမားလွန်းလှပေသည်။

သူက မည်မျှပင် နှေးကွေးနေခဲ့သည်ဖြစ်စေ နောက်ဆုံးတွင် ယီယွင်သည် နောက်ဆုံးသော မန္တန်ကို အပြီးသတ် ဖော်ဆောင်လိုက်နိုင်ခဲ့ပြီ ဖြစ်ကာ နောက်ဆုံးအဆင့် ဆေးရတနာ ဖြစ်တည်ခြင်းကို စတင် လုပ်ဆောင်လိုက်တော့သည်။

ယီယွင်၏ ဆေးရတနာ ဖြစ်တည်ခြင်း အတတ်ပညာရပ်မှာလည်း မည်သည့် ထူးခြားဆန်းပြားမှုမျိုးမျှ ရှိမနေခဲ့ချေ။ ၎င်းက အောက်မြေကမ္ဘာက အကြမ်းတမ်းဆုံးလှသော ဆေးရတနာ ဖြစ်တည်ခြင်း အတတ်ပညာရပ်သာ ဖြစ်ပေသည်။

သူက ၎င်းကို လျင်မြန်စွာ အပြီးသတ်လိုက်သည်ဆိုသော်လည်း ၎င်းက အလွန်ပင် ရိုးရှင်းလှကာ ကြမ်းတမ်းလွန်းလှသည်။

"ဒုန်း။"

မီးခိုးရောင် ဆေးရတနာလေးတစ်ခုမှာ ယီယွင်၏ စက်ဝန်းအတွင်းမှ သူ၏ လက်ထဲသို့ လိမ့်ဆင်းလာခဲ့ရတော့သည်။

အဆင့်မြင့် ဆေးရတနာအချို့မှာ ဆေးဖော်စပ်ပြီးသည့်နောက်တွင် ကြည်လင်တောက်ပလှသော ပုံသဏ္ဌာန် ရှိတတ်ကြသော်လည်း... ယီယွင် ဖော်စပ်လိုက်သော ဆေးရတနာမှာမူ ကြည့်ရဆိုးလှကာ ၎င်းအတွင်း၌ အမှိုက်သရိုက်အချို့ ပါဝင်နေသည့်အလား ဖြစ်နေခဲ့သည်။

ထို့အပြင် ၎င်း၏ အရည်အသွေး သတ်မှတ်ချက်မှာလည်း ၎င်း၏ အပြင်ပန်း ပုံသဏ္ဌာန်ထက် ပိုမို မြင့်မားခြင်း မရှိခဲ့ချေ။ ၎င်းက တကယ့်ကို အပြင်ပန်းရော အတွင်းပိုင်းပါ တူညီလှပေသည်။

အရည်အသွေး အကဲဖြတ်ချက် ညံ့ဖျင်းခြင်း ။

ယီယွင်က ထိုဆေးရတနာကို လက်ထဲတွင် ဆုပ်ကိုင်လိုက်သည့် အခါ၌ ၎င်း၏ မျက်နှာပြင်ထက်တွင် ပြာမှုန်အနည်းငယ် ရှိနေကြောင်း သတိပြုမိလိုက်ရသည်။ သူက မိမိ၏ အင်္ကျီလက်စက္ကို အသုံးပြုပြီး ၎င်းကို အေးအေးလူလူ သုတ်လိုက်ပြီးနောက် အစေခံမလေး၏ လင်ဗန်းထက်သို့ တင်ပေးလိုက်ကာ ၎င်းကို မယ်တော် လော့ထံသို့ ပေးအပ်ရန် အမူအရာ ပြသလိုက်တော့သည်။

"မယ်တော်ကြီးခင်ဗျာ. ကျွန်တော်မျိုးရဲ့ ဆေးရတနာကတော့ အပြီးသတ် ဖော်စပ်ပြီးသွားခဲ့ပါပြီ။

ကျွန်တော်မျိုးက ပျက်စီးခြင်းကောင်းကင် အတတ်ပညာရပ်ကို လေးလ သို့မဟုတ် ငါးလခန့်သာ လေ့လာဖူးတာ ဖြစ်လို့ ဤကဲ့သို့သော ညံ့ဖျင်းခြင်း အဆင့်ရှိ တတိယအဆင့် ဆေးရတနာတစ်ခုကို ဖော်စပ်နိုင်တာကပင် အတော်လေးကို ကောင်းမွန်လှပါပြီ။ ယခုအခါမှာတော့ ကျွန်တော်မျိုးက ၎င်းကို မယ်တော်ကြီးထံသို့ ဆက်သပါရစေခင်ဗျာ။"

အစေခံမလေးက ထိုမီးခိုးရောင် ဆေးရတနာလေးကို မယ်တော် လော့ထံသို့ သွားရောက် ပေးအပ်လိုက်သည်ကို မြင်တွေ့လိုက်ရသည့် အခါတွင် ထိုနေရာတွင် ရှိနေကြသော လူတိုင်းမှာ ဆွံ့အသွားခဲ့ကြရတော့သည်။ သူတို့၏ မျက်ဝန်းများမှာ ထိုဆေးရတနာလေးထံ၌သာ စူးစူးစိုက်စိုက် ရောက်ရှိနေခဲ့ကြပြီး အကြည့်များကို လွှဲဖယ်နိုင်ခြင်း မရှိကြတော့ချေ။

တောက်... ဒါက ဘာတွေ ဖြစ်ကုန်တာလဲ။ ယီယွင်က အနိုင်ရရှိသွားခဲ့တာလို့တော့ ငါ့ကို လာမပြောနဲ့နော်။

လူအများစုမှာ ဤအချက်ကို ချက်ချင်းပင် သဘောပေါက်သွားခဲ့ကြရတော့သည်။ တစ်ဖက်တွင်မူ တစ်ဦးက မိမိ၏ ဆေးဖိုကို ပေါက်ကွဲအောင် ပြုလုပ်လိုက်မိခြင်း ဖြစ်ကာ အခြားတစ်ဖက်တွင်မူ အခြားတစ်ဦးက ညံ့ဖျင်းခြင်း အဆင့်ရှိ ဆေးရတနာတစ်ခုကို ဖော်စပ်နိုင်ခဲ့ခြင်း ဖြစ်သည်ဆိုသော်လည်း အနည်းဆုံးတော့ သူက ၎င်းကို အပြီးသတ်နိုင်ခဲ့သည် မဟုတ်ပါလား။

ဤအခိုက်အတန့်တွင် မင်းသား ချီရှန်းသည် မိမိ၏ နှလုံးသားတစ်ခုလုံးကို ရွှံ့နွံများ ပေကျံနေခဲ့သော ခွာများ ရှိကြသည့် သန်းနှင့်ချီသော ရှေးဟောင်း ဖေးသားရဲကြီးများ၏ နင်းခြေခြင်းကို ခံလိုက်ရသည့်အလား ခံစားလိုက်ရတော့သည်။

သူက မိမိကိုယ်မိမိ အလွန်ပင် မိုက်မဲလှသော လူအသုံးမကျတစ်ဦးအလား ခံစားလိုက်ရသည်။ သူက ထိုလူအသုံးမကျဖြစ်သော လော့ခွေ့နှင့်အတူတူ အလွန်ပင် ဟာသဆန်လှသော ပြဇာတ်တိုလေးတစ်ခုအတွင်း၌ ဒုတိယမြောက် ဇာတ်ဆောင်အဖြစ် ပါဝင် သရုပ်ဆောင်ခဲ့မိခြင်း ဖြစ်ပေသည်။

မျှော်လင့်မထားဘဲနှင့် သူက နောက်ထပ် ရက်အနည်းငယ်အတွင်းမှာတင် တော်ဝင်မြို့တော်တစ်ခုလုံး၏ လှောင်ပြောင်စရာ အကြောင်းအရာတစ်ခု ဖြစ်လာတော့မှာ ဖြစ်သည်။

ယီယွင်နှင့် ပတ်သက်၍မူ ဉာဏ်ရည်ဉာဏ်သွေး မပြည့်ဝလှသလို မြင်တွေ့ရသော ဤကောင်က နောက်ဆုံးသော အောင်နိုင်သူ ဖြစ်လာခဲ့ပြီ ဖြစ်သည်။

"ပျက်စီးခြင်းကောင်းကင် အတတ်ပညာရပ်ကို လေးလ သို့မဟုတ် ငါးလခန့်သာ လေ့လာဖူးတာ ဖြစ်လို့" တဲ့လား။

"ဤကဲ့သို့သော ညံ့ဖျင်းခြင်း အဆင့်ရှိ တတိယအဆင့် ဆေးရတနာတစ်ခုကို ဖော်စပ်နိုင်တာကပင် အတော်လေးကို ကောင်းမွန်လှပါပြီ" တဲ့လား...

ယီယွင်၏ စကားစုများကို ပြန်လည် စဉ်းစားကြည့်လိုက်သည့် အခါတွင် မင်းသား ချီရှန်းသည် သူ၏ ခေါင်းကို နံရံနှင့်သာ ဆောင့်ပစ်ချင်စိတ် ပေါ်ထွက်လာခဲ့ရတော့သည်။ ဦးနှောက်ထဲတွင် ဝက်အူတစ်ခု လျော့နေသည့်အလား မြင်တွေ့ရသော ဤကောင်က တကယ်ပဲ အနိုင်ရရှိသွားခဲ့တာ ဟုတ်လား။

ဒါမှမဟုတ် ဤကောင်က ဝက်လိုမျိုး ဟန်ဆောင်ပြီး ကျားကို ဖမ်းလိုက်တာလား။ သို့သော်လည်း မင်းသား ချီရှန်းသည် အနည်းဆုံးတော့ နှစ်ပေါင်း ထောင်ချီသော ကျင့်ကြံခြင်း သက်တမ်း ရှိနေခဲ့သူ ဖြစ်ပေသည်။

သူက ပြိုင်ပွဲကို အစမှ အဆုံးအထိ အသေအချာ အာရုံစိုက် စောင့်ကြည့်နေခဲ့ခြင်း ဖြစ်သည်။ သူသည် ယီယွင်က နောက်ကွယ်ကနေ တိတ်တဆိတ် တစ်ခုခု လုပ်ဆောင်ခဲ့လိမ့်မည်ဟု လုံးဝ မခံစားမိခဲ့ချေ သူက ဘယ်လိုလုပ်ပြီး ဤမျှလောက်အထိ အစွမ်းထက်လှတဲ့ အရည်အချင်းမျိုး ရှိနေနိုင်ပါ့မလဲ။

ပုလဲလုံးလေးများ လိမ့်ဆင်းလာခဲ့သည့်အလား သာယာလှသော ရယ်မောသံတစ်ခု ရုတ်တရက် ပေါ်ထွက်လာခဲ့သည်။ လော့ဟော်အာက အားရပါးရ အော်ဟစ်ရယ်မောလိုက်ခြင်း ဖြစ်ပေသည်။

သူမက ကလေးတစ်ယောက်ကဲ့သို့သော စိတ်နေသဘောထား ရှိသူ ဖြစ်ပြီး မူလကတည်းက မည်သည့် ကိစ္စရပ်ကိုမျှ အလေးအနက် ထားတတ်သူ မဟုတ်ချေ။ သူမသည် ဤတည်ခင်းဧည့်ခံပွဲကြီးအတွက် ခန့်ညားထည်ဝါလှသော ပုံသဏ္ဌာန်ကို အတင်းအဓမ္မ ဖော်ဆောင်ထားခဲ့ခြင်း ဖြစ်ပေသည်။

ဤမျှလောက်အထိ စိတ်ဝင်စားစရာ ကောင်းလှသော ကိစ္စရပ်မျိုးနှင့် စစ်မှန်စွာ ဆုံတွေ့လိုက်ရသည့် အခါတွင် သူမက ဘယ်လိုလုပ်ပြီး ဆက်လက် သည်းခံနိုင်ပါ့မလဲ။

လူအများစုက သူမကို လှမ်းကြည့်လိုက်ကြသည်ကို မြင်တွေ့လိုက်ရသည့် အခါတွင် (အထူးသဖြင့် မင်းသား ချီရှန်းက သူ၏ မိခင် သေဆုံးသွားခဲ့သည့်အလား မျက်နှာပျက်နေသည်ကို မြင်တွေ့လိုက်ရသည့် အခါတွင်) လော့ဟော်အာသည် ချက်ချင်းပင် ချောင်းဆိုးဟန် ပြုလုပ်လိုက်ရင်း လက်သုတ်ပုဝါဖြင့် သူမ၏ နှုတ်ခမ်းကို သုတ်လိုက်တော့သည်။

သူမက တည်ငြိမ်လှသော မျက်နှာထားကို ထပ်မံ၍ အတင်းအဓမ္မ ဖော်ဆောင်လိုက်ပြန်သည်။

သို့သော်လည်း သူမက ဤသို့ လုပ်ဆောင်လေလေ... မင်းသား ချီရှန်းအနေဖြင့် ပိုမို၍ စိတ်ပျက်အားလျော့မှုကို ခံစားရလေလေ ဖြစ်ပေသည်။

လော့ဟော်အာက မိမိ၏ ရယ်မောသံကို ထိန်းသိမ်းထားရင်း အလေးအနက် ရှိဟန် ဆောင်နေခြင်းမှာ သူ့အတွက် အကြီးမားဆုံးသော စော်ကားမှုတစ်ခု ဖြစ်ပေသည်။ အဘယ်ကြောင့်ဆိုသော် လော့ဟော်အာက သူ့ကို လှောင်ပြောင်သရော်နေခဲ့ခြင်း ဖြစ်သည်ဟု သူ ခံစားလိုက်ရသောကြောင့် ဖြစ်သည်။

"မင်းသား ချီရှန်းခင်ဗျာ... ကျွန်တော်... ကျွန်တော် ဒါကို လက်မခံနိုင်ပါဘူး"

ဤအခိုက်အတန့်တွင် စိတ်ဓာတ်ကျနေခဲ့သော လော့ခွေ့က ရုတ်တရက် ထရပ်လိုက်သည်။ သူက ဒါကို ဘယ်လိုလုပ်ပြီး လက်ခံနိုင်ပါ့မလဲ။ သူ၏ အတွေးအမြင်အရ ဆိုလျှင်မူ သူ မန္တန်များကို ပေါင်းစပ်နေသည့် အချိန်တွင် မျှော်လင့်မထားသော ပြဿနာတစ်ခု ရုတ်တရက် ပေါ်ထွက်လာခဲ့ခြင်းကြောင့်သာ ဖြစ်ပေသည်။

၎င်းက သူ၏ ဆေးဖိုကို ပေါက်ကွဲသွားစေခဲ့ပြီး ယီယွင်ကို အလကားနေရင်း အနိုင်ရရှိသွားစေခဲ့ခြင်း ဖြစ်သည်။ "နောက်ထပ် တစ်ကြိမ်လောက်ပဲ။ နောက်ထပ် တစ်ကြိမ်လောက်ပဲ ထပ်လုပ်ခွင့်ပေးပါ၊ ကျွန်တော် အဆင့်မြင့်မားလှတဲ့ ဆေးရတနာတစ်ခုကို အသေအချာ ဖော်စပ်ပြသနိုင်ပါတယ်"

လော့ခွေ့က ဤသို့ ပြောဆိုလိုက်ပြီးနောက် မင်းသား ချီရှန်း၏ မျက်နှာထားမှာ ပိုမို၍ ရုပ်ဆိုးသွားခဲ့ရတော့သည်။ လော့ဟော်အာက ရယ်မောလိုက်ရင်း ပြောလိုက်သည်။

"လော့ခွေ့... မင်းကိုယ်တိုင်ပဲ ပြောခဲ့တာလေ။ မင်းက တတိယအဆင့် ဆေးရတနာတစ်ခုကိုတောင် အောင်မြင်အောင် မဖော်စပ်နိုင်ခဲ့ဘဲနဲ့... ဘာဖြစ်လို့ ဆက်လက် ယှဉ်ပြိုင်ဖို့အတွက် အရည်အချင်း ရှိနေဦးမှာလဲ။ ဒီတစ်ကြိမ်မှာတော့ မင်းက မျက်နှာကျက်ကို အပေါက်ဖြစ်အောင် လုပ်လိုက်ပြီ ဖြစ်တယ်၊ အကယ်၍ မင်းကို နောက်ထပ် အခွင့်အရေးတစ်ခု ထပ်ပေးမယ်ဆိုရင်... မင်းက ဤနေရာတစ်ခုလုံးကို ဖျက်ဆီးပစ်ဦးမှာလား။"

လော့ဟော်အာသည် သူမ၏ လက်သုတ်ပုဝါလေးကို ကစားနေခဲ့ရင်း သူ၏ ခံစားချက်များကို အနည်းငယ်မျှ ငဲ့ညာခြင်း မရှိဘဲ ပြောဆိုလိုက်ခြင်း ဖြစ်သည်။ ကြည်လဲ့သော လော့ နန်းတော် သည် ဆေးရတနာများကို ဆေးဖော်စပ်ရန်အတွက် ရည်ရွယ်ချက်ရှိရှိ တည်ဆောက်ထားသော နေရာတစ်ခု မဟုတ်ချေ။

၎င်းက ဘယ်လိုမှ ဖျက်ဆီး၍ မရနိုင်လောက်အောင် ခိုင်ခံ့လှသည်မျိုး မဟုတ်ချေ။ ဆေးဖို ပေါက်ကွဲသွားခဲ့သည့် အခိုက်အတန့်တွင် ၎င်းက မျက်နှာကျက်ထက်က ကျောက်ပြားတစ်ချောင်းကို အပိုင်းပိုင်းအစစ ဖြစ်သွားအောင် ရိုက်ခွဲပစ်ခဲ့သည် မဟုတ်ပါလား။