အခန်း ၇၇၆

အခန်း (၇၇၆) - မြေကမ္ဘာအင်မော်တယ်တာအိုအသီးကို ရရှိခြင်း၊ အင်မော်တယ်ဝိညာဉ်အကြွင်းအကျန်ကို ဝါးမျိုခြင်း၊ ကံကြမ္မာသားတော်၏ အခွင့်အလမ်း(၁)။

ဝုန်း… ဝုန်း… ဝုန်း…။

မျက်စိတစ်မှိတ်အတွင်း မိုးကြိုးအင်မော်တယ်စံအိမ်သည် တုန်ခါလာပြီး ပေါက်ကွဲသံများ မြည်ဟည်းလာကာ ရွှေရောင်အလင်းတန်းများ ဖြာထွက်လာလေသည်။

တစ်ချိန်တည်းမှာပင် အင်မော်တယ်စံအိမ်တစ်ခုလုံး အက်ကွဲသွားသကဲ့သို့ ထင်မှတ်ရပေသည်။

စံအိမ်အတွင်းမှ အလင်းလုံးများ ချက်ချင်းဆိုသလို ပန်းထွက်လာပြီး အရပ်လေးမျက်နှာသို့ အံ့မခန်းအမြန်နှုန်းဖြင့် ပျံသန်းသွားကြ၏။

"ဘာတွေဖြစ်ကုန်တာလဲ...”

မိုးကြိုးအင်မော်တယ်စံအိမ်၏ နေရာအနှံ့တွင် စောင့်ကြပ်နေကြသော ကျင့်ကြံသူများမှာ ကောင်းကင်သို့ မော့ကြည့်ရင်း မှင်တက်သွားကြလေသည်။

ဤကဲ့သို့သော အပြောင်းအလဲမျိုး ဖြစ်လာလိမ့်မည်ဟု မည်သူမျှ လုံးဝထင်မှတ်မထားခဲ့ကြပေ။

"တစ်ယောက်ယောက် မိုးကြိုးအင်မော်တယ်စံအိမ်ထဲက အစီအရင်တားမြစ်ချက်ကို သွားထိမိလို့ စံအိမ်ရဲ့ ကာကွယ်ရေးစနစ်ကို လှုံ့ဆော်လိုက်မိပုံပဲ။ ဒါကြောင့် အထဲက ရတနာတွေ အကုန်လွင့်စင်ထွက်လာတာ...”

ခန္ဓာပေါင်းစည်းခြင်းအဆင့် ကျွမ်းကျင်သူတစ်ဦးက ၎င်း၏ခန့်မှန်းချက်ကို ထုတ်ပြောလိုက်၏။

အဘယ်ကြောင့်ဆိုသော် ဝိညာဉ်လောကတွင်လည်း အလားတူ အင်မော်တယ်စံအိမ်မျိုး ပေါ်ပေါက်ဖူးသောကြောင့်ပင် ဖြစ်၏။ ထိုစံအိမ်များသည် အန္တရာယ်ကြုံတွေ့ရချိန် သို့မဟုတ် ပျက်စီးလုနီးပါးဖြစ်ချိန်တွင် ကာကွယ်ရေးစနစ်ကို အသက်သွင်းကာ အတွင်းရှိရတနာအားလုံးကို အပြင်သို့ ထုတ်လွှတ်ပေးတတ်ကြသည်။

ထိုသို့ပြုလုပ်ရခြင်း၏ ရည်ရွယ်ချက်မှာ အစစ်အမှန်ရတနာများ လွတ်မြောက်သွားစေရန် ဖုံးကွယ်ပေးထားခြင်းပင် ဖြစ်ပေသည်။

အပြင်သို့ လွင့်စင်သွားသော ရတနာများစွာထဲတွင် တန်ဖိုးမဖြတ်နိုင်သော ရတနာအစစ်အမှန်ဟူ၍ အနည်းငယ်သာ ပါဝင်မည်မှာ သေချာလှသည်။

သို့သော် သာမန်ကျင့်ကြံသူများအတွက်မူ ဤသည်က အရေးမကြီးပေ။

ဥပမာအားဖြင့် အဆင့်မြင့်အိမ်ကြီးဖြစ်စေ၊ သာမန်အိမ်လေးဖြစ်စေ သာမန်လူများအတွက်မူ ရှားပါးသောပိုင်ဆိုင်မှုများသာ ဖြစ်သောကြောင့် မည်သို့မျှ နှာခေါင်းရှုံ့မည် မဟုတ်ပေ။

အဆင့်မြင့်ကျင့်ကြံသူများသာလျှင် အဖိုးတန်ဆုံးရတနာများကို ရွေးချယ်ဂရုစိုက်ကြမည် ဖြစ်‌သည်။

"ဒီလိုလေ… မိုးကြိုးအင်မော်တယ်စံအိမ်က ပေါ်လာတာ အနည်းဆုံး နှစ်ပေါင်းသိန်းနဲ့ချီနေပြီ...”

"သူ့ဟာသူ အင်မော်တယ်လောကကနေ ပြုတ်ကျလာပြီး လေဟာနယ်စွမ်းအားရဲ့ ဖိနှိပ်မှုကြောင့် အကြီးအကျယ် ပျက်စီးနေခဲ့တာ...”

"နှစ်ပေါင်းများစွာ ကြာလာတဲ့အခါ ပွန်းပဲ့ပျက်စီးမှုတွေကြောင့် ပြိုကျမယ့်အခြေအနေကို ရောက်နေခဲ့ပြီ...”

"အခု ငါတို့ နတ်ဘုရားအသွင်ပြောင်းအဆင့် ကျင့်ကြံသူတွေ အများကြီး ဝင်သွားတာက ကုလားအုတ်ကို ဖိသတ်လိုက်တဲ့ နောက်ဆုံးကောက်ရိုးမျှင်လို ဖြစ်သွားစေတာပဲ...”

"ဒါကြောင့်မို့ မိုးကြိုးအင်မော်တယ်စံအိမ် ပြိုကျသွားတာ ဖြစ်ရမယ်...”

"ကာကွယ်ရေးစနစ် ဟုတ်လား။ လူသေသွားမှတော့ ဘာကာကွယ်ရေးစနစ်က လိုသေးလို့လဲ...”

"ဟားဟား... အဲဒါက အင်မော်တယ်လေ။ သေချာပေါက် သေသွားပြီလို့ ဘယ်သူက ပြောရဲလို့လဲ...”

"ဒါလည်း ဟုတ်တာပဲ။ ဒီနှစ်တွေထဲ ဝိညာဉ်လောကမှာ ဝင်စားတဲ့ အင်မော်တယ်အချို့ ပေါ်လာဖူးတယ်။ သူတို့က အင်မော်တယ်တွေ ကျဆုံးပြီးနောက် ပြန်လည်မွေးဖွားလာကြတာ။ မိုးကြိုးအင်မော်တယ်စံအိမ်က အင်မော်တယ်လည်း မသေသေးတာ ဖြစ်နိုင်တယ်...”

"ဒါပေမဲ့ ဒီနှစ်တွေမှာ အင်မော်တယ်လောကကနေ အင်မော်တယ်စံအိမ်တွေ မကြာခဏ ပြုတ်ကျလာတတ်တယ်။ အင်မော်တယ်လောကက အရမ်းအန္တရာယ်များနေလို့လား။ ငါတို့ အင်မော်တယ်ဖြစ်သွားရင်တောင် အေးအေးချမ်းချမ်း မနေရဘူးလား...”

"မသေချာဘူး။ ဒါပေမဲ့ အင်မော်တယ်လောကဆိုတာလည်း ကောင်းတဲ့နေရာတော့ မဟုတ်လောက်ဘူး။ တကယ်လို့ လုံခြုံတယ်ဆိုရင် အင်မော်တယ်တွေ ကျဆုံးတဲ့သတင်း မကြာခဏ ထွက်လာမှာ မဟုတ်ဘူး။ နောင်တစ်ချိန် ငါတို့ အင်မော်တယ်ဖြစ်ဖို့ အခွင့်အရေးရရင်တောင် တစ်သက်လုံး ပူပင်သောကကင်းမယ်လို့ မပြောနိုင်ဘူး...”

"ဒါဆိုရင် ငါတို့ တာအိုကျင့်ကြံပြီး အင်မော်တယ်ဖြစ်လာတာ ဘာအဓိပ္ပာယ်ရှိတော့မှာလဲ။ အင်မော်တယ်ဖြစ်ရင် မသေနိုင်ဘူးဆိုတာ မဟုတ်ဘူးလား...”

"တာအိုကျင့်ကြံတာက အသက်ရှည်ဖို့သက်သက် မဟုတ်ဘူး။ စွမ်းအားအတွက်လည်း ပါတာပဲ။ ဒီလောကက အားကြီးသူက အားနည်းသူကို အနိုင်ကျင့်တဲ့လောကလေ။ စွမ်းအားမရှိရင် သက်တမ်းကုန်တဲ့အထိ နေရဖို့ဆိုတာ မျှော်လင့်ချက်တစ်ခုသက်သက်ပဲ။ အရွယ်ရောက်တဲ့အထိတောင် အသက်ရှင်ချင်မှ ရှင်နိုင်မှာ...”

"မင်းပြောတာ မှန်တယ်။ ဒီလောကက အားနည်းသူတွေကို လက်မခံဘူး။ အခြေအနေနဲ့ လိုက်လျောညီထွေ နေနိုင်သူပဲ ရှင်သန်နိုင်မယ်။ ဒီလောကကြီးနဲ့ အံဝင်ခွင်ကျ မဖြစ်ဘူးဆိုရင်တော့ လောကကြီးရဲ့ ဖယ်ရှားခြင်းကို ခံရဖို့ပဲ ရှိတော့တယ်...”

ခန္ဓာပေါင်းစည်းခြင်းအဆင့် ကျွမ်းကျင်သူများစွာက အသီးသီး ဆွေးနွေးပြောဆိုနေကြ၏။

၎င်းတို့သည်လည်း မိုးကြိုးအင်မော်တယ်စံအိမ်၏ အပြောင်းအလဲများကို ကြည့်ရင်း မျက်လုံးများ တလက်လက်တောက်ပကာ အလွန်ရှုပ်ထွေးသော အမူအရာများ ပေါ်လွင်နေကြပေသည်။

ဤကဲ့သို့သော အပြောင်းအလဲသည် သူတို့အတွက်ပင် အနည်းငယ် အံ့ဩစရာကောင်းနေသည်။

သို့သော်ငြား ကြီးမားသော အကျိုးကျေးဇူးများလည်း ရှိနေချေသည်။

အနည်းဆုံးအနေဖြင့် မိုးကြိုးအင်မော်တယ်စံအိမ်အတွင်းသို့ ဝင်ရောက်ရန် မလိုအပ်တော့ပေ။ အတွင်းရှိ အစီအရင်တားမြစ်ချက်များ၏ စွမ်းအားမှာ အလွန်တရာ ကြောက်မက်ဖွယ်ကောင်းလှသည်။

အနည်းငယ် ပေါ့ဆမိပါက အတွင်း၌ပင် အသက်ဆုံးရှုံးသွားနိုင်ချေ ရှိသည်။

"အင်မော်တယ်လက်နက်... အဲဒါ မိုးကြိုးအင်မော်တယ်စံအိမ်ရဲ့ အင်မော်တယ်လက်နက်ပဲ...”

သန့်စင်ခြင်္သေ့မျိုးနွယ်မှ ခန္ဓာပေါင်းစည်းခြင်းအဆင့် ကျွမ်းကျင်သူတစ်ဦး၏ သူငယ်အိမ်များ ကျဉ်းမြောင်းသွားလေသည်။

ဧရာမရွှေရောင်အလင်းတန်းတစ်ခုကို သူ ပထမဆုံး သတိပြုမိသွားပြီး အတိုင်းအဆမရှိ စိတ်လှုပ်ရှားသွားချေပြီ။

အကယ်၍ အင်မော်တယ်လက်နက်တစ်ခုကိုသာ ရရှိမည်ဆိုပါက သန့်စင်ခြင်္သေ့မျိုးနွယ်အတွက် ကြီးမားလှသော အင်အားတိုးတက်မှုကြီး ဖြစ်လာမည်မှာ သံသယဖြစ်ဖွယ်မရှိပေ။

အင်မော်တယ်လက်နက်ကို ပိုင်ဆိုင်ထားသော မဟာယာနအဆင့် ကျင့်ကြံသူတစ်ဦး၏ စွမ်းအားသည် ဆယ်ဆမက တိုးတက်လာနိုင်ပေသည်။

အင်မော်တယ်လက်နက် တစ်ခုသည် မျိုးနွယ်စုတစ်ခု၏ ကံကြမ္မာကို နှစ်သန်းပေါင်းများစွာအထိ ထိန်းသိမ်းစောင့်ရှောက်ပေးနိုင်၏။

မျိုးနွယ်စုတစ်ခုကို မရေမတွက်နိုင်သော နှစ်ကာလများတိုင် ကာကွယ်ပေးရန် လုံလောက်ပေသည်။

အကယ်၍ သန့်စင်ခြင်္သေ့မျိုးနွယ်သာ မိုးကြိုးအင်မော်တယ်စံအိမ်မှလာသော ဤအင်မော်တယ်လက်နက်ကို ရရှိခဲ့ပါက ၎င်းတို့၏စွမ်းအားမှာ အဆပေါင်းများစွာ တိုးတက်သွားမည် ဖြစ်လေသည်။

ရွှစ်...။

မျက်စိတစ်မှိတ်အတွင်း သူ၏ခန္ဓာကိုယ်က လျှပ်တစ်ပြက် လှုပ်ရှားသွားပြီး ပထမဆုံးရယူနိုင်ရန် ချက်ချင်း လိုက်လံဖမ်းဆီးတော့သည်။

"အင်မော်တယ်လက်နက်ကို လုချင်နေတာလား။ စိတ်ကူးယဉ်မနေနဲ့...”

"အင်မော်တယ်လက်နက်ဆိုတာ မင်းတို့လို သန့်စင်ခြင်္သေ့မျိုးနွယ်လေး လုယူသွားလို့ရတဲ့အရာ မဟုတ်ဘူး...”

"ဒီအင်မော်တယ်လက်နက်ကို ငါတို့ ရုပ်သေးမျိုးနွယ်က ယူမယ်။ ကျန်တဲ့မျိုးနွယ်တွေ အကုန်ထွက်သွားကြစမ်း...”

"သေးနုပ်တဲ့ ရုပ်သေးမျိုးနွယ်... ကျရှုံးနေတဲ့ အမှိုက်တွေကများ။ ငါတို့ လေကျားသစ်မျိုးနွယ်ကို လာအော်ရဲရင် မင်းတို့မျိုးနွယ်စုတစ်ခုလုံးကို သုတ်သင်ပစ်မယ်...”

"အင်မော်တယ်လက်နက်ကို လုချင်ရင် ဘယ်သူက အစွမ်းအစပိုကြီးလဲ ကြည့်ကြတာပေါ့...”

ထိုအခါ ခန္ဓာပေါင်းစည်းခြင်းအဆင့် ကျွမ်းကျင်သူများစွာက အားမာန်အပြည့်ဖြင့် ဟိန်းဟောက်လိုက်ကြသည်။

မိုးကြိုးအင်မော်တယ်စံအိမ်မှ ထွက်ပေါ်လာသော အင်မော်တယ်လက်နက်ကို မည်သူက လက်လွှတ်ခံချင်ပါမည်နည်း။

တစ်ယောက်ပြီးတစ်ယောက် အပေါ်သို့ ပျံတက်သွားကာ အင်မော်တယ်လက်နက်ကို လုယူပြီး မိမိတို့ကိုယ်ပိုင်အဖြစ် အပြည့်အဝသိမ်းပိုက်ရန် ကြိုးစားကြတော့သည်။

ခန္ဓာပေါင်းစည်းခြင်းအဆင့် ကျွမ်းကျင်သူများထံမှ ကြောက်မက်ဖွယ်စွမ်းအားများနှင့် အရှိန်အဝါများ ပေါက်ကွဲထွက်လာပြီး လေဟာနယ်ကိုပင် တုန်လှုပ်သွားစေသကဲ့သို့ ထင်မှတ်ရ၏။

စွမ်းအင်များ ရိုက်ခတ်မှုကြောင့် လေဟာနယ်အက်ကွဲကြောင်းများပင် ပေါ်ထွက်လာချေသည်။

၎င်းတို့သည် မြေပြင်နတ်ဘုရားများနှယ် လှုပ်ရှားမှုတိုင်းတွင် ကြောက်မက်ဖွယ် စွမ်းအားများကို ထုတ်လွှတ်နေကြ၏။

သာမန်ကျင့်ကြံသူများသာ အနီးသို့ ချဉ်းကပ်မိပါက ခန္ဓာပေါင်းစည်းခြင်းအဆင့် ကျွမ်းကျင်သူများ၏ အရှိန်အဝါကြောင့် ချက်ချင်း အသက်ပျောက်ကာ ပြာအဖြစ်သို့ ပြောင်းလဲသွားမည်မှာ အသေအချာပင်။

"အင်မော်တယ်လက်နက်တင် မကဘူး။ ကောင်းကင်အဆင့်ဝိညာဉ်ရတနာတွေ အများကြီးနဲ့ ရွှမ်ထျန်းရတနာတွေတောင် ပါသေးတယ်...”

လူတစ်ယောက်၏ သူငယ်အိမ်များ ကျဉ်းမြောင်းသွားလေသည်။

မိုးကြိုးအင်မော်တယ်စံအိမ်ကြီးမှာ အစိတ်စိတ်အမွှာမွှာ ကွဲအက်သွားပြီး၊ ပြီးပြည့်စုံသော နန်းတော်ကြီးတစ်ခုက မျက်စိတစ်မှိတ်အတွင်း အပိုင်းအစပေါင်းများစွာအဖြစ်သို့ ပြောင်းလဲကာ အရပ်လေးမျက်နှာသို့ လွင့်စင်ပျံသန်းသွားသည်ကို သူ ရှင်းလင်းစွာ တွေ့လိုက်ရသည်။

ဤကဲ့သို့သော အင်မော်တယ်စံအိမ် အပိုင်းအစပေါင်း သောင်းနှင့်ချီ၍ ထွက်ပေါ်လာခဲ့၏။

၎င်းတို့သည် ကြယ်ကြွေများပမာ လေဟာနယ်ထဲသို့ ဝင်ရောက်သွားပြီး ဝေးကွာသောနေရာများဆီသို့ ပျံသန်းသွားကြ၏။

အမြန်နှုန်းမှာမူ စိတ်ကူးယဉ်နိုင်စွမ်းထက်ပင် ကျော်လွန်နေတော့သည်။

ဤမျှမြန်ဆန်သော အမြန်နှုန်းကို နတ်ဘုရားအာရုံဖြင့်ပင် ဖမ်းဆုပ်နိုင်ခြင်းမရှိဟု ဆိုနိုင်ပေသည်။

"မိုးကြိုးအင်မော်တယ်စံအိမ်ထဲမှာ တကယ်ပဲ ရတနာတွေ အများကြီးရှိနေတာပဲ...”

"ဟားဟား... ချမ်းသာပြီကွ။ ဒီတစ်ခါတော့ အကြီးအကျယ် ချမ်းသာပြီ...”

"အရင်က အစီအရင်တားမြစ်ချက်တွေရှိလို့ အင်မော်တယ်စံအိမ်ထဲကို ငါတို့ ဝင်လို့မရခဲ့ဘူး။ အခုတော့ စံအိမ်ထဲက ရတနာတွေ အကုန်လွင့်ထွက်လာပြီ။ ဒါက ငါတို့ရဲ့ အခွင့်အလမ်းပဲ။ လုံးဝ လက်လွှတ်ခံလို့ မဖြစ်ဘူး...”

"အခုချက်ချင်း ဝင်လုကြ။ ဒီရတနာတွေ တခြားမျိုးနွယ်တွေရဲ့ လက်ထဲကို ရောက်သွားခွင့် လုံးဝမပေးနိုင်ဘူး...”

"ကျက်သရေတုံးတဲ့ကောင်တွေ... ငါနဲ့များ ရတနာကို လာလုရဲသေးတယ်။ အကုန်လုံး သေလိုက်ကြစမ်း...”

"ငါ့ဟာတွေ... ဒီရတနာတွေအကုန်လုံး ငါ့ဟာတွေချည်းပဲ။ ဘယ်သူ လာတားရဲလဲ။ လာတားတဲ့သူက ငါ့ရန်သူပဲ။ သေချာပေါက် သတ်ပစ်မယ်...”

မျိုးနွယ်စုအသီးသီးမှ ကျင့်ကြံသူများမှာ အလွန်တရာ စိတ်လှုပ်ရှားစွာဖြင့် အသံကုန် ကြုံးဝါးလိုက်ကြတော့သည်။

အင်မော်တယ်လက်နက်ကို ရယူရန် မျှော်လင့်ချက် မရှိတော့သော်လည်း အင်မော်တယ်စံအိမ်မှ လွင့်စင်လာသော ကောင်းကင်အဆင့်ဝိညာဉ်ရတနာများ၊ ရွှမ်ထျန်းရတနာများနှင့် အင်မော်တယ်စံအိမ် အပိုင်းအစများမှာ အလွန်အဖိုးတန်လှ‌သည်။

တစ်ခုတစ်လေ ရရှိမည်ဆိုလျှင်ပင် သူတို့အတွက် အကျိုးကျေးဇူးများစွာ ရရှိမည် ဖြစ်သည်။

ဤကဲ့သို့သော အခွင့်အလမ်းမျိုးကို မည်သူကမျှ လက်လွှတ်ခံမည် မဟုတ်ပေ။

ထိုအပြောင်းအလဲက မျိုးနွယ်စုများစွာ၏ လောဘနှင့် စိတ်လှုပ်ရှားမှုများကို ချက်ချင်း လှုံ့ဆော်ပေးလိုက်သည်မှာ ထင်ရှားလှ၏။

ဤကဲ့သို့သော အခွင့်အလမ်းနှင့် ရတနာများရှေ့တွင် မည်သူကမျှ လက်လျှော့မည် မဟုတ်ပေ။

ဝုန်း… အုန်း…။

မျက်စိတစ်မှိတ်အတွင်း လူသားမျိုးနွယ်၊ ရုပ်သေးမျိုးနွယ်၊ မြွေပျံမျိုးနွယ်၊ ရွှေဖားပြုတ်မျိုးနွယ်၊ သန့်စင်ခြင်္သေ့မျိုးနွယ် အစရှိသော မျိုးနွယ်စုများအကြား ချက်ချင်းပင် တိုက်ပွဲကြီးများ ဖြစ်ပွားလာပြီး ကျင့်ကြံသူများသည် ထိုအလင်းစက်များနောက်သို့ လိုက်လံဖမ်းဆီးကြတော့သည်။

အင်မော်တယ်စံအိမ်မှ လွင့်စင်လာသော ရတနာများကို ရရှိရန်အတွက် တစ်ယောက်စီတိုင်းက အသေအလဲ တိုက်ခိုက်ကြလေသည်။

ခဏအကြာတွင် ဤဒေသ၌ သမိုင်းတွင် အကြီးကျယ်ဆုံးသော တိုက်ပွဲကြီးတစ်ရပ်က ပေါက်ကွဲထွက်ပေါ်လာတော့သည်။

............