အခန်း ၃၅၇

အခန်း (၃၅၇) လိုက်လံသတ်ဖြတ်ခြင်း

လျန်ကျုံးဖူ၏ မျက်လုံးများ ပြူးကျယ်သွားပြီး မျက်တောင်များပင် ကျွတ်ထွက်မတတ် ဖြစ်သွားရ၏။ ယာရှန်းဂိုဏ်းသည် ပတ်ဝန်းကျင်ရှိ ဂိုဏ်းကြီးတစ်ခုအဖြစ် သတ်မှတ်ခံရသော်လည်း ဂိုဏ်းအတွင်း၌ ဒွာရသန့်စင်ခြင်း အဆင့် ပညာရှင် သိပ်မများလှသလို ဒွာရသန့်စင်ခြင်း နောက်ဆုံးအဆင့် ပညာရှင် ဆိုသည်မှာလည်း လုံးဝ မရှိပေ။

ဒွာရသန့်စင်ခြင်း အစောပိုင်းအဆင့် တစ်ယောက်သည်ပင် ယာရှန်းဂိုဏ်းအတွက် အလွန်တန်ဖိုးရှိသော တိုက်ခိုက်ရေးစွမ်းအား တစ်ခု ဖြစ်နေချိန်တွင် ဒွာရသန့်စင်ခြင်း အလယ်အလတ်အဆင့် ဆိုလျှင် ဆိုဖွယ်ရာပင် မရှိတော့ချေ။ ယာရှန်းဂိုဏ်း တစ်ခုလုံးတွင် ဒွာရသန့်စင်ခြင်း အလယ်အလတ်အဆင့် ဆို၍ သုံးယောက်သာ ရှိသည်။

မကြာသေးမီက ရှန်ဝူမြို့ကို ဝိုင်းရံတိုက်ခိုက်စဉ်က တစ်ယောက် ဒဏ်ရာရသွားခဲ့ပြီး ယခုထက်တိုင် မြို့စားမင်း စံအိမ်တွင် ကုသနေရဆဲ ဖြစ်သည်။

ထိုသို့ဖြစ်ရာ ယခု ကျီကျောက်ဝမ်က သူ၏ မျက်စိရှေ့မှောက်တွင် ဤသို့ အသတ်ခံလိုက်ရခြင်းကို လျန်ကျုံးဖူ လုံးဝ လက်မခံနိုင်ချေ။

ဟုန်ယွမ်ဖုန်း၏ မျက်လုံးများ အနည်းငယ် မှေးကျဉ်းသွားပြီး ချန်ဖေးကို အေးစက်စွာ ကြည့်လိုက်၏။ သူ့ရှေ့တွင် လူသတ်ရဲသည် ဆိုတော့ ချန်ဖေးက သေချာပေါက် သေလမ်းကို ရွေးချယ်လိုက်ခြင်းလော။ သို့သော် ဟုန်ယွမ်ဖုန်း၏ အမြင်တွင် ငါးက သေသွားမည် ဖြစ်သော်လည်း ပိုက်ကွန်ကတော့ လုံးဝ လုံခြုံနေမည်ဟု ထင်မှတ်ထားသည်။

ချန်ဖေးက ဘာမှမပြောဘဲ လျန်ကျုံးဖူနှင့် ဟုန်ယွမ်ဖုန်းတို့ကို တစ်ချက် ကြည့်လိုက်ပြီး ကျီကျောက်ဝမ်၏ လက်ထဲမှ ဝိညာဉ်လက်နက်ကို သိမ်းယူကာ မြို့ပြင်ဘက်သို့ တိုက်ရိုက် ပြေးထွက်သွား၏။

ဤနေရာက တပ်စခန်း ဖြစ်ပြီး စစ်သားများကလည်း တဖြည်းဖြည်း ဝိုင်းရံလာနေပြီ ဖြစ်ရာ အပြည့်အဝ ဝိုင်းရံခံလိုက်ရပြီး အစီအရင် ပွင့်လာပါက ချန်ဖေး အတော်လေး အကျပ်ရိုက်သွားနိုင်သည်။

"သူခိုးကောင်... ရပ်စမ်း..."

လျန်ကျုံးဖူက ဒေါသတကြီး အော်ဟစ်လိုက်ပြီး သူ၏ ပုံရိပ်က လက်ခနဲ ဖြစ်သွားကာ ချန်ဖေး၏ နောက်သို့ လိုက်သွား၏။ သူတို့ ယာရှန်းဂိုဏ်းမှ လူကို သတ်ပြီးနောက် ဝင်ချင်သလို ဝင်ပြီး ထွက်သွားချင်သလို ထွက်သွားခွင့် ရှိသည်ဟု ထင်နေသလော။

ဟုန်ယွမ်ဖုန်းက ဘာမှမပြောဘဲ လျန်ကျုံးဖူ၏ နောက်မှ လိုက်သွားသည်။ ယနေ့ ချန်ဖေး သေချာပေါက် သေရမည်။

ကျီကျောက်ဝမ် အသတ်ခံလိုက်ရပြီး ချန်ဖေး၏ တိုက်ခိုက်ရေး စွမ်းအားက ဟုန်ယွမ်ဖုန်း၏ မျှော်လင့်ချက်ကို ကျော်လွန်နေခဲ့သည်။ မည်သို့ပင်ဆိုစေကာမူ ကျီကျောက်ဝမ်က အစစ်အမှန် ဒွာရသန့်စင်ခြင်း အလယ်အလတ်အဆင့် ဖြစ်၏။

ချန်ဖေးက ဒွာရသန့်စင်ခြင်း အလယ်အလတ်အဆင့်သို့ ရောက်ရှိသွားသည်မှာ သိပ်မကြာသေးသော်လည်း ကျင့်ကြံမှုအဆင့်က ရှိနေဆဲ ဖြစ်သည်။

ချန်ဖေးက ထူးချွန်သော ပါရမီရှင် တစ်ယောက် ဖြစ်ပြီး ဒွာရသန့်စင်ခြင်း အဆင့်သို့ ရောက်ရှိပြီး မကြာမီမှာပင် ယခု ဒွာရသန့်စင်ခြင်း အလယ်အလတ်အဆင့် တစ်ယောက်ကို သတ်ဖြတ်နိုင်နေပြီ ဖြစ်ရာ ဆက်လက် ကြီးထွားလာပါက မည်မျှအထိ ရောက်ရှိသွားမည်နည်း။

ယနေ့သာ ချန်ဖေး လွတ်မြောက်သွားပြီး ယွမ်ချန်ဓားဂိုဏ်းထဲတွင် ပြန်လည် ပုန်းအောင်းနေမည် ဆိုပါက ဟုန်ယွမ်ဖုန်း အနေဖြင့် တိုက်ခိုက်ရန် အခွင့်အရေးပင် ရတော့မည် မဟုတ်ပေ။

နတ်တိမ်ဓားဂိုဏ်းကို အကြောင်းကြားပြီး ချန်ဖေး၏ ခြိမ်းခြောက်မှုကို ပြောပြရမည်လော။ ယခုအချိန်တွင် နတ်တိမ်ဓားဂိုဏ်း၏ အကြီးမားဆုံး ခြိမ်းခြောက်မှုမှာ ရှန်းယန်ဂိုဏ်းနှင့် ကြားနေဟန်ဆောင်နေသော ယွီမိသားစုသာ ဖြစ်သည်။

ယွမ်ချန်ဓားဂိုဏ်းကို နှိမ်နင်းရန်မှာ လုံးဝ မဖြစ်နိုင်ပေ။ မည်သို့ပင်ဆိုစေကာမူ ချန်ဖေး သတ်ဖြတ်ခဲ့သည်မှာ ယာရှန်းဂိုဏ်းမှ လူတစ်ယောက်သာ ဖြစ်ပြီး နတ်တိမ်ဓားဂိုဏ်းအတွက် မည်သည့် ဆုံးရှုံးမှုမှ မရှိခဲ့ပေ။

ချန်ဖေး၏ ဤဒွာရသန့်စင်ခြင်း အလယ်အလတ်အဆင့် ကျင့်ကြံမှုနှင့် တိုက်ခိုက်ရေး စွမ်းအားမှာ နတ်တိမ်ဓားဂိုဏ်း၏ ထိပ်တန်း ခေါင်းဆောင်ပိုင်းများ အမြင်တွင် ထိုမျှသာ ဖြစ်သည်။

နတ်တိမ်ဓားဂိုဏ်း လိုအပ်နေသည်မှာ ဒွာရပေါင်းစည်းခြင်း အဆင့် ပညာရှင်များ ဖြစ်ပြီး ဒွာရသန့်စင်ခြင်း အဆင့် ပညာရှင်များ လုံးဝ မလိုချေ။ ဒွာရသန့်စင်ခြင်း အထွတ်အထိပ်အဆင့် ပညာရှင်များပင် အများအပြား ရှိနေသေးသည်။

ပွင့်ပွင့်လင်းလင်း ပြောရလျှင် ဒွာရသန့်စင်ခြင်း အထွတ်အထိပ်အဆင့် တစ်ယောက်တည်းကပင် သေချာ စီစဉ်လုပ်ဆောင်ပါက ယွမ်ချန်ဓားဂိုဏ်း တစ်ခုလုံးကို ပြုန်းတီးသွားစေနိုင်ပြီး သူတို့ဘက်မှ မည်သည့် ထိခိုက်မှုမျှ ရှိမည် မဟုတ်ပေ။ ဤသည်က သူတို့၏ နောက်ခံအင်အား ဖြစ်သည်။

ထို့ကြောင့် ဟုန်ယွမ်ဖုန်း အနေဖြင့် ယနေ့ ချန်ဖေးကို သေချာပေါက် သတ်ဖြတ်ရမည် ဖြစ်သည်။ သို့မဟုတ်ပါက ချန်ဖေး ကြီးထွားလာသည်ကိုသာ ထိုင်ကြည့်နေရမည် ဖြစ်ပြီး မည်သည့် နည်းလမ်းကောင်းမှ ရှိမည် မဟုတ်ပေ။

တစ်နေ့နေ့တွင် ချန်ဖေးသာ ဒွာရသန့်စင်ခြင်း နောက်ဆုံးအဆင့်သို့ ရောက်ရှိသွားပါက ဟုန်ယွမ်ဖုန်း အနေဖြင့် သူ၏ ကိုယ်ပိုင် လုံခြုံရေးအတွက် သတိထားနေရမည် ဖြစ်သည်။ မည်သို့ပင်ဆိုစေကာမူ နတ်တိမ်ဓားဂိုဏ်း၏ အမြင်တွင် ယွမ်ချန်ဓားဂိုဏ်းက အရေးကြီးသော ကိစ္စရပ်များတွင် အမှားအယွင်း မလုပ်သရွေ့ သည်းခံနိုင်စွမ်း ရှိသည်။

ဟုန်ယွမ်ဖုန်း၏ ကိုယ်ကျိုးစီးပွားနှင့် နတ်တိမ်ဓားဂိုဏ်း တစ်ခုလုံး၏ အကျိုးစီးပွားမှာ လုံးဝ မတူညီပေ။

နတ်တိမ်ဓားဂိုဏ်းက ချန်ဖေးသည် သူတို့ဂိုဏ်းမှ လူကို သတ်ဖြတ်ခဲ့သည်ကို မသိရှိသရွေ့ အမှန်တကယ် ခက်ခဲနိုင်ပေသည်။

ဟုန်ယွမ်ဖုန်း အနေဖြင့် ချန်ဖေးကဲ့သို့သော ခြိမ်းခြောက်မှုမျိုး သူ့အနားတွင် အမြဲရှိနေခြင်းကို ခွင့်မပြုနိုင်ချေ။ ယနေ့ ချင်ဟိုင်မြို့တွင် ရှိနေသည့် အခွင့်အရေးကို အသုံးချ၍ ချန်ဖေးကို မသိမသာ သတ်ဖြတ်ရမည်။

အချိန်ကျလာပါက ယွမ်ချန်ဓားဂိုဏ်းအနေဖြင့် မည်သည့် သက်သေအထောက်အထားမှ ရှာတွေ့နိုင်မည် မဟုတ်သလို နတ်တိမ်ဓားဂိုဏ်း မဟာမိတ်အဖွဲ့အပေါ်လည်း ကြီးမားသော သက်ရောက်မှု ရှိမည် မဟုတ်ပေ။ ဤသို့ဖြင့် သူ၏ တိတ်ဆိတ်သော အန္တရာယ်ကို လုံးဝ ဖယ်ရှားနိုင်မည် ဖြစ်သည်။

သို့မဟုတ်ပါက ဟုန်ယွမ်ဖုန်း အနေဖြင့် စားကောင်းအိပ်ပျော်မည် မဟုတ်ချေ။

ရွှီယန်ရှင်းက ဒဏ်ရာရနေသော ချန်ဟန်ကျုံး၏ အနီးသို့ ရောက်လာပြီး အခြားစစ်သားများက ဒဏ်ရာများကို ကုသပေးနေသည်ကို မြင်လိုက်ရသောအခါ အသက်အန္တရာယ်မှ ယာယီ လွတ်ကင်းသွားပြီ ဖြစ်ကြောင်း သိလိုက်ရသဖြင့် အနည်းငယ် စိတ်သက်သာရာ ရသွားသည်။

သို့သော် ချန်ဟန်ကျုံး၏ ဒဏ်ရာ အခြေအနေက ရွှီယန်ရှင်းကို ကျောချမ်းသွားစေခဲ့သည်။ ချန်ဖေးက တိုက်ကွက် အနည်းငယ်ဖြင့်ပင် ချန်ဟန်ကျုံးကို ဤသို့ ဖြစ်သွားစေခဲ့သည်ကို သူ မသိသော်လည်း မြို့စားမင်း စံအိမ်မှ သတင်းရ၍ သူတို့ ရောက်လာချိန်အထိ အချိန်အလွန်တိုတောင်းခဲ့သည်။

ချန်ဖေးက ဤမျှ တိုတောင်းသော အချိန်အတွင်း ပထမဆုံး ချန်ဟန်ကျုံးကို ပြင်းထန်စွာ ဒဏ်ရာရစေခဲ့ပြီးနောက် သူတို့၏ မျက်စိရှေ့မှောက်တွင်ပင် ကျီကျောက်ဝမ်ကို ခေါင်းဖြတ် သတ်လိုက်ခြင်း ဖြစ်သည်။

ဤသို့သော တိုက်ခိုက်ရေး စွမ်းအားမျိုးက သာမန် ဒွာရသန့်စင်ခြင်း အလယ်အလတ်အဆင့် တစ်ယောက်တွင် လုံးဝ မရှိနိုင်ချေ။

ယခု လိုက်သွားကြသော လျန်ကျုံးဖူနှင့် ဟုန်ယွမ်ဖုန်းတို့ကို တွေးမိပြီး ရွှီယန်ရှင်း တစ်ခဏမျှ ချီတုံချတုံ ဖြစ်သွားပြီးနောက် သွားကြိတ်၍ နောက်မှ လိုက်သွားခဲ့သည်။ ချန်ဖေး အစွမ်းထက်သော်လည်း လျန်ကျုံးဖူကလည်း မအားနည်းပေ။ အနည်းဆုံး တူညီသော ဒွာရသန့်စင်ခြင်း အလယ်အလတ်အဆင့်ဖြစ်သော ကျီကျောက်ဝမ်ထက် များစွာ အစွမ်းထက်ပေသည်။

ထို့အပြင် ဟုန်ယွမ်ဖုန်း ဆိုသည်မှာ နတ်တိမ်ဓားဂိုဏ်း၏ ထိပ်တန်း အမွေအနှစ် ကျင့်စဉ်များကို လေ့ကျင့်ထားသူ ဖြစ်ပြီး သာမန် ဒွာရသန့်စင်ခြင်း အလယ်အလတ်အဆင့်များထက် များစွာ သာလွန်သည်။

သူတို့ နှစ်ယောက် ပူးပေါင်းလိုက်လျှင် ချန်ဖေးကို သေချာပေါက် ဖမ်းဆီးနိုင်မည် ဖြစ်သည်။

မည်သို့ပင်ဆိုစေကာမူ ရရှိထားသော သတင်းများအရ ချန်ဖေး ဒွာရသန့်စင်ခြင်း အဆင့်သို့ ရောက်ရှိသွားသည်မှာ သုံးနှစ်ခန့်သာ ရှိသေးသည်။ ဤအချိန်အတိုင်းအတာအတွင်း ဒွာရသန့်စင်ခြင်း အဆင့် ပညာရှင်များစွာအတွက် မိမိ၏ ကျင့်ကြံမှုကို တည်ငြိမ်အောင် လုပ်ပြီး ဒွာရ တစ်ခု၊ နှစ်ခုခန့် ထပ်ဖွင့်နိုင်ရန်သာ လုံလောက်ပေသည်။

ချန်ဖေး ယနေ့ ပြသခဲ့သော စွမ်းအားက ဤအတိုင်းအတာထက် များစွာ ကျော်လွန်နေပြီး ဒွာရသန့်စင်ခြင်း အလယ်အလတ်အဆင့်သို့ ရောက်ရှိနေပြီ ဖြစ်သည်။ သို့သော် သေချာတွေးကြည့်လျှင် ဤသည်က အဆုံးစွန် ကန့်သတ်ချက် ဖြစ်နေလောက်ပြီ ဖြစ်သည်။

လျန်ကျုံးဖူနှင့် ဟုန်ယွမ်ဖုန်းတို့၏ ဝိုင်းဝန်း သတ်ဖြတ်မှုရှေ့တွင် ချန်ဖေး မည်သို့သော မုန်တိုင်းမျိုး ထပ်မံ ဖန်တီးနိုင်မည်ကို ရွှီယန်ရှင်း မယုံကြည်ချေ။

ရွှီယန်ရှင်း ဤသို့ တွေးနေသကဲ့သို့ လျန်ကျုံးဖူနှင့် ဟုန်ယွမ်ဖုန်းတို့ကလည်း ထိုနည်းတူပင် ဖြစ်သည်။ သုံးနှစ်အတွင်း ဒွာရသန့်စင်ခြင်း အလယ်အလတ်အဆင့်သို့ ရောက်ရှိခြင်းက လုံလောက်အောင် လွန်ကဲနေပြီ ဖြစ်ရာ ဤအချိန်တွင် အခြားအရာများမှာ သေချာပေါက် များစွာ အားနည်းနေမည် ဖြစ်သည်။

သေချာပေါက် ဤသို့သော ပါရမီမျိုးက အလွန် ကြောက်မက်ဖွယ် ကောင်းနေဆဲ ဖြစ်သည်။ ချန်ဖေးကိုသာ ကြီးထွားရန် အချိန်လုံလုံလောက်လောက် ထပ်ပေးလိုက်လျှင် မည်သည့်အဆင့်ထိ ရောက်သွားမည်ကို နတ်ဘုရားများသာ သိနိုင်ပေလိမ့်မည်။

ယခု နှစ်ဘက်စလုံးက သေခန်းပြတ် ရန်သူများ ဖြစ်နေကြပြီ ဖြစ်ရာ လက်ဆွဲနှုတ်ဆက်ပြီး ငြိမ်းချမ်းရေး ယူရန် လုံးဝ မဖြစ်နိုင်တော့ချေ။ သို့ဖြစ်ရာ သူ ပိုမို အစွမ်းမထက်လာမီ ဤနေရာတွင်ပင် သတ်ပစ်ရမည် ဖြစ်သည်။

သို့မဟုတ်ပါက အနာဂတ်တွင် ချန်ဖေးသည် ဟုန်ယွမ်ဖုန်းအတွက် ပုန်းကွယ်‌နေသော အန္တရာယ်တစ်ခု ဖြစ်လာရုံသာမက ယာရှန်းတပ်မတော် တစ်ခုလုံး၏ ရင်ဘတ်ထဲမှ ဆူးတစ်ချောင်း ဖြစ်လာလိမ့်မည်။

ချန်ဖေး၏ ကိုယ်အစစ်က ပုံရိပ်ယောင်အဖြစ် ပြောင်းလဲသွားပြီး ခုန်ပေါက်မှု အနည်းငယ် အတွင်းမှာပင် မြို့ရိုးအပြင်ဘက်သို့ ရောက်ရှိသွား၏။ ဤနေရာတွင် ချန်ဖေး မရပ်တန့်ဘဲ ရှေ့သို့ ဆက်လက် ပြေးထွက်သွားသည်။

လျန်ကျုံးဖူနှင့် ဟုန်ယွမ်ဖုန်းတို့ကလည်း တစ်ယောက်ပြီး တစ်ယောက် မြို့ရိုးအပြင်ဘက်သို့ ခုန်ထွက်လာကြပြီး ချန်ဖေး၏ နောက်သို့ အနီးကပ် လိုက်ပါလာကြသည်။ သူတို့၏ အမြင်အာရုံထဲမှ ချန်ဖေး ပျောက်ကွယ်သွားမည့် အလားအလာ အနည်းငယ်ကိုပင် လုံးဝ ခွင့်မပြုကြချေ။

အချိန်အနည်းငယ် ကြာပြီးနောက် ရွှီယန်ရှင်း မြို့ရိုးအပြင်ဘက်သို့ ရောက်လာပြီး အနက်ရောင် အစက်အပြောက်များအဖြစ် ပြောင်းလဲသွားသော ရှေ့မှ လူသုံးယောက်ကို ကြည့်လိုက်သည်။ ချန်ဖေး ဆက်ပြေးနေဆဲ ဖြစ်သည်ကို မြင်လိုက်ရသောအခါ ရွှီယန်ရှင်း ပို၍ စိတ်သက်သာရာ ရသွား၏။ သိသာထင်ရှားစွာပင် ချန်ဖေးက ထိုနှစ်ယောက်ကို မယှဉ်နိုင်မည်ကို စိုးရိမ်သောကြောင့် ဤသို့ ထွက်ပြေးနေခြင်း ဖြစ်သည်။

ထိုအခိုက်တွင် ချင်ဟိုင်မြို့အတွင်း၌ ချန်ဖေး၏ ကိုယ်ပွားနှင့် ရွမ်မိသားစုဝင် လူတစ်ဒါဇင်ကျော်တို့က အခြား မြို့ရိုးတစ်ခုမှ ခုန်ထွက်လာကြပြီး နောက်ဆုံးတွင် တောင်ကြားတစ်ခုအတွင်း၌ ရပ်တန့်လိုက်ကြသည်။

ဤနေရာက ချင်ဟိုင်မြို့နှင့် ဆယ်မိုင်ကျော် ကွာဝေးပြီး ချင်ဟိုင်မြို့နှင့် သူတို့ကြားတွင် မြင်ကွင်းကို ကာကွယ်ထားသည့် အရာ မရှိချေ။ အကယ်၍ တစ်ယောက်ယောက်က နောက်မှ တကယ် လိုက်လာမည် ဆိုပါက ချက်ချင်း တွေ့နိုင်ပေသည်။

"အစ်ကိုချန်... အစ်ကိုက ကိုယ်ပွားလား..."

ချူးလန်က သတိထား၍ မေးလိုက်ပြီး ကျန်ရှိနေသော ရွမ်မိသားစုဝင်များကလည်း ချန်ဖေးကို လှမ်းကြည့်လိုက်ကြသည်။

အစောက တပ်စခန်းအတွင်း ဖြစ်ပျက်သွားခဲ့သော ကိစ္စရပ်များက ယုန်တစ်ကောင် အထက်အောက် ခုန်ပေါက်နေသကဲ့သို့ အလွန် လျင်မြန်ပြီး လွှမ်းမိုးနိုင်လွန်းလှသည်။ သို့သော် ယေဘုယျအားဖြင့် သူတို့၏ ရှေ့မှလူနှင့် နောက်မှ ပေါ်လာသော သူတို့က ချန်ဖေး ဖြစ်ပုံရကြောင်း သူတို့ နားလည်လိုက်ကြသည်။

သိုင်းပညာလောက ဆိုသည်မှာ စိတ်ကူးယဉ်၍ပင် မရနိုင်လောက်အောင် စိတ်ဝင်စားဖွယ် ကောင်းလှသည်။ သို့သော် ကံမကောင်းစွာဖြင့် ဤအလွှာကို အမှန်တကယ် ထိတွေ့နိုင်သူများမှာ အမြဲတမ်း လူနည်းစုသာ ဖြစ်နေလိမ့်မည်။

"အင်း... အစစ်က လူတွေကို မျှားခေါ်သွားတာ..."

ချန်ဖေးက ခေါင်းညိတ်လိုက်သည်။

"အန္တရာယ် များလားဟင်..."

ချူးလန်က စိုးရိမ်တကြီး မေးလိုက်သည်။ ယာရှန်းဂိုဏ်းတွင် ဤမျှများပြားသော ဒွာရသန့်စင်ခြင်း အဆင့် ပညာရှင်များ ရှိနေပြီး ချူးလန်၏ မှတ်ဉာဏ်ထဲတွင် ချန်ဖေးက ယွမ်ချန်ဓားဂိုဏ်း၏ ဒွာရသန့်စင်ခြင်း အဆင့်သစ်လေး တစ်ယောက်သာ ဖြစ်သည်။

ချူးလန်၏ ကျင့်ကြံမှုက မမြင့်မားသော်လည်း သိုင်းပညာ ဗဟုသုတ အချို့တော့ ရှိသေးသည်။ နှစ်ပေါင်းများစွာ ကျင့်ကြံလာခဲ့သော ထိုဒွာရသန့်စင်ခြင်း အဆင့် ပညာရှင်များနှင့် နှိုင်းယှဉ်ပါက ချန်ဖေးတွင် ကြီးမားသော ကွာဟချက် ရှိနေလိမ့်မည်။

"ကိစ္စမရှိပါဘူး..."

ချန်ဖေးက ချူးလန်၏ ဆံပင်ကို ပွတ်သပ်၍ ပြုံးကာ ပြောလိုက်သည်။

မိုင်ပေါင်းများစွာ အကွာတွင် ချန်ဖေး၏ ကိုယ်အစစ်က တောအုပ်တစ်ခုထဲသို့ ပြေးဝင်သွားပြီး ကျောက်တုံးတစ်တုံးပေါ်တွင် ရပ်ကာ နောက်သို့ လှည့်ကြည့်လိုက်၏။ ချန်ဖေးသာ ဆန္ဒရှိပါက အထွတ်အထိပ်သို့ ရောက်ရှိနေသော ကောင်းကင် ရှောင်တိမ်းခြင်း ကိုယ်ဖော့ပညာဖြင့် လျန်ကျုံးဖူနှင့် ဟုန်ယွမ်ဖုန်းတို့ လုံးဝ မီအောင် လိုက်နိုင်မည် မဟုတ်ချေ။

အစောက ချန်ဖေးက လျန်ကျုံးဖူနှင့် ဟုန်ယွမ်ဖုန်းတို့ကို ဆွဲထားခဲ့ခြင်း၏ ရည်ရွယ်ချက်မှာ အလွန် ရိုးရှင်းလှသည်။ ထိုနှစ်ယောက်ကို ဤနေရာတွင် ထာဝရ ချန်ထားခဲ့ရန်ပင် ဖြစ်သည်။

အစောက တပ်စခန်းတွင် ရှိနေခဲ့ပြီး ချန်ဖေးကို မြင်တွေ့ခဲ့သူ အားလုံးမှာ ချန်ဖေး၏ သတ်ဖြတ်ခြင်းကို ခံလိုက်ရပြီ ဖြစ်သည်။ ယနေ့ ဤနေရာတွင် လျန်ကျုံးဖူနှင့် ဟုန်ယွမ်ဖုန်းတို့ကို သတ်ဖြတ်ပြီးနောက် ပြန်သွားကာ ယာရှန်းတပ်မတော်မှ ဒွာရသန့်စင်ခြင်း အဆင့် ပညာရှင် အားလုံးကို သတ်ဖြတ်လိုက်ရုံပင် ဖြစ်သည်။

ထိုသို့ဆိုလျှင် ဤကိစ္စမှာ ပြေလည်သွားမည် ဖြစ်သည်။

ဟုန်ယွမ်ဖုန်းက ချင်ဟိုင်မြို့တွင် ထောင်ချောက်ဆင်၍ ချန်ဖေးကို ဖိနှိပ်ရဲခြင်းမှာ နတ်တိမ်မြို့နှင့် အလွန်ဝေးကွာနေခြင်းကြောင့်သာ ဖြစ်သည်။ ကိစ္စတော်တော်များများက အကြမ်းဖျင်း ရှင်းလင်းလိုက်သရွေ့ နတ်တိမ်မြို့သို့ သတင်းရောက်ရန် ခက်ခဲပေသည်။

လျန်ကျုံးဖူက ချန်ဖေးသည် ရှေ့တွင် ရပ်တန့်နေသည်ကို မြင်လိုက်ရသောအခါ သူ၏ မျက်လုံးများ အနည်းငယ် မှေးကျဉ်းသွားပြီး သတိထားနေသော်လည်း ဘေးမှ ဟုန်ယွမ်ဖုန်းကို တွေးမိသောအခါ လျန်ကျုံးဖူ အနည်းငယ် စိတ်သက်သာရာ ရသွားသည်။

နတ်တိမ်ဓားဂိုဏ်းသည် ပတ်ဝန်းကျင်မိုင်ထောင်ပေါင်းများစွာကို ဖိအားပေးနိုင်ခြင်းမှာ ဒွာရပေါင်းစည်းခြင်း အဆင့် ပညာရှင်များ ရှိနေခြင်းက အဓိက အကြောင်းရင်း ဖြစ်သော်လည်း ဂိုဏ်းတွင်းရှိ ဒွာရသန့်စင်ခြင်း အဆင့် ပညာရှင်များကလည်း အခြားဂိုဏ်းများမှ အဆင့်တူ ပညာရှင်များထက် ပိုမို အစွမ်းထက်ကြသည်။

ဤသည်က ကျင့်စဉ်များ၏ မွေးရာပါ အားသာချက် ဖြစ်ပြီး အခြားဂိုဏ်းများနှင့် နှိုင်းယှဉ်ရန် ခက်ခဲသည်။ ဤအခြေအနေက ဒွာရသန့်စင်ခြင်း နောက်ဆုံးအဆင့်သို့ ရောက်လာလေလေ ပိုမို သိသာထင်ရှားလာလေလေ ဖြစ်သည်။

"မပြေးတော့ဘူးလား..."

ဟုန်ယွမ်ဖုန်းက ချန်ဖေးကို ကြည့်၍ လှောင်ပြောင်လိုက်၏။

အစောက ချန်ဖေး ပြသခဲ့သော ကိုယ်ဖော့ပညာကြောင့် ဟုန်ယွမ်ဖုန်း အမှန်တကယ်ပင် စိုးရိမ်နေခဲ့မိသည်။ တစ်ခုခု အမှားအယွင်း ဖြစ်သွားပါက ချန်ဖေး လွတ်မြောက်သွားနိုင်ချေ ရှိသည်။

ယခု ချန်ဖေးက သူတို့ နှစ်ယောက်ကို ရပ်တန့်၍ တိုက်ခိုက်ရဲနေသည်ကို မြင်လိုက်ရသောအခါ ဟုန်ယွမ်ဖုန်းက စိတ်ထဲတွင် လှောင်ရယ် ရယ်လိုက်သော်လည်း အနည်းငယ် စိတ်သက်သာရာ ရသွားမိသည်။

ချန်ဖေးတွင် တန်ပြန် သတ်ဖြတ်နိုင်မည့် အလားအလာ ရှိနေမည်လော။ သူ၏ နှစ်ပေါင်းများစွာ ကျင့်ကြံလာခဲ့သည်များက အလကား ဖြစ်နေမည်ဟု ထင်‌နေသည်လား။ ထို့အပြင် ဘေးတွင် လျန်ကျုံးဖူ ရှိနေသေးပြီး သူကလည်း ဒွာရသန့်စင်ခြင်း အလယ်အလတ်အဆင့်သို့ ဝင်ရောက်လာသည်မှာ နှစ်များစွာ ကြာမြင့်နေပြီ ဖြစ်သည်။

လူနှစ်ယောက်ပေါင်း၏ စွမ်းအားဖြင့် ချန်ဖေးကို မသတ်နိုင်စရာ အကြောင်းမရှိချေ။

"ဒီနေရာက လုံလောက်အောင် ဝေးသွားပြီ..."

ချန်ဖေးက ဟုန်ယွမ်ဖုန်းကို ကြည့်လိုက်၏။ ပတ်ဝန်းကျင်ရှိ ယွမ်ချီစွမ်းအင်များ တုန်ခါသွားပြီး အနက်ရောင် ဓားအစီအရင်က ကောင်းကင်ယံမှ ပစ်ချလာကာ ကြီးမားလှသော ဖိအားများ နေရာအနှံ့ ပျံ့နှံ့သွားပြီး သူတို့ နှစ်ယောက်စလုံးကို ဖုံးလွှမ်းသွားသည်။

"ကျုံးယွမ် ဓားအစီအရင်... အဲဒါကို မြည်းစမ်းကြည့်ချင်နေတာ ကြာပြီ..."

လျန်ကျုံးဖူက အသံနှိမ့်၍ အော်ဟစ်လိုက်ပြီး ဓားအရိပ်တစ်ခုက ကောင်းကင်ယံသို့ ထိုးတက်သွား၏။ ဓားအရိပ်ထဲတွင် လှိုင်းလုံးများ ဆူပွက်နေသည်။ ထိုဓားသ်ုင်းမှာပင်လယ်ချိတ်ပိတ် ဓားသိုင်းပင် ဖြစ်သည်။ ကျီကျောက်ဝမ် ထုတ်သုံးခဲ့သည်နှင့် နှိုင်းယှဉ်ပါက လျန်ကျုံးဖူ၏ ပင်လယ်ချိတ်ပိတ် ဓားသိုင်း အရှိန်အဝါက ပိုမို ကြီးမားခမ်းနားလှသည်။

လှိုင်းလုံးကြီးများက ကမ်းခြေကို ရိုက်ခတ်နေသော ပင်လယ်ပြင်ကြီး တစ်ခုကဲ့သို့ လျန်ကျုံးဖူ၏ ချိတ်ပိတ်ခြင်းကို ခံထားရကာ ကျုံးယွမ် ဓားအစီအရင်ဆီသို့ ရိုက်ခတ်သွားသည်။

ဟုန်ယွမ်ဖုန်းက သူ၏ ဘယ်ခြေဖြင့် ရှေ့သို့ တစ်လှမ်း တက်လိုက်ပြီး ချန်ဖေးထံ အပြင်းအထန် ပြေးဝင်သွားရန် ပြင်လိုက်စဉ်တွင် ရုတ်တရက် အံ့အားသင့်သွားပြီး သူ၏ ခေါင်းထက်သို့ မော့ကြည့်လိုက်၏။

ဟုန်ယွမ်ဖုန်း၏ မျှော်လင့်ချက်ထဲတွင် လျန်ကျုံးဖူ၏ ပင်လယ်ချိတ်ပိတ် ဓားသိုင်းဖြင့် ခုခံနိုင်လိမ့်မည်ဟု ထင်ထားခဲ့သော ကျုံးယွမ် ဓားအစီအရင်က ဤအခိုက်အတန့်တွင် လျန်ကျုံးဖူ၏ ဓားအရိပ်ကို တစ်မုဟုတ်ချင်း ကြေမွသွားစေခဲ့ပြီး နောက်တစ်စက္ကန့်တွင်မူ အနက်ရောင် ဓားအစီအရင်က နေရာအနှံ့ ပြန့်ကျဲသွားတော့သည်။

လျန်ကျုံးဖူ၏ မျက်နှာ အနည်းငယ် ဖြူရော်သွားပြီး ချီစွမ်းအင်များ အနည်းငယ် ဖရိုဖရဲ ဖြစ်သွား၏။ သို့သော် ချီစွမ်းအင်များထက် ပို၍ ဖရိုဖရဲ ဖြစ်နေသည်မှာ လျန်ကျုံးဖူ၏ စိတ်အခြေအနေပင် ဖြစ်သည်။

အစောက တိုက်ခိုက်မှုက ပင်လယ်ချိတ်ပိတ် ဓားသိုင်း၏ အစွမ်းထက်ဆုံး အခြေအနေ မဟုတ်သော်လည်း ဤမျှ လွယ်ကူစွာ ချိုးဖျက်ခံလိုက်ရခြင်းကို လျန်ကျုံးဖူ အနေဖြင့် လက်ခံရန် အနည်းငယ် ခက်ခဲနေသည်။

လျန်ကျုံးဖူ၏ အာရုံထဲတွင် ထိုဓားအစီအရင်က အမှန်တကယ် တောင်ကြီးတစ်လုံး ဖုံးအုပ်လာသကဲ့သို့ ဖြစ်နေပြီး လုံးဝ ခုခံ၍ မရနိုင်ချေ။