အခန်း ၇၇၃

အခန်း (၇၇၃) - အဆုံးမဲ့မိုးကြိုးပင်လယ် ဓမ္မသဏ္ဌာန်၊ အဆင့်မြင့် ကောင်းကင်အဆင့်ဝိညာဉ်ရတနာ ဟွေကွမ်နတ်ဘုရားကြေးမုံ၊ မိုးကြိုးအင်မော်တယ်စံအိမ်တော်၏ အခွင့်အရေး(၃)။

ဤသည်က အကြောင်းမဲ့သက်သက် ဘေးဒုက္ခကြုံရခြင်းပင်။

လူသားမျိုးနွယ်နှင့် ရုပ်သေးမျိုးနွယ်တို့ကြားရှိ ပဋိပက္ခမှာ ပိုမိုပြင်းထန်လာပြီး အချင်းချင်း၏ ပါရမီရှင်များကိုပါ စတင်လုပ်ကြံနေကြပြီဟုသာ ဆိုနိုင်ပေတော့သည်။

မှန်ပေသည်၊ ရုပ်သေးမျိုးနွယ်၏ စွမ်းရည်မှာ ထူးခြားလှပြီး အမှောင်ထဲတွင် ပုန်းကွယ်နေနိုင်သောကြောင့် လူသားမျိုးနွယ်ထက် ပို၍ အားသာချက် ရှိနေပေသည်။

'နှမြောစရာပဲ၊ တခြားရုပ်သေးမျိုးနွယ် သစ္စာဖောက်တွေရဲ့ သတင်းအချက်အလက် မပါဘူး...’

'ပါခဲ့လို့ရှိရင် အကုန်ဖမ်းပြီး သတ်ပစ်လို့ရတယ်...’

ကျိုးစွေ့မှာ အလွန် နှမြောတသ ဖြစ်မိလေသည်။

ရုပ်သေးမျိုးနွယ်များသည်လည်း အလွန်သတိကြီးကြပြီး ဤသစ္စာဖောက်များအားလုံးမှာ တစ်လမ်းမောင်း ဆက်သွယ်မှုများသာ ဖြစ်ကြသည်မှာ ထင်ရှားပေ၏။

သူတို့၏ အထက်လူကြီးများမှလွဲ၍ မည်သူကမျှ သူတို့၏ အစစ်အမှန် နောက်ကြောင်းကို မသိနိုင်ကြချေ။

ဤသည်မှာ သတင်းပေါက်ကြားသွားပါက သူလျှိုအမြောက်အမြား ပေါ်သွားပြီး တစ်အုပ်စုလုံး အဖမ်းခံရမည့် အခြေအနေကို ရှောင်ရှားရန်အတွက်ပင် ဖြစ်လေသည်။

တစ်လမ်းမောင်း ဆက်သွယ်မှုသည် အလုပ်တွင်ကျယ်မှု အနည်းငယ် လျော့နည်းသော်လည်း ဘေးကင်းလုံခြုံမှုအတွက်မူ အလွန်ကောင်းမွန်လှသည်။

ထို့ကြောင့် ဤမျှကြာမြင့်သော အချိန်ကာလအတွင်း သူတို့ကိုယ်တိုင် ခြေရာဖျောက်ရန် ပျက်ကွက်ပြီး လက်စပေါ်သွားခြင်းမှလွဲ၍ လူသားမျိုးနွယ်ဘက်မှ ဤလူသားသစ္စာဖောက်များကို ဖမ်းဆီးနိုင်ခြင်းမှာ အလွန်ရှားပါးလှ၏။

'ဒါပေမယ့် ဒီတစ်ခေါက် ရိတ်သိမ်းရရှိမှုကလည်း မဆိုးဘူးပဲ။ ရတနာတွေ အများကြီး ရလိုက်တယ်...’

ကျိုးစွေ့က လက်ကိုဝှေ့ယမ်းလိုက်ပြီး မြေပြင်ပေါ်မှ သိုလှောင်အိတ်သုံးလုံးကို ချက်ချင်း ကောက်ယူလိုက်သည်။ ယင်းတို့မှာ ရုပ်သေးမျိုးနွယ် လေဟာနယ်သန့်စင်ခြင်းအဆင့် ကျင့်ကြံသူသုံးဦး ချန်ထားခဲ့ခြင်းဖြစ်ပြီး အတွင်း၌ ရတနာအမြောက်အမြားကို သိုလှောင်ထားသည်။

ပထမဦးစွာ အထွတ်အထိပ် စိတ်ဝိညာဉ်ကျောက်တုံး အရေအတွက်မှာ သိုလှောင်အိတ်သုံးလုံးကို ပေါင်းလိုက်လျှင် အနည်းဆုံး အတုံးပေါင်း နှစ်သန်းခွဲခန့် ရှိနေသည်။

ဒုတိယအနေဖြင့် အင်မော်တယ်သလင်းကျောက် အရေအတွက်မှာလည်း အတုံးသုံးဆယ် ရှိနေလေသည်။

အမှန်တကယ်ဆိုရလျှင် အင်မော်တယ်သလင်းကျောက် အတုံးသုံးဆယ် ပိုင်ဆိုင်ထားခြင်းက အတော်လေး အံ့အားသင့်ဖွယ်ကောင်းသော ကြွယ်ဝချမ်းသာမှုပင် ဖြစ်၏။

သာမန် လေဟာနယ်သန့်စင်ခြင်းအဆင့် ကျင့်ကြံသူများပင် ဤမျှများပြားသော အင်မော်တယ်သလင်းကျောက်များကို ပိုင်ဆိုင်ထားမည် မဟုတ်ဘဲ အလွန်ဆုံး အထွတ်အထိပ် စိတ်ဝိညာဉ်ကျောက်တုံးများကိုသာ ပိုင်ဆိုင်ထားကြပေမည်။

မည်သို့ပင်ဆိုစေ အင်မော်တယ်သလင်းကျောက် အရေအတွက်မှာ အလွန်တရာ ရှားပါးလွန်းလှသည် မဟုတ်ပါလော။

'အင်မော်တယ်သလင်းကျောက် အတုံးသုံးဆယ်တောင် ရှိနေတာပဲ။ ကြည့်ရတာ ဒီသစ္စာဖောက်သုံးကောင်ကလည်း တော်တော် ချမ်းသာကြတာပဲ...’

ကျိုးစွေ့က သူ၏ မေးစေ့ကို ပွတ်သပ်လိုက်လေသည်။

ဤအင်မော်တယ်သလင်းကျောက် အတုံးသုံးဆယ်လုံးမှာ ရုပ်သေးမျိုးနွယ်များ ပေးထားသော ရန်ပုံငွေများ ဖြစ်သည်မှာ ထင်ရှားပေ၏။

မည်သို့ပင်ဆိုစေ သစ္စာဖောက်တစ်ဦးအနေဖြင့် ရန်ပုံငွေမရှိပါက တစ်လှမ်းရှေ့တိုးရန်ပင် ခက်ခဲလှပေမည်။

သတင်းအချက်အလက် စုံစမ်းရန်ဖြစ်စေ၊ မိမိဘာသာ ကျင့်ကြံရန်ဖြစ်စေ၊ အရင်းအမြစ် အမြောက်အမြား လိုအပ်လေသည်။

သူတစ်ပါးကို မေတ္တာသက်သက်ဖြင့် အလုပ်လုပ်ခိုင်းရန်မှာ မဖြစ်နိုင်ချေ။

လုံလောက်သော အကျိုးအမြတ်များ မပေးဘဲ ဤသစ္စာဖောက်များက မိမိတို့၏အသက်ကို စတေးကာ လူမျိုးစုအတွက် သတင်းအချက်အလက်များ ထောက်ပံ့ပေးမည် မဟုတ်ပေ။

'အင်မော်တယ်သလင်းကျောက် အများကြီး ရနိုင်ရင် ကောင်းမှာပဲ...’

'အင်မော်တယ်သလင်းကျောက်က ကျင့်ကြံခြင်းကို အထောက်အကူပြုဖို့ သုံးလို့ရရုံသာမက တခြား ရတနာမျိုးစုံကို ဝယ်ဖို့လည်း သုံးလို့ရတယ်...’

'စိတ်ဝိညာဉ်လောကရဲ့ အခိုင်မာဆုံး ငွေကြေးပဲ...’

ကျိုးစွေ့က မျက်လုံးများကို မှေးစင်းလိုက်လေသည်။

ယခင်က သူသည် ပိုင်စုကျဲ့ထံမှ အင်မော်တယ်သလင်းကျောက် အတုံးတစ်ရာကိုသာ မြင်ဖူးခဲ့ခြင်း ဖြစ်၏။

အင်မော်တယ်သလင်းကျောက် အရေအတွက်မှာ အလွန်တရာ ရှားပါးလွန်းလှပေသည်။

မှန်ပေသည်၊ ယင်း၏ အကျိုးကျေးဇူးများမှာလည်း အလွန်များပြားလှ၏။

သူကိုယ်တိုင်လည်း အင်မော်တယ်သလင်းကျောက်တစ်တုံးကို အသုံးပြု၍ ကျင့်ကြံဖူးရာ ကျင့်ကြံခြင်းအမြန်နှုန်းမှာ ဆယ်ဆမက မြန်ဆန်လာသည်ကို တွေ့ရှိခဲ့ရသည်။

အကယ်၍ အင်မော်တယ်သလင်းကျောက်များကြားတွင် အချိန်ကြာမြင့်စွာ နစ်မြုပ်ကျင့်ကြံနိုင်မည်ဆိုပါက ဆယ်နှစ်အတွင်း နတ်ဘုရားအသွင်ပြောင်းအဆင့် အထွတ်အထိပ်သို့ တက်လှမ်းနိုင်မည်မှာ သေချာလှ၏။

ဝမ်းနည်းစရာကောင်းသည်မှာ သူသည် ဤမျှများပြားသော အင်မော်တယ်သလင်းကျောက်များကို ရှာဖွေနိုင်မည် မဟုတ်ချေ။

ဤကဲ့သို့သော ကျင့်ကြံခြင်းမျိုးမှာလည်း တကယ်ကို အလွန်တရာ စည်းစိမ်ခံလွန်းရာကျပေသည်။

အမှန်တကယ်ဆိုရလျှင် အဆင့်အတားအဆီးကို ချိုးဖြတ်ရန် နီးကပ်နေချိန်မှလွဲ၍ မည်သည့် ကျင့်ကြံသူကမျှ အင်မော်တယ်သလင်းကျောက်ကို ကျင့်ကြံရာတွင် သုံးစွဲရန် ရက်ရောမည်မဟုတ်ပေ။

အင်မော်တယ်သလင်းကျောက်၏ အဓိကအသုံးဝင်မှုမှာ အခြားကျင့်ကြံသူများနှင့် ရတနာများ ဖလှယ်ရန်အတွက် ဖြစ်လေသည်။

ဥပမာအားဖြင့် အဆင့်မြင့် စိတ်ဝိညာဉ်ဆေးပင်များ၊ အဆင့်မြင့် ဆေးလုံးများ၊ အဆင့်မြင့် ရတနာများ အစရှိသည်တို့ပင် ဖြစ်၏။

'ဒါပေမယ့် အကြီးမားဆုံး ရိတ်သိမ်းရရှိမှုကတော့ ဒီအဆင့်မြင့် ကောင်းကင်အဆင့်ဝိညာဉ်ရတနာ ဟွေကွမ်နတ်ဘုရားကြေးမုံပဲ ဖြစ်ရမယ်...’

ကျိုးစွေ့က အနည်းငယ် ပြုံးလိုက်လေသည်။

သိုလှောင်အိတ် တစ်လုံးအတွင်း၌ အဆင့်မြင့် ကောင်းကင်အဆင့်ဝိညာဉ်ရတနာတစ်ပါး ရှိနေသည်ကို သူ အာရုံခံမိလိုက်၏။

အမှန်တကယ်ဆိုရလျှင် ဤအဆင့်ရှိ ရတနာမျိုးသည် လူမျိုးစုတစ်စု၏ အစောင့်အရှောက်ရတနာအဖြစ်ပင် သတ်မှတ်၍ရနေပြီ ဖြစ်သည်။

သူ၏ ကိုယ်ပေါ်တွင်လည်း ကောင်းကင်အဆင့်ဝိညာဉ်ရတနာ သုံးပါးရှိပြီး၊ ယင်းတို့မှာ အရပ်ရှစ်မျက်နှာ နတ်ဆိုးချုပ်မျှော်စင်၊ နဂါးငါးကောင်ဓားစက်၊ ချင်းလွမ်အစစ်အမှန်မီးတောက်ကြေးမုံ တို့ပင် ဖြစ်လေသည်။

နှမြောစရာကောင်းသည်မှာ ၎င်းတို့အားလုံးသည် အဆင့်နိမ့် ကောင်းကင်အဆင့်ဝိညာဉ်ရတနာများသာ ဖြစ်နေခြင်းပင်။

အဆင့်အတန်းအရ ပြောရမည်ဆိုပါက အထွတ်အထိပ်အဆင့် ကောင်းကင်အဆင့်ဝိညာဉ်ရတနာများနှင့် အလွန်တရာ ကွာဟလွန်းလှပေသည်။

အဆင့်နှစ်ဆင့်မျှသာ ကွာဟသည်ဟု မယူဆသင့်ချေ။ အစွမ်းသတ္တိအရ တကယ်တမ်း နှိုင်းယှဉ်ကြည့်မည်ဆိုပါက အနည်းဆုံး ဆယ်ဆ သို့မဟုတ် အဆပေါင်းများစွာပင် ကွာဟနေလေသည်။

အဆင့်နိမ့် ကောင်းကင်အဆင့်ဝိညာဉ်ရတနာများသည် စိတ်ဝိညာဉ်လောကတွင် တကယ်တမ်း၌ နည်းပါးလှသည်မဟုတ်ပေ။

သို့သော် အထွတ်အထိပ်အဆင့် ကောင်းကင်အဆင့်ဝိညာဉ်ရတနာများ၏ အရေအတွက်မှာမူ အလွန်တရာ ရှားပါးလှသည်။

လူနည်းစုမျှသော ခန္ဓာပေါင်းစည်းခြင်းအဆင့် ကျွမ်းကျင်သူကြီးများသာလျှင် အထွတ်အထိပ်အဆင့် ကောင်းကင်အဆင့်ဝိညာဉ်ရတနာများကို ပိုင်ဆိုင်ထားနိုင်ကြခြင်း ဖြစ်လေသည်။

အကယ်၍ ရုပ်သေးမျိုးနွယ်စုအနေဖြင့် အထွတ်အထိပ်အဆင့် ကောင်းကင်အဆင့်ဝိညာဉ်ရတနာတစ်ခုကို ဆုံးရှုံးလိုက်ရပါက ကြီးမားသော ဆုံးရှုံးမှုကြီးတစ်ရပ်ဖြစ်သည်ဟု ဆိုနိုင်ပေသည်။

"ဒီအထွတ်အထိပ်အဆင့် ကောင်းကင်အဆင့်ဝိညာဉ်ရတနာဖြစ်တဲ့ ဟွေကွမ်နတ်ဘုရားကြေးမုံရဲ့ စွမ်းအားက သာမန်မဟုတ်ဘူးပဲ...”

ကျိုးစွေ့မှာ အလွန် စိတ်လှုပ်ရှားနေ၏။

ထိုလေဟာနယ်သန့်စင်ခြင်းအဆင့် ရုပ်သေးမျိုးနွယ်စု ကျင့်ကြံသူသုံးဦး၏ မှတ်ဉာဏ်များအရ ဤအထွတ်အထိပ်အဆင့် ကောင်းကင်အဆင့်ဝိညာဉ်ရတနာတွင် စွမ်းဆောင်ရည်နှစ်မျိုး ရှိကြောင်းကို သိနိုင်ပြီး ပထမစွမ်းဆောင်ရည်မှာ ထောက်လှမ်းခြင်းပင် ဖြစ်လေသည်။

၎င်းသည် မိုင်တစ်သန်းပတ်လည်အတွင်းရှိ သက်ရှိအားလုံး၏ စွမ်းအားကို အလိုအလျောက် ထောက်လှမ်းနိုင်ပြီး လူတစ်ဦးချင်းစီ၏ တိကျသောတည်နေရာကို သိရှိနိုင်ကာ တစ်ချိန်တည်းမှာပင် ကြေးမုံပြင်၌ ပေါ်လွင်စေပြီး အချိန်နှင့်တစ်ပြေးညီ စောင့်ကြည့်နိုင်ပေသည်။

ဒုတိယစွမ်းဆောင်ရည်မှာ ပြန်လည်ရိုက်ခတ်ခြင်းပင် ဖြစ်၏။

၎င်းသည် ရန်သူ၏ တိုက်ခိုက်မှုစွမ်းအားကို ဝါးမြိုစုပ်ယူနိုင်ပြီး၊ ထို့နောက် နတ်ဘုရားအလင်းတန်းများကို ထုတ်လွှတ်ကာ ထိုစွမ်းအားကို ရန်သူ့ထံသို့ ပြန်လည်ရိုက်ခတ်စေနိုင်၏။

ရန်သူ၏ တိုက်ခိုက်မှုက ပို၍ ကြောက်မက်ဖွယ်ကောင်းလေလေ ပြန်လည်ရိုက်ခတ်သည့် စွမ်းအားက ပို၍ ကြောက်မက်ဖွယ်ကောင်းလေလေ ဖြစ်သည်။

ရန်သူ၏ စွမ်းအားသည် ဟွေကွမ်နတ်ဘုရားကြေးမုံ၏ ခံနိုင်ရည်ထက် မကျော်လွန်သရွေ့ မလွဲမသွေ ပြန်လည်ရိုက်ခတ်နိုင်မည် ဖြစ်သည်။

ဤကဲ့သို့သော စွမ်းဆောင်ရည်များကို ပိုင်ဆိုင်ထားသည့် ဟွေကွမ်နတ်ဘုရားကြေးမုံမှာ အတော်လေး အစွမ်းထက်လှသည်ဟု ဆိုနိုင်ပေသည်။

များပြားလှသော အထွတ်အထိပ်အဆင့် ကောင်းကင်အဆင့်ဝိညာဉ်ရတနာများအကြားတွင်ပင် ထိပ်ဆုံးမှ ရပ်တည်နိုင်စွမ်း ရှိလေသည်။

အဘယ်ကြောင့်ဆိုသော် ဤကောင်းကင်အဆင့်ဝိညာဉ်ရတနာ ဖုန်းရှီးမြို့တွင် ကျန်ရစ်ခဲ့သောအခါ ရုပ်သေးမျိုးနွယ်စုမှာ အလွန်တရာ စိုးရိမ်ပူပန်ခဲ့ရပြီး ဤရတနာကို ချက်ချင်းပင် ပြန်လည်ရယူရန် လိုလားနေခဲ့ကြသောကြောင့် ဖြစ်လေသည်။

ဝမ်းနည်းစရာကောင်းသည်မှာ သစ္စာဖောက်သုံးဦး၏ ကိုယ်ပိုင်ဆုံးဖြတ်ချက်ကြောင့် ၎င်းတို့၏အသက်များ ဆုံးရှုံးရုံသာမက၊ ဤအထွတ်အထိပ်အဆင့် ကောင်းကင်အဆင့်ဝိညာဉ်ရတနာပါ ဆုံးရှုံးသွားလိမ့်မည်ကို ရုပ်သေးမျိုးနွယ်စုက လုံးဝ ထင်မှတ်မထားခဲ့ခြင်းပင် ဖြစ်ချေသည်။

"မဆိုးဘူး... မဆိုးဘူး...”

ကျိုးစွေ့က သူ၏မေးစေ့ကို ပွတ်သပ်လိုက်ပြီး အလွန် ကျေနပ်သွားလေသည်။

ဤအထွတ်အထိပ်အဆင့် ကောင်းကင်အဆင့်ဝိညာဉ်ရတနာကို သန့်စင်လိုက်သည်နှင့် တစ်ပြိုင်နက် သူ၏စွမ်းအားများမှာလည်း အကြီးအကျယ် တိုးတက်လာမည်မှာ သေချာလှသည်။

ဤရတနာကို လက်ဝယ်ပိုင်ဆိုင်ထားသရွေ့ ရန်သူ၏ တိုက်ခိုက်မှုများကို အပြည့်အဝ ပြန်လည်ရိုက်ခတ်နိုင်မည်ဖြစ်ရာ ရှုံးနိမ့်နိုင်မည်မဟုတ်သော အနေအထား၌ ရပ်တည်နိုင်မည် ဖြစ်၏။

'မကြာသေးခင်က ငါ့ရဲ့ ကံကြမ္မာဟာ တကယ်ကို တက်လာတာပဲ။ ရုပ်သေးမျိုးနွယ်စု သူလျှိုတွေက ကိုယ့်သေတွင်း ကိုယ်တူးဖို့ ရောက်လာတဲ့အပြင် သူတို့မျိုးနွယ်စုရဲ့ ရတနာကိုတောင် လာပေးသွားသေးတယ်။ မကြာခင် မိုးကြိုးအင်မော်တယ်စံအိမ်ကို သွားဖို့ လိုအပ်နေပြီထင်တယ်။ အဲ့ဒီလိုမှမဟုတ်ရင် ဒီလောက်ကြီးမားတဲ့ အခွင့်အရေးကြီးကို ဖြုန်းတီးပစ်လိုက်သလို ဖြစ်သွားလိမ့်မယ်...’

ကျိုးစွေ့က မျက်လုံးများကို မှေးကျဉ်းလိုက်လေသည်။

လေဟာနယ်သန့်စင်ခြင်းအဆင့် ရုပ်သေးမျိုးနွယ်စု ကျင့်ကြံသူသုံးဦးကို လွယ်ကူစွာ ရှင်းလင်းလိုက်ပြီးနောက် သူ၏ ခန္ဓာကိုယ်ပေါ်ရှိ ကံကြမ္မာများလည်း တစ်စိတ်တစ်ပိုင်း တိုးလာသည်ကို သူ ခံစားလိုက်ရ၏။

အဘယ်ကြောင့်ဆိုသော် စွမ်းအားများ တိုးတက်လာခြင်းနှင့် မှော်ရတနာများ တိုးပွားလာခြင်းသည်လည်း ကံကြမ္မာကို မြင့်တက်စေနိုင်ပြီး ကံကြမ္မာကို ဖိနှိပ်ထိန်းချုပ်နိုင်သော အာနိသင်ကို ဖြစ်ပေါ်စေနိုင်သောကြောင့်ပင် ဖြစ်လေသည်။

ဝုန်း...။

ထိုခဏ၌ သူက လက်ဝှေ့ယမ်းကာ မန္တန်တစ်ခုကို အသုံးပြုလိုက်ရာ တိုက်ပွဲကြောင့် ပျက်စီးသွားသော မြေပြင်သည် ချက်ချင်းပင် မူလအခြေအနေသို့ ပြန်လည်ရောက်ရှိသွားပြီး များပြားလှသော ကျောက်စရစ်ခဲများမှာလည်း အပြည့်အဝ ပေါင်းစည်းသွားလေသည်။

ဤသည်မှာ စောစောက မည်သည့်အရာမျှ မဖြစ်ခဲ့သကဲ့သို့ပင် ဖြစ်၏။

လေဟာနယ်သန့်စင်ခြင်းအဆင့် ရုပ်သေးကျင့်ကြံသူသုံးဦး၏ ရုပ်အလောင်းများမှာလည်း ချက်ချင်းပင် ပြာအဖြစ်သို့ လောင်ကျွမ်းသွားလေသည်။

ရုပ်သေးမျိုးစေ့ သုံးစေ့သာ ကျန်ရစ်ခဲ့တော့သည်။

ဆဋ္ဌမအဆင့်အစီအရင် အကာအကွယ်၏ စွမ်းအားကြောင့် အကာအကွယ်အတွင်းရှိ တိုက်ပွဲလှိုင်းဂယက်များမှာ အပြင်ဘက်သို့ ပြန့်နှံ့သွားခြင်း မရှိချေ။

ဤနေရာတွင် လေဟာနယ်သန့်စင်ခြင်းအဆင့် တိုက်ပွဲတစ်ခု ဖြစ်ပွားခဲ့ကြောင်းကို မည်သူမျှ မသိရှိကြပေ။