အခန်း ၇၇၁

အခန်း (၇၇၁) - အဆုံးမဲ့မိုးကြိုးပင်လယ် ဓမ္မသဏ္ဌာန်၊ အဆင့်မြင့် ကောင်းကင်အဆင့်ဝိညာဉ်ရတနာ ဟွေကွမ်နတ်ဘုရားကြေးမုံ၊ မိုးကြိုးအင်မော်တယ်စံအိမ်တော်၏ အခွင့်အရေး(၁)။

"ဒီလိုကိုး...”

"ဒီအဆင့်မြင့် ကောင်းကင်အဆင့်ဝိညာဉ်ရတနာ ဟွေကွမ်နတ်ဘုရားကြေးမုံသာ ရှိနေမယ်ဆိုရင် အဲဒီနတ်ဘုရားအသွင်ပြောင်းအဆင့် ကျင့်ကြံသူကို ဖြေရှင်းဖို့က လက်ဖဝါးလှန်လိုက်သလို လွယ်ကူသွားမှာပဲ...”

ထိုစကားကို ကြားလိုက်ရချိန်တွင် ရုပ်သေးမျိုးနွယ်စုမှ လေဟာနယ်သန့်စင်ခြင်းအဆင့် နှစ်ဦးမှာ အလိုအလျောက် ခေါင်းညိတ်လိုက်မိကြသည်။

အမှန်တကယ်တွင် ၎င်းတို့အနေဖြင့် လူသားမျိုးနွယ်မှ နတ်ဘုရားအသွင်ပြောင်းအဆင့်များအား ရက်စက်စွာ သတ်ဖြတ်ခြင်းမှာ လက်ဖဝါးလှန်လိုက်သကဲ့သို့ လွယ်ကူသောအရာ ဖြစ်ပေ၏။

သို့သော်လည်း တစ်ဖက်လူ ရုန်းကန်သည့်အချိန်၌ အခြားသော ကျင့်ကြံသူများ၏ အာရုံစိုက်မှုကို ဆွဲဆောင်သွားမည်ကိုသာ စိုးရိမ်ရခြင်း ဖြစ်သည်။

ထိုသို့ဖြစ်လာပါက တစ်မြို့လုံးမှ ၎င်းတို့အား အလိုရှိသူများအဖြစ် ကြေညာခံရပေမည်။

ထိုအခါ ၎င်းတို့သည်လည်း ထိုသူနှင့်အတူ အသေခံရလောက်ချေ၏။

၎င်းတို့သည် အစောကတည်းက အသေခံရန် ပြင်ဆင်ထားပြီးဖြစ်သော်လည်း ဤကဲ့သို့ အဓိပ္ပာယ်မဲ့သော စတေးမှုမျိုးကိုမူ ပြုလုပ်ရန် မလိုအပ်ပေ။

အကယ်၍ အသက်ရှင်သန်နိုင်မည့် အခွင့်အရေးရှိနေပါက မည်သူကများ သေချင်ပါမည်နည်း။

ဘန်း...။

ထိုအချိန်မှာပင် ကြောက်မက်ဖွယ်ကောင်းသော နယ်ပယ်စွမ်းအားတစ်ခုက ဖိချလာပြီး ကွေ့ဝူယီ၊ ကွေ့ဝူအာ၊ ကွေ့ဝူဆန်း စသည့် လေဟာနယ်သန့်စင်ခြင်းအဆင့် သက်ရှိသုံးဦး၏ ခန္ဓာကိုယ်ထက်သို့ ချက်ချင်းဆိုသလို လွှမ်းခြုံသွားလေသည်။

ဤသည်မှာ ကြီးမားလှသော တောင်ကြီးတစ်လုံးက ဖိချလိုက်သကဲ့သို့ဖြစ်ကာ ပတ်ဝန်းကျင်ရှိ ကောင်းကင်နှင့်မြေကြီး စိတ်ဝိညာဉ်ချီများကိုပါ ချုပ်နှောင်သွားသည်။

ထို့ကြောင့် ၎င်းတို့၏ ခန္ဓာကိုယ်များမှာ လှုပ်ရှား၍မရနိုင်တော့ချေ။

"ဘယ်သူလဲ...”

ချက်ချင်းဆိုသလိုပင် ကွေ့ဝူယီအစရှိသော လေဟာနယ်သန့်စင်ခြင်းအဆင့် ရုပ်သေးသက်ရှိများ၏ မျက်နှာများမှာ ပြောင်းလဲသွားလေသည်။ ၎င်းတို့သည် မည်သည့်အရာ ဖြစ်ပျက်သွားသည်ကို လုံးဝမသိရှိကြသကဲ့သို့၊ အဘယ်ကြောင့် ဤကဲ့သို့ ရုတ်တရက် တိုက်ခိုက်ခံလိုက်ရသည်ကိုလည်း နားမလည်နိုင်ဖြစ်နေကြ၏။

၎င်းတို့၏ လှုပ်ရှားမှုများမှာ အလွန်လျှို့ဝှက်လွန်းလှပြီး ပစ်မှတ်ထားသူ၏ နေအိမ်အနီးသို့ပင် မကပ်ရသေးသည်ကို သိထားရမည် ဖြစ်၏။

သို့သော်လည်း ယခုအချိန်၌ ရန်သူ၏ ဝင်ရောက်တိုက်ခိုက်ခြင်းကို ခံလိုက်ရသည်မှာ အမှန်တကယ်ပင် စိတ်ကူးယဉ်နိုင်စွမ်းထက် ကျော်လွန်နေပေသည်။

၎င်းတို့အား ပို၍ထိတ်လန့်သွားစေသည်မှာ အမှတ် (၈၈) တာအိုကျောင်းတော် တစ်ခုလုံး၏ အကာအကွယ်အစီအရင်သည် ချက်ချင်းဆိုသလို ပွင့်လာပြီး ဤနယ်မြေတစ်ခုလုံးကို လွှမ်းခြုံကာ အလွှာလေးထပ်ပါဝင်သော အကာအကွယ်အစီအရင်အဖြစ်သို့ ပြောင်းလဲသွားခြင်းကြောင့်ပင်။

ဤနယ်မြေသည် မျက်စိတစ်မှိတ်အတွင်းမှာပင် သီးခြားနေရာလွတ်တစ်ခုအဖြစ်သို့ ပြောင်းလဲသွားလေသည်။

ဤနေရာလွတ်အတွင်း၌ မည်သည့်အရာပင် ဖြစ်ပျက်နေသည်ဖြစ်စေ အပြင်ဘက်ရှိ မည်သူမျှ သိရှိနိုင်မည်မဟုတ်ပေ။

ဤသည်မှာ ဆဋ္ဌမအဆင့်အစီအရင်၏ အစွမ်းထက်လှသော အချက်ပင်ဖြစ်၏။

"ချီးတဲ့မှ... တကယ်ကြီး ဆဋ္ဌမအဆင့်အစီအရင်လား...”

"အမှတ် (၈၈) တာအိုကျောင်းတော်က ဘယ်အချိန်ကတည်းက ဆဋ္ဌမအဆင့်အစီအရင်ကို ခင်းကျင်းထားတာလဲ...”

"ဒီနေရာမှာ အလွန်ဆုံးမှ ပဉ္စမအဆင့်အစီအရင်ပဲ ရှိတာမဟုတ်ဘူးလား။ ဘယ်အချိန်က ဒီလို မဟာအစီအရင်ကြီးကို ပြောင်းလဲလိုက်တာလဲ...”

လေဟာနယ်သန့်စင်ခြင်းအဆင့် ရုပ်သေးသက်ရှိသုံးဦး၏ မျက်ဆံများမှာ ကျုံ့ဝင်သွားပြီး လုံးဝကို မယုံကြည်နိုင်ဖြစ်နေကြ၏။

၎င်းတို့သည် ယခင်က သတင်းအချက်အလက်များကို စုံစမ်းခဲ့ဖူးရာ တာအိုကျောင်းတော်ဆိုသည်မှာ အလွန်ဆုံးမှ ပဉ္စမအဆင့်အစီအရင်သာ ရှိသည်ဟု သိထားခဲ့ကြလေသည်။

အဘယ်ကြောင့်ဆိုသော် ဆဋ္ဌမအဆင့်အစီအရင်တစ်ခု ခင်းကျင်းရန် လိုအပ်သော အစီအရင်ပစ္စည်းများမှာ သာမန် တာအိုကျောင်းတော်တစ်ခု တတ်နိုင်သောအရာ မဟုတ်သောကြောင့်ပင်။

အစီအရင်ပစ္စည်းများကို တတ်နိုင်လျှင်ပင် ဆဋ္ဌမအဆင့် အစီအရင်သခင်တစ်ဦးအား ဖိတ်ခေါ်ရန်အတွက် ပေးဆပ်ရမည့် တန်ဖိုးမှာလည်း အလွန်ကြီးမားလှပေရာ၊ မည်သည့် တာအိုကျောင်းတော်ကမျှ ထိုငွေကို နှမြောတွန့်တိုခြင်းမရှိ သုံးစွဲနိုင်မည်မဟုတ်ပေ။

သို့ဖြစ်ရာ ယခုအချိန်၌ အမှတ် (၈၈) တာအိုကျောင်းတော်တွင် ဆဋ္ဌမအဆင့်အစီအရင်တစ်ခု ပေါ်လာခြင်းမှာ အမှန်တကယ်ပင် စိတ်ကူးယဉ်နိုင်စွမ်းထက် ကျော်လွန်နေလေသည်။

ဤသည်က ၎င်းတို့၏ တွေးထင်ထားမှုထက် ကျော်လွန်နေခဲ့၏။

ဤနေရာတွင် ဆဋ္ဌမအဆင့်အစီအရင် ပေါ်လာရခြင်းမှာ ကျိုးစွေ့နှင့် သဘာဝကျကျ ပတ်သက်နေလေသည်။

အမှတ် (၈၈) တာအိုကျောင်းတော်သည် သူ၏ပိုင်နက်ဖြစ်ရာ အစောကတည်းက သံစည်ပိုင်းတစ်ခုကဲ့သို့ လုံခြုံနေအောင် တည်ဆောက်ထားခဲ့ခြင်း ဖြစ်ပေ၏။

သူသည် ဆဋ္ဌမအဆင့်အစီအရင်သခင် ဖြစ်လာပြီးကတည်းက အမှတ် (၈၈) တာအိုကျောင်းတော်အတွင်းရှိ တောင်စောင့်မဟာအစီအရင်ကို တိတ်တဆိတ် ပြောင်းလဲခဲ့လေသည်။

ထိုတောင်စောင့်မဟာအစီအရင်ကြီးမှာ ဆဋ္ဌမအဆင့် အထွတ်အထိပ် အစီအရင်ဖြစ်သော 'ဓာတ်ငါးပါးရွှီမီအစီအရင်' အဖြစ်သို့ အဆင့်တက်သွားခဲ့၏။

ဤသို့ဖြင့် ရန်သူများ ဝင်ရောက်တိုက်ခိုက်လာပါကလည်း ရန်သူများအနေဖြင့် ကြီးမားသော ဆုံးရှုံးမှုများနှင့် ရင်ဆိုင်ရရန် လုံလောက်နေပြီဖြစ်၏။

အမှန်တကယ်တွင် ဤသည်မှာ ကျိုးစွေ့အနေဖြင့် သူ့ကိုယ်သူ ကာကွယ်ရန် နည်းလမ်းတစ်ခုအနေဖြင့်သာ ပြုလုပ်ထားခဲ့ခြင်း ဖြစ်ပေသည်။

မြို့တော်အတွင်း၌ လူသတ်ရန်အတွက် တစ်လောကလုံး၏ ပြစ်တင်ရှုတ်ချခံရမည့်အန္တရာယ်ကို အမှန်တကယ် လျစ်လျူရှုရဲသူများ ရှိနေလိမ့်မည်ဟု မည်သူကများ ထင်ထားပါမည်နည်း။

ထို့အပြင် ရန်သူမှာ လေဟာနယ်သန့်စင်ခြင်းအဆင့် ဘိုးဘေးများပင် ဖြစ်နေသေး၏။

ရှုထောင့်တစ်မျိုးမှ ကြည့်မည်ဆိုလျှင် ကျိုးစွေ့၏ ဆုံးဖြတ်ချက်မှာ အတော်လေး မှန်ကန်နေခဲ့သည်။

အကယ်၍သာ ဆဋ္ဌမအဆင့်အစီအရင်ကို ပြင်ဆင်ထားခြင်းမရှိပါက အတိုင်းအတာတစ်ခုအထိ အန္တရာယ်ရှိသွားနိုင်ချေသည်။

"ကျိုးစွေ့... ငါတို့ကို တိုက်ခိုက်နေတာ ကျိုးစွေ့ဆိုတဲ့ ကောင်လေးပဲ...”

ကွေ့ဝူယီက ချက်ချင်းပင် အော်ဟစ်လိုက်လေသည်။

၎င်းသည် ဤနေရာ၌ ပေါ်လာသောပုံရိပ်မှာ ယခုတစ်ကြိမ် ၎င်းတို့၏ ပစ်မှတ်ဖြစ်သော ကျိုးစွေ့ပင်ဖြစ်ကြောင်း အစောကတည်းက မြင်တွေ့ခဲ့ရသည်။

တစ်ဖက်လူ၏ ခန္ဓာကိုယ်မှ ကြောက်မက်ဖွယ်ကောင်းသော သတ်ဖြတ်လိုစိတ်များ ပျံ့နှံ့ထွက်ပေါ်နေပြီး ၎င်းတို့၏ ခန္ဓာကိုယ်များထက်ရှိ အငွေ့အသက်များကို ပိတ်လှောင်ထားခဲ့၏။

၎င်းမှာ လုံးဝကို ကြောင်အသွားရလေသည်။

ထိုကောင်လေးကို လုပ်ကြံရန် စီစဉ်ခဲ့သည်မှာ ၎င်းတို့ဖြစ်ပါလျက် အဘယ်ကြောင့် ယခုအခါ ပြောင်းပြန်ဖြစ်နေရသနည်း။

ဤသည်မှာ တစ်ဖက်လူ၏ ကျော့ကွင်းအတွင်းသို့ ကိုယ်တိုင်ဝင်ရောက်လာပြီး သေလမ်းကို ကိုယ်တိုင်ရှာနေသကဲ့သို့ ဖြစ်နေတော့သည်။

"တာအိုရောင်းရင်းကျိုး... အထင်လွဲနေတာပါ... အားလုံးက အထင်လွဲနေတာပါ...”

"ငါတို့က တာအိုကျောင်းတော်ထဲကို မတော်တဆ ဝင်လာမိတာပါ...”

"ကျေးဇူးပြုပြီး ဒီဆဋ္ဌမအဆင့်အစီအရင်ကြီးကို ဖွင့်ပေးပါဦး...”

ကွေ့ဝူအာက ကျယ်လောင်စွာ အော်ဟစ်လိုက်လေသည်။

၎င်းသည် ၎င်းတို့၏ဇာတ်မြစ် ပေါ်လွင်သွားသည်ဟု မတွေးမိဘဲ တာအိုကျောင်းတော်အတွင်းသို့ မတော်တဆ ဝင်ရောက်လာမိသောကြောင့်သာ မျက်မှောက်ရှိသူ၏ သတိထားမိခြင်းကို ခံလိုက်ရသည်ဟု ထင်မှတ်နေခဲ့၏။

သေချာရှင်းပြလိုက်မည်ဆိုပါက တစ်ဖက်လူက ဆက်လက်၍ တိုက်ခိုက်လာမည်မဟုတ်ကြောင်း သေချာနေပေသည်။

အဘယ်ကြောင့်ဆိုသော် ၎င်းတို့အနေဖြင့် စတင်လှုပ်ရှားရခြင်းပင် မရှိသေးဘဲ အတွေးတစ်ခုမျှသာ ဖြစ်သောကြောင့်ပင်။

အရာရှိများထံ တိုင်ကြားမည်ဆိုလျှင်ပင် ၎င်းတို့ဘက်မှ အကြောင်းပြချက် ခိုင်လုံနေဆဲဖြစ်၏။

"ဒါက အထင်လွဲတာဆိုတာ ကျုပ်သိပါတယ်...”

"ဒါကြောင့် မင်းတို့တွေ နောက်ဘဝကျရင် ပိုပြီး သတိထားကြပေါ့ကွာ...”

ကျိုးစွေ့က တည်ငြိမ်စွာဖြင့် ပြောလိုက်လေသည်။

ဘာ…။

ကွေ့ဝူယီအစရှိသော လေဟာနယ်သန့်စင်ခြင်းအဆင့် ကျင့်ကြံသူများ၏ မျက်နှာများမှာ ကြမ်းကြုတ်သွားလေသည်။

ဤအသေးအမွှား နတ်ဘုရားအသွင်ပြောင်းအဆင့် လူသားလေးမှာ အလွန်အမင်း ရိုင်းစိုင်းမောက်မာလွန်းလှပေသည်။

၎င်းတို့မှာ လေဟာနယ်သန့်စင်ခြင်း အစောပိုင်းအဆင့် ကျင့်ကြံသူများပင် ဖြစ်၏။

အင်အားအရ ပြောရမည်ဆိုလျှင် ဤနတ်ဘုရားအသွင်ပြောင်း နှောင်းပိုင်းအဆင့် လူသားလေးထက် အဆင့်တစ်ဆင့် ပိုမြင့်မားနေပေသည်။

နတ်ဘုရားအသွင်ပြောင်းအဆင့်နှင့် လေဟာနယ်သန့်စင်ခြင်းအဆင့်တို့ကြားရှိ ကွာဟချက်မှာ ကောင်းကင်နှင့်မြေကြီးကဲ့သို့ ကွာခြားလှ၏။

ပုံမှန်အားဖြင့် လေဟာနယ်သန့်စင်ခြင်းအဆင့် ဘိုးဘေးများသည် နတ်ဘုရားအသွင်ပြောင်းအဆင့် အရှင်သခင်များကို အလွယ်တကူ ရက်စက်စွာ သတ်ဖြတ်နိုင်စွမ်းရှိသည်။

သို့သော်လည်း ယခုအခါ၌ ဤကောင်လေး၏ လေသံမှာ ၎င်းတို့အား အလွယ်တကူ သတ်ဖြတ်နိုင်သကဲ့သို့ ဖြစ်နေသည်မှာ အမှန်တကယ်ပင် ယုတ္တိမရှိလွန်းလှပေ။

ယခုအချိန်တွင် မည်သူက မည်သူ့ကို လုပ်ကြံနေသည်လဲဆိုသည်မှာ ရှင်းလင်းမှုမရှိတော့။

သို့သော် ၎င်းတို့ တုံ့ပြန်ရန် အချိန်မရလိုက်မီမှာပင် ကျိုးစွေ့က စတင်လှုပ်ရှားလာခဲ့၏။ သူသည် ခန္ဓာကိုယ်ထက်ရှိ 'မိုးကြိုးကပ်ဘေးကူ' ကို ချက်ချင်း အသက်သွင်းလိုက်လေသည်။ ဆဋ္ဌမအဆင့် အောက်ခြေအဆင့်သို့ အဆင့်တက်သွားပြီဖြစ်သော 'မိုးကြိုးကပ်ဘေးကူ' ၏ အင်အားမှာ ကြောက်မက်ဖွယ်ကောင်းလွန်းလှပေသည်။

၎င်း၏ခန္ဓာကိုယ်ထက်ရှိ စွမ်းအားများမှာ ကျိုးစွေ့၏စွမ်းအားများနှင့် တစ်သားတည်း ပေါင်းစည်းသွားသကဲ့သို့ ရှိနေတော့သည်။

လူနှင့် ‘ကူ’ တစ်သားတည်း ဖြစ်တည်ခြင်းပင်။

ဝုန်း...။

ချက်ချင်းဆိုသလို အစီအရင်အကာအကွယ်တစ်ခုလုံးအတွင်း၌ အဆုံးမဲ့သော ကောင်းကင်နှင့်မြေကြီး စိတ်ဝိညာဉ်ချီများက စီးဆင်းလာပြီး ကျိုးစွေ့၏ကျောဘက်တွင် ဧရာမ ကောင်းကင်မြေကြီး ဓမ္မသဏ္ဌာန်ကြီးတစ်ခု ချက်ချင်း ပေါ်လာလေသည်။

၎င်းမှာ အဆုံးမဲ့မိုးကြိုးပင်လယ်ပင် ဖြစ်၏။

ကျိုးစွေ့၏ ကျောဘက်၌ ဧရာမ ပင်လယ်ကြီးတစ်ခု ပေါ်လာသည်ကို မှုန်ဝါးဝါး မြင်တွေ့နေရသော်လည်း၊ ၎င်းအတွင်းရှိ ပင်လယ်ရေများမှာ မိုးကြိုးများ၏ စုစည်းမှုဖြင့် ဖွဲ့စည်းထားခြင်းဖြစ်ကာ ပင်လယ်ရေတစ်စက်စီတိုင်းမှာ မိုးကြိုးအရည်များ ဖြစ်နေကြသည်။ မရေမတွက်နိုင်သော မိုးကြိုးများမှာလည်း မိုးခြိမ်းသံများအဖြစ် မြည်ဟည်းနေကြလေသည်။

ဤအခိုက်အတန့်တွင် သူသည် မိုးကြိုးနတ်ဘုရားတစ်ပါးအဖြစ် အသွင်ပြောင်းသွားပြီး အဆုံးမဲ့မိုးကြိုးပင်လယ်ကို ထိန်းချုပ်နေသကဲ့သို့ပင်။

အကယ်၍ နတ်ဘုရားအသွင်ပြောင်းအဆင့် ကျင့်ကြံသူများ၏ တိုက်ပွဲမှာ နတ်ဘုရားအသွင်ပြောင်းနယ်ပယ်တို့ကြား ထိပ်တိုက်တွေ့ဆုံမှုနှင့် ယှဉ်ပြိုင်မှုဖြစ်သည်ဟု ဆိုလျှင်၊ လေဟာနယ်သန့်စင်ခြင်းအဆင့် ဘိုးဘေးများ၏ တိုက်ပွဲမှာ ကောင်းကင်နှင့်မြေကြီး ဓမ္မသဏ္ဌာန်များကြား ထိပ်တိုက်တွေ့ဆုံခြင်းပင် ဖြစ်လေသည်။

"အရမ်းလွန်လွန်းနေပြီ... ဒါက ကောင်းကင်နဲ့မြေကြီး ဓမ္မသဏ္ဌာန်လား...”

"ဘယ်လိုလုပ် ဖြစ်နိုင်မှာလဲ... ဒီကောင်လေးက နတ်ဘုရားအသွင်ပြောင်းအဆင့် ကျင့်ကြံသူ မဟုတ်ဘူးလား။ သူက ဘယ်လိုလုပ်ပြီး ကောင်းကင်နဲ့မြေကြီး ဓမ္မသဏ္ဌာန်ကို ပိုင်ဆိုင်ထားရတာလဲ...”

"ကျစ်... ဒီကောင်လေးက ကျင့်ကြံခြင်းအဆင့်ကို ဖုံးကွယ်ထားတာပဲ။ သူက နတ်ဘုရားအသွင်ပြောင်းအဆင့် ကျင့်ကြံသူမဟုတ်ဘဲ လေဟာနယ်သန့်စင်ခြင်းအဆင့် ဘိုးဘေးတစ်ပါး ဖြစ်နေတာ... ငါတို့အားလုံး သူ့ဆီမှာ လှည့်စားခံလိုက်ရပြီ...”

ကွေ့ဝူယီအစရှိသော လေဟာနယ်သန့်စင်ခြင်းအဆင့် ကျင့်ကြံသူများ၏ မျက်နှာများမှာ ကြီးစွာ ပြောင်းလဲသွားလေသည်။

၎င်းတို့သည် ဤကောင်းကင်နှင့်မြေကြီး ဓမ္မသဏ္ဌာန်၏ ကြောက်မက်ဖွယ်ကောင်းမှုကို ခံစားလိုက်ရ၏။

၎င်းမှာ ကောင်းကင်နှင့်မြေကြီးကြားရှိ အဆုံးမဲ့ မိုးကြိုးစွမ်းအင်များကို ကြိုးကိုင်ခြယ်လှယ်နေသကဲ့သို့ဖြစ်ကာ ပတ်ဝန်းကျင်၌လည်း ဖျက်ဆီးခြင်းအငွေ့အသက်များ ပြည့်နှက်နေသော ကြောက်မက်ဖွယ် မိုးကြိုးတန်းများ ပေါ်ထွက်လာခဲ့သည်။

၎င်းတို့၏ တစ်သက်တာလုံးတွင် မည်သည့် လူသား လေဟာနယ်သန့်စင်ခြင်းအဆင့် ဘိုးဘေးကမျှ ဤမျှကြောက်မက်ဖွယ်ကောင်းသော ဓမ္မသဏ္ဌာန်စွမ်းအားနှင့် ဤမျှကျယ်ပြောလှသော မှော်စွမ်းအင်များကို ပိုင်ဆိုင်ထားသည်ကို မမြင်ဖူးခဲ့ကြချေ။ ဤသည်မှာ စိတ်ကူးယဉ်နိုင်စွမ်းထက်ပင် ကျော်လွန်နေပေ၏။