အခန်း ၃၅၀

အခန်း (၃၅၀) - နောက်ဆက်တွဲဖြစ်ရပ်များနှင့် အင်အားစုဆောင်းခြင်း

“ဟုတ်ပါတယ်၊ ယင်ချင်းလိန် သေသွားပြီဆိုတော့ သခင်လေးကပဲ ကျောင်းအုပ်ရာထူးကို ဆက်ခံသင့်တယ်လေ”

ယင်ချင်းလိန်၏အုပ်စုမှ နည်းပြတစ်ဦးက အလျင်အမြန် ထောက်ခံပြောဆိုလိုက်လေသည်။

အားလုံးကလည်း ခေါင်းညိတ်သဘောတူလိုက်ကြသည်။

ယခင်က ယင်ချင်းလိန်ဘက်၌ ရပ်တည်ခဲ့ကြသော နည်းပြများအားလုံးသည် ၎င်းတို့၏လုပ်ရပ်များဖြင့် သူနှင့် အဆက်အသွယ်ဖြတ်ကြောင်း ပြသလိုက်ကြချေပြီ။

“အားလုံးက သဘောတူကြတယ်ဆိုတော့ အခုကစပြီး လုဝမ့်က ရေခဲငှက်မွေးကျောင်းတော်ရဲ့ ကျောင်းအုပ်အသစ် ဖြစ်လာပါပြီ”

ကျန်းရွှိက အခြေအနေကို အကဲခတ်ပြီးနောက် အလျင်အမြန် ကြေညာလိုက်လေသည်။

လက်ရှိအခြေအနေများအရ လုဝမ့်တစ်ယောက် ကျောင်းအုပ်သစ်ဖြစ်လာခြင်းမှာ အလွန်ပင် သဘာဝကျလှပေသည်။

နောက်ဆုံးတွင် လုဝမ့်၏မျက်နှာထက်၌ စိတ်သက်သာရာရသွားသည့် အပြုံးတစ်ပွင့် ပေါ်ထွက်လာခဲ့ချေပြီ။

ယင်ချင်းလိန် သေဆုံးသွားခဲ့ပြီ ဖြစ်သည်။ လုဝမ့်အတွက်မူ သူ၏အဘိုးဖြစ်သူအတွက် လက်စားချေမှု ထက်ဝက်ခန့် ပြီးမြောက်သွားခြင်းပင် ဖြစ်သည်။ ယခုအခါ ကျောင်းအုပ်ရာထူးကို ရရှိလိုက်ပြီဖြစ်ရာ အဘိုး၏ နောက်ဆုံးဆန္ဒကိုလည်း ဖြည့်ဆည်းပေးနိုင်ခဲ့လေပြီ။

“ဒီနေ့ ကျွန်တော် ရေခဲငှက်မွေးကျောင်းတော်ရဲ့ ကျောင်းအုပ်ဖြစ်လာတာက စီနီယာကြီးတွေရဲ့ ထောက်ခံမှုကြောင့်ပါပဲ... အားလုံးကို ကျေးဇူးတင်ပါတယ်ဗျာ”

လုဝမ့်က လက်နှစ်ဖက်ကိုယှက်ကာ အရိုအသေပေးရင်း အားလုံးကို ပြောလိုက်သည်။

သို့သော် သူ၏အကြည့်များမှာ ရွှီနင်၊ ကျန်းရွှိနှင့် ရွှီစီးချီတို့အပေါ်သို့သာ အဓိက ကျရောက်နေလေသည်။

“ကျွန်တော်က အဆင့်သုံး မှော်ပညာရှင်အဆင့်ပဲ ရှိပါသေးတယ်... အင်အားကလည်း နည်းပါးသလို အသက်ကလည်း ငယ်သေးတာမို့ ရေခဲငှက်မွေးကျောင်းတော်ကြီးရဲ့ အရေးကိစ္စတွေကို တစ်ယောက်တည်း စီမံခန့်ခွဲဖို့ဆိုတာ မဖြစ်နိုင်ပါဘူး... နောင်မှာလည်း ဒီက စီနီယာကြီးတွေအားလုံး ကျွန်တော့်ကို ဝိုင်းဝန်းကူညီပေးကြဖို့ မျှော်လင့်ပါတယ်... ကျွန်တော်လည်း အားလုံးဆီကနေ ကြိုးစားသင်ယူသွားပါ့မယ်”

လုဝမ့်၏စကားများမှာ အလွန်ပင် ရိုးသားပွင့်လင်းလှပေသည်။

ရေခဲငှက်မွေးကျောင်းတော်ကြီးကို သူတစ်ယောက်တည်း အပြည့်အဝ ထိန်းချုပ်နိုင်မည်မဟုတ်ကြောင်းကို သူကိုယ်တိုင် အသိဆုံးပင် ဖြစ်သည်။

ရေခဲငှက်မွေးကျောင်းတော်၏ လက်ရှိအင်အားကို ဆက်လက်ထိန်းသိမ်းထားနိုင်ရန်အတွက် ရွှီနင်၊ ကျန်းရွှိနှင့် ရွှီစီးချီတို့၏ အကူအညီများ မဖြစ်မနေ လိုအပ်လေသည်။

သူ စကားပြောပြီးသည်နှင့် ကျန်သူများကလည်း လုဝမ့်အပေါ် ထောက်ခံအားပေးကြောင်း အသီးသီး ဖော်ပြလိုက်ကြသည်။

ကျန်းရွှိနှင့် ရွှီစီးချီတို့သည်လည်း ရှုပ်ပွနေသော ပြဿနာများကို စတင်ရှင်းလင်းကြတော့သည်။

ယနေ့ ဖြစ်ပျက်ခဲ့သမျှသည် ရေခဲငှက်မွေးကျောင်းတော်အပေါ် ကြီးမားသော ဂယက်ရိုက်ခတ်မှုများ ဖြစ်ပေါ်စေမည်မှာ အသေအချာပင်။

ထို့ကြောင့် ကျန်းရွှိသည် ကျောင်းတော်ကြီး တည်ငြိမ်အေးချမ်းစေရန် အခြားသော နည်းပြများနှင့် ပူးပေါင်း၍ အင်တိုက်အားတိုက် ဆောင်ရွက်ရပေမည်။

ရွှီနင်ကမူ ထိုကဲ့သို့သော အုပ်ချုပ်ရေးကိစ္စရပ်များတွင် ဝင်ရောက်စွက်ဖက်ခြင်း လုံးဝမရှိခဲ့ပေ။

အမှန်စင်စစ် ရွှီနင်သည် ရေခဲငှက်မွေးကျောင်းတော်သို့ ရောက်ရှိလာသည့်အချိန်မှစ၍ သိုင်းပညာကျင့်ကြံရေးကိုသာ အာရုံစိုက်နေခဲ့ပြီး စိတ်ရှုပ်စရာကောင်းသော အသေးစိတ်ကိစ္စရပ်များကို တစ်ကြိမ်မျှ ဝင်ရောက်ကိုင်တွယ်ခြင်း မရှိခဲ့ချေ။

ဤလုပ်ရပ်မှာ သူ့အား အနည်းငယ် ပျင်းရိသူဟု ထင်ရစေသော်လည်း အမှန်တကယ်တွင်မူ ဤသည်မှာ ကျန်းရွှိ၊ ရွှီစီးချီနှင့် လုဝမ့်တို့အား စိတ်အေးသက်သာရှိစေရန် ပြုမူနေခြင်းသာ ဖြစ်သည်။

မည်သို့ပင်ဆိုစေကာမူ ရွှီနင်သည် ပြိုင်ဘက်ကင်းသော တိုက်ခိုက်နိုင်စွမ်းရှိသည့် အပြင်လူတစ်ဦးသာ ဖြစ်သည်။

အကယ်၍ သူသာ ရေခဲငှက်မွေးကျောင်းတော်အား ထိန်းချုပ်လိုစိတ်ဖြင့် အားကြိုးမာန်တက် ဝင်ရောက်စွက်ဖက်နေမည်ဆိုပါက သံသယဝင်ခံရမည်မှာ အသေအချာပင်။

ထို့အပြင် ရွှီနင်ကိုယ်တိုင်ကလည်း ထိုကဲ့သို့သော အုပ်ချုပ်ရေးကိစ္စရပ်များကို စိတ်ဝင်စားမှု မရှိပေ။

သူ လိုအပ်သည်မှာ ကျင့်ကြံရေးအရင်းအမြစ်များသာ ဖြစ်ပေသည်။

အချိန်များက လျင်မြန်စွာ ကုန်ဆုံးသွားပြီး မျက်စိတစ်မှိတ်အတွင်းမှာပင် ရက်အနည်းငယ် ကုန်လွန်သွားခဲ့လေပြီ။

လွန်ခဲ့သော ရက်အနည်းငယ်အတွင်း ရွှီနင်သည် ကွမ်ယွဲ့ထံသွားရောက်ကာ သိုင်းပညာလမ်းညွှန်ပြသပေးခြင်းမှလွဲ၍ သူ၏ခြံဝင်းထဲတွင်သာ နေထိုင်ကာ အပြင်သို့ ထွက်ခြင်းမရှိခဲ့ချေ။

တစ်နေ့တွင် ကျန်းရွှိတစ်ယောက် ရွှီနင်ထံ ရောက်ရှိလာခဲ့သည်။

ကျန်းရွှိ၏မျက်နှာမှာ ရက်ပေါင်းများစွာ အနားမယူရသဖြင့် အနည်းငယ် ပင်ပန်းနွမ်းနယ်နေပုံရသည်။

မှော်ပညာရှင်လောကတွင် အဆင့်ခုနစ် မှော်ပညာရှင်အဆင့်သို့ မရောက်ရှိသေးသရွေ့ ၎င်းတို့၏ ရုပ်ပိုင်းဆိုင်ရာ ကြံ့ခိုင်မှုမှာ သာမန်လူတစ်ဦး၏ ကန့်သတ်ချက်ထဲတွင်သာ ရှိနေသေးသည်။

မှော်စွမ်းအင်များဖြင့် မိမိတို့၏ ခန္ဓာကိုယ်ကို ထောက်ပံ့ထားခြင်း မရှိပါက ရုပ်ပိုင်းဆိုင်ရာ သက်သက်ဖြင့် သာမန်သိုင်းပညာရှင်အချို့ကိုပင် အနိုင်ယူနိုင်စွမ်း မရှိကြပေ။

“ညီလေးရွှီ...”

ကျန်းရွှိက အလွန်ပင် ဖော်ရွေပျူငှာစွာ နှုတ်ဆက်လိုက်သည်။

သူသည် ရွှီနင်အပေါ်၌ အလွန်ပင် အထင်ကြီးလေးစားမှု ရှိလေသည်။

ကျန်းရွှိသည် ရွှီနင်အား ရေခဲငှက်မွေးကျောင်းတော်သို့ ခေါ်ဆောင်လာစဉ်က အနည်းငယ် စိုးရိမ်ပူပန်ခဲ့မိသည်မှာ အမှန်ပင်။ မည်သို့ပင်ဆိုစေ ရွှီနင်သည် ပြိုင်ဘက်ကင်းသော စွမ်းရည်များကို ပိုင်ဆိုင်ထားသည့် အပြင်လူတစ်ဦးသာ ဖြစ်သည်။

အကယ်၍ ရွှီနင်၌သာ မကောင်းသော ရည်ရွယ်ချက်များ ရှိနေမည်ဆိုပါက ကျောင်းတော်အတွက် ကြီးမားသော ဘေးအန္တရာယ်ကြီး ကျရောက်လာနိုင်ပေသည်။

သို့သော် ထိုစဉ်က အခြေအနေများမှာ အလွန်ပင် အရေးကြီးနေခဲ့သဖြင့် သူ၏ရှေ့တွင် ပိုကောင်းသော ရွေးချယ်စရာလမ်းကြောင်း မရှိခဲ့ချေ။

ကံကောင်းထောက်မစွာဖြင့် ရွှီနင် ရေခဲငှက်မွေးကျောင်းတော်သို့ အမှန်တကယ် ရောက်ရှိလာပြီးနောက်တွင် ရွှီနင်သည် ကျောင်းတော်၏ အုပ်ချုပ်ရေးပိုင်းကို အနည်းငယ်မျှပင် စိတ်ဝင်စားခြင်းမရှိကြောင်း ကျန်းရွှိ သတိထားမိခဲ့သည်။

သူ၏ တစ်ခုတည်းသော တောင်းဆိုချက်မှာ အရင်းအမြစ် အများအပြား ရရှိရေးသာဖြစ်ရာ ဤအချက်က ကျန်းရွှိကို စိတ်သက်သာရာရကာ သက်ပြင်းချနိုင်စေခဲ့သည်။ စိတ်အေးသွားပြီးနောက်တွင် ကျန်းရွှိသည်လည်း ရွှီနင်အတွက် အရင်းအမြစ်များ စုဆောင်းပေးနိုင်ရန် အစွမ်းကုန် ကြိုးပမ်းပေးခဲ့လေသည်။

ယခုတစ်ကြိမ် ယင်ချင်းလိန်အား ဖယ်ရှားပြီး လုဝမ့်ကို ကျောင်းအုပ်ရာထူး ရရှိစေရန် ဆောင်ရွက်ခဲ့သည့် အစီအစဉ်များတွင် ရွှီနင်သည် အဓိကနေရာမှ ပါဝင်ပံ့ပိုးပေးခဲ့သည်။

သို့သော် အရင်ကကဲ့သို့ပင် ရေခဲငှက်မွေးကျောင်းတော်၏ အာဏာယန္တရားထဲသို့ ဝင်ရောက်စွက်ဖက်လိုခြင်း မရှိခဲ့ပေ။ ဤအချက်ကပင် ကျန်းရွှိအား အတိုင်းထက်အလွန် ကျေနပ်အားရစေခဲ့လေသည်။

“အစ်ကိုကျန်း... ခင်ဗျား တော်တော်လေး ပင်ပန်းနေတဲ့ပုံပဲ... သေချာလေး အနားယူသင့်တယ်နော်”

ရွှီနင်က ပေါ့ပေါ့ပါးပါး လေသံဖြင့် ပြန်လည်နှုတ်ဆက်လိုက်သည်။

ထိုစကားကို ကြားသောအခါ ကျန်းရွှိက ရယ်မောလိုက်ပြီး ‌ပြောလိုက်သည်။

“ညီလေးရွှီရေ... အခုဆို ကျောင်းတော်ကြီးက တည်ငြိမ်သွားပြီ... ရေခဲငှက်မွေးကျောင်းတော်ကြီးလည်း မကြာခင်မှာ လမ်းကြောင်းမှန်ပေါ် ပြန်ရောက်လာတော့မှာပါ”

“ဒါဆိုလည်း ကောင်းတာပေါ့ဗျာ”

ရွှီနင်လည်း ပြုံးလျက် ပြန်ဖြေလိုက်သည်။

ဤသို့ဆိုလျှင် သူရရှိမည့် အရင်းအမြစ်များလည်း ထပ်မံတိုးပွားလာဦးမည် ဖြစ်ပေသည်။

“ဒါ့အပြင် ငါတို့ လေပင်လယ်ကျောင်းတော်နဲ့လည်း ယာယီ သဘောတူညီမှု ရယူထားနိုင်ခဲ့ပြီ”

ကျန်းရွှိက အသံကို နှိမ့်ချလိုက်ပြီး သူ၏အပြုံးများလည်း ပျောက်ကွယ်သွားလေသည်။

“ဟင်...”

ရွှီနင် မျက်ခုံးပင့်လိုက်မိသည်။

လေပင်လယ်ကျောင်းတော်နှင့် ယင်ချင်းလိန်တို့ ပူးပေါင်းကြံစည်မှုသည် ရေခဲငှက်မွေးကျောင်းတော်အပေါ် ကြီးမားလှသော ဆုံးရှုံးမှုများကို ဖြစ်ပေါ်စေခဲ့လေသည်။

ကျောင်းတော်၏ အရင်းအမြစ်များကို လျှို့ဝှက်စွာ ခိုးယူပေးခဲ့ရုံသာမက ကျောင်းအုပ်ဟောင်းကိုပင် လုပ်ကြံသတ်ဖြတ်ခဲ့ကြသည်။ ဤကဲ့သို့သော သွေးကြွေးမျိုးကို အလွယ်တကူ ကျေအေးနိုင်ရန်မှာ အလွန်ပင် ခက်ခဲလှပေသည်။

“ငါတို့နဲ့ လေပင်လယ်ကျောင်းတော်ကြားမှာ သွေးကြွေး ရှိနေတယ်ဆိုပေမဲ့ လောလောဆယ်မှာတော့ လက်စားချေဖို့ ဘာနည်းလမ်းမှ မရှိသေးဘူးလေ”

ကျန်းရွှိ၏ လေသံထဲတွင် မတတ်သာသည့် အရိပ်အယောင်များ စွက်ယှက်နေသည်။

လေပင်လယ်ကျောင်းတော်တွင် အဆင့်ခြောက် မှော်ပညာရှင်နှစ်ဦး ရှိလေသည်။ ကျောင်းအုပ်ဟောင်း သက်ရှိထင်ရှား ရှိနေစဉ်ကပင် ရေခဲငှက်မွေးကျောင်းတော်သည် လေပင်လယ်ကျောင်းတော်၏ အင်အားကို မယှဉ်နိုင်ခဲ့ပေ။

ယခုအခါ ကျောင်းအုပ်ဟောင်းလည်း ကွယ်လွန်သွားခဲ့ပြီဖြစ်သလို ရေခဲငှက်မွေးကျောင်းတော်မှာလည်း မငြိမ်မသက်မှုများနှင့် ကြုံတွေ့ခဲ့ရသဖြင့် ကျောင်းတော်၏ အင်အားမှာ ယခင်ကထက် များစွာ ကျဆင်းသွားခဲ့ပြီ ဖြစ်သည်။ ထို့ကြောင့် လေပင်လယ်ကျောင်းတော်နှင့် ထိပ်တိုက်ရင်ဆိုင်ရန်မှာ လုံးဝ မဖြစ်နိုင်တော့ချေ။

“လေပင်လယ်ကျောင်းတော်ကလည်း ယင်ချင်းလိန်နဲ့ ပူးပေါင်းကြံစည်ခဲ့တာတွေ၊ ရေခဲငှက်မွေးကျောင်းတော်ရဲ့ ပိုင်ဆိုင်မှုတွေကို ခိုးယူခဲ့တာတွေကို အပြင်လူတွေ မသိစေချင်ဘူးလေ... ဒါတွေသာ ပေါက်ကြားသွားရင် အထီးကျန်လေပြင်းဒေသရဲ့ တောင်ပိုင်းမှာ သူတို့ရဲ့ နာမည်ဂုဏ်သတင်းကို ထိခိုက်စေနိုင်တယ်မလား... ဒါကြောင့် နှစ်ဖက်လုံး အပေးအယူတစ်ခု လုပ်ခဲ့ကြတယ်”

ကျန်းရွှိက ဆက်၍ ပြောလိုက်သည်။

“သူတို့နဲ့ ယင်ချင်းလိန် ပူးပေါင်းကြံစည်ခဲ့တဲ့ သက်သေအထောက်အထားတွေကို ငါတို့ဘက်က ပြန်ပေးလိုက်ရင် သူတို့ကလည်း ငါတို့ကို အရင်းအမြစ် တော်တော်များများ ပြန်ပေးလိမ့်မယ်”

“ဪ... ဒီလိုကိုး...”

ရွှီနင် ခေါင်းညိတ်လိုက်သည်။

ကျန်းရွှိ၏ နာကျင်မှုကို သူ ကောင်းစွာ နားလည်နိုင်ပေသည်။

တစ်ဖက်လူသည် ကျောင်းအုပ်ဟောင်းအား လုပ်ကြံသတ်ဖြတ်မှုတွင် ပါဝင်ပတ်သက်နေသော်ငြား ကျန်းရွှိတစ်ယောက် မတတ်သာဘဲ သည်းခံနေရခြင်း ဖြစ်သည်။

အကြောင်းရင်းမှာ သူတို့သည် လေပင်လယ်ကျောင်းတော်၏ အင်အားကို မယှဉ်နိုင်သောကြောင့်ပင်။

“လက်စားချေဖို့ အခွင့်အရေးကရှိနေပါသေးတယ်”

ရွှီနင်က ကျန်းရွှိ၏ပခုံးကို ပုတ်လျက် ပြောလိုက်သည်။

“ရေခဲငှက်မွေးကျောင်းတော်ကြီး အင်အားပြန်လည်တောင့်တင်းလာတဲ့ တစ်နေ့ကျရင် လေပင်လယ်ကျောင်းတော်လည်း အနှေးနဲ့အမြန်ဆိုသလို ပြန်လည်ပေးဆပ်ရမှာပါ”

“အင်း...”

ကျန်းရွှိက လေးလေးနက်နက် ခေါင်းညိတ်ထောက်ခံလိုက်သည်။

“ညီလေးရွှီ...”

ကျန်းရွှိက ဆက်၍ “ကျောင်းတော်ဘက်က ညီလေးကို အရင်းအမြစ် တော်တော်များများ ထောက်ပံ့ပေးဖို့ ဆုံးဖြတ်ထားတယ်... ညီလေးအနေနဲ့ အေးအေးချမ်းချမ်း ကျင့်ကြံပြီး ပိုမိုတိုးတက်လာဖို့ မျှော်လင့်ပါတယ်... ဒါမှသာ ရေခဲငှက်မွေးကျောင်းတော်ရဲ့ အဆင့်မြင့် တိုက်ခိုက်ရေးစွမ်းအားက အာမခံချက် ရှိလာမှာလေ”

“ကျွန်တော် အကောင်းဆုံး ကြိုးစားသွားပါ့မယ်”

ရွှီနင်က ပြန်လည်ကတိပေးလိုက်သည်။

သူတို့နှစ်ဦး ခေတ္တမျှ စကားစမြည်ပြောဆိုပြီးနောက် ကျန်းရွှိသည် ရွှီနင်၏ နေအိမ်မှ ပြန်လည်ထွက်ခွာသွားလေသည်။

နောက်ရက်အနည်းငယ်အတွင်းတွင်မူ ကျန်းရွှိ ပြောခဲ့သည့်အတိုင်းပင် ကျင့်ကြံရေးအရင်းအမြစ် အမြောက်အမြားကို ရွှီနင်ထံသို့ ပေးပို့လာကြလေသည်။

ရွှီနင်သည်လည်း သူ၏အဆင့်ကို မြှင့်တင်နိုင်ရန်အတွက် ထိုအရင်းအမြစ်များအားလုံးကို စုပ်ယူလိုက်တော့သည်။

သို့သော် အဆင့်ခြောက်သို့ တက်လှမ်းရန် လိုအပ်သော စွမ်းအင်ပမာဏမှာ အလွန်ပင် များပြားလွန်းလှသည်။

ဤမျှတိုတောင်းသော အချိန်ကာလလေးအတွင်း လိုအပ်သည့် စွမ်းအင်ပမာဏကို စုဆောင်းနိုင်မည် မဟုတ်ကြောင်း သိသာထင်ရှားလှပေသည်။

မည်သို့ပင်ဖြစ်စေ ရွှီနင်တစ်ယောက် လောကြီးနေခြင်း မရှိပေ။

ထို့ကြောင့် ရွှီနင်သည် အေးချမ်းပြီး အားလပ်လွန်းသော ဘဝတစ်ခုကို စတင်ဖြတ်သန်းနေလေသည်။

အရင်းအမြစ်များကို စုပ်ယူခြင်းအပြင် သူသည် ကွမ်ယွဲ့နှင့် လုဝမ့်တို့၏ သိုင်းပညာကျင့်ကြံမှုများကိုပါ လမ်းညွှန်ပြသပေးနေခဲ့သည်။

ထိုအထဲတွင် လုဝမ့်၏ တိုးတက်မှုမှာ သိပ်မသိသာလှသော်လည်း ကွမ်ယွဲ့၏ တိုးတက်မှုကမူ အံ့မခန်းပင် ဖြစ်သည်။ သူမသည် အဆင့်သုံး မှော်ပညာရှင်အဆင့်သို့ တိုက်ရိုက် ချိုးဖျက်တက်လှမ်းနိုင်ခဲ့လေသည်။

ဤရလဒ်ကြောင့် ကွမ်ယွဲ့တစ်ယောက် အတိုင်းထက်အလွန် ပျော်ရွှင်နေရတော့သည်။

ရွှီနင်ကမူ ဤအားလပ်နေသော အချိန်ကာလအတွင်း၌ သူ၏စွမ်းအင်များကို ဖြည်းဖြည်းချင်း စုဆောင်းနေလေတော့သည်။