အခန်း ၄၅
Vol. 5 Ch. 45
အခန်း (၄၅) နင်ယို့ချီ၏ ဖိတ်ခေါ်မှု
ဤနေရာတွင် ဖြစ်ပျက်ခဲ့သမျှ အရာအားလုံးကို ဖန်တီးခဲ့သူ ရှုချွမ်းမှာမူ ဘာမှမသိဘဲ ဖြစ်နေခဲ့သည်။
သူက သူ၏ ခန္ဓာကိုယ်ပေါ်မှ သွေးကွက်များကို ဆေးကြောသန့်စင်ပြီးနောက် သန့်ရှင်းသော အဝတ်အစားများ လဲလှယ်ဝတ်ဆင်လိုက်ရုံသာ ရှိသေးသည်။
ကျွိ...
တံခါးပွင့်လာခဲ့ပြီး နင်ယို့ချီက သူမ၏ မြားနှင့် လေးကို ကိုင်ဆောင်ကာ ပြန်လည်ရောက်ရှိလာခဲ့သည်။
သူမက ရှုချွမ်း ကုတင်ပေါ်တွင် ထိုင်နေသည်ကို မြင်လိုက်ရသည့်အခါ လန့်ဖျပ်သွားခဲ့ရသည်။
သူမသည် အစောပိုင်းက ရှုချွမ်း၏ ဒဏ်ရာ မည်မျှ ပြင်းထန်သည်ကို အလွန် ရှင်းရှင်းလင်းလင်း သိထားသည်။
မူလယန်ဆေးလုံး၏ အကူအညီ ရှိသည့်တိုင်အောင် သူက သုံးရက်မှ ငါးရက်အထိ ကုတင်ပေါ်မှ ဆင်းနိုင်မည် မဟုတ်ပေ။
သို့သော် သူမ အပြင်သို့ တစ်မနက်ခင်းသာ ထွက်သွားခဲ့ရုံရှိသေးသည်၊ ရှုချွမ်းက လှုပ်ရှားနိုင်ရုံတင်မကဘဲ သူ၏ ဒဏ်ရာများအားလုံး လုံးဝဥဿုံ ပျောက်ကင်းသွားသည့် ပုံစံမျိုး ဖြစ်နေခဲ့သည်။
ဒါက သူမ၏ တွက်ချက်မှုထက် လုံးဝ ကျော်လွန်နေခဲ့သည်။
သို့သော်လည်း သူမက စိတ်ကို လျင်မြန်စွာ ပြန်လည်ထိန်းချုပ်လိုက်ပြီး ပြောလိုက်သည်။ “ရှင့်ရဲ့ လျှို့ဝှက်ချက်တွေက တော်တော်လေး ကြီးမားပုံရတယ်၊ ဒဏ်ရာတွေက ဒီလောက် မြန်မြန်ဆန်ဆန် ပျောက်ကင်းသွားတာကြည့်ရင်ပေါ့"
"တောင်တန်းအပြင်ဘက်က လူတွေက ရှင့်နောက်ကို လိုက်နေကြတာ မဟုတ်လား ကျွန်မ အခုလေးတင် အတွင်းပိုင်းနယ်မြေရဲ့ အစွန်းနားအထိ သွားကြည့်ခဲ့တာ၊ သူတို့အားလုံး ဆုတ်ခွာသွားကြပြီ”
“ကျင့်ကြံမှုအဆင့် အမြင့်ဆုံးဖြစ်တဲ့ 'ကောင်းကင်တက်လှမ်းခြင်း နယ်ပယ်' သိုင်းပညာရှင်တွေ တိုက်ခိုက်နေတဲ့ နေရာ ထဲကို မတော်တဆ ဝင်မိပြီးတော့ အသက်ရှင်လျက် လွတ်မြောက်လာနိုင်တာ ရှင် တကယ် ကံကောင်းတာပဲ”
ထိုစကားကို ကြားသောအခါ ရှုချွမ်းလည်း မှင်တက်သွားခဲ့သည်။
သို့သော်လည်း နင်ယို့ချီသည် အစောပိုင်းက ထွက်ပေါ်ခဲ့သော ဓားချက်၏ နောက်ဆက်တွဲ ပျက်စီးမှုများကို မြင်တွေ့ခဲ့ပြီး ရှုချွမ်း လိုက်လံဖမ်းဆီးခံနေရစဉ် သိုင်းပညာရှင်ကြီးများ တိုက်ခိုက်နေသည့် နေရာ ထဲသို့ မတော်တဆ ရောက်ရှိသွားကာ ဒဏ်ရာရခဲ့ခြင်း ဖြစ်သည်ဟု ထင်မှတ်နေကြောင်း သူ ချက်ချင်း နားလည်လိုက်သည်။
သူနောက်သို့ လိုက်လံဖမ်းဆီးနေသော ကျင့်ကြံသူများ ဆုတ်ခွာသွားရခြင်းမှာလည်း သိသာထင်ရှားလှသည်၊ ထိုကြောက်မက်ဖွယ်ကောင်းသော မြင်ကွင်းကြောင့် ထိတ်လန့်တုန်လှုပ်သွားကြခြင်း ဖြစ်သည်။
တကယ်တော့ ဒါက ပုံမှန်ပါပဲ။ ဘာပဲဖြစ်ဖြစ် ထိုဓားချက်က ကောင်းကင်တက်လှမ်းခြင်း နယ်ပယ် အထွတ်အထိပ်ရှိသော သိုင်းပညာရှင်တစ်ဦး၏ ဓားချက်ဖြစ်ရာ 'ကမ္မနယ်ပယ်' သိုင်းပညာရှင်တစ်ဦးကိုပင် ချက်ချင်း သတ်ဖြတ်နိုင်စွမ်း ရှိသည်၊ နတ်ဘုရားစွမ်းအားနယ်ပယ် ကျင့်ကြံသူ အနည်းငယ်ကိုမူ ပြောနေစရာပင် မလိုတော့ပေ။
ထို့ကြောင့် သူတို့က ရှေ့သို့ ဆက်လက် လိုက်လံဖမ်းဆီးရန် မဝံ့ရဲကြတော့ခြင်း ဖြစ်သည်။
“သတင်းပေးတဲ့အတွက် ကျေးဇူးတင်ပါတယ် မိန်းကလေးနင်”
ရှုချွမ်းက သူမကို ကျေးဇူးတင်စကား ဆိုလိုက်သည်။
နင်ယို့ချီက ခေါင်းညိတ်ပြကာ ရှုချွမ်း၏ ကျေးဇူးတင်မှုကို လက်ခံလိုက်သည်။
ထို့နောက် သူမက ရှုချွမ်းကို နောက်ထပ် မည်သို့ ကိုင်တွယ်ရမည်နည်းဆိုသည်ကို စတင် စဉ်းစားတော့သည်။
ရှုချွမ်းက သူမ ရှိနေသည့်နေရာကို မတော်တဆ ရောက်ရှိလာခြင်းဖြစ်ရာ သူမအနေဖြင့် ရှုချွမ်းကို သဘာဝကျကျပင် ပြန်မလွှတ်ချင်ပေ။
အဘယ်ကြောင့်ဆိုသော် သူမ၏ ခမည်းတော်ဖြစ်သူကို ခြိမ်းခြောက်ရန်အတွက် သူမကို ဖမ်းဆီးချင်နေသည့်လူ မည်မျှပင် များပြားနေသည်ကို သူမ မသိရှိသောကြောင့် ဖြစ်သည်။
အကယ်၍ ရှုချွမ်း ထွက်ခွာသွားပါက သူမ၏ တည်နေရာကို ပေါက်ကြားသွားစေရန် အလွန် အလားအလာ ရှိသည်။
သို့သော် သူ့ကို ဤနေရာတွင် တစ်ယောက်တည်း ပိတ်လှောင်ထားရန်ကျတော့လည်း နင်ယို့ချီအနေဖြင့် ဤကဲ့သို့ ရက်စက်သော အလုပ်မျိုးကို မလုပ်ရက်ပေ။
အမှောင်ဝိညာဉ်တောင်တန်း၏ အတွင်းပိုင်းနယ်မြေမှာ အန္တရာယ်များဖြင့် ပြည့်နှက်နေသည်ဖြစ်ရာ သေမျိုးအဆင့်ကျော်လွန်ခြင်းနယ်ပယ် အဆင့် ၂ သာရှိသော ရှုချွမ်းကဲ့သို့ ကျင့်ကြံသူတစ်ဦးအတွက် ဤနေရာတွင် သေခြင်း စာမျက်နှာ ဖွင့်ရပေလိမ့်မည်။
အကယ်၍ သူမက ရှုချွမ်းကို တကယ် သေစေချင်ခဲ့ပါက အစောပိုင်းက တန်ဖိုးကြီးလှသော မူလယန်ဆေးလုံးကို အသုံးပြုပြီး သူ့ကို ဒဏ်ရာကုသပေးခဲ့မည် မဟုတ်ပေ။
သူမ၏ ယခုခရီး ရည်ရွယ်ချက်မှာ အန္တရာယ်များဖြင့် ပြည့်နှက်နေသော 'ထိုက်ယင်ဂိုဏ်းအပျက်အစီး' သို့ သွားရန် ဖြစ်သည်။ သူမ၏ သေမျိုးအဆင့်ကျော်လွန်ခြင်းနယ်ပယ် အဆင့် ၉ အထွတ်အထိပ် ကျင့်ကြံမှုဖြင့်ပင် သူ့ကိုယ်သူ မနည်းကာကွယ်နေရသည်ဖြစ်ရာ ဝန်ထုပ်ဝန်ပိုးဖြစ်မည့် ရှုချွမ်းကိုပါ ခေါ်ဆောင်သွားရန်မှာ ပို၍ပင် မသင့်တော်ပေ။
သူမက အနည်းငယ် ဘေးကျပ်နံကျပ် ဖြစ်နေခဲ့သည်။
တစ်ချိန်တည်းမှာပင် ရှုချွမ်းက ကုတင်ပေါ်တွင် တင်ပျဉ် ခွေထိုင်ကာ မျက်လုံးများကို မှိတ်လျက် ကျင့်ကြံနေခဲ့သည်။
စောစောက ပြင်းထန်သော တိုက်ပွဲကြီးအချို့ကို ကြုံတွေ့ခဲ့ရပြီးနောက် သူ၏ ကျင့်ကြံမှုက အထွတ်အထိပ်သို့ ပြန်လည်ရောက်ရှိလာပြီး အဆင့်တက်လှမ်းတော့မည့် အရိပ်အယောင်များ ပြသလာခဲ့သည်။
ရှုချွမ်းက အလွန်အမင်း ဝမ်းမြောက်သွားခဲ့သည်။ သူက သူ့ဘေးရှိ နင်ယို့ချီကိုပင် ဂရုမစိုက်နိုင်တော့ဘဲ ကျင့်ကြံခြင်း ပုံစံကို လျင်မြန်စွာ ယူလိုက်ပြီး 'မဟာယန်ကျင့်စဉ်' ကို လည်ပတ်စေကာ ကောင်းကင်နှင့် မြေကြီး အတွင်းရှိ မူလချီများကို စုပ်ယူတော့သည်။
ဘုန်း
မွန်းလွဲပိုင်းအထိ ရှုချွမ်း၏ တစ်ကိုယ်လုံးမှ ပြင်းထန်သော မြည်ဟည်းသံတစ်ခု ထွက်ပေါ်လာခဲ့သည်။ 'မဟာယန်ကျင့်စဉ်' က အရူးအမူး လည်ပတ်သွားခဲ့ပြီး 'မဟာယန်မူလချီ' များက သူ၏ ခန္ဓာကိုယ်ပတ်ပတ်လည်တွင် ဝန်းရံလျက် တောက်ပသော အလင်းတန်းများကို ထုတ်လွှတ်နေခဲ့သည်။
ပတ်ဝန်းကျင်ရှိ မူလချီများက သူ၏ ခန္ဓာကိုယ်ထဲသို့ အရူးအမူး တိုးဝင်သွားခဲ့ကြသည်။
“ဟူး~”
ရှုချွမ်းက အသက်ကို ပြင်းပြင်းရှူလိုက်ပြီး ကျင့်ကြံခြင်းကို ရပ်တန့်လိုက်သည်။
ဤသို့ဖြင့် သူက သူ၏ ကျင့်ကြံမှုအဆင့်ကို တိုက်ရိုက် ကျော်လွန်သွားခဲ့ပြီး 'သေမျိုးအဆင့်ကျော်လွန်ခြင်းနယ်ပယ် အဆင့် ၃' သို့ ရောက်ရှိသွားခဲ့ပြီ ဖြစ်သည်။
ဒါက တကယ့်ကို မျှော်လင့်မထားတဲ့ ဝမ်းသာစရာ ဖြစ်ရပ်တစ်ခုပါပဲ။
၎င်းက “ကြီးမားတဲ့ ဒုက္ခကနေ လွတ်မြောက်ပြီးရင် ကံကောင်းခြင်းတွေ သေချာပေါက် လိုက်လာလိမ့်မယ်” ဆိုသည့် စကားနှင့် အလွန်ပင် တူညီနေခဲ့သည်။
“ရှင်က ဒီလောက်ပြင်းထန်တဲ့ ဒဏ်ရာတွေကနေ မြန်မြန်ဆန်ဆန် ပြန်ကောင်းလာရုံတင်မကဘဲ ကျင့်ကြံမှုအဆင့်ကိုပါ တက်အောင် လုပ်နိုင်တယ်၊ ဒါက တကယ့်ကို မယုံနိုင်စရာပဲ”
“ရှင်က ဘယ်လို မွန်းစတား မျိုးလဲ”
ရှုချွမ်း အဆင့်တက်လှမ်းသွားသည်ကို ခံစားမိလိုက်ရသဖြင့် နင်ယို့ချီသည်လည်း အံ့ဩတအံ့ဖြင့် မတ်တတ်ရပ်လိုက်မိပြီး သူမ၏ မျက်စိရှေ့မှောက်ရှိ အရာအားလုံးကို လုံးဝ မယုံကြည်နိုင်ဘဲ ဖြစ်နေခဲ့ရသည်။
သာမန်လူတစ်ယောက်သာ ရှုချွမ်းကဲ့သို့ ပြင်းထန်သော ဒဏ်ရာမျိုး ရရှိခဲ့လျှင် အဆင့်တက်လှမ်းရန် နေနေသာသာ၊ အသက်ရှင်ကျန်ရစ်ရန်ပင် ကောင်းကင်ဘုံ၏ စောင့်ရှောက်မှုကို ဆုတောင်းရမည် ဖြစ်သည်။
သို့သော် ရှုချွမ်းမှာမူ ဒဏ်ရာများ တိုက်ရိုက် ပျောက်ကင်းသွားရုံတင်မကဘဲ ဤအခွင့်အရေးကို အသုံးချကာ သူ၏ ကျင့်ကြံမှုကိုပါ အဆင့်မြှင့်တင်နိုင်ခဲ့သည်။
သူမက ရှုချွမ်းကဲ့သို့ လူမျိုးကို တစ်ခါမျှ မမြင်ဖူးခဲ့ပေ။
သူမက ကုတင်ပေါ်ရှိ ရှုချွမ်းကို ကြည့်ရင်း တစ်စုံတစ်ခုကို တွေးမိသွားပုံရကာ မျက်လုံးများထဲတွင် အလင်းတစ်ခု ဖျတ်ခနဲ လက်သွားပြီးနောက် လှမ်း၍ ပြောလိုက်သည်။
“ကျွန်မ ရှင့်ရဲ့ အသက်ကို ကယ်ခဲ့တာ၊ ရှင် ကျွန်မကို ဘယ်လို ပြန်ပေးဆပ်မှာလဲ အတိအလင်း ပြောရရင် အဲ့ဒီ မူလယန်ဆေးလုံးက တော်တော်လေး တန်ဖိုးကြီးတာနော်”
သူ၏ အင်အားများ အထွတ်အထိပ်သို့ ပြန်ရောက်လာပြီးနောက် ကျင့်ကြံမှုအဆင့်ပါ တိုးတက်သွားသဖြင့် ရှုချွမ်းက စိတ်အားထက်သန်နေပြီး အနည်းငယ် ပြုံးကာ ပြောလိုက်သည်။ “မိန်းကလေးနင်... မိန်းကလေးရဲ့ လိုအပ်ချက်ကိုသာ ပြော ပါ၊ ကျွန်တော် ရှုချွမ်း အစွမ်းကုန် ဖြည့်ဆည်းပေးပါ့မယ်"
" ကျွန်တော်တို့ 'ထိုက်ယိမြင့်မြတ် နယ်မြေ' ရဲ့ တိုက်ရိုက် တပည့်တွေက ကူညီစောင့်ရှောက်မှုနဲ့ ရန်ငြိုးရန်စတွေကို အမြဲတမ်း ပြတ်ပြတ်သားသား ခွဲခြားတတ်ကြပါတယ်”
ရှုချွမ်းက ထိုက်ယိမြင့်မြတ်နယ်မြေ၏ တိုက်ရိုက်တပည့်တစ်ဦး ဖြစ်ကြောင်း ကြားလိုက်ရသဖြင့် နင်ယို့ချီ အနည်းငယ် အံ့အားသင့်သွားခဲ့သည်။ ရှုချွမ်း၏ အဆင့်အတန်းမှာ မရိုးရှင်းနိုင်ကြောင်း သူမ ခန့်မှန်းထားခဲ့သော်လည်း သူက မြင့်မြတ်နယ်မြေ၏ တိုက်ရိုက်တပည့်တစ်ဦး ဖြစ်နေလိမ့်မည်ဟု သူမ မျှော်လင့်မထားခဲ့ပေ။ ထိုအချက်က သူမ၏ စိတ်ထဲရှိ အတွေးကို ပိုမို ခိုင်မာသွားစေခဲ့သည်။
“ရှင်က မြင့်မြတ်နယ်မြေရဲ့ တိုက်ရိုက်တပည့်တစ်ယောက် ဖြစ်နေတာ ကျွန်မ မသိခဲ့ဘူး၊ ဒါဆိုရင်တော့ အတော်ပဲ။ ကျွန်မ လုပ်စရာ အလုပ်တစ်ခု ရှိတယ်၊ ရှင် ကျွန်မနဲ့အတူ လိုက်ခဲ့ပေးရုံနဲ့ အဲ့ဒီအလုပ်ပြီးသွားရင် ကျွန်မတို့ အကြွေးကျေပြီလို့ သတ်မှတ်လို့ရတယ်”
နင်ယို့ချီ၏ အကြည့်မှာ စူးရှနေပြီး စကားကို ဝေ့လည်ကြောင်ပတ် မလုပ်ဘဲ တိုက်ရိုက်ပင် ပြောလိုက်သည်။
“မိန်းကလေးနင် ပြောတဲ့ အလုပ်က ဘာများလဲ ”
ရှုချွမ်းက နင်ယို့ချီ ဘာလုပ်ချင်သည်ကို စနစ်မှတစ်ဆင့် စောန ကတည်းက သိရှိထားပြီးဖြစ်သော်လည်း မသိကျိုးကျွံပြုကာ အံ့ဩသွားသည့် ပုံစံဖြင့် မေးမြန်းလိုက်သည်။
နင်ယို့ချီက ခေါင်းကို အနည်းငယ် ညိတ်လိုက်ပြီး “ကျွန်မ 'ထိုက်ယင်ဂိုဏ်းအပျက်အစီး' ကို ရှာဖို့အတွက် အမှောင်ဝိညာဉ်တောင်တန်းရဲ့ အလယ်ဗဟိုနယ်မြေဆီကို သွားဖို့ လိုတယ်။ အဲ့ဒီထဲမှာ ကျွန်မလိုအပ်တဲ့ အရာတစ်ခု ရှိနေတယ်၊ ဒါပေမဲ့ ထိုက်ယင်ဂိုဏ်းအပျက်အစီးက နတ်ဘုရားစွမ်းအားနယ်ပယ်အောက် ကျင့်ကြံသူတွေကိုပဲ ဝင်ခွင့်ပြုတာ”
“ပြီးတော့ လမ်းတစ်လျှောက်မှာ အန္တရာယ်တွေ အများကြီး ရှိတယ်။ ကျွန်မတစ်ယောက်တည်း သွားဖို့အတွက် သိပ်ပြီး ယုံကြည်ချက် မရှိဘူး။ ရှင်က နတ်ဘုရားစွမ်းအားနယ်ပယ် သိုင်းပညာရှင် အမြောက်အမြားရဲ့ လက်ထဲကနေ လွတ်မြောက်လာနိုင်တာကို ကြည့်ရင် ရှင်က သေမျိုးအဆင့်ကျော်လွန်ခြင်းနယ်ပယ် ကျင့်ကြံသူတွေထဲမှာ ထူးချွန်ထက်မြက်တဲ့လူဆိုတာ ထင်ရှားပါတယ်။ ပြီးတော့ အခု ရှင်က မြင့်မြတ်နယ်မြေရဲ့ တိုက်ရိုက်တပည့်တစ်ယောက်လို့ ပြောတာကို ကြားလိုက်ရတော့ ရှင့်ကို ဖိတ်ခေါ်ချင်တဲ့ ကျွန်မရဲ့ အတွေးက ပိုပြီး ခိုင်မာသွားတာပေါ့”
ဤနေရာသို့ ရောက်သောအခါ နင်ယို့ချီက ခဏမျှ ရပ်နားလိုက်ပြီးနောက် ထပ်လောင်း ပြောကြားခဲ့သည်။ “ဒါပေမဲ့ အတိအလင်း ပြောရရင် ကျွန်မက အဲ့ဒီထဲက ပစ္စည်းတစ်ခုတည်းကိုပဲ ယူမှာပါ၊ ကျန်တဲ့ ရရှိလာသမျှ အရာအားလုံးက ရှင့်ရဲ့ အပိုင် ဖြစ်လာလိမ့်မယ်”
သူမ စကားပြောပြီးနောက်...
သူမက ကြည်လင်သော မျက်ဝန်းများဖြင့် ရှုချွမ်းကို စိုက်ကြည့်ကာ “သခင်လေးရှု... "
"ရှင် ဘယ်လို ထင်လဲ”
“ကောင်းပါပြီ၊ ဒါဆိုရင်တော့ ကျွန်တော် မိန်းကလေးနင်နဲ့အတူ ဒီခရီးကို လိုက်ပါခဲ့ပါ့မယ်”
ရှုချွမ်းက ခဏမျှ စဉ်းစားဟန် ပြုလိုက်ပြီးနောက် ထိုနေရာတွင်ပင် ချက်ချင်း ခေါင်းညိတ် သဘောတူလိုက်သည်။
စနစ်၏ ပြသချက်အရ နင်ယို့ချီသည် နောက်ဆုံးတွင် 'ထိုက်ယင်မူလစွမ်းအား' ကို အောင်မြင်စွာ ရရှိခဲ့သည်။ သိသာထင်ရှားသည်မှာ သူမတစ်ယောက်တည်း သွားလျှင်ပင် ဤခရီးစဉ်တွင် ကြီးမားသော အန္တရာယ်မျိုး ရှိလာမည် မဟုတ်ပေ။
ယခု သူမက သူ့ကို ဖိတ်ကြားခြင်းမှာ အန္တရာယ်များကို အနည်းဆုံးအထိ လျှော့ချရန်အတွက်သာ ဖြစ်သည်။
ရှုချွမ်း လိုက်ပါရန် သဘောတူလိုက်ခြင်းမှာ ပထမအချက်အနေဖြင့် နင်ယို့ချီ၏ အသက်ကယ်ကျေးဇူးကို ပြန်လည်ပေးဆပ်ရန် ဖြစ်သည်၊ သူက ကျေးဇူးကန်းတတ်သော လူစားမျိုး မဟုတ်ပေ။
ဒုတိယအချက်အနေဖြင့် သူမနှင့် ကောင်းမွန်သော ဆက်ဆံရေးတစ်ခု တည်ဆောက်ရန် ဖြစ်သည်၊ ကံကြမ္မာ သမီးတော်တစ်ဦးနှင့် ပူးပေါင်းဆောင်ရွက်ခြင်းက သူ၏ ကိုယ်ပိုင်ကံတရားကိုလည်း မြင့်တက်စေနိုင်သောကြောင့် ဖြစ်သည်။
ထို့ပြင် နင်ယို့ချီက ထိုက်ယင်ဂိုဏ်းအပျက်အစီး၌ ထိုက်ယင်မူလစွမ်းအားကို ရှာဖွေတွေ့ရှိနိုင်သည်ဆိုပါက သူမ၏ ကံတရားနှင့်အတူ အခြားသော အခွင့်အလမ်းများကိုလည်း ထပ်မံ ရှာဖွေတွေ့ရှိနိုင်ပေသည်။
ယခုအချိန်တွင် သူ အလိုအပ်ဆုံးအရာမှာ သူ့ ခွန်အားကို မြှင့်တင်ပေးနိုင်မည့် အခွင့်အလမ်းများသာ ဖြစ်သည်။ သူ ပိုမို သန်မာလာမှသာ အစောပိုင်းက ကြုံတွေ့ခဲ့ရသော အသက်အန္တရာယ် အကျပ်အတည်းမျိုးမှ ကင်းဝေးနိုင်မည် ဖြစ်သည်။
“တကယ် ကောင်းတာပဲ”
နင်ယို့ချီ၏ မျက်နှာတွင် ချက်ချင်းပင် အပြုံးတစ်ခု ပေါ်ထွက်လာခဲ့သည်။ “သခင်လေးရှုရဲ့ အကူအညီနဲ့ဆိုရင် ဒီတစ်ခေါက် ထိုက်ယင်ဂိုဏ်းအပျက်အစီး ခရီးက သေချာပေါက် အဆင်ပြေချောမွေ့မှာပါ”
“မိန်းကလေးနင်ကလည်း ချီးမွမ်းလွန်းနေပါပြီ။ ကျွန်တော် ရှုချွမ်း အစွမ်းကုန် ကြိုးစားပေးပါ့မယ်”
ရှုချွမ်းက ပြုံးလျက် ပြောလိုက်သည်။
ထို့နောက်...
သူတို့နှစ်ဦး ခရီး၏ အသေးစိတ်အချက်အလက်များ၊ သတိထားရမည့် အချက်များနှင့် ကြုံတွေ့ရနိုင်သော အန္တရာယ်များကို ဆွေးနွေးခဲ့ကြသည်။
နင်ယို့ချီက ရှုချွမ်းအတွက် ကောင်းကျိုးနှင့် ဆိုးကျိုးအားလုံးကို သေချာစွာ ခွဲခြမ်းစိတ်ဖြာ ပြခဲ့သည်။
သူတို့နှစ်ဦး အစီအစဉ် ကို လုံးဝ ရှင်းလင်းစွာ ချမှတ်ပြီးစီးချိန်တွင် ညနက်ပိုင်းသို့ ရောက်ရှိနေပြီ ဖြစ်သည်။
မနက်ဖြန်အတွက် နှစ်ဦးစလုံး မျက်လုံးများကို မှိတ်ကာ အနားယူခဲ့ကြသည်။
သို့သော်လည်း အမျိုးသားတစ်ဦးနှင့် အမျိုးသမီးတစ်ဦး တစ်ခန်းတည်း အတူတူ ရှိနေခြင်းကြောင့် ဖြစ်နိုင်သည်၊ သူတို့နှစ်ဦးစလုံး အိပ်ပျော်ခြင်း မရှိခဲ့ကြပေ။ အနည်းငယ်မျှသော လှုပ်ရှားသံ သို့မဟုတ် အသံဗလံကြားရုံမျှဖြင့် သူတို့၏ မျက်လုံးများ ပွင့်လာခဲ့ကြသည်။