အခန်း (၅၈၇-၅၈၈)

အခန်း ၅၈၇ - ဧကရာဇ်အဆင့် မင်းဆက်သို့ တိုးမြှင့်ခြင်း (၂)

အကယ်၍ ကုချင်းဖန်သာ မရှိလျှင် သိုင်းနတ်ဘုရားမင်းဆက်၏ အင်အားမှာ သာမန်မျှသာ ဖြစ်လိမ့်မည်။ သို့သော် ယခုအချိန်အထိ ထိုအင်အားစုများသည် မသိမသာဖြင့် သိုင်းနတ်ဘုရားမင်းဆက်ကိုယ်တိုင်မှာ ကြောက်မက်ဖွယ်ကောင်းသော အစုအဖွဲ့တစ်ခုအဖြစ် ကြီးထွားလာခဲ့ကြောင်း ရုတ်တရက် သတိပြုမိလိုက်ကြသည်။

နတ်ဘုရားအသွင်ပြောင်းခြင်း နယ်ပယ် အဆင့်ကိုးရှိသော စစ်သည် သုံးသိန်း။ ဤသည်မှာ နတ်ဆိုးနှိမ်နင်းရေး စစ်တပ်၏ အင်အားအပြည့်အစုံပင် မဟုတ်သေးပေ။ ဤကဲ့သို့ ကြောက်မက်ဖွယ်ကောင်းသော စစ်တပ်မျိုးကို ရှေးဟောင်းမင်းဆက် များစွာပင် ပိုင်ဆိုင်ထားခြင်း မရှိပေ။ ‘ဧကရာဇ်အဆင့် မင်းဆက်’ အချို့သာလျှင် ဤအဆင့်ရှိသော စစ်တပ်ကို လေ့ကျင့်ပျိုးထောင်နိုင်သည်။ သို့သော် မည်သည့် ဧကရာဇ်အဆင့် မင်းဆက်မဆို နှစ်ပေါင်းသန်းချီသော အခြေခံအုတ်မြစ်များ ရှိကြသည်။ သိုင်းနတ်ဘုရားမင်းဆက်မှာမူ တည်ထောင်ခဲ့သည်မှာ နှစ်ပေါင်း တစ်ရာခန့်သာ ရှိသေးသဖြင့် အချိန်ကွာခြားချက်မှာ အနည်းဆုံး အဆပေါင်း တစ်သောင်းခန့် ရှိနေသည်။

ထို့ကြောင့် နတ်ဆိုးနှိမ်နင်းရေး စစ်တပ် သုံးသိန်း ပေါ်ထွက်လာသည့်အခါ ‘ကုရှင်း’ ပြည်နယ်တစ်ခုလုံးရှိ မငြိမ်မသက်မှုများသည် ချက်ချင်း ပျောက်ကွယ်သွားခဲ့သည်။ နတ်ဆိုးများ၊ တစ်ကိုယ်တော် ကျင့်ကြံသူများ သို့မဟုတ် မကောင်းဆိုးဝါး ဝိညာဉ်များဟု ခေါ်ဆိုကြသူများ အားလုံးမှာ နတ်ဆိုးနှိမ်နင်းရေး စစ်တပ်၏ သံမဏိစည်းကမ်းများအောက်တွင် နှိမ်နင်းခြင်း ခံခဲ့ရသည်။ ဤအကြောင်းကြောင့်ပင် သိုင်းနတ်ဘုရားမင်းဆက်သည် ကုရှင်းပြည်နယ်ကို လုံးဝသိမ်းပိုက်နိုင်ခဲ့ပြီး ထိုကဲ့သို့ တိုတောင်းသော အချိန်အတွင်း ပရမ်းပတာမှုအားလုံးကို နှိမ်နင်းနိုင်ခဲ့ခြင်း ဖြစ်သည်။

သို့သော် ပြင်ပမှ တုန်လှုပ်ခြောက်ခြားမှုများနှင့် ပတ်သက်၍ ကုယန်မှာ ဂရုစိုက်ရန် စိတ်မပါပေ။ အကြောင်းမှာ ယခုအခါ သူသည် ဧကရာဇ်အဆင့်သို့ တိုးမြှင့်ရန်အတွက် ပြင်ဆင်နေသောကြောင့် ဖြစ်သည်။ သူ၏ အာရုံခံစားမှုအရ သိုင်းနတ်ဘုရားမင်းဆက်၏ နိုင်ငံတော်ကံကြမ္မာမှာ အထွတ်အထိပ်သို့ ရောက်ရှိနေပြီဖြစ်ကာ၊ ‘ဆဋ္ဌမအဆင့် ပဒုမ္မာကြာ’ ၏ ပုံရိပ်မှာ အပြည့်အဝ ထင်ရှားလာပြီး ‘အဝါရောင် တိမ်တိုက်’ တစ်ခုမှာလည်း သူတော်စင်အောက်ရှိ ကျင့်ကြံသူအားလုံးကို ဖိနှိပ်နိုင်စွမ်းရှိစွာ ကျဆင်းနေသည်။

ကုယန်သည် သူ၏ နတ်ဘုရားအသိစိတ်ကို နိုင်ငံတော်ကံကြမ္မာနှင့် ပေါင်းစပ်လိုက်သောအခါ သူသည် ‘ကောင်းကင်ကိုးထပ်မှ နတ်မင်းကြီး’ တစ်ပါးအဖြစ် ပြောင်းလဲသွားသကဲ့သို့ ခံစားရပြီး ကျယ်ပြောလှသော သိုင်းနတ်ဘုရားမင်းဆက်မှာ သူ၏ရှေ့တွင် ပေါ်လာသည်။

“ကိုးပြည်နယ်စလုံး ထွန်းကားနေပြီ”

“ရှန့်ယွမ်ပြည်နယ် ဝပြောနေပြီ”

“ကုရှင်းပြည်နယ် တည်ငြိမ်သွားပြီ”

“သိုင်းနတ်ဘုရားမင်းဆက်ရဲ့ စုဆောင်းမှုဟာ လုံလောက်သွားပြီ၊ ဧကရာဇ်အဆင့် တက်လှမ်းဖို့ လက်တစ်ကမ်းပဲ လိုတော့တယ်”

သုံးရက်အကြာတွင်။

နန်းတွင်းအခမ်းအနား စီတန်းလှည့်လည်မှုသည် ‘နေဧကရာဇ်တောင်’ သို့ ဦးတည်သွားခဲ့သည်။ ဧကရာဇ် ကုယန်သည် အရပ်ဘက်နှင့် စစ်ဘက်ဆိုင်ရာ အရာရှိများ၊ လူအုပ်ကြီးနှင့်အတူ ခန့်ညားထည်ဝါစွာ ချီတက်သွားသည်။ သိုင်းလောကဂိုဏ်းပေါင်းစုံမှ အားကောင်းသော ပုဂ္ဂိုလ်များကိုလည်း နန်းတော်မှ ဖိတ်ကြားထားသဖြင့် အခမ်းအနားကို ကြည့်ရှုရန် နေဧကရာဇ်တောင်သို့ ဦးတည်ခဲ့ကြသည်။

နေဧကရာဇ်တောင်သို့ ဝင်ရောက်လိုက်ချိန်တွင် ထိတ်လန့်ဖွယ်ကောင်းသော ဝိညာဉ်စွမ်းအင်များကြောင့် သူတို့အားလုံး တုန်လှုပ်သွားကြသည်။

“ဟား... နေဧကရာဇ်တောင်ရဲ့ ဝိညာဉ်စွမ်းအင်က ကြောက်စရာကောင်းလိုက်တာ၊ အောက်မှာ ထိပ်တန်း ဝိညာဉ်ကြော ရှိနေတာ သေချာတယ်” ဗဟုသုတရှိသော ကျင့်ကြံသူအချို့မှာ ဤမြင်ကွင်းကို မြင်လိုက်ရသဖြင့် သူတို့၏နှလုံးသားများမှာ ပြင်းထန်စွာ တုန်လှုပ်သွားကြသည်။ ထိုကဲ့သို့သော ဝိညာဉ်စွမ်းအင်မျိုးသည် ‘သန့်ရှင်းသောအဆင့်’ ဝိညာဉ်ကြောထက်ပင် များစွာ ပိုမိုထိတ်လန့်ဖွယ် ကောင်းသည်။ နေဧကရာဇ်တောင်၏ ဝိညာဉ်ကြောမှာ အနည်းဆုံး ‘နတ်ဘုရားအဆင့်’ရှိနေသည်မှာ ထင်ရှားသည်။

သို့သော် နတ်ဘုရားအဆင့် ဝိညာဉ်ကြောများမှာ အလွန်ရှားပါးသည်။ အရှေ့ပိုင်းဒေသတစ်ခုလုံးတွင် အစစ်အမှန် နတ်ဘုရားအဆင့် ဝိညာဉ်ကြောမှာ အနည်းငယ်သာ ရှိသည်။ မည်သည့် နတ်ဘုရားအဆင့် ဝိညာဉ်ကြောမဆို ထိပ်တန်းအင်အားစုများက ထိန်းချုပ်ထားကြပြီး ဧကရာဇ်အဆင့် မင်းဆက်အချို့နှင့် ရှေးကျသော၊ ဟောင်းနွမ်းလှသော အင်အားစုများသာလျှင် ထိုကဲ့သို့သော ဝိညာဉ်ကြောများကို ပိုင်ဆိုင်ထားကြသည်။

ပိုမိုမြင့်မားသော ‘ဧကရာဇ်အဆင့်’ ဝိညာဉ်ကြောမှာမူ ပို၍ပင် ရှားပါးလှသည်။

သို့သော် နေဧကရာဇ်တောင်၏ ဝိညာဉ်ကြော အဆင့်တက်စဉ်က လှုပ်ရှားမှုမှာ မသေးငယ်လှသဖြင့် ဤကိစ္စကို သိရှိသူမှာ မနည်းလှပေ။ အကယ်၍ ၎င်းသည် သိပ်သည်းသော ဝိညာဉ်စွမ်းအင် သက်သက်သာ ဖြစ်လျှင် ဤမျှကြီးမားသော ဆူပူမှုကို ဖြစ်စေလိမ့်မည် မဟုတ်ပေ။ ဤဝိညာဉ်စွမ်းအင်ထဲတွင် ရှာဖွေရခက်သော ‘ဧကရာဇ်အရှိန်အဝါ’ များ ပါဝင်နေခြင်းကြောင့်လည်း ဖြစ်သည်။ ကျင့်ကြံသူအချို့မှာမူ နေဧကရာဇ်တောင်ထဲတွင် ရှေးဟောင်း ‘မဟာဧကရာဇ်’တစ်ပါး ပုန်းကွယ်နေသည်ဟုပင် သံသယဝင်ခဲ့ကြသည်။

“နေဧကရာဇ်တောင်မှာ ကြီးမားတဲ့ လျှို့ဝှက်ချက် ရှိနေတယ်” ဟု ‘ထိုက်ရွှမ်း တာအိုဘုရင်’က တွေးတောနေသည်။ ရှေးဟောင်း သူတော်စင်တစ်ပါးအနေဖြင့် သူ၏ အသိပညာမှာ သာမန်လူများနှင့် နှိုင်းယှဉ်၍ မရနိုင်ပေ။ သို့သော် နေဧကရာဇ်တောင်တွင် လျှို့ဝှက်ချက်များ ရှိနေသည်ဟု ခန့်မှန်းမိသော်လည်း၊ ထိုက်ရွှမ်း တာအိုဘုရင်မှာ ပိုမိုနက်ရှိုင်းစွာ စူးစမ်းရန် ရည်ရွယ်ချက် မရှိပေ။ အဆုံးတွင် သိုင်းနတ်ဘုရားမင်းဆက်မှာ သာမန်အင်အားစု မဟုတ်သဖြင့် လျှို့ဝှက်ချက်တစ်ခုခု ရှိနေလျှင်ပင် ၎င်းသည် သာမန်သူတော်စင်တစ်ဦး လောဘတက်နိုင်သော အရာမဟုတ်ပေ။

သူ၏ ဘေးနားတွင် ‘ဖူရှန်ကျွင်း’ က ခံစားချက်အပြည့်ဖြင့် မှတ်ချက်ပေးခဲ့သည်- “ဒီနေဧကရာဇ်တောင်ရဲ့ အခြေခံအုတ်မြစ်ဟာ သာမန်အင်အားစုတွေနဲ့ နှိုင်းယှဉ်လို့မရဘူး၊ သိုင်းနတ်ဘုရားမင်းဆက်ဟာ နှစ်ပေါင်းတစ်ရာမပြည့်ခင်မှာ ဒီအဆင့်ကို ရောက်လာလိမ့်မယ်လို့ ဘယ်သူထင်မှာလဲ”

ဤယဇ်ပူဇော်ပွဲ အခမ်းအနားသို့ ‘မြင့်မြတ်သောထိုက်ရွှီမြေ’ကိုလည်း ဖိတ်ကြားထားသဖြင့် ထိုက်ရွှမ်း တာအိုဘုရင်၊ ဖူရှန်ကျွင်းနှင့်အတူ မြင့်မြတ်သောထိုက်ရွှီမြေမှ အားကောင်းသော ပုဂ္ဂိုလ်အချို့နှင့် အမြင်ကျယ်စေရန် လိုက်ပါလာသော ထူးချွန်သည့် မျိုးဆက်သစ်လူငယ်အချို့ ရောက်ရှိနေကြသည်။ ဖူရှန်ကျွင်း၏ နောက်ကွယ်တွင် မြင့်မြတ်သောထိုက်ရွှီမြေမှ တပည့်အချို့မှာ တုန်လှုပ်နေသော အမူအရာများ ရှိနေကြသည်။ ဤနေရာရှိ အရာအားလုံးမှာ သူတို့၏ မျက်စိကို ပွင့်သွားစေရန် လုံလောက်နေသည်မှာ ထင်ရှားသည်။

အခြားတစ်ဖက်တွင် နေဧကရာဇ်တောင်၏ တစ်နေရာတွင် အနက်ရောင် ဝတ်ဆင်ထားပြီး သာမန်ပုံစံရှိသော သက်လတ်ပိုင်း ကျင့်ကြံသူတစ်ဦးသည် သူ၏ရှေ့မှ မြင်ကွင်းကို ကြည့်နေရင်း သူ၏ အမူအရာမှာ အနည်းငယ် ပြောင်းလဲသွားသည်။

“ဝိညာဉ်စွမ်းအင်ထဲမှာ ဧကရာဇ်အရှိန်အဝါတွေ ပါနေတယ်၊ ငါမှန်အောင် ခန့်မှန်းရမယ်ဆိုရင် ဒီနေရာမှာ ပုန်းကွယ်နေတဲ့ ‘ဧကရာဇ်ရုပ်အလောင်း’ ရှိနေရမယ်”

“ဆရာ၊ ဒါက တကယ်ပဲလား”

စကားပြောသူမှာ ရဲရင့်သော ပုံစံရှိသည့် အမျိုးသမီးတစ်ဦး ဖြစ်ကာ၊ သာမန် အနက်ရောင်ဝတ်စုံကို ဝတ်ဆင်ထားပြီး ကျောက်စိမ်းကဲ့သို့ ချောမွေ့သော အသားအရေနှင့် မညစ်နွမ်းသော နတ်သမီးတစ်ပါးကဲ့သို့ အလွန်လှပသော အသားအရေ ရှိသူဖြစ်သည်။ အကယ်၍ ကုမိသားစု၏ အခြားအဖွဲ့ဝင်များသာ ဤနေရာတွင် ရှိနေပါက ဤအမျိုးသမီးမှာ ပျောက်ဆုံးနေသည်မှာ ကြာပြီဖြစ်သော ‘ကုရှန့်နန်’ ဖြစ်ကြောင်း တွေ့ရှိကြလိမ့်မည်။

ကုရှန့်နန်၏ ဘေးတွင် ရှိနေသူမှာ ‘ဓားဂိုဏ်း’ ၏ ဂိုဏ်းချုပ် ‘ရှောင်းကျန့်ကျွင်း’ ဖြစ်သည်။ သူသည် ကျင့်ကြံမှုမှာ တာအိုနန်းတော်နယ်ပယ် အဆင့်ကိုးသို့ ရောက်ရှိထားပြီး သူတော်စင်တစ်ဝက်နှင့် ယှဉ်နိုင်လောက်အောင် အားကောင်းသော ပုဂ္ဂိုလ်တစ်ဦး ဖြစ်သည်။

“မမှားနိုင်ဘူး၊ ငါတို့ဂိုဏ်းမှာလည်း ရှေးဟောင်း ဧကရာဇ်ရုပ်အလောင်းတွေ ရှိတယ်၊ အငွေ့အသက်က အတူတူပဲ။ မင်းရဲ့ သိုင်းနတ်ဘုရားမင်းဆက်ရဲ့ အခြေခံအုတ်မြစ်က တကယ်ကို ထူးခြားတာပဲ၊ ဧကရာဇ်ရုပ်အလောင်းတွေကိုတောင် ထိန်းချုပ်ထားနိုင်တယ်” ဂိုဏ်းချုပ် ရှောင်းကျန့်ကျွင်းက တုန်လှုပ်သော အရိပ်အယောင်ကို ပြသခဲ့သည်။

ဧကရာဇ်ရုပ်အလောင်း ၎င်းမှာ မဟာဧကရာဇ်တစ်ပါး၏ ရုပ်အလောင်း ဖြစ်သည်။ ရှေးခေတ်ကတည်းက လူသားမျိုးနွယ်ထဲတွင် မဟာဧကရာဇ်များမှာ အလွန်ရှားပါးသည်။ ဓားဂိုဏ်းတွင် ဧကရာဇ်ရုပ်အလောင်းများ ရှိနေခြင်းမှာ ဓားဂိုဏ်းသည် ရှေးခေတ်ကတည်းက လက်ဆင့်ကမ်းလာခဲ့သည့် ရှေးအကျဆုံး အင်အားစုတစ်ခု ဖြစ်သောကြောင့် ဖြစ်သည်။ ထိုသို့ပင် ဖြစ်စေကာမူ ဓားဂိုဏ်းမှ မဟာဧကရာဇ် လက်တစ်ဆုပ်စာသာ ပေါ်ထွက်ခဲ့သည်။

ဤသို့တွေးရင်း ဂိုဏ်းချုပ် ရှောင်းကျန့်ကျွင်းသည် သူ၏ဘေးမှ ကုရှန့်နန်ကို ကြည့်ကာ မေးလိုက်သည်- “မင်းရဲ့ ကုမိသားစုက တကယ်ပဲ သာမန်မိသားစုဖြစ်ပြီး၊ မင်းရဲ့ အဘိုးက နှစ်ပေါင်းတစ်ရာကျော်ပဲ ကျင့်ကြံခဲ့တာဆိုတာ သေချာလား”

“ဖြစ်နိုင်ပါတယ်... ဒါပေမဲ့ တပည့်တစ်ယောက်အနေနဲ့ ကျွန်မလည်း သိပ်မသေချာဘူး” ကုရှန့်နန်၏ အမူအရာမှာ တွန့်ဆုတ်နေပြီး မရေမရာ ပြောလိုက်သည်။ အဆုံးတွင် ကုမိသားစု၏ လက်ရှိ ကျော်ကြားမှုမှာ ကုရှန့်နန်သည် ကိုးပြည်နယ်သို့ ပြန်မရောက်သည်မှာ ကြာပြီဖြစ်သော်လည်း လူသိများဆဲ ဖြစ်သည်။ ကုမိသားစုသည် အားကောင်းသည်။ သူမ၏ အဘိုးမှာမူ ပို၍ပင် ကြောက်မက်ဖွယ်ကောင်းအောင် အားကောင်းကာ လွန်ခဲ့သော နှစ်အနည်းငယ်က နတ်ဆိုးဧကရာဇ် လေးပါးကို သတ်ဖြတ်ခဲ့သဖြင့် သူ၏ ကျော်ကြားမှုမှာ ကမ္ဘာကို တုန်လှုပ်စေခဲ့သည်။

သူမ၏ ဆရာ ပြောပြချက်အရ ကုချင်းဖန်၏ အစွမ်းမှာ မဟာဧကရာဇ်အောက်ရှိ အားအကောင်းဆုံး ပုဂ္ဂိုလ်တစ်ဦး၏ အဆင့်သို့ ရောက်ရှိနေပြီဖြစ်ကာ နောင်တွင် မဟာဧကရာဇ် ဖြစ်လာမည်မှာ သေချာသလောက်ပင်။

ဂိုဏ်းချုပ် ရှောင်းကျန့်ကျွင်းက အသက်ကို ခပ်ပြင်းပြင်းရှူလိုက်သည်- “အကယ်၍ ကောလာဟလသာ မှန်မယ်ဆိုရင် မင်းရဲ့ အဘိုးဟာ တကယ်ကို ထူးခြားတဲ့သူပဲ။ ဓားဂိုဏ်းမှာ နက်ရှိုင်းတဲ့ အခြေခံအုတ်မြစ်ရှိပြီး ရှေးခေတ်ကတည်းက လက်ဆင့်ကမ်းလာခဲ့ကာ ပါရမီရှင်ပေါင်းများစွာ ဝင်ရောက်ခဲ့ပေမဲ့ ဘယ်သူမှ ဒီအဆင့်ကို မရောက်ခဲ့ဘူး။ ဓားဂိုဏ်းရဲ့ အရင်က မဟာဧကရာဇ် ကိုးပါးတောင်မှ တစ်ပါးချင်းစီဟာ ဧကရာဇ်တစ်ဝက်နယ်ပယ်ကို ရောက်ဖို့ အနည်းဆုံး နှစ်ပေါင်း ရာချီ ကြာခဲ့ကြတာ။”

နှစ်ပေါင်း ရာချီအတွင်း ဧကရာဇ်တစ်ဝက်နယ်ပယ်သို့ ရောက်ရှိခြင်းမှာ အလွန်ပင် ထူးခြားနေပြီ ဖြစ်သည်။ သို့သော် ကုချင်းဖန်နှင့် နှိုင်းယှဉ်လျှင် ကွာဟချက်မှာ ပို၍ပင် ကြီးမားနေသည်။ သို့သော် သူ၏ ဘေးရှိ ကုရှန့်နန်ကို ကြည့်ကာ ဂိုဏ်းချုပ် ရှောင်းကျန့်ကျွင်းက ပြန်လည် ပြုံးပြလိုက်သည်။ ကုမိသားစုမှာ အားကောင်းသည်။ သူ၏ တပည့်မှာလည်း ထူးချွန်သည်။ သူမသည် ‘အနှိုင်းမဲ့ဓားရိုး’ ကို လေ့ကျင့်ထားသူ ဖြစ်သည်။ ဓားဂိုဏ်း၏ အကောင်းဆုံး ဆက်ခံသူပင် ဖြစ်သည်။

ဓားဂိုဏ်း၏ သမိုင်းတစ်လျှောက်တွင် အနှိုင်းမဲ့ဓားရိုးကို အမှန်တကယ် ကျင့်ကြံနိုင်ခဲ့သူမှာ ဂဏန်းနှစ်လုံး အရေအတွက်မျှသာ ရှိသည်။ ကံမကောင်းစွာဖြင့် ထိုပါရမီရှင် အများစုမှာ အချိန်မတိုင်မီ သေဆုံးခဲ့ကြသည်။ သို့သော် အချိန်မတိုင်မီ သေဆုံးခြင်း မရှိခဲ့သော ကိုးဦးစလုံးမှာ နောက်ဆုံးတွင် ဧကရာဇ်နယ်ပယ်သို့ ရောက်ရှိခဲ့ကြသည်။ တစ်နည်းအားဖြင့် ကုရှန့်နန်သည် ဧကရာဇ်ဖြစ်မည့် ပါရမီကို ပိုင်ဆိုင်ထားပြီးဖြစ်သည်။ ဤအကြောင်းကြောင့်ပင် သူမ၏ ဆရာနှင့် ဓားဂိုဏ်း၏ ဂိုဏ်းချုပ်အဖြစ် ရှောင်းကျန့်ကျွင်းက သူ၏ တပည့်မလေး၏ လမ်းကြောင်းကို ကိုယ်တိုင် ကာကွယ်ပေးနေခြင်း ဖြစ်သည်။ ကုရှန့်နန်၏ ပါရမီသည် ဓားဂိုဏ်း ပြန်လည် ထွန်းကားလာရန် အခွင့်အလမ်းပင် ဖြစ်သည်။ ထိုကဲ့သို့သော ရတနာအတွက် ဂိုဏ်းချုပ် ရှောင်းကျန့်ကျွင်းမှာ သဘာဝကျကျပင် ပေါ့ဆလိမ့်မည် မဟုတ်ပေ။

ဤအချိန်တွင် ကုယန်နှင့် အဖွဲ့မှာ နေဧကရာဇ်တောင်၏ ထိပ်ဖျားသို့ ရောက်ရှိလာကြပြီ ဖြစ်သည်။ ဤနေရာတွင် ယဇ်ပလ္လင်ကို တည်ဆောက်ထားသည်မှာ ကြာပြီဖြစ်သည်။ အမြင့် ကိုးဆယ်ကိုး ‘ကျန်း’၊ ကိုး ‘ချီ’၊ ကိုး ‘ဆွန်း’ ရှိသော ယဇ်ပလ္လင်မှာ တိမ်တိုက်များထဲသို့ ထိုးဝင်နေသဖြင့် ကျင့်ကြံသူအားလုံးမှာ ယဇ်ပလ္လင်ပေါ်ရှိ မြင်ကွင်းကို အမှန်တကယ် မြင်နိုင်ရန် အပေါ်သို့ မော့ကြည့်ကြရသည်။

စာကြွင်း ။ ။ တရုတ်ရှေးဟောင်း အလျား သို့မဟုတ် အမြင့်အတိုင်းအတာစနစ်တွင်

• ကျန်း : ဆယ်ပေခန့် (သုံးမီတာခန့်) ရှိသည်။

• ချီ : တစ်ပေခန့် (မီတာ သုံးပုံတစ်ပုံခန့်) ရှိသည်။

• ဆွန်း : တစ်လက်မခန့် (သုံးစင်တီမီတာခန့်) ရှိသည်။

အလျား သို့မဟုတ် အမြင့်အားဖြင့် ကျန်းတစ်ရာ (ပေတစ်ထောင်ကျော် သို့မဟုတ် မီတာသုံးရာကျော်) ပြည့်ရန် တစ်လက်မခန့်သာ လိုတော့သည့် ပမာဏကို ဆိုလိုခြင်း ဖြစ်သည်။

ကုယန်သည် သူ၏ ဧကရာဇ်ဝတ်ရုံကို ဝတ်ဆင်ကာ ဧကရာဇ်ခေါင်းဆောင်ကို ဆောင်းပြီး ယဇ်ပူဇော်ပွဲ အခမ်းအနား စတင်ရန် ယဇ်ပလ္လင်ဆီသို့ ဖြည်းညှင်းစွာ လျှောက်လှမ်းသွားသည်။ ကုယန်သည် ရှေးဟောင်းအိုးကြီးထဲတွင် အမွှေးတိုင်ကို ထွန်းလိုက်သည့်အခါ သိုင်းနတ်ဘုရားမင်းဆက်တစ်ခုလုံး ပြင်းထန်စွာ တုန်ခါသွားကာ၊ နိုင်ငံတော်ကံကြမ္မာ၏ ထိတ်လန့်ဖွယ် စွမ်းအားများမှာ ထောင်ပေါင်းများစွာသော မြစ်များ ပင်လယ်ထဲသို့ စီးဝင်သကဲ့သို့ နေဧကရာဇ်တောင်ဆီသို့ စုစည်းရောက်ရှိလာသည်။

“ဘုန်း ဘုန်း ဘုန်း”

နေဧကရာဇ်တောင် တုန်ခါသွားသည်။ လောကကြီး တုန်ခါသွားသည်။ အလွန်ပင် အစစ်အမှန်ဖြစ်သော ဆဋ္ဌမအဆင့် ပဒုမ္မာသည် ကောင်းကင်ယံကို ဖုံးလွှမ်းသွားကာ ထိတ်လန့်ဖွယ် ဖိအားများကို ထုတ်လွှတ်လိုက်သည်။ ချက်ချင်းပင် ပဒုမ္မာမှာ ယိမ်းနွဲ့သွားပြီး ကောင်းကင်ဘုံ၏ တန်ခိုးအာဏာများကို ထုတ်ဖော်ပြသလိုက်ကာ ကြာဖက်အသစ်များ ရုတ်တရက် ထွက်ပေါ်လာသည်။ ကြာဖက်အသစ် တစ်ခုစီ ထွက်ပေါ်လာတိုင်း ကောင်းကင်ဘုံ၏ တန်ခိုးအာဏာမှာ ပိုမိုပြင်းထန်လာသဖြင့် ဤမြင်ကွင်းကို ကြည့်ရှုနေသော ကျင့်ကြံသူအားလုံးမှာ လေးနက်သော အမူအရာများဖြင့် အနည်းငယ်မျှပင် မလှုပ်ရဲကြပေ။

အခန်း ၅၈၈ - ကောင်းကင်တာအို ကွင်းဆက်များကို ရိုက်ချိုးခြင်း

“သင့်မျိုးဆက် ‘ကုယန်’ သည် သိုင်းနတ်ဘုရားမင်းဆက်ကို တည်ထောင်ကာ ဧကရာဇ်အဆင့် မင်းဆက်သို့ တက်လှမ်းနိုင်ခဲ့သဖြင့် ‘ကောင်းကင်ကိုးထပ်ဘုံသို့ ဧကရာဇ် တက်လှမ်းခြင်း’ (တစ်ကြိမ်သာ ရရှိနိုင်သည်) အောင်မြင်မှုကို ရရှိသွားပါသည်”

“ဆုလာဘ် - အဆင့်မြှင့်တင်မှု အမှတ် ၁၀၀,၀၀၀”

“ဆုလာဘ် - သူတော်စင်နယ်ပယ်သို့ တိုက်ရိုက်တက်လှမ်းနိုင်သော ဆေးလုံး ၃ လုံး”

“ဆုလာဘ် - သေမင်းစစ်သည် (ထိပ်တန်း ပါရမီရှင်အဆင့်) ၃၀,၀၀၀”

“ဆုလာဘ် - ပြီးပြည့်စုံခြင်းအဆင့် မဟာဧကရာဇ်၏ နတ်ဘုရားစွမ်းရည် ‘ဝိညာဉ်လောက ပြန်လည်မွေးဖွားခြင်း မျက်လုံး’”

“နောက်ဆုံးတော့ အဆင့်တက်သွားပြီပဲ”

ကုချင်းဖန်၏ မျက်လုံးများမှ နတ်ဘုရားအလင်းတန်းများ ထွက်ပေါ်လာသည်။

အဆင့်မြှင့်တင်မှု အမှတ် တစ်သိန်း။

ဤမျှ များပြားလှသော ဆုလာဘ်များက သူ့ကို အနည်းငယ် အံ့အားသင့်စေသော်လည်း ၎င်းမှာ ကုချင်းဖန်၏ မျှော်လင့်ချက်အတွင်း၌သာ ရှိပါသည်။ အဆုံးတွင် မင်းဆက်တစ်ခုမှ ဧကရာဇ်အဆင့် မင်းဆက်သို့ တက်လှမ်းရန် ခက်ခဲမှုမှာ သာမန်ထက် အဆပေါင်း ရာချီ ပိုမိုခက်ခဲသည်။ သိုင်းနတ်ဘုရားမင်းဆက်၏ နယ်မြေမှာ အဆပေါင်း ရာချီ ကျယ်ပြန့်လာခဲ့သော်လည်း ဧကရာဇ်အဆင့်သို့ တက်လှမ်းရန် အခြေခံအုတ်မြစ်များကို စုဆောင်းရန် နှစ်ပေါင်းများစွာ အချိန်ယူခဲ့ရသည်။ ထို့ကြောင့် အဆင့်မြှင့်တင်မှု အမှတ် တစ်သိန်းမှာ များလွန်းသည်ဟု မဆိုနိုင်ပေ။

သို့သော် အမှတ် တစ်သိန်းမှာ ဆုလာဘ်၏ အစိတ်အပိုင်းတစ်ခုသာ ဖြစ်သည်။ သူတော်စင်နယ်ပယ်သို့ တိုက်ရိုက်တက်လှမ်းနိုင်သော ဆေးလုံး ၃ လုံးနှင့် သေမင်းစစ်သည် ၃၀,၀၀၀ တစ်ခုချင်းစီမှာ တကယ့်ကို ကောင်းမွန်သော ဆုလာဘ်များ ဖြစ်ကြသည်။

ပထမတစ်ခုမှာ ပြောနေစရာပင် မလိုတော့ပေ။ ထိုဆေးလုံး ၃ လုံးမှာ သိုင်းနတ်ဘုရားမင်းဆက်အတွက် ‘သူတော်စင် ကောင်းကင်ကိုးထပ်ဘုံ’ အဆင့်ရှိ ထိပ်တန်းပညာရှင် သုံးဦးကို တိုးပွားလာစေရန် လုံလောက်သည်။ သေမင်းစစ်သည် ၃၀,၀၀၀ နှင့် ပတ်သက်၍မူ၊ အကယ်၍ ကောင်းမွန်စွာ အသုံးချနိုင်ပါက ၎င်းတို့၏ အနာဂတ် ရိုက်ခတ်မှုမှာ ဆေးလုံး ၃ လုံးထက်ပင် သာလွန်နိုင်ပါသည်။ အဆုံးတွင် သေမင်းစစ်သည်များ၏ အလားအလာမှာ အကန့်အသတ်မရှိပေ၊ ပါရမီဆိုသည်မှာ လူတစ်ဦး၏ အနိမ့်ဆုံးအဆင့်သာ ဖြစ်ပြီး အမြင့်ဆုံးအတားအဆီး မဟုတ်ပေ။

သေမင်းစစ်သည် ၃၀,၀၀၀။ ဤအရေအတွက်မှာ ကုချင်းဖန် ယခင်က ရရှိခဲ့ဖူးသော သေမင်းစစ်သည် အားလုံးပေါင်းထက်ပင် ပိုမိုများပြားသည်။ ဤမျှများပြားသော သေမင်းစစ်သည် အစုအဝေးဖြင့် ကုချင်းဖန်သည် ၎င်းတို့ကို ရှေးဟောင်းသီးခြားကမ္ဘာအနှံ့ ဖြန့်ကြက်ထားနိုင်ရုံသာမက နောင်တွင် ‘မငြိမ်မသက် ကြယ်တာရာကောင်းကင်ယံ’ ကိုပင် လက်လှမ်းမီရန် ရည်မှန်းနိုင်မည် ဖြစ်သည်။

သို့သော် ကုချင်းဖန် အလေးအနက်ဆုံး ဂရုစိုက်မိသည်မှာ နောက်ဆုံးဆုလာဘ်ပင် ဖြစ်သည်။

ပြီးပြည့်စုံခြင်းအဆင့် မဟာဧကရာဇ်၏ နတ်ဘုရားစွမ်းရည် - ဝိညာဉ်လောက ပြန်လည်မွေးဖွားခြင်း မျက်လုံး

၎င်းမှာ ကုချင်းဖန် ပထမဆုံးအကြိမ် ရရှိဖူးသော မဟာဧကရာဇ်အဆင့် နတ်ဘုရားစွမ်းရည် ဖြစ်ကာ၊ ၎င်းကို အသုံးပြု၍ ပြီးပြည့်စုံခြင်းအဆင့်သို့ တိုက်ရိုက် ရောက်ရှိနိုင်သည်။ ကုချင်းဖန်၏ နတ်ဘုရားအသိစိတ် လှုပ်ရှားလိုက်ရုံဖြင့် ထိုနတ်ဘုရားစွမ်းရည်ပါဝင်သော ရတနာမှာ အလင်းတန်းတစ်ခုအဖြစ် ပြောင်းလဲသွားကာ သူ၏ အသိစိတ်ပင်လယ်ထဲသို့ ပေါင်းစပ်ဝင်ရောက်သွားသည်။

ထို့နောက်တွင် ပြင်းထန်သော မှတ်ဉာဏ်များ ပေါ်ထွက်လာသည်။ ကုချင်းဖန်သည် ဤမဟာဧကရာဇ်အဆင့် နတ်ဘုရားစွမ်းရည်ကို အထွတ်အထိပ်သို့ ရောက်ရှိစေရန် နှစ်ပေါင်း ထောင်ချီ၍ ကြိုးစားပမ်းစား ကျင့်ကြံခဲ့ရသကဲ့သို့ ခံစားရသည်။ နှစ်ပေါင်း ထောင်ချီသကဲ့သို့ ထင်ရသော်လည်း ခဏချင်းအတွင်းပင် ဖြစ်သည်။ ကုချင်းဖန် မျက်လုံးဖွင့်လိုက်သည့်အခါ သူ၏ သူငယ်အိမ်ထဲတွင် ထိတ်လန့်ဖွယ်ကောင်းသော ‘တာအိုစည်းချက်’ များ ထင်ဟပ်နေပြီး အရာအားလုံးကို ဝါးမြိုနိုင်စွမ်းရှိသော ကြောက်မက်ဖွယ် စွမ်းအားများမှာ ဟင်းလင်းပြင်ထဲတွင် ပျံ့နှံ့နေသည်။

ဝိညာဉ်လောက ပြန်လည်မွေးဖွားခြင်း မျက်လုံး။

၎င်းသည် မမြင်နိုင်သောနည်းဖြင့် သတ်ဖြတ်နိုင်သည်။ တစ်ချက်ကြည့်လိုက်ရုံဖြင့် သက်ရှိများ၏ ဝိညာဉ်ကို ချေမှုန်းပစ်နိုင်ကာ ‘ဝိညာဉ်ကိုးထပ်လောက’ ထဲသို့ ကျဆင်းသွားသကဲ့သို့ လုံးဝ ပျောက်ကွယ်သွားစေသည်။

“ထိပ်တန်းအဆင့် မဟာဧကရာဇ်ရဲ့ နတ်ဘုရားစွမ်းရည်”

“တကယ်ကို ထူးခြားတာပဲ”

ဤနတ်ဘုရားစွမ်းရည်ဖြင့် ကုချင်းဖန်၏ အစွမ်းမှာ ပိုမိုတိုးတက်လာခဲ့သည်။ အကယ်၍ နတ်ဆိုးဧကရာဇ် ခြောက်ပါး ကိုယ်တိုင် လာရောက်ရင်ဆိုင်လျှင်ပင် ဤနတ်ဘုရားစွမ်းရည်ကို အားကိုး၍ ရာရှာ နတ်ဆိုးဧကရာဇ်နှင့် အခြားနတ်ဆိုးများ ပြန်မလှည့်နိုင်အောင် သူ လုပ်ဆောင်နိုင်သည်။ ဤသည်မှာ ထိပ်တန်းအဆင့် မဟာဧကရာဇ် နတ်ဘုရားစွမ်းရည်၏ ကြောက်မက်ဖွယ်ကောင်းမှုပင် ဖြစ်သည်။

ကျင့်ကြံသူတစ်ဦး၏ စွမ်းအားမှာ အရာအားလုံး၏ အခြေခံဖြစ်သော်လည်း ထိပ်တန်းနတ်ဘုရားစွမ်းရည်တစ်ခုကို တတ်မြောက်ထားခြင်းကလည်း အစွမ်းကို များစွာ မြင့်တက်စေနိုင်သည်။ ကွာခြားချက်မှာ ထိပ်တန်းနတ်ဘုရားစွမ်းရည်တစ်ခုကို ‘မဟာအောင်မြင်မှု’ အဆင့်သို့ ရောက်ရန် အချိန်အကြာကြီး ယူရခြင်း ဖြစ်သည်။ သို့သော် ယခုအခါ ကုချင်းဖန်သည် ‘ဝိညာဉ်လောက ပြန်လည်မွေးဖွားခြင်း မျက်လုံး’ ကို ချက်ချင်း အောင်မြင်သွားသဖြင့် အနည်းဆုံး နှစ်ပေါင်း ထောင်ချီသော ကြိုးစားအားထုတ်မှုကို သက်သာစေခဲ့သည်။ အဆုံးတွင် ထိပ်တန်းအဆင့် မဟာဧကရာဇ် နတ်ဘုရားစွမ်းရည်တစ်ခုသည် နှစ်ပေါင်း ထောင်ချီ မကျင့်ကြံဘဲ မဟာအောင်မြင်မှုသို့ ရောက်ရန် မဖြစ်နိုင်ပေ။

ထို့နောက် ကုချင်းဖန်သည် သူ၏ ကျင့်ကြံမှုအဆင့်ကို ကြည့်လိုက်ပြီး၊ မည်သည့် တွန့်ဆုတ်မှုမျှ မရှိဘဲ အဆင့်မြှင့်တင်မှု အမှတ်များကို အသုံးပြုကာ အဆင့်မြှင့်လိုက်သည်။

သူတော်စင်ဘုရင် လေးထပ်ကောင်းကင်ဘုံ။

သူတော်စင်ဘုရင် ငါးထပ်ကောင်းကင်ဘုံ။

သူတော်စင်ဘုရင် ခြောက်ထပ်ကောင်းကင်ဘုံ။

သူတော်စင်ဘုရင် ခုနစ်ထပ်ကောင်းကင်ဘုံ။

သူတော်စင်ဘုရင် ရှစ်ထပ်ကောင်းကင်ဘုံ။

သူတော်စင်ဘုရင် ကောင်းကင်ကိုးထပ်ဘုံ။

ကုချင်းဖန်သည် ခဏချင်းအတွင်းမှာပင် သူ၏ ကျင့်ကြံမှုအားလုံးကို ‘သူတော်စင်ဘုရင် သုံးထပ်ကောင်းကင်ဘုံ’ မှ ‘သူတော်စင်ဘုရင် ကောင်းကင်ကိုးထပ်ဘုံ’ အထွတ်အထိပ်သို့ မြှင့်တင်လိုက်သည်။ နောက်တစ်ဆင့် တက်လှမ်းလိုက်ပါက သူတော်စင်ဘုရင် အတားအဆီးကို ရိုက်ချိုးပြီး ‘ဧကရာဇ်တစ်ဝက်နယ်ပယ်’ သို့ တိုက်ရိုက် ဝင်ရောက်နိုင်မည် ဖြစ်သည်။

အမည် - ကုချင်းဖန်

အသက် - ၁၂၇ / ၉၀၀၀

နယ်ပယ် - သူတော်စင်ဘုရင် နဝမအလွှာ

သိုင်းပညာ - ကောင်းကင်သွေးကြောကျမ်းစာ (စတုတ္ထအလွှာ)၊ ကောင်းကင်ဓား (ပြီးပြည့်စုံခြင်း)၊ မဟာတောရိုင်းလက်သီးကျမ်း (ပြီးပြည့်စုံခြင်း)၊ ရှေးဟောင်းကောင်းကင်ဓား (ပြီးပြည့်စုံခြင်း)၊ ခရမ်းရောင်အထွတ်အထိပ် တာအိုကျမ်း (ပြီးပြည့်စုံခြင်း)၊ လေဖုန်းကျမ်း (ပြီးပြည့်စုံခြင်း)၊ နိဗ္ဗာန်တာအိုကျမ်း (တာအိုနန်းတော်အခန်း နဝမအလွှာ)၊ ကောင်းကင်ဖီးနစ် နတ်ဘုရားစွမ်းရည် (ပြီးပြည့်စုံခြင်း)၊ ကောင်းကင်ကိုးထပ်ဘုံကျမ်း (သူတော်စင်မဟာအခန်း ပထမအလွှာ)၊ နတ်ဘုရားကောင်းကင် မိုးကြိုး (ပြီးပြည့်စုံခြင်း)၊ ကိုးပါးယန်တာအိုကျမ်း (ပြီးပြည့်စုံခြင်း)၊ ဝိညာဉ်တစ်သောင်း တာအိုကျမ်းစာ (ပြီးပြည့်စုံခြင်း)၊ အသူရာကျမ်း (သူတော်စင်ဘုရင်အခန်း နဝမအလွှာ)၊ ရှေးဟောင်းနတ်ဘုရားကျမ်း (တာအိုနန်းတော်အခန်း နဝမအလွှာ)၊ ဝိညာဉ်လောက ပြန်လည်မွေးဖွားခြင်း မျက်လုံး (ပြီးပြည့်စုံခြင်း)၊

အဆင့်မြှင့်တင်မှု အမှတ် - ၄၉,၆၀၀

“သူတော်စင်ဘုရင် အဆင့်ကိုးကို ရောက်ပြီ”

“ဧကရာဇ်တစ်ဝက်နယ်ပယ်ကို ဆက်ပြီး ကျော်ဖြတ်ဖို့ဆိုရင် အဆင့်တစ်ခုစီအတွက် အမှတ် ငါးသောင်း လိုတယ်”

“လောလောဆယ်တော့ အမှတ် လေးရာပဲ လိုတော့တယ်၊ ဒါဆိုရင် ဧကရာဇ်တစ်ဝက်နယ်ပယ်ကို ခြေချနိုင်ပြီ”

ကုချင်းဖန်က တွေးတောလိုက်သည်။ အမှတ် လေးရာဆိုသည်မှာ နောက်တစ်ခဏချင်းအတွင်း ရရှိနိုင်သော အရာဖြစ်သည်။ ဧကရာဇ်တစ်ဝက်နယ်ပယ်သို့ ခြေချနိုင်သည်နှင့် သူ၏ အစွမ်းမှာ ပိုမိုမြင့်တက်လာမည် ဖြစ်သည်။ ယခု သူတော်စင်ဘုရင် နဝမအလွှာသို့ ရောက်ရှိချိန်တွင် သူ၏ အစွမ်းမှာ ယခင်ကထက် ဆပေါင်းများစွာ တိုးတက်လာသည်ဟု ခံစားရပြီး၊ ဧကရာဇ်တစ်ဝက်နယ်ပယ်သို့ ရောက်ရှိပါက သူ၏ စွမ်းအားမှာ မည်သည့်အဆင့်အထိ ပေါက်ကွဲထွက်လာမည်ကို သူမခန့်မှန်းနိုင်တော့ပေ။

“အခု ငါ့အဆင့်နဲ့ဆိုရင် မဟာဧကရာဇ်နဲ့ ကွာဟချက် ရှိသေးလားဆိုတာ သိချင်မိတယ်”

ကုချင်းဖန်က သူ့ဘာသာ ရေရွတ်လိုက်သည်။ မဟာဧကရာဇ်သည် အမှန်တကယ်ပင် အားကောင်းသော်လည်း လုံးဝ အနိုင်မတိုက်နိုင်သော အရာမျိုး မဟုတ်ပေ။ ယခင်က သူတော်စင်ဘုရင် တတိယအလွှာတွင် ရှိစဉ်ကပင် ကောင်းကင်သွေးကြောလေးခု၏ စွမ်းအားကို အသုံးပြု၍ ထိပ်တန်း ဧကရာဇ်တစ်ဝက်များနှင့် ယှဉ်ပြိုင်နိုင်ခဲ့ကာ ရာရှာ နတ်ဆိုးဧကရာဇ်ကဲ့သို့သော ရှေးဟောင်း ဧကရာဇ်တစ်ဝက်များကို တိုက်ရိုက် ဖိနှိပ်နိုင်ခဲ့သည်။ ယခုမူ သူ၏ ကိုယ်ပိုင်ကျင့်ကြံမှုမှာ သူတော်စင်ဘုရင် နဝမအလွှာသို့ ရောက်ရှိသွားပြီဖြစ်ကာ အစွမ်းမှာ ဆပေါင်းများစွာ တိုးတက်နေပြီဖြစ်သဖြင့်၊ အင်အားအပြည့် ထုတ်သုံးပါက မဟာဧကရာဇ်တစ်ပါးထက် အားနည်းလိမ့်မည်မဟုတ်ဟု ကုချင်းဖန် ယုံကြည်ချက်ရှိနေသည်။ အကယ်၍ သူသည် ဧကရာဇ်တစ်ဝက်နယ်ပယ်သို့ ထပ်မံတိုးတက်နိုင်ပါက သူ၏ အစွမ်းမှာ ပိုမို၍ပင် အားကောင်းလာမည် ဖြစ်သည်။