အခန်း ၄၀၇

အခန်း။ ၄၀၇

သို့သော်လည်း ထိုအခိုက်အတန့်တွင် မြေခွေးတစ်ထောင်တောင်မှ မြေခွေးမိစ္ဆာအိုကြီးသည် အခွင့်အရေးကောင်းကို လှမ်းမြင်သွားပြီး ရုတ်တရက် လှုပ်ရှားလိုက်တော့သည်။

၎င်း၏ အိုမင်းရင့်ရော်လှသော မျက်နှာထက်တွင် ရက်စက်ကြမ်းကြုတ်သည့် အမူအရာတစ်ခု ပေါ်ထွက်လာ၏။

ခန္ဓာကိုယ်ထက်တွင် အလင်းတစ်ချက် ဖျတ်ခနဲ လက်သွားပြီးနောက် ရှည်လျားဖြူဆွတ်နေသော မြေခွေးအမြီးကြီးသည် ခန္ဓာကိုယ်မှ ရုတ်တရက် ပြုတ်ထွက်သွားကာ ဝံပုလွေသခင်လေးဆီသို့ အရှိန်အဟုန်ဖြင့် ပြေးဝင်သွားခဲ့သည်။

ရှူး ရှူး ရှူး ရှူး...

မြေခွေးမိစ္ဆာအိုကြီး၏ အမြီးသည် မျက်စိတစ်မှိတ်အတွင်းမှာပင် တဟုန်ထိုး ကြီးထွားရှည်လျားလာပြီး အဆက်မပြတ် ဖြန့်ကျက်သွားကာ ဝံပုလွေသခင်လေးဆီသို့ ဦးတည်ထိုးစိုက်မည့် သိပ်သည်းလှသော ငွေဖြူရောင် မြားတစ်ထောင် ရွာချလိုက်သည့်အလား မရေမတွက်နိုင်သော ချည်မျှင်တန်းများအသွင် ပြောင်းလဲသွားခဲ့တော့သည်။

ဝံပုလွေသခင်လေး၏ ခန္ဓာကိုယ်မှာ အလွန်တရာ ကြံ့ခိုင်လှသဖြင့် အဆင့်တူ လူသားကျင့်ကြံသူများ၏ တိုက်ခိုက်မှုများက သူ့ကို မထိခိုက်စေနိုင်သော်လည်း ယခု အဖြူရောင်ချည်မျှင်တန်းများ၏ ထိုးနှက်မှုကိုမူ လုံးဝ ပိတ်ဆို့နိုင်ခြင်း မရှိခဲ့ချေ။

ခြေလက်အဆစ်များနှင့် ဝမ်းဗိုက်ကဲ့သို့သော အကာအကွယ် အနည်းငယ် အားနည်းသည့် နေရာအနှံ့အပြားသို့ အဖြူရောင်ချည်မျှင်တန်း အမြောက်အမြား စိုက်ဝင်သွားသဖြင့် သူသည် ရင်ဘတ်ထဲမှနေ၍ အောင့်အည်းကာ ညည်းတွားလိုက်ရသည်။

"လွင့်စင်သွားစမ်း"

ဝံပုလွေသခင်လေး၏ ခန္ဓာကိုယ်မှ အနက်ရောင် အရှိန်အဝါများ အလုံးအရင်းဖြင့် ပေါက်ကွဲကာ ထွက်ပေါ်လာပြီး တောက်လောင်နေသော မီးလျှံများကဲ့သို့ ထိုအဖြူရောင်ချည်မျှင်တန်းများကို ဝါးမြိုကာ နောက်ဆုံးတွင် ပြာကျသွားစေခဲ့သည်။

သို့သော်လည်း သူ၏ အရှိန်အဝါမှာ သိသိသာသာ ထိုးဆင်းသွားခဲ့ပြီး မူလအသက်စွမ်းအားစွာ ဆုံးရှုံးသွားခဲ့ရပုံပင်။

မြေခွေးမိစ္ဆာအိုကြီး၏ ဒဏ်ရာပေးခြင်းကို ခံလိုက်ရသဖြင့် ဝံပုလွေသခင်လေးသည် ထိုနေရာ၌ ဆက်မနေရဲတော့ဘဲ နေရာရွှေ့ပြောင်းရန် ကြိုးပမ်းတော့သည်။

အတိအကျ ထိုအခိုက်အတန့်၌ပင် ဧရာမ အနက်ရောင် ကုဗတုံးလှောင်အိမ်ကြီးတစ်ခုသည် သူ့ထံသို့ တည့်တည့်မတ်မတ် လျှောဆင်းသက်လာပြီး သူ၏အမြင်အာရုံတစ်ခုလုံးကို အမှောင်ထုအတွင်းသို့ လွှမ်းခြုံပစ်လိုက်သည်။

အသက်ရှူသံ သုံးကြိမ်စာမျှပင် မပြည့်သော အချိန်ကာလအတွင်း ဒုန်းဟူသော ကျယ်လောင်လှသည့် ပေါက်ကွဲသံနှင့်အတူ ထိုအနက်ရောင်လှောင်အိမ်ကြီးမှာ ဝံပုလွေသခင်လေး၏ ပြင်းထန်လှသော ခွန်အားကြောင့် အစိတ်စိတ်အမွှာမွှာ ပျက်စီးသွားခဲ့ရပြီး မှေးမှိန်သွားသော အစီအရင်အလံလေးခုအသွင်ဖြင့် အဝေးသို့ လွင့်စင်သွားခဲ့ရသည်။

သို့သော်ငြားလည်း သူ၏အမြင်အာရုံမှာ အသက်ရှူသံအနည်းငယ်စာမျှ ကာလပတ်လုံး ပိတ်ဆို့ခြင်း ခံလိုက်ရသဖြင့် လူသားမျိုးနွယ်တို့၏ အဓိကရည်ရွယ်ချက်မှာ အောင်မြင်သွားခဲ့ပြီ ဖြစ်သည်။

ကြိုတင်ပြင်ဆင်ထားသော ကျင့်စဉ်အတတ်ပညာများနှင့် ဝိညာဉ်ရတနာ အမြောက်အမြားသည် ကောင်းကင်ယံထက်မှနေ၍ လှိုင်းတံပိုးတောင်ပံများအလား လိမ့်၍ ဆင်းသက်လာခဲ့ကြတော့သည်။

မြေခွေးမိစ္ဆာအိုကြီး၏ အမြီးဖြင့် ဖန်တီးထားသော ဝိညာဉ်ရတနာသည် ဝံပုလွေသခင်လေးထံသို့ အဖြူရောင်ချည်မျှင်တန်းများစွာကို ရှူး ရှူး ရှူးဟု အသံမြည်လျက် ထပ်မံပစ်လွှတ်လိုက်ပြန်သည်။

ငွေရောင်အလင်းတန်းတစ်ခုသည် လျှပ်စီးလက်သကဲ့သို့ သူ၏နှလုံးသားဆီသို့ ထိုးဖောက်ဝင်ရောက်ရန် ဦးတည်လာခဲ့ရာ ထိုငွေရောင်အလင်း ဖြတ်သန်းသွားရာ လေဟာနယ်တစ်ခုလုံး ဂယက်လှိုင်းများ ထင်ကျန်ရစ်ခဲ့သဖြင့် ၎င်း၏ မယုံကြည်နိုင်လောက်သော အရှိန်နှင့် စွမ်းရည်မှာ အထင်အရှားပင်။

အလျားပေ တစ်ရာရှိသော အနက်ရောင် ဓားဧရာမကြီးတစ်စင်းသည် ဝံပုလွေသခင်လေး၏ ဦးခေါင်းထက်တွင် ဝဲပျံနေပြီး ၎င်းထက်တွင် မည်းမှောင်သော တိမ်တိုက်များ ဖိနှိပ်လာသည့်

အလား အနက်ရောင် မိစ္ဆာစွမ်းအားများ တရိပ်ရိပ် တက်လှမ်းနေကာ ကောင်းကင်ကြီး ပြိုကျလာသကဲ့သို့ သူ၏လည်ပင်းဆီသို့ ဝုန်းခနဲ ကျဆင်းလာခဲ့သည်။

နီရဲသော မီးလျှံတိုက်ပွဲအလံတစ်ခုသည် သူ့အနီးတွင် တဖျတ်ဖျတ် လွင့်ပျံနေပြီး အလံထံမှ တဖျတ်ဖျတ်အသံများ ထွက်ပေါ်လျက် လေဟာနယ်ထဲမှနေ၍ မီးငှက်များစွာကို ဖြစ်ပေါ်စေကာ ထိုမီးငှက်အားလုံးသည် အသိုက်ပြန်ကြသည့်အလား ဝံပုလွေသခင်လေးဆီသို့ တဟုန်ထိုး ပြေးဝင်သွားကြသည်။

မတူညီသော ဝိညာဉ်ရတနာ တစ်ဆယ်ကျော်၏ ပေါင်းစပ်အင်အားများသည် တစ်ခုနှင့်တစ်ခု ရောယှက်စုစည်းသွားခဲ့ရာ ဝံပုလွေသခင်လေး တည်ရှိရာ နေရာတစ်ခုလုံးကို ဝိညာဉ်စွမ်းအားများ ပြည့်နှက်ကာ ဟင်းလင်းပြင်ကြီး တစ်ခုလုံး တုန်ဟည်းချောက်ချားသွားရသည့် သေတွင်းတစ်ခုအသွင်သို့ ပြောင်းလဲပစ်လိုက်တော့သည်။

"အား..."

ဝံပုလွေသခင်လေးသည် ကောင်းကင်နှင့်မြေကမ္ဘာကို တုန်ဟည်းသွားစေသည့် ကြောက်မက်ဖွယ်ကောင်းသော စူးစူးရှရှ အော်ဟစ်သံကြီးကို ထွက်ပေါ်စေလျက် ထိုနေရာမှနေ၍ အသည်းအသန် ရုန်းထွက်ခဲ့ရသည်။

သူ၏ ခန္ဓာကိုယ်တစ်ခုလုံးတွင် ဒဏ်ရာဒဏ်ချက်များ ဗရပွနှင့် မီးကျွမ်းရာများ ဖုံးလွှမ်းလျက် အလွန်တရာ သနားစဖွယ် အခြေအနေသို့ ရောက်ရှိသွားခဲ့ပြီး သွေးများ တသွင်သွင် စီးကျလာကာ သူ၏ခြေဖဝါးအောက်တွင် သွေးအိုင်များပင် ဖြစ်တည်လာခဲ့သည်။

"ယုတ်မာတဲ့ လူသားတွေ... မင်းတို့ ငါ့ကို သတ်လို့မရပါဘူးကွ"

ပြင်းထန်လှသော ဗုံးကြဲတိုက်ခိုက်မှု တစ်လှိုင်းကို ကြံ့ကြံ့ခံပြီးနောက်တွင်ပင် ဝံပုလွေသခင်လေးသည် မာန်တင်းကာ ဟိန်းဟောက်နေဆဲပင်။

သို့သော်လည်း ထို့နောက်တွင်မူ သူ၏ ပတ်ပတ်လည်တွင် နက်နဲသောအရှိန်အဝါများ ရှိကြသည့် လူသားကျင့်ကြံသူ တစ်ဆယ်ကျော်က ဝန်းရံပိတ်ဆို့ထားသည်ကို သူ ချက်ချင်း မြင်တွေ့လိုက်ရသည်။

သူတို့တစ်ဦးချင်းစီသည် ကျင့်စဉ်အတတ်ပညာများကို အဆင်သင့် ပြင်ဆင်ထားကြပြီးဖြစ်ရာ သူ့ထံသို့ ထပ်မံပစ်လွှတ်လိုက်ကြသဖြင့် ဒုတိယအကြိမ်မြောက် ပြင်းထန်လှသော ဗုံးကြဲတိုက်ခိုက်မှုကြီး စတင်ပြန်တော့သည်။

ဘုန်း ဘုန်း ဘုန်း...

မြေခွေးတစ်ထောင်တောင်၏ တောင်ခြေတစ်ခုလုံးသည် လုံးဝကို သက်ရှိတို့ မဝင်ရောက်ရမည့် တားမြစ်နယ်မြေတစ်ခုအဖြစ်သို့ ပြောင်းလဲသွားခဲ့ရသည်။

ဝံပုလွေမိစ္ဆာ ရာဂဏန်းခန့်မှာ ထိုကျင့်စဉ်စွမ်းအားများအကြား မိသွားခဲ့ကြသဖြင့် မျက်စိတစ်မှိတ်အတွင်းမှာပင် အသက်ပျောက်ကုန်ကြရသည်။

အချိန်မီ မရှောင်တိမ်းနိုင်ခဲ့ကြသော ဝံပုလွေဗိုလ်ချုပ် နှစ်ကောင်ပင်လျှင် ပြင်းထန်စွာ ဒဏ်ရာရရှိသွားခဲ့ကြပြီး ကျိုးကန်းပိန်ချွဲသွားသော ခန္ဓာကိုယ်များကို ဆွဲကာ ရှုံးနိမ့်သွားသည့် ခွေးအိုများအလား ဆုတ်ခွာပြေးလွှားခဲ့ကြရသည်။

ဒုတိယအကြိမ်မြောက် ဗုံးကြဲတိုက်ခိုက်မှုအပြီးတွင်မူ ဝံပုလွေသခင်လေးသည် နောက်ထပ် တောင့်ခံနိုင်စွမ်း မရှိတော့ချေ။

သူ၏ ခန္ဓာကိုယ်မှာ ပေါက်ကွဲသွားသည့် လေဖောင်းပူဖောင်းတစ်ခုကဲ့သို့ မူလအမြင့် ဆယ်ပေခန့်သို့ ပြန်လည်ကျုံ့ဝင်သွားခဲ့ရပြီး သူ၏ အရှိန်အဝါမှာလည်း အလွန်အမင်း အားနည်းသွားခဲ့ရသည်။

သူသည် လူသားကျင့်ကြံသူများကို နာကြည်းလှသော မျက်လုံးများဖြင့် စိုက်ကြည့်ကာ သွေးတစ်လုပ်ကို အန်ထုတ်လိုက်ပြီးနောက် နီရဲသော အလင်းတန်းတစ်ခုအသွင် ပြောင်းလဲလျက် အရှက်တကွဲဖြင့် လျင်မြန်စွာ ထွက်ပြေး၍ လွတ်မြောက်သွားခဲ့တော့သည်။

"မြန်မြန်... လိုက်ဖမ်းကြစမ်း။ ဒီမိစ္ဆာရဲ့ ပင်ကိုယ်ပါရမီက တကယ့်ကို ကြောက်စရာကောင်းလွန်းတယ်။ စိမ်းလဲ့ဝံပုလွေတောင်ကြောမှာတောင် သူ့ကို ကျော်လွန်နိုင်တဲ့သူ ရှားတယ်။ ငါတို့ ဒီလောက်အထိ အကွက်ချပြီး အစွမ်းကုန် နှစ်ကြိမ်တိုင်တိုင် တိုက်ခိုက်ခဲ့တာတောင် သူ့ကို အပြတ်မသတ်နိုင်သေးဘူး"

"ထားလိုက်ပါတော့... သူ အခု သူ့ရဲ့ မူလခန္ဓာကိုယ်အစစ်အမှန်ကိုတောင် ဆက်ပြီး မထိန်းသိမ်းနိုင်တော့ဘူးပဲ။ သူ့ရဲ့ ကျင့်ကြံခြင်းနယ်ပယ်ကလည်း မိစ္ဆာဗိုလ်ချုပ်အဆင့်အောက်ကို ထိုးကျသွားလောက်ပြီ။ တကယ်တမ်း ပြန်လည်နာလန်ထူလာဖို့ဆိုရင် အနည်းဆုံး အနှစ်တစ်ရာလောက် အချိန်ယူရမှာ"

"ဝံပုလွေသခင်လေးကို မိစ္ဆာဘုရင်ကြီးအဆင့်သို့ ဖောက်ထွင်းဝင်ရောက်မသွားအောင် တားဆီးဖို့ဆိုတဲ့ ငါတို့ရဲ့ အဓိကရည်ရွယ်ချက် အောင်မြင်သွားပြီပဲ"

"သူ့ကို သတ်ပစ်လိုက်ရင် နောက်ဆက်တွဲ သက်ရောက်မှုတွေက တစ်မျိုးတစ်ဖုံ ပြောင်းလဲသွားလိမ့်မယ်။ လွန်ခဲ့တဲ့ နှစ်ပေါင်းထောင်ချောက်များစွာကလိုပဲ လူသားမျိုးနွယ်နဲ့ မိစ္ဆာမျိုးနွယ်ကြား ကြီးမားတဲ့ စစ်ပွဲကြီး ဖြစ်ပွားပြီး လူသူအမြောက်အမြား ဒုက္ခပင်လယ်ဝေမယ့် ကပ်ဘေးဆိုးကြီးဆီကို ဦးတည်သွားနိုင်ခြေ ရှိတယ်"

ထိုနေရာတွင် အလောင်းကိုင်တွယ်ခြင်းဂိုဏ်း၊ နေနီဂိုဏ်း၊ စစ်မှန်သောသွေးဂိုဏ်းနှင့် ချင်လွမ်နန်းတော်တို့မှ ရောက်ရှိလာကြသည့် အခြေခံအုတ်မြစ်တည်ဆောက်ခြင်းအဆင့် ကျင့်ကြံသူကြီး အများအပြား ရှိနေကြသည်။

သုတို့သည် ဝံပုလွေသခင်လေးကို မောင်းထုတ်ပြီးနောက် အချင်းချင်း စကားအနည်းငယ် နှုတ်ဆက်ကာ တစ်ယောက်ပြီးတစ်ယောက် အသီးသီး ထွက်ခွာသွားကြတော့သည်။

အလောင်းကိုင်တွယ်ခြင်းဂိုဏ်းအုပ်စုနှင့်အတူ ပြန်လာသည့် လမ်းခရီးတွင်မူ...

"ဝမ်ဟုန်ယွဲ့... မင်း ဘယ်လိုဖြစ်လို့ အဲဒီဝံပုလွေသခင်လေးကို အသက်ရှူသံ သုံးကြိမ်စာလောက်တောင် ပိတ်ဆို့မထားနိုင်ရတာလဲ။ ငါတို့ရဲ့ အရေးကြီးတဲ့ ကိစ္စကြီးတစ်ခုလုံး ပျက်စီးလုနီးပါး ဖြစ်သွားရတယ်"

အကြီးအကဲပိက မကျေမနပ်ဖြင့် ပြစ်တင်ဝေဖန်လိုက်သည်။

အကြီးအကဲဝမ်သည် သူ၏နှုတ်ခမ်းထောင့်ရှိ သွေးစများကို သုတ်လိုက်ပြီး မျက်နှာတစ်ခုလုံး ဖြူလျော်နေကာ ဘာမျှ ပြန်လည်မရှင်းလင်းသော်လည်း သူ၏မျက်ဝန်းအစုံတွင်မူ နာကြည်းမှုနှင့် ဒေါသအရောင်အဝါများ ဖြတ်သန်းသွားခဲ့သည်။

တောက်... ကောက်ကျစ်တဲ့ အဲဒီခန္ဓာကိုယ်ကျင့်ကြံသူရဲ့ အလစ်အငိုက် တိုက်ခိုက်ခြင်းကိုသာ မခံရရင် ငါ ဘယ်လိုလုပ် အဲဒီဝံပုလွေသခင်လေးကို သုံးချက်စာလောက်တောင် ပိတ်မထားနိုင်ဘဲ တစ်ကြိမ်ပြီးတစ်ကြိမ် ဒဏ်ရာရပါ့မလဲ။

...

အလောင်းကိုင်တွယ်ခြင်းဂိုဏ်း၊ ဝမ်တောက်တောင်ထိပ်။

အကြီးအကဲဝမ် တစ်ယောက်တည်း နာကြည်းစွာ ကျိန်ဆဲပြစ်တင်နေသည့် ထိုကောက်ကျစ်သော ခန္ဓာကိုယ်ကျင့်ကြံသူလူငယ်လေး လုံယီမှာမူ လက်ရှိတွင် ယန်ပိုင်ကျောက်ဂူဂေဟာ၌ တိတ်ဆိတ်စွာ နေထိုင်လျက် သူ၏အသက်သခင်အလောင်းကောင် လုံအာနှင့်အတူ သိုင်းပညာရပ်များကို လေ့ကျင့်နေခဲ့သည်။

ဝူး... ဝူး...

လုံအာသည် လေဟာနယ်ထဲသို့ လက်သီးချက်များကို တရစပ် ထိုးနှက်နေရာ၊ တစ်ချက်ချင်းစီမှာ ကျားတစ်ကောင်ကဲ့သို့ အားအင်အပြည့် ရှိသည်။

၎င်း၏ ခန္ဓာကိုယ်မှာ လျင်မြန်ဖျတ်လတ်ပြီး ခြေလှမ်းများမှာလည်း စနစ်တကျ ရှိလှသဖြင့် အနှစ်ရာချီ လေ့ကျင့်ထားသော သိုင်းပညာရှင်အိုကြီးတစ်ဦးနှင့်ပင် တူသည်။

၎င်းမှာ နည်းစနစ်ပိုင်း သက်သက်ကိုသာ ဆိုလိုခြင်းပင်။

အကယ်၍ ၎င်း၏ ခန္ဓာကိုယ်ထဲတွင် ပေါင်လေးငါးသောင်းခန့် ရှိသော ခွန်အားများနှင့် ဓားလှံမတိုးသည့် သံအလောင်းကောင်ခန္ဓာကိုယ်ကိုပါ ထည့်သွင်း၍ တွက်ချက်မည်ဆိုပါက သိုင်းပညာရှင် ဆယ်ယောက် ပေါင်းလျှင်ပင် သူ၏ ပြိုင်ဘက် ဖြစ်လာနိုင်မည် မဟုတ်ချေ။

"အစွန်းရောက်လက်သီး"

လုံယီက လုံအာကို အမိန့်ပေးလိုက်သည်။

နောက်တစ်စက္ကန့်တွင် လုံအာ၏ ခြေထောက်များက တင်းမာသွားပြီး ကျောပြင်မှာ လေးတစ်

စင်းအလား ကိုင်းညွတ်သွားကာ ခါးမှာ ကြိုးတစ်ချောင်းကဲ့သို့ တင်းကျပ်သွားပြီးလျှင် မြှားတစ်စင်းနှင့်တူသော ညာဘက်လက်မောင်းဖြင့် ကောင်းကင်ယံ ၄၅ ဒီဂရီထောင့်သို့ ပင့်လက်သီးတစ်ချက်ကို အားကုန်ထိုးနှက်လိုက်တော့သည်။

ဖတ်...

မီးရှူးမီးပန်းများ ပေါက်ကွဲသံကဲ့သို့ ပြင်းထန်လှသော အသံမှာ လေထုထဲတွင် ကာလအတန်ကြာအောင် ပဲ့တင်ထပ်၍ ကျန်ရစ်ခဲ့၏။

ထို့နောက်တွင်မူ အဖြောင့်ထိုးလက်သီး၊ ဝိုက်လက်သီး၊ ပင့်လက်သီး၊ ထိုးချက်များ၊ ခြေကန်ချက်များ၊ ဘေးတိုက်ကန်ချက်များ၊ ဝှေ့ယမ်းကန်ချက်များနှင့် ပုဆိန်ကန်ချက်များ...

လုံအာသည် အမျိုးမျိုးသော သိုင်းကွက်များကို တစ်ခုပြီးတစ်ခု လျင်မြန်ချောမွေ့စွာ ထုတ်ဖော်ပြသနေရာ ကြည့်ရသည်မှာ ပန်းပွင့်လေးများ ဝဲပျံနေသည့်အလား လှပလွန်းလှသည်။

လုံယီသည် ဤမြင်ကွင်းကို ကြည့်ရှုရင်း ရင်ထဲမှနေ၍ မချီးမွမ်းဘဲ မနေနိုင်ခဲ့ချေ။

လုံအာသည် လူသားတစ်ယောက် မဟုတ်သော်ငြားလည်း သူ၏ သိုင်းပညာအမွေအနှစ်အားလုံးနီးပါးကို ပထမဆုံးအကြိမ်အဖြစ် အပြည့်အဝ ဆက်ခံရရှိထားသူ ဖြစ်သည်။

"စစ်မှန်သောခွန်အား ခန္ဓာကိုယ်ဖြိုခွဲခြင်း"

လုံယီ၏ အမိန့်ပေးသံ ထပ်မံထွက်ပေါ်လာသောအခါ...

လုံအာသည် သူ၏ညာဘက်လက်ကို အရှေ့သို့ ဆန့်ထုတ်လိုက်သည်။

၎င်း၏ လက်ညှိုးနှင့် လက်ခလယ်တို့ ပူးကပ်သွားပြီးနောက် သူတို့အကြားတွင် နီရဲသော အလင်းတန်းများ စုစည်းလာကာ ရှူးဟူသော အသံနှင့်အတူ လုံယီထံသို့ ပစ်လွှတ်လိုက်ရာ လုံယီက သူ၏လက်ဝါးဖြင့် အလွယ်တကူပင် ပိတ်ဆို့တားဆီးလိုက်၏။

ဒီလောက်အထိ ပြင်းထန်တဲ့ သတ်ဖြတ်နိုင်စွမ်းမျိုးနဲ့ဆိုရင် သာမန်ချီသန့်စင်ခြင်းအဆင့် နောက်ကျောပိုင်း ကျင့်ကြံသူတွေအနေနဲ့ သတိမထားမိဘဲ အပစ်ခံရရင် ဒုက္ခလှလှတွေ့သွားနိုင်တယ်။

လုံယီက စိတ်ထဲမှနေ၍ တိတ်တဆိတ် တွက်ချက်လိုက်သည်။

သူသည် လုံအာ၏ လက်ရှိတိုက်ခိုက်ရေးစွမ်းရည်အပေါ် အတော်အတန် ကျေနပ်မိသဖြင့် ၎င်းက သူကို အကူအညီအချို့ ပေးစွမ်းနိုင်လိမ့်မည်ဟု တွေးလိုက်မိသည်။

နောက်တစ်ကြိမ် အပြင်ထွက်သည့်အခါ ၎င်းကိုပါ တစ်ပါတည်း ခေါ်ဆောင်သွားရန် သူ စဉ်းစားလိုက်၏။

"ကတုံးကြီးလုံ... မင်းရဲ့ သခင်မကြီး ရောက်နေပြီလေ။ ဘာဖြစ်လို့ ထွက်ပြီး ကြိုဆိုရမှာကို မသိရတာလဲ"

ရင်းနှီးပြီးသားဖြစ်သော နောက်ပြောင်ကျီစယ်လိုသည့် အသံလေးတစ်ခု ကျောက်ဂူအပြင်ဘက်မှ ထွက်ပေါ်လာခဲ့သည်။

လုံယီ၏ နှုတ်ခမ်းထောင့်တွင် အပြုံးတစ်ခု ပေါ်ထွက်လာပြီးနောက် တံခါးအပြင်ဘက်သို့ လှမ်းလျှောက်ခဲ့တော့သည်။

ပိယောင်ယောင်သည် သူ့ထံသို့ တဆတ်ဆတ်နှင့် ခုန်ပေါက်လှမ်းလာနေ၏။

ယနေ့တွင် သူမသည် ထူးထူးခြားခြားပင် သူမ၏ဆံပင်များကို နှစ်ဖက်ခွဲကာ စည်းနှောင်ထားပြီး သူမ၏ မာန်ဝင့်ထည်ဝါလှသော ကိုယ်ဟန်အနေအထားနှင့် ပေါင်းစပ်လိုက်သောအခါ မပြောပြတတ်အောင် ဆွဲဆောင်မှုရှိသော အလှတရားတစ်ခု ပေါ်လွင်နေသည်။

"ဟူး... ချင်းယီကလည်း အခုထိ တံခါးပိတ်ကျင့်ကြံရာကနေ ထွက်မလာသေးဘူး။ ငါ ဘယ်သူနဲ့ သွားဆော့ရမှန်းတောင် မသိတော့ဘူး"

ပိယောင်ယောင်က မချင့်မရဲဖြင့် ညည်းတွားလိုက်သည်။

"သူမက ကျင့်စဉ်ကို အခုမှ ဆက်ခံရရှိထားတာဆိုတော့ ပြန်လည်ခြေဖျက်ဖို့အတွက် လုပ်ငန်းစဉ်တစ်ခု ရှိနေတာ သဘာဝပါပဲ"

လုံယီက စာနာနားလည်ပေးတတ်ဟန်ဖြင့် ဆိုလိုက်၏။

"ဒါနဲ့... ငါ့မိသားစုဆီကနေ သတင်းတစ်ခု ပို့လာတယ်။ ဆေးဖက်ဝင်အပင်တစ်ရာချိုင့်ဝှမ်းထဲမှာ နဂါးတစ်ကောင်ရဲ့ အမှတ်အသားတွေ တကယ်ကြီး ပေါ်လာတယ်တဲ့"

ပိယောင်ယောင်က ပြောလိုက်သည်။

"နဂါးရဲ့ အမှတ်အသားတွေ တကယ်ရှိနေတယ်ဆိုရင်တော့... နဂါးတံတွေးမြက်နဲ့ ပတ်သက်တဲ့ သတင်းက အမှန်ဖြစ်ဖို့ များတာပေါ့"

လုံယီ ခဏမျှ တွေးတောလိုက်ပြီးနောက် "အကြီးအကဲဝမ်က ငါ့ကို အပြင်ထွက်လာအောင် မျှားခေါ်ဖို့အတွက် အရင်းအနှီး အတော်များများ သုံးထားပုံပဲ"

"အကြီးအကဲဝမ်ကို စိုးရိမ်မနေပါနဲ့"

ပိယောင်ယောင်က သူမ၏ မျက်ဝန်းဝိုင်းဝိုင်းကြီးများကို ပုတ်ခတ်လျက် "ငါ မင်းကို ပြောဖို့ လုပ်နေတာ... အခု အကြီးအကဲဝမ်က ဂိုဏ်းထဲမှာ မရှိပါဘူး။ သူက အရေးကြီးတဲ့ ကိစ္စတစ်ခုနဲ့ တုပ်နှောင်ခြင်း ခံထားရတာ"

"ဘာ..."

လုံယီ အနည်းငယ် အံ့အားသင့်သွားခဲ့သည်။

"ငါ့အဖေက ငါ့ကို ပြောပြတာလေ... ဟိဟိ"

ပိယောင်ယောင်သည် သတင်းပေးရသဖြင့် အလွန်အမင်း စိတ်လှုပ်ရှားနေပုံရပြီး သတင်းလာပေးခြင်းပင်။

"ယောင်ယောင်... ကျေးဇူးပါပဲ"

လုံယီသည် စိတ်လှုပ်ရှားသွားခဲ့ရသဖြင့် ပိယောင်ယောင်၏ လက်ကလေးကို လှမ်း၍ ဆုပ်ကိုင်လိုက်သည်။

တစ်ဖက်လူ၏ မျက်နှာလေး ရဲခနဲ ဖြစ်သွားသော်လည်း လက်ကို ရုန်းထွက်ခြင်းမရှိသည်ကို မြင်တွေ့ရသဖြင့် သူသည် ရှေ့သို့ ဆက်လက်တိုးဝင်လိုက်တော့သည်။

သူမ၏ ချောမွေ့အေးမြလှသော လက်မောင်းလေးကို သာယာစွာ ပွတ်သပ်ရင်း သူမကို သူ၏ ရင်ခွင်ထဲသို့ ဆွဲသွင်းလိုက်ကာ ထို့ထက် ပိုမိုမြင့်မား၍ မတ်စောက်လှသော နယ်မြေအဆင့်အတန်းဆီသို့ ဆက်လက်တက်လှမ်းရန် ကြိုးပမ်းလိုက်စဉ် …..

ဖတ်….

လုံယီ၏ လက်မှာ ရက်စက်စွာ ရိုက်ထုတ်ခြင်း ခံလိုက်ရတော့သည်။

"လူလိမ် လူဆိုးလေး... ငါ အခု ပြန်တော့မယ်"

ပိယောင်ယောင်သည် မျက်နှာတစ်ခုလုံး ရဲတောက်လျက် လုံယီကို မျက်နှာပြောင်ပြပြီးနောက် ယန်ပိုင်ကျောက်ဂူဂေဟာအတွင်းမှနေ၍ အလျင်အမြန် ထွက်ပြေးလွတ်မြောက်သွားခဲ့တော့သည်။

"ဟေး... ဒီလောက်အထိ ချမ်းသာကြွယ်ဝတဲ့သူက နည်းနည်းလေးတောင် သဘောမကောင်းဘူးပဲ"

လုံယီက ခေါင်းကို ခါယမ်းလျက် ပြစ်တင်ဝေဖန်လိုက်သည်။

အကြီးအကဲဝမ် မရှိတဲ့အချိန်က... ခရီးသွားဖို့အတွက် အကောင်းဆုံး အခွင့်အရေးပဲ။ ပင်အန်းရွာကို ပြန်ရမယ့် အချိန်ရောက်ပြီ ထင်တယ်။

ဆေးဖက်ဝင်အပင်တစ်ရာချိုင့်ဝှမ်းနဲ့ ပင်အန်းရွာကလည်း တစ်နေရာတည်းမှာ တည်ရှိနေတာဆိုတော့... ငါ အခြေအနေအားလုံးကို တစ်ပြိုင်နက်တည်း တစ်ချက်တည်းနဲ့ ရှင်းလင်းလို့ ရတာပေါ့။