အခန်း ၂၁၆၃

အခန်း (၂၁၆၃) ဒိုင်းလွှားလှည်းများ၏ ထိတ်လန့်စရာကောင်းလှသော ကာကွယ်ရေးစွမ်းအား

"ခွေးကောင်"

ကောင်းရှန်း၏ စကားကို ကြားလိုက်ရသည့်အခါ အန်းလုရှန်းသည် တစ်ကိုယ်လုံး ဒေါသကြောင့် တုန်ရီသွားခဲ့ရသည်။

"ရှန့်ကုန်းအကြီးအကဲ၊ ထိုက်ရှီသခင်ကြီးဘက်က ဘာပြောလဲ၊ အကြီးအကဲ သိလား သူ ဘယ်အချိန်မှာ စစ်မြေပြင်ကို ရောက်လာမှာလဲ?"

အန်းလုရှန်းသည် ရုတ်တရက် အနောက်သို့ လှည့်ကြည့်ကာ ဘေးနားရှိ ရှန့်ကုန်းအကြီးအကဲအား မေးမြန်းလိုက်ခြင်းပင် ဖြစ်သည်။

ထိုက်ရှီသည် သူ့အား အနက်ရောင် အရိုးပုလွေတစ်ခု ပေးခဲ့ပါသော်လည်း သူသည် အမိန့်ကိုသာ လက်ခံနိုင်ပြီး ထိုက်ရှီအား တိုက်ရိုက် ဆက်သွယ်ရန် နည်းလမ်း မရှိပါချေ၊ အခြေခံအားဖြင့် ထိုက်ရှီနှင့် ဆက်သွယ်ချင်လျှင် ရှန့်ကုန်းအကြီးအကဲ မှတစ်ဆင့်သာ ဆက်သွယ်၍ ရပေသည်။

ထိုသူနှစ်ဦးမှာ အနက်ရောင်ဝတ် အဖွဲ့အစည်းမှ အဖွဲ့ဝင်များ ဖြစ်ကြသလို ရှန့်ကုန်းအကြီးအကဲ ကိုယ်တိုင်မှာလည်း ထိုက်ရှီ မှတစ်ဆင့် ရောက်ရှိလာခဲ့သူ ဖြစ်သည်။

ဤအင်ပါယာများကြားမှ စစ်ပွဲကြီးကို ကြိုတင် စတင်ရန်မှာလည်း ထိုက်ရှီ၏ အလိုဆန္ဒ ဖြစ်ပါသော်လည်း သူကိုယ်တိုင်မူ ပေါ်ထွက်လာခြင်း မရှိသေးပါချေ၊ အကယ်၍ ထိုက်ရှီသာ လူကိုယ်တိုင် လှုပ်ရှားမည်ဆိုပါက ဤစစ်ပွဲမှာ ယခုကဲ့သို့ အခက်တွေ့နေစရာ အကြောင်း မရှိပါချေ။

"အရှင်သခင် မင်း စိတ်မလောပါနဲ့ဦး၊ ထိုက်ရှီ သခင်ကြီးအနေနဲ့ သေချာပေါက် ရောက်လာပြီး လူကိုယ်တိုင် လှုပ်ရှားမယ်လို့ ကတိပေးထားပြီးပြီဆိုရင် သေချာပေါက် လုပ်ဆောင်ပါလိမ့်မယ်။ မင်းအနေနဲ့ စိတ်အေးအေးထားပြီး စောင့်နေရုံပါပဲ”

ရှန့်ကုန်းအကြီးအကဲက အေးအေးဆေးဆေးပင် ဆိုလိုက်သည်။

ဤစကားကို ကြားလိုက်ရသည့်အခါ အန်းလုရှန်း၏ မျက်နှာမှာ အလွန်ပင် မည်းမှောင်သွားခဲ့ပြီး တစ်စုံတစ်ခုကို စိုးရိမ်နေပုံရသည်။

သေချာပေါက် ရောက်လာမယ်။

ဤစကားကို လွန်ခဲ့သည့် သုံးရက်က သူ မေးမြန်းစဉ်ကလည်း ဤအတိုင်းသာ ဖြေခဲ့ပြီး ယခုလည်း ဤအတိုင်းပင် ပြန်လည်ဖြေကြားနေပါသော်လည်း မည်သည့်အချိန်တွင် ရောက်လာမည်ဆိုသော တိကျသော အချိန်ကိုမူ ပေးခြင်း မရှိပါချေ

အကယ်၍ ထိုက်ရှီနှင့်အနက်ရောင်ဝတ် အဖွဲ့အစည်းကိုသာ မစိုးရိမ်ရပါက သူသည် ထိုသူအား ဓားဖြင့် တစ်ချက်တည်း သတ်ပစ်ချင်နေပြီ ဖြစ်သည်။

"ထျန်းချန်ကျန်း မဟာထန်ရဲ့အဓိကစစ်တပ်ကြီး ရောက်လာဖို့ မင်း သိလား ဘယ်လောက်ကြာဦးမလဲ"

အန်းလုရှန်းသည် ရင်ထဲမှ ဒေါသများကို အတင်းအကျပ် ဖိနှိပ်လိုက်ရင်း ဘေးနားရှိ ထျန်းချန်ကျန်း အား လှည့်ကာ မေးမြန်းလိုက်သည်။

"အရှင်သခင်ကို ပြန်လည်တင်ပြပါတယ်၊ မဟာထန်ရဲ့ စစ်တပ်တွေဟာ အစွမ်းကုန် ချီတက်လာနေကြပါတယ်၊ ဒါပေမဲ့ အရှင် တွက်ချက်ထားတဲ့ အချိန်အရဆိုရင် ရောက်ရှိဖို့အတွက် တစ်ရက်လောက် လိုပါသေးတယ်။"

ထျန်းချန်ကျန်းက ဦးခေါင်းကို ငုံ့လျက် ရိုသေစွာ ပြန်လည်ဖြေကြားလိုက်လေသည်။

မဟာမိတ်တပ်ဖွဲ့များ၏ အင်အားမှာ ချန်းကျိုးနှင့် ယင်ကျိုးရှိ သံမဏိခံတပ် များကြောင့် နှစ်ခြမ်းကွဲနေသဖြင့် အလယ်ပိုင်းလွင်ပြင်အတွင်းသို့ မဝင်ရောက်နိုင်ပါသော်လည်း၊ မဟာထန်၏ ပြည်တွင်း၌မူ လျှို့ဝှက်သတင်းပေးများစွာ ရှိနေဆဲဖြစ်ရာ ယိုကျိုးအတွက် အသုံးဝင်သော သတင်းအချက်အလက်များကို အဆက်မပြတ် ပေးပို့နေကြခြင်းပင်။

"သိပ်ကောင်းတယ်"

အန်းလုရှန်းက စကားကို ကြားလိုက်ရသည့်အခါ အသာအယာ ခေါင်းညိတ်လိုက်မိသည်။

သူသည် စစ်ပွဲကို တစ်ရက်ခန့် နောက်ဆုတ်ပြီး ထိုက်ရှီ ရောက်ရှိလာသည်အထိ စောင့်ဆိုင်းနိုင်ပါသော်လည်း၊ မဟာထန်၏ အဓိကစစ်တပ်များ ဖြစ်ကြသော ကျန်းချိုးကျန့်ချုံးနှင့် ဝူရှန်း သံချပ်ကာမြင်းတပ်များ သံမဏိခံတပ်ဆီသို့ မရောက်ရှိသေးသည့် အချက်ကို ထည့်သွင်း စဉ်းစားကာ အန်းလုရှန်းက ဤစစ်ပွဲကို ကြိုတင် စတင်ရန် ဆုံးဖြတ်ခဲ့ခြင်းပင် ဖြစ်သည်။

"အခုတော့ ဒီနေ့အတွင်းမှာ ဒီသံမဏိခံတပ်ကို အောင်မြင်စွာ သိမ်းပိုက်နိုင်မလားဆိုတာကိုပဲ ကြည့်ရတော့မယ်"

အန်းလုရှန်း သည် များမကြာမီမှာပင် သတိဝင်လာခဲ့ပြီး မျက်နှာချင်းဆိုင်သို့ လှမ်းကြည့်လိုက်လေသည်။

အဝေးဆီတွင်မူ အဆုံးမရှိသော နိုင်ငံအသီးသီး၏ မဟာမိတ်တပ်ဖွဲ့ များမှာ သူတို့၏ ခြေအောက်၌ အလင်းကွင်းများကို နင်းထားကြလျက် လျှပ်စီးနှယ် မြန်ဆန်လှသော အရှိန်ဖြင့် သံမဏိခံတပ် ဆီသို့ အဆက်မပြတ် တိုးကပ်လာနေကြသည်။

နှစ်ဖက်အကွာအဝေးမှာ ပိုမို၍ နီးကပ်လာခဲ့ပြီ ဖြစ်၏။

သံမဏိခံတပ် အတွင်း၌မူ စစ်ပွဲ၏တင်းမာမှုများမှာ အထွတ်အထိပ်သို့ ရောက်ရှိနေပြီ ဖြစ်ရာ လေထုမှာ အလွန်ပင် လေးလံနေတော့သည်။

"အရှင်"

မြို့ရိုးပေါ်တွင် စုဟန်ရှင်း၏ အမူအရာမှာ လေးနက်နေလျက် ဝမ်ချောင်အား မသိစိတ်ဖြင့် လှမ်းကြည့်လိုက်မိသည်။

"မင်း ကိုယ်တိုင်ပဲ ဆုံးဖြတ်လိုက်ပါ၊ ဒီဘက်က ကိစ္စတွေကိုတော့ မင်းဆီပဲ အကုန် အပ်ထားမယ်"

မြို့ရိုးပေါ်တွင် ဝမ်ချောင်က အေးအေးဆေးဆေးပင် ဆိုလိုက်သည်။

လက်ရှိ အခြေအနေမှာ မဟာထန်အတွက် အလွန်ပင် ဆိုးရွားနေပေသည်၊ စစ်ရထားလေး တပ်ဖွဲ့မှာ လုံးဝတားဆီးခြင်း ခံထားရသည့်အလား ရှိနေပါသော်လည်း၊ ဝမ်ချောင်အနေဖြင့်မူ စုဟန်ရှင်းအပေါ်တွင် အလွန်ပင် ယုံကြည်မှု ရှိနေဆဲပင်။

ဤလောကပျက်သုဉ်းမည့် ခေတ်ကာလ၏ အတောက်ပဆုံးသော ဗိုလ်ချုပ် တစ်ဦး ဖြစ်သည့်အလျောက်၊ ဝမ်ချောင်သည် စုဟန်ရှင်း၏ အရည်အချင်းဖြင့် လက်ရှိ အခြေအနေကို သေချာပေါက် ဖြေရှင်းနိုင်လိမ့်မည်ဟု ယုံကြည်နေခြင်းပင် ဖြစ်၏။

"အင်း"

စုဟန်ရှင်းက လေးနက်စွာ ခေါင်းညိတ်လိုက်ပြီးနောက် စကားအများကြီး မဆိုတော့ဘဲ စစ်ရထားလေး တပ်ဖွဲ့ များကို အမြန်ဆုံး သွားရောက် ကွပ်ကဲတော့သည်။

"ပြင်ဆင်ကြစမ်း"

"ဟုတ်ကဲ့ပါ"

ပြင်းထန်လှသော ဟောက်သံများနှင့်အတူ မြင့်မားလှသော မြို့ရိုးပေါ်တွင် သံမဏိများ ထိခတ်သံများ ထွက်ပေါ်လာခဲ့ပြီး သောင်းနှင့်ချီသော မြားတံများမှာ ခံတပ်အတွင်းမှနေ၍ တစ်ဟုန်ထိုး ပစ်လွှင့်သွားတော့သည်။

"ဘုန်း ဘုန်း ဘုန်း"

အဆက်မပြတ်သော ပေါက်ကွဲသံများနှင့်အတူ သောင်းနှင့်ချီသော မြားတံများမှာ ရှေ့ဆုံးမှ ဒိုင်းလွှားလှည်းများကို ရိုက်ခတ်သွားခဲ့သော်လည်း၊ ယခင်ကအတိုင်းပင် ထိုဖျက်ဆီး၍ မရနိုင်သော စစ်ရထားလေး မြားတံများမှာ ဤအခိုက်အတန့်၌ လုံးဝအသုံးမဝင်ဘဲ ဖြစ်နေရပြန်သည်။

"မဟာထန်ရဲ့ စစ်ရထားလေးတွေကတော့ အသုံးမဝင်တော့ဘူးဟေ့"

"သူတို့တွေ ငါတို့ကို ဘာမှ မလုပ်နိုင်တော့ဘူး"

"ညီအစ်ကိုတို့ တက်ကြစမ်း"

"ဒီနေ့ဟာ ငါတို့တွေ နာမည်ကျော်ကြားဖို့နဲ့ ရာထူးတက်ဖို့ အခွင့်အရေးပဲ၊ ဒီနေ့မှာတင် မင်းသားတွေ မြို့စားတွေ ဖြစ်ရမယ်"

"အရှင်သခင်ရဲ့ အမိန့်တော် ရှိတယ်၊ မြို့ရိုးပေါ်ကို အရင်ဆုံး တက်နိုင်တဲ့သူကို ရွှေစင် တစ်သိန်း ချီးမြှင့်မယ့်အပြင်၊ မျိုးရိုးစဉ်ဆက် မြို့စားရာထူးကိုပါ ပေးအပ်မယ်"

...

ဤမြင်ကွင်းကို မြင်လိုက်ရသည့်အခါ ဒိုင်းလွှားလှည်းများ၏ အနောက်တွင်ရှိသော ယိုကျိုးစစ်သည်များ အားလုံးမှာ စိတ်လှုပ်ရှားစွာဖြင့် ဟိန်းဟောက်လိုက်ကြတော့သည်။

အနောက်ဘက်မှ မဟာမိတ်တပ်ဖွဲ့များမှာလည်း လှုံ့ဆော်မှုကို ခံလိုက်ရသည့်အလား တစ်ဦးချင်းစီမှာ အလွန်ပင် စိတ်လှုပ်ရှားနေကြပြီး ချီတက်မှု အရှိန်ကို မြှင့်တင်လိုက်ကြတော့သည်။

"စစ်ရထားလေး တပ်ဖွဲ့ အမိန့်ကို နာခံကြ၊ သုံးဖွဲ့ခွဲပြီး အလှည့်ကျ ပစ်ခတ်ကြစမ်း"

"ဗျူဟာပြောင်းမယ်၊ စစ်ရထားလေး ငါးစီးကို တစ်ဖွဲ့ဖွဲ့ပြီး ဒိုင်းလွှားလှည်း တစ်စီးတည်းကိုပဲ စုပြုံပြီး ပစ်ခတ်ကြစမ်း"

မြို့ရိုးပေါ်တွင် စုဟန်ရှင်း၏အမူအရာမှာ အေးစက်နေလျက် သူ၏ ဆံနွယ်များမှာ လေထဲ၌ လွင့်ပျံနေကာ၊ သူ၏အကြည့်များမှာ စူးရှနေလျက် မျက်နှာချင်းဆိုင်မှ အဆက်မပြတ် တိုးကပ်လာနေသော ဒိုင်းလွှားလှည်း တပ်ဖွဲ့ ကို စိုက်ကြည့်နေသည်။

စုဟန်ရှင်း၏ အမိန့်နှင့်အတူ၊ စိပ်လှသော၊ နားထဲ၌ ကျိန်းစပ်သွားစေမည့် ယန္တရားမောင်းတံသံများ ထွက်ပေါ်လာခဲ့ပြီး များပြားလှသော စစ်ရထားလေး တပ်ဖွဲ့ များသည်လည်း လိုက်ပါပြောင်းလဲသွားကြတော့သည်။

ဂျောက် ဂျောက် ဂျောက်

မြင့်မားလှသော မြို့ရိုးပေါ်တွင် ထက်မြက်လှသော မြားဖျားများမှာ လျင်မြန်စွာပင် လမ်းကြောင်း ပြောင်းလဲသွားကြပြီး ဦးတည်ချက် တစ်ခုတည်းသို့ ချိန်ရွယ်လိုက်ကြတော့သည်။

ဘုန်း ဘုန်း ဘုန်း

တောင်ပြိုသံ၊ ပင်လယ်လှိုင်းသံများအလား ဟိန်းဟောက်သံကြီးများနှင့်အတူ တတိယအသုတ် မြွေနဂါးနှယ် ရှိသော မြားတံများမှာ နိုင်ငံအသီးသီး၏ မဟာမိတ်တပ်ဖွဲ့ ဒိုင်းလွှားလှည်း တပ်ဖွဲ့ ဆီသို့ ထပ်မံ ပစ်လွှင့်သွားပြန်သည်။

မြားတံ ငါးစင်းကို တစ်ပြိုင်နက်တည်း ပစ်ခတ်ကာ မိုးကြိုးလျှပ်စီးနှယ် မြန်ဆန်လှသော အရှိန်ဖြင့် ဒိုင်းလွှားလှည်း တစ်စီးတည်းပေါ်သို့ ပြင်းထန်စွာ ရိုက်ခတ်လိုက်သည့်အခါတွင်မူ၊ နောက်ဆုံးတွင် ယခင်နှင့် လုံးဝ ကွဲပြားခြားနားလှသော ရလဒ်တစ်ခု ပေါ်ထွက်လာတော့သည်။

နားကွဲမတတ် စူးရှလှသော အသံကြီးနှင့်အတူ ခိုင်မာလှသော သံမဏိပြားမှာ ရုတ်တရက် အတွင်းသို့ ချိုင့်ဝင်သွားခဲ့ရသည်၊ ၎င်းမှာ ပြင်းထန်စွာ အရိုက်ခံလိုက်ရသော သံပြားတစ်ခုအလား ဖြစ်သွားပါသော်လည်း ဒိုင်းလွှားလှည်း တစ်ဆယ့်နှစ်စီးဖြင့် ဖွဲ့စည်းထားသော ပူးပေါင်းစစ်အစီအရင်ကိုမူ ဖောက်ထွက်နိုင်ခြင်း မရှိသေးပါချေ။

ဤမြင်ကွင်းကို မြင်တွေ့လိုက်ရသည့်အခါ မြို့ရိုးပေါ်ရှိ စုဟန်ရှင်း နှင့် ဗိုလ်ချုပ်များ အားလုံး၏ ရင်ထဲ၌ လေးလံသွားခဲ့ရ၏၊ ယိုကျိုးဘက်မှ ဤဒိုင်းလွှားလှည်းများ၏ ခိုင်မာမှုမှာ လူတိုင်း ထင်မှတ်ထားသည်ထက် များစွာပိုမိုသာလွန်နေပြီဖြစ်ရာ၊ စစ်ရထားလေး ငါးစီး၏ စုပေါင်း ပစ်ခတ်မှုဖြင့်ပင် ဤကာကွယ်ရေးကို မဖောက်နိုင်ခြင်းမှာ စုဟန်ရှင်းအနေဖြင့် ယခင်က လုံးဝ မထင်မှတ်ထားခဲ့သော အချက်ပင် ဖြစ်၏။

ယခုတစ်ကြိမ် ပြိုင်ဘက်မှာ ယခင်မည်သည့်အချိန်ကထက်မဆို ပို၍ရင်ဆိုင်ရ ခက်ခဲလှပေသည်။

သို့သော်လည်း ခဏတာအတွင်းမှာပင် စုဟန်ရှင်းသည် သတိဝင်လာခဲ့သည်။

"စစ်သည်တော် အားလုံး အမိန့်ကို နာခံကြ၊ ပစ်မှတ်ကို ပြောင်းမယ်၊ ဒိုင်းလွှားလှည်းတွေရဲ့ ဘီးတွေနဲ့ ဝင်ရိုးတွေကိုပဲ အစွမ်းကုန် ပစ်မှတ်ထားကြစမ်း"

စုဟန်ရှင်း၏ အမိန့်နှင့်အတူ စိပ်လှသော ယန္တရားမောင်းတံသံများ ထပ်မံထွက်ပေါ်လာခဲ့ပြီး စိပ်လှသော စစ်ရထားလေးများမှာလည်း လမ်းကြောင်း ပြောင်းလဲသွားပြန်သည်။

"ဝုန်း"

မည်သည့် နိမိတ်လက္ခဏာမျှ မရှိဘဲ၊ ရှေ့ဆုံးမှ ဒိုင်းလွှားလှည်း တစ်စီး၏ ဘယ်ဘက်ဘီးမှာ ဂျောက်ခနဲ အသံနှင့်အတူ မြားတံတစ်စင်း၏ ထိမှန်မှုကို ခံလိုက်ရကာ မျက်တောင်တစ်ခတ်အတွင်း ပေါက်ကွဲထွက်သွားတော့သည်၊ သစ်သားစများမှာ လေထဲ၌ လွင့်ပျံသွားခဲ့ပြီး ဧရာမ ဘီးကြီးမှာလည်း ပေပေါင်း ဆယ်နှင့်ချီ၍ မြင့်မားစွာ လွင့်တက်သွားတော့သည်။

ဒိုင်းလွှားလှည်း၏ အနောက်ဘက်တွင်မူ အံ့ဩတုန်လှုပ်သံများစွာ ထွက်ပေါ်လာတော့သည်။

ဒိုင်းလွှားလှည်း၏ ရှေ့မျက်နှာပြင်တွင် များပြားလှသော ကာကွယ်ရေး မန္တန်များနှင့် စစ်အစီအရင်များကို ထည့်သွင်းထားပါသော်လည်း၊ ထိုကဲ့သို့သော မန္တန်များနှင့် စစ်အစီအရင်များကိုမူ ဘီးများပေါ်တွင် ထည့်သွင်းနိုင်ခြင်း မရှိပါချေ၊ ပူးပေါင်းစစ်အစီအရင်က မည်မျှပင် အစွမ်းထက်ပါစေဦး၊ ဘီးများကို ပစ်မှတ်ထားသော ဤတိုက်ခိုက်မှုမျိုးကိုမူ တားဆီးနိုင်စွမ်း မရှိပါချေ။

အဆက်မပြတ်သော ပေါက်ကွဲသံကြီးများနှင့်အတူ၊ ဒိုင်းလွှားလှည်း တစ်စီးပြီးတစ်စီး၏ ဘီးများမှာ ကောင်းကင်ယံသို့ လွင့်တက်သွားကြတော့ရာ၊ ဘီးများ မရှိတော့သဖြင့် ထိုဒိုင်းလွှားလှည်းများမှာ မြေပြင်ပေါ်၌ တိုက်ရိုက်ပင် လှုပ်ရှား၍ မရတော့ဘဲ ဖြစ်သွားကြရပြီး၊ ခဏတာ အချိန်တိုအတွင်းမှာပင် ဒိုင်းလွှားလှည်း ရာနှင့်ချီ၍ လှုပ်ရှားမှု စွမ်းအားများ ဆုံးရှုံးသွားခဲ့ကာ အမှိုက်ပုံကြီးများအလား ဖြစ်သွားကြတော့သည်။

ဤမျှသာမကဘဲ၊ ပူးပေါင်းစစ်အစီအရင် အားလုံးမှာ ဒိုင်းလွှားလှည်း တစ်ဆယ့်နှစ်စီးကို တစ်ဖွဲ့ဖွဲ့ထားခြင်းဖြစ်ပေရာ၊ ဒိုင်းလွှားလှည်း တစ်စီးသာ လှုပ်ရှား၍ မရတော့ပါက စစ်အစီအရင် တစ်ခုလုံးမှာလည်း အလိုအလျောက် ပျက်ပြားသွားတော့သည်။

ဤမြင်ကွင်းကို မြင်လိုက်ရသည့်အခါ အဝေးဆီမှ အန်းလုရှန်း၏ နှုတ်ခမ်းထောင့်မှ အပြုံးမှာ ကြာရှည်မခံဘဲ လျင်မြန်စွာပင် ပျောက်ကွယ်သွားတော့သည်။

"မျက်နှာချင်းဆိုင်က အဲဒီစစ်ဗျူဟာမှူးက ဘယ်သူလဲ မင်း သိလား?"

အန်းလုရှန်းက သူ၏ မျက်နှာမှာ အလွန်ပင် မည်းမှောင်နေလျက် ရုတ်တရက် မေးမြန်းလိုက်လေသည်။

"စုဟန်ရှင်းပါ။ မဟာထန် ရဲ့ အသစ်တက်လာတဲ့ လူငယ် ဗိုလ်ချုပ် ဖြစ်သလို၊ မဟာထန် စစ်ရထားလေး တပ်ဖွဲ့ရဲ့ ခေါင်းဆောင်လည်း ဖြစ်ပါတယ်"

ဘေးနားမှ အသံတစ်ခု ထွက်ပေါ်လာခဲ့၏၊ ကောင်းရှန်းက ရုတ်တရက် စကားဆိုလိုက်ခြင်းဖြစ်ကာ သူ၏ အမူအရာမှာလည်း အလွန်ပင် လေးနက်နေတော့သည်။

ယခုအခါ ဝမ်ချောင်သည် မိမိကိုယ်တိုင် အစွမ်းထက်နေရုံသာမကဘဲ စစ်ဗျူဟာပိုင်း၌လည်း ထူးချွန်လှပေသည်။ သူ၏ဘေးနားတွင်လည်း ထိပ်တန်း ဗိုလ်ချုပ်များစွာ စုစည်းနေကြပြီဖြစ်ရာ စုဟန်ရှင်းမှာ သူတို့ထဲမှ တစ်ဦးပင် ဖြစ်တော့သည်။

ဒိုင်းလွှားလှည်း တပ်ဖွဲ့ကို ကိုင်တွယ်နိုင်မည့် နည်းလမ်းကို ရှာဖွေတွေ့ရှိရန်မှာ မခက်ခဲပါချေ၊ အဘယ်ကြောင့်ဆိုသော် မည်သည့်အရာမျှ ပြည့်စုံနေခြင်းမျိုး မရှိသောကြောင့်ပင်၊ သို့သော် အမှန်တကယ် စိုးရိမ်ရသည့် အချက်မှာ ပထမဆုံးအကြိမ် ပစ်ခတ်မှုမှ ယခုအထိ အချိန်မှာ အလွန်ပင် တိုတောင်းလွန်းလှပေရာ၊ လက်ဖက်ရည် တစ်ခွက်စာ အချိန်ပင် မပြည့်သေးမီမှာပင် စုဟန်ရှင်းက ဒိုင်းလွှားလှည်းတပ်ဖွဲ့ကို ကိုင်တွယ်နိုင်မည့် နည်းလမ်းကို ရှာဖွေတွေ့ရှိသွားခြင်းပင် ဖြစ်ရာ၊ ဤကဲ့သို့သော တုံ့ပြန်မှု အရှိန်မှာ ထိပ်တန်း ဗိုလ်ချုပ်များသာ ပိုင်ဆိုင်နိုင်သည့် အရာပင် ဖြစ်တော့သည်။

ဤကဲ့သို့သော အဆင့်ရှိသည့် ဗိုလ်ချုပ်မျိုးမှာ တစ်လောကလုံး၌ ရှာဖွေမည်ဆိုပါကလည်း များစွာရှိလိမ့်မည် မဟုတ်ပါချေ။

အနောက်ဘက်မှ တုံ့ပြန်မှုများကို ထားလိုက်ဦး၊ ဒိုင်းလွှားလှည်း တစ်စီးပြီးတစ်စီး မြေပြင်ပေါ်၌ လှုပ်ရှား၍ မရတော့သည်နှင့်အမျှ၊ စစ်ရထားလေး တပ်ဖွဲ့မှ စစ်သည်များ အားလုံးသည်လည်း ဒိုင်းလွှားလှည်း တပ်ဖွဲ့ ၏ အားနည်းချက်ကို သိရှိသွားကြပြီ ဖြစ်ရာ လျင်မြန်စွာပင် ပစ်မှတ်ကို ပြောင်းလဲလိုက်ကြတော့သည်၊ ခဏတာအတွင်းမှာပင် အဆက်မပြတ်သော နားကွဲမတတ် ပေါက်ကွဲသံကြီးများနှင့်အတူ ပိုမိုများပြားလှသော ဒိုင်းလွှားလှည်းများမှာ သံမဏိခံတပ် ရှေ့ ပေပေါင်း ရာနှင့်ချီ၍ ဝေးကွာသော နေရာတွင် လှုပ်ရှား၍ မရတော့ဘဲ ဖြစ်သွားကြရသည်။

သို့သော်ငြားလည်း စစ်ပွဲမှာ ရပ်တန့်သွားခြင်း မရှိသေးပါချေ။

"နောက်ထပ် လူအချို့ ထပ်လာကြစမ်း၊ ဒိုင်းလွှားလှည်းကို မပြီးတော့ ရှေ့ကို ဆက်တက်ကြစမ်း"

"စစ်ကြောင်း ပုံစံကို ပြောင်းမယ်၊ အနောက်ဘက်က တခြား ဒိုင်းလွှားလှည်းတွေကို ယူပြီး ရှေ့ကို ဆက်တက်ကြစမ်း"

"ကာကွယ်ရေးကို သတိထားကြ၊ တစ်ဖက်လူကို ဘီးတွေကို ပစ်ခတ်ခွင့် မပေးနဲ့"

...

ရှေ့တန်း စစ်မျက်နှာမှနေ၍ တစ်ချက်ပြီးတစ်ချက် အော်ဟစ်သံများ ထွက်ပေါ်လာတော့သည်။

ကြီးမားလှသော စစ်မြေပြင်မှာ အလွန်ပင် တင်းမာနေလျက်ရှိပြီး အခြေအနေမှာ ပေါက်ကွဲထွက်တော့မည့် အဆင့်သို့ ရောက်ရှိနေပြီ ဖြစ်၏၊ ဒိုင်းလွှားလှည်း တပ်ဖွဲ့၏ နေရာမှနေ၍ လှမ်းကြည့်လိုက်မည်ဆိုပါက မျက်နှာချင်းဆိုင်ရှိ မဟာထန် သံချပ်ကာဝတ် စစ်သည်တော်များကိုပင် ရှင်းလင်းစွာ မြင်တွေ့နေရပေသည်။

ယခုအချိန်အထိ ထိုစစ်တပ်ကြီးမှာ ကျောက်ရုပ်များနှယ် လှုပ်ရှားခြင်းမရှိဘဲ တည်ငြိမ်စွာ ရှိနေကြဆဲပင်။

ဤမျှလောက် နီးကပ်လှသော အကွာအဝေးမှာ လူတိုင်း၏ ရင်ထဲမှ သတ်ဖြတ်လိုသော စိတ်များကို နှိုးဆွပေးလိုက်ပြီဖြစ်ရာ၊ အောင်မြင်မှုမှာ မျက်စိရှေ့သို့ ရောက်ရှိနေပြီဖြစ်သဖြင့် လူတိုင်းက ဤအခိုက်အတန့်၌ အလွယ်တကူ လက်လွှတ်ရန် မည်သို့ ဖြစ်နိုင်ပါမည်နည်း။

များမကြာမီမှာပင် ထိုအော်ဟစ်သံများနှင့်အတူ ရှေ့ဆုံးမှ ဒိုင်းလွှားလှည်း တပ်ဖွဲ့ များမှာ လျင်မြန်စွာပင် ပြောင်းလဲသွားတော့သည်၊ စက်ဝိုင်းပုံစံ ဒိုင်းလွှားလှည်း စစ်ကြောင်းများမှာ ဒုတိယအကြိမ် ပြန်လည်ပေါင်းစပ်လိုက်ကြပြီး၊ ဘီးများ ပျက်စီးသွားသော လှည်းများကို ထိုနေရာ၌ပင် စွန့်ပစ်ခဲ့ကာ အသစ် ဖွဲ့စည်းလိုက်သော ဒိုင်းလွှားလှည်း စစ်ကြောင်းများမှာ ရှေ့သို့ ဆက်လက် တိုးဝင်လာကြတော့သည်။

ဒိုင်းလွှားလှည်းများပေါ်တွင် ထွင်းထုထားသော စစ်အစီအရင်များနှင့် မန္တန်များမှာ မူလကတည်းကပင် အတူတူပင်ဖြစ်သဖြင့် အများအပြားမှာ အစားထိုး အသုံးပြု၍ ရပေသည်။ ဤသို့ လုပ်ဆောင်ရခြင်း၏ ရည်ရွယ်ချက်မှာလည်း ဒိုင်းလွှားလှည်း တပ်ဖွဲ့အနေဖြင့် ဤကဲ့သို့သော အဆင့်ရှိသည့် တိုက်ပွဲမျိုးတွင် အနည်းငယ်မျှ ထိခိုက်မှုများ ရှိလာနိုင်သည်ကို မင်း ကြိုတင် စဉ်းစားထားခဲ့ခြင်းကြောင့်ပင်။

ဤသို့ဖြင့် ဒိုင်းလွှားလှည်းတပ်ဖွဲ့ ခံစားရသော ထိုးနှက်မှုများကို အနည်းဆုံးသို့ လျှော့ချနိုင်မည်ဖြစ်ပြီး၊ အခြေအနေတစ်ခုလုံးနှင့် စစ်ဆင်ရေး အစီအစဉ် တစ်ခုလုံးကိုလည်း ထိခိုက်မှု မရှိစေရန် လုပ်ဆောင်နိုင်ခြင်းပင် ဖြစ်တော့သည်။

"ဟွန်း… လူသားတွေဆိုတာ လူသားတွေပါပဲ၊ အရာရာကို အရိုးရှင်းဆုံးပဲ တွေးနေကြတာပဲ၊ အကယ်၍ ပူးပေါင်းစစ်အစီအရင်က ဒီလောက်လွယ်လွယ်နဲ့ ဖျက်ဆီးခံရမယ်ဆိုရင် ဘာမှ တန်ဖိုးရှိတော့မှာ မဟုတ်ဘူး"

စစ်တပ်အင်အား သန်းနှင့်ချီသော လူအုပ်ကြီးကြားတွင် ရှန့်ကုန်းအကြီးအကဲသည် အနက်ရောင် ဝတ်စုံကို ဆင်မြန်းထားလျက် ဒိုင်းလွှားလှည်း တပ်ဖွဲ့ များမှာ လျင်မြန်စွာပင် စနစ်တကျ ပြန်လည်ဖြစ်သွားခဲ့ကာ ရှေ့သို့ ဆက်လက် တိုးဝင်နေသည်ကို မြင်တွေ့လိုက်ရသည့်အခါ မနေနိုင်ဘဲ အေးစိမ့်စွာ ပြုံးလိုက်မိသည်။

အဖွဲ့အစည်းအတွင်းရှိ တည်ဆောက်ရေးပိုင်း၌ ကျွမ်းကျင်သော အကြီးအကဲ တစ်ဦး ဖြစ်သည့်အလျောက်၊ ရှန့်ကုန်းအကြီးအကဲ သည် သိုင်းပညာ၌ ကျွမ်းကျင်သော ရှန့်ကျွင်းများနှင့် ထိုက်မျိုးနွယ်စုဝင် ထိပ်တန်း ကျွမ်းကျင်သူ ၁၂ ဦးကို မယှဉ်နိုင်ပါသော်လည်း၊ အဖွဲ့အစည်းအတွင်း၌မူ မည်သူနှင့်မျှ အစားထိုး၍ မရနိုင်သော ထူးခြားလှသည့် အဆင့်အတန်းတစ်ခုကို ပိုင်ဆိုင်ထားပေသည်။

အကြောင်းပြချက်မှာ အလွန်ပင်ရိုးရှင်းလှပေသည်။ အဘယ်ကြောင့်ဆိုသော် သူ ဦးဆောင်သော ထိုလက်မှုပညာရှင်များမှာ အဓိကအားဖြင့် လောကီနယ်ပယ်ရှိ ခွန်အားများနှင့် လောကီနယ်ပယ်ရှိ စစ်ပွဲများကို ပစ်မှတ်ထားခြင်းဖြစ်ကာ၊ ၎င်းမှာ အင်ပါယာ တစ်ခုကို ပြောင်းလဲနိုင်စွမ်း ရှိသည့် ကြီးမားလှသော ခွန်အားတစ်ခုပင် ဖြစ်၏။

ပို၍အရေးကြီးသည်မှာ ထျန်း၏ သန့်စင်ခြင်း အစီအစဉ်မှာ မင်းတို့လို ထိပ်တန်း လက်မှုပညာရှင်များနှင့် မကင်းနိုင်သောကြောင့်ပင်။

နတ်ဘုရား၏ အစေခံများ ဖြစ်ကြသည့်အလျောက် သူတို့၏ခွန်အားမှာ ထိုလူသားများ လုံးဝမယှဉ်နိုင်သော အရာပင် ဖြစ်တော့သည်။

သို့သော်လည်း ရှန့်ကုန်းအကြီးအကဲ၏ ကျေနပ်လှသောအပြုံးမှာ နှုတ်ခမ်းထောင့်တွင် ပေါ်ထွက်လာရုံမျှသာ ရှိသေးသော်လည်း၊ နောက်တစ်ခဏ၌ ရှေ့တန်း စစ်မျက်နှာတွင် အပြောင်းအလဲ အသစ်တစ်ခု ထပ်မံ ပေါ်ထွက်လာတော့သည်။

******