အခန်း ၂၁၅၈

အခန်း (၂၁၅၈) စစ်ပွဲစတင်ပြီ

"ကောင်းတယ်၊ သိပ်ကောင်းတယ် အန်းယာလုရှန်း၊ ကောင်းရှန်း၊ ချွေချန်းယုံ၊ ထျန်းချန်းစီ…… မင်းတို့တွေက တကယ်ပဲ ငါအယုံကြည်ရဆုံး လက်အောက်ငယ်သားတွေ ပီသပါပေတယ်၊ ဒီတစ်ခါတော့ ငါက မင်းတို့ကို ကိုယ်တိုင် သေမင်းဆီ လိုက်ပို့ပေးရမယ်"

လူတိုင်းက တစ်ယောက်တစ်ပေါက်နှင့် မိမိမှာ ကျန်းရှို့ကွေးမဟုတ်ပါဟု ငြင်းဆိုနေကြသည်ကို ကြားလိုက်ရသည့်အခါ ကျန်းရှို့ကွေး၏တစ်ကိုယ်လုံးမှာ ဒေါသကြောင့် တုန်ရီသွားခဲ့ရပြီး အလွန်အမင်း ဒေါသထွက်လွန်းသဖြင့် ရယ်ပင် ရယ်မောလိုက်မိတော့သည်။

အခြားတစ်ဖက်တွင်မူ အန်းလုရှန်း၊ ကောင်းရှန်း နှင့် ဝူဆူမစ်ရှ် ခါဂန်း အပါအဝင် မည်သူကမျှ ကျန်းရှို့ကွေးအား ဆက်လက်ပြောဆိုခွင့် မပေးဝံ့ကြတော့ပါချေ။

ဝမ်ချောင်၏ နည်းလမ်းများမှာ သူတို့ ထင်မှတ်ထားသည်ထက် များစွာ ပိုမိုအစွမ်းထက်လှပေရာ ဤအခြေအနေတွင် သူတို့အနေဖြင့် အနည်းငယ်မျှပင် အသာစီးရနိုင်မည် မဟုတ်ပါချေ။

"စစ်တပ် အမိန့်ကို နာခံကြ၊ တိုက်ပွဲဝင်ဖို့ ပြင်ဆင်ကြစမ်း"

အန်းလုရှန်းက အနည်းငယ်မျှ တွေဝေခြင်း မရှိဘဲ အမိန့်ပေးလိုက်ပြီး စကားအဆုံးတွင် သူ၏မြင်းခေါင်းကို ချက်ချင်း လှည့်ကာ စစ်တပ်ကြီး၏ နက်ရှိုင်းရာ နေရာသို့ ပြန်လည် ဝင်ရောက်သွားတော့သည်။

သူသည် ဤနေရာ၌ ဆက်လက် ကျန်ရှိနေမည်ဆိုပါက ဝမ်ချောင်ဘက်မှ အခွင့်အရေးကို အသုံးချကာ နောက်ထပ် ပြဿနာများ ဖန်တီးလာမည်ကို စိုးရိမ်နေခြင်းပင် ဖြစ်၏။

အန်းလုရှန်း၏ အမိန့်အောက်တွင် ကျယ်လောင်သော ခရုသင်းသံကြီးများ ထွက်ပေါ်လာခဲ့ပြီး တစ်ချိန်တည်းမှာပင် တချွတ်ချွတ် မြည်သံများနှင့်အတူ သံချပ်ကာများ တုန်ခါသွားခဲ့ကာ နိုင်ငံအသီးသီး၏ မဟာမိတ်တပ်ဖွဲ့များမှာ သူတို့၏ လက်ထဲရှိ လက်နက်များကို ရိုက်ခတ်လိုက်ကြရာ စစ်သည်တို့၏ ကိုယ်ပေါ်ရှိ သံချပ်ကာများမှ အေးစိမ့်လှသော အလင်းရောင်များ တစ်လက်လက် တောက်ပလာတော့သည်။ သံချပ်ကာပြားများမှာ တစ်ခုနှင့်တစ်ခု ထိခတ်သွားခဲ့ပြီး သတ်ဖြတ်လိုသော အရှိန်အဝါများမှာ လျင်မြန်စွာ ပေါက်ကွဲထွက်ပေါ်လာကာ ကောင်းကင်ယံအထိ ထိုးတက်သွားတော့သည်။

ဒုန်း ဒုန်း ဒုန်း

တစ်ချိန်တည်းမှာပင် စစ်တပ်ကြီး၏ အနောက်ဘက်၌ စစ်ရထား အစီးပေါင်း ဆယ်နှင့်ချီ၍ တစ်တန်းတည်း တန်းစီထားလေသည်။ ထိုစစ်ရထားများပေါ်ရှိ ဟူလူမျိုး စစ်သည်များမှာ ရင်ဘတ်ကို ဖော်ထားကာ လက်မောင်းများကို ပြသလျက် စစ်ရထားပေါ်ရှိ စစ်ဗုံကြီးများကို တစ်ချက်ပြီးတစ်ချက် အားကုန်သုံးကာ တီးခတ်နေကြတော့ရာ မြည်ဟည်းနေသော စစ်ဗုံသံကြီးများမှာ ကောင်းကင်နှင့်မြေကြီးကို တုန်ဟိန်းစေခဲ့ပြီး မိုင်ပေါင် ရာနှင့်ချီ၍ ဝေးကွာသော နေရာမှပင် ရှင်းလင်းစွာ ကြားနေရပေသည်။

"ခွေးကောင်"

မြင့်မားလှသော မြို့ရိုးပေါ်တွင် ကျန်းရှို့ကွေးသည် ဤမြင်ကွင်းကို မြင်လိုက်ရသည့်အခါ ဒေါသတကြီး ဖြစ်သွားခဲ့ပြီး သူ၏ဆံပင်များပင် ထောင်တက်သွားလုမတတ် ဖြစ်သွားခဲ့ရ၏။ သူသည် မြို့ရိုးပေါ်မှနေ၍ ချက်ချင်းပင် ခုန်ဆင်းကာ အန်းလုရှန်းအား သတ်ဖြတ်ပြီး မိမိ ခံစားခဲ့ရသော အရှက်ရမှုများကို ဆေးကြောပစ်ချင်နေတော့သည်။

ခမ်းနားကြီးကျယ်လှသော ကာကွယ်ရေးဗိုလ်ချုပ်ဘဝမှနေ၍ ဖုန်မှုန့်များကြားသို့ ကျဆင်းသွားခဲ့ရပြီး တော်ဝင်နန်းတော်နှင့် ပြည်သူများ၏ လှောင်ပြောင်စရာတစ်ခု ဖြစ်လာခဲ့ရသဖြင့် သူသည် အန်းလုရှန်းက မိမိအပေါ်တွင် ကျူးလွန်ခဲ့သော အရှက်ရမှုများကို အဆပေါင်း ရာနှင့်ချီ၍ ပြန်လည် ပေးဆပ်စေရမည် ဖြစ်၏။

"ကာကွယ်ရေးဗိုလ်ချုပ် ခဏလောက် သည်းခံပါဦး၊ ဒီလို အချိန်မျိုး ရောက်နေပြီပဲ၊ အဲဒီ ဟူလူမျိုးခွေးကောင် ကို မနှိမ်နင်းနိုင်မှာ စိုးရိမ်နေစရာ လိုသေးလို့လား?"

ထိုအချိန်မှာပင် နားထဲသို့ ခြေသံများ တိုးဝင်လာခဲ့ပြီး ဝမ်ချောင်သည် ရှေ့သို့ တိုးလာကာ ကျန်းရှို့ကွေး၏ ပခုံးကို အသာအယာ ပုတ်လျက် နှစ်သိမ့်လိုက်လေသည်။

ဝမ်ချောင်၏ အသံကို ကြားလိုက်ရသည့်အခါ ကျန်းရှို့ကွေးသည် နောက်ဆုံး၌ အနည်းငယ် တည်ငြိမ်သွားတော့သည်။

ကျန်းရှို့ကွေးအနေဖြင့် ဝမ်ချောင်အပေါ်တွင် အလွန်ပင် ရိုသေလေးစားမှု ရှိနေပြီး ပို၍တိကျစွာ ပြောရလျှင် ကျေးဇူးတင်မှုများ ရှိနေခြင်းပင် ဖြစ်၏။ သို့မဟုတ်ပါက တစ်လောကလုံးမှ သိရှိထားကြသော ကျန်းရှို့ကွေး၏ မောက်မာမှုနှင့် ကိုယ့်ကိုယ်ကိုယ် အထင်ကြီးမှုများအရဆိုလျှင် ဤကဲ့သို့သော အခြေအနေမျိုး၌ သူ တည်ငြိမ်သွားရန်မှာ လုံးဝ မဖြစ်နိုင်သလောက်ပင်။

"ဝမ်ချောင်ငါ့မှာ တောင်းဆိုစရာ တစ်ခုတည်းပဲ ရှိတယ်၊ ဒီ စစ်ပွဲကြီးမှာ ဘယ်လိုပဲ ဖြစ်ဖြစ် အဲဒီ သစ္စာဖောက် ကို ငါကိုယ်တိုင် သတ်ပြီး ငါ့ရဲ့ဓားအောက်မှာ သေဆုံးသွားတာကို မြင်တွေ့ချင်တယ်"

ကျန်းရှို့ကွေး၏ မျက်ဝန်းများမှာ နီရဲနေလျက် လေးနက်စွာ ဆိုလိုက်သည်။

"အင်း"

ဝမ်ချောင်က စကားအများကြီး မဆိုတော့ဘဲ ခေါင်းကိုသာ အသာအယာ ညိတ်ပြလိုက်သည်။

"စစ်သည် အားလုံး အမိန့်ကို နာခံကြ၊ တိုက်ပွဲဝင်ဖို့ ပြင်ဆင်ကြစမ်း"

မျက်နှာချင်းဆိုင်မှ သတ်ဖြတ်ခြင်း အရှိန်အဝါများ ပြည့်နှက်နေလျက် ဖိအားပေး ကျူးကျော်လာနေသော နိုင်ငံအသီးသီး၏ မဟာမိတ်တပ်ဖွဲ့ကြီးကို ကြည့်ရင်း၊ ဝမ်ချောင်သည် ညာလက်ကို မြှောက်ကာ ရှေ့သို့ စိုက်ကြည့်လျက် ရုတ်တရက် အမိန့်ပေးလိုက်လေသည်။

ဝမ်ချောင်၏ အမိန့်နှင့်အတူ မူလက လူအနည်းငယ်မျှသာ မြင်တွေ့ရပြီး ဟာလာဟင်းလင်း ဖြစ်နေသော သံမဏိခံတပ်၏ လေထုမှာ မျက်တောင်တစ်ခတ်အတွင်း ချက်ချင်းပင် ပြောင်းလဲသွားတော့သည်။

မရေမတွက်နိုင်သောလူများ၏ အကြည့်များအောက်တွင် သံမဏိခံတပ်၏ အတွင်းပိုင်းမှနေ၍ သံမဏိများ ထိခတ်သံများ တစ်ချက်ပြီးတစ်ချက် ဆက်တိုက် ထွက်ပေါ်လာတော့သည်။

တချွတ်ချွတ် မြည်ဟည်းနေသော သတ္တုများ ထိခတ်သံများနှင့်အတူ ဧရာမ သံမဏိ အမိုးခုံးပြားကြီးများမှာ ခံတပ်၏ အတွင်းပိုင်းမှနေ၍ ထွက်ပေါ်လာခဲ့ပြီး မျက်တောင်တစ်ခတ်အတွင်းမှာပင် ဧရာမ သံမဏိခံတပ် ကြီး တစ်ခုလုံး ရှိ ပွင့်ဟနေသော နေရာများ အားလုံးမှာ ပိတ်ဆို့ ဖုံးကွယ်သွားခဲ့ရကာ နံရံများ အားလုံးမှာလည်း အပ်ပေါက်မျှပင် မရှိတော့လောက်အောင် အသေအချာ ပေါင်းစပ်သွားကြပြီး တစ်ခဏအတွင်းမှာပင် စစ်မှန်သော သံမဏိနံရံကြီးတစ်ခုအဖြစ် ပြောင်းလဲသွားတော့သည်။

ဤမျှသာမကသေးဘဲ နောက်တစ်ခဏ၌ ဒုတိယအကြိမ်မြောက် ပင်လယ်လှိုင်းလုံးကြီးများအလား မြည်ဟည်းသံကြီးများနှင့်အတူ မီတာ ဆယ်နှင့်ချီ၍ မြင့်မားလှပြီး လုံးဝဖျက်ဆီး၍ မရနိုင်သော သံမဏိခံတပ် ၏ အပြင်ဘက် နံရံများပေါ်တွင် လျှို့ဝှက်အခန်းငယ်များ တစ်ခုပြီးတစ်ခု ရုတ်တရက် ပွင့်ထွက်လာခဲ့ပြီး ထိုလျှို့ဝှက်အခန်းများ အတွင်း၌ တဂျောက်ဂျောက် မြည်သံများနှင့်အတူ သောင်းနှင့်ချီသော မဟာထန်၏ စစ်ရထားလေးများမှာ အစီအရီ ထွက်ပေါ်လာတော့သည်။

နှစ်သိန်းကျော်သော မဟာထန်၏ စစ်ရထားလေးများအားလုံးမှာ မြောက်ဘက်မှ နိုင်ငံအသီးသီး၏ မဟာမိတ်တပ်ဖွဲ့များဆီသို့ ချိန်ရွယ်ထားကြပြီး ထိုချွန်ထက်လှသော မြားဖျားများနှင့် မြားတံပေါ်ရှိ သွေးစီးကြောင်းများနှင့် ပန်းပွင့်ပုံစံများက တစ်သံမဏိခံတပ်လုံးကို အမည်နှင့် လိုက်ဖက်လှသော ဧရာမ စစ်မြေပြင် သားရဲကြီး တစ်ကောင်အဖြစ် ပြောင်းလဲသွားစေတော့သည်။

အင်ပါယာ အစိုးရ၏ အမိန့်ကို ရရှိပြီးကတည်းက လုပ်ငန်းဝန်ကြီးဌာန၏ ကြီးကြပ်မှုအောက်တွင် တစ်မဟာထန်လုံး ရှိ သောင်းနှင့်ချီသော လက်မှုပညာရှင်များမှာ နေ့ညမပြတ် အစွမ်းကုန် ကြိုးပမ်းခဲ့ကြသဖြင့် နောက်ဆုံးတွင်မူ တည်ဆောက်ပြီးစီးခဲ့သော မဟာထန်၏ စစ်ရထားလေးနှစ်သိန်းစလုံးကို အရှေ့ဘက်ရှိ ဤသံမဏိခံတပ်ဆီသို့ အပြည့်အစုံ ပို့ဆောင်နိုင်ခဲ့ခြင်း ဖြစ်၏။ ဤသည်မှာ နိုင်ငံအသီးသီး၏ မဟာမိတ်တပ်ဖွဲ့ ကို ရင်ဆိုင်ရန်အတွက် ဝမ်ချောင်၏ အရေးအကြီးဆုံးသော လက်နက်ကြီးပင် ဖြစ်တော့သည်။

ဤမျှသာမကသေးဘဲ ထိုမဟာထန်၏ စစ်ရထားလေးများ ပေါ်ထွက်လာပြီးနောက် မူလက ဟာလာဟင်းလင်း ဖြစ်နေသော သံမဏိခံတပ်၏ မြို့ရိုးပေါ်တွင် မျက်တောင်တစ်ခတ်အတွင်း တချွတ်ချွတ် မြည်သံများနှင့်အတူ သံချပ်ကာဝတ် စစ်သည်တော်များမှာ အတန်းလိုက် အစီအရီ လျင်မြန်စွာ ပေါ်ထွက်လာကြပြီး သူတို့ထဲမှ အများစုမှာ ပေါ်ထွက်လာသည်နှင့် တစ်ပြိုင်နက် လက်တစ်ဖက်ဖြင့် နောက်သို့ လှမ်းကာ လေးကို ကိုင်စွဲလိုက်ပြီး အခြားလက်တစ်ဖက်ဖြင့် မြားကို တင်လျက် ကြီးမားလှသော လေးများကို လပြည့်ဝန်းအလားအစွမ်းကုန် ဆွဲတင်လိုက်ကြကာ မြားဖျားများကို မြို့ရိုးအပြင်ဘက်ရှိ နိုင်ငံအသီးသီး၏ မဟာမိတ်တပ်ဖွဲ့များဆီသို့ ချိန်ရွယ်လိုက်ကြတော့သည်။

ထိုသံချပ်ကာဝတ် စစ်သည်တော် များ အားလုံးမှာ ခွန်အားကြီးမားပြီး ကိုယ်ဟန်မတ်မတ် ရှိကြကာ တစ်ဦးချင်းစီမှာလည်း အဟုန်များ ပြည့်ဝနေကြပြီး အနည်းဆုံး စစ်မှန်သော သိုင်းအဆင့် အဆင့်ရှစ်၊ ကိုးအဆင့် သို့မဟုတ် ရွှမ်ဝူအဆင့် အထိပင် ရှိနေကြရာ သူတို့၏ ခွန်အားမှာ အခြားသော စစ်သည်များထက် အဆပေါင်းများစွာ သာလွန်နေသည်မှာ ထင်ရှားလှပေသည်။ ဤသူများမှာ အခြားသူများ မဟုတ်ဘဲ နတ်မြားသမား တပ်ဖွဲ့ပင် ဖြစ်တော့သည်။

သေသေချာချာ ကြည့်ရှုလိုက်မည်ဆိုပါက မြို့ရိုးပေါ်တွင် ပေါ်ထွက်လာသော နတ်မြားသမား တပ်ဖွဲ့ များမှာ အနည်းဆုံး လူဦးရေ နှစ်သောင်း၊ သုံးသောင်းခန့် ရှိနေပေသည်။

""

သံမဏိခံတပ် ကြီးသည် စက္ကန့်ပိုင်းမျှ အချိန်တိုအတွင်း၌ ဤကဲ့သို့သော အပြောင်းအလဲများကို ပြီးမြောက်သွားသည်ကို မြင်တွေ့လိုက်ရသည့်အခါ တစ်ခဏအတွင်းမှာပင် လူတိုင်းမှာ အံ့ဩမှင်တက်သွားကြရ၏။

"ဒါက ဘာတွေလဲ။ ဒီလို အရာမျိုးတွေ ဘယ်လိုလုပ် ရှိနေရတာလဲ?"

မိမိ၏ ရှေ့မှောက်ရှိ ရက်စက်ကြမ်းတမ်းလှသော "သံမဏိ သားရဲကြီး"ကို ကြည့်ရင်း ယွန်းဂျယ်စိုးမွန်းမှာ အလွန်အမင်း မှင်တက်သွားခဲ့ရသည်။

ယွန်းဂျယ်စိုးမွန်းသည် ဂိုဂူလျော အင်ပါယာတစ်ခုလုံး တွင် စစ်တိုက်ရာ၌ အဝါသနာအပါဆုံးနှင့် အကြမ်းတမ်းဆုံးသော ဧကရာဇ်တစ်ဦး ဖြစ်သလို အရှေ့မြောက်ဘက် နယ်မြေတစ်ခုလုံး တွင်လည်း နာမည်ကျော်ကြားလှကာ အင်အားစု အားလုံးမှ လေးစားကြောက်ရွံ့ရသော ခေါင်းဆောင်ကြီး တစ်ဦး ဖြစ်ပေသည်။

သို့သော် ယွန်းဂျယ်စိုးမွန်းပင်လျှင် မိမိ၏ ရှေ့မှောက်ရှိ ထို ဧရာမအရာကြီးကို မြင်တွေ့လိုက်ရသည့်အခါ သူ၏ မျက်ခွံများမှာ မသိစိတ်ဖြင့်ပင် လှုပ်ခါသွားခဲ့ရ၏။

ယခင်က သံမဏိခံတပ်မှာ အပြင်ပန်းတွင် ခိုင်မာပြီး ကာကွယ်ရေး အစွမ်းထက်ရုံမျှသာ ရှိခဲ့သော်လည်း ယခုအခါတွင်မူ တိုက်စစ်နှင့် ခံစစ်နှစ်မျိုးစလုံးကို ပိုင်ဆိုင်ထားပြီး သွားများအထိ လက်နက်တပ်ဆင်ထားသော သံမဏိ သားရဲကြီးတစ်ကောင်အဖြစ် ပြောင်းလဲသွားခဲ့ပြီ ဖြစ်၏။

ယွန်းဂျယ်စိုးမွန်းသည် မွေးရာပါ ရဲရင့်သူဖြစ်ပြီး တစ်သက်တာလုံး စစ်ပွဲကြီးငယ်ပေါင်းများစွာ ဆင်နွှဲခဲ့ဖူးပါသော်လည်း ဤကဲ့သို့သော ပြိုင်ဘက်မျိုးကို တစ်ခါမျှ မကြုံတွေ့ခဲ့ဖူးပါချေ။

ဤအခိုက်အတန့်၌ ဂိုဂူလျော အင်ပါယာ သမိုင်းတစ်လျှောက် အစွမ်းအထက်ဆုံးသော ဧကရာဇ်ကြီး ပင်လျှင် ရင်ထဲ၌ ထိတ်လန့်တုန်လှုပ်သွားသကဲ့သို့ ခံစားလိုက်ရပြီး ကြီးမားလှသော ဖိအားတစ်ခုကိုလည်း ခံစားလိုက်ရပေသည်။

ဤကဲ့သို့သော အတွေးမျိုး ရှိနေသူမှာ ယွန်းဂျယ်စိုးမွန်းတစ်ဦးတည်း မဟုတ်ပါချေ။ သူ၏ အနောက်ရှိ ရှီဘုရင်မ၊ ခီတန်ဘုရင်၊ ဝူဆူမစ်ရှ် ခါဂန်း နှင့် အခြားသူများ အားလုံးမှာလည်း သူတို့၏ မျက်ဝန်းထဲ၌ အံ့ဩမှင်တက်မှုများ ပြည့်နှက်နေကြခြင်းပင်။

မိမိတို့ ရှေ့မှောက်ရှိ ဤသံမဏိခံတပ်ကြီး၏ ခက်ခဲကြမ်းတမ်းမှုမှာ သူတို့ ထင်မှတ်ထားသည်ထက် များစွာ သာလွန်နေပြီ ဖြစ်၏။

ထို့ပြင် သံမဏိခံတပ်၏အတွင်းပိုင်း၌လည်း ယန္တရား မောင်းတံသံများမှာ အဆက်မပြတ် ထွက်ပေါ်နေဆဲဖြစ်ရာ မျက်စိရှေ့တွင် မြင်တွေ့နေရသည်များအပြင် ဝမ်ချောင်သည် လျှို့ဝှက်ထားသော အစွမ်းထက် နည်းလမ်းများ မည်မျှအထိ များပြားနေဦးမည်ကို မည်သူမျှ မသိနိုင်ပါချေ။

"ဒီ ဧရာမ သံမဏိခံတပ် ကြီးကို ရှောင်ကွင်းပြီး သွားလို့ မရဘူးလား"

ရှီဘုရင်မ၏ တစ်ကိုယ်လုံးမှာ တစ်ချက် တုန်ယင်သွားခဲ့ပြီး ရုတ်တရက် မနေနိုင်တော့ဘဲ မေးမြန်းလိုက်လေသည်။

"မဖြစ်နိုင်ဘူး"

အနောက်ဘက်မှ အသံတစ်ခု ထွက်ပေါ်လာခဲ့၏။ ဝူဆူမစ်ရှ် ခါဂန်း ၏ တစ်ကိုယ်လုံးမှ အရှိန်အဝါများမှာ ပေါက်ကွဲထွက်ပေါ်နေလျက် နှင်းမုန်တိုင်းများအားလုံးကို သူ၏ ပတ်ဝန်းကျင် ပေအနည်းငယ်မျှ အကွာအဝေးတွင် ဖယ်ရှားထားလေသည်။

"သံမဏိခံတပ် ထဲမှာ ရှိနေတဲ့ သူက ငါတို့ တွေးထားတာထက် အများကြီး ပိုပြီးရင်ဆိုင်ရ ခက်ခဲတယ်။ သူက ဒီနေရာကို စစ်မြေပြင်အဖြစ် ရွေးချယ်လိုက်တာ အကြောင်းပြချက် မရှိဘဲ မဟုတ်ဘူး။ ချန်းကျိုး၊ ယင်ကျိုး အစရှိတဲ့ ဒီ ဒေသတွေက အရမ်းထူးခြားတယ်၊ ငါတို့တွေ တောင်ဘက်ကို ဆင်းလာမယ့် လမ်းကြောင်းရဲ့ အရေးအကြီးဆုံး လည်ပင်းနေရာမှာ အတိအကျ ကျရောက်နေတာပဲ"

"အကယ်၍ ငါတို့သာ တမင်တကာ လမ်းကြောင်း ပြောင်းပြီး သွားမယ်ဆိုရင်၊ ငါတို့ တပ်တွေ တစ်ဝက်လောက်က သံမဏိခံတပ် ကို ကျော်သွားပြီး ကျန်တဲ့ တစ်ဝက်က အနောက်မှာ ကျန်နေခဲ့တဲ့ အချိန်ကျရင် အဲဒီလူက သေချာပေါက် စစ်လွှတ်ပြီး ငါတို့ကို အလယ်ကနေ ဖြတ်တောက်မှာပဲ။ အဲဒီအခါ အလယ်ပိုင်းမှာ ရှုပ်ထွေးသွားပြီး ရန်သူရဲ့ တိုက်ခိုက်မှုကိုပါ ခံရမယ်ဆိုရင် ငါတို့ရဲ့ စစ်တပ် နှစ်ဖက်စလုံးက သူတို့ကို ပြန်လည် တိုက်ခိုက်ချင်ရင်တောင် ကိုယ့်တပ်တွေကြားထဲမှာ ရှုပ်ထွေးမှုတွေ ဖြစ်လာပြီး တားဆီးခံရလိမ့်မယ်။ အဲဒီအချိန်ကျရင် ငါတို့တွေ အကြီးအကျယ် ရှုံးနိမ့်သွားမှာပဲ"

"အဲဒီလူရဲ့ အရည်အချင်းအရဆိုရင် ဒီအချက်ကို သေချာပေါက် လုပ်နိုင်စွမ်း ရှိတယ်"

ဝူဆူမစ်ရှ် ခါဂန်း က ဆိုလိုက်သည်။

ရှီဘုရင်မမှာ အလွန် ငယ်ရွယ်လွန်းသေးသလို စစ်ဗျူဟာပိုင်းတွင်လည်း ကျွမ်းကျင်သူ မဟုတ်သဖြင့် အရာရာကို အပြည့်အဝ နားမလည်နိုင်ပါချေ၊ သို့မဟုတ်ပါကလည်း ဝမ်ချောင်၏ ကြောက်မက်ဖွယ် ကောင်းမှုများကို သတိမပြုမိသေးခြင်း ဖြစ်၏။

အကယ်၍ ဤ သံမဏိခံတပ် ကြီးကို ထိုမျှ လွယ်လင့်တကူ ရှောင်ကွင်းသွားနိုင်မည်ဆိုပါက အလွန် ကောင်းမွန်လှပေလိမ့်မည်။

သို့သော် ဝမ်းနည်းစရာ ကောင်းသည်မှာ ၎င်းမှာ စိတ်ကူးယဉ်မှု တစ်ခုသာ ဖြစ်ပေသည်။

"ဒါပေမဲ့၊ အကယ်၍ ငါတို့က ဒီနေရာကနေ မဖြတ်ဘဲ အရှေ့ တာ့ခ် လွင်ပြင်ကြီးကနေ ရှောင်ကွင်းပြီး သွားမယ်ဆိုရင်ရော"

ရှီဘုရင်မက သူမ၏ နှုတ်ခမ်းကို အသာအယာ ကိုက်လျက် အနည်းငယ် မကျေမနပ်ဖြင့် ဆိုလိုက်လေသည်။

"အဲဒါလည်း အလကားပဲ"

ဂိုဂူလျော ဧကရာဇ်ယွန်းဂျယ်စိုးမွန်းက စကားဆိုလာတော့သည်။ စစ်တပ် နေရာချထားမှုနှင့် စစ်ဗျူဟာပိုင်းဆိုင်ရာ နားလည်မှုများတွင် သူသည် မိမိ၏ ရှေ့မှောက်ရှိ လူများထက် များစွာ သာလွန်လှပေသည်။

"မင်းတို့တွေ မေ့နေကြပြီလား။ သူက ဝူရှန်းမှာလည်း နောက်ထပ် မြို့တစ်မြို့ ရှိသေးတယ်ဆိုတာကို။ အဲဒီလူက အစောပိုင်းကတည်းက အသေအချာ စဉ်းစားထားပြီးသားပဲ၊ သူက ဝူရှန်းရဲ့သံမဏိမြို့တော်မှာ စစ်တပ်ကြီးကို နေရာချထားပြီး အနောက် တာ့ခ် အင်ပါယာက စစ်တပ်တွေနဲ့ ပူးပေါင်းပြီး ရင်ဆိုင်ဖို့ ပြင်ထားတာ၊ ဒီလိုဆိုတော့ အရှေ့မြောက်ဘက်က သံမဏိခံတပ်နဲ့ နှစ်ဖက် ညှပ်ပြီး တိုက်ခိုက်နိုင်သွားတာပေါ့"

"အကယ်၍ ငါတို့က အဝေးကြီးကို ရှောင်ကွင်းပြီး သွားမယ်ဆိုရင်၊ သန်းနဲ့ချီတဲ့ စစ်တပ်ကြီးနဲ့ နောက်တန်း ထောက်ပံ့ရေးတွေဟာ သေချာပေါက် အရှည်ကြီး ဖြစ်သွားလိမ့်မယ်။ ဒါက မဟာထန်ကို ကျောခိုင်းလိုက်ပြီး ကိုယ့်ရဲ့အားနည်းချက်ကို ရန်သူဆီ ထုတ်ပြလိုက်တာနဲ့ အတူတူပဲ။ အကယ်၍ မဟာထန် ဘက်ကသာ စစ်လွှတ်ပြီး အနောက်ကနေ အခွင့်ကောင်းယူပြီး ခိုးဝင်တိုက်ခိုက်မယ်ဆိုရင် ငါတို့တွေ သေချာပေါက် အကြီးအကျယ် အထိနာသွားမှာပဲ"

"ထန်လူမျိုးတွေရဲ့ တိုက်ခိုက်ရေးစွမ်းရည်က အလွန် ပြင်းထန်တယ်၊ ရှန်းလုံခေတ် တုန်းကထက်တောင် ပိုပြီးသာလွန်နေသေးတယ်။ အရင်တုန်းကဆိုရင်တော့ ထားလိုက်ပါတော့၊ ဒါပေမဲ့ ယခုအခါ မဟာထန်မှာ စစ်သည်အင်အား တစ်သန်း ရှိနေပြီ။ အကယ်၍ အဲဒီလို စစ်ရေးဗျူဟာ အမှားမျိုးသာ ဖြစ်သွားမယ်ဆိုရင် အနည်းဆုံးတော့ အဲဒီလူရဲ့ အရည်အချင်းနဲ့ဆို ငါတို့ဘက်က စစ်သည် တစ်သန်းလောက် သေဆုံးသွားအောင် သူ လုပ်နိုင်စွမ်း ရှိတယ်။ ပြီးတော့ ငါတို့တွေ သံမဏိခံတပ်ကို ရှောင်ကွင်းသွားနိုင်ခဲ့ရင်တောင်မှ ကျန်တဲ့ စစ်သည်အင်အားက တစ်သန်းလောက်ပဲ ရှိတော့မယ်ဆိုတော့ အရေအတွက် အားသာချက် မရှိတော့ရင် အနိုင်ရဖို့ အခွင့်အရေး ဆိုတာ လုံးဝမရှိနိုင်တော့ဘူး။"

"ဒါကြောင့် မဟာထန်ကို ဖျက်ဆီးချင်တယ်ဆိုရင် ဘယ်လို လှည့်ကွက်မှ သုံးလို့ မရဘူး၊ နိုင်ငံအသီးသီးရဲ့ အင်အားစုတွေ အားလုံးက ယိုကျိုးမှာ စုပေါင်းပြီး တောင်ဘက်ကို တည့်တည့်ဆင်းလာရမယ်၊ အရင်ဆုံး ချန်းကျိုးနဲ့ ယင်ကျိုးက သံမဏိမြို့တော် တွေကို ဖျက်ဆီးပြီးမှ ဆက်လက် ချီတက်ပြီး မဟာထန် ကို တိုက်ရိုက် ဖျက်ဆီးပစ်ရမယ်။"

"မဟာထန်ရဲ့ အဓိက စစ်တပ်ကြီးက ဒီနေရာမှာ အားလုံး စုစည်းနေတာ၊ ဒီနေရာကို အမြစ်ပြတ် ရှင်းလင်းလိုက်နိုင်ပြီဆိုရင် မဟာထန်မှာ တားဆီးနိုင်မယ့် စစ်တပ် ဆိုတာ လုံးဝမရှိတော့ဘူး။ ဒီတော့ ပြောရရင် ဒီ စစ်ပွဲဟာ အဆုံးအဖြတ် တိုက်ပွဲပဲ၊ လုံးဝနောက်ဆုတ်လို့ မရတဲ့ တိုက်ပွဲပဲ"

ယွန်းဂျယ်စိုးမွန်းက လေးနက်စွာ ဆိုလိုက်သည်။

သူ၏အကြည့်များမှာ စူးရှထက်မြက်နေလျက် ကျောဘက်ရှိ အနက်ရောင် ဓားတို ခြောက်စင်းက သူ့အား အလွန်ပင် ခန့်ညားထည်ဝါလှစွာ ပုံဖော်ပေးနေတော့သည်။

စစ်ဗျူဟာပိုင်းဆိုင်ရာတွင် ဤပုဂ္ဂိုလ်မှာ လူတိုင်း ထင်မှတ်ထားသည်ထက် များစွာ ပိုမိုအစွမ်းထက်လှပေသည်။

အခြားတစ်ဖက်တွင်မူ ရှီဘုရင်မမှာ မှင်တက်သွားခဲ့ရပြီး စကားတစ်ခွန်းမျှပင် မဆိုနိုင်တော့ပါချေ。

ရှေ့မှောက်ရှိ အဆုံးအစမရှိ ဧရာမ နက်မှောင်လှသော သံမဏိခံတပ် ကြီး၊ ယင်ကျိုးအထိ ဖြန့်ကျက်ထားသော ကြီးမားလှသည့် အတားအဆီးကြီး၊ ထို့ပြင် ခံတပ်မြို့ရိုးပေါ်ရှိ တည်ငြိမ်လှသော လူငယ်လေးအား ပြန်လည် လှမ်းကြည့်လိုက်သည့်အခါ ရှီဘုရင်မ၏ လှပသော မျက်ဝန်းများမှာ လှုပ်ခါသွားခဲ့ပြီး ဤအခိုက်အတန့်၌ သူမ၏ခံစားချက်များမှာ ယခင်နှင့် လုံးဝကွဲပြားသွားခဲ့ပြီ ဖြစ်သည်။

သာမန်ဟု ထင်ရသော ထို သံမဏိခံတပ် ကြီးတွင် ဤမျှလောက် နက်ရှိုင်းလှသော ရည်ရွယ်ချက်များ ရှိနေလိမ့်မည်ဟု သူမ တစ်ခါမျှ မတွေးမိခဲ့ပါချေ၊ ထို့ပြင် ဤတိုက်ပွဲမှာ နိုင်ငံအသီးသီးနှင့် မဟာထန် ကြားမှ နောက်ဆုံး အဆုံးအဖြတ် တိုက်ပွဲဖြစ်လာလိမ့်မည်ဟုလည်း လုံးဝ မထင်မှတ်ထားခဲ့ပါချေ။

ခဏတာမျှ အချိန်အတွင်း၌ ရှီဘုရင်မ၏ ရင်ထဲတွင် ဗလာကျင်းသွားသကဲ့သို့ ဖြစ်သွားခဲ့ပြီး အဝေးဆီမှ သံမဏိခံတပ် မြို့ရိုးပေါ်ရှိ ထိုငယ်ရွယ်လှသော ပုံရိပ်အား ငေးကြည့်ရင်း အချိန်အတော်ကြာ စကားမပြောနိုင်ဘဲ ရှိနေတော့သည်။

အစွမ်းထက်မှန်း သိသော်လည်း ဤမျှအထိ ထက်မြက်လှလိမ့်မည်ဟု မသိခဲ့ပါချေ

ဤသည်မှာ သူမအနေဖြင့် မဟာထန်၏ မျိုးနွယ်ခြားဘုရင်၏ ထူးခြားမှုများကို ပထမဆုံးအကြိမ်အဖြစ် သိရှိလိုက်ရခြင်းပင် ဖြစ်တော့သည်.

သို့သော်လည်း သူမအနေဖြင့် ပိုမို၍တွေးတောနေရန် အချိန်မရှိတော့ပါချေ၊ အဘယ်ကြောင့်ဆိုသော် စစ်ပွဲကြီး စတင်နေပြီ ဖြစ်သောကြောင့်ပင်။

ဒုန်း ဒုန်း ဒုန်း

စစ်ဗုံသံများ တဂျိမ်းဂျိမ်း မြည်ဟည်းနေလျက်၊ တစ်ချက်ပြီးတစ်ချက် ထွက်ပေါ်လာသော ထိုအသံများအတွင်း၌ ထူးခြားလှသော စည်းချက်များနှင့် စွမ်းအားများ ကိန်းအောင်းနေပေရာ နိုင်ငံအသီးသီးမှ စစ်တပ်ကြီး၏ နှလုံးသားများကို ဆွဲဆောင်လှုံ့ဆော်ပေးနေပြီး၊ သန်းနှင့်ချီသော နိုင်ငံအသီးသီး၏ မဟာမိတ်တပ်ဖွဲ့များ အားလုံး၏ သွေးများကို ဆူပွက်လာစေကာ သတ်ဖြတ်လိုသော ဆန္ဒများကိုလည်း အထွတ်အထိပ်သို့ ရောက်ရှိလာစေသဖြင့် ထိုသတ်ဖြတ်ခြင်း အရှိန်အဝါများမှာ ကောင်းကင်ယံအထိ တစ်ဟုန်ထိုး ထိုးတက်သွားတော့သည်။

မာန်ဝူ စစ်ဗုံ…

ဤအရာမှာ နိုင်ငံအသီးသီးမှ ရှာဖွေ စုဆောင်းထားသော အလွန်ရှေးကျသည့် စစ်ဗုံများ ဖြစ်ကြပြီး၊ ဒဏ္ဍာရီများအရ ၎င်းတို့ကို ရှေးဟောင်း ဧရာမ သားရဲကြီးများ၏ အရေခွံများဖြင့် ပြုလုပ်ထားခြင်းဖြစ်ရာ၊ ခိုင်ခံ့ရုံသာမက ထူးခြားသော စွမ်းအားများကိုလည်း ပိုင်ဆိုင်ထားသဖြင့် စစ်တပ်ကြီး၏ စိတ်ဓာတ်နှင့် သတ်ဖြတ်လိုသော ဆန္ဒများကို အကြီးအကျယ် တိုးမြှင့်ပေးနိုင်စွမ်း ရှိပေသည်။

နိုင်ငံအသီးသီး၏ အင်အားများကို အစွမ်းကုန် အသုံးချ၍ ရှာဖွေခဲ့သော်လည်း စုစုပေါင်း မာန်ဝူ စစ်ဗုံ အလုံး နှစ်ဆယ်သာ ရရှိခဲ့ခြင်း ဖြစ်၏။

******