ဗုဒ္ဓအထွတ်အမြတ်တောင်သို့ ရှန်းယီရောက်လာခြင်း

ဗုဒ္ဓတောင်တန်း ခန်းမအတွင်း..

ရွှေဖားပြုတ်ဗောဓိသတ္တသည် သူ၏စိတ်ကို လျင်မြန်စွာတည်ငြိမ်အောင်ချိန်ညှိပြီး ခန်းမအတွင်းပိုင်းဆီသို့ ပြန်လည်ခြေလှမ်းလှမ်းလိုက်၏။

ကျယ်ဝန်းသောခန်းမကြီးအတွင်း မည်သည့် ဗုဒ္ဓရုပ်ပွားတော်မျှ ရှိမနေပေ။

အစစ်မှန်ဗုဒ္ဓက ဍုမေဏုတောင်အတွင်း သီတင်းသုံးပြီး၊ အစစ်မှန် ဗုဒ္ဓ၏အောက်တွင် မဟာလွတ်လပ်ခြင်းဗောဓိသတ္တက သေမျိုးလောကကို စီမံအုပ်ချုပ်သည်။ သာမန် အာဟတ်ဗောဓိသတ္တများက မဟာလွတ်လပ်ခြင်းသန့်စင်သောကမ္ဘာ ဗောဓိသတ္တ၏ခန်းမအတွင်း ရုပ်ပွားတော် ထားရှိခွင့် မရှိကြပေ။

ခန်းမ၏ဘေးဘက်တွင် ရှည်လျားသော စင်္ကြံတစ်ခု ရှိသည်။

ရွှေဖားပြုတ်ဗောဓိသတ္တက စင်္ကြံအတိုင်း ဖြည်းညှင်းစွာ လျှောက်လှမ်းရင်း တိတ်ဆိတ်သော အခန်းတစ်ခုအတွင်းသို့ ရောက်ရှိလာသည်။

သူသည် အမွှေးတိုင်အိုးတစ်ခုရှေ့တွင် ရပ်နေသော သင်္ကန်းဖြူခြုံ ဘုန်းကြီးတစ်ပါးကို မြင်တွေ့ရသည်။ အလွန်အမင်းပိန်ပါးလွန်းသဖြင့် သင်္ကန်းက သူ၏ခန္ဓာကိုယ်ပေါ်တွင် လျော့တိလျော့ရဲဖြစ်နေပြီး သူ၏နံရိုးကွက်များကို မြင်တွေ့နိုင်ရသည်။

သို့သော် ဤကဲ့သို့ ပိန်းပါးသောခန္ဓာကိုယ်နှင့် ဆန့်ကျင်ဘက်အနေဖြင့် သူ၏ဖုန်မှုန့်ကင်းစင်သော လက်များက အလွန်သန့်ရှင်းပြီးလှပနေသည်။

ဤအခိုက်အတန့်တွင် ထိုလက်များက အမွှေးတိုင်များကိုအိုးအတွင်းသို့ ညင်သာစွာ စိုက်ထူနေ၏။

အမွှေးတိုင်အိုး၏အရှေ့တွင်လည်း ဗုဒ္ဓရုပ်ပွားတော် ရှိမနေပေ။

သူက အစိမ်းရောင်အခိုးအငွေ့ကို အနည်းငယ် ရှူရှိုက်ရင်း မိမိကိုယ်ကိုယ်ပြန်လည်ပူဇော်နေခြင်း ဖြစ်သည်။ "ထျန်းဝူ ထွက်သွားပြီလား"

"သန့်စင်သောကမ္ဘာအရှင်မြတ်ကို လျှောက်ထားပါတယ်၊ သူ့ကို ပို့ဆောင်ပေးလိုက်ပါပြီ"

ဤသင်္ကန်းဖြူခြုံ ဘုန်းကြီးနှင့် ရင်ဆိုင်ရချိန်တွင် ရွှေဖားပြုတ်ဗောဓိသတ္တက သူ၏တိုက်ခိုက်လိုသောအရှိန်အဝါကို သိသိသာသာ ထိန်းချုပ်လိုက်ပြီး သူ၏အမူအရာအားလုံးတွင် ယဉ်ကျေးပျူငှာမှုကို ပြသသည်။

မဟာလွတ်လပ်ခြင်းဗောဓိသတ္တက ဒြပ်စင်ငါးပါးကိုကျော်လွန်ထားပြီး အနာဂတ်တွင် ကြာပန်းပလ္လင်ပေါ်၌ထိုင်ကာ အစစ်မှန်ဗုဒ္ဓတစ်ပါး ဖြစ်လာမည့် အခွင့်အရေး ရှိသည်။

သူက တတိယအဆင့်တွင် ပိတ်မိနေဆဲဖြစ်သော ကျင့်ကြံသူများနှင့် လုံးဝ နှိုင်းယှဉ်၍ မရဘဲ အကြီးအကဲတစ်ဦးအဖြစ် သတ်မှတ်နိုင်သည်။

စကားပြောပြီးနောက် ရွှေဖားပြုတ်ဗောဓိသတ္တကည် တစ်ခဏတာတုံ့ဆိုင်းသွားပြီး တိုးညှင်းသော အသံဖြင့် ဆိုသည်။

"အရှင်မြတ်၊တပည့်က တောင်အောက်ကို ဆင်းပြီး သွားရောက်ကြည့်ရှုချင်ပါတယ်"

သင်္ကန်းကို ခြုံထားသော်လည်း တောင်ပိုင်းဍုမေဏုအတွင်း၌သာ နေ့စဉ်အချိန်ကုန်လွန်နေပါက လောကသားများက သူ၏ဘွဲ့အမည်ကို မည်သို့ သိရှိနိုင်မည်နည်း။ ထျန်းဝူကဲ့သို့သော ပုဂ္ဂိုလ်များပင်လျှင် သူ့ကို ဂျူနီယာတစ်ဦးကဲ့သို့ ဆက်ဆံနေကြဆဲဖြစ်သည်။

"မင်းဘယ်ကိစ္စနဲ့ သွားချင်တာလဲ" သန့်စင်သောကမ္ဘာအရှင်မြတ်က သူ၏ အကြည့်ကို ပြန်လည် လှည့်လာသည်။

"တပည့် ဆုံးဖြတ်ချက်မချရသေးပါဘူး၊ အရှင်ရဲ့လမ်းညွှန်မှုကို ခံယူချင်ပါတယ်" ရွှေဖားပြုတ်ဗောဓိသတ္တက သူ၏မောက်မာသော အမူအရာကို ဖုံးကွယ်ထားသည်။ အနာဂတ်ဗုဒ္ဓ၏တိုက်ရိုက်တပည့်တစ်ဦးအနေဖြင့် သူသည် သေမျိုးလောကတွင် လိုအပ်သည့်အရာမရှိသဖြင့် တောင်အောက်လမှလောကနှင့် ပတ်သက်၍ ရင်းနှီးမှု မရှိဘဲ လမ်းစဉ်သုံးသွယ်မှ တပည့်များနှင့်သာ ရံဖန်ရံခါ ထိတွေ့ဖူးခြင်းဖြစ်သည်။

အမှန်တကယ်တော့ သူက ယဉ်ကျေးမှုအရသာ ဤသို့ပြောဆိုခြင်းဖြစ်ပြီး အခြားသူ၏လမ်းညွှန်မှုကို အမှန်တကယ်လိုအပ်နေခြင်း မဟုတ်ပေ။

သာမန်သေမျိုးလောကက သူ၏ကျင့်ကြံမှုဖြင့်ပင် လွတ်လပ်စွာသွားလာနိုင်သောနေရာ ဖြစ်သည်။

"လက်တစ်ထောင် ကျဆုံးသွားပြီ" သန့်စင်သောကမ္ဘာအရှင်က သူ၏အကြည့်ကို ရုပ်သိမ်းလိုက်ပြီး အရှေ့ရှိ အမွှေးတိုင်အိုးဆီသို့ ပြန်လည် ကြည့်ရှုလိုက်သည်။

"မင်း သွားဦးမှာလား" ဤတည်ငြိမ်သော စကားလုံးများ ထွက်ပေါ်လာသည်နှင့် ရွှေဖားဗောဓိသတ္တက ရုတ်တရက် မော့ကြည့်သည်။

သူသည် တတိယအဆင့်နယ်ပယ်သို့ ရောက်ရှိနေပြီး ကောင်းကင်ယံထက်တွင် မြင့်မားစွာတည်ရှိကာ သာမန်လူသားများ၏အစစ်မှန်နတ်ဘုရားအဖြစ် ရိုသေခြင်းကို ခံရသူဖြစ်သည်။

ဤကဲ့သို့သော တည်ရှိမှုမျိုးက သေမျိုးလောကအတွင်း၌သေဆုံးသွားနိုင်သည်ဟူသောအချက်ကို သူ စဉ်းစားမိပါသည်။

သို့သော် ရွှေဖားဗောဓိသတ္တသည် သူ၏မျက်နှာအမူအရာကို ချက်ချင်းပြန်လည်ပြင်ဆင်လိုက်၏။ စကားကပြောပြီးဖြစ်သဖြင့် ဤစီနီယာအား သူ့ကို အထင်သေးသွားမည့်အခြေအနေကို သူ ခွင့်မပြုနိုင်ပေ။

"ဒါက မဟာကပ်ဘေးဖြစ်တဲ့အတွက် အန္တရာယ်တွေရှိနေမှာက သဘာဝပါပဲ၊ တပည့်က သေမျိုးလောကရဲ့ဖုန်မှုန့်များကြားမှာမြှုပ်နှံခံရဖို့ အချိန်ကြာမြင့်စွာကတည်းက ပြင်ဆင်ထားပြီးသားပါ"

စကားသံများ တိတ်ဆိတ်သွားသည်။

ဤစကားကို ကြားသောအခါ သန့်စင်သောကမ္ဘာ အရှင်၏အကြည့်သည် အနည်းငယ် ပြောင်းလဲသွား၏။

ရွှေဖား၏စကားကို သူ အပြည့်အဝယုံကြည်သွားခြင်း မဟုတ်ပေ။

သူက ရှင်းပြ၍မရသော ခံစားချက်အချို့ကို ခံစားလိုက်ရခြင်းသာဖြစ်သည်။

မကြာသေးမီကပင် ဂိုဏ်းအတွင်းရှိ ဗောဓိသတ္တများနှင့် မသေမျိုးသုံးပါးဂိုဏ်းမှ မသေမျိုးအရှင်သခင်များက ဤကပ်ဘေးကိုပြဇာတ်ကြီးတစ်ခုကဲ့သို့သာ သတ်မှတ်ခဲ့ကြသည်။

နောက်ကွယ်မှနေ၍ မီးထိုးပေးရန်၊ တပည့်များအတွက်စင်မြင့်တစ်ခု ပြင်ဆင်ပေးရန်နှင့် နတ်ဘုရားမင်းဆက်ပြိုလဲသွားမည့် အချိန်ကို တည်ငြိမ်စွာ စောင့်ဆိုင်းရန်သာ လိုအပ်သည်။

မိမိကိုယ်တိုင် လှုပ်ရှားဆောင်ရွက်ရန်ဟူသော အတွေးမျိုး မရှိခဲ့ကြပေ။

သို့သော် အချိန်မည်မျှ ကုန်လွန်သွားပြီလဲ၊ ပထမဦးစွာ ထျန်းဝူ၊ ထို့နောက် ရွှေဖား၊ ဤလူစုက သူတို့ကိုယ်တိုင်အထက်တွင် အန္တရာယ်ကင်းစွာ ထိုင်နေနိုင်သည်ကို မေ့လျော့သွားကြပြီး သေမျိုးလောကအတွင်းသို့ ဝင်ရောက်ရန် အသည်းအသန် ဖြစ်နေကြ၏။

ဤအပြောင်းအလဲသည် အလွန် ရုတ်တရက် ဆန်လွန်းလှသည်။

၎င်းတို့အားလုံးကိုယ်တိုင်က ဤပြဇာတ်၏ အစိတ်အပိုင်းတစ်ခုဖြစ်နေခြင်း ဖြစ်နိုင်မလားဟု သူ စဉ်းစားမိသည်။

သက်ရှိအားလုံး၏စိတ်ခံစားမှု အပြောင်းအလဲများက ဂိုဏ်းခေါင်းဆောင်များ၏အတွေးအမြင်များပေါ်တွင်သာ တည်ရှိနေသည်။

"မင်းက အနာဂတ်လောကအရှင်ရဲ့ သွန်သင်မှုကို ခံယူထားသူဖြစ်တဲ့အတွက် ငါက ဝင်ရောက်စွက်ဖက်ဖို့ မသင့်တော်ပါဘူး၊ ဒါပေမယ့် မင်း တောင်အောက်ဆင်းချင်တယ်ဆိုရင် လမ်းကြောင်းနှစ်ခု ငါ အကြံပြုပါရစေ"

"ပထမတစ်ခုက လက်တစ်ထောင်ဗောဓိသတ္တရဲ့ကိစ္စကို စုံစမ်းစစ်ဆေးဖို့ ဖြစ်ပြီး၊ ဒုတိယတစ်ခုက အစစ်မှန်နတ်ဘုရားကို သူတို့ရဲ့ စိုးရိမ်ပူပန်မှုများကနေ ကူညီဖြေရှင်းပေးဖို့ ဖြစ်တယ်"

"ဒါက..." ရွှေဖားဗောဓိသတ္တက အနည်းငယ် လက်မခံချင်သောအမူအရာကို ပြသလိုက်သည်။ သူက အနာဂတ် အစစ်မှန်ဗုဒ္ဓတစ်ပါးအနေဖြင့် သူ၏အနာဂတ် ဗုဒ္ဓအဖြစ်အတွက် တောင်အောက်ဆင်းခြင်းဖြစ်ပြီး အောက်ခြေအလုပ်ကြမ်းများကို လုပ်ဆောင်ရန် မဟုတ်ပေ။

မည်သည့် ဗောဓိသတ္တမဆို ဤတာဝန်များကို လုပ်ဆောင်နိုင်ပြီး အရေးကြီးသည်မှာ မည်သူက ကြီးမားသောဂုဏ်သတင်းကို နောက်ဆုံးတွင် ရရှိမည်ဟူသော အချက်ပင်။

သန့်စင်သောကမ္ဘာဗောဓိသတ္တက စကားမဆိုဘဲ တစ်ဖက်လူ၏တုံ့ပြန်မှုကိုသာ စိတ်ရှည်စွာ စောင့်ဆိုင်းနေသည်။

ဤအခိုက်အတန့်တွင် အပြင်ဘက်မှ ကိုရင်ငယ်တစ်ပါး၏အသံ ထွက်ပေါ်လာသည်။

"ကျားနဂါးဖိနှိပ်ခြင်းအလင်းဘုရင်က မဟာလွတ်လပ်ခြင်းသန့်စင်သောကမ္ဘာ ဗောဓိသတ္တကို ဖူးမြော်ခွင့် တောင်းခံနေပါတယ်"

"ဟင်"

တုံ့ဆိုင်းနေဆဲဖြစ်သော ရွှေဖားဗောဓိသတ္တက ရုတ်တရက် ခေါင်းလှည့်ကြည့်လိုက်၏။

သူသည် ထိုဘွဲ့အမည်ကို အလွန် ရင်းနှီးပြီးသား ဖြစ်သည်။

ကြာမြင့်စွာကတည်းကပင် အင်ပါယာမြို့တော်သို့ ကျမ်းစာပို့ဆောင်စဉ်အတွင်း တောင်ပိုင်းဍုမေဏုတောင်အတွင်းဆွေးနွေးမှုများစွာ ရှိခဲ့ပြီး ဤအသစ်တက်လာသော အလင်းဘုရင်ကို သူနှင့် နှိုင်းယှဉ်ခဲ့ကြသည်။

အချို့ကမူ ကျမ်းစာစောင့်ရှောက်သူရာထူးကို တစ်စုံတစ်ရာသော အကြောင်းပြချက်ကြောင့် ရရှိခဲ့ခြင်းဖြစ်နိုင်ကြောင်း အနောက်ကွယ်တွင် အတင်းပြောခဲ့ကြ၏။

ရွှေဖားဗောဓိသတ္တက ပုံမှန်အားဖြင့် ထိုကဲ့သို့သော ကောလာဟလများကို ဂရုမစိုက်ပါ၊အဘယ်ကြောင့်ဆိုသော် သူကျမ်းစာစောင့်ရှောက်သူ ရာထူးကို မယူခဲ့ခြင်းမှာ ဗောဓိသတ္တအသီးအပွင့်အဆင့်ကိုသာ အာရုံစိုက်နေသောကြောင့် ဖြစ်ပြီး၊ သင်္ကန်းကို သူ လွှမ်းခြုံခွင့်ရသည့်အခိုက်အတန့်တွင် ထိုဆူညံသံအားလုံး ရပ်တန့်သွားပါလိမ့်မည်။

သို့သော် ကျားနဂါးဖိနှိပ်ခြင်းအလင်းဘုရင်က ပေလျိုမြစ်တွင် ထျန်းဝူရွှမ်းဝူအပါအဝင် သူနှင့် နယ်ပယ်တူကောင်းကင်ပါရမီရှင် ရှစ်ဦးကို သတ်ဖြတ်ခဲ့ချိန်တွင် ထိုဆူညံသံများက ပိုမိုကျယ်လောင်လာပြီး နားမခံသာအောင်ဖြစ်လာခဲ့သည်။

၎င်းသည် သာမန် ဂျူနီယာများ၏ရယ်စရာကောင်းသောပြိုင်ပွဲတစ်ခုမျှသာ ဖြစ်သော်လည်း လူအများက အော်ဟစ်ပြောဆိုနေကြခြင်းဖြစ်သည်။

ရွှေဖားဗောဓိသတ္တက လှောင်ပြောင်ပြုံး ပြုံးလိုက်ပြီး သူ၏ကိုယ်ပေါ်ရှိ အနီရောင်သင်္ကန်းကို တင်းကျပ်စွာ ဆုပ်ကိုင်ကာ ဤကဲ့သို့ နာမည်ကြီးသောပုဂ္ဂိုလ်တစ်ဦးက တွေ့ဆုံချိန်တွင် သူ့ကို ဦးညွှတ်ရန်လိုအပ်ခြင်းရှိမရှိကို အခြားသူများအား မြင်တွေ့စေရန် ရည်ရွယ်သည်။

ဤအတွေးဖြင့် သူက လှောင်ပြောင်သည့်ဟန်ဖြင့် ဆိုလိုက်သည်။

"ဒီအလင်းဘုရင်က အချိန်ရွေးတတ်တာပဲ၊ အကယ်၍ သူစောစောလာခဲ့ရင် ထျန်းဝူနဲ့ တွေ့ခဲ့မှာ"

သန့်စင်သောကမ္ဘာဗောဓိသတ္တက ထိုစကားကို ပြန်လည် တုံ့ပြန်ခြင်းမရှိဘဲ စင်္ကြံဆီသို့သာ တိတ်ဆိတ်စွာ စိုက်ကြည့်နေသည်။

မကြာမီ၊ရိုးရှင်းစွာ ဝတ်ဆင်ထားသော လူငယ်တစ်ဦးက သူတို့နှစ်ဦးထံသို့တည်ငြိမ်သော ခြေလှမ်းများဖြင့် ချဉ်းကပ်လာသည်။ သူ၏မျက်နှာသွင်ပြင်မှာ ချောမောပြီးအသားအရေဖြူဖျော့သော်လည်း ရွှေဖားဗောဓိသတ္တနှင့် နှိုင်းယှဉ်ပါက သူက အနည်းငယ်တည်ငြိမ်ပြီး အေးချမ်းပုံရကာ သူ၏ရှင်းလင်းသော မျက်လုံးများတွင် ထင်ရှားသောမောက်မာမှုများကင်းမဲ့နေ၏။