အခန်း (၂၀၂)

အခန်း ၂၀၂ -အနက်ရောင် မိုးကြိုးနဂါးကြီး။တစ်လောကလုံးကို တုန်ဟည်းသွားစေသည့် ရိုက်ခတ်မှုစွမ်းအား။

ကောင်းကင်ယံ၏ အနက်ရှိုင်းဆုံးနေရာတွင်နက်မှောင်လှသော မိုးကြိုးတိမ်တိုက်ကြီးအတွင်း၌ ကြောက်မက်ဖွယ်ကောင်းသော စွမ်းအားများကို သယ်ဆောင်ထားသည့် မည်းနက်သော မိုးကြိုးလျှပ်စီးများ ရှိနေသည်။

လင်းချန်၏ စိန်ခေါ်မှုကို သိရှိသွားသည့်အလား ထိုမိုးကြိုးတိမ်တိုက်ကြီးမှာ ပိုမိုပြင်းထန်စွာ တုန်ခါလာပြီး လောကနိယာမများကိုပင် ကမောက်ကမ ဖြစ်စေတော့သည်။

"ဂျိန်းးး"

မိုးကြိုးတိမ်တိုက်ကြီးအတွင်းမှ ပြင်းထန်သော ဟိန်းဟောက်သံကြီးနှင့်အတူ မိုင်ပေါင်းထောင်ချီ ရှည်လျားသောအနက်ရောင်မိုးကြိုးနဂါးကြီး တစ်ကောင် ပေါ်ထွက်လာသည်။

၎င်း၏ ကြောက်မက်ဖွယ်ကောင်းသော မျက်လုံးအစုံက လင်းချန်ကို သားကောင်တစ်ကောင်ကဲ့သို့ စိုက်ကြည့်နေပြီး ဝါးမျိုရန် အခွင့်အရေး ရှာနေသကဲ့သို့ပင်။

လင်းချန်သည် ထိုမြင်ကွင်းကို ကြည့်ကာ အံ့သြသွားမိသည်။ ဤမဟာဧကရာဇ်မိုးကြိုးဘေးဒုက္ခသည် ယခင်က ကြုံတွေ့ခဲ့ရသော ဘေးဒုက္ခများနှင့် လုံးဝမတူဘဲ စစ်မှန်သော အန္တရာယ်ကိုပါ ခံစားရစေသည်။

'မဟာဧကရာဇ်အဆင့် မတိုင်ခင်က မိုးကြိုးဘေးဒုက္ခတွေက တာအိုပြည်နယ် ၃၀၀၀ ရဲ့ ကောင်းကင်ဘုံနိယာမအောက်မှာ ရှိပေမဲ့... အခု မဟာဧကရာဇ် မိုးကြိုးဘေးဒုက္ခက ကောင်းကင်ဘုံနိယာမရဲ့ ထိန်းချုပ်မှုအပြင်ဘက်ကို ရောက်သွားပြီ ထင်တယ်...'

လင်းချန်၏ နှုတ်ခမ်းထောင့်များ ကွေးညွတ်သွားပြီး ခပ်ပြုံးပြုံးပင်ဖြစ်သွားသည်။ အကယ်၍ ထိုသို့ဆိုလျှင် ယခင်ကလို လွယ်လွယ်ကူကူ ဖြတ်ကျော်၍ရမည်မဟုတ်ဘဲ ထိပ်တိုက်ရင်ဆိုင်ရပေတော့မည်။

သို့သော် ဤသည်ကပင် သူအလိုရှိသောအရာ မဟုတ်ပါလား။ မဟာဧကရာဇ်အဆင့်ကို ရောက်ပြီးကတည်းက စွမ်းအားအသစ်ကို စမ်းသပ်ရန် အခွင့်အရေး မရသေးရာ ယခု တားမြစ်နယ်မြေများကို မနှိမ်နင်းမီ ဤမိုးကြိုးဘေးဒုက္ခကို သွေးပူလေ့ကျင့်ခန်းအဖြစ် အသုံးချရပေမည်။

အထူးသဖြင့် လင်းချန်၏ ဝိညာဉ်အင်အား သည်လည်း မဟာဧကရာဇ်အဆင့်သို့ ရောက်ရှိသွားပြီဖြစ်ရာ သူ၏ ကျင့်ကြံမှုသုံးမျိုးအနက် ခန္ဓာကိုယ်ကျင့်ကြံမှု တစ်ခုတည်းသာ ဧကရာဇ်အဆင့်သို့ မရောက်သေးပေ။

လက်တစ်ကမ်းအလိုသာ လိုတော့သည့် ထိုခန္ဓာကိုယ်ကျင့်ကြံမှုကိုလည်း ဤမိုးကြိုးဘေးဒုက္ခ၏ အကူအညီဖြင့် တစ်ပါတည်း ချိုးဖျက်ဝင်ရောက်နိုင်ရန် သူ မျှော်လင့်ထားသည်။

"ဝူးးး"

မိုးကြိုးနဂါးနက်ကြီးသည် ၎င်း၏ ကြီးမားလှသော ခန္ဓာကိုယ်ကို လှုပ်ခါပြီး လင်းချန်ရှိရာသို့ တဟုန်ထိုး ပြေးဝင်လာသည်။

၎င်းဖြတ်သန်းရာ လမ်းကြောင်းရှိ ဟင်းလင်းပြင်များပင် အက်ကွဲကြောင်းများ ဖြစ်ပေါ်ကုန်သည်။

လင်းချန်သည် မိမိအပေါ်သို့ ကျရောက်လာသော ဖိအားများကို ခံစားရင်း စိုးရိမ်ရမည့်အစား အလွန်ဝမ်းသာသွားသည်။ ဤသည်က သူစောင့်ဆိုင်းနေသော ပြိုင်ဘက်မျိုးပင်။

"လာစမ်းးး"

လင်းချန်သည် အော်ဟစ်လိုက်ရင်း ရှောင်ကွင်းခြင်းမပြုဘဲ ကောင်းကင်ယံသို့ ခြေလှမ်းကာ နဂါးနက်ကြီးထံသို့ တိုက်ရိုက် တိုးဝင်သွားသည်။

သူသည် မည်သည့် ဧကရာဇ်လက်နက်ကိုမျှ မထုတ် ဆင့်ခေါ်သလို ကာကွယ်ရေးစွမ်းအားများကိုလည်း မသုံးဘဲ မိမိကိုယ်ကို ဖရိုဖရဲနိယာမဖြင့်သာ လွှမ်းခြုံ၍ ရိုးရှင်းသော လက်သီးတစ်ချက်ကို ထိုးလိုက်တော့သည်။

မိုင်ပေါင်းထောင်ချီ ရှည်လျားသော နဂါးကြီးနှင့် ယှဉ်လျှင် လင်းချန်၏ ခန္ဓာကိုယ်မှာ သဲပွင့်လေးတစ်ခုကဲ့သို့ သေးငယ်လှသော်လည်း သူထုတ်ဖော်လိုက်သော စွမ်းအားမှာ နဂါးကြီးထက်ပင် အဆပေါင်းများစွာ ပိုမိုပြင်းထန်နေသည်။

"ဂုန်းးးး"

"ဝုန်းး"

နဂါးကြီး၏ ထက်မြက်လှသော လက်သည်းများနှင့် လင်းချန်၏ လက်သီးတို့ ထိပ်တိုက်တွေ့ဆုံသွားကြသည်။ ထိုခဏချင်းမှာပင် ကြောက်မက်ဖွယ်ကောင်းသော ရိုက်ခတ်မှုလှိုင်း များသည် ပတ်ဝန်းကျင်ရှိ အရာအားလုံးကို မှုန့်မှုန့်ညက်ညက် ကြေမွသွားစေသည်။

ထိုကြောက်မက်ဖွယ်ကောင်းသော စွမ်းအင်လှိုင်းများသည် အောက်ရှိ ရှေးဟောင်းလင်းမိသားစု ဆီသို့ပါ ဦးတည်၍ ကျဆင်းလာရာ လင်းမိသားစုတစ်ခုလုံး ပြာကျသွားမည့်အရေးနှင့် ရင်ဆိုင်လိုက်ရသည်။

ဤမြင်ကွင်းကို ကြည့်ပြီး လင်းဟောက်ရန် နှင့် အခြားသော ဧကရာဇ်တစ်ပိုင်း ပညာရှင်များ၏ မျက်နှာများ ပျက်သွားကာ ချက်ချင်းပင် ကောင်းကင်သို့ ပျံတက်၍ လင်းမိသားစု၏ မြို့စောင့်အစီအရင်ကြီး ကို အစွမ်းကုန် ဆင့်ခေါ်လိုက်ကြသည်။

"ဒိုင်း ဒိုင်း ဒိုင်း"

ဧကရာဇ်တစ်ပိုင်း ပညာရှင်များစွာ၏ စွမ်းအားဖြင့် မြို့စောင့်အစီအရင်ကြီးက လင်းမိသားစုတစ်ခုလုံးကို အချိန်မီ ကာကွယ်ပေးနိုင်ခဲ့သည်။

သို့သော် လင်းချန်နှင့် နဂါးကြီး တိုက်ခိုက်မှုမှ ထွက်ပေါ်လာသော အကြွင်းအကျန် စွမ်းအင်လှိုင်းများ အစီအရင်ပေါ်သို့ ကျရောက်လာသောအခါ ဧကရာဇ်တစ်ပိုင်းထိပ်ဆုံးအဆင့် ပညာရှင် ၁၀ ကျော်ကိုပင် ခံနိုင်ရည်ရှိသည့် အစီအရင်ကြီးပေါ်တွင် အက်ကွဲကြောင်းများပေါ်ပေါက်လာတော့သည်။

လင်းမိသားစုဝင်များနှင့် ဧည့်သည်တော်များအားလုံး ထိတ်လန့်တုန်လှုပ်သွားကြသည်။

အကယ်၍သာ အစီအရင်ကြီးကို အချိန်မီ မဖွင့်နိုင်ခဲ့လျှင် သူတို့အားလုံး ပုရွက်ဆိတ်များကဲ့သို့ ပျောက်ကွယ်သွားမည်မှာ အသေအချာပင်။

ဤသည်မှာ မဟာဧကရာဇ်မိုးကြိုးကပ်ဘေး၏ ကြောက်မက်ဖွယ် စွမ်းအားပင် ဖြစ်သည်။

လင်းဟောက်ရန်၊ လင်းရှောင်ကျိနှင့် အခြားပညာရှင်များ သက်ပြင်းချနိုင်သော်လည်း စိုးရိမ်စိတ်က မပြယ်သေးပေ။

ယခင်က လင်းချန် မိုးကြိုးကပ်ဘေးခံယူလျှင် ကောင်းကင်ဘုံ၏ ဆုလာဘ်အဖြစ် စွမ်းအင်များသာ စုပ်ယူရသော်လည်း ယခု မဟာဧကရာဇ်အဆင့်တွင်မူ စစ်မှန်သော ရင်ဆိုင်တိုက်ခိုက်မှု ဖြစ်နေသည်။

လင်းဟောက်ရန်က အောက်ရှိ ကွင်းပြင်သို့ ကြည့်ကာ လေးနက်သောအသံဖြင့် အော်ပြောလိုက်သည်။

"မိတ်ဆွေတို့... လင်းမိသားစုကို ကာကွယ်ဖို့ မြို့စောင့်အစီအရင်ထဲကို ခင်ဗျားတို့ရဲ့ စွမ်းအင်တွေ ထည့်ပေးကြပါ။"

ပြောပြီးသည်နှင့် သူ၏ ကိုယ်တွင်းစွမ်းအင်များကို အစီအရင်ထဲသို့ ပို့လွှတ်လိုက်သည်။

လင်းရှောင်ကျိနှင့် အခြားပညာရှင်များလည်း ထိုနည်းတူ ပြုလုပ်ကြသည်။ စားသောက်ပွဲရှိ အခြားအဖွဲ့အစည်းအသီးသီးမှ ရောက်လာကြသော ပညာရှင်များမှာလည်း မတွန့်ဆုတ်တော့ဘဲ ကောင်းကင်သို့ ပျံတက်ကာ အစီအရင်ကြီး ခိုင်ခံ့စေရန် သူတို့၏ စွမ်းအင်များကို စုပေါင်းပံ့ပိုးပေးလိုက်ကြရာ အစီအရင်ကြီးမှာ ပိုမိုတောက်ပပြီး အက်ကွဲကြောင်းများ ပြန်လည်စေ့သွားတော့သည်။

"ဒိုင်း ဒိုင်း ဒိုင်း"

ထိုသို့ စုပေါင်းခုခံနေစဉ်မှာပင် ပညာရှင်အားလုံးသည် ကောင်းကင်ထက်ရှိ လင်းချန်၏ လှုပ်ရှားမှုကို အသည်းတယားယားဖြင့် စောင့်ကြည့်နေကြသည်။

ကောင်းကင်ယံထက်တွင်မူ...

လင်းချန်နှင့် မိုးကြိုးနဂါးကြီးတို့သည် စက္ကန့်အနည်းငယ်မျှ ကြံ့ကြံ့ခံ တိုက်ခိုက်နေကြပြီးနောက်

"ဝုန်းးး"

တစ်လောကလုံးကို တုန်ဟည်းသွားစေသည့် ပေါက်ကွဲသံကြီးနှင့်အတူ လင်းချန်၏ သေးငယ်သော ခန္ဓာကိုယ်သည် အပေါ်သို့ တဟုန်ထိုး တက်လှမ်းသွားပြီး မိုင်ပေါင်းထောင်ချီ ရှည်လျားလှသော မိုးကြိုးနဂါးနက်ကြီး၏ ခန္ဓာကိုယ်ကြီးကိုမူ အနောက်သို့ လွင့်စင်ထွက်သွားအောင် ရိုက်ချပစ်လိုက်ပါတော့သည်။

၎င်းသည် သဲပွင့်လေးတစ်ခုက ကြီးမားလှသော နေမင်းကြီးကို မှောက်လှန်ပစ်လိုက်သကဲ့သို့ပင်... တကယ့်ကို အံ့သြတုန်လှုပ်ဖွယ် ကောင်းလှပေသည်။