အခန်း ၇၇၉

အခန်း (၇၇၉) - မြေကမ္ဘာအင်မော်တယ်တာအိုအသီးကို ရရှိခြင်း၊ အင်မော်တယ်ဝိညာဉ်အကြွင်းအကျန်ကို ဝါးမျိုခြင်း၊ ကံကြမ္မာသားတော်၏ အခွင့်အလမ်း(၄)။

နာရီအနည်းငယ် ကြာပြီးနောက်…။

ကျိုးစွေ့၏ ကိုယ်ပွားသည် ‘ကံကြမ္မာကူ’၏ လမ်းညွှန်မှုအတိုင်း မိုးကြိုးတောင်တန်းရှိ လျှို့ဝှက်သော ဂူတစ်ခုသို့ ရောက်ရှိလာခဲ့၏။

ဤဂူအတွင်း၌ နေထိုင်ခြင်းမှာ အန္တရာယ်များများစားစား မရှိပေ။

ထို့ထက်ပို၍ မိမိ၏ ကံကြမ္မာကို မြင့်တက်စေကာ ကံကောင်းမှုများကိုပင် ရရှိနိုင်သေး၏။

သို့သော် ယခုအချိန်တွင် သူသည် မည်သည့် ကံကောင်းမှုမျိုးကိုမှ စိတ်ဝင်စားခြင်း မရှိချေ။

အဘယ်ကြောင့်ဆိုသော် သူ၏ လက်ထဲတွင်ရှိသော မြေကမ္ဘာအင်မော်တယ်တာအိုအသီးမှာ အကြီးမားဆုံးသော ကံကောင်းမှု ဖြစ်နေသောကြောင့်ပင်။

‘တကယ်လို့ မြေကမ္ဘာအင်မော်တယ်တာအိုအသီးကို တိုက်ရိုက် စားသုံးလိုက်မယ်ဆိုရင် အင်မော်တယ်မဖြစ်ခင်အထိ ဘာအတားအဆီးမှ ရှိတော့မှာ မဟုတ်ဘူး...’

'ဒါပေမဲ့ ဒါက မြေကမ္ဘာအင်မော်တယ်တာအိုအသီးရဲ့ ကန့်သတ်ချက်ထဲမှာ ပိတ်မိသွားပြီး အနာဂတ်တာအိုလမ်းစဉ်ကို ပိတ်ပင်သလို ဖြစ်သွားလိမ့်မယ်... ဒါက ရတာထက် ဆုံးရှုံးတာက ပိုများတယ်...’

'ဒါ့အပြင် ဒီတာအိုအသီးထဲမှာ အင်မော်တယ်ရဲ့ ဝိညာဉ်အကြွင်းအကျန် ပုန်းကွယ်နေသေးတယ်... ဒါက ပုန်းကွယ်နေတဲ့ အန္တရာယ်ပဲ...’

'အကယ်၍ အင်မော်တယ် ဝိညာဉ်အကြွင်းအကျန်ကို မရှင်းလင်းနိုင်ဘူးဆိုရင် ဒါက အဆိပ်ရှိတဲ့ပန်းသီးလိုပဲ အမြဲတမ်းဖြစ်နေမှာ...’

ကျိုးစွေ့က မေးစေ့ကို ပွတ်သပ်ရင်း ဤမြေကမ္ဘာအင်မော်တယ်တာအိုအသီးကို မည်သို့ကိုင်တွယ်ရမည်ကို စဉ်းစားနေမိ၏။

အဘယ်ကြောင့်ဆိုသော် အနည်းငယ်မျှ သတိလွတ်သွားပါက ဤသည်မှာ ကံကောင်းမှု မဟုတ်တော့ဘဲ အသက်အန္တရာယ်ဖြစ်စေမည့် ထောင်ချောက်တစ်ခု ဖြစ်သွားနိုင်သောကြောင့်ပင်။

ထိုအခါ ကောင်းသောကိစ္စမှာ ဆိုးသောကိစ္စအဖြစ် ပြောင်းလဲသွားပေလိမ့်မည်။

တစ်ခါတစ်ရံတွင် ကံကောင်းမှုဆိုသည်မှာ ဤသို့ပင် ဖြစ်လေသည်။

အကယ်၍ စနစ်တကျ မဖြေရှင်းနိုင်ပါက ဘေးအန္တရာယ်အဖြစ်သို့ ပြောင်းလဲသွားနိုင်သည်။

"ကြည့်ရတာ ‘ကံကြမ္မာကူ’ရဲ့ အကူအညီကို ယူရဦးမှာပဲ...”

ကျိုးစွေ့က မျက်မှောင်ကြုတ်လိုက်၏။

‘ကံကြမ္မာကူ’၏ စွမ်းအားမှာ အကန့်အသတ်မရှိပေ။ ကံကြမ္မာကို လောင်ကျွမ်းစေနိုင်သရွေ့ အန္တရာယ်ကို ဖြေရှင်းနိုင်မည့်နည်းလမ်းအား ရှာဖွေနိုင်‌သည်။

သို့သော် ဤသည်မှာလည်း မိမိထံတွင် လုံလောက်သော ကံကြမ္မာစွမ်းအား ရှိနေရန် လိုအပ်ပေသည်။

မဟုတ်ပါက ဆန်မရှိဘဲ ထမင်းချက်၍ မရသကဲ့သို့သာ ဖြစ်ပေလိမ့်မည်။

ဝုန်း...။

ဤသို့ တွေးလိုက်ရင်း ကျိုးစွေ့သည် ‘ကံကြမ္မာကူ’၏ စွမ်းအားကို ချက်ချင်းပင် လှုံ့ဆော်လိုက်ရာ ရွှေရောင်ကံကြမ္မာ စွမ်းအင်များမှာ စတင် လောင်ကျွမ်းလာလေသည်။

ထို့နောက် လျှို့ဝှက်ဆန်းကြယ်သော သတင်းအချက်အလက်တစ်ခုမှာ သူ၏ သိစိတ်အာရုံထဲသို့ ချက်ချင်းပင် ဝင်ရောက်လာ၏။

'ဒီလိုကိုး...’

'‘အိပ်မက်ဝိညာဉ်ကူ’ရဲ့ စွမ်းအားကို သုံးပြီး ဒီဝိညာဉ်အကြွင်းအကျန်ကို ဝါးမြိုပစ်လို့ ရတာပဲ...’

'ပြီးမှ မြေကမ္ဘာအင်မော်တယ်တာအိုအသီးကို ‘မိုးကြိုးကပ်ဘေးကူ’ကို ပေးပြီး ဝါးမြိုခိုင်းလိုက်မယ်...’

'ဒါဆိုရင် မြေကမ္ဘာအင်မော်တယ်တာအိုအသီးရဲ့ စွမ်းအင်ကို အပြည့်အဝ ရရှိနိုင်ရုံတင်မကဘဲ အသီးရဲ့ ဘေးထွက်ဆိုးကျိုးတွေကိုလည်း ရှောင်ရှားနိုင်လိမ့်မယ်...’

ကျိုးစွေ့က မေးစေ့ကို ပွတ်သပ်ရင်း အရာအားလုံးကို နားလည်သွားသည့် အမူအရာမျိုး ပြသလိုက်သည်။

အမှန်အတိုင်းဆိုရလျှင် သူသည်လည်း ယခင်က ဤကဲ့သို့သော နည်းလမ်းမျိုးကို စဉ်းစားမိခဲ့သည်။

သို့သော် ‘အိပ်မက်ဝိညာဉ်ကူ’က ဤအင်မော်တယ် ဝိညာဉ်အကြွင်းအကျန်ကို အမှန်တကယ် ဝါးမြိုနိုင်ခြင်း ရှိမရှိကိုမူ သူ မသေချာခဲ့ချေ။

အဘယ်ကြောင့်ဆိုသော် ဤသည်မှာ အင်မော်တယ်၏ ဝိညာဉ်ဖြစ်သောကြောင့်။

အားနည်းနေသည့် အခြေအနေတွင် ရှိနေသော်လည်း ပဉ္စမအဆင့် အထွတ်အထိပ်ဖြစ်သော ‘အိပ်မက်ဝိညာဉ်ကူ’က ယှဉ်နိုင်မည်လောမှာ မသေချာဘဲ သတိလွတ်သွားပါက ‘အိပ်မက်ဝိညာဉ်ကူ’ပင် ပြန်လည် သတ်ဖြတ်ခံရနိုင်ပေသည်။

သို့သော် ‘ကံကြမ္မာကူ’ကမူ ‘အိပ်မက်ဝိညာဉ်ကူ’အနေဖြင့် ဤအင်မော်တယ် ဝိညာဉ်ကို သုတ်သင်နိုင်စွမ်း ရှိကြောင်း ပြောပြနေ၏။

ဤလျှို့ဝှက်ဆန်းကြယ်သော မြေကမ္ဘာအင်မော်တယ်၏ ဒဏ်ရာမှာ ထင်ထားသည်ထက် ပို၍ ပြင်းထန်နေသည်မှာ သိသာလှသည်။

ယခုအခါ ၎င်းမှာ ပဉ္စမအဆင့် ‘အိပ်မက်ဝိညာဉ်ကူ’ကိုပင် မယှဉ်နိုင်လောက်အောင် အားနည်းနေပြီ ဖြစ်၏။

သို့သော် သေချာ စဉ်းစားကြည့်လျှင်လည်း ဤသည်မှာ ဖြစ်နိုင်ပေသည်။

အကယ်၍ ဤအင်မော်တယ် ဝိညာဉ်အကြွင်းအကျန်တွင် စွမ်းအားသာ ရှိနေဦးမည်ဆိုပါက မိုးကြိုးအင်မော်တယ်နန်းတော်ကို ပြိုပျက်စေပြီးမှ ထွက်ပြေးစရာ အကြောင်းမရှိပေ။

အစောပိုင်းက ထိုနည်းလမ်းကို အသုံးပြုလိုက်ခြင်းမှာပင် တစ်ဖက်လူ၏ စွမ်းအားများကို အမြောက်အမြား ကုန်ဆုံးစေခဲ့ပုံရ၏။

ယခုအချိန်တွင် တစ်ဖက်လူမှာ အားအနည်းဆုံး အခြေအနေသို့ ရောက်ရှိနေပြီ ဖြစ်သည်။

ဤသည်မှာ အားနည်းနေချိန်တွင် အပြတ်ရှင်းရမည့် အခြေအနေပင် ဖြစ်ရာ တစ်ဖက်လူကို စွမ်းအားများ ပြန်လည်ရရှိရန် အခွင့်အလမ်း လုံးဝ ပေး၍မရချေ။

ဤလူကို အမြန်ဆုံး အပြတ်ရှင်းလိုက်ခြင်းကသာ အကောင်းဆုံး ရွေးချယ်မှုပင် ဖြစ်၏။ ဤအင်မော်တယ် ဝိညာဉ်အကြွင်းအကျန်ကို အပြီးသတ် မချေမှုန်းနိုင်သရွေ့ သူသည် မည်သည့်အခါမှ ပေါ့ဆမည်မဟုတ်ပေ။

ဝုန်း...။

ဤသို့ တွေးလိုက်ရင်း ကျိုးစွေ့သည် တုံ့ဆိုင်းမနေဘဲ ‘အိပ်မက်ဝိညာဉ်ကူ’ကို ချက်ချင်းပင် ဆင့်ခေါ်လိုက်၏။

ထိုအခါ ခုနစ်ရောင်ခြယ် ‘အိပ်မက်ဝိညာဉ်ကူ’မှာ သူ၏ကိုယ်ပေါ်မှ ပျံသန်းထွက်လာပြီး၊ ခန္ဓာကိုယ်မှာ ရေပူဖောင်းကဲ့သို့ ဖြစ်နေကာ အံ့ဩဖွယ်ကောင်းသော အိပ်မက်စွမ်းအားများ ကိန်းအောင်းနေလေသည်။

ဝှမ်…။

နောက်တစ်စက္ကန့်တွင် ၎င်းက ပါးစပ်ကို အကျယ်ကြီး ဖွင့်လိုက်ပြီး မြေကမ္ဘာအင်မော်တယ်တာအိုအသီးအပေါ်သို့ အိပ်မက်စွမ်းအားများ သုံးလိုက်ရာ၊ ဝိညာဉ်များကို ဆွဲငင်နိုင်သည့် ထိုစွမ်းအားကြောင့် အင်မော်တယ်ဝိညာဉ်ပင်လျှင် အပြင်သို့ ဆွဲထုတ်ခြင်း ခံလိုက်ရတော့သည်။

"ဒါ... ဒါက ဘယ်လိုလုပ် ဖြစ်နိုင်မှာလဲ... သာမန် လူသားတစ်ယောက်က ငါ ချီလေ့အင်မော်တယ်ရဲ့ တည်ရှိမှုကို ဘယ်လိုလုပ် သိသွားတာလဲ...”

"မင်း ငါ့ကို ဘယ်တုန်းကတည်းက သိနေတာလဲ...”

ခဏအတွင်းမှာပင် တာအိုအသီးထဲမှ ဝေဝါးသော ဝိညာဉ်တစ်ခုမှာ ရုန်းကန်လျက် ထွက်ပေါ်လာ၏။ ၎င်း၏ ဝိညာဉ်ခန္ဓာကိုယ်မှာ ပျက်စီးယိုယွင်းနေပြီး လေထဲမှ ဖယောင်းတိုင်မီးကဲ့သို့ပင် ပျောက်ကွယ်လုနီးပါး ဖြစ်နေချေပြီ။

အကယ်၍ သာမန်ဝိညာဉ်သာဆိုလျှင် ဤကဲ့သို့သော ဒဏ်ရာမျိုးဖြင့် သေဆုံးနေသည်မှာ ကြာပြီ ဖြစ်ပေလိမ့်မည်။

သို့သော် ဤသည်မှာ အင်မော်တယ်ဝိညာဉ်ဖြစ်သဖြင့် ထိုမျှလောက်နှင့် မသေနိုင်ချေ။

ဝုန်း...။

၎င်း ထွက်ပေါ်လာသည်နှင့်တစ်ပြိုင်နက် ပတ်ဝန်းကျင်ရှိ လောက၏ ဝိညာဉ်စွမ်းအင်များမှာ လှုပ်ခတ်လာပြီး ကြီးမားသော စွမ်းအင်ဝဲဂယက်တစ်ခု ဖြစ်ပေါ်လာရာ ဤနေရာတစ်ခုလုံး၏ အရှင်သခင်ကဲ့သို့ပင် ဖြစ်နေတော့၏။

သို့သော် ယခုအခါ ၎င်း၏ မျက်ဝန်းများတွင် ထိတ်လန့်မှုများ ပြည့်နှက်နေပြီး ကျိုးစွေ့ကို မယုံကြည်နိုင်စွာ စိုက်ကြည့်နေမိလေသည်။

အဘယ်ကြောင့်ဆိုသော် ၎င်း၏ မူလအကြံအစည်မှာ ဤလူသားက မြေကမ္ဘာအင်မော်တယ်တာအိုအသီးကို ဝါးမြိုရန် ကြိုးစားချိန်တွင် အခွင့်ကောင်းယူကာ ထိုလူသား၏ဝိညာဉ်ကို ဖျက်ဆီး၍ ခန္ဓာကိုယ်ကို လုယူပြီး အသက်ပြန်ရှင်ရန် ဖြစ်သောကြောင့်ပင်။

အကယ်၍ အင်မော်တယ်တာအိုအသီးကို အသုံးပြုပြီး လူပြန်ဝင်စားနိုင်မည်ဆိုပါက အကောင်းဆုံးပင် ဖြစ်ပေလိမ့်မည်။

မိမိ၏ မှတ်ဉာဏ်အားလုံးကို ထိန်းသိမ်းထားနိုင်ရုံတင်မက၊ တာအိုအသီး၏ စွမ်းအားဖြင့် ယခင် ကျင့်ကြံမှုအဆင့်ကိုလည်း လျင်မြန်စွာ ပြန်လည် ရရှိနိုင်ပေသည်။

သို့သော် ကံဆိုးသည်မှာ ၎င်း၏ဒဏ်ရာမှာ အလွန် ပြင်းထန်လွန်းလှသဖြင့် ရွေးချယ်ခွင့် မရှိခဲ့ချေ။

၎င်းအတွက် အကောင်းဆုံးနည်းလမ်းမှာ သက်ရှိတစ်ခုခု၏ ခန္ဓာကိုယ်ကို လုယူပြီး အသက်ပြန်ရှင်ရန်သာ ရှိတော့၏။

လုယူလိုက်သည့် ခန္ဓာကိုယ်မှာ မိမိနှင့် သင့်တော်ချင်မှ သင့်တော်မည် ဖြစ်သော်လည်း၊ အင်မော်တယ်တစ်ယောက်အနေဖြင့် အသက်ရှင်နေနိုင်သရွေ့ ချို့ယွင်းချက်များကို ပြန်လည် ပြုပြင်ရန် အခွင့်အလမ်း ရှိနေသေးသည်။

သို့သော် မိမိ၏ ချို့ယွင်းချက်မရှိသော အကြံအစည်ကြီးမှာ ဤလူသား၏ လက်ထဲတွင် ပျက်စီးသွားရလိမ့်မည်ဟု မည်သူက ထင်မှတ်ထားပါမည်နည်း။

ထို့ထက်ပို၍ ဤလူသားမှာ ထူးဆန်းသော ကူပိုးကောင်ကို အသုံးပြုပြီး မိမိ၏ ဝိညာဉ်ကို ဝါးမြိုရန်ပင် ကြိုးစားနေသေး၏။

သေးနုပ်လှသော လူသားတစ်ယောက်က အင်မော်တယ်တစ်ယောက်ကို သတ်ရန် ကြိုးစားနေခြင်းမှာ တကယ်ကို မောက်မာလွန်းလှသည် မဟုတ်ပါလော။

၎င်း၏ စိတ်ထဲတွင် အဆုံးစမဲ့သော ဒေါသများ တဟုန်းဟုန်း လောင်ကျွမ်းလာလေသည်။

"ဝါးမြိုစမ်း...”

ကျိုးစွေ့ကမူ ဤအင်မော်တယ် ဝိညာဉ်အကြွင်းအကျန်ကို ဂရုမစိုက်အားချေ။ ဤကဲ့သို့သော ထူးခြားသည့်တည်ရှိမှုနှင့် ရင်ဆိုင်ရချိန်တွင် စကားတစ်ခွန်း ပိုပြောမိရုံနှင့်ပင် အသက်ဆုံးရှုံးသွားနိုင်သောကြောင့် ဖြစ်ပေသည်။

ဤလူကို အမြန်ဆုံး အပြတ်ရှင်းလိုက်ခြင်းကသာ အကောင်းဆုံး ရွေးချယ်မှုပင် ဖြစ်၏။ ဤအင်မော်တယ် ဝိညာဉ်အကြွင်းအကျန်ကို အပြီးသတ် မချေမှုန်းနိုင်သရွေ့ သူသည် မည်သည့်အခါမှ ပေါ့ဆမည်မဟုတ်ပေ။

ဝုန်း...။

ဤအခိုက်အတန့်တွင် ‘အိပ်မက်ဝိညာဉ်ကူ’က ပါးစပ်ကို ဟလိုက်ရာ တစ်ကိုယ်လုံးမှာ အိပ်မက်ဆိုး ကမ္ဘာဦးတွင်းပေါက်ကြီးတစ်ခုအလား ပြောင်းလဲသွားပြီး၊ အနှိုင်းမဲ့ ဝါးမြိုခြင်းစွမ်းအားများ ထွက်ပေါ်လာကာ အင်မော်တယ် ဝိညာဉ်အကြွင်းအကျန်ထံသို့ တဟုန်ထိုး ပြေးဝင်သွားတော့၏။

ယခုအချိန်တွင် ‘အိပ်မက်ဝိညာဉ်ကူ’မှာ အလွန်အမင်း စိတ်လှုပ်ရှားနေချေပြီ။

အဘယ်ကြောင့်ဆိုသော် ဤဝိညာဉ်အကြွင်းအကျန်အတွင်း၌ မည်မျှ ကြောက်မက်ဖွယ်ကောင်းသော ဝိညာဉ်စွမ်းအင်များ ကိန်းအောင်းနေသည်ကို ၎င်းက အာရုံခံမိသောကြောင့် ဖြစ်ပေသည်။

အင်မော်တယ် ဝိညာဉ်တစ်စွန်းတစ်စမျှသာ ဖြစ်သော်လည်း အခြားသော ဝိညာဉ်များအနေဖြင့် နှိုင်းယှဉ်နိုင်စွမ်း မရှိချေ။

အကယ်၍ ဤအင်မော်တယ်ဝိညာဉ်ကိုသာ ဝါးမြိုနိုင်မည်ဆိုပါက ၎င်း၏ ကျင့်ကြံမှုအဆင့်မှာ အဆမတန် မြင့်တက်လာဖွယ် ရှိသည်။

ဤသည်မှာ ၎င်းအတွက် စိတ်ကူး၍ပင် မရနိုင်သော ကံကောင်းမှုကြီး ဖြစ်ပေသည်။

"ရပ်စမ်း... အခုချက်ချင်း ရပ်လိုက်စမ်း...”

"ငါဟာ အင်မော်တယ်လောကက အင်မော်တယ်တစ်ပါးပဲ။ အင်မော်တယ်လောကရဲ့ လျှို့ဝှက်ချက်ပေါင်းများစွာကိုလည်း သိထားတယ်…"

"မင်း အင်မော်တယ်ဖြစ်လာမယ့် လျှို့ဝှက်ချက်တွေကို မသိချင်ဘူးလား…"

"ငါ့ကိုသာ လွှတ်ပေးမယ်ဆိုရင် ငါ့တစ်သက်တာ သင်ယူခဲ့သမျှတွေနဲ့ အင်မော်တယ်တွေနဲ့ ပတ်သက်တဲ့ လျှို့ဝှက်ချက်အားလုံးကို သင်ပေးမယ်…"

ထိုအင်မော်တယ် ဝိညာဉ်အကြွင်းအကျန်၏ မျက်နှာတွင် ကြောက်ရွံ့တုန်လှုပ်မှုများ အထင်းသား ပေါ်လွင်နေ၏။ ၎င်းသည် ကျိုးစွေ့ကို သွေးဆောင်ရန် ကြိုးစားနေခြင်းပင် ဖြစ်လေသည်။

သို့သော်လည်း ထိုကဲ့သို့သော သွေးဆောင်မှုများကို ကျိုးစွေ့က လုံးဝ ဂရုမစိုက်ချေ။

အင်မော်တယ်လောက၏ လျှို့ဝှက်ချက်များမှာ အမှန်တကယ်ပင် အရေးကြီးပေသည်။ သို့သော် မိမိ၏ အသက်မှာမူ ထိုထက်ပို၍ အရေးကြီး၏။

ဇာတ်မြစ်ကို မသိရသည့် အင်မော်တယ် ဝိညာဉ်အကြွင်းအကျန်တစ်ခုကို မိမိဘေးတွင် ထားရှိခြင်းမှာ မိမိကိုယ်တိုင် ဒုက္ခရှာခြင်းသာ ဖြစ်ပေသည်။

တစ်ဖက်လူသည် မည်သည့်အချိန်တွင် ရုတ်တရက် တိုက်ခိုက်လာမည်ကို မည်သူမျှ မသိနိုင်သကဲ့သို့၊ မည်သို့သော နည်းလမ်းများ ရှိနေဦးမည်ကိုလည်း မည်သူမျှ မခန့်မှန်းနိုင်ချေ။

ထို့ကြောင့် ဤအင်မော်တယ် ဝိညာဉ်အကြွင်းအကျန်ကို အပြီးသတ် သုတ်သင်လိုက်ခြင်းကသာ အကောင်းဆုံး ဖြစ်ပေလိမ့်မည်။

ရရှိမည့် အကျိုးအမြတ်မှာ အနည်းငယ် နည်းပါးသွားလျှင်ပင် အနည်းဆုံးအနေဖြင့် မိမိကိုယ်မိမိ ဘေးကင်းအောင် ကာကွယ်နိုင်မည် မဟုတ်ပါလော။

ထို့အပြင် ယခုအချိန်တွင် သူ၏ ကျင့်ကြံမှုမှာလည်း နိမ့်ပါးနေသေးရာ အင်မော်တယ်လောက၏ လျှို့ဝှက်ချက်များကို သိရှိခဲ့လျှင်ပင် အချိန်တိုအတွင်း အင်မော်တယ်လောကသို့ တက်လှမ်းနိုင်မည် မဟုတ်ချေ။

ထို့ကြောင့် အင်မော်တယ် ဝိညာဉ်အကြွင်းအကျန်၏ သွေးဆောင်မှုကို သူ လုံးဝပင် အရေးမစိုက်ခဲ့ချေ။ ဤသည်မှာ မျက်မမြင်ကို မျက်စိမှိတ်ပြနေသကဲ့သို့ အပိုအလုပ်သာ ဖြစ်လေသည်။