အခန်း ၃၄၃
Vol. 35 Ch. 343
အခန်း (၃၄၃) - နည်းပြရာထူး
ယင်ချင်းလိန်က သူ၏အဆိုပြုချက်သည် နောင်ဖြစ်လာမည့်အရာများအတွက် ပြင်ဆင်ရန် အချိန်များစွာ ရရှိစေမည်ကို သိရှိထားလေသည်။
လုဝမ့်၏ ပါရမီသည် မဆိုးလှသော်လည်း သူ၏လက်ရှိအဆင့်မှ တက်လှမ်းနိုင်ရန်အတွက် အနည်းဆုံး သုံးနှစ်မှ ငါးနှစ်အထိ အချိန်ယူရပေလိမ့်မည်။
ထိုမျှရှည်လျားသော အချိန်ကာလအတွင်း ယင်ချင်းလိန်အနေဖြင့် ပိုမိုများပြားသော ပြင်ဆင်မှုများကို ပြုလုပ်နိုင်ပေသည်။
ထိုအချိန်ရောက်လျှင် ရေခဲငှက်မွေးကျောင်းတော်ကြီး တစ်ခုလုံးသည် သူ၏ထိန်းချုပ်မှုအောက်သို့ အပြည့်အဝ ရောက်ရှိသွားမည်ဟု ယုံကြည်ချက် အပြည့်ရှိနေသည်။
“အဲဒါက အရမ်းကြာလွန်းတယ်”
ကျန်းရွှိက တုံ့ပြန်လိုက်သည်။
သို့သော် ဤတစ်ကြိမ်တွင် သူ၏ကန့်ကွက်မှုမှာ သိပ်မပြင်းထန်လှပေ။
ထိုစကားကို ကြားသောအခါ ယင်ချင်းလိန်၏ ရင်ထဲတွင် လှုပ်ရှားသွားရသည်။
ကျန်းရွှိသည် သူ၏အကြံအစည်ကို သဘောတူနေပြီဖြစ်ကြောင်း သူသိသော်လည်း ကျန်းရွှိတို့ဘက်မှ ကျေနပ်စေရန် ပို၍လိုက်လျောမှုများ ပြုလုပ်ပေးရဦးမည် ဖြစ်လေသည်။
“စိတ်မပူပါနဲ့၊ ဒီလုပ်ငန်းစဉ်က သိပ်မကြာပါဘူး။ လုဝမ့် တိုးတက်လာအောင်လည်း ကျွန်တော် ကူညီပေးပါ့မယ်”
ယင်ချင်းလိန်က အဓိပ္ပါယ်မရှိသော စကားများကို ဆိုလိုက်သည်။
ယင်ချင်းလိန်၏စကားများသည် အမှန်မဟုတ်ကြောင်း လူတိုင်း သိထားကြလေသည်။
“အင်း...”
ကျန်းရွှိ ခေတ္တမျှ စဉ်းစားပြီးနောက် ဖြည်းညင်းစွာ ပြောလိုက်သည်။
“ယာယီကျောင်းအုပ်ယင်၊ ခင်ဗျားရဲ့ အဆိုပြုချက်က သိပ်မဆိုးလှပါဘူး။ ဒါပေမဲ့ သခင်လေးလုဝမ့်က ကျောင်းအုပ်နေရာကို ဆက်ခံမယ့်သူဆိုတော့ သူက ကျောင်းအုပ်နေရာကို တရားဝင် မဆက်ခံရသေးဘူးဆိုရင်တောင် ရေခဲငှက်မွေးကျောင်းတော်အတွက် တာဝန်တချို့တော့ ယူသင့်တယ် မဟုတ်လား”
“ဒါကြောင့် လုဝမ့်အနေနဲ့ နည်းပြတစ်ယောက်ရဲ့ တာဝန်ဝတ္တရားတွေအားလုံးကို ရရှိစေချင်တယ်။ ပြီးတော့ သူ့ရဲ့ရာထူးက နည်းပြတွေအားလုံးထက် ပိုမြင့်ရမယ်။ အဲဒီအပြင် သူက ခင်ဗျားရဲ့ အမိန့်ပေးမှုအောက်မှာ မရှိဘဲ တခြားနည်းပြတွေကို အမိန့်ပေးခွင့် ရှိရမယ်”
ကျန်းရွှိ၏ လေသံမှာ ပြတ်သားနေလေသည်။
“ဟင်...”
ကုချီရှင်နှင့် ယင်ချင်းလိန်ဘက်မှ အခြားနည်းပြများသည် ထိုစကားကို ကြားသောအခါ မျက်မှောင်ကြုံ့သွားကြသည်။
အကယ်၍ ယင်ချင်းလိန်သာ ဤအဆိုပြုချက်ကို သဘောတူလိုက်ပါက သူတို့သည် အဆင့်သုံး မှော်ပညာရှင်တစ်ဦးဖြစ်သော လုဝမ့်၏ လက်အောက်သို့ ရောက်ရှိသွားမည်ဟု ဆိုလိုခြင်း ဖြစ်သည်။
ထိုအခါ အပြင်ပန်းတွင်သာ နာခံပြီး စိတ်ထဲ၌ မနာခံလျှင်ပင် လုဝမ့်ရှေ့တွင် ဦးညွှတ်ကြရပေလိမ့်မည်။
“ရပါတယ်”
ကုချီရှင်နှင့် အခြားသူများ ရင်ထဲ၌ ညည်းညူနေကြဆဲအချိန်တွင် ယင်ချင်းလိန်က အဆင်သင့်ပင် ဖြေကြားလိုက်သည်။
“နောင်တစ်ချိန်မှာ လုဝမ့်က ရေခဲငှက်မွေးကျောင်းတော်ရဲ့ ကျောင်းအုပ် ဖြစ်လာမှာပဲလေ။ သူ့မှာ နည်းပြတစ်ယောက်ရဲ့ အာဏာအပြည့်အဝ ရှိမှာပါ။ ပြီးတော့ နည်းပြအားလုံးက သူ့အမိန့်ကို နာခံကြရမယ်။ အဲဒါအပြင် သူက ကျွန်တော့်ရဲ့ အမိန့်တွေကိုလည်း လျစ်လျူရှုနိုင်ပါတယ်”
လုဝမ့် နည်းပြတစ်ယောက် ဖြစ်လာခြင်းမှလွဲ၍ ကျန်အခြေအနေများသည် သူ့အတွက် ဘာမှမဟုတ်ကြောင်း ယင်ချင်းလိန် ကောင်းစွာ သိရှိထားလေသည်။
လုဝမ့်အနေဖြင့် နည်းပြများကို အမိန့်ပေးနိုင်ခြင်းနှင့် သူ၏အမိန့်များကို မနာခံခြင်းမှာ အဓိပ္ပါယ်မရှိလှချေ။
နှစ်ဖက်အုပ်စုများသည် ကွဲပြားနေပြီ ဖြစ်သည်။ သူ၏အုပ်စုမှ နည်းပြများသည် လုဝမ့်ဘက်တွင် ရှိနေသည်ဟု ထင်ရသော်လည်း အရေးကြီးသည့်အချိန်တွင်မူ သူ၏ဘက်၌သာ ရပ်တည်ကြမည် ဖြစ်သည်။
ထို့အပြင် ကျန်းရွှိ၊ ရွှီစီးချီနှင့် အခြားသူများ ရှိနေသဖြင့် သူသည် လုဝမ့်အား မည်သည့်အရာမျှ အမိန့်ပေးနိုင်မည် မဟုတ်ပေ။
“ကောင်းပြီ”
ကျန်းရွှိက ပြောလိုက်သည်။
“အဲဒီအပြင် ကျွန်တော့်မှာ နောက်ထပ် တောင်းဆိုစရာတစ်ခု ရှိသေးတယ်”
“ရှိသေးတာလား”
ယင်ချင်းလိန်က မျက်ခုံးပင့်လိုက်သည်။
“ပြောပါဦး”
“ရေခဲငှက်မွေးကျောင်းတော်မှာ နောက်ထပ် နည်းပြတစ်ယောက် ရှိလာဖို့ ကျွန်တော် မျှော်လင့်တယ်”
ကျန်းရွှိက ပြောလိုက်လေသည်။
“ဘယ်သူလဲ”
ယင်ချင်းလိန်က မေးလိုက်သည်။
“ရွှီနင်ပဲ”
ကျန်းရွှိသည် ရွှီနင်ကို ကြည့်လိုက်သည်။
“ကျန်းရွှိ... ခင်ဗျားက အခွင့်အရေးကို အရမ်းယူလွန်းနေတာ မဟုတ်ဘူးလား”
ဤတစ်ကြိမ်တွင် စကားပြောလာသူမှာ ကုချီရှင် ဖြစ်သည်။
“သူက အပြင်လူတစ်ယောက်လေ။ ပြီးတော့ ရေခဲငှက်မွေးကျောင်းတော်သို့ ဝင်တာကတင် လွန်နေပြီ။ ဒါပေမဲ့ ခင်ဗျားက သူ့ကို နည်းပြရာထူးပါ ပေးချင်နေသေးတာလား။ ခင်ဗျား အရမ်းလွန်လွန်းနေပြီ”
ကျန်းရွှိ၏ မျက်နှာအမူအရာမှာ ပြောင်းလဲသွားခြင်း မရှိပေ။
“ရွှီနင် ရေခဲငှက်မွေးကျောင်းတော်ကို ဝင်ရောက်ပြီးရင် ကျောင်းတော်အတွက် အကျိုးပြုမယ်ဆိုတာကို ကျွန်တော့်ရဲ့ ဂုဏ်သိက္ခာနဲ့ အာမခံပါတယ်။ သူသာ ရေခဲငှက်မွေးကျောင်းတော်ကို ထိခိုက်နစ်နာစေမယ့် လုပ်ရပ်မျိုး လုပ်ခဲ့ရင် ကျွန်တော့်အသက်နဲ့ရင်းပြီး ပေးဆပ်ဖို့ ဆန္ဒရှိပါတယ်”
ကျန်းရွှိက လေးနက်စွာ ပြောဆိုလိုက်လေသည်။
“ခင်ဗျား...”
ကုချီရှင်မှာ ထပ်မံ၍ စကားမပြောနိုင်ဖြစ်သွားရာ ယင်ချင်းလိန်ကိုသာ ကြည့်ရင်း ယင်ချင်းလိန်၏ အဖြေကို စောင့်ဆိုင်းနေရတော့သည်။
ယင်ချင်းလိန်သည် ရွှီနင်ကို ကြည့်လိုက်သည်။
ရွှီနင်သည် ကျန်းရွှိ ဖိတ်ခေါ်လာသော အကူအညီပေးမည့်သူ ဖြစ်ကြောင်း သူသိထားသည်။
“ရွှီနင်...”
တကယ်တမ်းတွင် ယင်ချင်းလိန်သည် ရွှီနင်ကို အနည်းငယ် စိုးရိမ်နေမိသည်။
ရွှီနင်သည် ဤမျှငယ်ရွယ်သော အသက်အရွယ်ဖြင့် အဆင့်လေး မှော်ပညာရှင်တစ်ဦး ဖြစ်နေပြီ ဖြစ်သည်။
ခိုင်လုံသော သက်သေအထောက်အထား မရှိသော်လည်း သူလွှတ်လိုက်သော လိုက်လံတိုက်ခိုက်သူများသည် ရွှီနင်၏လက်ထဲတွင် သေဆုံးသွားလောက်ပြီဟု သူ သံသယဝင်နေမိသည်။
“ကောင်းပြီ... ကျွန်တော် သဘောတူတယ်”
ယင်ချင်းလိန်သည် ခေတ္တမျှ စဉ်းစားပြီးနောက် နောက်ဆုံးတွင် လိုက်လျောရန် ဆုံးဖြတ်လိုက်လေသည်။
သူ အနည်းငယ် စိုးရိမ်နေသော်လည်း ဤတောင်းဆိုမှုကို သဘောတူမှသာ ကျန်းရွှိ အလျှော့ပေးမည်ကို ယင်ချင်းလိန် သိထားလေသည်။
ထို့အပြင် ရွှီနင်သည် ရေခဲငှက်မွေးကျောင်းတော်ထဲတွင် ရှိနေသရွေ့ သူ့အား ရှင်းလင်းရန် အခွင့်အရေးများစွာ ရှိနေဦးမည် ဖြစ်သည်။
“ကောင်းပြီ... ရွှီနင်က အခုကစပြီး ရေခဲငှက်မွေးကျောင်းတော်ရဲ့ နည်းပြသစ် ဖြစ်သွားပြီ”
ကျန်းရွှိက အသံမြှင့်၍ ပြောလိုက်သည်။
နှစ်ဖက်စလုံး သဘောတူညီမှု ရရှိသွားပြီးနောက် အစည်းအဝေးကို ဆက်လက်ပြုလုပ်ရန် အကြောင်းပြချက် မရှိတော့သဖြင့် နှစ်ဖက်လုံး ထွက်ခွာသွားကြလေတော့သည်။
“ကျောင်းအုပ်... ဒီလိုလုပ်လိုက်တာက လုဝမ့်ရဲ့အုပ်စုဘက်မှာ နည်းပြနှစ်ယောက် ထပ်တိုးသွားစေပါတယ်။ သူတို့ရဲ့အင်အားကလည်း အများကြီး တိုးလာပြီ...”
ကုချီရှင်နှင့် ယင်ချင်းလိန်တို့ နှစ်ယောက်တည်း ကျန်ရစ်ချိန်တွင် သူက စိုးရိမ်ပူပန်မှုများကို အလျင်အမြန် ထုတ်ဖော်ပြောဆိုလိုက်သည်။
“ရေခဲငှက်မွေးကျောင်းတော်မှာ နည်းပြဆယ့်နှစ်ယောက် ရှိတယ်။ ကျွန်တော်တို့ဘက်မှာက ငါးယောက်ပဲ ရှိပြီး သူတို့ဘက်မှာကျတော့ ခုနစ်ယောက် ဖြစ်နေပြီ...”
“ကိစ္စမရှိပါဘူး...”
ယင်ချင်းလိန်က လက်ကာပြလိုက်သည်။
“ငါက ကျောင်းအုပ်နေရာကို ရယူထားနိုင်သရွေ့ အားသာချက်က ငါတို့ဆီမှာပဲ ရှိတယ်။ အဲဒီကောင်လေး လုဝမ့်က သုံးနှစ်အတွင်းမှာ အဆင့်လေးကို တက်လှမ်းနိုင်မှာ မဟုတ်ဘူး။ နောက်လာမယ့် သုံးနှစ်အတွင်းမှာ သူ့ကို ဖိနှိပ်ဖို့နဲ့ ရေခဲငှက်မွေးကျောင်းတော်ကို အပြည့်အဝ ထိန်းချုပ်ဖို့ ငါ့မှာ နည်းလမ်းတွေ အများကြီး ရှိတယ်”
ယင်ချင်းလိန် ယုံကြည်ချက် အပြည့်ရှိနေသည်ကို မြင်လိုက်ရမှ ကုချီရှင် စိတ်အေးသွားတော့သည်။
“ဒါပေမဲ့ အဲဒီအပြင်လူ ရွှီနင်က သာမန်လူတော့ မဟုတ်လောက်ဘူး”
ကုချီရှင်က ပြောလိုက်သည်။
“သူက တကယ်လည်း သာမန်လူ မဟုတ်ဘူး...”
ယင်ချင်းလိန်နှင့် ကုချီရှင်တို့၏ အမြင်မှာ တူညီနေကြသည်။
“ဒါကြောင့် သူ့ကို ရှင်းပစ်ဖို့ အခွင့်အရေးတစ်ခု ရှာရမယ်”
“သူ့ကို ရှင်းပစ်ဖို့ဆိုတာ လွယ်မှာတော့ မဟုတ်ဘူး”
ကုချီရှင်က စိုးရိမ်တကြီး ကြည့်လိုက်သည်။
ယင်ချင်းလိန် ထိုစကားကို ကြားသောအခါ ရက်စက်ယုတ်မာသော အပြုံးတစ်ခု ပြုံးလိုက်လေသည်။
“သူ့ကို ကျွန်တော်တို့ကိုယ်တိုင် သွားတိုက်ခိုက်ဖို့ကတော့ အဆင်မပြေဘူးပေါ့။ ဒါပေမဲ့ တခြားတစ်ယောက်ကို အသုံးပြုမယ်ဆိုရင်တော့...”
ယင်ချင်းလိန်၌ အကြံအစည်တစ်ခု ရှိနေပုံရသည်။
“ခင်ဗျား ဆိုလိုတာက...”
ကုချီရှင်သည် ယင်ချင်းလိန်၏ စိတ်ကူးကို သဘောပေါက်သွားပြီးနောက် သူ၏မျက်နှာအမူအရာမှာ လေးနက်သွားလေသည်။
“မှန်တာပေါ့”
ယင်ချင်းလိန်က ခေါင်းညိတ်လိုက်သည်။
“သူတို့နဲ့ နောက်မှ ဆက်သွယ်ပြီး ရွှီနင်ကို လုပ်ကြံဖို့ ခိုင်းလိုက်မယ်”
“ဒါပေမဲ့ ဒီကိစ္စသာ ပေါက်ကြားသွားရင် လူတိုင်းရဲ့ ထောက်ခံမှုကို ဆုံးရှုံးရလိမ့်မယ်။ ကျွန်တော်တို့ဘက်က လူတွေဆီကပါ ထောက်ခံမှု ပျောက်သွားနိုင်တယ်...”
ကုချီရှင် စိုးရိမ်နေမိသည်။
“ဘာကို ကြောက်နေတာလဲ”
ယင်ချင်းလိန်က မဲ့ပြုံးပြုံးလိုက်သည်။
“အရင်ကျောင်းအုပ်ကြီးကိုတောင် ငါတို့က အကွက်ဆင်နိုင်ခဲ့သေးတာပဲ၊ ရွှီနင်လောက်ကတော့ ပြောနေစရာတောင် မလိုတော့ဘူး”
“ဟူး...”
ကုချီရှင်သည် ထိုစကားကို ကြားသောအခါ ထိတ်လန့်သွားပုံရသည်။
သူသည် ရင်တထိတ်ထိတ်ဖြင့် ပတ်ဝန်းကျင်ကို အလျင်အမြန် အကဲခတ်လိုက်သည်။
သူတို့သာ ယခင်ကျောင်းအုပ်ကြီးအား လုပ်ကြံခဲ့သည်ဟူသော သတင်းသာ ပြန့်သွားပါက ပြဿနာ ကြီးသွားပေလိမ့်မည်။
ထိုသို့သာ ဖြစ်သွားပါက ရေခဲငှက်မွေးကျောင်းတော်ကြီး တစ်ခုလုံးမှာ သူတို့အား ပစ်မှတ်ထားလာကြမည်ဖြစ်ပြီး နောင်တွင် ပြဿနာပေါင်း သောင်းခြောက်ထောင်နှင့် ရင်ဆိုင်ရပေလိမ့်မည်။
“တည်တည်ငြိမ်ငြိမ် နေစမ်းပါ”
ယင်ချင်းလိန်က ကုချီရှင်၏ ပခုံးကို ပုတ်လိုက်သည်။
“ရွှီနင်ကို စောင့်ကြည့်ဖို့ လူတချို့ လွှတ်ထားလိုက်”
ထိုသို့ပြောပြီးနောက် ယင်ချင်းလိန် ထွက်ခွာသွားလေသည်။
ကုချီရှင်၏ နဖူးတွင် ချွေးများ စို့လာသည်။ ယခင်ကျောင်းအုပ်ကြီးအား လုပ်ကြံခဲ့သည့်အကြောင်း တွေးမိတိုင်း သူ ကြောက်ရွံ့တုန်လှုပ်နေဆဲပင်။
သို့သော် ယခုအခါ ယင်ချင်းလိန်နှင့် ပူးပေါင်းမိသွားပြီဖြစ်ရာ သူ့အတွက် အခြားရွေးချယ်စရာ မရှိတော့ချေ။
ကုချီရှင်သည် တည်ငြိမ်သွားစေရန် အချိန်အတော်ကြာအောင် ရပ်နေပြီးနောက် ထွက်ခွာသွားလေတော့သည်။