အခန်း ၇၈၀

အခန်း (၇၈၀) - မြေကမ္ဘာအင်မော်တယ်တာအိုအသီးကို ရရှိခြင်း၊ အင်မော်တယ်ဝိညာဉ်အကြွင်းအကျန်ကို ဝါးမျိုခြင်း၊ ကံကြမ္မာသားတော်၏ အခွင့်အလမ်း(၅)။

"ယုတ်မာလှချည်လား"

"သာမန် လူသားလေးတစ်ယောက်ကတောင် အင်မော်တယ်ကို သတ်ချင်နေတာလား"

"မင်းကတော့ တကယ့်ကို အိပ်မက်လာမက်နေတာပဲ"

"ငါ ချီလေ့အင်မော်တယ် သေရမယ်ဆိုရင်တောင် မင်းကိုလည်း ကောင်းကောင်းနေခွင့်ပေးမှာ မဟုတ်ဘူး"

ထိုအင်မော်တယ် ဝိညာဉ်အကြွင်းအကျန်မှာ ဒေါသတကြီးဖြင့် ဟိန်းဟောက်လိုက်၏။ မိမိ၏ စကားများမှာ ဤကောင်လေးအပေါ်တွင် အကျိုးသက်ရောက်မှုမရှိဘဲ မိမိကို သတ်ရန်သာ ဆန္ဒပြင်းပြနေသည်ကို ၎င်း သတိပြုမိသွားလေသည်။

ထို့ကြောင့် မျှော်လင့်ချက် ကင်းမဲ့သွားချိန်တွင် ၎င်းမှာ ရူးသွပ်သွားကာ အင်မော်တယ်ဝိညာဉ်ကို ဖောက်ခွဲ၍ ဤလူသားနှင့် အတူတူသေရန် ကြိုးစားလိုက်တော့၏။

သို့သော်လည်း ဝမ်းနည်းစရာကောင်းသည်မှာ ထိုသို့ ပြုလုပ်ရန် နောက်ကျသွားခဲ့‌ချေပြီ။

ဘုန်း...။

နောက်တစ်စက္ကန့်တွင် ‘အိပ်မက်ဝိညာဉ်ကူ’က ထိုအင်မော်တယ် ဝိညာဉ်အကြွင်းအကျန်ကို တစ်လုတ်တည်းဖြင့် ဝါးမြိုလိုက်၏။

ချက်ချင်းဆိုသလိုပင် ထိုအင်မော်တယ် ဝိညာဉ်အကြွင်းအကျန်မှာ အိပ်မက်ကမ္ဘာတစ်ခုထဲသို့ ကျရောက်သွားသကဲ့သို့ ခံစားလိုက်ရပြီး၊ အိပ်မက်စွမ်းအားများက ၎င်း၏ဝိညာဉ် အနက်ရှိုင်းဆုံးအပိုင်းအထိ စိမ့်ဝင်သွားကာ အိပ်မက်ကမ္ဘာထဲတွင် နစ်မြုပ်သွားစေတော့သည်။

အကယ်၍ ၎င်းသာ စွမ်းအားအပြည့်အဝ ရှိနေသည့်အချိန်မျိုး၊ သို့မဟုတ် အခြေအနေ အနည်းငယ် ကောင်းမွန်နေဦးမည်ဆိုပါက ‘အိပ်မက်ဝိညာဉ်ကူ’၏ စွမ်းအားဖြင့် လှည့်စားခြင်းကို ခံရမည် မဟုတ်ချေ။

သို့သော် ယခုမူ မတူတော့ချေ။ ၎င်းမှာ အလွန်အမင်း အားနည်းနေပြီ ဖြစ်ပြီး မည်သည့် စွမ်းအားကိုမျှ အသုံးမပြုနိုင်တော့ချေ။ ‘အိပ်မက်ဝိညာဉ်ကူ’၏ အိပ်မက်စွမ်းအားကို ရင်ဆိုင်ရချိန်တွင် ခုခံနိုင်စွမ်း လုံးဝ မရှိတော့သည်မှာ သဘာဝပင် ဖြစ်၏။

ဝုန်း...။

မျက်စိတစ်မှိတ်အတွင်းမှာပင် ၎င်းမှာ အဆုံးမရှိသော မှောင်မိုက်မှုထဲသို့ ကျဆင်းသွားပြီး ထိုအင်မော်တယ်ဝိညာဉ်မှာ အိပ်မက်ဆိုး အစာအိမ်ရည်များဖြင့် ဝန်းရံခံလိုက်ရကာ တဖြည်းဖြည်း အရည်ပျော်၍ အစာခြေခြင်းကို ခံလိုက်ရတော့သည်။

"မဖြစ်နိုင်ဘူး... မဖြစ်နိုင်ဘူး"

ချီလေ့အင်မော်တယ်မှာ နာကျင်စွာဖြင့် အော်ဟစ်လိုက်မိ၏။ ၎င်းသည် ဝိညာဉ်လောကသို့ ခိုးကြောင်ခိုးဝှက် ဆင်းသက်လာခဲ့ပြီး ခက်ခက်ခဲခဲ အသက်ရှင်သန်နေခဲ့သော်လည်း၊ နောက်ဆုံးတွင် သာမန်လူသားတစ်ဦး၏ လက်ချက်ဖြင့် သေဆုံးရလိမ့်မည်ဟု မထင်မှတ်ထားခဲ့ချေ။

အင်မော်တယ်များ လူသားကမ္ဘာသို့ ဆင်းသက်လာပါက အင်မော်တယ်လောကသို့ ပြန်နိုင်ရန်မှာ အလွန်ခဲယဉ်းကြောင်း ၎င်း အရင်ကတည်းက ကြားဖူးခဲ့သည်။

အဘယ်ကြောင့်ဆိုသော် အင်မော်တယ်များသည် ကမ္ဘာလောက၏ နိယာမများ၏ ဖိနှိပ်မှုကို ခံရသောကြောင့်ပင် ဖြစ်၏။ စွမ်းအားများ ကန့်သတ်ခံရရုံသာမက ကံဆိုးမှုများနှင့်လည်း ဆက်တိုက် ကြုံတွေ့ရပြီး ကပ်ဘေးပေါင်းစုံကို ရင်ဆိုင်ရလေ့ ရှိသည်။

သို့မဟုတ်ပါက အင်မော်တယ် မည်မျှအထိ လူသားလောကသို့ ဆင်းသက်လာမည်ကို မည်သူမျှ မသိနိုင်ချေ။

သို့သော် မိမိသည် သာမန်လူသားတစ်ဦး၏ လက်ထဲတွင် သေဆုံးရလိမ့်မည်ဟုမူ ၎င်း တစ်ခါမျှ မတွေးတောခဲ့မိချေ။ မိမိ၏ တစ်သက်တာ ကျင့်ကြံမှုများ အားလုံးမှာ ပျက်စီးသွားရရုံသာမက အခြားသူကိုပါ လက်ဆောင် ပေးလိုက်ရသကဲ့သို့ ဖြစ်သွားလေသည်။

သို့သော် မည်သို့ပင် မကျေမနပ် ဖြစ်နေသည်ဖြစ်စေ၊ မည်သို့မျှ မတတ်နိုင်တော့ချေ။ ၎င်းမှာ ‘အိပ်မက်ဝိညာဉ်ကူ’၏ ခန္ဓာကိုယ်အတွင်း၌ပင် သေဆုံးသွားခဲ့ရပြီး၊ ထိုဝိညာဉ်အကြွင်းအကျန်မှာလည်း ‘အိပ်မက်ဝိညာဉ်ကူ’၏ ချေဖျက်ခြင်းကို ခံလိုက်ရကာ ကြီးမားလှသော ဝိညာဉ်စွမ်းအင်များအဖြစ် ပြောင်းလဲသွားတော့၏။

"ဒါက..."

ခဏချင်းမှာပင် ‘အိပ်မက်ဝိညာဉ်ကူ’၏ စွမ်းအားမှာ အဆမတန် တိုးတက်လာသည်ကို ကျိုးစွေ့ ခံစားလိုက်ရ၏။

ဤသည်မှာ အင်မော်တယ် ဝိညာဉ်အကြွင်းအကျန်မျှသာ ဖြစ်သော်လည်း ၎င်းအတွင်း၌ ပါဝင်သော ဝိညာဉ်စွမ်းအင်မှာ သာမန် ကောင်းကင်မိစ္ဆာများထက် များစွာ သာလွန်လှသည်။

ယင်းက ‘အိပ်မက်ဝိညာဉ်ကူ’အတွက် နှစ်ပေါင်းသောင်းချီ သက်တမ်းရှိသော ဝိညာဉ်ဆေးပင်များကို စားသုံးလိုက်ရသကဲ့သို့ပင် ဖြစ်၏။

အတွင်းရှိ ဆေးအာနိသင်မှာ မယုံနိုင်လောက်အောင်ပင် ကြမ်းတမ်းလှပြီး ရေကြီးရေလျှံဖြစ်နေသော မြစ်ရေများကဲ့သို့ ၎င်း၏ ခန္ဓာကိုယ်အတွင်းသို့ စီးဝင်သွားကာ ‘အိပ်မက်ဝိညာဉ်ကူ’၏ စွမ်းအားကို အဆပေါင်းများစွာ တိုးတက်လာစေတော့သည်။

ဆဌမအဆင့် အောက်ခြေအဆင့်။

ချက်ချင်းဆိုသလိုပင် ‘အိပ်မက်ဝိညာဉ်ကူ’၏ ခန္ဓာကိုယ်မှာ တုန်ခါသွားပြီး အံ့ဩဖွယ်ကောင်းသော အပြောင်းအလဲများ ဖြစ်ပေါ်လာလေသည်။

မူလအရွယ်အစားထက် နှစ်ဆခန့် ပိုမို ကြီးမားလာ၏။ ခုနစ်ရောင်ခြည် ဖြာထွက်နေသော ခန္ဓာကိုယ်ပေါ်တွင်လည်း နက်နဲလှသော လျှို့ဝှက်အမှတ်အသားများ ခပ်စိပ်စိပ် ထွက်ပေါ်လာလေသည်။

၎င်း၏ ခန္ဓာကိုယ်အတွင်းရှိ အိပ်မက်ဆိုး ဟင်းလင်းပြင်မှာလည်း ပိုမို ကျယ်ဝန်းလာပုံ ရသည်။ ခန္ဓာကိုယ်အတွင်း၌ အိပ်မက်ပူပေါင်းပေါင်းများစွာကို ထည့်သွင်း ထိန်းသိမ်းထားနိုင်စွမ်း ရှိလာတော့သည်။

'ဆဌမအဆင့် ‘အိပ်မက်ဝိညာဉ်ကူ’ရဲ့ ခန္ဓာကိုယ်ထဲက အိပ်မက်ကမ္ဘာဟာ အခုဆိုရင် သုံးထပ်အိပ်မက်ကမ္ဘာ ဖြစ်သွားပြီပဲ…'

ကျိုးစွေ့သည် ‘အိပ်မက်ဝိညာဉ်ကူ’၏ ခန္ဓာကိုယ်အတွင်းရှိ အိပ်မက်ကမ္ဘာ၏ အစွမ်းထက်မှုကို ခံစားမိလိုက်၏။

သုံးထပ်အိပ်မက်ကမ္ဘာသို့ ရောက်ရှိသွားပြီဖြစ်ရာ လေဟာနယ်သန့်စင်ခြင်းအဆင့် ကျင့်ကြံသူကြီးများပင်လျှင် အိပ်မက်ကမ္ဘာထဲသို့ ရောက်သွားပါက အလွယ်တကူ ထွက်နိုင်မည် မဟုတ်ချေ။

တစ်ကြိမ် အိပ်မက်ထဲသို့ ဆွဲသွင်းနိုင်ခဲ့ပါက ရန်သူ၏ဝိညာဉ်မှာ လွတ်မြောက်ရန် လွန်စွာ ခဲယဉ်းသွားပေလိမ့်မည်။

ထို့အပြင် ဆဌမအဆင့် ‘အိပ်မက်ဝိညာဉ်ကူ’သည် အိပ်မက်ကမ္ဘာမျိုးစေ့ကိုလည်း ဖန်တီးနိုင်စွမ်း ရှိလာချေသည်။

ဤအိပ်မက်ကမ္ဘာမျိုးစေ့သည် ကီလိုမီတာ သန်းတစ်ရာ ပတ်လည်အတွင်းရှိ သက်ရှိအားလုံး၏ အိပ်မက်များကို သက်ရောက်မှု ရှိစေနိုင်ပြီး၊ သက်ရှိအားလုံး၏ အိပ်မက်များကို တစ်ခုတည်းအဖြစ် ပေါင်းစည်းကာ ကြီးမားလှသော အိပ်မက်ကမ္ဘာတစ်ခုကို ဖန်တီးနိုင်သည်။

သက်ရှိများစွာ၏ အိပ်မက်များသည် အိပ်မက်ကမ္ဘာမျိုးစေ့အတွင်းသို့ ဝင်ရောက်သွားမည် ဖြစ်၏။ ထိုအခါ ‘အိပ်မက်ဝိညာဉ်ကူ’သည် သက်ရှိများ၏ အိပ်မက်စွမ်းအားကို စားသုံးပြီး မိမိ၏စွမ်းအားကို အဆက်မပြတ် တိုးတက်စေနိုင်မည် ဖြစ်သည်။

'အိုး... ငါသာ ဖုန်းရှီးမြို့တော်မှာ အိပ်မက်ကမ္ဘာမျိုးစေ့ရဲ့ စွမ်းအားကို သုံးလိုက်ရင် ဖုန်းရှီးမြို့တော် တစ်ခုလုံးမှာရှိတဲ့ သက်ရှိတွေရဲ့ အိပ်မက်တွေကို ထိုးထွင်းသိမြင်နိုင်မှာ မဟုတ်လား…'

'အကယ်၍ ငါသာ မကောင်းတဲ့စိတ် ရှိမယ်ဆိုရင် ဖုန်းရှီးမြို့တော်မှာရှိတဲ့ လူသားအားလုံးရဲ့ ဝိညာဉ်တွေကိုတောင် အိပ်မက်ကမ္ဘာထဲကို ဆွဲသွင်းလို့ရတယ်…'

'ဒါတင်မကဘူး၊ ဒီစွမ်းအားကို သုံးပြီးတော့ သက်ရှိတွေရဲ့ မှတ်ဉာဏ်တွေကို တိတ်တဆိတ် ခိုးယူပြီး သတင်းအချက်အလက် အများကြီးကိုလည်း ရယူနိုင်သေးတယ်…'

ကျိုးစွေ့က မေးစေ့ကို ပွတ်သပ်ရင်း တွေးတောနေမိ၏။ ဆဌမအဆင့် အောက်ခြေအဆင့် အဆင့်သို့ ရောက်ရှိသွားသော ‘အိပ်မက်ဝိညာဉ်ကူ’မှာ ယခင်ကထက် အဆပေါင်း ဆယ်ဂဏန်းမက ပိုမို အစွမ်းထက်လာခဲ့ပြီ ဖြစ်လေသည်။

ယခုအခါ ‘အိပ်မက်ဝိညာဉ်ကူ’သည် အိပ်မက်ကမ္ဘာ၏ အရှင်သခင်တစ်ဦးကဲ့သို့သော အရှိန်အဝါမျိုးအား အနည်းငယ် ပိုင်ဆိုင်လာခဲ့ပြီ ဖြစ်၏။

'ဆဌမအဆင့် ‘အိပ်မက်ဝိညာဉ်ကူ’က သွေးမျိုးဆက် နတ်ဘုရားစွမ်းရည် တစ်ခုကိုလည်း ရရှိခဲ့တာပဲ…'

'ဒီနတ်ဘုရားစွမ်းရည်ရဲ့ အမည်က “အိပ်မက်နယ်မြေလျှောက်လှမ်းခြင်း” တဲ့လား…'

ကျိုးစွေ့က မျက်လုံးကို အသာအယာ မှေးလိုက်၏။ ဤသည်မှာ အမှန်တကယ်ပင် အလွန် အစွမ်းထက်သော နတ်ဘုရားစွမ်းရည် ဖြစ်ပေသည်။

ဤစွမ်းရည်ကို အသုံးပြုလိုက်သည်နှင့် ခန္ဓာကိုယ်ကို အိပ်မက်ကမ္ဘာ၏ သက်ရှိတစ်ခုအဖြစ် ပြောင်းလဲစေကာ အိပ်မက်ကမ္ဘာအတွင်းသို့ ဝင်ရောက်သွားစေနိုင်သည်။

အိပ်မက်ကမ္ဘာသည် လက်တွေ့ကမ္ဘာတွင် တည်ရှိနေခြင်းမဟုတ်ဘဲ အခြားသော အပြိုင်စကြဝဠာ အာကာသအချိန်လောကတစ်ခုတွင် တည်ရှိနေခြင်း ဖြစ်သည်ကို သိထားရ‌ပေမည်။ တစ်ကြိမ် အိပ်မက်ကမ္ဘာထဲသို့ ခြေချလိုက်ပြီဆိုလျှင် အခြားသူများအနေဖြင့် မိမိ၏တည်ရှိမှုကို သတိထားမိရန်မှာ လွန်စွာ ခဲယဉ်းလှပေသည်။

ထွက်ပြေးရန် ဖြစ်စေ၊ ခရီးသွားရန် ဖြစ်စေ ဤနတ်ဘုရားစွမ်းရည်မှာ အသုံးဝင်လှသည်။

အိပ်မက်ကမ္ဘာ၏ သက်ရှိအဖြစ် ပြောင်းလဲသွားပါက အိပ်မက်ကမ္ဘာအတွင်း၌ တည်နေရာပြောင်းရွှေ့ခြင်းကို ပြုလုပ်နိုင်ပြီး အရှိန်အဝါမှာလည်း မယုံနိုင်လောက်အောင် မြန်ဆန်ပေသည်။ မျက်စိတစ်မှိတ်အတွင်း ကီလိုမီတာ တစ်သန်းအထိ ရွှေ့လျားနိုင်၏။

'ဒီနတ်ဘုရားစွမ်းရည်ရဲ့ အစွမ်းကတော့ တကယ်ကို ကြီးမားတာပဲ…'

'ဒါပေမဲ့ အသုံးပြုနိုင်တဲ့ အချိန်ကတော့ အရမ်းတိုတောင်းလွန်းတယ်…'

'ငါ့ရဲ့ လက်ရှိကျင့်ကြံမှုအရ ဆိုရင်တော့ အများဆုံး တစ်မိနစ်လောက်ပဲ ခံနိုင်ရည် ရှိမယ်…'

ကျိုးစွေ့က မေးစေ့ကို ပွတ်သပ်ရင်း တွေးတောလိုက်မိ၏။

ဤနတ်ဘုရားစွမ်းရည်ကို အသုံးပြုခြင်းမှာ ကြီးမားသော စွန့်စားမှုလည်း ရှိနေသည်မှာ အမှန်ပင် ဖြစ်၏။

အကယ်၍ အိပ်မက်ကမ္ဘာအတွင်း၌ အချိန်ကြာမြင့်စွာ နေထိုင်မိပါက အိပ်မက်စွမ်းအား၏ တိုက်စားမှုကို ခံရမည်ဖြစ်ပြီး ထာဝရ အိပ်မက်ကမ္ဘာ၏ သက်ရှိတစ်ခုအဖြစ် ပြောင်းလဲသွားကာ လက်တွေ့ကမ္ဘာသို့ ပြန်မလာနိုင်တော့မည့် အန္တရာယ်ရှိ၏။

သူ၏ လက်ရှိကျင့်ကြံမှုအရ တစ်မိနစ်ခန့်သာ အိပ်မက်စွမ်းအား၏ တိုက်စားမှုကို ခံနိုင်ရည် ရှိသည်။ ထိုအချိန်ထက် ကျော်လွန်သွားပါက ခန္ဓာကိုယ်ကို ထိခိုက်ပျက်စီးစေလိမ့်မည် ဖြစ်၏။

မှန်ပေသည်၊ သူ၏ကျင့်ကြံမှု မြင့်မားလာသည်နှင့်အမျှ အသုံးပြုနိုင်သည့် အချိန်မှာလည်း တိုးတက်လာမည် ဖြစ်သည်။

သို့သော်ငြား တစ်မိနစ်ခန့် အိပ်မက်နယ်မြေအတွင်း လျှောက်လှမ်းနိုင်ခြင်းမှာပင် လုံလောက်အောင် အစွမ်းထက်လှပြီ ဖြစ်၏။ အရေးကြီးသော အချိန်များတွင် အသုံးပြုပါက အသက်ဘေးမှ လွတ်မြောက်နိုင်မည့် နည်းလမ်းကောင်းတစ်ခုပင် ဖြစ်ချေသည်။

ဝုန်း...။

ထိုသို့ တွေးတောရင်း ကျိုးစွေ့က အတွေးတစ်ချက်ဖြင့် ထိုနတ်ဘုရားစွမ်းရည်ကို စမ်းသပ် အသုံးပြုကြည့်လိုက်၏။

ချက်ချင်းဆိုသလိုပင် သူ၏ ခန္ဓာကိုယ်မှာ ဝေဝါးသွားပြီး တစ်ကိုယ်လုံးမှာ အတွေးစလေးတစ်ခု၊ မီးခိုးငွေ့လေးတစ်ခုကဲ့သို့ ဖြစ်သွားကာ အပြိုင်စကြဝဠာ အာကာသအချိန်လောက အဆင့်ဆင့်ကို ဖြတ်ကျော်၍ အိပ်မက်ကမ္ဘာအတွင်းသို့ ဝင်ရောက်သွားတော့၏။

ဤအချိန်တွင် ကျိုးစွေ့သည် မိမိ၏ခန္ဓာကိုယ်မှာ အပြိုင်စကြဝဠာ အာကာသအချိန်လောက၏ အနက်ရှိုင်းဆုံး တစ်နေရာတွင် ရောက်ရှိနေသကဲ့သို့ ခံစားလိုက်ရသည်။ ဤနေရာသည် သာမန်ကျင့်ကြံသူများ ထိတွေ့နိုင်သော ကမ္ဘာလောက မဟုတ်ဘဲ စိတ်ဝိညာဉ်ဟင်းလင်းပြင်တစ်ခုနှင့် တူပေသည်။

ပတ်ဝန်းကျင်တွင် မည်သည့် နေရောင်ခြည်မျှမရှိဘဲ မှောင်မိုက်၍ ဘာမှမရှိသော ဟင်းလင်းပြင်ကြီးသာ ဖြစ်ကာ၊ ရံဖန်ရံခါတွင် ကြောက်မက်ဖွယ်ကောင်းသော စိတ်ဝိညာဉ်မုန်တိုင်းများ တိုက်ခတ်နေ၏။

အိပ်မက်ကမ္ဘာ အနက်ရှိုင်းဆုံးနေရာတွင်လည်း ကောင်းကင်မိစ္ဆာများစွာ၏ ဟိန်းဟောက်သံများကို ခပ်သဲ့သဲ့ ကြားနေရသည်။

ထိုအပြိုင်စကြဝဠာ အာကာသအချိန်လောကအတွင်း၌ ကောင်းကင်မိစ္ဆာများစွာ နေထိုင်နေကြပြီး လက်တွေ့ကမ္ဘာမှ ရောက်ရှိလာသော မကောင်းသော အတွေးပေါင်းစုံကို စားသုံးနေကြခြင်းပင် ဖြစ်၏။

'ကောင်းကင်မိစ္ဆာတွေက ဒီလိုမျိုး မွေးဖွားလာကြတာလား…'

'ကောင်းကင်မိစ္ဆာဆိုတာ သက်ရှိအားလုံးရဲ့ မကောင်းတဲ့ အတွေးတွေကနေ ဖြစ်ပေါ်လာတဲ့ မိစ္ဆာကောင်တွေပေါ့လေ…'

'အဲဒီလိုသာဆိုရင် ကောင်းကင်မိစ္ဆာတွေကို ဘာလို့ အမြစ်ပြတ် သုတ်သင်လို့ မရတာလဲ ဆိုတာ နားလည်နိုင်ပြီပဲ…'

ကျိုးစွေ့က အံ့ဩတကြီးဖြင့် ရေရွတ်လိုက်မိ၏။

နယ်ပယ်ပြင်ပ ကောင်းကင်မိစ္ဆာများ၏ ဇာတ်မြစ်ကို သူ သိရှိသွားပြီဟု ခံစားလိုက်ရသည်။ ၎င်းတို့မှာ သက်ရှိအားလုံး၏ မကောင်းသော အတွေးများမှ ဖန်တီးခံရခြင်းဖြစ်ပြီး သက်ရှိများ ရှိနေသရွေ့ ၎င်းတို့လည်း ရှိနေဦးမည် ဖြစ်၏။

သက်ရှိများ ပိုမို အစွမ်းထက်လာလေလေ ကောင်းကင်မိစ္ဆာများလည်း ပိုမို အစွမ်းထက်လာလေလေ ဖြစ်ပေလိမ့်မည်။

ဤသည်မှာ အလင်းနှင့် အမှောင်ကဲ့သို့ပင်ဖြစ်ရာ တစ်ခုနှင့်တစ်ခု အမှီသဟဲပြုလျက် ရှိနေကြသည်မှာ မရှိမဖြစ်ပင် ဖြစ်ပေတော့သည်။