ပထမဆုံး တွေ့ဆုံမှု

အခန်း (၂၈၇) : ပထမဆုံး တွေ့ဆုံမှု

ဝမ်ထျန်းနှင့် ဝမ်ဝေ့တို့က ဓာတ်ငါးပါးနန်းတော်မှ လူများအား ကြိုဆိုရန် တောင်ရှေ့သို့ ပျံသန်းသွားလိုက်ကြသည်။ ဝမ်ဝေ့က ရောက်ရှိသွားသည်နှင့် တစ်ခုခုကွဲပြားနေသည်ကို သတိပြုမိသွား၏။

ယခင် မဟာကျိုးဧည့်သည်တော်များ ရောက်လာသည်နှင့်မတူဘဲ ယခုကား သေးငယ်လွန်းလှသည်။ အတိအကျဆိုရလျှင် အဖွဲ့တွင် အမျိုးသမီးသုံးဦးသာ ပါရှိ၏။ တစ်ချက်တည်းကြည့်ရုံဖြင့် ထိုလူများထဲမှ နှစ်ယောက်က အထွတ်အထိပ်နယ်ပယ်အဆင့် ဖြစ်ပြီး ကျန်လူက အံ့ဖွယ်ခန္ဓာကိုယ်အဆင့် ဖြစ်၍ ဝမ်ဝေ့က သူမအပေါ်ကိုသာ အာရုံစိုက်ထားလိုက်သည်။

ကျန်းပိယုက သာမန်လူများလို သာမန်ဆန်လှပြီး ဆံပင်မှ ဝတ်ရုံအထိ သာမန်ဆန်လွန်းလှသည်။ အရာအားလုံးက သာမန်လိုသာ ဖြစ်နေ၏။ သို့သော် သူမ၏ ဝန်းကျင်တွင် ထူးခြားသည့် အငွေ့အသက်တစ်မျိုး ရှိနေသည်။ သူမက ရိုးရှင်းကာ ဖြူစင်လှသည်။ ပုံမှန်အားဖြင့် ဤသို့ သာမန်ဆန်လွန်းသူကို အလျင်အမြန် မေ့လျော့သွားတတ်သော်လည်း သူမအတွက် မမှန်ကန်နေခဲ့ပေ။

အားလုံးက တွေ့ဆုံပြီးသည့်အခါ တစ်ယောက်နှင့်တစ်ယောက် မိတ်ဆက်လိုက်ကြသည်။ ပုံမှန်အားဖြင့် ဤအခြေအနေတွင် နှုတ်ဆက်ပြီး စကားစမြည်ပြောပြီးနောက်တွင် နေရာအား လှည့်လည်ပြသမှုများ ပါဝင်သော်လည်း ဓာတ်ငါးပါးနန်းတော်က ထိုလောကဝတ်များ ကျော်ပစ်ပြီး သူတို့ ရောက်ရှိလာသည့် အကြောင်းအရင်းကိုသာ တိုက်ရိုက်ပြောလိုက်လေသည်။

ထိုအခြေအနေတစ်ခုလုံးတွင် ကျန်းပိယုက တိတ်ဆိတ်ငြိမ်သက်နေပြီး ရံဖန်ရံခါမှ လှည့်ကြည့်လာလေသည်။

ထျန်းဝေ့တောင်ထိပ်၊ ဧကရာဇ်အင်အားစုနှစ်ခုကြားမှ တရားဝင် အစည်းအဝေး

“ အဲဒါဆိုတော့ ဘာကြောင့်များ ရောက်လာတာပါလဲ” ဝမ်ထျန်းက မေးလိုက်သည်။ သို့သော်လည်း အစစ်အမှန်အုပ်ချုပ်သူ နှစ်ယောက်က ဘာမှမပြောဘဲ ကျန်းပိယုကိုသာ ကြည့်လိုက်သည်။ ကျန်းပိယုက ဝမ်ဝေ့အား တိုက်ရိုက်ကြည့်လိုက်ကာ

“ ရှင့်ရဲ့ အတွင်းအင်္ဂါတချို့ လိုတယ်”

အခန်းက တိတ်ဆိတ်သွားပြီး မည်သူကမှ အဖြစ်အပျက်ကို နားမလည်ကြပေ။ ထို့ကြောင့် သူတို့က ဝမ်ဝေ့ကိုသာ ကြည့်လိုက်ကြသည်။ ဤအခြေအနေတွင် လူငယ်မျိုးဆက် တစ်ယောက်ဖြစ်သည့် ကျန်းပိယုက စကားဝိုင်းထဲ ပါနေသည့်အတွက် သူလည်း ရှေ့ထွက်လာလိုက်သည်။

“ ကျုပ်ရဲ့ ချောမောမှုအဆင့်က အမျိုးသမီးတွေ ကျုပ် အစိတ်အပိုင်းကိုတောင် လိုချင်တဲ့အဆင့် ရောက်နေပြီလို့ ယုံကြည်ပေမဲ့ ဒါက ခင်ဗျားရဲ့ ရည်ရွယ်ချက် မဟုတ်ဘူးလို့ ခံစားမိနေတယ်။ ဆိုတော့ တာအိုရောင်းရင်း ကျန်းပိယု ရှင်းပြပါဦး” ဝမ်ဝေ့က ဆွဲဆောင်မှုရှိရှိ ပြုံးရင်း ပြောလိုက်သည်။

ကံဆိုးစွာဖြင့် ကျန်းပိယုက ထိုအရာများကို ဂရုမစိုက်ပေ။ သူမက မျက်မှောင်အနည်းငယ်ကြုတ်ကာ “ အကြီးအကဲတွေက ကျွန်မကို ပုံမှန်အတိုင်း မပြောဖို့တော့ သတိပေးထားတယ်။ ကျွန်မ ရှင့်ရဲ့ စိတ်ရှုပ်ထွေးမှုကို နားလည်ပါတယ်။ အဲဒီအတွက်လည်း တောင်းပန်ပါတယ်။

ကျွန်မ ကျင့်ကြံနေတုန်းက အလယ်ပိုင်းကုန်းမြေကနေ အားကောင်းတဲ့ ပင်ကိုဓာတ်ငါးပါးစွမ်းအင်ကို ခံစားမိလိုက်တယ်။ အဲဒါကြောင့် ဒီကို ရောက်လာတာပါ။ ရှင့်ကို တွေ့ပြီးတဲ့နောက်မှာ ရှင့်အတွင်းအင်္ဂါတွေဆီကနေ ထွက်လာတယ်ဆိုတာကို သိလိုက်ရတယ်။ အဲဒါကြောင့် ကျွန်မ လာယူတာပါ”

ဝမ်ဝေ့က ကျန်းပိယုကို လေ့လာရင်း မျက်ခုံးပင့်ကြည့်လိုက်သည်။ သူက သူမသည် တစ်ပြိုင်တည်း စကားတွေအများကြီး ပြောလေ့ မရှိကြောင်း ခံစားမိလိုက်သည်။ ဆိုလိုသည်မှာ သူမက စကားအနည်းငယ် ပြောသူသာ ဖြစ်လေသည်။

“ ရှင်းပြချက်ကိုတော့ အလေးထားပါတယ်။ ဒါပေမဲ့ မလုံလောက်သေးဘူး။ ခင်ဗျားက ဘယ်ဟာကို အတိအကျ လိုချင်တာလဲ” ဤတစ်ကြိမ် ဝမ်ဝေ့က သူ့ခန္ဓာကိုယ်မှ ဖိအားအနည်းငယ် ထုတ်လွှတ်ရင်း မေးလိုက်သည်။

သို့သော်လည်း ထိုဖိအားက ကျန်းပိယုအပေါ် သက်ရောက်မှု မရှိပေ။ သူမက အမူအရာပြောင်းလဲခြင်း မရှိဘဲ သူမက သိုလှောင်လက်စွပ်အတွင်းမှ ဘောလုံးအရွယ် သတ္တုလုံးတစ်လုံးကို ထုတ်ပေးလာလေသည်။

ဝမ်ဝေ့က တစ်ချက်တည်းကြည့်ရုံဖြင့် ထိုသတ္တုလုံးအတွင်းမှ ကြယ်တာရာ စွမ်းအားပြည့်နေသည့် ကမ္ဘာငယ်လေးတစ်ခုကို ခံစားမိလိုက်သည်။

“ အကြီးအကဲတွေ ပြောတာကတော့ ရှင့်ရဲ့ ရှေးဟောင်းခန္ဓာသန့်စင်ကျမ်းရဲ့ နောက်ဆုံးအဆင့်က ကြယ်တာရာစွမ်းအားနဲ့ ရှင့်ခန္ဓာဆုံမှတ်တွေကို ဖွင့်ရမယ် ပြောတယ်။ ဒါက ကျွန်မတို့ မူလကြယ်တာရာ ဧကရာဇ်ချန်ထားခဲ့တဲ့ ကြယ်တာရာ အဆီအနှစ်နဲ့ ပြည့်နေတဲ့ ကမ္ဘာငယ်လေးပဲ။ အဲဒါကြောင့် ရှင့်ရဲ့ ကျန့်အင်္ဂါရပ်တစ်ခုနဲ့ လဲလှယ်ချင်တယ်”

မူလကြယ်တာရာဧကရာဇ်နှင့် ပတ်သက်သည့် သတင်းအချက်အလက်များက ဝမ်ဝေ့၏ စိတ်ထဲ‌ ရောက်ရှိလာသည်။ သူက ဓာတ်ငါးပါးနန်းတော်၏ အားအကောင်းဆုံး မဟာဧကရာဇ်ထဲမှ တစ်ပါးဖြစ်ပြီး အဆင့် ၁၀ ကောင်းကင်ရုပ်ခန္ဓာဖြစ်သည့် ကြယ်တာရာအုပ်စိုးသူ ရုပ်ခန္ဓာကို ပိုင်ဆိုင်ထားခဲ့သူ ဖြစ်ပေသည်။

သူ မြင့်တက်လာစဉ်အတွင်း မူလအဆီအနှစ်ကို ကြယ်တာရာအဆီအနှစ်သို့ ပြောင်းလဲနိုင်သည့် နည်းလမ်းတစ်ခုကို ဖန်တီးခဲ့ပြီး ပြိုင်ဘက်ကင်း ကြယ်တာရာစွမ်းအား ထိန်းချုပ်နိုင်စွမ်းကို ရရှိလာသည်။

ထိုစဉ် ဓာတ်ငါးပါးနန်းတော်သည် အသင်္ချေအင်ပါယာကမ္ဘာအတွင်းတွင် အားအကောင်းဆုံး တာအိုဂိုဏ်း ဖြစ်ခဲ့ပြီး သူတို့က အလယ်ပိုင်းကုန်းမြေထဲ နေထိုင်ကြသည်။ ထို့အပြင် နန်းတော်နှင့် တာအိုအခွင့်အလမ်းဂိုဏ်းကြားတွင် တင်းအားတစ်ခု စတင်မြင့်တက်လာခဲ့၏။ ထိုအကြောင်းအရင်းမှာ မူလကြယ်တာရာ ဧကရာဇ်က မူလလမ်းစဉ်ကို အစားထိုးနိုင်သည့် ကြယ်တာရာအပေါ် မှီခိုနေသော ကျင့်ကြံရေး နည်းစနစ်အသစ်ကို ဖန်တီးခဲ့ဖို့ ကြိုးစားခဲ့၍ ဖြစ်လေသည်။ ထို့အပြင် သူက မူလအဆီအနှစ်ကို ကြယ်တာရာအဆီအနှစ် ပြောင်းလဲနိုင်သည့် အချက်ကြောင့် ဂိုဏ်းက စိုးရိမ်လာပြီး စစ်ပွဲဖြစ်ပွားလုမတတ် ဖြစ်ခဲ့သည်။ သို့သော်လည်း အမည်မသိ အကြောင်းအရင်းတချို့ကြောင့် သူက မလုပ်ဆောင်ခဲ့ပေ။ သူက ကြယ်တာရာအဆီအနှစ် ပြောင်းလဲသည့် နည်းလမ်းကိုပင် မဖြန့်ဝေခဲ့ပေ။

ထိုအတွေးအားလုံးက ဝမ်ဝေ့၏ စိတ်အတွင်း ခဏအတွင်း ဖြတ်ပြေးသွားကာ မေးလိုက်သည် “ ဒါက သူတာအိုကို သက်သေပြပြီးမှ ဖြစ်လာတဲ့ ကြယ်တာရာအဆီအနှစ်လား။ တာအို သက်သေမပြခင် ဖြစ်လာတဲ့ ကြယ်တာရာအဆီအနှစ်လား”

“ သူ တာအိုသက်သေပြပြီး မပျောက်ကွယ်သွားခင်တုန်းက ထားခဲ့တဲ့ဟာပါ”

ဝမ်ဝေ့က ခေါင်းညိတ်လိုက်ပြီးနောက် သူ့အဘိုးနှင့် ယန်းချန်ရှိရာဆီ လှည့်ကြည့်လိုက်ပြီး အနည်းငယ် ခေါင်းညိတ်ပြလိုက်သည်။ ထိုလူနှစ်ဦးက သူ့ဆိုလိုရင်းကို နားလည်ကာ အံ့ဖွယ်အသိစိတ်ဖြင့် သူ့အတွက် စစ်ဆေးပေးလိုက်သည်။

ဝမ်ဝေ့က အဖြေကောင်းကောင်း ရရှိပြီးသည့်နောက်တွင် ခဏတာစဉ်းစားလိုက်ပြီး “ မင်းရဲ့ အလဲအလှယ်ကို လက်ခံတယ်။ ဒါပေမဲ့ ငါ့ဆီမှာ တောင်းဆိုချက်တစ်ခုတော့ ရှိတယ်”

“ ပြောပါ”

“ အရင်ဆုံး မင်းဆီ ငါ့အတွင်းအင်္ဂါကို မပေးခင် ငါနဲ့ ဆက်နွယ်မှုကို ဖြတ်တောက်ဖို့ လိုအပ်တယ်။ ပြီးတော့ မင်းက ဒီဂိုဏ်းမှာပဲ အဲဒီဟာကို စုပ်ယူရမယ်။”

“ မင်း တကယ်လို့ အလဲအလှယ် မလုပ်ချင်ဘူးဆိုရင်လည်း ငြင်းလိုက်ပေါ့” အထွတ်အထိပ် အစစ်အမှန်အုပ်ချုပ်သူ တစ်ယောက်က ပြောလိုက်သည်။ သူမက ထိုအခြေအနေနှင့် ပတ်သက်၍ မကျေနပ်သည်မှာ သိသာလှ၏။ သို့သော်လည်း ကျန်းပိယုက တည်ငြိမ်နေဆဲ ဖြစ်သော်လည်း မျက်မှောင်ကြုတ်လာကာ မေးလိုက်သည် “ ဘာလို့လဲ”

“ မင်း သိတဲ့အတိုင်း တချို့အားကောင်းတဲ့ မန္တန်တွေ၊ ကျိန်စာတွေက ကောင်းကောင်းအလုပ်လုပ်နိုင်ဖို့ ပစ်မှတ်ထားတဲ့သူရဲ့ အစိတ်အပိုင်းတစ်ခုကို လိုအပ်တယ်။ အဲဒါကြောင့် ငါ့ဘေးကင်းမှုအတွက် သတိထားဖို့ လိုအပ်တယ်။

မင်းရဲ့ တုံ့ဆိုင်းနေတာကို နားလည်ပါတယ်။ ဒါပေမဲ့ ဒီဖြစ်စဉ်အတွင်းမှာ သူမကို တောင်တစ်လုံးပေးပြီးတော့ ဘေးကင်းမှုကိုလည်း အာမခံပေးနိုင်ပါတယ်”

အစစ်အမှန်အုပ်ချုပ်သူ နှစ်ယောက်က အကြည့်ချင်းဖလှယ်ကာ ကျန်းပိယုနှင့် ဆွေးနွေးလိုက်ကြသည်။ နောက်ဆုံးတွင် သူမက ပြောလိုက်၏ “ ကောင်းပြီ။ ဒုတိယ တောင်းဆိုချက်ကရော ဘာလဲ”

“ ဒုတိယနဲ့ နောက်ဆုံးတောင်းဆိုချက်က မင်းရဲ့ မူလအရင်းအမြစ် သွေးစက် လိုအပ်တယ်”

ကျန်းပိယုက ဝမ်ဝေ့၏ ရည်မှန်းချက်သည် သူမနှင့်အတူတူ ဖြစ်နေကြောင်း မှန်းဆမိလိုက်သည်။ သူမ၏ ခန္ဓာမှ ဓာတ်ငါးပါးစွမ်းအားကို အသုံးပြုကာ သူ့အင်အားကို တိုးတက်လိုချင်တာ ဖြစ်ရမည်။

“ ဒီအလဲအလှယ်က မျှတတယ်များထင်နေလား” အစစ်အမှန် အုပ်ချုပ်သူတစ်ယောက်က မေးလိုက်သည်။

“ ဘာလို့လဲ။ ဘာလို့ မမျှတရမှာလဲ” ဝမ်ဝေ့က ပြန်ဖြေလိုက်သည် “ ကျုပ်ရဲ့အတွင်းအင်္ဂါတွေက ပင်ကိုဓာတ်ငါးပါးပစ္စည်းနဲ့ သန့်စင်ထားတာ။ ဒါက ခင်ဗျားတို့ပေးတဲ့ ကြယ်တာရာ အဆီအနှစ်ထက် ပိုတယ်။”

ထိုအစစ်အမှန်အုပ်ချုပ်သူများက ထိုတာအိုအခွင့်အလမ်းဂိုဏ်း၏ အမွေခံသားတော်သည် အဓိပ္ပာယ် မရှိသည်များကို ပြောနေကြောင်း သိလေသည်။ အကယ်၍ သူပြောသည်က အမှန်ဖြစ်နေလျှင်ပင် သူတို့က အတွင်းအင်္ဂါအကုန်လုံး ယူမည် မဟုတ်ဘဲ အစိတ်အပိုင်းအနည်းငယ်သာ လိုချင်ရုံမျှ ဖြစ်၏။

သူတို့က ဒေါသထွက်သော်လည်း ဆက်လက် မငြင်းခုန်နိုင်တော့ပေ။ ထိုအလဲအလှယ်က သူတို့အတွက် အလွန်အရေးကြီးလှ၏။ ထို့ကြောင့် စကားအနည်းငယ် ပြောဆိုပြီးသည့်နောက်တွင် သူတို့က လက်ခံဖို့ ဆုံးဖြတ်လိုက်ကြသည်။

ကျန်းပိယုက သူမ၏ မူလအရင်းအမြစ် သွေးစက်နှစ်စက်နှင့်အတူ သတ္တုလုံးကို ထုတ်ပေးလာသည်။ သို့သော် သူမက ထိုအရာနှင့် ဆက်သွယ်မှုကို ဖြတ်တောက်လိုက်၏။

ဝမ်ဝေ့အတွက်မူ သူ့အတွင်းအင်္ဂါရပ်တချို့ကို ဖြတ်တောက်ကာ သူတို့ထဲတွင် ရှိနေသည့် ကံကြမ္မာစွမ်းအားကို ဖယ်ရှားလိုက်ပြီး ထိုအင်္ဂါရပ်များနှင့် သူ့ကြားတွင် ရှိနေသည့် ကံကြမ္မာကိုပင် ဖြတ်တောက်လိုက်သည်။

ယခုမှစ၍ သူတို့ကြားတွင် ဆက်နွယ်မှု မရှိတော့ပေ။ သူတို့က ဓာတ်ငါးပါးစွမ်းအား ကိန်းအောင်းပြီး မိုးမြေအတွင်း တည်ရှိနေသည့် အတွင်းအင်္ဂါမျှသာ ဖြစ်သည်။

ထို့အပြင် သူတို့ကို ဘာမှမလုပ်ပေ။ သူက စကားတည်သည့်သူ ဖြစ်ပေသည်။ နှစ်ဖက်လုံးကလည်း ဒီကမ္ဘာတွင် အမြင့်ဆုံး ချုပ်နှောင်ရေးစာချုပ်ကို ချုပ်ဆိုခဲ့ကြသည်။

ထို့နောက် အစစ်အမှန် အုပ်ချုပ်သူနှစ်ယောက်ကို တောင်တစ်လုံး ပေးအပ်လိုက်သည်။ သူတို့က ကျန်းပိယုကို ကာကွယ်ဖို့အတွက် အစီအရင်များစွာ ချမှတ်ခဲ့ပြီး သူတို့က တစ်ခုခုဖြစ်လိုဖြစ်ငြား သူတို့ဂိုဏ်းကိုပင် လှမ်း၍ ဆက်သွယ်ထားသည်။

ဂိုဏ်းချုပ်ခန်းမအတွင်း ဓာတ်ငါးပါးနန်းတော်မှလူများ ထွက်သွားပြီးသည့်နောက်တွင် ဝမ်ဝေ့က ဂိုဏ်းရှိ အထက်ပိုင်းလူများနှင့် ဆွေးနွေးနေသည်

“ သူမကို ဘယ်လိုထင်လဲ” သူ့အဘိုး ဝမ်ချန်က မေးလိုက်သည်။

“ သူမက ဖြူစင်တဲ့ နှလုံးသားနဲ့ မွေးလာတယ်တူတယ်။ သူမရဲ့ ပါရမီက တာအိုဘာသာအတွက် လုံးဝကို ပြီးပြည့်စုံတယ်။ သူမရဲ့ ဓာတ်ငါးပါးမျှခြေညီ ရုပ်ခန္ဓာကိုပါ ထည့်ပေါင်းလိုက်ရင် သူမရဲ့ အလားအလာက ဟာသတော့ မဟုတ်ဘူး”

ဖြူစင်သည့် စိတ်နှလုံးသားရှိခြင်းက စိတ် သို့မဟုတ် စိတ်ဝိညာဉ်တွင် အညစ်အကြေး မရှိသည့် အခြေအနေဖြစ်ပြီး စိတ်ခံစားချက်များ၊ စိတ်လိုအင်ဆန္ဒများနှင့် ရှုပ်ထွေးသည့်အတွေးများ၏ သက်ရောက်မှု မရှိဘဲ အမြဲလိုလို ငြိမ်းအေးနေတတ်သည်။ ဤသည်က မိုးမြေကြားရှိ စည်းမျဉ်းများကို နားလည်ဖို့ အကောင်းဆုံးအခြေအနေ ဖြစ်၏။

ထိုအခြေအနေက တရားထိုင်ခြင်း သို့မဟုတ် ကျင့်ကြံခြင်းဖြင့် ရောက်ရှိနိုင်သော်လည်း ထိုပါရမီဖြင့် မွေးဖွားလာသည့်သူများက အစစ်အမှန် ကျင့်ကြံရေးပါရမီရှင်များ ဖြစ်ကြသည်။ သူတို့က ကျမ်းများ၊ တာအိုသဘောတရားများကို နားလည်သဘောပေါက်ဖို့ လွယ်ကူသောကြောင့် တာအိုဂိုဏ်းများက သူတို့အား လိုက်လံရှာဖွေတတ်ကြသည်။